ကုဒ္ဒါလပဏ္ဍိတဇာတ်

၇၀။ ကုဒ္ဒါလဇာတ် ဘုရာꩻအွ်ႏဇေတဝန်ကျောင်ꩻကိုခိင်ႏ ဆင်တီသားပို စိတ္တဟတ္ထ လွေꩻထျ်လျ်း၊ နွို့မဝ်ꩻကျောင်ꩻ၊ အံႏဗာႏရဟန်ꩻတပါꩻ သွမ်ꩻကင်တပိတ်ကို၊ သမ်းအွီႏတန်နွ်ꩻမꩻ သꩻကိုယူႏ၊ "တွိုႏခွေနွ်ꩻ မာꩻဗာႏယပ်ꩻထာꩻမာꩻ ခေ့ꩻလေနီꩻနာꩻ၊ တအံႏဗာႏအွီႏတွ်းနျ်းယို၊ ခွေခမ်ႏနျ်းတွမ်ရဟန်ꩻမꩻ"ရိုꩻတဲင် ခမ်ႏရဟန်ꩻထင်ႏလꩻတလာလွို၊ ပွိုးတမာꩻတွ်းတရာꩻ၊ ထွာဒျာႏကိလေႏသာႏ ထာꩻအမ်ႏထွန်ႏနွ်ꩻမꩻ ထန်ႏသဲင်္ချာခန္ဒျာႏလမ်း၊ ထိုမ်ႏဟို့ꩻဆာႏမီႏယပ်ꩻပ်ꩻ ခမ်ႏယင်းရဟန်ꩻ၊ မာꩻနျ်းနွ်ꩻ ဗꩻစွန်ႏသူလဲင်ႏ။ တွိုႏအလဲင်ႏဆျ်ꩻသုတ်ꩻ သွန်ခန်းအဘိဓမ္မာႏနွုတ်ꩻကျမ်ꩻထင်ႏလို့ ပွါꩻဝိပဿနာႏ တွိုႏအရဟတ္တဖလ၊ အွ်ႏသွန်ဖေႏရဟန်ꩻဖိုင်ႏ အဘိဓမ္မာႏ၊ ရဟန်ꩻကမွိုတ်ဒါႏ ဝွေꩻသားဖိုင်ႏရီ "သဲင်္ချာဒုမ်လမ်းနဲ့?"၊ စိတ္တဟတ္ထထေရဒေါ့ꩻချာ "ဟွ်သဲင်္ချာတွ်းဒုမ်မတွ်ဗွေႏ"၊ ဘုရာꩻလွန်ဟောꩻဖေႏ- အွိုးစခါ ဗာရာဏသီခမ်း ဗြဟ္မဒတ်ခုန်စိုး ဘုရာꩻလောင်ꩻသဲင်္ထွာ ဟန်ႏသိလ္လာႏစာသား၊ အမိန်ꩻကုဒ္ဒါလပဏ္ဍိတ၊ ဆို့ꩻရျ်ထီဆေ့ ဟန်ႏနုန်းတဒွီတဲင်တဲင်ပူႏစူကာ အရာꩻမျိုꩻအစော့ꩻမျိုꩻဖိုင်ႏတဲင် ပေါႏရိုꩻတဲင် ဝွေꩻဥစ္စာႏနွ်ꩻ အွ်ႏဒျာႏ အနမ်ႏပွိုအီပေနွ်ꩻတဗာႏဒုမ်ꩻ၊ တွိုႏတနီꩻ ထီႏခန်းထွာလိုꩻလမ်းအပဲတ်၊ ထွာရဟန်ꩻအကျိုꩻ အနမ်ႏနွ်ꩻ အွန်ႏလို့ꩻခါꩻဟမ်ႏကို၊ ထန်ႏတခြာ၊ ထွာရသေ့ꩻ။ သေနန်းအနမ်ႏ မဲန်အမ်ႏအွီႏထာꩻ လောဘသꩻပေါႏ၊ သဲင်္ချာလမ်း လွေꩻထူႏအနမ်ႏ၊ လိုပ်ꩻအမ်ႏယင်းထာꩻ၊ ထင်္ခါါလင်္ခါါ ထင်ႏဗွေနွုတ်ꩻလဲင်ႏ၊ "ခွေအာႏကွိုꩻ နမ်ႏထွုင်းယိုတဲင် ထင်ႏလင်ꩻထာꩻနွုတ်ꩻ(လဲင်ႏ)၊ ယိုတလဲင်ႏနွ်ꩻ လင်္ချာဒုမ် ထင်ႏတငါခန်း၊ ခွေနမ်ႏယိုတဲ့ ဖေႏခွေကထူႏချာလꩻမွုးန္ဒမ်နွ်ꩻ နျ်ႏသော့ꩻခန်းထီယော့ကိုနွ်ꩻမꩻ"ရိုꩻတဲင် ထေစွန်ႏအအာႏတွာဆင်ပ္လောင်ႏတဲင် ဝီရီးကတူႏခကီသိုမ်ပတ်ထွူမꩻ ဆိမ္မဲ့ နေးနျ်ႏလွေꩻထီကဲန်ထွူ ဟွုန်းခြဝ်စွန်ႏအငွ်း "အောင်ႏလဲန်း-အောင်ႏလဲန်း"၊ အခိင်ႏနွ်ꩻ ဗာႏရာႏဏသီႏခုန် လွေꩻမာꩻငိမ်ꩻဒိုင်ပေႏ ထာꩻခိုးလျားထွူ ပသွူႏကတူႏ ထူႏချာအခြွိုင်း ထင်ႏထိုမ်းချာဆင် ထင်ႏဟွုန်ပါꩻငွ်း "အောင်ႏလဲန်း"နွ်ꩻ "အအောင်ႏထာꩻမျ်ꩻ ဖေႏကသေဗာႏ" ထွန်ႏအလိုꩻလွေꩻဟဲ့ꩻလွန်တဲင်ရီ၊ ကုဒ္ဒါလပဏ္ဍိတဒေါ့ꩻ "ဗွေႏခုန်ကအောင်ႏဒါႏစဲ့ꩻနွ်ꩻ အောင်ႏခန်းအရျာꩻအရီင် အသောင်ꩻအသိင်ꩻတ့ ပွိုးအောင်ႏကိလေႏသာႏတမွေးတွ်းနွ်ꩻမꩻ ဟဲ့ꩻဗာႏတွ်း ထာꩻအောင်ႏအဟွ်စား၊ ခွေထာꩻအောင်ႏယိုနွ်ꩻ တီက်ꩻနွောင်ꩻလောဘ၊ အောင်ႏလꩻကိလေႏသာႏနွ်ꩻမꩻ ထွာထာꩻအောင်ႏအမျစ္စား" အွ်ႏဒေါ့ꩻတွင်ꩻ ဒေါ့ꩻပါထွားပါ အာပေါကသိဏ နေးဈာန်ႏတမ်ꩻခိုꩻ အိုင်ထာꩻခြီင်ကို ဟောꩻလင်ꩻဖေႏခုန်တရာꩻ- ၇၀။ န တံ ဇိတံ သာဓု ဇိတံ၊ ယံ ဇိတံ အဝဇီယတိ။ တံ ခေါ ဇိတံ သာဓု ဇိတံ၊ ယံ ဇိတံ နာဝဇီယတိ။ ယံဇိတံ- ထာꩻအောင်ႏယမျိုꩻနွ်ꩻ၊ အဝဇီယတိ- လိုꩻစင်ꩻတဖဲ့ꩻသား အောင်္ချာဒါႏသွူ၊ တံဇိတံ- ဝွေꩻထာꩻအောင်ႏနွ်ꩻ၊ နသာဓုဇိတံ- ထာꩻအောင်ႏမျတ္တမွေးတွ်း၊ ယံဇိတံ- ထာꩻအောင်ႏယမျိုꩻနွ်ꩻ၊ နာဝဇီယတိ- လိုꩻစင်ꩻတဖဲ့ꩻသား အောင်္ချာဒါႏတွ်ႏသွူ၊ တံခေါဇိတံ- ထာꩻအောင်ႏမျိုꩻနွ်ꩻမꩻ၊ သာဓုဇိတံ- ဟဲ့ꩻဗာႏထာꩻအောင်ႏမျတ်။ နာႏတရာꩻတွင်ꩻ တဒင်္ဂပဟာန် ဟောခမ်ꩻသꩻကို ကိလေႏသာႏထိုꩻမား၊ ရီငါ "နီဗွေႏ အီႏကျွꩻလွေꩻမျ်ꩻ"။ "ခွေအီႏလွေꩻဒျာႏ ဟိမဝန္တာႏတခြာကိုသူꩻ၊ လွေꩻထွာဒျာႏရသေ့ꩻ" ခုန္တဲ့လွေꩻလွန်ꩻ၊ ပိုတန်ပိုပေႏ သဌေꩻခမ်းသား တဆီနီယူႏဇနာႏ ဗာရာဏသီႏခမ်းသား ကားကအွ်ႏလွေꩻလွန်ꩻ ဘုရာꩻလောင်ꩻဖဲ့ꩻချာ၊ သက္ကခမ်းကီ ကမ္ဗလာႏလျား၊ ထွားလင်ꩻလိုꩻခြောင်ႏ၊ ထီႏစွန်ႏဝင်ꩻထန္တခြာ မိးင်္ငါဝိသူႏကျုင်ႏ၊ မာꩻဖေႏအကျောင်ꩻ၊ မာꩻတွောင်းဖေႏဟမ်ႏ၊ အခင်အယာႏ အဆွာꩻနွ်ꩻယူႏဇနာႏသိုမ်ဆီ၊ အဒွေါင်ႏတဆီငတ်ꩻ၊ ရသေ့ꩻရပ်ဒိုင် အိုင်ဖေႏကလꩻ၊ ခွိုင်းကပျꩻယိုနွ်ꩻ ကုဒ္ဒါလပဏ္ဍိတဇာတ် အအဲဉ္စားဒုမ်ꩻ၊ မဲန္ထီႏအလျ်း ထွားဆျ်းတိံသနိပါတကို ဟတ္ထိပါလဇာတကသူꩻ၊ အဲလ္လျ်းပေႏတန် ဗိုန်ဝင်ꩻသွူနဲး၊ ဖဉ္ဆင်ꩻပါတဖူꩻ၊ ဘီလူꩻဝါးရန်ႏ အွန္ထန်ႏထိုꩻက္လောင်း၊ ကျောင်ꩻကိုရသေ့ꩻပရိက္ခရာႏ ကုဒ္ဒါလပဏ္ဍိတ ရာဇဗာရာဏသီ အထျꩻတဲႏအွန် ကျွန္နဝ်ဟောခမ်ꩻ နွုတ်ꩻခမ်းနွုတ်ꩻခုန် ပါတွမ်ႏအလိုꩻ ဖျောတွိုႏနွ်ꩻကို ဗွေထိုစွန္ဒျာႏ ယူႏဇနာႏသိုမ်ဆီ စုမ်ႏဖြီးစုမ်ႏဖြာꩻ သမာပတ်လꩻ ဘဝထင်ႏပ္လောင်ꩻ တွိုႏစွန်ꩻဗြဟ္မာႏ ကေားသားဝိုတ်ပတ် ဘဝထင်ႏပ္လောင်ꩻ တွိုႏစွန်ႏလူꩻခမ်း၊ ရဟန်ꩻသီးဖိုင်ႏ ကိလေႏသာႏသꩻ အီႏနွောင်ꩻလꩻဗာႏ ချ်ႏငါႏကျကျ၊ ဘုရာꩻလောင်ꩻမီႏတဲ့ မဲ့အွ်ႏကွင်ဒျာႏ။ ကွပ်ဒျာႏလောဘ သမုဒယသွူ တမျိုꩻထွူတမျိုꩻ ကျမ်ႏချိုꩻကိမ်ꩻချာ တထွူဒါႏတွ်း၊ သေတွ်းတဖူꩻ လီးလူꩻကွင်ယောင်ႏ၊ ထန္ထိုꩻခန္ဒျာႏအခြာနွ်ꩻမꩻ တွိုႏလꩻနိရော တရာꩻတောႏထင်ႏထွူ ရဟန်ꩻဖိုင်ႏတွိုႏလꩻ တမဂ်တနီမဂ်သိုမ်မဂ်လိတ်ꩻမဂ်။ ဗာရာဏသီခုန် သဲင်္ထွာအာနန္ဒထေရ၊ ကုဒ္ဒါလပဏ္ဍိ ပရိသတ်ဖိုင်ႏနွ်ꩻ သဲင်္ထွာယင်းခွေ ပရိသတ်ဖိုင်ႏသွူ၊ နံပါတ်(၇၀) ကုဒ္ဒါလဇာတ်ထွူယို။