ခန္ဓာႏဒုက္ခကဲꩻကထဲ့ခြောက်ꩻ

"ပပါတသုတ် (ထဲ့သော့ꩻခြောက်ꩻတန်၊ ခန္ဓာႏဒုက္ခနဝ်ꩻ-ကယ်ꩻက ထဲ့သော့ꩻခြောက်ꩻတန်)"

အွိုးခꩻတနီꩻ သွုံꩻသွမ်ꩻယာထွူ ဗွေႏဘုရာꩻတွမ်ႏသံဃာႏ လွေꩻအုံသာႏယာႏထာꩻ "ပဋိဘာနကောင်နာ"တဲင် အဝ်ႏကောင်နာ ထွားလလင်ꩻခြောက်ꩻနဝ်ꩻ ယော့မွေးစွဉ်ႏထာꩻ၊ ရဟန်ꩻတပါꩻ ရီနီဗွေႏဘုရာꩻ။ "ဩဗွေႏ- ဘုရာꩻမျတ်ဗွေႏဩ- ခြောက်ꩻသူꩻနဝ်ꩻ တန်မွေးစွဉ်ႏထာꩻ၊ ယော့မွေးစွဉ်ႏထာꩻ၊ ငမ်းခရာႏဟောဝ်မွေးစွဉ်ႏထာꩻ၊ တန်လဲဉ်းခြောက်ꩻ၊ ယော့လဲဉ်းခြောက်ꩻ၊ ငမ်းခရာႏကယ်ꩻခြောက်ꩻယို အလောင်ႏအလင်နဝ်ꩻ အဝ်ႏနေဟောင်း ဗွေႏဩ" "တန်လဲဉ်းခြောက်ꩻယို၊ ယော့လဲဉ်းခြောက်ꩻယို၊ ငမ်းခရာႏကယ်ꩻခြောက်ꩻယို အလောင်ႏအလင်တဲ့အဝ်ႏ" "ငမ်းခရာႏကယ်ꩻခြောက်ꩻယို-ကရိုꩻနဝ်ꩻ ထမုဲင်ꩻဖုံႏအီ ဗွေႏဩ" "ရဟန်ꩻသီးဖုံႏဟွေး- ခန္ဓာႏယိုနဝ်ꩻ 'ဒုက္ခသစ္စာႏ-ဒုက္ခအမွေးအမဲဉ်ႏ'၊ ကမာꩻဒုက္ခခန္ဓာႏနဝ်ꩻ လောႏဘꩻတဏှာႏ 'သမုဒယသစ္စာႏ-ထွာအီထာꩻဒုက္ခ အမွေးအမဲဉ်ႏ'၊ နိဗ္ဗာန်ႏနဝ်ꩻ ခန္ဓာႏဒုက္ခငိမ်ꩻဖေ့ထိုꩻ 'နိရောဓသစ္စာႏ-ဒုက္ခဖေ့ထိုꩻ အမွေးအမဲဉ်ႏ'၊ မဂ္ဂင်ႏသွစ်ꩻပါꩻနဝ်ꩻ တွိုႏအီနိဗ္ဗာန်ႏ 'မဂ္ဂသစ္စာႏ-မာꩻဖေ့ထိုꩻအီ ဒုက္ခအမွေးအမဲဉ်ႏ'၊ ပေါႏသသေတဝ်း အမွေးအမဲဉ်ႏ၊ ပေါႏတလꩻတဝ်း သစ္စာႏလစ်ꩻပါꩻနဝ်ꩻ တလꩻတဝ်းမဂ်၊ တလꩻတဝ်းဖိုလ်ႏ၊ 'အဝိဇ္ဇာႏ-ထာꩻသေတဝ်း၊ တဏှာႏ-ထာꩻမဉ်လꩻ'ဝွဋ်ရွီးယိုနီလီး အဝ်ႏမွန်ဗန်နေက။ ကွပ်နဝ်ꩻမꩻ မာꩻကုသိုလ်ႏယင်၊ မာꩻအကုသိုလ်ႏယင်၊ မာꩻကုသိုလ်ႏတဲင် ထွာလိုꩻထွာလူꩻ၊ မာꩻအကုသိုလ်ႏတွော့ꩻ ထွာတိရစ္ဆာန်ႏ၊ ထွာပိတ္တာႏ၊ ထဲ့ငါးရုဲင်ꩻ၊ ထွာသွူလိုꩻတဲ့ သေတဝ်း ထာꩻဖြားဒုက္ခ၊ သေတဝ်း ထာꩻသဆာဒုက္ခ၊ သေတဝ်း ထာꩻသီဒုက္ခ၊ သေတဝ်းခန္ဓာႏဒုက္ခ။ အဝ်ႏထီႏသွူလိုꩻဖြားတဲ့ အီႏဖြားဗာႏထာꩻနဝ်ꩻ သေယူႏတဝ်း၊ အဝ်ႏထီႏသွူလိုꩻဆာတဲ့ အီႏဆာဗာႏထာꩻနဝ်ꩻ သေငမ်းတဝ်း၊ အဝ်ႏထီႏသွူလိုꩻသီတဲ့ အီႏသီဗာႏထာꩻနဝ်ꩻ သေသꩻဝꩻတဝ်း၊ ဖြားဗာႏသွူထာꩻတဲ့ ငမ်းတဝ်း၊ ဆာဗာႏသွူထာꩻတဲ့ ပြန်းတဝ်း၊ အီႏသီဗာႏထာꩻတဲ့ သꩻဝꩻတဝ်း။ မွိုးဖါသီငွိုး၊ ပိုသီငွိုး၊ လီꩻသီငွိုး၊ ဝါꩻသီငွိုး၊ မာသီငွိုး၊ ဒုက္ခငွိုး၊ ဝင်ꩻနိစ္စက်ငွိုး၊ မော့ꩻထာꩻဆာငွိုး၊ ကငွိုးဗာႏသွူထာꩻ ကားမုဲင်ꩻလဲင်ႏလဲင်ႏတဲ့ သံႏဝွေႏဂတလꩻတဝ်း၊ ဖေႏကလꩻမဂ်ဖိုလ်ႏ နိဗ္ဗာန်ႏနဝ်ꩻ တကျံႏတဝ်း၊ တမာꩻတဝ်း၊ ပျောႏလွဉ်ꩻဒျာႏပိုမာ၊ ပျောႏလွဉ်ꩻဒျာႏ လောကီꩻအာႏရွုံႏ၊ ထာꩻဖြားခြောက်ꩻ၊ ထာꩻဆာခြောက်ꩻ၊ ထာꩻသီခြောက်ꩻ၊ ထာꩻငွိုးခြောက်ꩻ၊ အာႏရွုံႏခြောက်ꩻ၊ ခန္ဓာႏခြောက်ꩻဖုံႏနဝ်ꩻ တန်လဲဉ်းကခြောက်ꩻယို၊ ယော့လဲဉ်းကခြောက်ꩻယို၊ ငမ်းခရာႏ ဟောဝ်လဲဉ်းကခြောက်ꩻယို"အကျောင်ꩻ ဗွေႏဘုရာꩻဟော်ꩻနယ်နုဲင်းနောဝ်ꩻသွူ။ (သုတ္တန်ႏပိဋကတ်၊ မဟာဝဂ္ဂသံယုတ်ပါဠိ၊ ပပါတသုတ်)