ခမ်းထီတောမ်ႏလိုꩻမျိုꩻ
"ခမ်းထီတောမ်ႏလိုꩻမျိုꩻ ဖေႏကထင်ႏထိုနဝ်ꩻ ခမ်းသားတဖြာꩻစီႏ အထီအသွီႏယို အရေꩻတန်မွေး" ခမ်းထီတဖြိုင်ႏတဲ့နဝ်ꩻ၊ လိုꩻမျိုꩻတမျိုꩻတဲ့နဝ်ꩻ လိုꩻအိုင်အဝ်ႏမု အဆင်ႏအရန်း ဖေႏကထင်ႏထိုနဝ်ꩻ ခမ်းထီကိုကအဝ်ႏဒါႏ ခမ်းသားထီသား တဖြာꩻစီႏအထီအသွီႏယို ထွာအထျꩻသွူ၊ ခမ်းထီကို ခမ်းသားသီးယို ခမ်းသားသီးအချင်ꩻချင်ꩻအလောင်းတဲ့နဝ်ꩻ၊ အိုပ်ချုပ်ရေꩻ အစိုႏရသီးတောမ်ႏ ခမ်းသားသီးအချင်ꩻချင်ꩻအခါႏတဲ့နဝ်ꩻ၊ လွောက်ꩻနာႏဥပဒေႏတွဗာ့ꩻ တဖြာꩻတောမ်ႏတဖြာꩻ ရိုႏသေႏအမ်ႏသွင်ꩻလွဝင်ꩻ၊ သေနာႏလိုꩻကျင်ꩻတရာꩻ၊ သေနာႏလိုꩻအခွင်ꩻအရေꩻ၊ သေနာႏလိုꩻဂုဏ်ႏသိက္ခာႏတွော့ꩻ တဖြာꩻတောမ်ႏတဖြာꩻ ရိုႏသေႏအမ်ႏသွင်ꩻလွဝင်ꩻ-စစွဉ်ႏ အခေႏခံႏထာꩻသေတရာꩻ၊ ထာꩻဆင်ႏချင်ႏတရာꩻနမ်းလောင်းယိုဖိုင်ႏနဝ်ꩻ အထျꩻအဝ်ႏဒျာႏ ခမ်းသားတဖြာꩻစီႏအလောင်းနဝ်ꩻသွူ။ အွဉ်ငါခမ်းထီသား အစိုႏရသီးတဲ့နဝ်ꩻ၊ လိုꩻမျိုꩻတမျိုꩻအွဉ်ငါသီးတဲ့နဝ်ꩻ ခမ်းထီဖေႏကထင်ႏထို၊ ခမ်းထီကို တရာꩻဥပဒေႏဒို့ꩻတခြို့ရေꩻ ဖေႏကအဝ်ႏယို အွဉ်ငါမာꩻလွေꩻခန်းနုဲင်းမုဲင်ꩻတယဝ်း ခမ်းသားသီး မိဉ်းတပါလွဉ်ꩻတဝ်း၊ ခမ်းသားသီး တဖြာꩻစီႏ မိဉ်းတမာꩻလွဉ်ꩻတဝ်းနဝ်ꩻ အီႏထွာလွဉ်ဗာႏ တယိုꩻတဝ်းသွူ။ အစိုႏရနဝ်ꩻ အွဉ်ငါလွေꩻလဲဉ်းသွူ ခမ်းထီကို လိုꩻအိုင်အဝ်ႏမု အဆင်ႏအရန်းဖေႏကထို ရိုꩻနုဲင်းနဝ်ꩻလဲ့ ကထွာခမ်းသားတဖြာꩻစီႏယို လိုꩻမုအသောင်အရင်ꩻကိုကထွာဒါႏ နုဲင်းတငါတအီႏတစျꩻဖိုင်ႏ၊ လာꩻတဗော့ꩻငီႏငါပြူးထီဖိုင်ႏ၊ ဝါးကာꩻသင်ကယ်နဝ်ꩻ မာꩻလꩻတဝ်းနုဲင်းမုဲင်ꩻ ဥပဒေႏကို အဝ်ႏပျဌာန်းခါꩻဒျာႏ လွောက်ꩻနာႏတဝ်းဖိုင်ႏ၊ ထာꩻဥပဒေႏတကင်ꩻတဝ်းယို ဥပဒေႏအဝ်ႏပျဌာန်းခါꩻဒျာႏလဲ့ အဝ်ႏဖြေꩻစာ၊ အဝ်ႏအမ်ႏအွꩻဖိုင်ႏ-စတဲင်ယိုဖိုင်း မိဉ်းအဝ်ႏမာꩻ၊ မိဉ်းတလွောက်ꩻနာႏတဝ်းနဝ်ꩻ ခမ်းထီအီႏပြောင်ꩻလုဲင်ႏ ထင်ႏထိုဗာႏ တယိုꩻတဝ်းသွ၊ လိုꩻမျိုꩻကို မိဉ်းအဝ်ႏထွာဒျာႏလဲ့ လိုꩻမျိုꩻအီႏထင်ႏထိုဗာႏနဝ်ꩻ ယပ်ꩻနဝ်ꩻသွူ။ အာဆီယံ တဆီနဲင်ႏငံႏကို စင်ကာပူခမ်းနဝ်ꩻ ထွာအထင်ႏထိုလဲဉ်းဝင်ꩻ၊ ထွာစီꩻပွါꩻရေꩻဟဝ်ခမ်း၊ လိုꩻအိုင်အဝ်ႏအဆင်ႏအရန်းထိုခမ်း၊ ထွာခမ်းသားရွဉ်နွို့ဟဝ်တဲင် ခမ်းထီခြွေခမ်းကရိုꩻနဝ်ꩻ အဝ်ႏသေထွူဒျာႏနဝ်ꩻသွူ။ စင်ကာပူခမ်းနဝ်ꩻ သဲင်၊ ခံꩻ၊ လိုင်းသောမ်ႏ(ကျောက်စိမ်း)၊ လိုင်းမေႏသွာႏ-စစွဉ်ႏလိုင်းရတနာႏဖိုင်ႏ တထန်ႏတဝ်း နုဲင်းမြန်မာခမ်းထီနဝ်ꩻသွူ၊ စင်ကာပူခမ်းနဝ်ꩻ မုဲင်းသက်ꩻ(ကျွန်းသစ်)၊ မုဲင်းသေား(ပျဉ်းကဒိုး)စစွဉ်ႏသေင်ႏငိုꩻတန်ႏ တထန်ႏတဝ်း နုဲင်းမြန်မာခမ်းထီနဝ်ꩻသွူ၊ စင်ကာပူခမ်းနဝ်ꩻ လိုꩻသီးအွꩻတာႏ၊ လိုꩻသီးသုင်ꩻတာႏ ထီပေႏငါ တထန်ႏတဝ်း နုဲင်းမြန်မာခမ်းထီနဝ်ꩻသွူ။ စင်ကာပူခမ်းထီ ရွဉ်နွို့တာႏ စာအံႏခရာႏ သေင်ႏအဲဉ်ထဝ်း၊ လိုင်းတန်ႏဖိုꩻ အငိုꩻတန်အဲဉ်ထဝ်းလဲ့ ဟန်ႏသနီꩻ စင်ကာပူခမ်းထီနဝ်ꩻ ခြွေလွိုလဲဉ်း၊ ထင်ႏထိုလွိုလဲဉ်း စာအံႏခရာႏသေင်ႏအဝ်ႏ၊ အငိုꩻတန်ႏလိုင်းအမျိုꩻမျိုꩻအဝ်ႏ မြန်မာခမ်းထီနဝ်ꩻသွူ။ စင်ကာပူခမ်းထီနဝ်ꩻ စာအံႏခရာႏ တမုဲင်ꩻမုဲင်ꩻတအဝ်ႏတဝ်းလဲ့ အဝ်ႏထွာဒျာႏခမ်းထီခြွေ၊ အဝ်ႏထွာဒျာႏ ပြွူႏဖြိုထင်ႏထိုခမ်းထီနဝ်ꩻသွူ၊ စင်ကာပူနဝ်ꩻ စာအံႏခရာႏ တအဝ်ႏတဝ်းသွူတကာႏတဝ်း ခမ်းထီသုင်ꩻအွꩻတာႏ ထီနဝ်ꩻ ဖြေꩻထူႏဗာႏနေးဒျာႏ မလေးသျားခမ်းထီထျꩻနဝ်ꩻသွူ၊ မြန်မာခမ်းထီနဝ်ꩻ စာအံႏခရာႏ သေင်ႏရတနာႏ၊ လိုင်ႏရတနာႏကအဝ်ႏအာလဲ့ အဝ်ႏထွာဗာႏ ခမ်းထီကေန်ꩻ၊ အဝ်ႏထွာဒျာႏဒျာႏ ပြွူႏဖြိုထင်ႏထိုမု တအဝ်ႏတဝ်း ခမ်းထီနဝ်ꩻသွူ။ စင်ကာပူခမ်းထီ ကထင်ႏထို ကခြွေလွိုဗာႏနုဲင်းယိုနဝ်ꩻ အာႏကွိုꩻတဝ်းအလောင်ႏအလင်၊ အာႏကွိုꩻဒျာႏ ခမ်းသားသီး တဖြာꩻစီႏအစွန်ꩻနဝ်ꩻသွူ၊ စင်ကာပူခမ်းထီ ဖေႏကထင်ႏထိုနဝ်ꩻ စင်ကာပူခမ်းသား ထာꩻသေထာꩻဒါႏ ပညာႏအစွန်ꩻယံဖိုင်ႏယို အဝ်ႏတွော့ꩻသွူ၊ စင်ကာပူ ခမ်းသားသီးတဖြာꩻစီႏယို အထီအသွီႏ ထာꩻဒါႏပညာႏ၊ လွောက်ꩻနာႏကျင်ꩻသုင်ꩻ ဥပဒေႏစီꩻကန်ꩻစနစ်ဖိုင်ႏ ဟဝ်နဝ်ꩻသွူ။ စင်ကာပူခမ်းသားတဖြာꩻစီႏ အထီအသွီႏ ဖေႏကယံနဝ်ꩻ စင်ကာပူခမ်းထီကကျင်ꩻသုင်ꩻဒါႏ ပညာႏရေꩻစနစ်ယို ယံနဝ်ꩻသွူ၊ နဝ်ꩻမꩻ "မြန်မာခမ်းထီ ဖေႏကတိုꩻတက်ထင်ႏထိုနဝ်ꩻ အာႏကွိုꩻဗာႏဒျာႏ မြန်မာခမ်းသားသီး အထီအသွီႏ"ဒေါ်အောင်ဆန်းစုကြည်လဲ့ အဝ်ႏဒေါ့ꩻရိုꩻဖိုနုဲင်းနဝ်ꩻသွူ။ ခမ်းထီကခြွေအိုင်နောင်တောမ်ႏ သဘာဝသယံဇာတနဝ်ꩻ တတဉ်ႏခွေါင်ညဆွာꩻနွောင်ꩻတဝ်းသွူ၊ အာႏကွိုꩻတဝ်းခမ်းသားသီး ထာꩻဒါႏ၊ အာႏကွိုꩻဒျာႏ ခမ်းကိုသယံဇာတတွော့ꩻ ကအဝ်ႏခြွေဒါႏခမ်းထီယို ခမ်းကို သယံဇာတမိဉ်ႏလို့တနီꩻခါနဝ်ꩻ ခမ်းထီကိုကအဝ်ႏဒါႏ ခမ်းသားသီး တွိုႏဗာႏဒါႏထာꩻဒုက္ခနဝ်ꩻသွူ။ ခမ်းထီကခြွေ၊ ကထင်ႏထိုတိုꩻတက်ဒါႏ တောမ်ႏခမ်းထီကို ခမ်းသားသီး တဖြာꩻစီႏအထီအသွီႏနဝ်ꩻ ခမ်းထီတဲ့ ထင်ႏထိုတဉ်ႏခွေါင်ညဆွာꩻနွောင်ꩻနဝ်ꩻသွူ၊ ကောပ်စွဉ်ႏ ခမ်းသားသီး ထာꩻဒါႏပညာႏယို အဝ်ႏနမ်းလောင်းတဲင် ခမ်းသားတဲ့ အိုင်ထွိုင်ႏချာနွောင်ꩻ၊ ခမ်းထီတဲ့ အိုင်ထွိုင်ႏချာနွောင်ꩻနဝ်ꩻမꩻ ခမ်းထီတဲ့ မော့ꩻဗာႏတဝ်းဒုက္ခ၊ ခမ်းသားသီးတဲ့ မော့ꩻဗာႏတဝ်းထာꩻဒုက္ခနဝ်ꩻသွူ။ ပအိုဝ်ႏလိုꩻမျိုꩻသီးယိုလဲ့ ပအိုဝ်ႏလိုꩻမျိုꩻ ဖေႏကထင်ႏထို ပြွူႏဖြိုနဝ်ꩻ ယံလုမ်ꩻနဲင်ႏငံႏရေꩻပါတီသားတဲ့ တလꩻတဝ်း၊ အဝ်ႏခန်းပအိုဝ်ႏနမ်းပဲင်ႏအိုပ်ချုပ်ခွင်ꩻတဲ့ တလꩻတဝ်း၊ ယံလုမ်ꩻစဲ့ꩻပအိုဝ်ႏ လယ်ႏအံႏနွဗာင်ꩻထာꩻတွော့ꩻ ရိုꩻမာꩻပအိုဝ်ႏလိုꩻမျိုꩻ ဖေႏကထင်ႏထိုရေꩻနုဲင်းနဝ်ꩻလဲ့ တထွာနွောင်ꩻတဝ်းသွူ၊ မာꩻပအိုဝ်ႏနဲင်ႏငံႏရေꩻသား၊ ပအိုဝ်ႏနဲင်ႏငံႏရေꩻပါတီသားဖိုင်ႏ၊ မာꩻပအိုဝ်ႏလိုꩻမျိုꩻ ဖေႏကထင်ႏထိုရေꩻ-ဒေါ့ꩻရိုꩻနုဲင်းနဝ်ꩻတွော့ꩻ လယ်ႏဟုတ်ꩻငါႏမွုန်းထာꩻ၊ ဟုတ်ꩻသင်ႏတန်ႏတန်ႏငါသွူ။ မိဉ်းမဉ်မာꩻမွေး ပအိုဝ်ႏလိုꩻမျိုꩻထင်ႏထိုရေꩻနဝ်ꩻ အဝ်ႏလိုႏမာꩻယံဖျင်ဆင်ရီးဒျာႏ ပအိုဝ်ႏခမ်းသားတဖြာꩻစီႏ အထီအသွီႏထင်ႏထိုရေꩻတာႏ ပညာႏရေꩻ၊ သေသတင်ꩻတောမ်ႏ နယ်ꩻပညာႏခွင်ꩻအဝ်ႏသွူ။[၁][၂]