ခမ်းထီရေꩻတောမ်ႏ

"ခမ်းထီရေꩻတောမ်ႏ ဘာႏသာႏရေꩻ သျုတ်ရောꩻဗာႏတဝ်းဝင်ꩻ ကရိုꩻနဝ်ꩻ" ခမ်းခြွဉ်းဗူႏ မြန်မာခမ်းထီယိုနဝ်ꩻ ခမ်းရင်ꩻသားလိုꩻမျိုꩻပေါင်ꩻစွုမ်ႏ ဖြွမ်းဗူႏအုံရိုမ်းအဝ်ႏရောဝ်းညီꩻဝင်ꩻ ခမ်းတခမ်းနဝ်ꩻသွူ၊ ခမ်းရင်ꩻသား လိုꩻမျိုꩻပေါင်ꩻစွုမ်ႏကိုယို လိုꩻမျိုꩻပေါင်ꩻတဲ့အာ၊ ဘာႏသာႏငေါဝ်းငွါပေါင်ꩻတဲ့ စွုမ်ႏ၊ တောမ်ႏထာꩻကိုꩻကွယ်ႏယွုမ်းအံႏတဲ့စွုမ်ႏအာ အဝ်ႏနဝ်ꩻသွူ၊ ကောပ်နဝ်ꩻမꩻ ခမ်းခြွဉ်းဗူႏမြန်မာခမ်းထီယို မိဉ်ႏအီႏလွေꩻငါ အနာႏဂတ်ကိုယို ဖေႏကထွာဒျာႏ ဖြွမ်းဖြွမ်းဗူႏဗူႏ၊ ရောင်းရောင်းရျူးရျူႏ အုံရိုမ်းညီꩻဝင်ꩻ ဖေႏကတဲ့ꩻခေါဝ်းနဝ်ꩻ အီႏတယ်ႏဆို့ꩻ အွဉ်ႏထွာလွေꩻခမ်းထီနုဲင်းမုဲင်ꩻစားဟောင်း။ ခမ်းခြွဉ်းဗူႏ မြန်မာခမ်းထီယို တယ်ႏစွဉ်ႏကလꩻလွဉ် လွစ်ထန်ႏ(လွတ်လပ်)ရေꩻ ဗꩻတွိုႏလွဉ်ႏဟန်ႏသနီꩻ ခမ်းထီကိုနဝ်ꩻ စဲ့ꩻပွယ်ꩻတဆွိုးတဝ်းနဝ်ꩻသွူ၊ နဝ်ꩻမꩻ အီႏလွေꩻငါ အနာႏဂတ်ကို ခမ်းထီဖေႏကညိမ်ꩻချမ်ꩻနဝ်ꩻ ကထွာဒါႏခမ်းကို ခမ်းရင်ꩻသားလိုꩻမျိုꩻစွုမ်ႏ၊ အစွိုꩻစွုမ်ႏကပါဒါႏ ခမ်းခြွဉ်းဗူႏညီႏလာႏခံႏကိုယို အုံကိုမ်လွေꩻဝင်ꩻ အနာႏဂတ်ခမ်းထီရေꩻနဝ်ꩻသွူ၊ အဝ်ႏနဝ်ꩻတရန်းတဲင် သဲင်ꩻမာꩻချာယင်း ဆဲင်ႏရာꩻလိုꩻမျိုꩻအလွောက်ꩻ ခမ်းထီရေꩻအုံကိုမ်ပွယ်ꩻဖုံႏနဝ်ꩻသွူ။ ပအိုဝ်ႏလိုꩻမျိုꩻအလွောက်ꩻ ခမ်းထီရေꩻအုံကိုမ်ပွယ်ꩻထွိုင်ႏထွူ အဝ်ႏအုံကိုမ်ပွယ်ꩻကို ကလꩻထန်ႏလွဉ်ဒါႏ အချက်ဖုံႏကိုနဝ်ꩻ "ခမ်းထီနဝ်ꩻ ထွာဗာႏ အခေႏခံႏဗာႏတဝ်း တောမ်ႏဘာႏသာႏရေꩻ"အချက်နုဲင်းနဝ်ꩻပါနဝ်ꩻသွူ၊ ပွိုင်းဝွို့တောမ်ႏအချက်နဝ်ꩻတဲင် ပအိုဝ်ႏကို ယင်ဟန်ႏသားနဝ်ꩻ တဟွုန်ဗာႏဖိုတဝ်းတဲင် ထွိုင်ႏဟွုန်စွော့ꩻတွော့ꩻ ဟွုန်ထူꩻဆန်ꩻ၊ ဟွုန်ကျွိုက်တဝ်း ထွာလွဉ်ထိုꩻလွဗာႏနုဲင်းနဝ်ꩻသွူ။ ငေါဝ်းယိုနဝ်ꩻ မြန်မာခမ်းထီကို ကထွာဒါႏ ခမ်းရင်ꩻသားလိုꩻမျိုꩻစွုမ်ႏသီးအတာႏ ထွာတရျားခမ်းထီ၊ အခါႏခမ်းထီမျိုꩻနဝ်ꩻသွူ၊ တခေင်ႏတဝ်းပဉ်ဖဲ့ꩻနဝ်ꩻသွူ၊ မြန်မာခမ်းထီကိုယို ချင်ꩻ၊ ခင်၊ စောက်ꩻဗွာ၊ လားဟူ၊ ကယန်း၊ လီဆူး-စတဲင်ခမ်းရင်ꩻသား လိုꩻမျိုꩻဖုံႏနဝ်ꩻ ထွာယွုမ်းအံႏကိုႏကွယ်ႏ ခရစ်ယာန်ႏဘာႏသာႏ ခမ်းရင်ꩻသားနဝ်ꩻသွူ၊ နုဲင်းယင်း မဲင်ꩻ၊ ရခဲင်ႏ၊ ဖြဝ်ꩻ၊ ပအိုဝ်ႏ၊ စောက်ꩻတနျာႏ၊ မန်း-စတဲင်ခမ်းရင်ꩻသားလိုꩻမျိုꩻဖုံႏနဝ်ꩻ ယွုမ်းအံႏကိုႏကွယ်ႏ ဗုဒ္ဓဘာႏသာႏခမ်းရင်ꩻသားလိုꩻမျိုꩻနဝ်ꩻသွူ။ မိဉ်ႏနုဲင်းဒျာႏ ခမ်းထီကိုယို အဝ်ႏလိုꩻမျိုꩻတမျိုꩻလုမ်ꩻနဝ်ꩻ ဘာႏသာႏငေါဝ်းငွါတဗာႏယို အွဉ်ႏထွာခမ်းထီတဖြုံႏလုမ်းမွိုးဖါ ဘာႏသာႏငေါဝ်းငွါတွော့ꩻ သုံꩻနုန်ꩻတဲမ်းဒေါ့ꩻအီထွူ ကိုႏကွယ်ႏယွုမ်းအံႏမု အဝ်ႏတစွိုးလုမ်ꩻ ခမ်းထီနဝ်ꩻ အွဉ်ႏထွာအမျိုꩻသာꩻခမ်းထီ အီႏလꩻနဝ်ꩻသွူ၊ နဝ်ꩻမꩻ လိုꩻမျိုꩻတမျိုꩻ၊ ဘာႏသာႏငေါဝ်းငွါတစွိုး၊ ထာꩻယွုမ်းအံႏ သာႏသနာႏတပါꩻ ကအဝ်ႏဒါႏ ခမ်းထီနဝ်ꩻ "စွိုးခွိုꩻ၊ ဘာႏသာႏ၊ သာႏသနာႏ"အမျိုꩻသာꩻဝါႏဒ အခေႏခံႏအွဉ်ႏအထျꩻ၊ အွဉ်ႏထွာ အမျိုꩻသာꩻခမ်းထီ လꩻနဝ်ꩻသွူ၊ ထွာခမ်းထီရေꩻတောမ်ႏ ဘာႏသာႏရေꩻရော်ꩻဝင်ꩻ ခမ်းထီနဝ်ꩻသွူ။ ခမ်းခြွဉ်းဗူႏ မြန်မာခမ်းထီယို ထွို့ꩻဗူႏတယ်ႏထောင်ႏခါꩻဒျာႏ တောမ်ႏယေန်ႏငဲမု၊ ဘာႏသာႏငေါဝ်းငွါတောမ်ႏ ထာꩻကိုꩻကွယ်ႏယွုမ်းအံႏမုဖုံႏ တဗွိုန်ပီလတဝ်း ခမ်းရင်ꩻသားလိုꩻမျိုꩻစွုမ်ႏနဝ်ꩻသွူ၊ နဝ်ꩻမꩻ အနာႏဂတ်ကို ခမ်းထီညိမ်ꩻချံꩻနွောင်ꩻအီ၊ လိုꩻမျိုꩻစွုမ်ႏ၊ ဘာႏသာႏသာႏငေါဝ်းငွါစွုမ်ႏ၊ ထာꩻယွုမ်းအံႏကိုႏကွယ်ႏမုစွုမ်ႏယို ဖြွမ်းဖြွမ်းဗူႏဗူႏ ရောင်းရောင်းရျူႏရျူႏ အုံရိုမ်းအဝ်ႏရော်ꩻညီ ဖေႏကလꩻနဝ်ꩻ မြန်မာခမ်းထီရေꩻယို တောမ်ႏဘာႏသာႏရေꩻ ရော်ꩻတဝ်းနုဲင်းနဝ်ꩻသွူ။ ခမ်းထီရေꩻယို အခေႏခံႏတဝ်း တောမ်ႏဘာႏသာႏရေꩻ ရိုꩻနုဲင်းနဝ်ꩻတဲင် ဘာႏသာႏနုဲင်းမုဲင်ꩻနဝ်ꩻ ကုဲင်ထိုꩻဗာႏ၊ ယားထိုꩻဗာႏ၊ ကိုႏကွယ်ႏယွုမ်းအံႏဗာႏတဝ်းဒွုမ်နုဲင်းနဝ်ꩻ တမွေးတဝ်းသွူ၊ ဘာႏသာႏယို ဒို့ꩻအိုပ်တွော့ꩻ ဘာႏသာႏနဝ်ꩻ ထိုꩻမားထိုꩻဗာႏစွဉ်ႏ၊ ဘာႏသာႏနဝ်ꩻ ဒို့ꩻအိုပ်တွော့ꩻ ဘာႏသာႏယို အွဉ်ႏဗာႏတဝ်းဒွုမ်-စတဲင်နုဲင်းနဝ်ꩻစားဖုံႏ တအဝ်ႏတဝ်းသွူ၊ ယိုနဝ်ꩻ ဖေႏခါꩻဒျာႏ လိုꩻတွိုင်ꩻယို တယ်ႏကလွူးကာႏ ပါလွဉ်ထွူအခွင်ꩻအရေꩻ၊ လိုꩻတဖြာꩻယို ဝွေꩻယွုမ်းအံႏရာꩻဘာႏသာႏ လွစ်လွစ်တခြင်ခြင် ဝွေꩻယွုမ်းအံႏကိုႏကွယ်ႏခွင်ꩻဖုံႏနဝ်ꩻသွူ။ ဘာႏသာႏရေꩻတောမ်ႏ ခမ်းထီရေꩻရော်ꩻဝင်ꩻ တအဝ်ႏတဝ်းခမ်းထီ ထွာနုဲင်းနဝ်ꩻဒျာႏသွူ၊ သုံꩻတောမ်ႏဘာႏသာႏရေꩻတွော့ꩻ မာꩻခမ်းထီရေꩻ ဖေႏကထွာဗာႏမွုန်းနဝ်ꩻသွူ။ ဘာႏသာႏရေꩻတောမ်ႏ ခမ်းထီရေꩻရော်ꩻဝင်ꩻ တအဝ်ႏတဝ်းခမ်းထီကရိုꩻယို ခမ်းထီကို ခမ်းသားသီးကယွုမ်းအံႏကိုႏကွယ်ႏဒါႏ ယွုမ်းအံႏရာꩻ ဘာႏသာႏအလွောက်ꩻအလောင်းနဝ်ꩻ ယွုမ်းအံႏလꩻတဝ်း၊ ကိုႏကွယ်ႏလꩻတဝ်း ရဲပေ့ꩻခါꩻ ယွုမ်းအံႏကိုႏကွယ်ႏမု တမွေးတဝ်းသွူ၊ ယိုနဝ်ꩻ ထွာဒျာႏဖေႏထဲင်း ခမ်းကိုကအဝ်ႏ ခမ်းသားသီး လွစ်လွစ်တခြင်ခြင် ယွုမ်းအံႏကိုႏကွယ်ႏခွင်ꩻနဝ်ꩻသွူ။ သဘောသဘာဝနဝ်ꩻ ယိုခါ မြန်မာခမ်းထီကို ကအဝ်ႏနေဒါႏ ယွုမ်းအံႏကိုႏကွယ်ႏခွင်ꩻအတွိုင်ꩻနဝ်ꩻသွူ၊ လိုꩻကယွုမ်းအံႏကိုႏကွယ်ႏဒါႏ ဗုဒ္ဓဘာႏသာႏသားလဲ့ လွစ်လွစ်တခြင်ခြင် ယွုမ်းအံႏကိုႏကွယ်ႏခွင်ꩻအဝ်ႏဒျာႏအတွိုင်ꩻ ကထွာလိုꩻကယွုမ်းအံႏကိုႏကွယ်ႏဒါႏ ခရစ်ယာန်ႏဘာႏသာႏသားလဲ့ လွစ်လွစ်တခြင်ခြင် ယွုမ်းအံႏကိုႏကွယ်ႏခွင်ꩻအဝ်ႏဒျာႏနဝ်ꩻသွူ၊ ဗွိုန်နုဲင်းနဝ်ꩻနေနေ ကထွာဘာႏသာႏလောင်ႏလင်ဖုံႏလဲ့ လွစ်လွစ်တခြင်ခြင် ယွုမ်းအံႏကိုႏကွယ်ႏခွင်ꩻဖေႏလို့လို့ဒျာႏနဝ်ꩻသွူ။ ယိုခါခါ မြန်မာခမ်းကအဝ်ႏထွာနေဒါႏ ခမ်းထီကို လိုꩻတမျိုꩻတောမ်ႏတမျိုꩻတဲ့နဝ်ꩻ၊ ဘာႏသာႏတမျိုꩻတောမ်ႏတမျိုꩻတဲ့နဝ်ꩻ ယိုခါခါ ကအုံရိုမ်းအဝ်ႏရောဝ်းညီꩻဝင်ꩻယိုတွော့ꩻ ဖေႏလွဝင်ꩻအုံညီꩻခွင်ꩻ၊ ဖေႏလွဝင်ꩻ ယွုမ်းအံႏခွင်ꩻယိုဖုံႏနဝ်ꩻ အထွာထွူလဲဉ်းဒျာႏရင်ꩻ ခမ်းထီရေꩻတောမ်ႏ ဘာႏသာႏရေꩻ ရော်ꩻတဝ်းဝင်ꩻပုံႏစံႏနဝ်ꩻသွူ၊ အစနစ်နဝ်ꩻ ယိုခါခါ အဝ်ႏခုမ်သုံꩻနေလဲဉ်းနဝ်ꩻသွူ၊ ကွဲတွော့ꩻ ထွိုင်ႏထီႏလိတ်ဖြုံႏ ဝေါဟာရနဝ်ꩻ ဟွုန်ဆန်ꩻ၊ အွိုးဝေါဟာရအဓိပ္ပါယ်ႏတောမ်ႏ အနစ်သာရနဝ်ꩻ အဝ်ႏထွူလဲဉ်းစူကို အဝ်ႏခုမ်သဲဉ်ꩻခါꩻလဲဉ်းနဝ်ꩻသွူ။