ခမ်းသားသꩻရာႏ

"ခမ်းသားသꩻရာႏ ခမ်းသားငေါဝ်းတွမ်ႏ ပရိသတ်သီး စွီႏစူထောင်ငါ နေင်ႏတသာ" (သက္ကရာဇ်)ခရစ်နေင်ႏ ၂၀၁၆-ဗာႏလို့ နေင်ႏတသာ ၂၀၁၇-ဗာႏအီႏနွို့ငါလွေꩻတဲင် နေင်ႏတသာကိုယို ကမ္ဘာႏလောင်း ကားတဲင်လိုꩻပိုသီး၊ မန်းခမ်းကို ကားတဲင်ခမ်းသားထီသားသီး၊ ပအိုဝ်ႏစွိုးခွိုꩻကို ကားတဲင်ပအိုဝ်ႏလိုꩻမျိုꩻသီး တွမ်ႏယင်းကားလို့တဲင် ကအဝ်ႏဖေႏအာႏဟော်ꩻထွားသေႏသေႏဒါႏ ခမ်းသားသꩻရာႏ ခမ်းသားငေါဝ်းလိတ်သေသင်ꩻ ပရိသတ်သီးအပေါင်ꩻ ကလဲဉ်းခိုႏ အပဲင်လီꩻအမင်ꩻယဖုံႏယို အွဉ်ႏကုဲင်ချာထွူ တွမ်ႏနမ်းတသာ သꩻတသာတွော့ꩻ ရပ်ဆွုမ်ႏလွေꩻသွိုသွိုဝင်ꩻ နေင်ႏတသာ။ နေင်ႏလီꩻယို အွဉ်ႏကုဲင်ချာတဲင် တဖြာꩻတွမ်ႏတဖြာꩻ ကထွာဒါႏ အပဲင်အမင်ꩻအဆာယို အချင်ꩻချင်ꩻကိုအခါႏ တအွဉ်ႏထွာတဝ်းအစွိုးထွူ အီႏလွေꩻငါထဲင်းဒါႏ အနာႏဂတ်မွူးနီꩻကိုယို ပတ်သဲစ်တွမ်ႏလောကရေꩻရာႏ၊ လိုꩻမုအသောင်အရင်ꩻအရေꩻအရာႏ ပြွူႏဖြိုထင်ႏထိုထွာအီ၊ အကျိုꩻဖေႏသာႏယာႏနွောင်ꩻအီအတာႏ အဝ်ႏလိုꩻမာꩻနုဲင်းမုဲင်ꩻ၊ မာꩻညီꩻမာꩻဖြွမ်းတင်ꩻလꩻထမုဲင်ꩻယို အုံဝဲင်ꩻထိုမ်ႏသဲင်ꩻဒျာႏမꩻ လꩻအဖြေႏသွူ။ နုဲင်းယိုခါ ပအိုဝ်ႏခမ်းသားသီးအခါႏ စီꩻပွါꩻရေꩻ၊ ပညာႏရေꩻ၊ ခြွိုင်ႏသန်ꩻရေꩻတွမ်ႏ လိုꩻမုရေꩻဖုံႏယို ဖုဲင်းကံကမဒါႏ စွုမ်ႏနီꩻအဝ်ႏကျုံႏခွဲ၊ ဖြေႏသျင်ꩻနေဗာႏ နိစ္စဓူဝပျဿနာႏနဝ်ꩻသွူ။ အရေꩻစားယိုဖုံႏ ပွိုင်ႏပွိုင်ႏကအဝ်ႏထဲ့ဆုဲင်ꩻဗာႏထာꩻနဝ်ꩻ ကွပ်စွဉ်ႏမန်းခမ်းထီယို ခမ်းထီ(နဲင်ႏငံႏ)ရေꩻတစွူတဝ်း၊ တယံတဝ်းနဝ်ꩻသွူ၊ နဲင်ႏငံႏရေꩻယို ထွာအထျꩻတဲင် ခမ်းထီကိုကအဝ်ႏ ခမ်းသားသီး စီꩻပွါꩻရေꩻ၊ ပညာႏရေꩻ၊ ခြွိုင်ႏသန်ꩻရေꩻတွမ်ႏ လိုမုရေꩻယို ထဲ့ဆုဲင်ꩻထိုꩻဗာႏစွဉ်ႏ အဆꩻချာသွတ်ꩻနဝ်ꩻသွူ။ ကလဲဉ်းခိုႏချာနဝ်ꩻ ကွပ်စွဉ်ႏစဲ့ꩻအာႏဏာႏအဝ်ႏအစိုႏရယို လောက်ꩻအံႏနွောင်ꩻ ဆောမ်ꩻသော့ꩻထောင်ႏ မာꩻငါႏခမ်းသားထီသားနုဲင်းနဝ်ꩻတဲင် ကထွာခမ်းသားနဝ်ꩻ ပွိုင်းဝွို့ဗွုန်ႏတဝ်းဒွုမ် နဲင်ႏငံႏရေꩻ၊ မာꩻဗွုန်ႏတဝ်းဒွုမ်နဲင်ႏငံႏရေꩻ၊ ငမ်းထိုꩻလို့စွဉ်ႏနဲင်ႏငံႏရေꩻနဝ်ꩻသွူ။ ကပဲင်ႏဆဲင်ႏဒါႏ ခမ်းထီတဖြုံႏအာႏဏာႏယို ထွာဒျာႏခမ်းသားသီးနဝ်ꩻသွူ၊ ခမ်းသားသီးယို ထွာခမ်းထီအဗွေႏအစဲစ်အမဲန်ႏနဝ်ꩻသွူ။ နဲင်ႏငံႏအရေꩻတဲ့ ခမ်းထီအရေꩻ၊ ခမ်းထီအရေꩻတဲ့ နဲင်ႏငံႏအရေꩻနဝ်ꩻမꩻတဲင် နဲင်ႏငံႏအရေꩻ ခမ်းထီအရေꩻယို ပွိုင်းဝွို့တဝ်း တွမ်ႏခမ်းသားနဝ်ꩻ တလꩻတဝ်း၊ တဲက်ဆဲင်ႏတဝ်း တွမ်ႏခမ်းသားနဝ်ꩻ တလꩻတဝ်း၊ ခမ်းသားသီး ခုမ်မာꩻတဝ်း အုံထွားဗော့ꩻနုဲင်းနဝ်ꩻ တလꩻတဝ်း၊ ကထွာခမ်းသားသီး ငမ်းထိုꩻစွဉ်ႏနဲင်ႏငံႏရေꩻနဝ်ꩻ တလꩻတဝ်းနဝ်ꩻသွူ။ ခမ်းသားသီး မဉ်ႏတထွားတဝ်း ခမ်းထီရေꩻ နဲင်ႏငံႏရေꩻနဝ်ꩻ အဗွိုန်ပီထိုꩻနုဲင်းစွဉ်ႏ သွို့ꩻခြံဗွေႏ တထွားတဝ်းသွို့ꩻခြံယာႏနဝ်ꩻတဲင် သွို့ꩻခြံယာႏရမ်ꩻထိုꩻဒါႏ၊ ရွိုင်ꩻထိုꩻဒါႏနဝ်ꩻအတွိုင်ꩻ ယိုလဲ့ ခမ်းထီရမ်ꩻထိုꩻစွဉ်ႏနဝ်ꩻသွူ။ သွို့ꩻခြံမဉ်ႏရမ်ꩻထိုꩻနဝ်ꩻ စီꩻပွါꩻရေꩻ လꩻသော့ꩻတဝ်းဒွုမ်တဲင် လိုꩻမုရေꩻရာႏဖုံႏယို ကုဲင်လွဉ်ꩻပါဗာႏနဝ်ꩻသွူ၊ ကွပ်ခမ်းထီရေꩻရာႏယို မဉ်ႏရမ်ꩻထိုꩻသွူတဲင် ခမ်းသားသီးအရေꩻ စီꩻပွါꩻရေꩻ ပညာႏရေꩻ ခြွိုင်ႏသန်ꩻရေꩻ လိုꩻမုရေꩻဖုံႏယို ထဲ့ဖွိုႏလွဉ်လို့အီနဝ်ꩻသွူ။ ကထွာခမ်းထီဗွေႏ ခမ်းသားသီး ခမ်းထီအထွာတမုဲင်ꩻ၊ ခမ်းထီယို အွဉ်ႏဗာႏလိုꩻနုဲင်းမုဲင်ꩻအိုပ်ချွုတ်၊ လိုꩻအစွိုꩻမုဲင်ꩻအိုပ်ချွုတ်နဝ်ꩻ အခုမ်စံႏယံ၊ လိုꩻအစွိုꩻမုဲင်ꩻအိုပ်ထိန်ꩻနဝ်ꩻ အခုမ်စံႏယံတဝ်း စစွဉ်ႏအရေꩻအရာႏယိုအစ ကထွာခမ်းထီဗွေႏ ခမ်းသားသီးယို ထွားလွဉ်ꩻထွꩻထွꩻ၊ စောႏတနာႏလွဉ်ꩻလို့လို့ဒျာႏမꩻသွူ။ မဉ်ႏဒေါ့ꩻဗာႏအချွုတ်နဝ်ꩻ ခမ်းထီဗွေႏခမ်းသားသီးယို ကင်ꩻတွမ်ႏနဲင်ႏငံႏရေꩻ ခမ်းထီရေꩻတလꩻတဝ်းနဝ်ꩻသွူ၊ မဉ်ႏထွားယင်း ဒီမိုကရေစီခေတ်စနစ်ကိုယိုလဲ့ ခမ်းထီဗွေႏခမ်းသားသီးယို ကအီႏထွဉ်ႏဒါႏ လိုꩻထွားခုမ်မာꩻဖေႏ ခမ်းထီအတာႏ ခမ်းသားအကျိုꩻ လွိုက်ခမ်းသားနမ်းတင်နဝ်ꩻ လွိုက်ထွူတွော့ꩻ ထွူလဲဉ်း၊ အွဉ်ႏစွꩻ၊ အွဉ်ႏထွူဗော့ꩻနုဲင်းနဝ်ꩻ တလꩻတဝ်းနဝ်ꩻသွူ။ နဝ်ꩻမꩻ ခမ်းသားအရေꩻ၊ စီꩻပွါꩻရေꩻ၊ ပညာႏရေꩻ၊ ခြွိုင်ႏသန်ꩻရေꩻတွမ်ႏ လိုꩻမုရေꩻဖုံႏယို အဆင်ႏဖေႏကပြေႏ အရန်းဖေႏကထိုလွဉ်နဝ်ꩻ ထောင်ထွားလွဉ်ꩻ၊ နွို့ပါဝင်ႏဝွေႏဖန်ႏလွေꩻခမ်းထီအရေꩻ၊ အုံဝဲင်ꩻထိုမ်ႏသဲင်ꩻအဖြေႏဒျာႏမꩻ ခမ်းသားသီးအရေꩻယိုတဲ့ အီႏပြေႏလꩻနဝ်ꩻသွူ။ ခမ်းထီအရေꩻယို ခမ်းသားသီးယံကသေထွꩻ ယံကတွိုႏဗꩻ ခမ်းသားသီးမဲ့နားနဝ်ꩻ ခမ်းသားသီး အဝ်ႏလိုႏစူယောင်းထွꩻထွꩻဝင်ꩻ မီဒီယာနဝ်ꩻသွူ၊ မန်းခမ်းထီအရေꩻ၊ ပအိုဝ်ႏစွိုးခွိုꩻအရေꩻ ခမ်းသားသီး ယံထောင်ထွားနွောင်ꩻနဝ်ꩻ အနာႏဂတ်နေင်ႏတသာကိုသူꩻလဲ့ ခမ်းသားသꩻရာႏ ခမ်းသားငဝ်း အီႏကျိုꩻဆောင်ႏလွေꩻတသေႏသေႏဒျာႏသွူ၊ ခမ်းသားသꩻရာႏ ခမ်းသားငေါဝ်းတွမ်ႏ ပရိသတ်သီး စွီႏစူထောင်ငါ နေင်ႏတသာ၊ ရပ်ဆွုမ်ႏလွေꩻပါ နေင်ႏတသာ။