ခွိုꩻထင်ႏထိုတာႏလိုႏခွိုꩻအာႏ

"နီစွိုးခွိုꩻထင်ႏထိုတာႏ အောဝ်ႏလိုႏငါႏနီခွိုꩻအာႏ" နီပအိုဝ်ႏရပ်ရာႏ ကထင်ႏထိုဗာႏ နုဲင်းယိုခါနောဝ်ꩻ ခွန်နင်ꩻသီးမဉ်ႏထွားချာ ကွပ်စွဉ်ႏအွဉ်ငါသား ဗွေႏရဟန်ꩻသင်္ဃာႏလဲ့ယံ၊ အွဉ်ငါခေါင်းဆောင်တန်ဖုံႏလဲ့ ထာꩻထီႏဆွာꩻ၊ ခမ်းသားမွိုးဖါအမျာꩻလဲ့ လွောင်ႏဗူႏတဲင် နီကမဲဉ်လꩻဒါႏ ရပ်ရာႏထင်ႏထိုရေꩻ၊ တဖူꩻလွေꩻသဲင်ꩻရေꩻ၊ ခြွိုင်ႏသန်ꩻရေꩻ၊ စီꩻပွါꩻရေꩻ ထာꩻမာꩻဖုံႏယို ပအိုဝ်ႏကို ဟန်ႏသနီꩻမာꩻချာ ထင်ႏထိုတိုꩻတက်ဗာႏ၊ ကလိုႏအတွိုင်ꩻ အဗွေတဗာႏ တလꩻတောဝ်းလဲ့ ကထွိုက်တန်ႏတွမ်ႏနီနောဝ်ꩻ တခူႏတခေါဝ် လꩻလွဉ်ဗာႏ၊ အင်းတူႏအင်းတန်ႏ စံႏစာꩻဗာႏ၊ ကွပ်ပွိုးစွဉ်ႏ နီလွောင်ႏဗူႏအာႏဒျာႏနောဝ်ꩻသွူ။ လွောင်ႏဗူႏအာႏကရိုꩻနောဝ်ꩻ ပွယ်ꩻစာꩻဖုံႏလဲ့ ပွယ်ꩻစာꩻအလွောက်ꩻ၊ ဆို့ꩻရုဲင်ရေꩻသားလဲ့ ဆို့ꩻရုဲင်ရေꩻအလွောက်ꩻ ဆွန်ꩻစူဝင်ꩻ ကျိုꩻစာꩻခွုမ်မာꩻလွေꩻဗာႏ နီစွိုးခွိုꩻထင်ႏထိုရေꩻတာႏ၊ နဲင်ႏငံႏရေꩻသားလဲ့နောဝ်ꩻ၊ ပါတီပေါင်ꩻစွုမ်ႏလဲ့နောဝ်ꩻ အရေꩻန်အရေꩻတွိုႏ ပအိုဝ်ႏတာႏ ဆွန်ꩻစူဝင်ꩻ ကျိုꩻစာꩻလွေꩻဗာႏ နီလိုꩻမျိုꩻထင်ႏထိုရေꩻတာႏ၊ ပညာႏဒါႏသားတွမ်ႏ လိုꩻသေလိုꩻဒါႏဖုံႏနောဝ်ꩻလဲ့ နီလိုꩻမျိုꩻပညာႏရေꩻ၊ နီလိတ်လုဲင်ꩻ နီယေန်ႏငဲး ထင်ႏထိုရေꩻတာႏ အွဉ်နယ်သွဉ်နယ် ကျိုꩻစာꩻခွုမ်မာꩻလွေꩻကိုဗာႏနောဝ်ꩻသွူ။ လိုꩻမျိုꩻတမျိုꩻ၊ ခမ်းထီတဖြုံႏ၊ စွိုးခွိုꩻတခွိုꩻ လွိုင်ႏကွိုန်ꩻသာႏယာႏရေꩻတာႏနောဝ်ꩻ အောဝ်ႏဗွော့ꩻလွုမ်ꩻ အွဉ်ငါသားလဲ့ တလꩻတောဝ်း၊ အောဝ်ႏဗွော့ꩻဒျာႏ ခမ်းသားမွိုးဖါနောဝ်ꩻလဲ့ တလꩻတောဝ်း၊ အာႏရဲင်ꩻကတလာသားလဲ့ နေးဗာႏတွမ်ႏနမ်းအာႏ၊ ပညာႏကအောဝ်ႏသားလဲ့ နေးတွမ်ႏဉာဏ်ႏအာႏ၊ ရွဉ်ခံꩻဥစ္စာႏကလွိုင်ႏအာသားလဲ့ နေးတွမ်ႏရွဉ်အာႏ ဆွန်စူခွုမ်မာꩻ ကျိုꩻစာꩻလွေꩻကိုဗာႏ နီနွောင်ꩻရာꩻ နီစွိုးခွိုꩻထာꩻမာꩻဖုံႏနောဝ်ꩻသွူ။ နီပအိုဝ်ႏဒုံ ကဲဉ်းအာအာ ခေတ်ယိုခါလဲ့နောဝ်ꩻ ပွိုင်းလဲင်ႏခါလဲ့နောဝ်ꩻ ဒင်ႏဖြားဒုံ ဒင်ႏဥက္ကဋ္ဌဖုံႏ ဒင်ႏအတန်အကဲႏဖုံႏ အောဝ်ႏယပ်ꩻခုဲင်ႏနေကသွူ။ ကယပ်ꩻခုဲင်ႏဗာႏနုဲင်းယိုနောဝ်ꩻ မဉ်ႏဒေါ့ꩻဗာႏ ကွပ်စွဉ်ႏပညာႏရေꩻ အာႏပေႏချက်ဖုံႏလဲ့ပါ၊ လွောင်ႏဗူႏမုꩻအာႏပေႏငါႏဖုံႏလဲ့ပါ၊ အောဝ်ႏသေအောဝ်ႏဒါႏကီလဲ့ လꩻသျုတ်တရေင်ငါႏလဲ့ပါ၊ ယဟန်ႏသားနောဝ်ꩻ ထီႏတောဝ်းအမျာꩻသာႏလဲ့ အောဝ်ႏပါနောဝ်ꩻသွူ။ နီပအိုဝ်ႏဒေႏသ ထင်ႏထိုရေꩻတာႏ နီကအောင်ႏ လိုႏကျိုꩻစာꩻဒါႏ ပညာႏရေꩻဖုံႏ၊ သꩻဓာတ်လွောင်ႏဗူႏမုꩻဖုံႏ၊ သꩻဓာတ်ရက်စွိုးခွိုꩻဖုံႏယို အောဝ်ႏလိုႏနေကတဲင် ယိုမာꩻငါနောဝ်ꩻ ဖေႏကအောဝ်ႏခန်း စွုမ်ႏဖြာꩻဖြာꩻ ကျိုꩻစာꩻလွူးလွေꩻဗာႏ၊ သꩻဓာတ်ရက်စွိုးခွိုꩻမျိုꩻအလောင်း ဖေႏကမွန်ဗန်တသေႏနောဝ်ꩻလဲ့ နေးတွမ်ႏအနယ်ꩻပေါင်ꩻစွုမ်ႏတဲင် ခေတ်ယိုꩻယွဲးလိုꩻပေႏဖုံႏတာႏ လိုꩻဖြားလိုꩻတန်အွဉ်ငါသား ဖေႏအာႏမုꩻနောဝ်ꩻ အောဝ်ႏလိုႏနေကသွူ။ ကတိုꩻတက်ထင်ႏထိုလဲဉ်းဒါႏ လိုꩻမျိုꩻတွမ်ႏခမ်းထီဖုံႏ နီနာꩻမဉ်ႏထောင်ထွား အခေႏခံႏတရာႏနောဝ်ꩻ နမ်းဖြာꩻစီႏလဲ့ယံဗာႏ၊ ဒုံတဒုံစီႏလဲ့ယံဗာႏ၊ အွိုင်ႏတအွိုင်ႏစီႏလဲ့ယံဗာႏ၊ နယ်ႏတနယ်ႏလဲ့ယံဗာႏ၊ အွဉ်ငါသားလဲ့ယံဗာႏ၊ ထောင်လွဉ်ꩻဆꩻချာသားလဲ့ယံဗာႏ၊ လွောင်ႏဗူႏရေꩻလဲ့ အောဝ်ႏဗာႏ၊ စီꩻကန်ꩻလဲ့ဟောဝ်ဗာႏနောဝ်ꩻသွူ။ ပွယ်ꩻတန်မွူးနီꩻခွိုꩻပအိုဝ်ႏ အခန်ꩻအနာꩻကို ကထင်ႏလွဉ်ဖေႏအာႏဒါႏ ခွန်နင်ꩻသီးလိုꩻဖြာꩻပေါင်ꩻအာႏရဲင်ꩻ ပါတီပေါင်ꩻအာႏရဲင်ꩻ ပါဝင်ႏငီꩻမုꩻနောဝ်ꩻ ကျယံငါႏအတွိုင်ꩻ ခင်ႏလမ်းမုဲင်ꩻ ဒုံမုဲင်ꩻ ရပ်မုဲင်ꩻတရိုꩻတောဝ်း ငိမ်ꩻချံꩻခွꩻသꩻ အုံအောဝ်ႏရေꩻအတာႏ ခမ်းသားစဲ့ꩻအရေꩻလဲ့ နီသေနာႏဖေႏဗာႏ၊ နဲင်ႏငံႏရေꩻပြောင်ꩻလုဲင်ႏမုꩻလဲ့ လိုꩻတွိုင်ꩻစွုမ်ႏဖြာꩻ ဖေႏကကျင်ႏလယ်ႏနောဝ်ꩻ လွူꩻထွားဗာႏ နီတာႏဝင်ꩻတာႏ အကျိုꩻကထွာအီဒါႏ ထာꩻမာꩻဖုံႏနောဝ်ꩻ လွောက်ꩻနာႏကျင်ꩻသွုံꩻလွဉ်ꩻဗာႏနောဝ်ꩻသွူ။ နီလိုꩻမျိုꩻဘဝကံႏတရာꩻနောဝ်ꩻ တအောဝ်ႏသော့ꩻတောဝ်း ဝင်ꩻစူကို၊ အောဝ်ႏသော့ꩻချာဒျာႏနီစူကို၊ ကားဒျာႏနီကဖန်ဆင်ꩻ၊ နီကဖန်ဆင်ꩻ နီအခွင်ꩻအရေꩻခိန်ႏ အတန်သွတ်ꩻ အနီꩻအရင်ꩻနောဝ်ꩻ အောဝ်ႏဒျာႏခွိုꩻပအိုဝ်ႏခွန်နင်ꩻသီး သꩻရာႏကို လွောင်ႏဗူႏမုꩻကရိုꩻဒါႏ အနီꩻအရင်ꩻတွမ်ႏ သစ္စာႏတရာꩻဖုံႏနောဝ်ꩻသွူ။ သꩻဓာတ်ရက်စွိုးခွိုꩻတွမ်ႏ သစ္စာႏအောဝ်ႏချာ နီလိုꩻမျိုꩻအလောင်း ကုဲင်ပြင်ꩻမုဲင်ꩻခါလဲ့ နီလိုꩻမျိုꩻထိုꩻမားမုဲင်ꩻခါနောဝ်ꩻသွူ။ မွိုးအောဝ်ႏဖါအဲဉ်ထောဝ်းလဲ့နောဝ်ꩻ၊ ဖါအောဝ်ႏမွိုးအဲဉ်ထောဝ်းလဲ့နောဝ်ꩻ ဝင်ꩻဟဲ့ꩻလိုꩻတဆွူႏ၊ လိုꩻအမျာꩻခါႏ သꩻပေႏဗာႏ၊ မွိုးဖါနီပါꩻ အဲဉ်ထောဝ်းနောဝ်ꩻ ဝင်ꩻဟဲ့ꩻလိုꩻတဆုဲင်၊ မဲ့ငါလဲ့ပေႏ သꩻလဲ့ပေႏဗာႏတဲင် နီခမ်းထီတွမ်ႏနီလိုꩻမျိုꩻ ထင်ႏထိုရေꩻအတာႏ ထူႏသွဉ်ခန်ꩻ လꩻသံႏဝွေႏတွော့ꩻ အယပ်ꩻအခုဲင်ႏခါႏ ဝင်ႏကအွဉ်ထောင်ဖေႏဒါႏ နဲင်ႏငံႏရေꩻတဖူꩻ နုဲင်းယိုခါ ကထွာဒါႏဆꩻချာသားနီနာꩻ ဖေႏကလွစ်မော့ꩻ တဖူꩻမာႏနောဝ်ꩻ စွို့ꩻစွို့ꩻစွဉ်ႏစွဉ်ႏ နီထောင်လွဉ်ꩻမꩻ ကောဝ်ႏထွန်ႏထျꩻသူꩻ နီအီႏတွိုႏနွောင်ꩻနောဝ်ꩻသွူ။ နီပအိုဝ်ႏနုဲင်းယိုခါ တခွိုꩻလွုမ်းကအောဝ်ႏထောင် နဲင်ႏငံႏရေꩻတဖူꩻနောဝ်ꩻ စအီႏတွိုႏဗꩻ တထာႏဝကိုတဲင် အောဝ်ႏလိုႏသွုပ်ငါႏနောဝ်ꩻ အောဝ်ႏအာနေက တဖူꩻဆွာꩻနေကတွော့ꩻ ပါꩻမုဲင်ꩻမဲဉ်ယားယားခံႏမွိုန်းအပꩻလီ ခံႏမွိုးအကုဲင်ပြင်ꩻ ခွန်နင်ꩻသီးယိုတအာႏ ဖေႏကလွစ်ဗာမဲ့ငါပေႏ တရေႏလင်ꩻနောဝ်ꩻ အောဝ်ႏလိုႏစွူစွူဒျာႏ နီရဲင်ꩻအာႏ အောဝ်ႏလိုႏထဲင်းထဲင်းဒျာႏ နီလွောင်ႏဗူႏရေꩻ ယိုမာꩻငါလိုႏငါႏလဲဉ်း ကောဝ်ႏထွန်ႏထျꩻတွိုႏဗꩻလွေꩻအကျောင်ꩻ တဲမ်းနယ်ဗာႏ လိတ်ထွားသား ဗွေႏခွန်နင်ꩻသီးဖုံႏသွူ။