ဃောသကဌေꩻဝတ္ထု
"ဃောသကသဌေꩻဝတ္ထုအအဲဉ်ႏ"
အွိုးစခါ ခါးလားနီဗွေႏဘုရာꩻ ကပွင်ꩻအတွင်ꩻနဝ်ꩻ အလ္လကပ္ပခမ်းကို မူႏခိုအမျာꩻ အံႏမငါႏထာꩻတဲင် ပါꩻကမဉ်ꩻ "ကောတုဟလိက"နောဝ်ꩻ ဟဲ့ꩻပါတွမ်ႏအမာ "ကာဠီ"အီပါတွမ်ႏအပိုပေႏ "ကာပိ"တွော့ꩻ ထိုꩻလွေꩻကောသမ္ဗီခမ်း။ တန်ꩻဗꩻလꩻဒွိုန်း ကောသမ္ဗီခမ်းတဲ့ စရိပ်သမ်းလို့ထိုꩻ တဖူꩻလောင်းတဲင် ဟို့ꩻခိုးဒဲဉ် နုဲင်းစွဉ်ႏအီႏသီသီ၊ ဟို့ꩻခိုးထီနုဲင်းစွဉ်ႏအီႏဝွစ်ဝွစ်တွော့ꩻ လွေꩻနွိုင်ႏလွေꩻဆေ့ꩻဗာႏနေး၊ အပိုပေႏနောဝ်ꩻ အမွိုးယွော့လွေꩻခါႏခါႏ၊ အဖါယွော့လွေꩻခါႏခါႏ၊ ယွော့လွေꩻခလဲ့ꩻနေးလို့ဝင်ꩻ။ တွိုႏအဖါခလဲ့ꩻတွော့ꩻ အွဉ်ႏပြာႏသေꩻစွဉ်ႏဒျာႏ အပို၊ အမာနောဝ်ꩻ သꩻလဲဉ်းတဝ်းအပိုတဲင် ငွိုးငါးနေးစွဉ်ႏထာꩻ၊ ထွဉ်ႏအဝါꩻယွော့လွေꩻယင်းအပို၊ အဝါꩻတဲ့ မာꩻရာꩻဒါႏတဝ်း၊ ယွော့လွေꩻယင်း အပိုပေႏနောဝ်ꩻသွူ။ ဝွေꩻသီးတမာဝါꩻနဝ်ꩻ တွိုႏလွေꩻခန်းဒုံတဒုံ၊ အနီꩻနောဝ်ꩻ တောႏတနꩻခန်း ပါꩻတဖြာꩻ လောင်ꩻကပ်ပစ္စေကဗုဒ္ဓါႏသွမ်ꩻတဲင် လွူးစာႏဂပါခန်း ဝွေꩻသီးတမာဝါꩻ၊ ဗွူႏပါခန်း အထွီႏမွူး၊ အဝါꩻနောဝ်ꩻ ထွားထွီႏမွူးနောဝ်ꩻတွော့ꩻ "ထွီႏမွူးနောဝ်ꩻ ကံႏဟောဝ်မွေးစွဉ်ႏထာꩻဟွေး၊ အံႏဗာႏအွီႏသေႏသေႏမွေးစွဉ်ႏထာꩻ"အသꩻကို ယူႏတေ့ꩻခန်းနုဲင်းနဝ်ꩻသွူ။ အဝါꩻ (ကောတုဟလိက) နဝ်ꩻ သီစွော့ꩻထိုꩻစွဉ်ႏ အဟာနောဝ်ꩻတဲင် သဲင်ꩻကွုတ်စွဉ်ႏ ထွီႏလမ်းနောဝ်ꩻ၊ အမာ(ကာဠီ) နောဝ်ꩻတဲ့ အုံညီꩻလမ်းနဝ်ꩻ၊ အံႏစင်းနမ်း ပနီꩻနီꩻ၊ ပေါႏလꩻလꩻဟူတဲ့ ဒွိုႏဒဲဉ်ကပ်လူႏပါ ပစ္စေကဗုဒ္ဓါႏ၊ ကုသိုလ်ႏနောဝ်ꩻ ဖန်းဖေႏပါ အဝါꩻကသီထိုꩻငါနောဝ်ꩻသွူ။ ထွီႏပေႏနဝ်ꩻ ထွိုင်ႏတန်ပသာႏတွော့ꩻ လိန်ႏမာႏမွေးစွဉ်ႏထာꩻ၊ ပေါႏထီႏပစ္စေကဗုဒ္ဓါႏ ကျွꩻလွဉ်တဲ့ ဝီအမေးလောႏအွမ်ႏဆွုမ်ႏ၊ ပစ္စေကဗုဒ္ဓါႏတဲ့ ဗွူႏအဆာႏတဲင် ထွီႏပေႏတဲင် ရက်မွေးစွဉ်ႏ ပစ္စေကဗုဒ္ဓါႏနောဝ်ꩻသွူ။ အဗွေႏအွဉ်လွေꩻ အွဉ်သဲင်ꩻတဲင် ပေါႏတွိုႏတွိုႏ ခိန်ႏတွုံꩻသွမ်ꩻနောဝ်ꩻ ထွီႏပေႏလောႏထင်ႏကျောင်ꩻ၊ ပေါႏတွိုႏထင်ႏတခါꩻငွါတဲ့ အူႏထာꩻသွံလဲင်ႏထွူတွော့ꩻ အွဉ်သဲင်ꩻ ပစ္စကဗုဒ္ဓါႏ၊ တွိုႏတဖူꩻလောင်းနဝ်ꩻတဲ့ ပစ္စေကဗုဒ္ဓါႏအန္တရာယ်ႏ ဖေႏနေးကကင်ꩻနောဝ်ꩻ အူႏဖေႏကာႏကွယ်ႏဖေႏနဝ်ꩻသွူ။ တွိုႏတနီꩻတွော့ꩻ ပစ္စေကဗုဒ္ဓါႏနဝ်ꩻ အီႏသဲင်ꩻသင်္ကန်ꩻ အွိုးဂန္ဓမာနကောင်သူꩻတဲင် ကျွꩻသဲင်ꩻနေးဒျာႏ မို့ꩻလောင်း၊ ထွီႏပေႏနောဝ်ꩻ ထွားထွားလွဉ်ꩻ ပစ္စေကဗုဒ္ဓနောဝ်ꩻတဲင် ထင်းဒျာႏပစ္စေကဗုဒ္ဓါႏကျွꩻသဲင်ꩻဒွုမ်တွော့ꩻ သꩻရာႏပꩻ သီဝꩻလင်ꩻခန်းဒျာႏ ဗော့ꩻနောဝ်ꩻသွူ။ ကွပ်ရက်ဗာႏ ကျိုႏလွေꩻကျိုႏသဲင်ꩻဗာႏ ပစ္စေကဗုဒ္ဓါႏ ကုသိုလ်ႏနောဝ်ꩻတဲင် ထွီႏပေႏနောဝ်ꩻ တွိုႏထင်ႏတောလူꩻခမ်း နင်ꩻမူႏတဖဲ့ꩻငတ်ꩻရျာꩻ၊ ထင်ႏခမ်ႏစာꩻဗာႏ လူꩻချမ်ꩻသာႏ၊ တပေါႏအုံဗာႏညတဝ်း၊ သီစောဝ်းထိုꩻချာ၊ လင်ꩻကွုတ်တော ကောသမ္ဗီခမ်း ပြည့်တန်ဆာမူႏဟို့ꩻကိုနောဝ်ꩻသွူ။ ဇာတ်ကရီးပန်အွဉ်နောဝ်ꩻ ဝွေꩻဝေါင်းထိုꩻဗာႏဖို အပို(ဝွေꩻကျံႏအွဉ်ႏပြာႏသီဗာဖိုအပို)တဲင် အကုသိုလ်ႏအပဲစ်နဝ်ꩻ ဝဋ်တွပ်ꩻချာတွော့ꩻ သဲစ်ကလွူးဝွေꩻတဲ့ ဝင်ꩻလွေꩻဝေါင်းဒင်ႏခန်းဒျာႏ ထာꩻအီႏပွုမ်ႏလောင်း၊ ပါꩻတဖြာꩻလွေꩻမော့ꩻတဲင် ထူႏသဲင်ꩻအလမ်းနောဝ်ꩻသွူ။ အနီꩻနောဝ်ꩻနောဝ်ꩻ ပုရောဟိတ်ပုဏ္ဏာꩻ ဟော်ꩻဖေႏ ကောသမ္ဗီႏသဌေꩻနုဲင်းယို - "သဌေꩻဖြားဟွေး- ဟန်ႏနီꩻယိုနဝ်ꩻ နက္ခတ်ဟဝ်မွေးစွဉ်ႏထာꩻ၊ လိုꩻပေႏကလွူးဟန်ႏနီꩻယိုနဝ်ꩻ အီႏထွာဗာႏသဌေꩻတန်"ဟော်ꩻနုဲင်းနောဝ်ꩻတဲင် သဌေꩻမာနောဝ်ꩻ သမ်းတလွူးတဝ်းအပို အနီꩻနဝ်ꩻတွော့ꩻ ထွဉ်ႏခန်းအသွဉ်းမူႏ လယ်ႏထုမ်ႏရီ လိုꩻပေႏကလွူးအနီꩻနောဝ်ꩻသွူ။ ထွိုင်ႏလွေꩻမော့ꩻ ကျင်ပေႏနဝ်ꩻတဲင် ကွီဖြေꩻနွိုင်ႏဆေꩻ ဖေႏသေꩻရွဉ်တရေင်၊ သဌေꩻနောဝ်ꩻ ယူႏ"ဝွေꩻမာမဉ်ႏလွူးပို မဉ်ႏထွာအမူႏနဝ်ꩻ အီႏဖေႏတောႏလမ်း တွမ်ႏပါꩻပေႏယို၊ မဉ်ႏထွာအခိုနောဝ်ꩻ အီႏမာꩻသီတေ့ꩻထိုꩻကမꩻ"အသꩻကိုနောဝ်ꩻ ယူႏသေꩻနုဲင်းနောဝ်ꩻသွူ။ ထွိုင်ႏလꩻသွံနီꩻတွော့ꩻ အမာလွူးခန်းအပို၊ သမ်းထွာဒျာႏအခိုတဲင် ထွဉ်ႏအသွဉ်းမူႏကာဠီ၊ အီလွေꩻအပိုလွူး ဖိုးဖွောင်ꩻငွါ၊ ဖေႏနေးဖိုးဖုံႏ ကယမ်းသီထိုꩻ အရိုꩻနုဲင်းနဝ်ꩻသွူ။ တွိုႏအနီꩻနောဝ်ꩻ ဖိုးထီးတန် ဥသဘတဗာႏ ထန်ႏရီးရီးဝင်ꩻတဲင် အုံထွိုင်ႏခါꩻဖေႏ မောင်ႏပေႏဆꩻကီတွော့ꩻ ဖိုးတယမ်းသီတောဝ်း ဖိုးသား ထူႏလွူးတောနောဝ်ꩻသွူ။ ဝွေꩻကကျံႏသီပါꩻပေႏနဝ်ꩻ ငမ်းဝင်ꩻသေအာတဲင် ဖေႏရွဉ် တရေင်တွော့ꩻ ထွဉ်ႏအသွဉ်းမူႏ လွေꩻကွီချာယင်းနဝ်ꩻသွူ။ ပထမလဲင်ႏ ပါꩻပေႏသီတောဝ်းတဲင် တွိုႏဖျင်နီလဲင်ႏကိုနဝ်ꩻ ထွဉ်ႏအသွဉ်းမူႏ လွေꩻအွဉ်ႏသော့ꩻ လောတဖူꩻကို၊ တွိုႏနောဝ်ꩻကိုရပ်နဝ်ꩻ ဖိုးအုဲင်ႏလွေꩻတဝ်း၊ လောသားထူႏသဲင်ꩻ၊ သဌေꩻဖေႏတရေင် ကွီချာနဝ်ꩻသွူ။ တွိုႏသွံလဲင်ႏကို လွေꩻဝေါင်းသော့ꩻ ထာꩻပုံသင်ႏခဲင်ꩻကို၊ ဗဲတီသားလွေꩻမော့ꩻ ထူႏသဲင်ꩻ၊ သဌေꩻဖေႏတရေင် ကွီချာယင်း။ တွိုႏလစ်ꩻလဲင်ႏကိုနောဝ်ꩻ ထွဉ်ႏအသွဉ်းမူႏ လွေꩻလွဉ်းထဲ့လဲင်း၊ လင်ꩻထဲ့ဒင်ႏယင်း သွီႏပုံလောင်း၊ ထာꩻထဲင်သား လွေꩻခွဝါႏ၊ လွေꩻမော့ꩻထူႏသဲင်ꩻ၊ သဌေꩻဟွုန် ဖေႏတရေင် ကွီချာယင်း။ တွိုႏငတ်ꩻလဲင်ႏကို သဌေꩻကအီႏကျံႏသီ အလဲင်ႏယိုနောဝ်ꩻ မောင်ႏပေႏနဝ်ꩻတဲ့ တန်ပသာလဲဉ်း၊ အမဉ်ꩻတွင်ႏ"ဃောသက"ဝင်ꩻဟဲ့ꩻလွခန်းနုဲင်းနောဝ်ꩻသွူ။ တွိုႏတနီꩻတွော့ꩻ သဌေꩻလွေꩻထေ့ ဖို့ꩻဖွိုင်ꩻသားထျꩻ၊ "မွူးရောဝ်ꩻမဲ့ꩻ ခွေအီႏအွဉ်ႏစွꩻလွဉ် ခွေပိုယုတ်တဖြာꩻ၊ ပေါႏဖျော်လွဉ်နာꩻထျꩻတဲ့ ရီရာမွုန်းဒွုမ်၊ မာꩻသီထွူတွော့ꩻ တဒွေါ့ꩻပဲစ်ꩻပဲစ်ꩻ၊ ဗုံသော့ꩻနာꩻမေႏအောင်ကိုနောဝ်ꩻနော၊ ယို- ခွေဖေႏသေꩻနာꩻ ရွဉ်စရီးတရေင်" သဌေꩻထွဉ်ႏခါꩻနုဲင်းနောဝ်ꩻထွူတဲင် သဲင်ꩻချာယင်းအလမ်းနောဝ်ꩻသွူ။ တွိုႏနုဲးမွူးရဝ်ꩻတွော့ꩻ သဌေꩻထွဉ်ႏခန်း ဃောသကလွေꩻထေ့ ဖို့ꩻဖွိုင်ꩻသားထျꩻ၊ ဃောသက လွေꩻခွဲခန်း သဌေꩻပိုယာႏ အဝ်ႏတောႏပိန်တွင်ꩻ၊ သဌေꩻပိုယာႏရိုꩻ- "ခွေတောႏထာꩻဟန်ႏနီꩻ သွုမ်ꩻအာငါႏ၊ နီဝေး တောႏဖေႏလုဲင်ႏခွေဟုဲင်း၊ ဖို့ꩻဖွိုင်ꩻသားထျꩻသူꩻနဝ်ꩻ မဲ့ꩻခွေလွေꩻဖေႏလုဲင်ႏဒျာႏ"ရိုꩻနုဲင်းနောဝ်ꩻသွူ။ ဃောသက ဒေါ့ꩻနုဲင်းမုဲင်ꩻဒေါ့ꩻ သဌေꩻပိုယာႏ တနာႏတောဝ်း၊ လွေꩻဒျာႏနွိုင်ႏနွိုင်ႏတဲင် ဃောသကအုံကုဲင် တောႏဖေႏတောပိန်၊ သဌေꩻပိုယာႏနောဝ်ꩻ လွေꩻထေ့တော ဖို့ꩻဖွိုင်ꩻသားထျꩻ၊ သဲစ်ကဖျော်တဲ့ သဌေꩻပိုယာႏရိုꩻ- "နီဖါကထွဉ်ႏခါꩻ ကိစ္စမဟာနီꩻနောဝ်ꩻ မာꩻဖေႏထွူထွူစွဉ်ႏ ယိုခါခါတဲ့ နီဖါထွဉ်ႏလွဉ်နုဲင်းနောဝ်ꩻ" သဲစ်ကဟွုန်ငေါဝ်းနောဝ်ꩻတဲင် သဌေꩻပိုယာႏနဝ်ꩻ ဖွိုင်ꩻသားမာꩻသီထွူတွော့ꩻ တဒွေါ့ꩻပဲစ်ꩻ၊ ဝေါင်းသော့ꩻ ဝေါင်းသော့ꩻစွဉ်ႏဒျာႏ အမေႏအောင်ကိုနောဝ်ꩻသွူ။ နုဲင်းမွူးဟာတွော့ꩻ ဃောသက ပေါက်သဲင်ꩻလမ်းတဲင် သဌေꩻရိုꩻ- "ခွေထွဉ်ႏနာꩻလွေꩻ ဖွိုင်ꩻသားထျꩻနောဝ်ꩻ နာꩻလွေꩻတောဝ်းနဲ့" "ကျံႏလွေꩻဒျာႏတဲ့ ဖူးခိုကွီလွေꩻတောဒျာႏ၊ ခွေတဖေႏလွေꩻတောဝ်းတဲ့ ဝွေꩻလွေꩻနွိုင်ႏနွိုင်ႏဒျာႏ" သဌေꩻသဲစ်ကဟွိုန်ငေါဝ်းနောဝ်ꩻတဲင် ငွိုးငါးစွဉ်ႏထာꩻတွော့ꩻ လောႏလွေꩻစွဉ်ႏဖွိုင်ꩻသားထျꩻ။ ဖွိုင်ꩻသားရိုꩻ-" သဌေꩻဟွေး- နာꩻကထွဉ်ႏဒါႏ ကိစ္စမဟာနီꩻနဝ်ꩻ ခွေနက်ဖေႏထွူလဲဉ်း" ဒေါ့ꩻနယ်ဆွုမ်ႏနုဲင်းနောဝ်ꩻသွူ။ သဌေꩻသဲစ်ကဟွုန်ငေါဝ်းနဝ်ꩻတဲင် သောကပိုတာႏ လောႏအသꩻရာႏတွော့ꩻ လဲင်ꩻအီႏဗော့ꩻ တဖေင်ꩻနမ်းနေးစွဉ်ႏနောဝ်ꩻသွူ။ သဌေꩻနောဝ်ꩻ ယိန်းလွꩻထီႏစွဉ်ႏ ဃောသကတဲင် အုံထာꩻအောဝ်ႏကျံႏသီစွဉ်ႏ ဃောသကနောဝ်ꩻသွူ။ ကွပ်နောဝ်ꩻမꩻ ကကျမ်ႏသီႏ တွိုႏသူလဲင်ႏကိုနောဝ်ꩻ ဃောသက ထွာလဲဉ်းသွူခိုဗင်ႏ၊ တွိုႏတနီꩻတွော့ꩻ သဌေꩻထွဉ်ႏလွေꩻဖေႏလိတ် ထိန်ꩻဘဏ္ဍာႏသားထျꩻ၊ ဖျော်ရီးခန်းအဖါသွꩻ သဌေꩻတဖြာꩻလမ်း၊ သဌေꩻပိုဝင်ꩻရိုꩻနုဲးနဝ်ꩻတဲင် ဝင်ꩻလောႏဖေႏခန်း ခင်ႏလမ်း၊ ဃောသကနဝ်ꩻ လွေꩻထာꩻရွိုးငါႏတဲင် ဗေင်ႏတလွာထာꩻတွော့ꩻ မဲ့ဗေင်ႏတငါထိုꩻစွဉ်ႏနဝ်ꩻသွူ။ ဃောသက မဲ့အောဝ်ႏဗေင်ႏထာꩻတွင်ꩻနဝ်ꩻ သဌေꩻပိုမူႏနံꩻ ဖျော်လွဉ်၊ သဌေꩻပိုမူႏ ထွိုင်ႏထီႏဃောသကနဝ်ꩻ ကျွိုက်ထွူစွဉ်ႏတလဲင်ႏချင်ꩻ၊ သဌေꩻပိုမူႏ ထွားချာထွားငါတွော့ꩻ ထီႏခန်းလိတ် ဃောသကကွဉ်ꩻကတူႏကိုနောဝ်ꩻတဲင် သဌေꩻပိုမူႏထူႏထွူ လောႏလွေꩻအခန်ꩻကို၊ ထွိုင်ꩻတခါꩻ၊ ဗွောင်ပတဲင်ပေါက် ဖေါက်ဖတ်ဟော်ꩻထွားစံꩻခန်း လိတ်နောဝ်ꩻသွူ။ "ထိန်ꩻဘဏ္ဍာႏသားဟွေး- ခွေပိုယုတ်ယိုတဖြာꩻနောဝ်ꩻ မာꩻသီထွူတဲင် လွဉ်းတေ့ꩻသော့ꩻသွော့ တရေႏအိန်ႏကိုနဝ်ꩻနော၊ နာꩻမဉ်ႏမာꩻဖေႏနုဲင်းနောဝ်ꩻနဝ်ꩻ မဲ့ꩻအောင်ႏဆုꩻဒျာႏနာꩻ"။ သဌေꩻပိုမူႏ ကထွိုင်ႏဟော်ꩻဖတ်ဗာႏ လိတ်နောဝ်ꩻတဲင် - "ဝေးခိုယို ဒါႏတဝ်းလိတ်ဟယို၊ လိတ်အီႏမာꩻသီဝွေꩻတဲ့ ဝွေꩻတသေတဝ်း၊ အဝ်ႏတထူပီပဲ့လွေꩻဒျာႏ အကွဉ်ꩻကတူႏကို၊ ခွေမဉ်ႏတထီႏရီးတောဝ်းမွိုင်ဟ တိတ်ချဝွေꩻအီႏသီဗာႏထာꩻ၊ ခွေအီႏကယ်ႏက ဝွေꩻမꩻ"အွဉ်ႏသꩻနုဲင်းနဝ်ꩻတဲင် သဌေꩻလိတ်နဝ်ꩻ အဲ့ꩻသဲ့ꩻထိုꩻထွူတွော့ꩻ သဌေꩻပိုမူႏ တဲမ်းဖေႏလုဲင်ႏနုဲးယို- "ထိန်ꩻဘဏ္ဍာႏသားဟွေး- ခွေပိုခိုယိုနဝ်ꩻ အွဉ်ႏမင်္ဂလာႏဖေႏသွော့ တွမ်ႏသဌေꩻပိုမူႏနောဝ်ꩻနော၊ လိုႏတခြိုꩻစူခူꩻ အမျိုꩻမုဲင်ꩻတဲ့ ထေဖေႏလို့လို့ဟုဲင်း၊ မင်္ဂလာႏဖေႏထွူတဲင် မာꩻဖေႏသွော့ လမ်းဟောဝ်ဟောဝ်၊ လမ်းနီဆောင်စားနောဝ်ꩻနော၊ လမ်းသောင်လစ်ꩻဖဲ့ꩻနဝ်ꩻတဲ့ တယ်ႏခါꩻဖေႏနေးသွော့တန်ꩻတွိုင်ꩻ၊ ခန်ꩻခါꩻဖေႏပါသွော့ ကောပွေါးသားနဝ်ꩻနော၊ ကိစ္စကားကအောဝ်ႏ မဉ်ႏထွူလို့မꩻ ကွဲအွဉ်ႏဒေါ့ꩻဟွုန်ချာယင်းသွော့ခွေ၊ တွိုႏနောဝ်ꩻမꩻ နာꩻတာႏနောဝ်ꩻ မဲ့ꩻခွေထွားမာꩻဖေႏဒျာႏ"
ကောတဲမ်းသား -
ကောသမ္ဗီႏ သဌေꩻတန် ။
သဌေꩻပိုမူႏ တဲမ်းလိတ်နုဲင်းနဝ်ꩻ ထွိုင်ႏထွူတွော့ꩻ ငပယွုမ်းစွဉ်ႏထာꩻ၊ ဃောသကနောဝ်ꩻ အောဝ်ႏတခြော့နေကထာꩻ၊ သဌေꩻပိုမူႏ လွေꩻအွဉ်ႏသော့ꩻဖေႏချာ လိတ်တသာ တစောင်ႏတဲ့ အမဲ့တသေတဝ်း၊ နုဲင်းမွူးရောဝ်ꩻမꩻ ဝွေꩻလွေꩻဖေႏလိတ်၊ ဘဏ္ဍာႏထိန်ꩻသား ကထွိုင်ႏဟော်ꩻထွား လိတ်နောဝ်ꩻတဲင် သꩻရောင်းသꩻရေꩻ လွေꩻရီဖေႏစွဉ်ႏ သဌေꩻပိုမူႏ၊ အမွိုးအဖါတဲ့ သဘော်ꩻတူႏတဲင် စီႏစဲဉ်ႏဖေႏထွူစွဉ်ႏဒျာႏ ပွယ်ꩻမင်္ဂလာႏနောဝ်ꩻသွူ။ ပွယ်ꩻမင်္ဂလာႏထွူးလဲဉ်းအကျောင်ꩻ မာꩻဖေႏလမ်းဟဝ်ဟဝ်တဲ့ ထွူလဲဉ်းအကျောင်ꩻ သဌေꩻကထင်ႏဟွုန်နုဲင်းနဝ်ꩻတဲင် ရေႏခါꩻတမျိုꩻ ထွာထိုꩻတစားတွော့ꩻ ဆာတန်စွဉ်ႏဒျာႏထာꩻ၊ ဝင်ꩻလွဉ်ဟဲ့ꩻဃောသကတဲ့ အမာဖေႏသဲင်ꩻတဝ်း၊ အထွိုင်ႏဒါႏယာႏဒါႏယီႏဒွုမ် အလွိုးတရမွန်နွောင်ꩻတဝ်းဒွုမ် ကထွိုင်ႏဟွုန်နုဲင်းနဝ်ꩻမꩻ ဃောသကသီးတမာဝါꩻ ကွဲးသဲင်ꩻထေ့သဌေꩻထျꩻ၊ သဌေꩻသီထိုꩻတွော့ꩻ ခွုင်းကားတဲင် သဌေꩻအမွီႏဖုံႏနောဝ်ꩻ ဝွေꩻသီးလꩻလို့စွဉ်ႏဒျာႏနောဝ်ꩻသွူ။ သဌေꩻပိုမူႏနောဝ်ꩻ လိတ်တဲ့ဒါႏ၊ လိန်ႏတဲ့လိန်ႏမာႏ၊ ထာꩻဝွေႏဖန်ႏတဲ့ဒါႏတဲင် လꩻလို့သဌေꩻအမွေႏ၊ အဝါꩻဃောသကနဝ်ꩻ ထွာမွိုင်ကြွိုင်ဗာႏစွဉ်ႏ သဌေꩻတန်တဖြာꩻနဝ်ꩻသွူ။ သဌေꩻဖြား သꩻတကဲင်ႏအကျောင်ꩻ၊ ကျံႏသီဃောသက ပဉ်သူလဲင်ႏအကျောင်ꩻ၊ ကလꩻလွဉ်ဗာႏ ဥစ္စာႏအမွေႏဖုံႏနောဝ်ꩻ ကွပ်စွဉ်ႏ သဌေꩻပိုမူႏဒါႏလိတ်၊ ဝွေႏဖန်ႏဉာဏ်ႏပညာႏအောဝ်ႏမꩻ လꩻလွဉ်ဗာႏအကျောင်ꩻ၊ လိတ်ကဖေႏလွေꩻ ထိန်ꩻဘဏ္ဍာႏသားနောဝ်ꩻ လိတ်မာꩻသီဒျာႏနာꩻအကျောင်ꩻ၊ သဌေꩻပိုမူႏ တဲမ်းလုဲင်ႏတောဒျာႏအကျောင်ꩻ စတဲင်စားနဝ်ꩻခရာႏ သွဉ်းမူႏကာဠီ ခြုဲင်းနယ်သျင်ꩻနယ်ဖေႏ ဃောသကတဲင် ဃောသက ထင်ႏသေအခရာႏတွော့ꩻ အံႏဖြာႏမွေးစွဉ်ႏအမာ၊ လꩻပါစွဉ်ႏ သံႏဝွေႏ၊ ဖေႏလူႏဖေႏတန်ꩻမွေးစွဉ်ႏထာꩻ၊ ရဟန်ꩻသံဃာႏလွုမ်ꩻတကာႏတဝ်း လိုꩻခြောလိုꩻဒုက္ခ-စတဲင်နုဲင်းနောဝ်ꩻဖုံႏတဲ့ ဝွေꩻဖေႏအံႏဖေႏအွꩻတွော့ꩻ တနီꩻတနီꩻယို လို့စွဉ်ႏတရေင်တရေင်၊ လူႏစွဉ်ႏစွုမ်ႏနီꩻစွုမ်ႏနီꩻနောဝ်ꩻသွူ။ တောင်ꩻခါꩻ = = အလုဲင်းနောဝ်ꩻ ထွားသွော့ = ဓမ္မပဒ အဋ္ဌကထာႏ - ၁၀၈၊ ဓမ္မပဒ ပြန်ႏမန်းဘာႏသာႏ ပထမတွဲꩻ-၂၁၉။
"ဃောသကဝတ္ထုကိုယို ကလꩻနွောင်ꩻဒါႏဗဟုသုတဖုံႏနောဝ်ꩻ"
၁။ ထာꩻရက်ပိုယို မွိုးနောဝ်ꩻ ကယ်ꩻလဲဉ်းကဖါ။
၂။ အာႏရꩻငါႏ ထွီႏဘဝတဲင် သဲင်ꩻထွာဗာႏမွေးစွဉ်ႏထွီႏ။
၃။ ထွီႏရိုꩻကီလဲ့ လိန်ႏမာႏငါႏ၊ သေဒျာႏ ဝင်ꩻကေꩻဇူꩻ။
၄။ ထွီႏပေႏနဝ်ꩻ ပင်ꩻလွေꩻပင်ꩻသဲင်ꩻဒါႏ ပစ္စေကဗုဒ္ဓါႏတဲင် သီထွူနောဝ်ꩻ တွိုႏထင်ႏဗာႏ လူꩻခမ်း။
၅။ အဝ်ႏတိရစ္ဆာန်ႏဘဝတဲ့ တွိုႏထင်ႏနွောင်ꩻဒျာႏ လူꩻခမ်း။
၆။ ကွပ်ကျမ်ႏမာꩻသီဗာႏဖိုပိုတဲင် တွိုႏသဲင်ꩻဃောသကဘဝနောဝ်ꩻ ခံႏဗာႏ ဝင်ꩻမာꩻသီနွုတ်ꩻလဲင်ႏဗွေဗွေ။
၇။ ကထွာထွီႏပေႏခါ ကပသာလွေꩻသဲင်ꩻ ပစ္စေကဗုဒ္ဓါႏ အူႏဖေႏထာꩻ၊ ကာႏကွယ်ႏရဲခါꩻဖေႏ အန္တရာယ်ႏတဲင် ကွပ်ကုသိုလ်ႏနောဝ်ꩻတွော့ꩻ ဝင်ꩻကျံႏသီဝွေꩻ ကားမုဲင်ꩻလဲင်ႏလဲင်ႏပဉ်တဲ့ ဝွေꩻအန္တရာယ်ႏကင်ꩻဒျာႏ၊ ထွာတောဝ်း နုဲင်းမုဲင်ꩻမုဲင်ꩻ။
၈။ ဝဋ်ကထင်တွိုႏ မွူးနီꩻအခန်ꩻသီ ကထင်ႏတွိုႏနောဝ်ꩻလဲ့ လဲ့ꩻတလꩻတောဝ်း၊ သဌေꩻပိုယာႏသီဗာႏ။
၉။ ကွပ်ဝွေꩻနာႏအမာငေါဝ်း အွဉ်ႏပြာႏသီထွာတဝ်းအပိုပတဲင် ဃောသကနဝ်ꩻ အမာႏသီထွူဆဲဆဲ့တဲ့ သီဗာႏထွာတဝ်း။
၁၀။ ကောသမ္ဗီႏသဌေꩻနဝ်ꩻ ကွပ်ကျမ်ႏသီတကုဲင် အပိုလွူးတဲင် ဝဋ်တွမ်ꩻသွူးစွဉ်ႏဒျာႏ အပိုယာႏသီဗာႏတော။
၁၁။ ကွပ်တဒါႏတောဝ်းလိတ်တဲင် လိတ်အီႏမာꩻသီချာအီအဗွေႏတဲ့ အဗွေႏတသေတောဝ်ႏ
၁၂။ ခါႏလိတ်သား သဌေꩻပိုမူႏ ကယ်ႏဖေႏနဝ်ꩻမꩻ ဒါႏလိတ်လိတ်သား ဃောသကနဝ်ꩻ အန္တရာယ်ႏကင်ꩻဗာႏႏ
၁၃။ သဌေꩻပိုမူႏတဲ့ မဉ်ႏတဒါႏတောဝ်းလိတ်နောဝ်ꩻ လိတ်ထမုဲင်ꩻကျောင်ꩻ သေတောဝ်းတွော့ꩻ တိတ်ချꩻ ဃောသကသီဗာႏ။
၁၄။ သဌေꩻပိုမူႏနောဝ်ꩻ ဇာတ်ကရီးခါ အံႏစင်းနမ်းထွူ ကလꩻလꩻလွဉ်ဟူပေႏနောဝ်ꩻ ကွပ်ကပ်လူႏဗာႏဖို ပစ္စေကဗုဒ္ဓါႏဒဲဉ်သွမ်ꩻတဲင် သဲင်ꩻထွာဗာႏသဌေꩻပိုမူႏ၊ သဲင်ꩻခြွေခြာႏဗာႏ။
၁၅။ သဌေꩻပိုမူႏနဝ်ꩻ ဇာတ်ကရီးခါ (အဝ်ႏထွာ ကာဠီဘဝတွင်ꩻ) ရက်ဖိုကျွိုက်ဖို (ကောတုဟိလက)တဲင် (ကောတုဟလိက ထွိုင်ႏသဲင်ꩻထွာ ဃောသကနဝ်ꩻ) သဲစ်ကထီႏ ဃောသကတဲ့ တလဲင်ႏချင်ꩻ ကျွိုက်တခြွိုက်ချင်ꩻစွယ်ꩻစွဉ်ႏ။
၁၆။ ဝွေꩻသီးဝင်ꩻနီယိုနောဝ်ꩻ ဇာတ်ကရီးပန်အွဉ် ထွာလွဉ်ဗာႏဖို တမာဝါꩻတဲင် တွိုႏသဲင်ꩻဘဝယိုတဲ့ အကံႏပေါင်ꩻ၊ အကျောင်ꩻဆွိုက်ယင်းဒျာႏလို့ဝင်ꩻ။
၁၇။ သဌေꩻပိုမူႏ ထာꩻယူႏဝွေႏဖန်ႏ ဉာဏ်ႏထာꩻစိက္ကူꩻ ထူꩻဟောဝ်ငါႏနောဝ်ꩻမꩻ လꩻလို့စွဉ်ႏ သဌေꩻအမွေႏ။
၁၈။ ဝွေꩻသီးတမာဝါꩻနဝ်ꩻ ကထင်ႏခြွေခြာႏတဲ့ အွဉ်ႏမွေးတောဝ်းအနမ်း၊ သေလူႏသေတန်ꩻဒျာႏ၊ တနီꩻတနီꩻယို လို့ပဉ်တရေင်တရေင် စတဲင်နုဲင်းနောဝ်ꩻဖုံႏအကျောင်ꩻ-။
"ဃောသကသဌေꩻဝတ္ထုယို ကလိုႏထူႏငါႏ'သွဉ်အီနမ်း" (သင်ခန်းစား)ဖုံႏနောဝ်ꩻ"- ၁။ ပိုယာႏခန်းတဲ့ယဝ်း ကျမ်ႏမာꩻသီထိုꩻမွုန်း၊ ဝွဋ်တွပ်၊ချာဒါႏလိုꩻ (ထွားသော့ꩻ ဃောသကနောဝ်ꩻ)
၂။ ကေန်ꩻခြေားလိုꩻခမ်း အံႏစင်းဗာႏခန်းနမ်းတဲ့ယဝ်း သေလူႏတန်ꩻသွော့၊ မာꩻသွော့ကုသိုလ်ႏ၊ (ထွားနုဲင်းသွော့ ကာဠီနောဝ်ꩻ)
၃။ အမျိုꩻတစွယ်ꩻလံꩻတောဝ်းနောဝ်ꩻ တွမ်ႏစွယ်ꩻလံꩻမွုန်း၊ ကွပ်ဥပါဒါန်ႏ ထာꩻစွယ်ꩻလံꩻနဝ်ꩻတဲင် ကစွယ်ꩻလံꩻအတွိုင်ꩻ သဲင်ꩻထွာဒါႏ (ထွားသွော့ ကောတုဟလိက ကသဲင်ꩻထွာထွီႏနဝ်ꩻ)။
၄။ ပိုလွူးပိုယာႏ အွဉ်ႏတရျာႏရျားသွော့ မေတ္တာႏ၊ ပေါႏမေတ္တာႏ တရျားတောဝ်းနောဝ်ꩻ ခိုးလျားဗာႏထာꩻနုဲင်းကောသမ္ဗီႏသဌေꩻနဝ်ꩻသွူ။ (ထွားသွော့ ကောသမ္ဗီႏသဌေꩻ ကကျံႏတကုဲင် ဃောသကနဝ်ꩻ၊ ဃောသကသီတဝ်း အပိုယာႏသီဗာႏတောဒျာႏ)။
၅။ ကျံႏတကုဲင်မွိုန်းဝင်ꩻ၊ ဝဋ်တွမ်ꩻချာဒါႏ၊ ဗာႏဆာချာဒါႏနမ်း၊ ဟောဝ်ငမ်းငါႏ မရေႏမရာႏ။
၆။ ပေါႏတဟော်ꩻဒါႏတောဝ်းလိတ်နောဝ်ꩻ ဝင်ꩻကျံႏနုဲင်းမုဲင်ꩻ၊ ဝင်ꩻတဲမ်းနုဲင်းမုဲင်ꩻ သေရွမ်းတောဝ်းတဲင် ဝွမ်ႏလိုꩻတအာႏနောဝ်ꩻ ဗွိုန်ပီငါႏလို့ဝင်ꩻ၊ ဘဝထဲ့ဖွိုႏငါႏ၊ (ထွားသွော့ ဃောသက ကအီလွေꩻလိတ်နောဝ်ꩻ)။
၇။ လောႏဘတန်လွဉ်ꩻငါႏမွုန်း၊ ကွပ်ဝိသမလောဘ လွဉ်ꩻချိုꩻငါႏတဲင် တွိုႏအနာလွိုနောဝ်ꩻ အဗွေႏတဲ့ဒုက္ခဗာႏ၊ ဥစ္စာႏတခြိုꩻတဲ့ ထွာထိုꩻဒါႏဝင်ꩻထာꩻ) (ထွားသွော့ ကောသမ္ဗီႏသဌေꩻနောဝ်ꩻ)[၁][၂]