ငဝ်းပူႏဇောႏလင်ꩻအမျိုꩻမျိုꩻ

ငေါဝ်းဝုဲႏအီဘုရာꩻ ယိုတယွာꩻ

ဘန္တေဩဗွေႏ သမ္ဗုဒ္ဓ၊ (အစိန္တေယျ) ဘုရာꩻသျင်ႏ၊ ကွတ်ꩻပါꩻဂုဏ်ႏအင်ႏ ဗွေပြဲ့ꩻစုံႏ၊ သိုမ်ဆီတဘုံႏ လိုꩻလူꩻဖါ၊ ဝေနေယျသတ္တဝါႏ အကဲႏစော့ꩻ၊ ခွေသွဉ်းရိုႏသေႏ ကန်ႏတော့ꩻရီး၊ စူနုံဆီလီး မတ်ဗိုဖူႏ၊ သီသကတူႏ မတ်မော်နမ်း၊ ဦးချထေင်းထင်ႏ အုံလင်ꩻဝုဲႏ၊ အပဲစ်ထာꩻခုဲႏ ကံႏသိုမ်ပွိဒင်၊ ငမ်းသꩻအုံဗော့ꩻ ခွိုင်းရွဗာႏ၊ ဝစီႏလိစ်ꩻပါꩻ နဝ်ꩻဖြောင်းဖြေꩻ၊ အွိုးယိုတရေꩻ ဆူꩻတကုဲ၊ ဒုစရွိုက်အသုဲ ငမ်းအဝ်ႏဒါႏ၊ မနော်ꩻသွံပါꩻ သꩻကိုယူႏ၊ နုဲးယိုနုဲးဆူꩻ သꩻထင်းကြွို့ꩻ၊ မီႏမာႏတရွို့ꩻ သွံပါꩻကံႏ၊ ပွိုးမသေနမ်း ငမ်းအဝ်ႏဒါႏ၊ ခွေသွဉ်းတကာႏ ကွီလွစ်ကင်ꩻ၊ ကာယကြိုတွင်ꩻ နမ်းကဝ်ႏလောင်း၊ ယမ်ကစင်ကြောင်း ထီသူႏလာႏ၊ သျိခိုးဝန္ဒနာႏ ကန်ႏတော့ꩻလဝ်း၊ သျင်ႏတောႏဗွေႏစဝ်း သမ္ဗုဒ္ဓ၊ ရိုႏသေႏဂါရဝ ဗာႏအတွက်၊ အပဲစ်ယမ်ငက် ထာꩻကုဲထိုꩻ၊ ထာꩻဟဝ်အကျိုꩻ ယမ်ကရောက်၊ လောကမျက်မောက် အထင်ႏသျာꩻ၊ နမ်းငါသင်္သရာႏ ယမ်တိုꩻတက်၊ ဘဝဆက်က် ဘေꩻရန်ႏသူႏ၊ ထိုꩻမားထဲ့ဟူႏ ကင်ꩻညာꩻယန်၊ မဟာႏကျိုꩻတန် ဆုꩻငတ်ꩻပွိုင်၊ ယမ်ကဗွေတွိုင် တရေꩻရေꩻ၊ နောင်ႏလာႏမိတေꩻ အစိတ္တ (အဇိတ)၊ မီႏပွင်ꩻမီႏဖြ တွိုႏနဝ်ꩻခါ၊ လူꩻလိုꩻချွစ်ပါ ဟဲ့ꩻဝွေႏနေႏ၊ နိဗ္ဗာန်ႏရွေႏပြေႏ ခင်ႏလမ်းရှူႏ၊ အမတဝေင်ꩻဦꩻ ဘေꩻရန်ႏကင်ꩻ၊ ဒါႏယကာႏရင်ꩻ ခွေသွဉ်းယို၊ ဦးချကေႏညိုႏ ဂါရဝ၊ မဟပ္ဖလ အာနိသင်ႏ၊ မန်ႏန်ႏယမ်ဖေႏ လꩻလင်ꩻဩ။ သာႏဓု-သာႏဓု-သာႏဓု

ကွီဖဒဲဉ်ဟန်ႏကျိုꩻ

ယောယိုငခါ ထွူဖြီꩻစီꩻ၊ ယပ်ꩻနမ်းဆျာꩻထီ ဝွေႏအမျ၊ သတ္တဝါႏအနန္တ လꩻတွာတွာ၊ အဝ်ႏကုဲင်ထဲင်းခြာ နိဂုင်ꩻချုက်၊ တဖြာꩻတပုက်က် ဗွေႏသီးလောင်း၊ ဟော်ꩻခြာဆုတောင်ꩻ ထဲင်းတပြန်ႏ၊ အကျိုꩻဒဲဉ်ဟန်ႏ စာႏဂတွက်၊ သွဉ်းသီးစိုမ်ꩻမက် ကလူႏဗာႏ၊ သီႏလသွစ်ꩻပါꩻ အကျိုꩻကီꩻ၊ ကောထွာပိုလီꩻ ယိုငခါ၊ ပေႏတန်ဆေ့ꩻအာ မူႏတွမ်ႏမောင်ႏ၊ နေးတွမ်ႏဟူဖေါင်း ကွီဖလင်ꩻ၊ နေးတွမ်ႏကဝ်ႏခံꩻ ကွီတောင်ꩻပြန်ႏ၊ အဋ္ဌသိဉ်ထံꩻ သီႏလသား၊ မွိုးဖြားဖါဖြားသီးယာဟွေး။ သာႏဓု-သာႏဓု-သာႏဓု

ဖိစ်ပင်ꩻသွမ်ꩻသဒ္ဓါႏ စာႏဂတာႏ

ဩဗွေႏဩစဝ်း သွဉ်းတကာႏ၊ ကံႏတန်သွံပါꩻ သွဉ်းကွီရီႏ၊ ကာယဝစီႏ မနော်ꩻပဲစ်၊ ယမ်ကကင်ꩻလွစ် ဗွေႏစဝ်းဩ၊ ကန်ႏတော့ꩻပူႏဇောႏ လဝ်းဟွုန်ဗာႏ၊ နီဗွေႏဆရာႏ မွူးရဝ်ꩻရင်ꩻ၊ သွဉ်းသီးဖိစ်ပင်ꩻ လဝ်းငသေꩻ၊ စဝ်းစဝ်းလေလေ အခိန်ႏခါႏ၊ သဲꩻခံႏအုံဗာႏ ယွုန်းယောဖန်း၊ ပိဏ္ဍပါတံ သွမ်ꩻဩဇာႏ၊ သွဉ်းသီးတကာႏ အီႏလောင်ꩻလူႏ၊ သုံꩻဆောင်ႏတောႏမူႏ ယဝ်းထွူတဲင်၊ တရာꩻထံꩻသဲင် ထံႏမ(ဓမ္မ)စက်၊ ဟော်ꩻဖေႏဗွောင်ဖွက် သွမ်ꩻပန်ꩻကျိုꩻ၊ ပေႏတန်မူႏခို နီသွဉ်းသီး၊ သာႏဓုငီꩻငီꩻဗာႏလွဝင်ꩻကွိုနဲးဗွေႏစဝ်းရဟန်ꩻသင်္ဃာႏဩ။

ဝွန်ႏခံႏသေꩻဝင်ꩻ ကျောင်ꩻတာႏရင်ꩻ

ဟန်ႏသလဲင်ႏခါယို ဒါယကာႏ၊ သွမ်ꩻပန်ꩻသတ်ထာႏ ဒါယက၊ ကိုႏစီႏဖြွမ်းလွ တွိုင်ႏပင်ႏဝင်ꩻ၊ ခိုဗင်ႏမူႏနံꩻ တကာႏပေႏ၊ ဒါႏနမဲဉ်ဖေႏ မွူးရဝ်ꩻရင်ꩻ၊ စာႏဂအခန်ꩻ မွူးရဝ်ꩻစဝ်း၊ ဟန်ႏဟာလျောက်လဝ်း ဖိစ်ပင်ꩻသေꩻ၊ ကဝ်ႏစော့ꩻတရေꩻ ဟူဖေါင်းတုဲ၊ ရသာႏဟွမ်အုဲ လွီးပနဲဉ်ႏ၊ သော့ꩻငီꩻဒျꩻစဲဉ်ႏ တလင်ႏကို၊ ဆေႏလိက်လွောင်ႏယို မေႏခြဲစ်ꩻလွမ်၊ ညောင်ႏရွီႏဆဒွမ် ပြူးလာႏရေꩻ၊ မွိုင်ꩻပွဉ်ယာသေꩻ ပလောင်းကောင်၊ ထုက်ထင်ႏပိဉ်လွမ် နေင်ႏသွေႏပီႏ၊ စောက်ꩻခမ်းသေင်ႏစီႏ တꩻစေꩻတူႏ၊ ပကိုꩻတောင်ႏအူ မောက်ꩻမူးရာႏ၊ လပသေႏချာႏ ပါစုံႏလင်ႏ၊ လိုꩻယွဲးခိုဗင်ႏ ဒါယကာႏ၊ ပငါပရာꩻ ဖိစ်ပင်ꩻသေꩻ၊ ပုဂ္ဂိုလ်ႏဘန္တေ စရိယော၊ တွမ်ႏသင်္ဃာႏတောႏ ဟူသမျ၊ ဝွန်ႏခံႏအာမ အုံယွော့လင်ꩻ၊ ဘဝမူႏနံꩻ ဒါယိကာႏ၊ သွမ်ꩻပန်ꩻသဒ္ဓါႏ ဒါယက၊ အားလုံးဟွုန်လွ ထွူမတဝ်း၊ ပေႏတန်လောင်ꩻရဝ်း တဖုံႏဟွေး။