ဆင်ပေႏထွားနုဲင်းမွုန်းဆင်တန်
"နာဂသုတ် (ဆင်ပေႏဖုံႏနဝ်ꩻ ထွားနုဲင်းမွုန်းတဝ်း ဆင်တန်)"
အွိုးခꩻတလဲင်ႏ- နီဗွေႏဘုရာꩻအဝ်ႏအုံ သာဝတ္ထိခမ်း၊ ကျောင်ꩻဇေႏတဝွန်ႏကိုအတွင်ꩻ စင်ꩻပေႏတပါꩻနဝ်ꩻ သဲင်ꩻလယ်ႏအုံည တကာႏလမ်း၊ ရဟန်ꩻဖုံႏရိုꩻ 'အုံညမွုန်းလမ်းဟုဲင်း ဗွေႏစင်ꩻပေႏ'-ကထင်ႏရိုꩻနုဲင်းနဝ်ꩻတဲင် စင်ꩻပေႏရိုꩻချာ တွိုႏဗွေႏစင်ꩻတန်(ရဟန်ꩻတန်)ဖုံႏမဉ်ႏတဲ့ သဲင်ꩻလယ်ႏအုံညလမ်းဟ နီယိုစင်ꩻပေႏဒျာႏ၊ ဒေါ့ꩻခရာႏအဝ်ႏကဲထမုဲင်ꩻ"ဒေါ့ꩻချာနုဲင်းနောဝ်ꩻသွူ။ ရဟန်ꩻသီးဖုံႏ လွေꩻလောဝ်းနီဗွေႏဘုရာꩻ၊ နီဗွေႏဘုရာꩻရိုꩻ- "ရဟန်ꩻသီးဖုံႏဟွေး- ခွေအီႏခြုဲင်းနယ်ကသီ ဆင်တန်နွို့ထီ အံႏဗိုခရာႏ၊ နာႏစဲင်းစဲင်းလွေသွော့နော၊ အွိုးစခါ တခြာတန်ကိုနဝ်ꩻ ထီနောင်အဝ်ႏတနောင်၊ ထီနောင်ယော့ကိုနဝ်ꩻ ဗိုတုဲင်ဖုံႏအဝ်ႏ၊ ဆင်ဖုံႏနဝ်ꩻ အာႏကွိုꩻဗိုထောင်ꩻ၊ အဝ်ႏမောင်ꩻဗိုတုဲင်ဖုံႏနဝ်ꩻတဲင် အုံပြုံႏပြင်ႏ ထီနောင်ထျꩻဖုံႏနောဝ်ꩻသွူ။ တွိုႏတနီꩻ- ဆင်တန်ဖုံႏနဝ်ꩻ နမ်းတန်နမ်းထိုတဲင် နွို့ထီယော့ယော့ကို ဗျာႏဗိုထောင်ꩻအံႏစုဲင်-ကဉ်ႏဗိုတုဲင်အံႏမျောႏ၊ ပျောႏမွေးစွဉ်ႏထာꩻ၊ ဆင်တန်ဖုံႏ ကနွို့အံႏနုဲင်းနဝ်ꩻနဝ်ꩻ ထွာအီဒျာႏအာႏ၊ ထွာအီဒျာႏသွီႏယာႏ၊ တဗာႏဗာႏ တအဝ်ႏခံတဝ်းထီကို၊ တဗာႏဗာႏ တသီဖိုတဝ်း ထီနောင်ကိုနောဝ်ꩻသွူ။ ရဟန်ꩻသီးဖုံႏဟွေး- ဆင်ပေႏဖုံႏနဝ်ꩻ ထီႏဒျာႏဆင်တန်ဖုံႏ ဗျာႏဗိုထောင်ꩻ ပသေထီအံႏစုဲင်-ကဉ်ႏဗိုတုဲင် ပေသထီအံႏမျောႏ၊ ထီႏဒျာႏဆင်တန်ဖုံႏ ပျောႏထာꩻနဝ်ꩻလွုမ်ꩻ၊ ထီယော့ထီဖွိုꩻ သေယူႏတောဝ်း၊ နီနမ်းဖွိုႏဖို ဆင်တန်နမ်းဖွိုႏထို၊ ကွာႏနုဲင်းမုဲင်ꩻယို သေယူႏတဝ်း၊ ထီႏတဖွေါင်းဒျာႏဗော့ꩻ ထီတခိုႏမော့ကီ၊ ထီယော့ဗီမ်သီဒါႏနဝ်ꩻ တသေယူႏယာႏတောဝ်းနောဝ်ꩻသွူႏ ရဟန်ꩻသီးဖုံႏဟွေး- ဆင်ပေႏဖုံႏနဝ်ꩻ ထီႏတဖွေါင်းမော့ကီ-ဗီမ်သီဒါႏယူႏတဝ်း၊ နွို့နုဲင်းနုဲင်းထီနောင်ကို ဗျာႏဗိုထောင်ꩻသဲစ်ကဟောဝ်းꩻ ပေသတဝ်း-အံႏစွဉ်ႏ၊ သေ့ꩻပါ၊ ဟံႏဗော့ꩻပါ၊ သုဲင်ꩻဖွန်ႏပါ၊ ကွပ်နဝ်ꩻမꩻ ထွာရောႏဂါႏတဲင် ကဆာတဝ်တဲ့အဝ်ႏ၊ ကသီထိုꩻတဲ့အောဝ်ႏနောဝ်ꩻသွူ။ ရဟန်ꩻသီးဖုံႏဟွေး- ဆင်ပေႏ ယဗာႏဗာႏနဝ်ꩻ နွို့ငါငါထီယော့၊ ကွဲညညရွိုး၊ ယားထီဒါႏဒွုမ်၊ ဗဲ့ꩻခင်ႏနွောင်ꩻဒွုမ်တွော့ꩻ သီသော့ꩻထီကိုတဲ့အဝ်ႏ၊ ကထွာနုဲင်းနဝ်ꩻနဝ်ꩻ တထွာအီတဝ်းအာႏ၊ တထွာအီတဝ်း သွီႏယာႏ၊ ထွာတောဒျာႏရောႏဂါႏ၊ တုꩻနုဲင်းဆင်တန်နဝ်ꩻ ထွာတောဒျာႏ ထာꩻမာႏနောဝ်ꩻသွူ။ ရဟန်ꩻသီးဖုံႏဟွေး- စင်ꩻတန် (ရဟန်ꩻတန်)သီးဖုံႏနဝ်ꩻ ထာꩻသူႏသေအဝ်ႏ၊ နေးလောဘ မဉ်လꩻလာဘ်မွေးတဝ်း၊ တွုံꩻသွမ်ꩻ၊ သဲင်ꩻသွုံꩻသွမ်ꩻ၊ သဲင်ꩻဟော်ꩻဒျာႏတရာꩻ၊ မာꩻဖေႏတကာႏသီး ကလꩻကုသိုလ်ႏ၊ တကာႏကေႏညို ကတာႏပင်ꩻဒျာႏ၊ စင်ꩻပေႏဖုံႏနဝ်ꩻ ထိန်ꩻဣန္ဒြေႏဒါႏတဝ်း၊ အမွန်းအပျောႏအာ၊ အပဲ့စ်ထွာဒါႏ၊ သꩻလော်လယ်ဒါႏ၊ မဉ်ထွက်ဒါႏထာꩻ၊ ကွပ်နဝ်ꩻမꩻ သွုံꩻဝင်ꩻဒဲဉ်ဖေႏကထန်ႏ၊ အံႏဝင်ꩻဟန်ႏဖေႏကထွိုက်နဝ်ꩻ ကျင်ꩻသွုံꩻအုံဟောဝ်ဟောဝ်သွော့နော"ဗုဒ္ဓေါဗွေႏဘုရာꩻ မိန်းခါꩻနုဲင်းနောဝ်ꩻသွူ။ (သုတ္တန်ႏပိဋကတ်၊ နိဒါနသံယုတ်ပါဠိ၊ နာဂသုတ်)[၁][၂]