ဆရာႏတွမ်ႏလိုꩻဆာ

"ဆရာႏတွမ်ႏလိုꩻဆာ သေချာငါမꩻ" မနုဿာႏလိုꩻပို အခိုတယောဝ်း၊ အမူႏတယောဝ်း တရေꩻတကုဲင်၊ ခြွေခြာႏကေန်ꩻခြေား တရွေꩻတောဝ်း သဲင်ꩻထွာလိုꩻ အီသဲင်ꩻပါထွူလဲဉ်း ရုပ်ခန္ဓာႏ နမ်းတဗာႏ ယာႏတဒူယိုတဲင် ထာꩻဆာယို ပါသဲင်ꩻထွူလဲဉ်းဒျာႏ ပငါပရာꩻနောဝ်ꩻသွူ။ ဗွေႏဘုရာꩻဗုဒ္ဓဟော်ꩻ အနိစ္စ ဒုက္ခ အနတ္တ ဖြားဗာႏ ဆာဗာႏ သီဗာႏဒျာႏနောဝ်ꩻမꩻ စွုမ်ႏဖြာꩻဖြာꩻ မော့ꩻခွဲးတလူႏဗာႏ၊ လွိုဆန်တလꩻတောဝ်းတဲင် မဉ်ႏခံႏစာꩻဗာႏ၊ မဉ်ႏမော့ꩻလွဉ်စိန်ႏစွော့ꩻဒါႏ ထာꩻဆာနောဝ်ꩻ အောဝ်ႏလိုႏယူႏဒါႏဒါႏ၊ ပညာႏအောဝ်ႏလိုႏပါ၊ ရဟောဝ်နွောင်ꩻ၊ ရဟောဝ်လꩻကရိုꩻဒါႏ ဉာဏ်ႏထာꩻယူႏနောဝ်ꩻ အောဝ်ႏလိုႏယူႏကောဝ်းဒါႏဒါႏငါႏနောဝ်ꩻသွူ။ ထာꩻဆာကရိုꩻနောဝ်ꩻ အောဝ်ႏနီစွိုးလွုမ်ꩻ (၁) သွီႏတလီꩻမာꩻထွာတဲင်ဆာ (၂) အောဝ်ႏသွီႏတလီꩻအထန်ႏဖဲ့ꩻလွဉ်တဲင်ဆာ၊ မဉ်ႏဒေါ့ꩻဗာႏယိုꩻယိုꩻမာꩻမာꩻ အောဝ်ႏထီႏမဲ့ဆꩻလယိုခါနောဝ်ꩻ ထီႏဗာႏနုဲင်းနောဝ်ꩻလွုမ်ꩻသွူ။ (၁) သွီႏတလီꩻမာꩻထွာတဲင်ဆာ-ကရိုꩻနောဝ်ꩻ နီရုပ်ခန္ဓာႏယို နီကအံႏသော့ꩻဒါႏ အဆာႏအာဟာႏရ တစွိုးစွိုးတဲင် မဉ်ႏတတဲ့ꩻခေါဝ်းတောဝ်း တွမ်ႏဝွေꩻနောဝ်ꩻ ထွာအီဒါႏ ထာꩻဆာတမျိုꩻမျိုꩻ၊ မဉ်ႏတမွေးတောဝ်း ကွပ်ရာႏသီႏဥတု တဗူႏတဗန်ႏထိုꩻတဲင် တွမ်ႏဝွေꩻမဉ်ႏလွေꩻတလူႏဗာႏလဲ့ ဆာအီဒါႏ တမျိုꩻနေနေနောဝ်ꩻသွူ။ ယိုနောဝ်ꩻ သွီႏတလီꩻမာꩻထွာတွော့ꩻ ဆာရိုꩻဗာႏနုဲင်းနောဝ်ꩻသွူ။ (၂) အောဝ်ႏသွီႏတလီꩻအထန်ႏဖဲ့ꩻလွဉ်တဲင်ဆာ-ကရိုꩻနောဝ်ꩻ အောဝ်ႏမွိုးသန္ဓေႏကိုပါလင်ꩻလွဉ်တဲ့ တမွေးတောဝ်း၊ အဆာႏအာဟာႏရတစွိုးစွိုးမာႏတွော့ꩻ ဆာအီတဲ့ တမွေးတောဝ်း၊ ရာႏသီႏဥတုဖေါက်ပြန်ႏ တဗူႏတဗန်ႏထိုꩻတွော့ꩻ ဆာအီတဲ့တမွေးတောဝ်း၊ နီဘွုံꩻကံႏထဲ့ဖွိုႏ ဂျိုဟ်ႏသက်ထဲ့တရော့ꩻတောဝ်းခိန်ႏ နီဝွဋ်ခံႏလံꩻမဉ်ႏတနꩻ အောဝ်ႏမိစ္ဆာႏမိစ္ဆာႏသီး ဉာဏ်ႏတစွိုးစွိုးတွော့ꩻ ကကျံႏလွဉ်၊ ကမာꩻထွာလွဉ်တွော့ꩻ ဆာအီနောဝ်ꩻစားနောဝ်ꩻ ရိုꩻဗာႏသွီႏတလီꩻအထန်ႏဖဲ့ꩻ မာꩻထွာလွဉ်တွော့ꩻဆာ၊ မဉ်ႏဒေါ့ꩻဗာႏယိုꩻယိုꩻလဲ့ "ပယောဂဆာ"ရိုꩻဗာႏနုဲင်းနောဝ်ꩻသွူ။ အမုဲင်(၁) အောဝ်ႏသွီႏတလီꩻအကို မာꩻထွာလွဉ်တဲင် ကဆာဗာႏနောဝ်ꩻ နေးတွမ်ႏသိပ္ပံပညာႏ ကုလာလုမ်ꩻလာꩻနောဝ်ꩻ ဟောဝ်နွောင်ꩻအီလꩻရိုꩻနောဝ်ꩻလဲ့ အမုဲင်(၂) ပယောဂဆာမျိုꩻနောဝ်ꩻ သိပ္ပံပညာႏလုမ်ꩻလာꩻဖေႏ တဒါႏတောဝ်း၊ အောဝ်ႏဒျာႏ ဝိဇ္ဇာႏပညာႏလုမ်ꩻလာꩻနောဝ်ꩻမꩻ ဟောဝ်နွောင်ꩻအီလꩻနောဝ်ꩻသွူ။ အောဝ်ႏသွီႏတလီꩻအထန်ႏဖဲ့ꩻ မာꩻထွာလွဉ်တွော့ꩻ ကဆာဗာႏ ထာꩻဆာပယောဂမျိုꩻနောဝ်ꩻ သိပ္ပံပညာႏသားတွမ်ႏ လိုꩻသေလိုꩻဒါႏယဟန်ႏသားဖုံႏ၊ လိုꩻရွဉ်အာသားဖုံႏ၊ လိုꩻသꩻစွယ်ꩻတမွိုꩻတရာꩻသားဖုံႏတွမ်ႏ ခေတ်လိုꩻပေႏယိုခါနောဝ်ꩻ ယွုမ်းကြွို့ꩻတောဝ်းနောဝ်ꩻသွူ။ ပွိုးတမုဲင်ꩻနဲးတဲင် ထာꩻဆာပယောဂမျိုꩻနောဝ်ꩻ တထီႏတောဝ်းအနမ်းစဲင်းစဲင်းစဲ့စဲ့တဖဲ့ꩻ၊ လိုꩻကအီႏမော့ꩻဗာႏ ထာꩻဆာပယောဂလဲ့ အောဝ်ႏကြွို့ꩻတောဝ်းတဖဲ့ꩻ၊ ဆရာႏလုမ်ꩻလာꩻ ပယောဂသား တအွဉ်ႏနယ်နွောင်ꩻတောဝ်း အနမ်းအခြုံတဖဲ့ꩻတွော့ꩻ လိုꩻယဟန်ႏနောဝ်ꩻ ပယောဂထာꩻဆာယို တယွုမ်းကြွို့ꩻတောဝ်းနောဝ်ꩻသွူ။ တဲမ်းလိတ်သား ဖါသွီႏယာႏဒျာႏမဉ်ႏတဲ့ ပယောဂကရိုꩻနောဝ်ꩻ တယွုမ်းတောဝ်း၊ လောကကို ပယောဂကရိုꩻနောဝ်ꩻ အဲဉ်ထောဝ်း-ရိုꩻဒျာႏနုဲင်းနောဝ်ꩻနေနေသွူ။ တဲမ်းလိတ်သား ခွေသွဉ်းပွုံႏခွိုင်ꩻနယ်ဖေႏနုဲင်းယို- လောကကို ပေါႏရန်ႏသူႏတအဲဉ်ထောဝ်းနောဝ်ꩻ "စဲ့ꩻ"ကရိုꩻနောဝ်ꩻ တပေါႏသော့ꩻဗာႏတောဝ်း လောကကို၊ ဒုစရဲက်သား မဉ်ႏတအောဝ်ႏတောဝ်းလဲ့ "ယဲꩻ"ကရိုꩻနောဝ်ꩻ တပေါႏသော့ꩻဗာႏတောဝ်း၊ တခွန်ꩻမဉ်ႏတအောဝ်ႏတောဝ်းလဲ့ "သော်"ကရိုꩻနောဝ်ꩻ လောကကို ပေါႏသော့ꩻခရာႏတအဲဉ်ထောဝ်း၊ ပယောဂမဉ်ႏတအောဝ်ႏတောဝ်းလဲ့ "ပယောဂဆရာႏ"ကရိုꩻနောဝ်ꩻ လောကကို တအောဝ်ႏတောဝ်းနောဝ်ꩻသွူ။ ကွပ်နောဝ်ꩻမꩻ ခွိုꩻနွယ်ႏပအိုဝ်ႏသီးဖုံႏဟွေး- နီကအုံသော့ꩻဒါႏ ခမ်းထီယိုတဖြုံႏကိုနောဝ်ꩻ ခံႏဗာႏအာငါႏ ဝင်ꩻပေ့ꩻမဲ့ပေ့ꩻနားတဖဲ့ꩻ၊ ပညာႏရေꩻ အရန်းထဲ့ဖွိုႏငါႏတဖဲ့ꩻတဲင် နီနမ်းတွမ်ႏနီနမ်း အောဝ်ႏခံႏစာꩻဗာႏသွူ ထာꩻဆာလဲ့ ခွေယို ခံႏဗာႏထာꩻဆာအမျိုꩻမုဲင်ꩻကရိုꩻနောဝ်ꩻ ကဉ်းအာအာ တသေချာတောဝ်းနောဝ်ꩻမꩻ မဉ်ႏဆာလဲဉ်းသွူလဲ့ နဲစ်ဟဲ့ꩻဗော့ꩻဆရာႏ၊ နီထာꩻဆာဖေႏကဟောဝ်နောဝ်ꩻ အမာꩻဖေႏဒါႏ အောဝ်ႏဆရာႏလွုမ်ꩻ ရိုꩻနောဝ်ꩻတွော့ꩻ လꩻရာꩻ ဗော့ꩻရာꩻဆရာႏ၊ ဖဉ်းမွိုတ်ရာꩻဆရာႏ ဟဲ့ꩻစွဉ်ႏဒျာႏနောဝ်ꩻသွူ။ ဆရာႏလဲ့ တသီႏဆဲ့ꩻဆရာႏ၊ ဖေႏအံႏပိန္တော်ꩻဆရာႏ၊ ရဲဉ်ꩻခေႏဖေႏဆရာႏ၊ ပယောဂဆရာႏ-စတဲင် ဆရာႏအောဝ်ႏယင်းအမျိုꩻမျိုꩻအကို နီထာꩻဆာယို ရခေါဝ်းသင်ꩻတွမ်ႏ ဆရာႏမျိုꩻမုဲင်ꩻကရိုꩻနောဝ်ꩻလဲ့ ခါးလားကဟဲ့ꩻကပင်ꩻဆရာႏခိန်ႏ နီအောဝ်ႏလိုႏယူႏဒါႏဒါႏငါႏနောဝ်ꩻသွူ။ ကောကထွာဒါႏ၊ ကောကမာꩻဒါႏ နမ်းဆရာႏသားဖုံႏလဲ့ အောဝ်ႏလိုႏပဲင်ႏငါႏ ပငါပရာꩻ၊ အောဝ်ႏလိုႏဒါႏစွုမ်ႏစွုမ်ႏငါႏပညာႏ၊ ပေါႏမာꩻသွူဆရာႏ၊ ပေါႏအမျာꩻအာႏကွိုꩻသွူလဲ့ သꩻဆွော့ꩻဖေႏကလꩻ၊ အောဝ်ႏလိုႏအမျိုꩻမုဲင်ꩻ ဖေႏကဒါႏနောဝ်ꩻ ကောကထွာဆရာႏယို လိုႏငါႏပညာႏလုမ်းနမ်းနောဝ်ꩻသွူ။ "ဆရာႏ"ကရိုꩻနောဝ်ꩻ ထွာ"ဒါနမလို ပုဂ္ဂိုလ်လေးဦး"ကို ပါသော့ꩻတပါꩻတွော့ꩻ ပေါႏမာꩻသွူနမ်းဆရာႏလဲ့ လိုႏမျိုꩻမုဲင်ꩻဖေႏကလꩻ၊ လိုꩻဆာသꩻဖေႏကဆွော့ꩻနွောင်ꩻနောဝ်ꩻ အောဝ်ႏလိုႏလဲပ်ပဲင်ႏငါႏ ပငါပရာꩻနောဝ်ꩻသွူ။ ဆရာႏသီးနောဝ်ꩻ "လက္ခဏာပိုင်လျှင် သွေးမကိုင်စတမ်း၊ သွေးလေကိုနိုင် ပြဒါးတိုင်မစမ်း၊ ဤသုံးခန်း ကန်းသောသူ ပြုမူလူအရမ်း"မန်းငေါဝ်းတွိုင်ꩻ အောဝ်ႏနုဲင်းနောဝ်ꩻအတွိုင်ꩻ ပေါႏမာꩻသွူဆရာႏလဲ့ ပဲင်ႏဗဲင်းပတာꩻ၊ တောဝ်းလဲ့ ပဲင်ႏဗဲင်းသွီႏ၊ တောဝ်းလဲ့ ပဲင်ႏဗဲင်းလက္ခဏာႏ-နောဝ်ꩻသွံပါꩻ တပါꩻပါꩻပဲင်ႏမꩻ နီကအီႏလုမ်ꩻလာꩻဒါႏထာꩻဆာယို အယပ်ꩻအခုဲင်ႏပေါႏမော့ꩻဗာႏတောဝ်းနောဝ်ꩻသွူ။ မဉ်ႏတပဲင်ႏခါꩻတောဝ်းတစွိုးစွိုးနောဝ်ꩻ ဆာကတူႏ လုမ်ꩻလာꩻခင်ႏ၊ ဆာခင်ႏလုမ်ꩻလာꩻကတူႏတဲင် လိုꩻဆာတန်ႏတလူႏတောဝ်း အယပ်ꩻအခုဲင်ႏလဲ့ တလူႏဗာႏဒါႏ၊ တန်ႏလို့ထွိုက်လို့သင်တောဝ်းလဲ့ လို့အာဗာႏနောဝ်ꩻမ အွဉ်ႏသꩻဗွာဗွာတဲင် သွဉ်ပဲင်ႏပဲင်ႏထွူသွူမꩻ ကွဲးလုမ်ꩻလာꩻဝင်ꩻနောဝ်ꩻ ဟောဝ်ငါႏအကျောင်ꩻ-။ ဆရာႏတွမ်ႏလိုꩻဆာနောဝ်ꩻ အောဝ်ႏလိုႏသေနာႏလူႏလုဲင်ႏဖေႏဒါႏငါႏဝင်ꩻ၊ ဆရာႏယင်ဟန်ႏလဲ့ လိုꩻဆာသဲစ်ကဟဲ့ꩻ ဝင်ꩻအီႏဟောဝ်မကောင် ဟောဝ်တောဝ်းမကောင် သေဒွိုန်း၊ ဗက်ꩻတန်လဲဉ်းဝင်ꩻစူဟွာႏ၊ ကွီတဗက်တဗွိုရီးလဲဉ်းဝင်ꩻစားနောဝ်ꩻလဲ့ အောဝ်ႏဟွိုန်ထီႏထွꩻဗာႏဖိုအာငါႏနေနေနောဝ်ꩻသွူ။ လိုꩻဆာယဟန်ႏလဲ့ ခါးလားကဟောဝ်နောဝ်ꩻ "မဉ်လို့ခွိုင်းမုဲင်ꩻလို့ ဟောဝ်ဒါႏငါ၊ ဆရာႏကွီတွိုင်ꩻဖေႏဒျာႏ"ရိုꩻနောဝ်ꩻတွော့ꩻ ထွိုင်ႏဟောဝ်နောဝ်ꩻ ဟောဝ်ချာဒျာႏ၊ ထွိုင်ႏဟောဝ်တောဝ်းနောဝ်ꩻ ထီႏဆရာႏလဲ့ နုဲင်းတေားဒျာႏထာꩻလောက်ꩻနုဲင်းနောဝ်ꩻတဲ့ အောဝ်ႏနေနေနောဝ်ꩻသွူ။ ကွပ်နောဝ်ꩻမꩻ ဆရာႏတွမ်ႏလိုꩻဆာယို ယူႏချာငါကိုဗဲင်းဝင်ꩻ- "ယိုဝင်ꩻတွက်၊ ယိုနီတာႏ"သစ္စာႏအောဝ်ႏအောဝ်ႏတွော့ꩻ ဆရာႏလဲ့ တန်ႏရာꩻတန်ႏရာꩻကျောင်ꩻ ကွီဗဲင်း၊ လိုꩻဆာတဲ့ ဆရာႏတာႏချင်းဗဲင်း၊ စွိုးခြေင်ႏကမ္ဘာႏမွိုန်းတောဝ်းဝင်ꩻအကျောင်ꩻ မဉ်ဖေႏသေငါႏနုဲင်းနောဝ်ꩻသွူႏ နမ်းသꩻနီပါꩻ ယံချံꩻသာႏ၊ ဆရာႏလဲ့ လာဘ်သပ္ပကာႏ ဖေႏကအာ၊ လိုꩻဆာလဲ့ ဖေႏကမော့ꩻထဲင်းဗာႏမွိုန်းဒွုမ်ဝင်ꩻ ထာꩻဆာအကျောင်ꩻ ဆုတောင်ꩻမင်္ဂလာႏဖေႏထွူတဲင်-တွမ်ႏမေတ္တာႏတဲင်-