ဇောတိကသူဋ္ဌေꩻ

ရာႏဇဂြိုဟ်ႏခမ်းကို ပေါႏလွိုထွူ ဗိမ္ဗိသာရခွန်ဟော်ခံꩻနဝ်ꩻ ဇမ္ဗူဒိပ်တကျွန်ꩻလွုမ်း လိုꩻသေငါꩻတဝ်းသားတအဲဉ်ထဝ်း သူဌေꩻဖုံႏနဝ်ꩻ - ဇောတိက၊ ဇဋိက၊ မေဏ္ဍက၊ ကာကဝလိယ၊ ပုဏ္ဏ စတဲင် သူဌေꩻယိုဝင်ꩻငတ်ꩻဖုံႏဒျာႏနဝ်ꩻသွူ။

သူဌေꩻနောဝ်ꩻဖုံႏအကို ဇောတိက သူဌေꩻနောဝ်ꩻ - အွိုး...မွိုးနန်းစခါ ဗာႏရာႏဏသီႏခမ်းကို သူဌေꩻသူႏကျွယ်ႏတဖူးဝေးဝင်ꩻနီ အောဝ်ႏလိုပ်ꩻမာꩻ တောင်းလုဲင်ခြံ နောဝ်ꩻသွူ။ တွိုႏတနီꩻတဲင်ခါ အဖူးနောဝ်ꩻ အောဝ်ႏတောင်းလုဲင်ခြံ အီႏသဲင်ꩻလမ်း ရေႏနုဲင်းနောဝ်ꩻတဲင် ဗက်ꩻသဲင်ꩻပါခန်းတောင်းလုဲင် ဝွေꩻတာႏနောဝ်ꩻတလီး အဝေးတာႏလဲ့တလီး ဗက်ꩻခိန်ႏလဲ့ တောင်းလုဲင်ထီဖေႏနေးကရီႏလွင်ꩻထိုꩻမွိုန်းတဲင် ထူႏသော့ꩻခါꩻနေ တွမ်ႏ (ဖက်)နောဝ်ꩻသွူ။ [အခိန်ႏတွင်ꩻနောဝ်ꩻခါ အဒီႏအရာႏဖုံႏအတာႏ ဟံႏဩဇာႏအရသာႏဟဝ်ငါႏတဲင် တောင်းလုဲင်ထီနောဝ်ꩻ စေ့ꩻနေးခရာႏတလိုႏတောဝ်း ဗက်ꩻဗော့ꩻ အမွူးခင်ႏထျꩻ တောမ်ႏ အနာတဲင် အွဉ်ႏမိုးကီလနေးငါလဲ့ ဗွိုန်ပီနုဲင်းစွဉ်ႏ အဝ်ႏဓမကရိုဏ် ကရီႏလင်ꩻဒါႏထီပမာႏ အထီဖုံႏရီႏလင်ꩻလို့ချာဒျာႏတဲင် ဒွူႏခါꩻဗာႏနေးတွမ်ႏ (ဖက်)နောဝ်ꩻသွူ။]

လူႏဗာႏတောင်းလုဲင်ကျိုꩻ

သူဌေꩻပေႏနဝ်ꩻ ထူႏသဲင်ꩻတွမ်ႏတောင်းလုဲင်ထီ တိန်ႏတွိုႏဂန္ဓမာဒနကောင်လောင်းတဲင် ပစ္စေကဗုဒ္ဓါတဆူႏနဝ်ꩻ နေးတွမ်ႏ သမာပတ်ဉာဏ်ႏ ထွိုင်ႏထွား ချီႏမျှောက်ထွိုက်ဒါႏပုဂ္ဂိုလ်ႏထွူ အာႏရုံႏကို ထီႏဖျော်စွဉ်ႏ သူဌေꩻပေႏတဲင် ကျွꩻလွဉ်သဌေꩻပေႏဆꩻငါ သဌေꩻပေႏလဲ့ ဝုဲင်ႏ ရိုႏရိုႏသေႏသေႏထွူတဲင် သꩻရောင်ႏသꩻရေꩻ ဗွောင်ႏအခွမ်ꩻလာꩻဗုဲင်ပြေင်လောင်း ဒါလင်ꩻဖေႏထွူ ပစ္စေကဗုဒ္ဓါႏတဲင် "ဩဗွေႏ နေးတွမ်ႏ ဂရုဏာႏ သညင်ꩻတန်တန်အာအာတဲင် လက်ခံႏဖေႏသွော့ ခွေသွဉ်း ထာꩻလူႏယိုဗွေႏဩ။" လျောက်လဝ်းခန်း နုဲင်းနဝ်ꩻသွူ။ ပစ္စေကဗုဒ္ဓါႏ  အုံလင်ꩻထွူတဲင် ထူႏတွမ်ႏသပိတ် ဖေႏအပ်ငါခန်း သူဌေꩻပေႏနောဝ်ꩻသွူ။ သူဌေꩻပေႏလဲ့ ဝွေꩻတာႏ ကပါလွဉ်ဒါႏ တောင်းလုဲင်ထီနောဝ်ꩻ သော့ꩻဗွေထွူ သပိတ်တဲင် ကပ်ငါခန်း ပစ္စေကဗုဒ္ဓါႏနောဝ်ꩻသွူ။ ပစ္စေကဗုဒ္ဓါႏလဲ့ သွုံꩻနယ်ဗော့ꩻ သဌေꩻပေႏဆꩻငါတဲင် သူဌေꩻပေႏကထွိုင်ႏထီႏနောဝ်ꩻ သꩻသဒ္ဓါႏစေႏတနာႏကယိန်းတွိုႏတဲင်  "နီဝေးမဉ်ႏမဲဉ်လူႏတဝ်းလဲ့ မဲ့ꩻခွေဖေႏနေးဗော့ꩻဝွေꩻအငိုꩻ" ရေႏနုဲင်းနောဝ်ꩻတဲင် အဝေးအတာႏ ကပါဒါႏတောင်းလုဲင်ထီလဲ့ သော့ꩻဖေႏခန်း ပစ္စေကဗုဒ္ဓါသပိပ်ကိုထွူ "ဩဗွေႏ ခွေသွဉ်း ကလူႏကလောင်ꩻဗာႏ အခိုႏအဦꩻ တောင်းလုဲင်ထီယို အကျိုꩻ မဉ်ႏတွိုႏစိုးနားပန်ငါ မဉ်ႏသဲင်ꩻထွာ လူꩻလိုꩻဘဝလဲ့ ရေႏတွိုင်ꩻယံလꩻ တꩻတွိုင်ꩻယံကအောင်ႏ ဆုဲင်ꩻတခိန်ႏခိန်ႏ နီဗွေႏသီးကလꩻဒါႏ တရာꩻထူꩻယိုအတွိုင်ꩻ ခွေသွဉ်းလဲ့ ယံဖေႏကလꩻဗာႏနုဲင်းနုဲင်းသွော့ ဗွေႏဩ။" ဆုတောင်ꩻပတ္တနာႏခန်း နုဲင်းနဝ်ꩻသွူ။ ပစ္စေက ဗုဒ္ဓါႏလဲ့ "တကာႏပေႏ ကွီဆုꩻဒါႏအတွိုင်ꩻ ယံဗွေသွော့ꩻနော"ဆုတောင်ꩻဖေႏနုဲင်းနဝ်ꩻထွူ ကျောင်ႏထင်ႏချာ ကောင်လောင်းတဲင် ကလꩻဒါႏတောင်းလုဲင်ထီလဲ့ သဲင်ကပ်လူႏခန်း သွꩻပစ္စေကဗုဒ္ဓါႏငတ်ꩻရျာꩻနောဝ်ꩻသွူ။ သဌေꩻပေႏလဲ့ ကထွိုင်ႏထီႏဗာႏ အံႏအော်ꩻခရာႏ တံꩻခိုꩻပျာဋိနုဲင်းနဝ်ꩻဖုံႏတဲင် သꩻရေꩻမွေးစွဉ်ႏထာꩻနဝ်ꩻသွူ။ ဝွေꩻကထွိုင်ႏသဲင်ꩻတွိုႏလံးတဲင် အဝေးနဝ်ꩻ "ခွေထင်းဒျာႏ နာꩻလင်ꩻခြံ တောင်းလုဲင်မွော့ တပါသဲင်ꩻတဝ်း နာꩻလွေꩻမုဲင်ꩻကိုအီး" ကထွိုင်ႏရီနုဲင်းနဝ်ꩻတဲင် အဖူးလဲ့ "ခွေလင်ꩻခြံဒျာႏရင်ꩻ တောင်းလုဲင်ထီတဲ့ ထူႏသဲင်ꩻဒျာႏ ထွိုင်ႏတွိုႏတဖူꩻလောင်း သံးခွဲ ပစ္စေကဗုဒ္ဓါတွော့ꩻ ခွေကထူႏသဲင်ꩻတောင်းလုဲင်ထီနဝ်ꩻ နီဝေးတာႏယင် ခွေတာႏယင် ခွေလူႏထိုꩻလို့လဲဉ်း ပစ္စေကဗုဒ္ဓါသနယ် နီဝေးမဉ်ႏမဲဉ်လꩻကုသိုလ်ႏတဲ့ထူႏ မဉ်ႏမဲဉ်လꩻနေးဒျာႏ အငိုꩻတဲ့လꩻဒျာႏ" ရိုꩻဖေႏခန်းအဝေးနုဲင်းနဝ်ꩻသွူ။ အဝေးကထွိုင်ႏဟွုန်ဗာႏ ငဝ်းနုဲင်းနဝ်ꩻတဲင် သꩻရေꩻစွုမ်းသွိုꩻမွေးငါႏ မရေႏမရာႏတဲင် "ဘဝတသက်လွုမ်း အီႏမာꩻဗာႏ တောႏတောႏတယိုꩻတဝ်း ကုသိုလ်ႏမျိုꩻယို ခွေဖူးပေႏနဝ်ꩻ မာႏဗာႏလဲဉ်းသွူ။ အငိုꩻနဝ်ꩻ ခွေတမဲဉ်လꩻတဝ်း ခွေမဲဉ်လꩻဒျာႏကုသိုလ်ႏ ကုသိုလ်ႏအကျိုꩻနဝ်ꩻ မဉ်ႏတွိုႏဘဝဖါ ခွေမဲဉ်ထွာနုဲင်းငါႏ ပစ္စေကဗုဒ္ဓါမျတ်သနယ်" ဆုတောင်ꩻပတ္တနာႏခန်း နုဲင်းနဝ်ꩻသွူ။

ဆုဲင်ꩻဘဝ

ဝွေꩻသီးတဖူးဝေးနဝ်ꩻ ကွပ်ပွိုး ကုသိုလ်ႏကံႏ အကျိုꩻဖေႏတဲင် တနီꩻထွူတနီꩻ ကျံႏတွိုင်ꩻတဲ့အောင်ႏ ဆောင်ႏတွိုင်ꩻတဲ့ထွာ ဥစ္စာႏဓန ရွဉ်ခံꩻဖုံႏလဲ့ လွိုင်ႏအာဝပြော်ꩻ မွေစွဉ်ႏထာꩻနဝ်ꩻသွူ။ အဝ်ႏနဝ်ꩻဘဝ ကထွိုင်ႏသီမားတဲင် ထင်ႏအုံႏစံႏစာꩻလူꩻစေꩻစိန်ႏ သူခမ်းသူဌာႏနတဲင်ခါ ဗွေႏစဝ်းမျတ်ဘုရာꩻ ဝိပဿီကထင်ႏပွင်ꩻတဲင် ဝွေꩻသီးဝင်ꩻနီꩻနဝ်ꩻ သဲင်ꩻတယ်ႏယင်းပတိသန္ဓေႏ ဗန္ဓုမတီခမ်း သဌေꩻသူႏကျွယ်ႏတဖြာꩻ အမာမူႏလံးသား ဟို့ꩻကိုနဝ်ꩻသွူ။ ကထွိုင်ꩻလွူးဖွာꩻတဲင် အဝေးနဝ်ꩻ အမဉ်ꩻဟဲ့ꩻဖန် သေနတဲင် အဖူးနဝ်ꩻ အမဉ်ꩻတွင်ႏလꩻခန်း အပရာဇိတနဝ်ꩻသွူ။ အခိန်ႏရာႏကဝ်ႏကထွိုင်ႏတွိုႏ ကထွိုင်ႏတောႏလံးတဲင် ကွပ်ပွိုး ဝွေꩻဘုန်ꩻကံႏအကျိုꩻတွော့ꩻ ရွဉ်ခံꩻဥစ္စာႏ သဲင်ꩻခြွေခြာႏ ထွာလꩻခန်း သူဌေꩻတန်တဖြာꩻနဝ်ꩻသွူ။ တွိုႏတနီꩻတဲင်ခါ ဗွေꩻမျတ်ဘုရာꩻ ကွပ်ပွိုး မဲဉ်ချီႏမျောက်ငါႏ အဖါခွန်ဟော်ꩻခံꩻတဲင် ကျွꩻသဲင်ꩻလွဉ်ခန်း ဗန္ဓုမတီခမ်းနဝ်ꩻသွူ။ ခမ်းသားဖုံႏလဲ့ လူႏဆွုမ်ႏ၊ လောင်ꩻဆွုမ်ႏလွꩻတဲင် ကာလသေနသဌေꩻလဲ့ ရဲဉ်ꩻတွမ်ႏ လူႏတန်ꩻခရာႏ လူႏစာႏဝတ္ထု အစွိုးစွိုး အဒဝ်ႏဒဝ်ႏဖုံႏ ကထွိုႏထွူ လူႏကပ်ခန်း ဗွေႏမျတ်ဘုရာꩻတဲင် တွမ်ႏ ခမ်းသားအမျာꩻဖုံႏ သွိုသွိုငီႏငီႏ အွဉ်ဝင်ꩻနာႏလွခန်း တရာꩻထီခွꩻဖုံႏနဝ်ꩻသွူ။ ဗွေႏမျတ်ဘုရာꩻလဲ့ တွမ်ႏဝွေꩻ အတဲ့ခဝ်းဒါႏ၊ ဒါနကထာႏ၊ သီလကထာႏ၊ သဂ္ဂကထာႏ၊ မဂ္ဂကထာႏ၊ ကာမာဒီနဝ၊ နိက္ခမ္မာနိသံသ စတဲင် ဟော်ꩻဖေႏ တရာꩻစားယိုဖုံႏတဲင် ဝွေꩻအာႏစွုမ်းသွိုꩻ ဟွိုန်ကေႏညိုႏယွုမ်းအံႏမွေႏစွဉ်ႏ ဗွေႏမျတ်ဘုရာꩻ တရာꩻတောႏကထွိုင်ႏသွတ်ꩻသဝ်ꩻတဲင် ဝွေꩻလဲ့ ကွီဗုဲင်စွဉ်ႏရဟန်ꩻနဝ်ꩻသွူ။ ဗွေႏမျတ်ဘုရာꩻလဲ့ "တကာႏမဉ်ႏမဲဉ်ဗုဲင်ရဟန်ꩻလဲ့ ကွီဒွိုန်းကအခွင်ꩻ ဖူးဝေးထျꩻလုဲင်း" ကထွိုင်ႏမိန်းလဝ်းနုဲင်းနဝ်ꩻလဲ့ ဝွေꩻလဲ့ နက်သဲင်ꩻလမ်း ဒေါ့ꩻခန်းအဖူး "ဖူးပေႏ...မွိုးဖြားဖါဖြားသီး အစဲဉ်ႏစဲဉ်ႏအဆက် ၇ဆက် ကအွဉ်ႏကုဲငါသေꩻခါꩻဒါႏ ခွေပစ္စေꩻဥစ္စာႏဖုံႏ ကားကအဝ်ႏ နာꩻနေးသွော့ꩻလို့လို့လုဲင်း ခွေနဝ်ꩻ နွို့သွူ ဗွေႏမျတ်ဘုရာꩻသာႏသနာႏ ခွေအီႏဗုဲင်သွူႏရဟန်ꩻ" ရိုꩻဖေႏခန်းအဖူး နုဲင်းနဝ်ꩻသွူ။ အဖူး အပရာဇိတလဲ့ ကထွိုင်ႏဟွုန်ဗာႏ ငဝ်းနုဲင်းနဝ်ꩻတဲင် "နီဝေးဒေါ့ꩻငဝ်းနေးမုဲင်ꩻတန်ဟောင်း ပေါႏလွိုတဲင် မွိုဖါနီပါꩻ နီဝေးနဝ်ꩻ ထွာဖူးပေႏ မွိုးတကွို့ꩻ ဖါတခဝ် ဖူႏပေႏကိုꩻကွဲႏခရာႏလဲ့ အဝ်ႏဒျာႏ နီဝေးတဖြာꩻလွုမ်ꩻက အွဉ်ႏကုဲင်တဆွူႏမွုန်းဖူးပေႏမွိုင်နီဝေး နီဝေးမီႏမဲဉ် အာႏထုတ် ဒါႏန၊ သီႏလ၊ ဘာဝနာႏတရာꩻလဲ့ အုံလမ်းကံကျင်ꩻနေးဗော့ꩻနဝ်ꩻမွိုင်" အဖူးငွိုးအွီႏအဲင်ထာꩻတဲင် တောင်ꩻပြန်ႏစွဉ်ႏဒျာႏ ဝွေꩻနုဲင်းနဝ်ꩻသွူ။ အဝေး သေနကလဲ့ "နာꩻတွမ်ႏကန်ဆီꩻတာꩻ မွုန်းဒွုမ်ခွေ နာꩻအုံကုဲင်ချာတွော့ꩻ ပစ္စေꩻဥစ္စာႏဖုံႏလဲ့ စံႏစာꩻလို့လို့ခန်းနာꩻနဝ်ꩻ" ရိုꩻဖေႏအဖူးနုဲင်းနဝ်ꩻတဲင် ထူႏတွမ်ႏ သင်္ကန်ꩻ ပရိက္ခရာႏဖုံႏတွော့ꩻ ထင်ႏထေ့ဗွေႏဘုရာꩻ ဗုဲင်ထိုꩻစွဉ်ႏ ရဟန်ꩻနဝ်ꩻသွူ။ ဗုဲင်ရဟန်တညငါႏတဝ်း အခိန်ႏခါႏ ကွပ်ပွိုး အွဉ်ႏရေꩻ အားထုတ်မွေး ဝိပဿနာႏတရာꩻတဲင် တွိုႏလꩻစွဉ်ႏ အရဟတ္တဖိုလ်ႏ နဝ်ꩻသွူ။

လူႏဗာႏ ဂန္ဓကုဋိကျိုꩻ

အဖူး အပရာဇိတလဲ့ တဲႏစွဉ်ႏအဝေး ကဗုဲင်ထိုꩻရဟန်ꩻဆꩻချာ ဝွေꩻလဲ့ ဗွေႏဖရာꩻတွမ်ႏ ရဟန်ꩻသင်္ဃာႏ သီးအတွက်တာႏ ကသွုံꩻအပ်ဒါႏ ပစ္စေꩻ ၄ ပါꩻဖုံႏ လုမ်းလုမ်းကုမ်ႏကုမ်ႏ ဖေႏလူႏဖေႏတန်ꩻမွေးထူ သံးနာႏဗာႏပါထဲင်း ဗွေႏမျတ်ဖရာꩻ တရာꩻတောႏတဲင် ထွာလꩻစွဉ်ႏ ဥပသကာႏနဝ်ꩻသွူ။

တွိုႏတနီꩻတဲင် အပရာဇိတနဝ်ꩻ လျှောက်လဝ်းခန်း အဝေး မဟာသေနမထေရ်ႏ နုဲင်းယိုသွူ။ "ဩဗွေႏ - နီဗွေႏသီးနဝ်ꩻ လွစ်ထန်ႏလꩻလဲဉ်းသွူ ဖဝသွံပါꩻကို၊ တွိုႏခွေသွဉ်းနဝ်ꩻ တလွစ်ထန်ႏလꩻတဝ်းဒွိုန်း ကာႏမဂုဏ်ႏ သံႏယောꩻဇဉ်ႏကိုတဲင် ဆုဲင်ꩻဖေႏနေးကလွစ်ထန်ႏလꩻနုဲင်းနုဲင်းနီဗွေႏသီး မဲဉ်မာꩻခါꩻငါႏ ကုသိုလ်ႏသွူဪ။ ခွေသွဉ်း မီႏမာꩻကုသိုလ်ႏနုဲင်းမုဲင်ꩻမꩻ အီႏလွောက်ဖက်လꩻ ခွေသွဉ်းဟောင်းဗွေႏဪ" လျှောက်လဝ်းခန်း အဝေးနုဲင်းနဝ်ꩻသွူ။ အဝေးမထေရ်ႏမျတ်လဲ့"တကာႏဖူးခို အပရာဇိတဟွေး… မွေးသွူ, တကာႏဖူးခို မီႏတွိုႏ ပစ္စုပ္ပန်ႏဖဝသူꩻ မီႏမဲဉ်ခြွေခြာႏချံꩻသာႏနဝ်ꩻ ဆို့ꩻလူႏသွော့ ဗွေႏမျတ်ဘုရာꩻ အုံနင်းသတင်ꩻသုင်ꩻသော့ꩻတာႏ ဂန္ဓကုဋိတဖြုံႏလုဲင်း" ဟော်ꩻဖေႏခန်းနုဲးနဝ်ꩻသွူ။ တကာႏဖူးခိုလဲ့ ကထွိုင်ႏဟွိုန်ဗာႏငဝ်းနုဲင်းနဝ်ꩻတဲင် "ဟဝ်သွူဗွေႏဪ" ဝန်ႏခံႏခန်းနုဲင်းနဝ်ꩻတဲင် စုလုမ်းလုမ်းခါꩻ သေင်ႏဖုံႏ၊ လုံးဖုံႏ၊ အွတ်ꩻဖုံႏ၊ စုခါꩻအင်္ဂတေဖုံႏတဲင် ထာႏထွန်ႏယလီးလီးနဝ်ꩻ စီႏနေးခံꩻ၊ ယလီးလီးနဝ်ꩻ စီႏနေးရွဉ်၊ ယလီးလီးနဝ်ꩻ စီႏနေးပတ္တမျာꩻ၊ ယလီးလီးနဝ်ꩻ စီႏနေးပလဲꩻ၊ ယလီးလီးနဝ်ꩻ စီႏနေး လုံးသဲင်ရတနာႏဖုံႏနဝ်ꩻသွူ။ ဆို့ꩻထွူထာꩻထွန်ႏ ရတနာႏ ၇-ပါꩻတဲင် ဆꩻကီလဲ့ သꩻခါꩻနေး တောမ်ႏ ခံꩻပျာꩻအွတ်ꩻဗီႏဖုံႏနဝ်ꩻသွူ။ အဆေင်ႏဖုံႏလဲ့ စီႏနေ တောမ်ႏ ရတနာႏ ၇-ပါꩻတဲင်ꩻ ဆို့ꩻလူႏခန်း ဂန္ဓကုဋိ အအဲဉ်ႏအလုဲင်း အဝ်ႏတဂါႏဝုတ်နဝ်ꩻသွူ။ အသောင်လဲ့ ခြဲ့ꩻလုဲင်းထဲင်း တဂါႏဝုတ်စီႏတဲင် ဆို့ꩻခါꩻစွဉ်ႏ တံꩻတွိုင်ꩻရဲမေႏနဝ်ꩻသွူ။ အာရာမ်အကိုဖဲ့ꩻနဝ်ꩻ စီႏတရောင်းတရေꩻခါꩻစွဉ်ႏ အွတ်ꩻအင်္ဂတေအဒျာရွဉ်ဗီႏဖုံႏနဝ်ꩻသွူ။ အာရာမ်ဆꩻကီဖဲ့ꩻလဲ့ ဆို့ꩻခူခါခါꩻစွဉ်ႏ သေင်ႏမွူး ကဝ်ႏမွူးဖုံႏနဝ်ꩻသွူ။ တခါꩻလစ်ꩻဖဲ့ꩻလဲ့ ခူႏခူသေꩻခါꩻစွဉ်ႏ ထီနောင်တန်ဖုံႏနဝ်ꩻသွူ။ ကျောင်ꩻထျꩻကျောင်ꩻသောင်ဖုံႏလဲ့ ဆို့ꩻလူႏသေꩻခါꩻစွဉ်ႏ တံꩻခွေါန်ႏလုင်ꩻ၊ တံꩻခွေါန်ႏပျာꩻ အရောင်ႏငတ်ꩻမျိုꩻနဝ်ꩻသွူ။ ကျောင်ꩻတောႏစူဖွို့ (အမွမ်းခြင်ပိတ်)ဖုံႏလဲ့ တောမ်ႏရတနာႏ ၇-ပါꩻတဲင် ထုသေꩻခါꩻ အရုပ်အမျိုꩻမျိုꩻ ကျူႏဗျာႏထာꩻပုင်ႏဖုံႏ အဝ်ႏရံႏခူနေးစွဉ်ႏနဝ်ꩻသွူ။ ဗွေႏမျတ်ဘုရာꩻ ကနွို့လွဉ်ခိန်ႏနဝ်ꩻ အရောင်ႏဆဝ်တောႏဖေႏနေးတောင်ႏတဲင် ပတ္တမျာꩻတန်ႏဖိုꩻရွဉ်ယာႏတသိန်ႏ၊ ပတ္တမျာꩻ တန်ႏဖိုꩻကအဝ်ႏဒါႏ နီသိန်ႏသုမ်သိန်ႏ၊ အဆွာꩻလစ်ꩻသောင်ꩻ အခူပတ်တထာရပ် ကအဝ်ႏဒါႏ မနောမယပတ္တမျာꩻဖုံႏလဲ့ အဝ်ႏတယ်ႏအွဉ်ႏတံꩻခါꩻ ဗွေႏဘုရာꩻခင်ႏလမ်းထျꩻနဝ်ꩻသွူ။ အာရာမ်အကိုဖဲ့ꩻနဝ်ꩻလဲ့ ဖြေ့ꩻလီခါꩻ ရွဉ်ခံꩻလုံးသဲင်ပတ္တမျာꩻဖုံႏနဝ်ꩻ မီႏနွို့လွဉ်နဝ်ꩻ လဲင်ꩻဗဉ်ႏနေးစွဉ်ႏကီႏလေင်း(ပုဆစ်ဒူး)နဝ်ꩻသွူ။

ဝွေꩻကဆို့ꩻလူႏကျောင်ꩻကျာꩻ အဖူးမူႏပိုခို လီꩻပေႏအပရာဇိတနဝ်ꩻ "နီဖူကမာꩻ ကုသိုလ်ႏနဝ်ꩻ ပိုခိုတဲ့ မဲဉ်ကူႏညီႏကိုငါႏဩ" ကထွိုင်ႏကွီခွင်ꩻနုဲင်းနဝ်ꩻတဲင် "ခွေကျောင်ꩻအာရာမ်ကို ပိုခိုတောမ်ႏနွို့ပါရော်ꩻငီꩻမွိုန်းတောဝ်းဒွုမ် ထုမ်ႏမာꩻယင်းဒျာႏသွော့အလင်လုဲင်းပိုခို"ရိုဖေႏခန်းနုဲင်းနဝ်ꩻသွူ။ အပရာဇိတလဲ့ ကွီခွင်ꩻတလဲင်ႏထွူတလဲင်ႏ တိန်ႏတလꩻတဝ်းတဲင် မာꩻလူႏခန်း ဗွေႏသံႏဃာႏသီး စီꩻဝွေꩻသော့ꩻတဝင်ꩻတာႏ တရွပ်ဗဲရုပ် စီႏနေးတွမ်ႏ ရတနာႏ(၇)ပါꩻနဝ်ꩻသွူ။ [ဝွေꩻနဝ်ꩻ ဗွေႏဘုရာꩻလောင်ꩻ မေဏ္ဍကသူဌေꩻလောင်ꩻဒျာႏနဝ်ꩻသွူ]။ အပရာဇိတနဝ်ꩻလဲ့ ဆို့ꩻလူႏကျောင်ꩻတောႏ ကထွိုင်ႏထွူအောင်ႏမျင်ႏတဲင် လျောက်လဝ်းစွဉ်ႏ အဝေးမဟာသေနမထေရ်ႏမျတ်နဝ်ꩻသွူ။ မထေရ်ႏမျတ်လဲ့ အုံကပ်ꩻခြꩻတွမ်ႏ နီဗွေႏမျတ်ဘုရာꩻထျꩻတဲင် "ဩဗွေႏ စဝ်းမျတ်သမ္ဗုဒ္ဓ ဗွေႏမျတ်ဘုရာꩻဗွေႏဩ။ နီဗွေႏသတင်ꩻသွုံꩻသော့ꩻတာႏ ဖူးခိုဒါႏယကာႏ အပရာဇိတ ဆို့ꩻလူႏဖေႏ ကျောင်ꩻတောႏလဲ့ အောင်ႏမျင်ႏလဲဉ်းသနယ်ဩ။ ထီႏသညင်ꩻတန်တန်အာအာတဲင် ယံကခီႏမျောက်လက်ခံႏဖေႏသွော့ ကျောင်ꩻတောႏအလူႏယို ဗွေႏဩ။" လျောက်လဝ်းခန်းနုဲင်းနဝ်ꩻသွူ။ သမ္မာသမ္ဗုဒ္ဓ စဝ်းမျတ်နီဗွေႏနီဗွေႏဘုရာꩻလဲ့ တောမ်ႏ ရဟန်ꩻသံႏဃာႏစွိုꩻသီးဖုံႏ ကထွိုင်ႏရေႏကျွꩻထင်ႏ ကျောင်ꩻတောႏကို ကထွိုင်ႏထီႏဗာႏ တန်ႏဖိုအာငါႏ ရတနာႏအမျိုꩻမျိုꩻဖုံႏ အဝ်ႏဗွေႏဗိက်ဗက်နေးစွဉ်ႏထာꩻတဲင် တထင်ႏသော့ꩻတဝ်းကျောင်ꩻတောႏကိုတဲင် အုံယတ်(ယွိုင်း)ခန်းဒျာႏ တခါꩻမုခ်ကိုနဝ်ꩻသွူ။ ဒါႏယကာႏလဲ့ "ကျွꩻနွို့သွော့ဗွေႏဪ"ကထွိုင်ႏလျောက်လဝ်းနုဲင်းနဝ်ꩻ ခွုင်းမုဲင်ꩻလဲင်ႏလဲင်ႏတဲင် ဗွေႏမျတ်ဘုရာꩻလဲ့ ထွားစွဉ်ႏ ဗွေႏမဟာသေနနဝ်ꩻသွူ။ ဗွေႏမဟာသေနလဲ့ သဲစ်နီဗွေႏမျတ်ဘုရာꩻကထွားလွဉ်တဲင် အလိုႏတောႏအဝ်ႏနုဲင်းမုဲင်ꩻအကျောင်ꩻ သေထွူစွဉ်ႏတဲင် "တကာႏဖူးခိုဟွေး တကာႏကျောင်ꩻတောႏကိုနဝ်ꩻ တန်ႏဖိုꩻတန် ရတနာႏဖုံႏအဝ်ႏအာငါႏတဲင်၊ ရတနာႏယိုဖုံႏနဝ်ꩻ ခွေသွဉ်းအွဉ်ႏဒျာႏ အထိန်ꩻအထွားသားသနဲ့ဗွေႏဩ။ လျောက်လဝ်းနုဲင်းနဝ်ꩻလုဲင်းတကာႏ"သွဉ်ဖေႏခန်းနုဲင်းနဝ်ꩻသွူ။ တကာႏဒါႏယကာႏလဲ့ ဗွေႏမဟာသေန ကသွဉ်ဖေႏဒါႏအတွိုင်ꩻ တိန်ႏလျောက်လဝ်းမꩻတဲင် ဗွေႏမျတ်ဘုရာꩻလဲ့ ကျွꩻထင်ႏခန်း ကျောင်ꩻတောႏကိုနဝ်ꩻသွူ။

တောင်ꩻအီ ထာꩻယူႏ မီႏမာႏနဝ်ꩻ လင်ꩻတွိုႏအီဒါႏအပါယ်ႏအကျောင်ꩻ

[နီဗွေႏမျတ်ဘုရာꩻနဝ်ꩻ ကွပ်ပွိုးတမုဲင်ꩻမွော့ မဲဉ်လꩻတွိုႏ ရတနာႏထိန်ꩻထွားသားနဲတဲင် - လိုꩻယုတ်၊ လိုꩻတွူ၊ လိုဟဝ်၊ လိုꩻဒါႏသီးဖုံႏ လိုꩻတရတပါꩻ တရျာꩻတစွိုး လိုꩻပေါင်ꩻစွုမ်ႏသီးဖုံႏနဝ်ꩻ အီႏလွဉ်ဝုဲင်ႏရိုႏသေႏ နီဗွေႏမျတ်ဘုရာꩻတဲင် မီႏထူႏသဲင်ꩻသူဌေꩻရတနာႏဖုံႏနဝ်ꩻ နီဗွေႏမျတ်ဘုရာꩻ မီႏရဲ၊ ဖေႏထူႏတဝ်းလဲ့ တအပ်တဝ်းနဝ်ꩻသွူ။ လိုꩻတရတပါꩻကွဲထူႏထူႏတွော့ꩻ သူဌေꩻဒါႏယကာႏအကျောင်ꩻတောႏ မီႏယထိုꩻနဝ်ꩻ ဗွေႏသံႏဃာႏသီးအလောင်းတရိုꩻတဝ်း၊ နီဗွေႏမျတ်ဘုရာꩻအလောင်းတရိုꩻတဝ်း ယူႏမာႏသံႏသယထွာတွော့ꩻ မီႏအွဉ်ႏရန်ႏစင်ꩻ၊ မီႏသꩻလျားနဝ်ꩻ လင်ꩻထဲ့အီဒါႏ အပါယ်ႏအကျောင်ꩻ တွမ်ႏဉာဏ်ႏတောႏ ကတိန်ႏထီႏတောႏနုဲင်းနဝ်ꩻတဲင် မဲဉ်အွဉ်ႏဗာႏ ရတနာႏထိန်ꩻထွားသားနုဲင်းနဝ်ꩻသွူ။] ကျောင်ꩻတကာႏ အပရာဇိတလဲ့ ဆို့ꩻလူႏကျောင်ꩻတောႏတိန်ႏထွူတဲင် တခါꩻလစ်ꩻဖဲ့ꩻနဝ်ꩻ အွဉ်ႏဖေႏအပွေါးသား တဖဲ့ꩻဝင်ꩻလစ်ꩻနဝ်ꩻသွူ။ ကလွဉ်ပူႏဇောႏဆယ်ꩻကပ်ဒါႏ နီဗွေႏမျတ်ဘုရာꩻ လိုꩻတရတပါꩻသီးဖုံႏနဝ်ꩻ ယဟန်ႏလဲ့ ခြွေခြာႏ၊ ယဟန်ႏသားလဲ့ ဝီႏဝီႏဝါးဝါးပေႏ၊ ယဟန်ႏသားလဲ့ သံးဆင်ꩻရယ်ꩻတဲင် စွုမ်ႏစီႏနေးစွဉ်ႏဒျာႏနဝ်ꩻသွူ။ "ကျောင်ꩻတောႏကို ကအဝ်ႏဖြေ့ꩻလီဒါႏ ရတနာႏဖုံႏနဝ်ꩻ လိုꩻကားကအဝ်ႏ တွမ်ႏစူတဲင် မီႏထူႏသဲင်ꩻ ရတနာႏဖုံႏနဝ်ꩻ ခွုင်းစူကိုကနွောင်ꩻ ထူႏသဲင်ꩻခွင်ꩻ ဖေႏသွော့လုဲင်း။ လိုꩻကေားထူႏနေး တွမ်ႏ ဆဲင်ꩻထုံꩻတန်ဖုံႏ၊ ခြောင်းဖုံႏ၊ ကဝ်ဖုံႏ၊ ဝန်ႏဖုံႏသားနဝ်ꩻ သီဖေႏထူႏမွုန်းနော။" ဒေါ့ꩻဖေႏခန်းနုဲင်းနဝ်ꩻသွူ။

တောင်ꩻအီဇောတိကထာꩻလူႏ

[သူဌေꩻနဝ်ꩻနဝ်ꩻ အရေႏနုဲင်းယိုသွူ - "လိုꩻဟဝ်ဖုံႏ မီႏလွဉ်နဝ်ꩻ လွဉ်ဝုဲင်ႏရိုႏသေႏဒျာႏ နီဗွေႏမျတ်ဘုရာꩻ၊ လွဉ်နာႏဒျာႏတရာꩻ၊ လွဉ်လူႏလွဉ်တန်ꩻထာꩻရိုꩻရိုꩻဒျာႏ။ လိုꩻကုဲင်ဖုံႏနဝ်ꩻ ကွပ်ပွိုးလောႏဘသꩻ(မဲဉ်လꩻရတနာႏ)တဲင် အီႏထင်ႏလွဉ်ကျောင်ꩻနေနေ။ မီႏတွိုႏလွဉ်လဲဉ်းသွူ ကျောင်ꩻတောႏကိုနဝ်ꩻ သမ်းနာႏဗာႏ ဗွေႏမျတ်ဘုရာꩻတရာꩻတောႏတဲင် ယံကထီႏအီ ထာꩻဒုက္ခလွစ်ထန်ႏရာꩻ(နိဗ္ဗာန်ႏ)" ရေႏနုဲင်းနဝ်ꩻတဲင် ခွုင်းစူကတွမ်ႏ ထူႏသဲင်ꩻခွင်ꩻဖေႏခန်းနုဲင်းနဝ်ꩻသွူ။] အဝ်ႏနဝ်ꩻတဲင် ရပ်ဗော့ꩻ၊ ရပ်ညာꩻ လိုꩻအမျာꩻသီးဖုံႏလဲ့ ကောမဲဉ်လွဉ်ထီႏ ကျောင်ꩻတောႏသားလဲ့အဝ်ႏ၊ ကောမဲဉ်လွဉ်ဝုဲင်ႏ နီဗွေႏမျတ်ဘုရာꩻသားလဲ့အဝ်ႏတဲင် လိုꩻကွိုန်ꩻမွေးမုဲင်းစွဉ်ႏထာꩻနဝ်ꩻသွူ။ တိန်ႏသဲင်ꩻချာလမ်းခိန်ႏတဲင် ထူႏသဲင်ꩻပါတွမ်ႏ ကျောင်ꩻတောႏကို ကဖြေ့ꩻလီဒါႏ ရတနာႏဖုံႏနဝ်ꩻသွူ။ အဇိတသဌေꩻလဲ့ ခွုင်းကအဝ်ႏခြေင်ရာꩻ အထွောင်းမုဲင်ꩻတယဝ်း လွဉ်ဖြေ့ꩻလီသံးဖေႏမပ်မပ်စွဉ်ႏနဝ်ꩻသွူ။ ဗွေႏမျတ်ဘုရာꩻခင်ႏထျꩻလဲ့ အွဉ်ႏခါꩻဖေႏတွမ်ႏ ပတ္တမျာꩻရတနာႏ တွာစွဉ်ႏ တဒွီရာႏတဲင် အရောင်ႏတင်ႏခꩻလေလင်းနေးစွဉ်ႏထာꩻနဝ်ꩻသွူ။ ကွပ်ပတ္တမျာꩻအရောင်ႏတဲင် လိုꩻအမျာꩻသီးဖုံႏ ကထွိုင်ႏထွားငါ ဗွေႏမျတ်ဘုရာꩻနဝ်ꩻ သပ္ပာယ်ႏမွေးမုဲင်းစွဉ်ႏထာꩻတဲင် ဝုဲင်ႏရိုႏသေႏတဝ်းတဒါႏတဝ်း စွုမ်ႏဖြာꩻဖြာꩻနဝ်ꩻသွူ။

အဆုဲင်ꩻသွတ်ꩻဘဝ

ကွပ်ပွိုး ဝွေꩻမာꩻဗာႏအာ ထာꩻဟဝ်ကုသိုလ်ႏနုဲင်းနဝ်ꩻတဲင် ကံႏအကျိုꩻတိန်ႏဖေႏနဝ်ꩻ အဝ်ႏလိုꩻဘဝကတိန်ႏသီငါတဲင် ထင်ႏထွာလꩻခန်း လူꩻတနံ၊ ထင်ႏစံႏစာꩻဗာႏခန်း လူꩻချံꩻသာႏဖုံႏနဝ်ꩻသွူ။ ရာႏဇဂြိုဟ်ႏခမ်းကို သမ္မာသမ္ဗုဒ္ဓ ဂေါတမနီဗွေႏမျတ်ဘုရာꩻ ကတိန်ꩻပွင်ꩻတဲင် ဝွေꩻလဲ့ လူꩻခမ်းသက်တန်ꩻလို့တွော့ꩻ လင်ꩻတယ်ႏသန္ဓႏ မွိုးဗွေႏဟို့ꩻကို ကတိန်ႏလꩻ ၉ လာပုဲင် ၁၅နီꩻတဲင် လွူးဖွာꩻလင်ꩻခန်း လိုꩻခမ်းလောကကိုနဝ်ꩻသွူ။ သဲစ်ဝွေꩻကလွူးဖွာꩻလင်ꩻတဲင် ရာႏဇဂြိုဟ်ႏတခမ်းလွုမ်းအကို ကအဝ်ႏဒါႏ တခြိုꩻအခွုမ်အစံႏ၊ လိုꩻမူႏ၊ လိုꩻခိုသီး နမ်းလောင်း ကခြွိုင်းကဒျꩻဒါႏ ရတနာႏဖုံႏလဲ့ အရောင်ႏတင်ႏလေလင်း တခမ်းလွုမ်းလွုမ်း ထွာလို့စွဉ်ႏ တရောင်ႏချင်ႏနဝ်ꩻသွူ။ တိန်ႏတွိုႏမွူးရဝ်ꩻ အဖါသူဌေꩻ ကထင်ႏခစာꩻ ခွန်ဟော်ခံꩻတဲင် ခွန်ဟော်ခံꩻလဲ့ ရီခန်း "မဟာ ခြီႏ၊ ပြာႏ၊ လက်နက်၊ စူခွုမ်စူစံႏ၊ ရတနာႏဖုံႏ အရောင်ႏတင်ႏ ဗိက်ဗိက်နေးစွဉ်ႏဒျာႏ အပွိုးအပါႏ မဲ့ꩻအဝ်ႏဒါႏဟောင်း" ကထွိုင်ႏရီနုဲင်းနဝ်ꩻတဲင်။ "ဩဗွေႏ တွမ်ႏနန်းမွိုန်း တနꩻဒျာႏ ခွေသွဉ်းလမ်းကို နီဗွေႏသွဉ်းသယ်ႏခိုတဖြာꩻ လွူးဖွာꩻလင်ꩻအကျောင်ꩻဒျာႏသနယ်ဪ" လျှောက်နုဲင်းနဝ်ꩻတဲင် "သူဌေꩻဟွေး...နာꩻပိုနဝ်ꩻထူꩻဆန်ꩻမွေးထာꩻ၊ ထွာဒါႏလိုꩻကုဲင်၊ ထွာဒါႏတခွန်ꩻဟောင်း၊ မဲ့ꩻရိမ်ခွေစေꩻစိန်ႏ မဲ့ꩻထွာဒါႏ ခွန်လောင်ꩻတန်ဟောင်း" ရီချာနုဲင်းနဝ်ꩻတဲင် "ဩဗွေႏ အီႏထွာလိုꩻနုဲင်းနဝ်ꩻ တမွေးဗာႏတဝ်းသနဲ့ဪ လိုꩻလꩻပုဗ္ဗာသမ္ဘာတဲင် အီႏသဲင်ꩻစံႏစာꩻဗာႏ စေꩻစိန်ႏဥစ္စာႏ ထာꩻချံꩻသာႏဒျာႏသနဲ့ဪ"လျှောက်လဝ်းချာခန်းနုဲင်းနဝ်ꩻသွူ။ "ပေါႏနေးနဝ်ꩻတဲ့ နာꩻပိုနဝ်ꩻ နာꩻလွူးတန်တန်၊ နာꩻခေါမ်ꩻရော့ꩻရော့ꩻသွော့လုဲင်း" ရိုꩻနုဲင်းနဝ်ꩻတဲင် ခွန်ဆုꩻဖေႏစွဉ်ႏ နဲဉ်းထီငိုꩻ တနီꩻတရေင် တရေင်နဝ်ꩻသွူ။ ဝွေꩻကလွူးဖွာꩻခိန်ႏနဝ်ꩻ လက်နက်၊ ခြီႏ၊ ပြာႏ၊ ရတနာႏ၊ ပတ္တမျာꩻဖုံႏ အရောင်ႏတင်ႏလက်လက်တဲင် ဝွေꩻမဉ်ꩻလဲ့ ဟဲ့ꩻဖန်တွင်ႏခန်း ဇောတိက နုဲင်းနဝ်ꩻသွူ။