တက္ကပဏ္ဍိတဇာတ်

၆၃။ တက္ကပဏ္ဍိတဇာတ် ဘုရာꩻအွ်ႏဇေတဝန်ႏကျောင်ꩻကိုခိင်ႏ သွန်သင်အီရဟန်ꩻကွင်တပါꩻ (လိုꩻမူႏသီးယို သေဒါႏတွ်း ဝင်ꩻကေꩻဇူꩻ၊ ပဲတ်မာႏဒါႏ ကေꩻဇူꩻဗွေႏ၊ မွော့မဲလ္လတွိုႏ လိုꩻမူႏနျ်းနွ်ꩻ) အွိုးစခါ ဗာရာဏသီခမ်း ဗြဟ္မဒတ်ခုန်စိုး ဘုရာꩻလောင်ꩻ မာꩻနမ်းရသေ့ꩻတဲင် မာꩻသိုးမ္ပေႏ အွ်ႏအိုင်ဂင်္ဂါႏခြောင်ထျꩻ၊ မုန်းပျောႏဒျာႏတွမ်ႏအဘိညာဉ်ႏ ဈာန်ႏသမာႏပတ်၊ အခိင်ႏနွ်ꩻ ဗာရာဏသီ သဌေꩻပိုမူႏတဖြာꩻ အယားကျ်ဒါႏဝင်ꩻသီႏလနွ်ꩻမꩻ ဝင်ꩻဟဲ့ꩻအမိန်ꩻ ဒုဋ္ဌကုမာရိ၊ ဝွေꩻနွ်ꩻ နမ်းကျမ်ꩻသꩻကျမ်ꩻ၊ တနီꩻသားကို လိုꩻဖိုင်ႏဟဲ့ꩻတွမ်ႏ ဒုဋ္ဌကုမာရီတဲင် လွေꩻပဆိုးထာꩻ ဂင်္ဂါႏခြောင်ထျꩻ၊ မွူးတဲ့ဟာ ခမ်းတဲ့အုမ်ႏ၊ အသွန်းမူႏဖိုင်ႏ အွန်ႏကျ်ဗော့ꩻထီကို၊ လွင်းသဲင်ꩻထိုꩻခးန္ဒျာႏအလမ်း ပငါပရာꩻ၊ သဌေꩻပိုမူႏနွ်ꩻ ခြဝ်အငဝ်းခြွန်ႏဒွမ်လင်ꩻထိုꩻခးန္ဒျာႏ၊ တွိုႏလင်ꩻစွန်ꩻ ဘုရာꩻလောင်ꩻရသေ့ꩻကျောင်ꩻထျꩻ၊ ဘုရာꩻလောင်ꩻ လေမေႏခြဲးလွေꩻထွား၊ ထေအာႏတတွာဆင်စား ယားထီလွေꩻယွော့ထန်ႏ၊ အီသဲင်ꩻကျောင်ꩻ အူမေႏမာꩻလိုမ်ꩻဖေႏ၊ အွန်ႏအမ်ႏသီင်ႏရောင်ꩻရာႏ၊ ရီအကျောင်ꩻလမ်ꩻ ဒုဋ္ဌကုမာရီဒေါ့ꩻနဲ၊ အွန်ႏအိုင်သော့ꩻအကျောင်ꩻကို၊ ရသေ့ꩻနွ်ꩻ အိုင်ဒျာႏအထန်ႏ၊ ထင်ႏလꩻနီသိုမ်နီꩻ ပါꩻမူႏနွ်ꩻ ယားကျ်ရသေ့ꩻသီႏလ၊ လွေꩻတေားဒုမ်အလင်၊ ရသေ့ꩻလꩻသွူပါꩻမူႏနွ်ꩻတဲင် လွေꩻအိုင်ပါꩻဒိုင်ပေႏကို၊ မာꩻဆျာႏဒါႏဖိုးနဲန်းထီ၊ စာဒါႏနွ်ꩻမꩻ ဝင်ꩻဟဲ့ꩻအမိဉ်ꩻ တက္ကပဏ္ဍိတ၊ လိုꩻဒိုင်ဖိုင်ႏ ဖေႏလꩻခꩻတဲင် အွန်ႏပွေါဒိုင် တခါꩻငွါထျꩻ၊ ဖေႏကသေလိုꩻနွို့ထန်ႏ ဖေႏကဟွုန်ငွ်းဟွ်ကျ်၊ တွိုႏတနီꩻ စိုန်သားဖိုင်ႏ အွ်ႏကောင်ကို လင်ꩻစိုန်ထာꩻဒိုင်ကို၊ တခြိုꩻနွ်ꩻ အွန်ႏချာဗော့ꩻလိုꩻဒိုင်ထမ်ႏ၊ တွိုႏတခြာကို လိုꩻဒိုင်နွ်ꩻ အွန်ႏစွꩻသဲင်္ချာ၊ ပါꩻမူႏနွ်ꩻ (ပွိုးအယောင်ꩻရေꩻတန်နွ်ꩻမꩻ) စိုန်ကဲႏနေးအျ်ႏထိုꩻခန်းဒျာႏ။ ဘုရာꩻလောင်ꩻတဲ့ ဝွေꩻမာနွ်ꩻ စိုန်ကဲႏနေးအျ်ႏထိုꩻလဲန်းအကျောင်ꩻ လꩻထွူသတင်ꩻနျ်းနွ်ꩻတဲ့ "ပါꩻမူႏယို အတလဲန်းတွ်းခွေ မဲ့ꩻအလွင်းသဲင်ꩻလွန်ချာယင်းဒျာႏ"ရိုꩻတဲင် အွ်ႏပွေါးစွူစွူဒျာႏ ဒိုင်တခါꩻထျꩻ သိုးမ္ပေႏကို၊ သဌေꩻပိုမူႏနွ်ꩻတဲ့ ထွာဗာႏစိုန်ကဲႏမာနွ်ꩻ အိုင်ဗာႏဟွ်၊ အံႏဗာႏဟွ်၊ အွ်ႏငမ်းတေ့ꩻစွန်ႏ တက္ကပဏ္ဍိတလွန်ဟဲ့ꩻချာ၊ "ဖေႏကလွန်ဟဲ့ꩻချာဒါႏမွုန္တဝ်းဒုမ်ဝွေꩻနွ်ꩻ ဟဲ့ꩻလွန်ထေ့ဝွေꩻထျꩻတဲင် အွန်ႏစိုန်ကဲႏမာꩻသီထိုꩻခန်းနွ်ꩻမꩻ သꩻဆွော့ꩻလꩻ"ရေႏရွဲႏနျ်းနွ်ꩻတဲင် ထွန်ႏပါꩻလွေꩻပသာသတင်ꩻ "ဖေႏကလွန်ဟဲ့ꩻချာဝွေꩻ အိုင်ဗာႏဒုက္ခငါႏထာꩻ" တက္ကပဏ္ဍိတတဲ့ သꩻရောင်းသꩻရေꩻ ထင်းဒျာႏအမွေး ယုမ်းပါꩻမူႏငွ်း လွေꩻထေ့တွိုႏစိုန်သားဒိုင် တခါꩻငွါထျꩻ။ ဒေါ့ꩻဟွုန်လွေꩻ သဌေꩻပိုမူႏလွန္ထေ့၊ ပါꩻမူႏရိုꩻ "နီလွင်းယာနေးနွ်ꩻ ရော့ꩻတွ်း၊ ပါꩻမီႏထီႏလꩻ ပါꩻမာꩻသီလို့စွန်ႏ နီဝင်ꩻနီ၊ မွူးခေ့ꩻမေꩻ နီကွဲးလွင်း"ဟဲ့ꩻသဲင်ꩻအလမ်း လွူးကဒဲန်ထွူမꩻ အွန်ႏအိုင်ပွေါးထာꩻအောင်ကို၊ နျ်းမွူးဟာ စိုန်ကဲထင်ႏမုန်ꩻတကဲထွူဒွ်မꩻ ပါꩻမူႏနွ်ꩻကွဲးဒေါ့ꩻ "အခိင်ႏယို နာꩻမီႏမော့ꩻရန်ႏသူႏနွ်ꩻ နာꩻအီႏမာꩻနျ်းမျ်ꩻ" ရီစိုန်ကဲႏ၊ "မာꩻနျ်းယို နျ်းနွ်ꩻ"ထင်ႏဒေါ့ꩻ ရန်ႏသူႏတအွ်ႏညာꩻတွ်း အွ်ႏသော့ꩻထာꩻအောင်ကိုသူꩻ စိုန်ကဲႏထင်ႏသေ လေတွမ္မေႏခြဲး၊ လွေꩻဆွမ်ꩻသဲင်ꩻအလမ်းကို။ ထင်ႏတွဲႏနက် ခွိုင်းမျ်ꩻဆင်ႏင်ႏတဲ့ တက္ကပဏ္ဍိတ ဒေါ့ꩻငွ်းလိတ်ꩻငွါ (ဒေါသနွ်ꩻတန်၊ သေတွ်းဝင်ꩻကေꩻဇူꩻ၊ အီထေ့လိုꩻထာꩻမာႏ၊ လောက္ကာႏဒါႏတွ်ႏသွꩻ)နွ်ꩻဒုမ်ꩻ၊ စိုန်ကဲႏအမ်ႏဒဲန်ထွူ ဗီင်ႏထာꩻတစိꩻထွူ ထွိုင်ႏတွဲႏနက်ယင်း ဘုရာꩻလောင်ꩻတဲ့ ဒေါ့ꩻယင်းဗော့ꩻငွ်းလိတ်ꩻငွါ၊ စိုန်ကဲႏစိဉ္စာꩻ "ပါꩻယို ခွေကတွဲႏကနက် တခွိုင်းနွ်ꩻ ငွ်းလင်တဒေါ့ꩻတွ်း၊ ဒေါ့ꩻဗော့ꩻငွ်းလိတ်ꩻငွါနွ်ꩻဒုမ်ꩻ၊ ခွေရီက အခရာႏမꩻ"ရိုꩻတဲင် ထင်ႏရီဘုရာꩻလောင်ꩻဒေါ့ꩻနဲ။ "ခွေယိုစခါ ထွာရသေ့ꩻလꩻဈာန်ႏအဘိညာဉ်ႏ အိုင်ဂင်္ဂါႏခြောင်ထျꩻ၊ ပါꩻမူႏနွ်ꩻခြွန်ႏလင်ꩻထီ ခွေကဲႏထန်ႏ၊ ပါꩻမူႏယားကျ်ခွေတရာꩻ၊ ခွေတ့ မာꩻလွူးပါꩻမူႏ၊ လွေꩻအိုင်ပါꩻဒိုင်ပေႏထျꩻ၊ စိုန်သားထင်ႏဆွမ်ꩻ အိုင်ဗာႏဒုက္ခငါႏထာꩻအကျောင်ꩻ- ဒေါ့ꩻဟွုန်ခွေ၊ ခွေလွန္ထေ့ ပါꩻမူႏထျꩻနွ်ꩻမꩻ တွိုႏသော့ꩻဗာႏသီစူကိုနျ်းယို၊ ပွိုးနွ်ꩻမꩻ ခွေဒေါ့ꩻငွ်းလိတ်ꩻငွါ"။ စိုန်ကဲႏထင်ႏသေစဲင်း အခရာႏ၊ "ပါꩻသဌေꩻပိုမူႏယို ဒေါသတန်ငါႏနွ်ꩻမꩻ ခြွန်ႏဗာႏထီ၊ ဝင်ꩻကဲဖေႏသွူဝွေꩻတဲ့ ဝွေꩻတသေတွ်း ဝင်ꩻကေꩻဇူꩻ၊ တွိုႏခွေထျꩻ မာꩻဖေႏခွေကမာꩻသီ အဝါꩻလီꩻ ထေအပရိယာယ်ႏ၊ ဗိုန္နဝ်ꩻအတွိုင်ꩻ မီႏတွိုႏယင်းပါꩻထျꩻတဲ့ အီႏအွန်ႏမာꩻသီယင်းခွေဒျာႏရင်ꩻ" စိုန်ကဲႏသဖေါꩻပေါက်လဲန်း၊ နေးပရိယာယ်ႏ ဟဲ့ꩻထွိုင်ႏပါꩻမူႏ၊ အီႏလွေꩻမာꩻသီ တက္ကပဏ္ဍိတ အွိုးဒိုင်သောင်၊ အွန်ႏပါꩻမူႏခုမ် စိုန်ကဲႏဗက်ꩻလင်ꩻ၊ ပါꩻမူႏငွန်ꩻထဲ့ သီဗော့ꩻနွ်ꩻကိုထွူ ဟဲ့ꩻတက္ကပဏ္ဍိတ အိုင်ကနီသိုမ်နီꩻထွူရီ "နာꩻအီႏလွေꩻမျ်ꩻ?"၊ "ခွေအီႏလွေꩻထွာယင်းဒျာႏရသေ့ꩻ၊ ထွာလိုꩻလမ်းအကျိုꩻတအဲန္ထဝ်း" ဒေါ့ꩻချာစိုန်ကဲႏ၊ စိုန်ကဲႏဒေါ့ꩻ "ပေါႏနွ်ꩻတဲ့ ခွေတဲ့လွေꩻလွန်ꩻနာꩻ"။ တွိုႏတခြာ ပွါꩻယင်းဈာန်ႏသမာႏပတ်သွစ်ꩻပါꩻ၊ လꩻယင်းအဘိညာဉ်ႏ၊ ထင်ႏသီလဲးန္ထင်္ကီ ဗြဟ္မာႏခမ်း၊ တရာꩻထင်ႏသုတ်ꩻ ဘုရာꩻဟောꩻ- ၆၃။ ကောဓနာ အကတညူ စ၊ ပိသုဏာ မိတ္တဘေဒိကာ။ ဗြဟ္မစရိယံ စရ ဘိက္ခု၊ သော သုခံ န ဝိဟာဟီသိ။ ဘိက္ခု- ရဟန်ꩻ၊ (ဣတ္ထိယောနာမ- လိုꩻမူႏသီးအမျိုꩻနွ်ꩻ)၊ ကောဓနာစ- ဒေါသတဲ့တန္ဒာႏ၊ အကတညူစ- ဝင်ꩻကေꩻဇူꩻလဲ့ တသေဒါႏတွ်း၊ ပိသုဏာစ- ဒေါ့ꩻဒါႏငွ်းပꩻလီ၊ မိတ္တဘေဒိကာစ- သွꩻဟွ်တဲ့ ယားကျ်ချာဒါႏ၊ စ- ပွိုးနွ်ꩻမꩻ၊ တွံ- နာꩻနွ်ꩻ၊ စရ- ကျင်ꩻသွော့၊ ဗြဟ္မစရိယံ- အကျင်ꩻမျတ်၊ သောတွံ- ပါꩻနာꩻနွ်ꩻ၊ နဝိဟာဟီသိ- သုမ်ꩻထိုꩻဗာႏတွ်း၊ သုခံ- ဈာန်ႏမဂ်ဖိုလ်ႏသုခနွ်ꩻသွူ။ ရဟန္နဝ်ꩻ ထွာသောတာပန်ႏ၊ စိုန္ကဲႏနွ်ꩻ သဲင်္ထွာအာနန္ဒထေရ၊ တက္ကပဏ္ဍိတနွ်ꩻ(ထွာ)ဘုရာꩻ၊ နံပါတ်(၆၃)ထွူယို။