တွမ်ရွမ်လွမ်
"တွမ်ရွမ်လွမ်"
၁။ စွန်တခွန်ꩻထာꩻ၊ အဒိန္နာ၊ ဘုရာꩻတကျွိုက်တဝ်း။
၂။ မဉ်ႏသီတွိုႏဆုဲင်ꩻ၊ ထဲ့ငါးရုဲင်ꩻ၊ ပါꩻမုဲင်ꩻတကယ်ႏတဝ်း။
၃။ လိုꩻခိုတဖြာꩻ၊ ထုမ်ႏကျိုꩻစာꩻ၊ လွိုပါꩻအံႏမတောဝ်း။
၄။ လူႏဗာႏတန်ꩻဗာႏ၊ ခြွေချမ်ꩻသာႏ၊ ယံငါႏဆင်ꩻရယ်ꩻတဝ်း။
၅။ အာႏရဲင်ꩻစူခင်ႏ၊ သွုံꩻအပျင်ႏ၊ တဆင်ႏဒုက္ခစောဝ်း။
၆။ အာႏရဲင်ꩻစူခင်ႏ၊ သွုံꩻဟဝ်ထင်ႏ၊ တဆင်ႏခြွေစဝ်းစဝ်း။
၇။ လိုꩻခိုပဉ်ဖြာꩻ၊ စွန်အံႏထာꩻ၊ အမျာꩻထင်းတန်တဝ်း။
၈။ လိုꩻခိုပဉ်ဖြာꩻ၊ ထုမ်ႏကျိုꩻစာꩻ၊ အမျာꩻထီႏဖွီတဝ်း။
၉။ ထုမ်ႏတွမ်-ထုမ်ႏရွမ်၊ ထွာအလွမ်၊ မဉ်ꩻဟွမ်ဝင်ꩻတဲ့ꩻခဝ်း။
"အံႏလဲဉ်"တွမ်ႏ"လဲဉ်အံႏ"
၁။ လꩻရီး လဲဉ်ဆုဲင်ꩻနောဝ်ꩻ "အံႏလဲဉ်"၊
၂။ လဲဉ်ရီး လꩻဆုဲင်ꩻနောဝ်ꩻ "လဲဉ်အံႏ"၊
၃။ နာꩻ"အံႏလဲဉ်"ဝင်ꩻတဲ့ တဟောဝ်တောဝ်း၊
၄။ ဝင်ꩻ"အံႏလဲဉ်"နာꩻတဲ့ တဟောဝ်တောဝ်း၊
၅။ အံႏလဲဉ် - လဲဉ်အံႏနောဝ်ꩻ ထွာ "မုသာꩻ၊ ထွာအကြဲစ်၊ ထွာအပဲစ်"။
၆။ အံႏလဲဉ်တောဝ်း - လဲဉ်အံႏတောဝ်းနောဝ်ꩻ ထွာ"သစ္စာႏ၊ ထွာအစဲစ်၊ ထွာအမဲစ်"၊
၇။ အပဲစ်နောဝ်ꩻ ထွာအီ "ထာꩻဒုက္ခ"၊
၈။ အမဲစ်နောဝ်ꩻ ထွာအီ "ထာꩻချမ်ꩻသာႏ"၊
၉။ ဒေါ့ꩻမွိုန်းတောဝ်း "ငေါဝ်းမုသာꩻ"၊
၁၀။ ဖြောဝ်ႏဒျာႏသွော့ "ငွါသစ္စာႏ"နော။
"ထာꩻစေꩻတွမ်ႏထာꩻဆေ့ရေး"
၁။ "ထာꩻစေꩻ"နဝ်ꩻ "မစ္ဆရိယ - အကုသိုလ်ႏ" စေတသိက် အဝ်ႏဒို့ꩻခါꩻအသꩻ၊ မဉ်ဖေႏတဝ်းပါꩻ၊ မဉ်လူႏတောဝ်းထာꩻ၊
၂။ "ထာꩻဆေ့ꩻရေး"နဝ်ꩻ "ပညာႏ - သောဘန"စေတသိက် အဝ်ႏဖွေါင်ꩻခါꩻအသꩻ၊ ချင်းကွဉ်ကꩻ၊ ချင်းအံႏ-ချင်းအွꩻ၊ ဖေႏကယပ်ꩻသꩻဗာႏမွုန်း၊
၃။ "ထာꩻစေꩻ"နောဝ်ꩻ "ထွာ - အကုသိုလ်ႏ"၊ ထွာအီ ထာꩻဒုက္ခ၊
၄။ "ထာꩻဆေ့ရေး"နဝ်ꩻ "ထွာတဝ်း - အကုသိုလ်ႏ"၊ ထွာအီ ထာꩻချမ်ꩻသာႏ၊
၅။ ကွပ်နဝ်ꩻမꩻ "စေꩻမွုန်း-ဆေ့ရေး"နေးဒျာႏနော။
"အာႏဏာႏတွမ်ႏ အာႏနာႏ""လိုꩻတန်တွမ်ႏလိုꩻယံ"
၁။ ကပ်ꩻလိုꩻတန်၊ အွမ်ႏလိုꩻတန်တဲင် လိုꩻတန်ဒင်ႏတွော့ꩻ လꩻအာႏဏာႏ၊ ထွာဗာႏလိုꩻတန်၊
၂။ "အာႏနာႏ"နဝ်ꩻ အွဉ်ႏချာ၊ "အာႏဏာႏ"နောဝ်ꩻ အွဉ်ႏငါတဲင် နေးတွမ်ႏ "အာႏဏာႏ"တွော့ꩻ ကမာꩻဒါႏ "အတ္တဟိတ-နမ်းအကျိုꩻ"နဝ်ꩻ ထွာကီလိုꩻတန်တဲ့ "လိုꩻယံမွေးတောဝ်း"၊
၃။ အမျာꩻကျွိုက်၊ အမျာꩻလွိုက်တဲင် အမျာꩻဒင်ႏတွော့ꩻ လꩻအာႏဏာႏ၊ ထွာဗာႏလိုꩻတန်၊
၄။ "အာႏဏာႏ"နဝ်ꩻ အွဉ်ႏချာ၊ "အာႏနာႏ"နဝ်ꩻအွဉ်ႏငါတဲင် နေးတွမ်ႏ"ထာꩻအာႏနာႏ"တွော့ꩻ ကမာꩻဖေႏဒါႏ "ပရဟိတ-ဝင်ꩻအကျိုꩻ"နဝ်ꩻ "ထွာလိုꩻတန်ယင်-ထွာလိုꩻယံယင်"နဝ်ꩻသွူ။
၅။ နာꩻနဝ်ꩻ "အာႏဏာႏသား"နဲ့၊ "အာႏနာႏသား"နဲ့၊
၆။ နာꩻနဝ်ꩻ "ထွာလိုꩻတန်"နဲ့၊ "ထွာလိုꩻယံ"နဲ့။
"ထာꩻမွေးတွမ်ႏထာꩻမာႏ"
၁။ "ထာꩻဒါႏ"ကရိုꩻနောဝ်ꩻ - "ဒါႏအဟောဝ်"တွမ်ႏ "ဒါႏအကုဲင်"အဝ်ႏနီမျိုꩻ။
၂။ ထူႏတွမ်ႏထာꩻဒါႏဟောဝ် မာꩻနဝ်ꩻ "ထွာအမွေး"၊
၃။ နေးတွမ်ႏထာꩻဒါႏကုဲင် မာꩻနဝ်ꩻ "ထွာအမာႏ"၊
၄။ ထူႏတွမ်ႏအမွေးတဲင် နေးဆေ့ꩻဆေ့ꩻ၊ မာꩻအာအာဖေႏ အမျာꩻအကျိုꩻနဝ်ꩻ ဝင်ꩻရိုꩻနာꩻ "လိုꩻဟဝ်"၊
၅။ နေးတွမ်ႏအမာႏတဲင် ထူႏအာအာ၊ မာꩻဆေ့ꩻဆေ့ꩻဖေႏ အမျာꩻအကျိုꩻနဝ်ꩻ ဝင်ꩻရိုꩻနာꩻ "လိုꩻကုဲင်"၊
၆။ နာꩻနဝ်ꩻ မဉ်ထွာ "လိုꩻဟဝ်"နဲ့ꩻ မဉ်ထွာ "လိုꩻကုဲင်"နဲ့၊
၇။ မဉ်ႏမဉ်ထွာ လိုꩻဟောဝ်တဲ့ မာꩻသွော့အဟောဝ်၊
၈။ မဉ်ႏမဉ်ထွာ လိုꩻကုဲင်တဲ့ မာꩻသွော့အကုဲင်၊
၉။ အဟောဝ်တွမ်ႏ အကုဲင်အကျိုꩻနောဝ်ꩻ မဲ့ꩻ"ကံႏတရာꩻ မာꩻဖေႏဒျာႏ"။[၁][၂]