ထာꩻမာꩻကထဲ့အီ အပါယ်ႏ

ယားတမူ၊ ယာႏအာ၊ တခူန်ꩻမာ။ တွောန်ဖိုးထီးဗွာ၊ လဲ့ꩻတခြာ။ စံꩻငါႏမုဆိုꩻ - ပါယ်ႏလိစ်ꩻမျိုꩻ ။

ယားတမူ၊ ယာႏအာ-ကစဒါႏယိုဖိုင်ႏနဝ်ꩻ ပေါႏပဉ္စာနန္တရိယအကုသိုလ်ႏကံႏထွူနဝ်ꩻ အပဲစ်ကတန်ဒါႏအကုသိုလ်ႏကံႏနေနေ မီဉ်ႏဒေါ့ꩻနုဲးနဝ်ꩻတဲ့ တမာႏတဝ်းသွူ။

ယားတမူ-ကရိုꩻနဝ်ꩻ လောကကိုယို ဟဝ်ငမ်းခရာႏသုတ်ꩻသုတ်ꩻစိုန်သားနဝ်ꩻ ထွာလိုꩻ ကယားဒါႏတမူတဝတ်ꩻသားဖိုင်ႏနဝ်ꩻသွူ။ တမူတဝတ်ꩻပေႏဖိုင်ႏနဝ်ꩻ နေးတောမ်ႏသမ္မာအာဇီဝတဲင် ကထိုမ်ႏရွောမ်ခြွောန်းဒါႏတမူထီတဝတ်ꩻထီဖိုင်ႏယို စိုန်ထိုꩻဝင်ꩻ ယားထိုꩻဝင်ꩻ။ တမူမွူး တဝတ်ꩻမွူးဖိုင်ႏ မီဉ်ႏတလဲ့ꩻထိုꩻဖေႏတဝ်းနဝ်ꩻ လဲ့ꩻသီဝင်ꩻတောမ်ႏမေႏ။ ထီႏထီႏတမူ တဝတ်ꩻပေႏ ဆားဆွုက်ꩻပေႏဖိုင်ႏယို မာꩻသီထွူ အံႏပြာꩻ အံႏကျော်ဝင်ꩻ။ စိုန်သားကအီႏမွိုက်ꩻကယ်ꩻနုဲးယို လောကကိုယို အဲန်ထဝ်းဒူမ်သွူ။

ယာႏအာ-ကရိုꩻနဝ်ꩻ ထွားထွားသွူနမ်းကလွူးခါꩻဒါႏ ဖိုး၊ ထော့ꩻ၊ ဗဲး ကစဖိုင်ႏယိုထွူ ယိုတဗာႏနဝ်ꩻ အခီင်ႏညလဲန်းခွိုင်းမုဲꩻ?။ ယိုတဗာႏနဝ်ꩻ တန်လဲန်းသွူ။ အယာႏတဲ့အာလဲန်းသွူ။ စာထိုꩻတဲ့အီႏလꩻသွူ။ တဝ်းလဲ့ ဖို့ꩻအံႏအီႏလꩻသွူ။ အကုသိုလ်ႏဖိုင်ႏ အဝ်ႏတိုꩻလွောန်နုဲးနဝ်ꩻသွူ။

တခူန်ꩻမာ-ကရိုꩻနဝ်ꩻ တခူန်ꩻဝင်ꩻမာ၊ ဝင်ꩻဝါꩻယို ဒေါ့ꩻခရာႏ ရတလိုႏတဝ်းဒူမ်။ ကာမပဲင်ႏဗွေႏ အဝ်ႏငါႏသွူတမိုႏမိုႏလဲ့ လွေꩻပဲစ်မာႏ။ ပျောႏဗာႏတဆင်ႏ ကခံႏဗာႏနဝ်ꩻနေင်ႏပေါင်ꩻ သီင်ꩻသောင်ꩻလူမ်ꩻတကာႏတဝ်းမွေ့ာ။

တွောန်ဖိုးထီးဗွာ-ကရိုနဝ်ꩻ တောမ်ႏစူနိုင် ဝဲတ်ꩻချာစမ်ꩻ နမ်းဒီႏခူꩻမွိုင်။ မဲ့ထီဟူႏဗာႏစွောန်ႏထာꩻ။ တွိုႏဖိုးထီးထွိုက်ꩻဒီႏခူꩻ ဖေႏကပꩻ ဖေႏကဖူန်ႏ ထူႏတောမ်ႏတွီး ကတွဲႏပꩻ ကနဲပ်ꩻပꩻဝင်ꩻနဝ်ꩻ အကုသိုလ်ႏတန်ထာꩻ တခွိုင်းမုဲꩻ ယူႏဗူန်ႏတဝ်းခွေႏ။

လဲ့ꩻတခြာ-ကရိုꩻနဝ်ꩻ ထူႏတောမ်ႏမေႏခြဲတ်ꩻ ကလဲ့ꩻတခြာနဝ်ꩻ သတ္တဝါႏပေႏတန်မျိုꩻပေါင်ꩻစူမ်ႏ သီလွဗာႏထာꩻ။ "လဲ့တခြာတချက် မုဆိုꩻတသက်" မီဉ်ႏဒေါ့ꩻနုဲးနဝ်ꩻနဝ်ꩻ တမာႏတဝ်းသွူ။

စံꩻငါႏမုဆိုꩻ-ကရိုꩻနဝ်ꩻ အဝ်ႏထီႏဖို၊ အဝ်ႏသေဒျာႏအတွိုင်ꩻ။ ခွင်ꩻသာႏတွိုင်ꩻ မာꩻသီသတ္တဝါႏဖိုင်ႏထွူ "စံꩻငါႏပိုမာ ဟို့ꩻပေႏတထာတာႏ ထပေႏဖိုင်ႏ ခံႏဗာႏထာꩻသီ"ကရိုꩻနဝ်ꩻအတွိုင်ꩻ စာအံႏ လွူးအီနမ်း၊ ပိုမာဖိုင်ႏတဲင် အကုသိုလ်ႏအာကယ်ꩻလိုꩻလင်ရိုꩻဗာႏနုဲးနဝ်ꩻသွူ။

ကောပ်နဝ်ꩻမꩻ မီဉ်ႏသီလွေꩻငါ လွေꩻတွိုႏဗာႏအပါယ်ႏခြံကို သေႏချာႏသွူ။

တွော့ꩻ အဓိကဒျာႏ အဆုဲꩻသုတ်ꩻ သက်ထဲ့ခီင်ႏနဝ်ꩻသွူ။ မာꩻအံႏနမ်း စံꩻငါႏသား တသက်လူမ်းရိုꩻကီလဲ့ အခီင်ႏတွိုင်ꩻ မာꩻအကုသိုလ်ႏလူမ်ꩻ မွေးတဝ်း။ ကမာꩻဒါႏကုသိုလ်ႏခီင်ႏလဲ့ အဝ်ႏနေနေ။

သက်ကအီႏထဲ့ခီင်ႏ ယူႏလꩻချာကုသိုလ်ႏထွူ မီဉ်ႏသီလွေꩻနဝ်ꩻ အီႏတွိုႏထင်ႏဗာႏလူꩻခမ်း။ ကုသိုလ်ႏကံႏခြွီမီဉ်ႏလိုꩻငါ တွိုႏဘဝဆုဲꩻချာတနီꩻခါသူꩻနဝ်ꩻ လဲ့ꩻတလွောတ်တဝ်းတဲင် အီႏခံႏချာဗာႏယင်းဒျာႏ ကမာꩻခါꩻဒါႏ အကုသိုလ်ႏ အကျိုꩻဖိုင်ႏသွူ။

ပုထုဇဉ်ႏလိုꩻသီးဖိုင်ႏနဝ်ꩻ တကင်ꩻတဝ်းတောမ်ႏ အကုသိုလ်ႏတဲင် ဗိုန်ပီနုဲး "လိုꩻပေႏတောမ်ႏလိုꩻတန် ကစံႏ မေႏအူ"နဝ်ꩻအတွိုင်ꩻ။ လိုꩻပေႏနဝ်ꩻ သေတဝ်း မေႏအူလျားထွူ စံႏတဲင် ယီင်းလျားဗာႏ။ လိုꩻတန်နဝ်ꩻ သေမေႏအူလျားထွူ စံႏဗွီႏဗွီႏတသွာႏသွာႏနေးတဲင် အလျားသက်သာႏ။ ဖေႏကလျားမွုန်းလဲ့ စံႏနွောင်ꩻနဝ်ꩻသွူ။

နုဲးနဝ်ꩻနေနေ သေအကုသိုလ်ႏသားနဝ်ꩻ တမာꩻတဝ်းဒူမ် အကုသိုလ်ႏ တောမ်ႏသꩻပါပါစား။ ထွိုင်ႏတမာꩻတဝ်းဒူမ်နဝ်ꩻ တခံႏဗာႏတဝ်တဝ်းဒူမ် အကုသိုလ်ႏအကျိုꩻနဝ်ꩻသွူ။

အွောန်ႏသꩻမီဉ်ႏဒါႏနဝ်ꩻ မာꩻထာꩻမာꩻ အကုသိုလ်ႏဖေႏကလွောစ်ထွာပါမွုန်းနဝ်ꩻအနယ်ꩻအဝ်ႏမွေးတဝ်းနဲ့။

ခွိုင်းကနွောင်ꩻရာꩻ တောမ်ႏအကုသိုလ်ႏကင်ꩻကင်ꩻစား ယံကထိုမ်ႏကျံႏနွောင်ꩻဒျာႏသွော့ဝါင်ꩻ စီꩻပွာꩻအကျောင်ꩻ။