ထွို့ꩻဗူႏရေꩻ
ထွို့ꩻဗူႏရေꩻ[မွဉ်းဖျင် | မွဉ်းဖျင်အရွီးခိုႏ]
ကရိုꩻနဝ်ꩻ ၁။ အစွုမ်ꩻစွိုꩻ အဝ်ႏဗာႏတဉ်ႏတဉ်ႏခွေါင်ခွေါင်၊ အမျိုꩻသာꩻထာꩻမာꩻ အစွိုးတမျိုꩻလဲ့သင်၊ ခမ်းထီ၊ စီꩻပွာꩻ၊ ပညာႏ၊ ဘာႏသာႏ၊ သာႏသနာႏရေꩻ ထာꩻမာꩻဖုံႏလဲ့သင် ထာꩻမာꩻအကျိုꩻဆောင်ႏ ကောႏမတီႏစွုမ်ꩻစွိုꩻ မဉ်ႏအဝ်ႏတဉ်ႏတဉ်ႏခွေါင်ခွေါင်နဝ်ꩻ ထာꩻမာꩻတွိုႏခြောင်ꩻမွိုင်နဝ်ꩻသွူ။ နေးတွမ်ႏအစွိုꩻအနေႏ ကမာꩻထွိုက်ဒါႏ ထာꩻမာꩻမျိုꩻယို တဖြာꩻမာꩻလွုမ်ꩻ တထွာနွောင်ꩻတဝ်းတဲင် ယိုခါ စွိုးခွိုꩻလိတ်လုဲင်ꩻတွမ်ႏ ဘာႏသာႏ သာႏသနာႏရေꩻထာꩻမာꩻဖုံႏယို ထွာဒျာႏ အမျာꩻအစွုမ်ꩻစွိုꩻ အွဉ်ငါမုꩻ ထာꩻမာꩻမျိုꩻဒျာႏနဝ်ꩻမꩻ ဗဟိုႏ၊ ဝေင်ꩻနယ်ႏ၊ အွိုင်ႏ၊ ဒုံဆောင်ႏစစွဉ်ႏ ထာꩻမာꩻအကျိုꩻဆောင်ႏအစွုမ်ꩻစွိုꩻ အရန်းရန်းဖုံႏ အဝ်ႏလွဉ်ဗာႏနဝ်ꩻသွူ။ အစွုမ်ꩻစွိုꩻ အဝ်ႏထွူအတွိုင်ꩻ လွောင်ႏဗူႏရေꩻ မဉ်ႏအဝ်ႏမꩻ အစွိုꩻအီႏတဉ်ႏခွေါင်နွောင်ꩻ၊ အစွိုꩻမဉ်ႏတဉ်ႏခွေါင်မꩻ ကအင်းရေႏဒါႏ စွိုးခွိုꩻထာꩻမာꩻဖုံႏ အီႏတွိုႏခြောင်ꩻ၊ ထီႏနွောင်ꩻအနမ်းအခြုံဖုံႏနဝ်ꩻသွူ။ ၂။ အစွုမ်ꩻစွိုꩻအာႏရင်ꩻ- အစွိုꩻစွိုꩻအာႏရဲင်ꩻကရိုꩻနဝ်ꩻ အစွိုꩻနွို့ထာꩻမာꩻအမုꩻဆောင်ႏဖုံႏ အဆင်းအရန်းအလွောက်ꩻ တဖြာꩻဆေ့ꩻအာ လွုမ်းကွုမ်ႏမုꩻ၊ အထီအသွီႏဗွေလွုမ်းကွုမ်ႏမုꩻ၊ လွောင်ႏဗူႏမုꩻ၊ သွုန်ႏသꩻထင်ရုဲင်းဟန်မုꩻဖုံႏယိုနဝ်ꩻ ထွာဒျာႏ အစွိုꩻစွိုꩻအာႏရဲင်ꩻနဝ်ꩻသွူ။ ၂။(က) ဒုံဆောင်ႏ/ အွိုင်ႏ/ နယ်ႏ/ ဗဟိုႏစစွဉ်ႏ အဆင်းအရန်းဆဲင်ႏရာꩻ ကလိုႏအပ်ထွိုက်ဒါႏ ထာꩻမာꩻအမုဆောင်ႏ အစွိုꩻအဖြာꩻဆေ့ꩻအာ/ အပါꩻဆေ့ꩻအာဖုံႏ လွုမ်းကွုမ်ႏလဲ့ ထွာလဲဉ်းအာႏရဲင်ꩻ တမျိုꩻနဝ်ꩻသွူ။
ပုဂ္ဂိုလ်ႏအထီအသွီႏ ဗွေလွုမ်း[မွဉ်းဖျင် | မွဉ်းဖျင်အရွီးခိုႏ]
ကရိုꩻနဝ်ꩻ - (၁) သꩻရက်ခွိုꩻကအဝ်ႏဒါႏပုဂ္ဂိုလ်ႏ၊ (၂) ရိုꩻသာꩻစွို့ꩻစွဉ်ႏပုဂ္ဂိုလ်ႏ၊ (၃) မဉ်ထီႏဒျာႏ အမျာꩻအကျိုꩻ (ပရဟိတသꩻရင်ꩻကအဝ်ႏဒါႏပုဂ္ဂိုလ်ႏ)၊ (၄) အဓမ္မမျိုꩻနဝ်ꩻ အဓမ္မအတွိုင်ꩻ ရုဲင်းရုဲင်းဟန်ဟန် ဖြေႏသျင်ꩻဒင်ႏပျꩻဗွုန်ႏဒါႏပုဂ္ဂိုလ်ႏ၊ (၅) ထာꩻမာꩻမဲဉ်ႏအတွိုင်ꩻ ရုဲင်းရုဲင်းဟန်ဟန် ဖြေႏသျင်ꩻဒင်ႏပျꩻဗွုန်ႏဒါႏပုဂ္ဂိုလ်ႏ၊ (၆) အထီႏအဟွုန် ဗဟုသုတအဝ်ႏ (ဗဟုသုတဖေႏကလွိုင်ႏကွုန်ꩻအာ အဝ်ႏစုရွမ်)ဒါႏပုဂ္ဂိုလ်ႏ၊ (၇) စေႏတနာႏ၊ ဝါႏသနာႏ၊ အနစ်နာႏလဲ့ ခံႏနွောင်ꩻပုဂ္ဂိုလ်ႏ၊ (၈) စုပေါင်ꩻအွဉ်ငါစနစ် သꩻရင်ꩻကအဝ်ႏဒါႏပုဂ္ဂိုလ်ႏ-အစွိုꩻကို ပုဂ္ဂိုလ်ႏစားယိုဖုံႏ မဉ်ႏပါသော့ꩻအာနဝ်ꩻ ထွာအစွိုꩻအာႏရဲင်ꩻ တမျိုꩻနေနေနဝ်ꩻသွူ။ ဒါႏပညာႏသား အထီအသွီႏကအဝ်ႏဒါႏ ပုဂ္ဂိုလ်ႏစားယိုဖုံႏ ဖေႏနေးကပါသော့ꩻလွဉ်နွောင်ꩻ အစွိုꩻကိုနဝ်ꩻ တလဲင်ႏတစိꩻစိꩻ စုရွမ်ထွို့ꩻဗူႏသော့ꩻဗာႏနဝ်ꩻသွူ။ အစွိုꩻကို သꩻရက်စွိုးခွိုꩻတအဲဉ်ထဝ်းပုဂ္ဂိုလ်ႏ၊ ရိုꩻသာꩻစွို့ꩻစွဉ်ႏမု တအဲဉ်ထဝ်းပုဂ္ဂိုလ်ႏ၊ ဟဝ်နမ်းတာႏပုဂ္ဂိုလ်ႏစစွဉ်ႏ အထီတသွီႏ တလွုမ်းတဝ်းပုဂ္ဂိုလ်ႏဖုံႏ မဉ်ႏပါသော့ꩻအာနဝ်ꩻ လိုꩻအာစွဉ်ႏလဲ့ ပွယ်ꩻတကွုန်ꩻနွောင်ꩻတဝ်းတဲင် အစွိုꩻအာႏရဲင်ꩻ ဗွေလွုမ်းနွောင်ꩻအတာႏ အဝ်ႏလိုႏအာငါႏ ပုဂ္ဂိုလ်ႏအထီအသွီႏ ဗွေလွုမ်းဖုံႏနဝ်ꩻသွူ။ ယဟန်ႏသားနဝ်ꩻ ကရိုꩻဒါႏအထီအသွီႏဖုံႏ အဝ်ႏဒျာႏလဲ့ နမ်းမော့ꩻထာꩻမာꩻ တမော့ꩻကျုံႏဗာႏဖိုတဝ်းနဝ်ꩻ အီႏနွို့ပါသော့ꩻညီꩻဗာႏ အစွိုꩻကိုယို သꩻရွူႏထိုꩻဒါႏနဝ်ꩻသွူ။ ကွဲႏတွော့ꩻ နမ်းမော့ꩻထာꩻမာꩻ မဉ်ႏတလူႏလွဉ်ဗာႏ ကွဲးအာအာမꩻ အဝ်ႏထာꩻမာꩻတွမ်ႏထာꩻမာꩻ သွဉ်ချာဒျာႏတွော့ꩻ တလဲင်ႏတစိꩻစိꩻ ကျင်ႏလယ်ႏလွဉ်ဗာႏဒျာႏနဝ်ꩻသွူ။ နဝ်ꩻသွူတကာႏတဝ်း အစွိုꩻကို လိုꩻမဲဉ်ႏ၊ ခင်ႏလမ်းမဲဉ်ႏ ဖေႏကထွာနွောင်ꩻနဝ်ꩻလဲ့ အဝ်ႏလိုႏလွိုက်ရွေꩻ ဒင်ႏမျောက်ဗာႏနဝ်ꩻသွူ။ ဥပမာႏ- ပုဂ္ဂိုလ်ႏတပါꩻ/ တဖြာꩻနဝ်ꩻ ပညာႏထာꩻဒါႏလဲ့အဝ်ႏ၊ အသက်အရွယ်ႏလဲ့ ပေါင်းတန်၊ အစွိုꩻအလောင်း၊ အမျာꩻအလောင်း၊ စွိုးခွိုꩻအလောင်း ကအွဉ်နွောင်ꩻဒါႏ အထီအသွီႏလဲ့အဝ်ႏ၊ သꩻရက်စွိုးခွိုꩻလဲ့အဝ်ႏ၊ အနစ်နာႏလဲ့ခံႏနွောင်ꩻ၊ နမ်းမော့ꩻထာꩻမာꩻလဲ့မာꩻနွောင်ꩻ၊ စေႏတနာႏ၊ ဝါႏသနာႏလဲ့အဝ်ႏ၊ ရိုꩻသာꩻစွို့ꩻစွဉ်ႏမုꩻလဲ့အဝ်ႏ၊ ရုဲင်းဟန်မုꩻ သတ္တိꩻလဲ့လွုမ်း၊ အမျာꩻလဲ့အာႏကွိုꩻရိုꩻသေႏဒါႏပုဂ္ဂိုလ်ႏနုဲင်းယိုနဝ်ꩻ ခင်ႏလမ်းမဉ်ႏမဲဉ်ႏလဲ့ အစွိုꩻထာꩻမာꩻ အင်းရွယ်ႏချက်ဖုံႏ အောင်ႏမျင်ႏနွောင်ꩻအီနဝ်ꩻသွူ။ ကွဲႏတွော့ꩻ ဝွေꩻခင်ႏလမ်းမဉ်ႏတမဲဉ်ႏတဝ်းနဝ်ꩻ ကအီႏခွုမ်မာꩻ ထာꩻမာꩻသူꩻ အဝ်ႏလွိုႏလွိုႏကာႏကာႏ သꩻဓာတ်ကုဲင်းထဲ့ဖွိုႏထိုꩻဒါႏနဝ်ꩻသွူ။ ကွပ်နဝ်ꩻမꩻ လိုꩻမဲဉ်ႏ ခင်ႏလမ်းမဲဉ်ႏနဝ်ꩻ အရေꩻတန်ငါႏနဝ်ꩻသွူ။
အစွိုꩻလွောင်ႏဗူႏရေꩻ[မွဉ်းဖျင် | မွဉ်းဖျင်အရွီးခိုႏ]
အစွိုꩻလွောင်ႏဗူႏရေꩻယိုလဲ့ အရေꩻတန်ကိစ္စ တမျိုꩻနေနေနဝ်ꩻသွူ။ အစွိုꩻလွောင်ႏဗူႏတဉ်ႏခွေါင်ရေꩻယိုနဝ်ꩻ တပါꩻတွမ်ႏတပါꩻ သေနာႏစွꩻခွင်ꩻမုꩻ၊ စာႏနာႏမုꩻသꩻဓာတ် သဘော်ꩻဗွိုန်ပီမုꩻဖုံႏယို ထွာအခေႏခံႏနဝ်ꩻသွူ။ ပြောင်ꩻလုဲင်ႏတဝ်းအချက်ဖုံႏ၊ ပုဂ္ဂိုလ်ႏရေꩻအလꩻ ပျဿနာႏယဟန်ႏဖုံႏနဝ်ꩻလဲ့ ယားကုဲင်အီဒါႏ အစွိုꩻလွောင်ႏဗူႏရေꩻနဝ်ꩻသွူ။ အရေꩻတန်ငါႏအချက်နဝ်ꩻ "စုပေါင်ꩻအွဉ်ငါမုꩻ" ထာꩻမာꩻဒျာႏတဲင် ပုဂ္ဂိုလ်ႏရေꩻအလꩻ ဟဝ်ဒေါ့ꩻသေနာႏ(ပုတ်ခတ်)တဝ်း အစွိုꩻအနေႏနဝ်ꩻသွူ။ ဒင်ႏပျꩻလွဝင်ꩻ အခရာႏမဉ်ႏအဝ်ႏလဲ့ ဒင်ႏပျꩻဖြောင်ဖြောင်ဗာႏလို့ဝင်ꩻ၊ တဖဲ့ꩻကဒင်ႏပျꩻဒါႏအချက်ဖုံႏနဝ်ꩻ တဖဲ့ꩻသားလဲ့ ထီႏဖွီဗာႏတဝ်း၊ အွဉ်ႏရေꩻအံႏသွင်ꩻထွူတဲင် နီဖဲ့ꩻနီခဝ် အဆင်ႏဖေႏကပြေႏနဝ်ꩻ နေးတွမ်ႏထာꩻသေ (နာနာႏတွော့ꩻ ဖြေႏသျင်ꩻဟဝ်ဟဝ်ဒါႏဒါႏဗာႏလွဝင်ꩻနဝ်ꩻသွူ။ ထာꩻမာꩻခွင်ꩻကရိုꩻနဝ်ꩻလဲ့ ကျင်ꩻသုံꩻလွေꩻဗာႏဒျာႏ စုပေါင်ꩻအွဉ်ငါမုစနစ်ယိုနဝ်ꩻ လွောင်ႏဗူႏရေꩻယိန်းတဉ်ႏခွေါင်အီနဝ်ꩻသွူ။ လိုꩻဆေ့ꩻဖဲ့ꩻ ကဒင်ႏပျꩻလွဉ်ဒါႏ အချက်ဖုံႏနဝ်ꩻလဲ့ လိုꩻအာဖဲ့ꩻ အံႏသွင်ꩻထူႏရေꩻ သုံꩻသပ်ဝွေႏဖန်ႏ ရပ်ခံႏဆုံꩻဖျတ်ဖေႏဗာႏ၊ အွဉ်ႏဖွီထိုꩻဗာႏတဝ်းသွူ။ အဝ်ႏအစွိုꩻဆကီ အရန်းရန်း ကဆုံꩻဖျတ် ဖေႏအပ်လင်ꩻဒါႏ တာႏဝွန်ႏဖုံႏနဝ်ꩻ အစွိုꩻဆလ အရန်းရန်းဖုံႏ ထူႏတာႏဝွန်ႏခွုမ်မာꩻလွေꩻဗာႏနဝ်ꩻသွူ။ အခေႏအနေႏမဲဉ်ႏအတွိုင်ꩻ ဒင်ႏပျꩻဗာႏလွဝင်ꩻ၊ ကဒင်ႏပျꩻလွဉ်အတွိုင်ꩻ ဆဲင်ႏရာꩻတာႏဝွန်ႏအဝ်ႏပုဂ္ဂိုလ်ႏသီး ထူႏရေꩻဖြေႏသျင်ꩻဆွုမ်ႏဗာႏ၊ အွဉ်ႏနယ်လွေꩻဖေႏထဲင်းဗာႏ တဖူꩻရဲဉ်ႏဖုံႏ စစွဉ်ႏစားယိုဖုံႏနဝ်ꩻ ထွာဒျာႏ စုပေါင်ꩻအွဉ်ငါမုနဝ်ꩻသွူ။
အစီꩻဝွေꩻပွယ်ꩻမော့ꩻခွဲး တွမ်ႏလွောင်ႏဗူႏရေꩻ[မွဉ်းဖျင် | မွဉ်းဖျင်အရွီးခိုႏ]
အစီꩻအဝွေꩻပွယ်ꩻမော့ꩻခွဲယို ယိန်းအဝ်ႏခွိုꩻလဲ့ ယိန်းဟဝ်၊ ထွာအီလွောင်ႏဗူႏရေꩻ အခေႏခံႏနဝ်ꩻသွူ။ အစွိုꩻသားချင်ꩻချင်ꩻ မဉ်ႏမော့ꩻခွဲခွိုꩻလို့ဝင်ꩻမꩻ အကျောင်ꩻမဲဉ်ႏ အကျံႏဉာဏ်ႏတသာဖုံႏ ဒင်ႏပျꩻလူႏလုဲင်ႏလို့ဝင်ꩻတဲင် ကအီႏမာꩻငါလွေꩻထဲင်းဒါႏ ထာꩻမာꩻအလောင်း ဝွေႏဖန်ႏထီႏဖြောင်နွောင်ꩻအီနဝ်ꩻသွူ။ ကွပ်နဝ်ꩻမꩻ အစွိုꩻပွယ်ꩻမော့ꩻခွဲ အဝ်ႏမုဲင်ꩻခါတရိုꩻတဝ်း အစွိုꩻသားစွုမ်ႏဖြာꩻ ပေါႏခြွိုင်ႏသန်ꩻရေꩻ အဝ်ႏဟဝ်နဝ်ꩻ လိုႏထင်ႏငါႏ၊ နမ်းရင်ꩻထာꩻမာꩻ ကျိုꩻစာꩻအွဉ်ႏကုဲင်ယို့ꩻတွော့ꩻ ထူႏရေꩻဗာႏဒျာႏ အမျာꩻကိစ္စ၊ နမ်းရင်ꩻကိစ္စ လုံးဝမဉ်ႏတဖုဲင်ႏတဝ်းလာꩻလာꩻ၊ အွဉ်ႏကုဲင်လုံးဝ မဉ်ႏတလꩻတဝ်းရိုꩻလဲ့ တဲမ်းလိတ်ဖေႏဆန္ဒတွောꩻ (ဖေႏဗာႏဆန္ဒ)နဝ်ꩻမꩻ ထွာအံႏသွင်ꩻ၊ ရိုႏသေႏအမျာꩻ အစွိုꩻသားဖုံႏနဝ်ꩻသွူ။ အစီꩻအဝွေꩻ ပွယ်ꩻမော့ꩻခွဲကို ၇၅ ရျာꩻခေါင်ꩻ မဉ်ႏတဗွေတဝ်းနဝ်ꩻ ထွာနွောင်ꩻတတဝ်း အစီꩻအဝွေꩻနဝ်ꩻမꩻ အတတ်နွိုင်ႏသွတ်ꩻ အွဉ်ႏရေꩻဗာႏနဝ်ꩻသွူ။ ပွယ်ꩻမော့ꩻခွဲကို ကထင်ႏလွဉ်ဒါႏ အစွိုꩻသားအဖြာꩻ/ အပါꩻလဲ့မရိုꩻ အစွိုꩻအတွက်၊ အမျာꩻအတွက် အကျိုꩻကအဝ်ႏဒါႏ အကျံႏအဉာဏ်ႏဖုံႏ နမ်းဆန္ဒထာꩻထီႏဖုံႏ ကမဉ်ဒင်ႏပျꩻအတွိုင်ꩻ ဒင်ႏပျꩻခွင်ꩻအဝ်ႏဗာႏနဝ်ꩻသွူ။ ကမဉ်ဒင်ႏပျꩻဒါႏအတွိုင်ꩻ ပွယ်ꩻမော့ꩻခွဲကို အစွိုꩻအဝ်ႏစုံႏယာႏအတွင်ꩻ သံးတဒင်ႏပျꩻတဝ်းတဲင် အစီꩻအဝွေꩻထွူသွူမꩻ ဝွေႏဖန်ႏဒေါ့ꩻဆုဲင်ꩻ ဝင်ꩻမဉ်ꩻစားယိုဖုံႏလဲ့ လိုႏသျောင်ႏလꩻလꩻ၊ ယားကုဲင်အီငါႏလွောင်ႏဗူႏရေꩻ၊ ယားကုဲင်နွောင်ꩻအီဒါႏ သꩻဓာတ်ရေꩻဖုံႏနဝ်ꩻသွူ။ ဆန္ဒအတွိုင်ꩻ ဒင်ႏပျꩻဝွေႏဖန်ႏဖြောင်ဖြောင်ဗာႏဒျာႏ ပွယ်ꩻမော့ꩻခွဲကိုနဝ်ꩻသွူ။ နဝ်ꩻသွူတကာႏတဝ်း အဝ်ႏပွယ်ꩻမော့ꩻခွဲကို စုပေါင်ꩻကဆုံꩻဖျတ်သေꩻခါꩻဒါႏ ထာꩻမာꩻတဖူꩻစဲဉ်ႏဖုံႏနဝ်ꩻလဲ့ တာႏဝွန်ႏကေႏကေႏ ကအီႏကျိုꩻဆောင်ႏလွေꩻနဝ်ꩻ ထွာဒျာႏအစွိုꩻသားတွိုင်ꩻသီး တာႏဝွန်ႏဖုံႏနဝ်ꩻသွူ။ တောင်ꩻသေꩻ// ပွယ်ꩻမော့ꩻခွဲတဗာႏအကို (ပီပြင်မု) ဖေႏကအဝ်ႏနဝ်ꩻလဲ့ ဖျင်ဆင်ဗာႏ ပွယ်ꩻအခန်ꩻအနာꩻ၊ ကဖျင်ဆင်သေꩻခါꩻဒါႏအတွိုင်ꩻ သဘာပတိ၊ နာယက၊ ဥက္ကဋ္ဌ၊ အွဉ်အကိုရေꩻ၊ အစွိုꩻနွို့၊ အွဉ်ႏခြပ်သား၊ ဒင်ႏမတ်တန်ꩻသား ပုဂ္ဂိုလ်ႏစားယိုနဝ်ꩻ ကချꩻသေꩻဒါႏ ခင်ႏလမ်းအတွိုင်ꩻ သတင်ꩻသုံꩻ/ အုံဗာႏနဝ်ꩻသွူ။
သွုန်ႏသꩻထင် ရုဲင်းဟန်မုꩻ[မွဉ်းဖျင် | မွဉ်းဖျင်အရွီးခိုႏ]
သွုန်ႏသꩻထင် ရုဲင်းဟန်မုꩻကရိုꩻနဝ်ꩻ နေးတွမ်ႏသꩻရက်ခွိုꩻတွော့ꩻ စွိုးခွိုꩻအတာႏ အကျိုꩻကအဝ်ႏထာꩻမာꩻဖုံႏယို မဉ်မော့ꩻတလူႏအဆူႏအနာႏ နုဲင်းမုဲင်ꩻမုဲင်ꩻတယဝ်း ခံႏတဝ်းအဆွတ်၊ ဝီရိယအဝ်ႏအဝ်ႏ တွူႏတရန်ငါနွောင်ꩻ သတ္တိမျိုꩻဖုံႏယိုသွူ။ ထာꩻမာꩻအမျိုꩻမုဲင်ꩻတရိုꩻတဝ်း ပြွစ်ꩻပြေလွုမ်းချော်ꩻစွဉ်ႏတလဲင်ႏချင်ꩻ တအဝ်ႏကြွို့ꩻတဝ်းတဲင် ဆေ့ꩻတွမ်ႏအာ ခံႏဗာႏဝင်ꩻဝွေႏဖန်ႏ ဒေါ့ꩻရိုꩻမု အဆူႏအနာႏ တမျိုꩻမျိုꩻအဝ်ႏဒါႏဒျာႏရင်ꩻ၊ ကွဲႏတွော့ꩻ ကာလ၊ ဒေသ၊ အခေႏအနေႏအလꩻ ကကျိုꩻစာꩻ မာꩻထွိုက်မာꩻသင်ꩻဒါႏ အမျိုꩻသာꩻထာꩻမာꩻယို တခံႏဆွတ်ချာဗာႏတဝ်း၊ အစွန်ꩻကအဝ်ႏအတွိုင်ꩻ နေးတွမ်ႏအစွိုꩻအာႏ၊ ခမ်းသားအာႏစုပေါင်ꩻဝင်ꩻတွော့ꩻ ကျိုꩻစာꩻခွုမ်မာꩻထဲင်းထဲင်းဗာႏ ထာꩻမာꩻနဝ်ꩻသွူ။ စွိုးခွိုꩻဘာႏသာႏ၊ သာႏသနာႏ၊ ပညာႏ၊ စွိုးခွိုꩻလိတ်လုဲင်ꩻ တွမ်ႏယေန်ႏငဲမုꩻ ယံတဉ်ႏခွေါင် ထင်ႏထိုတသွောင်းလွေꩻငါမပ်မပ်နဝ်ꩻ ထွာဒျာႏနီစွိုးခွိုꩻ တာႏဝွန်ႏထာꩻမာꩻဒျာႏတဲင် သမဲင်ꩻဖေႏတာႏဝွန်ႏအလꩻ တာႏဝွန်ႏကေႏကေႏ ကခွုမ်မာꩻထွိုက်သင်ꩻဒါႏအတွိုင်ꩻ ရုဲင်းရုဲင်းဟန်ဟန် ခွုမ်မာꩻဗာႏနဝ်ꩻသွူ။ သွုန်ႏသꩻထင် ရုဲင်းဟန်မုꩻဖုံႏယိုလဲ့ ထွာအစွိုꩻအာႏရဲင်ꩻတမျိုꩻနေနေသွူ။
ထွို့ꩻဗူႏရေꩻ - နီစွိုးခွိုꩻ ဖေႏကအဝ်ႏတဗူႏချင်ꩻ၊ တသꩻချင်ꩻလဲ့သင်၊ စွိုးခွိုꩻလိတ်လုဲင်ꩻ၊ ဘာႏသာႏ၊ သာႏသနာႏ၊ ပညာႏ၊ ထမ်းထီရေꩻ၊ စီꩻပွာꩻရေꩻ၊ ထာꩻသေထာꩻဒါႏဖုံႏလဲ့သင်၊ စွိုးခွိုꩻယေန်ႏငဲးမု ထိန်ꩻသိမ်ꩻရေꩻဖုံႏလဲ့သင် တမျိုꩻသာꩻလွုမ်း နွောင်ꩻရာꩻ တဖြာꩻတဖဲ့ꩻတခဝ် ဖေႏကကျိုꩻစာꩻ ခွုမ်မာꩻရောင်အတွက် ကအီႏထွို့ꩻချာ ပအိုဝ်ႏစွိုးခွိုꩻဖုံႏယို အဝ်ႏလိုႏငါႏ ခေါင်းဆောင်အွဉ်ငါသားဟဝ် တွမ်ႏဆဲင်ႏရာꩻအစွိုꩻ တဉ်ႏတဉ်ႏခွေါင်ခွေါင် ဖေႏကအဝ်ႏဗာႏ အစွိုꩻအလွောင်ႏအဗူႏ အရန်းရန်း၊ မဉ်ႏအဝ်ႏထွူ တဉ်ႏတဉ်ႏခွေါင်ခွေါင်နဝ်ꩻမꩻ တရန်းထွို့ꩻဗူႏလွေꩻဗာႏယင်း လူထုဖုံႏနဝ်ꩻသွူ။ ကအီႏထွို့ꩻဗူႏလွေꩻဒါႏ လူထုယို အခေႏခံႏနဝ်ꩻ - (က) အဝ်ႏလူထုကိုတဲင်တွော့ꩻ ဖေႏကထွာချာ လူထုအတာႏ။ (ခ) သာႏသနာႏရေꩻ၊ ဘာႏသာႏရေꩻ၊ ပညာႏရေꩻ၊ လွောင်ႏဗူႏရေꩻ အနစ်သာရယို ဖေႏသဘော်ꩻကဗွောင် သျင်ꩻပျꩻနယ်ဗာႏ။ (ဂ) ထာꩻမာꩻစွိုꩻသား ခံႏနယ်ပျꩻနယ်ဗာႏ။ (ဃ) စွိုးခွိုꩻသမဲင်ꩻရေꩻယို ဒေါ့ꩻဟော်ꩻသျင်ꩻပျꩻနယ်ဗာႏ။ (င) စွိုးခွိုꩻလိတ်လုဲင်ꩻယို အရေꩻတန်ငါႏအကျောင်ꩻ ဒေါ့ꩻဟော်ꩻနယ်ဗာႏ။ (စ) ထွို့ꩻဗူႏတွမ်ႏလိတ်စောင်ႏ။ အချက်အမုဲင် (က) ဗꩻ (စ)ဖုံႏယိုနဝ်ꩻ ထွာဒျာႏ ထွို့ꩻဗူႏတွမ်ႏသဘော်ꩻတရာꩻနယ်ꩻဖုံႏနဝ်ꩻသွူ။ ခေတ်အလွောက်ꩻတွော့ꩻ သင်ꩻရာꩻခင်ႏလံးနဝ်ꩻ ထွို့ꩻဗူႏတွမ်ႏအနုပညာႏနယ်ꩻယိုလဲ့ လိုႏအပ်ငါႏနေနေနဝ်ꩻသွူ။ (ဆ) ငဝ်းတဲက်၊ ငဝ်းတဲက်ဒွေါင်ႏ၊ ငဝ်းတချင်ꩻ၊ အဒုံႏအအူ အကျူႏပဒေႏသာႏစားယိုဖုံႏနဝ်ꩻ ထွာခေတ်လိုꩻပေႏသꩻရာႏတဲင် အနုပညာစားယိုလဲ့ ထွာအခေႏခံႏ ထွို့ꩻဗူႏရေꩻတမျိုꩻနဝ်ꩻသွူ။
အဝ်ႏလူထုကို ဖေႏကထွာချာ လူထုအတာႏ[မွဉ်းဖျင် | မွဉ်းဖျင်အရွီးခိုႏ]
အဝ်ႏလူထု ကလွိုက်ရွေꩻ ဒင်ႏမျောက်ဒါႏ လူထုနမ်းတင် ထာꩻမာꩻသားတရိုꩻတဝ်း အလွောင်ႏအဗူႏတစွိုးစွိုးကိုတရိုꩻတဝ်း အမျာꩻသဘော်ꩻလꩻ ကဒင်ႏမျောက်ထင်ႏပုဂ္ဂိုလ်ႏဖုံႏယို ထွာဒျာႏ အမျာꩻအကျိုꩻတာႏနဝ်ꩻသွူ။ အစွုမ်ႏစွိုꩻကိုယို ထွာဒျာႏအမျာꩻဖေႏတာႏဝွန်ႏတွောꩻ ဆောင်ႏရွက်ဖေႏဗာႏ အမျာꩻအကျိုꩻ၊ စွိုးခွိုꩻဖေႏတာႏဝွန်ႏတွော့ꩻ ခွုမ်မာꩻဗာႏဒါႏ စွိုးခွိုꩻအကျိုꩻနုဲင်းယိုနဝ်ꩻ အဝ်ႏလူထုကိုတွော့ꩻ ထွာလူထုအတာႏနဝ်ꩻသွူ။ အချက်ယိုနဝ်ꩻ နယ်ႏပယ်ႏလုဲင်းစွဉ်ႏလဲ့ ယိုကိုနဝ်ꩻ တဲမ်းနယ်ဖေႏဗာႏ အမော့လွုမ်ꩻသွူ။
ထာꩻမာꩻစှိုꩻသား ခံႏယပ်ꩻနယ်ဗာႏ[မွဉ်းဖျင် | မွဉ်းဖျင်အရွီးခိုႏ]
အမျာꩻသဘော်ꩻလꩻ ကဒင်ႏမျောက်ဒါႏ အမုဆောင်ႏသားစွိုꩻဖုံႏယို အမျာꩻအကျိုꩻအတွက် ခံႏယပ်ꩻခံႏပန်ꩻဗာႏနဝ်ꩻသွူ။ အစွိုꩻသားဖုံႏ မဉ်ႏခံႏယပ်ꩻ၊ ခံႏခုဲင်ႏနွောင်ꩻနဝ်ꩻမꩻ ထာꩻမာꩻအီႏအောင်ႏယိုꩻသွူ။ အမျာꩻအကျိုꩻ စွိုးခွိုꩻတိုꩻတက်ရေꩻအတွက် အဝ်ႏအယပ်ꩻအခုဲင်ႏကို အစွိုꩻသားဖုံႏ ခွꩻညီꩻလျားပီတွော့ꩻ တွူႏတရန်ထင်ႏဗာႏ ယပ်ꩻယပ်ꩻခုဲင်ႏခုဲင်ႏ ကတွူႏတရန်လွဉ်လဲဉ်းအတွိုင်ꩻ အကျိုꩻအမျတ် ဖေႏကအဝ်ႏနွောင်ꩻနဝ်ꩻ တစွိုးခွိုꩻလွုမ်း တာႏဝွန်ႏအဝ်ႏညီꩻဝင်ꩻ အွိုးစခါ လိုꩻဖြားစိုးလဲ့ စွိုးခွိုꩻအတွက် ခံႏယပ်ꩻခုဲင်ႏ၊ လူႏဗာႏတွမ်ႏသွီႏသက်မꩻ နီဘဝအဆင်းအရန်း တွိုႏလꩻနုဲင်းယို စစွဉ်ႏစားယိုလဲ့ ဒေါ့ꩻဟော်ႏဖေႏထွူအတွိုင်ꩻ အစွိုꩻသားဖုံႏလဲ့ ခံႏယပ်ꩻခံႏခုဲင်ႏလွိုဗာႏဝင်ꩻ ကျိုꩻစာꩻလွိုလွိုဗာႏဝင်ꩻဖုံႏနဝ်ꩻသွူ။ အစွိုꩻသားဖုံႏသားအနေႏ မဉ်ႏခံႏယပ်ꩻ ခံႏခုဲင်ႏနယ်မꩻတဲင် လူထုဖုံႏလဲ့ အီႏအွဉ်ႏရေꩻလွဉ် အမျိုꩻသာꩻတာႏနဝ်ꩻသွူ။
စွိုးခွိုꩻသမဲင်ꩻရေꩻ[မွဉ်းဖျင် | မွဉ်းဖျင်အရွီးခိုႏ]
စွိုးခွိုꩻသမဲင်ꩻရာႏဇဝင်ႏယို ထွို့ꩻဗူႏရေꩻအတွက် အရေꩻတန်ငါႏ လိုꩻတွိုင်ꩻသီးမဉ်ႏသေစဲင်းချာ စွိုးခွိုꩻသမဲင်ႏမꩻတဲင် အဝ်ႏသမဲင်ꩻ ကဖေႏလွဉ်ဒါႏ စွိုးခွိုꩻသꩻဓာတ်ရေꩻဖုံႏ အီႏပေါႏပေါက်လွဉ်နဝ်ꩻသွူ။ သမဲင်ꩻကိုအလꩻ ကကာႏလွဉ်ဗာႏဒါႏ ခတ်အဆက်ဆက် ဘဝမျိုꩻမျိုꩻဖုံႏယို ထွာအီလိုꩻမျိုꩻ သꩻဓာတ်ရေꩻဖုံႏနဝ်ꩻမꩻ သမဲင်ꩻရာႏဇဝင်ႏယိုလဲ့ ဟော်ꩻနယ်လွေꩻဗာႏနဝ်ꩻသွူ။
ပညာႏရေꩻ၊ ဘာႏသာႏရေꩻ၊ သာႏသနာႏ၊ လွောင်ႏဗူႏရေꩻ[မွဉ်းဖျင် | မွဉ်းဖျင်အရွီးခိုႏ]
သေနာႏလွဉ်သွူ စွိုးခွိုꩻသမဲင်ꩻ ရာႏဇဝင်ႏတဲင် အဝ်ႏသမဲင်ꩻကိုကလွဉ်ဒါႏ ထာꩻသေအလောင်း သꩻရက်ခွိုꩻဖုံႏ ပေါႏလွဉ်ထွူခါ ပစ္စုပ္ပန်ႏအနာႏဂတ် လိုꩻမုအုံအဝ်ႏရေꩻ ဖေႏကထွꩻတသွုန်လꩻဝင်ꩻနဝ်ꩻ အီႏကျိုꩻစာꩻသွုပ်လွေꩻဗာႏနဝ်ꩻသွူ။ နဝ်ꩻမꩻ ပစ္စုပ္ပန်ႏတွမ်ႏ အနာႏဂတ် သာႏယာႏရေꩻအတွက် အရေꩻတန်ငါႏ ပညာႏရေꩻ၊ ဘာႏသာႏရေꩻ၊ သာႏသနာႏရေꩻ၊ လွောင်ႏဗူႏရေꩻဖုံႏနဝ်ꩻသွူ။ စီꩻပွာꩻရေꩻ၊ လိုꩻမုရေꩻ၊ ခမ်းထီရေꩻ၊ မဲ့ဖြုံႏကထွာဒါႏ ပညာႏရေꩻ၊ မွိုးဖါထုံꩻစံႏယေန်ႏငဲးရေꩻ၊ အမွေႏတဉ်ႏခွေါင်တာႏ သေႏမုꩻကရိုꩻဒါႏ ဘာႏသာႏရေꩻ၊ လောကသံႏသရာႏ အကျိုꩻစီꩻပွာꩻအတွက် အမျတ်သွတ်ꩻအာႏကွိုꩻခရာႏကထွာဒါႏ သာႏသနာႏရေꩻ၊ စွိုးခွိုꩻကွိုက်ꩻပေါင်ꩻ အုံအဝ်ႏသွီႏထီꩻရက်ပဲင်ꩻရေꩻ၊ ခမ်းထီဒုံဆောင်ႏ သာႏယာႏရေꩻကထွာဒါႏ လွောင်ႏဗူႏရေꩻဖုံႏယို အရေꩻတန်ငါႏအကျောင်ꩻ အနစ်သာရဖေႏကပေါႏ သဘော်ꩻဖေႏကဗွောင်နဝ်ꩻ ဟော်ꩻနယ်ဗာႏ၊ သဘော်ꩻဖေႏကဗွောင်လွ ပငါပရာꩻနဝ်ꩻမꩻ ခွိုꩻရက်သꩻဖုံႏ အီႏပေါႏလွဉ်နွောင်ꩻနဝ်ꩻသွူ။
စွိုးခွိုꩻလိတ်လုဲင်ꩻရေꩻ[မွဉ်းဖျင် | မွဉ်းဖျင်အရွီးခိုႏ]
လိတ်လုဲင်ꩻအဝ်ႏ လိုꩻမျိုꩻတွမ်ႏ အဲဉ်ထဝ်းလိုꩻမျိုꩻသီး အဆင်းအရန်း ကွာႏဝင်ꩻပုံႏဖုံႏ လိတ်လုဲင်ꩻထိုꩻမား လိုꩻထိုꩻမားဒါႏအကျောင်ꩻခရာႏဖုံႏ၊ လိတ်လုဲင်ꩻယို အရေꩻတန်ငါႏ အကျောင်ꩻခရာႏဖုံႏယိုလဲ့ သျင်ꩻပျꩻနယ်ဗာႏစဲင်းစဲင်း၊ မဉ်ႏသေစဲင်း လိတ်လုဲင်ꩻတန်ႏဘိုꩻနဝ်ꩻမꩻ သꩻအီႏဝင်ႏရောင်၊ အီႏသွဉ်ရောင်ဝင်ꩻနဝ်ꩻမꩻ လိတ်လုဲင်ꩻအီႏထင်ႏထို၊ အီႏတဉ်ႏခွေါင်၊ လိတ်လုဲင်ꩻမဉ်ႏတဉ်ႏခွေါင်နဝ်ꩻမꩻ နီစွိုးခွိုꩻ အီႏတိုꩻတက်တဉ်ႏခွေါင်တသေႏဗာႏနဝ်ꩻသွူ။[၁][၂]