ဒေါ့ꩻငဝ်းပညာႏ လိုႏဒါႏခေတ်

ခေတ်ယိုခါ ခမ်းထီရေꩻစတဲင် အရေꩻအစွိုးစွိုးအဒဝ်ႏဒဝ်ႏယို ဖေႏနေးကတိုꩻတက် ထင်ႏတသွောင်းလွဉ်တဲင် မာꩻပွယ်ꩻမော့ꩻခွဲ အဝ်ႏတွိုင်ႏပင်ႏဆွေꩻနွေꩻလွေꩻဗာႏဝင်ꩻသွူ။ ကောအွဉ်ဆꩻငါသား ပုဂ္ဂိုလ်ႏဖုံႏနဝ်ꩻ မဉ်ႏထင်ႏတွိုႏလွဉ် ပွယ်ꩻမော့ꩻခွဲကိုခါ အဝ်ႏလိုႏဒေါ့ꩻငဝ်းစဲင်း ငဝ်းချက်ထို့သွူတကာႏတဝ်း ဖေႏနေးကောနာႏသား သꩻကဝင်ႏစာꩻနဝ်ꩻလဲ့ အရေꩻတန်ငါႏသွူ။ အခရာႏစဲင်း အချက်ဟဝ်ဟဝ် ထာꩻဒေါ့ꩻကျင်ႏလယ်ႏသားနဝ်ꩻမꩻ နမ်းကမဉ်အွဉ်ႏထွာဒါႏ အဖဲ့ꩻအမျိုꩻ ထွို့ꩻသော့ꩻနွောင်ꩻထွူတဲင် နမ်းကမဉ်လꩻ ကနစ်သက်ရာꩻ ထာꩻမာꩻတစွိုးစွိုးနဝ်ꩻ အောင်ႏမျင်ႏအီနွောင်ꩻနဝ်ꩻသွူ။ ကွပ်ပွိုးနဝ်ꩻမꩻ ပါꩻမုဲင်ꩻတရိုꩻတဝ်း နမ်းကမဉ်ခွုမ်မာꩻလွေꩻဒါႏ ကိစ္စအမျိုꩻမျိုꩻ မီႏမဉ်အောင်ႏမျင်ႏနဝ်ꩻ ဒေါ့ꩻငဝ်းပညာႏယို ဟဝ်ဟဝ်ဒါႏဒါႏ လေ့လာစဲင်းစဲင်းနဲင်းနဲင်းထွူတွော့ꩻ ထာꩻဒေါ့ꩻယံလျင်ႏနဝ်ꩻ ကျိုꩻစာꩻကျံႏဖန်ႏဗာႏသွူ။

ပညာႏရုဲင်းထင် နွောင်ꩻပွယ်ꩻတန်

"ထာꩻသေဖြားရုဲင်း မဲ့ငါလုဲင်းအမျာꩻခြာ" ငဝ်းနဝ်ꩻအခရာႏ မဉ်ႏဒေါ့ꩻဗာႏနဝ်ꩻ "ပညာႏဉာဏ်ႏလေ ထာꩻသေကလုမ်းကုမ်ႏသား"ပုဂ္ဂိုလ်ႏဖုံႏနဝ်ꩻ မုဲင်ꩻခါခါတရိုꩻတဝ်း လိုꩻအမျာꩻခြာ ရုဲင်းရုဲင်းထင်ထင် တွူႏတရန်နွို့လွဉ်ထွူတဲင် နမ်းကကျင်ႏလယ်ႏဒါႏပညာႏယို အွဉ်ႏထွူအထျꩻတွော့ꩻ ထင်ႏဒေါ့ꩻငဝ်းအကျိုꩻအဝ်ႏအဝ်ႏ၊ အကဲဉ်အနမ်းအဗဲ့ꩻအာအာနဝ်ꩻသွူ။ ကွပ်ဒါႏပညာႏ လိတ်လုဲင်ꩻတွော့ꩻ လိုꩻအမျာꩻဆငါ ရုဲင်းရုဲင်းထင်ထင် စနစ်ခြောင်ꩻမဲဉ်ႏမဲဉ်ႏ ဒေါ့ꩻခြပ်ရဲဉ်ႏလွေꩻနွောင်ꩻငဝ်းနဝ်ꩻသွူ။

ဒေါ့ꩻငဝ်းပညာႏအခရာႏ

လိုꩻအမျာꩻခြာ ကလိုႏသုံꩻအီဒါႏ ဒေါ့ꩻငဝ်းပညာႏယို အရေꩻတန်ငါႏသွူ။ လောကကို ပေါႏထွာလွက်လိုꩻနဝ်ꩻ ဒေါ့ꩻငဝ်းစွုမ်ႏဖြာꩻဖြာꩻသွူ။ ဒေါ့ꩻငဝ်းပညာႏအလꩻ ဒေါ့ꩻရီဒေါ့ꩻတောႏထေ့ မွိုးဖါ မွိုတ်မွိုတ်ကျွမ်ꩻကျွမ်ꩻ ကဒေါ့ꩻသုံꩻအီငဝ်း လွိုထဲင်းဖူးဝေးမွိုးဖါ သွꩻပေႏခြာ ကခွုမ်မာꩻငီꩻသေႏသေႏဒါႏ သွꩻပေႏချင်ꩻ ကဒေါ့ꩻရီဒါႏဝင်ꩻဖုံႏနဝ်ꩻ ဒေါ့ꩻငဝ်းပညာႏယို အရေꩻပေါႏတန်တဝ်းနဝ်ꩻသွူ။ သွꩻပေႏခြာ ဖူးဝေးမွိုးဖါထျꩻနဝ်ꩻ ဒေါ့ꩻငဝ်းယို အချက်ထို့တဝ်း စဲင်းတဝ်းခန်းတယဝ်း လိုꩻအမျာꩻဆငါ ကဒေါ့ꩻဒါႏငဝ်းနဝ်ꩻမꩻ ဟဲ့ꩻလꩻထာꩻဒေါ့ꩻဒါႏ ပညာႏထာꩻသေအာရိုꩻနုဲင်းနဝ်ꩻသွူ။ အဝ်ႏဖြောင်းကို ကဒေါ့ꩻထန်ႏတွိုင်ꩻငဝ်းနဝ်ꩻ ဟဲ့ꩻတဝ်းထာꩻဒေါ့ꩻဒါႏနဝ်ꩻသွူ။ ဒေါ့ꩻငဝ်းပညာႏယို အဝ်ႏသွံစွိုးသွူ။

သွံစွိုးကရိုꩻနဝ်ꩻ

၁။ ပွယ်ꩻမော့ꩻခွဲးတွိုင်ႏပင်ႏ ငဝ်းခြပ်ရဲဉ်ႏအွဉ် ၂။ တရာꩻရွုမ်ꩻကို ကဒေါ့ꩻသုံꩻအီဒါႏငဝ်း ၃။ အလွောင်ႏအဗူႏကို ကသုံꩻအီဒါႏငဝ်း-အဝ်ႏနုဲင်းနဝ်ꩻသွူ။ ၁။ ပွယ်ꩻမော့ꩻခွဲတွိုင်ႏပင်ႏအခန်ꩻကို ကသုံꩻအီဒါႏငဝ်းနဝ်ꩻ - ပွယ်ꩻတန်ပွယ်ꩻလုဲင်း မွူးနီꩻထူꩻမွူးနီꩻမျတ်ယို အွဉ်ႏထွာသွူအကျောင်ꩻလဲ့နဝ်ꩻ၊ တအွဉ်ႏဖေင်ꩻနွောင်ꩻတဝ်း ကိစ္စတစွိုးစွိုးအတွက်တာႏတဲ့နဝ်ꩻ တဲးတဲးဝါးဝါး ကဒေါ့ꩻစဲဉ်ႏဒင်ႏသွင်ꩻထင်ႏဒါႏငဝ်းဖုံႏယို ကေားနာႏဆွုမ်ႏသား နားလုံꩻသꩻရာႏ ဗာႏတနꩻသော့ꩻနွောင်ꩻနဝ်ꩻသွူ။ ၂။ တရာꩻရွုမ်ꩻကို ကဒေါ့ꩻသုံꩻအီဒါႏငဝ်းနဝ်ꩻ - တရာꩻရွုမ်ꩻကို ကအဝ်ႏအုံဒါႏ တရာꩻဆုံꩻဖျတ်သားသီးဖုံႏ တရာꩻစွယ်ꩻသားဖဲ့ꩻတဲ့နဝ်ꩻ၊ တရာꩻခံႏသားဖဲ့ꩻတဲ့နဝ်ꩻ အွဉ်ႏနယ်ထွူတွမ်ႏစီꩻကန်ꩻချက် ဥပဒေႏတဲင် ကဒေါ့ꩻထန်ႏဒါႏငဝ်းဖုံႏနဝ်ꩻ ဟဲ့ꩻတရာꩻရွုမ်ꩻကို ကသုံꩻအီဒါႏငဝ်းနဝ်ꩻသွူ။ ငဝ်းစားယိုနဝ်ꩻ မာꩻတသွိုး အွဉ်ႏတလူႏနွောင်ꩻအီ တရာꩻဆုံꩻဖျတ်သားကနောက်ꩻသွူ။ တရာꩻရွုမ်ꩻကို ကဒေါ့ꩻသုံꩻဒါႏ တရာꩻသူꩻကီꩻ (တရာꩻဆုံꩻဖျတ်သား)သီးဖုံႏနဝ်ꩻ ဥပေဒႏအတွိုင်ꩻ အွဉ်ႏနယ်နွောင်ꩻသွူ တဲးတဲးဝါးဝါးတကာႏတဝ်း သက်သေႏသက်ကန်ႏသား ကဒေါ့ꩻနယ်ထင်ႏဒါႏငဝ်းနဝ်ꩻလဲ့ ဆင်ႏချင်ႏယူႏတွေꩻလွဉ်ꩻထွူတွော့ꩻ ကဒေါ့ꩻထန်ႏဒါႏငဝ်းယို ယူႏထွားသွူ ဒေါ့ꩻငဝ်းပုံႏနယ်ꩻနဝ်ꩻမꩻ ဖေႏနေးတရာꩻဆုံꩻဖျတ်သား ကအွဉ်ႏရေꩻလွဉ်နီငဝ်းယို ကျံႏဒေါ့ꩻသော့ꩻဗာႏနဝ်ꩻသွူ။ ၃။ အလွောင်ႏအဗူႏ/ရွုမ်ꩻကို ကသုံꩻအီဒါႏငဝ်းနဝ်ꩻ ပါလီမန်လွတ်တော်ကိုတဲ့နဝ်ꩻ၊ ညီႏလာႏခံႏကိုတဲ့နဝ်ꩻ၊ အစွိုꩻအဗူႏကိုခြာလဲ့နဝ်ꩻ ဆွေꩻနွေꩻတွိုင်ႏပင်ႏထွူတွော့ꩻ ဖေႏနေးကအွဉ်ႏထွော့နွောင်ꩻအီအတွက် ကဒေါ့ꩻထန်ႏဒါႏငဝ်းဖုံႏနဝ်ꩻသွူ။ ကောကဒေါ့ꩻထန်ႏဒါႏငဝ်းယို တွမ်ႏကောကနာႏခံႏဆွုမ်ႏသား နားလုံꩻသꩻရာႏတွမ်ႏ ကတူႏဆွတ်ꩻခီး တဖူꩻနီလီး ဖေႏနေးကဗာႏလို့နွောင်ꩻဗာႏသွူ။ ပွယ်ꩻမော့ꩻခွဲရွုမ်ꩻကို ကဒေါ့ꩻဒါႏငဝ်းယိုနဝ်ꩻ ခမ်းထီအတွက် ခွိုꩻရက်သီးအတာႏ ရပ်ရာႏဒုံဆောင်ႏ မူႏမောင်ႏသီးအကျိုꩻ ကဆောင်ႏရွက်ဖေႏဒါႏ လိုꩻသီးဖုံႏနဝ်ꩻ ဒေါ့ꩻထန်ႏသုံꩻအီဗာႏဒျာႏရင်ꩻသွူ။ ပါꩻမုဲင်ꩻတရိုꩻတဝ်း တနီꩻခါ အီႏဒေါ့ꩻဗာႏငဝ်းနဝ်ꩻ တလွစ်နွောင်ꩻတဝ်းသွူ။ အဝ်ႏလိုႏဖျင်ဆင်သေꩻခါꩻရီးလဲဉ်းဝင်ꩻဖုံႏသွူ။

ဒေါ့ꩻငဝ်းပညာႏယေန်ႏကေႏငါႏ

လိုꩻသေလိုꩻဒါႏလျင်ႏ ပညာႏသျင်ႏသီးဖုံႏ ကဒေါ့ꩻဒါႏငဝ်းဖုံႏနဝ်ꩻ နာႏဟဝ်ယေန်ႏငါႏသွူ။ ယေန်ႏကေႏငါႏတတွာမုဲင်ꩻကရိုꩻနဝ်ꩻ ဝွေꩻသီးကဒေါ့ꩻဒါႏငဝ်းယို အချက်ထို့သွူတကာႏတဝ်း လိုꩻအမျာꩻသꩻလဲင်ꩻစွယ်ꩻလံꩻနေးအီစွဉ်ႏတဲင် အခြောင်ꩻစွို့ꩻစွို့ꩻ ခွုမ်ဖွို့ꩻလွေꩻအခရာႏသူꩻ ကောနာႏခံႏဆွုမ်ႏသား ဟွုန်စဲင်းစဲ့ငါႏ အချက်ဖုံႏနဝ်ꩻသွူ။