နီပအိုဝ်ႏလိုꩻမျိုꩻ

ပအိုဝ်ႏခမ်းကောင် တွမ်ႏခမ်းဒွမ် မဉ်ႏစုဗူႏ တလွမ်တလွောင်ႏချင်ႏနောဝ်ꩻ အောင်ႏမျင်ႏမုꩻ ကရိုꩻဒါႏ ကောဝ်ႏထွန်ႏထျꩻယို နီပအိုဝ်ႏလိုꩻမျိုꩻ တွိုႏတောဝ်း မျိုꩻအီႏအောဝ်ႏပဲးနဲ့ ။

ခိုနောဝ်ꩻ ကေားအွဉ်ထင်ႏငါ မူႏနောဝ်ꩻ ကွဲးထောင်စဲဉ်ႏလွဉ်ꩻဆꩻချာတွော့ꩻ ”သမဂ္ဂါနံ တပေါ သုခေါ” ပါဠိငေါဝ်းလွဉ်အတွိုင်ꩻ စွုမ်ႏနီ,စွုမ်ႏဟာ မဉ်ႏတအုံစွူတောဝ်းကျိုꩻစာꩻ ကရေႏရွယ်ႏခါꩻ ပဲင်ႏဆဲင်ႏခမ်းနယ်ႏစဲစ် အီႏအောဝ်ႏဗာႏ။

ဒါႏခေတ်ပညာႏသား မဉ်ႏထွားချာခွိုꩻ ခေတ်စနစ်ကုဲင်မျိုꩻ ပယ်ႏညာꩻညာꩻထန်ႏ သꩻဓာတ်ခွေါင်ခံႏ အွဉ်ႏဗွေလို့ရက်ခွိုꩻလောင်း ခွိုင်းကသေ အဒေါဝ်ႏဒေါဝ်ႏဖုံႏ ဆွန်ꩻစူဖေါဝ်ႏ မဉ်ႏစွဲးထဲမ်ပင်ႏကို နီပအိုဝ်ႏပို စွုမ်ႏဖြာꩻဖြာꩻနောဝ်ꩻ ကမဉ်ပဲင်ႏဆဲင်ႏရာꩻ”ခမ်းနယ်ႏ”စဲစ်ယို အီႏလꩻဗာႏ ။

ပအိုဝ်ႏခမ်းကောင်လိတ်မူ ပအိုဝ်ႏခမ်းဒွမ် အခြဲမ်တရျာꩻလိတ်မူ မဉ်ႏအွဉ်ႏစုထွာသွူ ပအိုဝ်ႏလိတ်မူ တမူချင်ႏနောဝ်ꩻနယ်ႏ နီပအိုဝ်ႏအရောင်ႏတင်ႏ အီႏတဆောဝ်လေဗꩻထဲင်းထဲင်း ကမ္ဘာႏတန်ဟံႏလောင်းထျꩻကီ ကရိုꩻနောဝ်ꩻ နီသွဉ်း အာႏမခံႏချက် ဖေႏဗွိုန်ႏဒျာႏသွူ။