ပအိုဝ်ႏဒုံတန်

"ပအိုဝ်ႏဒုံတန် လိုႏမွဉ်းဖျင်" နီပအိုဝ်ႏလိုꩻမျိုꩻနောဝ်ꩻ မာꩻထာꩻမာꩻအမျိုꩻမုဲင်ꩻမုဲင်ꩻခန်းတယောဝ်း ကဉ်းအာအာအစူꩻယိုꩻကျင်ꩻငါႏထာꩻတဲင် ထာꩻမာꩻအောဝ်ႏယံ စွန်ꩻအောဝ်ႏထင်ဒျာႏ လိုꩻမျိုꩻလဲ့အောဝ်ႏတန်ဒျာႏ၊ ခွိုꩻအာႏလဲ့အောဝ်ႏသန်ဒျာႏ၊ ကွဲတွော့ꩻ သꩻဓာတ်ရက်စွိုးခွိုꩻ၊ သꩻဓာတ်ရက်စွိုးခွိုꩻ၊ သꩻဓာတ်ရက်သမဲင်ꩻ တမွန်ဗန်တောဝ်းတွော့ꩻ အခေတ်မုဲင်ꩻမုဲင်ꩻလဲ့ အောဝ်ႏဗဉ်ခံသော့ꩻဒျာႏ ဝင်ꩻထာꩻတေက်ꩻ အွို့ꩻအံႏဆျာႏခြေင်းကိုနောဝ်ꩻသွူ။ နီပအိုဝ်ႏ တယ်ႏစွဉ်ႏအောဝ်ႏခယ်ႏခမ်းလင်ꩻလွဉ်ကာႏ တယ်ႏထောင်ႏခါꩻ ဒုံဆောင်ႏခူဝေင်ꩻဖုံႏနောဝ်ꩻ ခယ်ႏခမ်းကို၊ လောဝ်ꩻခမ်းကို၊ ထုဲင်ꩻခမ်းကို၊ မန်းခမ်းကို၊ ကမ္ဘောဒီးယားခမ်းကို၊ အင်ဒိုနီးရှားခမ်းကိုဖုံႏ အောဝ်ႏအာတန်၊ ကွဲတွော့ꩻ တယ်ႏထောင်ႏဒါႏ၊ ခံႏယပ်ꩻဒါႏ၊ မာꩻသေꩻဒါႏလဲဉ်းသွူလဲ့ ပွိုးစွဉ်ႏကတူႏခီးပေႏငါႏ၊ တဲမ်းခါꩻတောဝ်းပအိုဝ်ႏသမဲင်ꩻ၊ ဒုံဆောင်ႏသမဲင်ꩻ၊ တဲမ်းဗော့ꩻခါꩻတောဝ်း ပအိုဝ်ႏလွိုးပွုံႏငုဲင်ꩻတွော့ꩻ ဆုဲင်ꩻဝုဲင်ꩻနောဝ်ꩻ နေင်ႏပေါင်ꩻထွိုင်ႏညအာနောဝ်ꩻ ထွာလိုꩻလို့ဒျာႏ ဝင်ꩻရဲင်ꩻအာႏ၊ ဝင်ꩻထာꩻခြိုꩻ၊ ဝင်ꩻသမဲင်ꩻနောဝ်ꩻသွူ။ ညာꩻညာꩻတဒေါ့ꩻတောဝ်းဒွုမ် ဝေင်ꩻတောင်ႏကီꩻနောဝ်ꩻ ပွိုင်းလဲင်ႏခါ ပအိုဝ်ႏဒုံစဲစ်စဲစ်ဒျာႏကရိုꩻနောဝ်ꩻ ပအိုဝ်ႏယိုခါ စွုမ်ႏဖြာꩻအောဝ်ႏသေထွꩻ၊ စဗော့ꩻနေင်ႏပေါင်ꩻတရျာꩻနီရျာꩻကိုလွုမ်ꩻမွေးတဲ့ ယိုခါ ထွာထိုꩻလို့လဲဉ်းဝင်ꩻခင်ႏလမ်းအုံ၊ နီဒုံဒျာႏ အုံလꩻတောဝ်း ထိုꩻထိုꩻလုဲင်ႏ တမုဲင်ꩻကဲဒေါ့ꩻဗွိုန်ႏတဖြာꩻဖြာꩻ၊ ဒုံမဉ်ꩻပေႏငါမွေးတဲ့ အောဝ်ႏဟံႏဗွာ ဝင်ꩻမာꩻလဲင်ꩻကြုဲင်ꩻထိုꩻ မြေဖြူ၊ အောဝ်ႏညောင်ႏခံꩻ လဲင်ꩻထွာညောင်ပင်သာ၊ အောဝ်ႏဘုရာꩻဗွာ လဲင်ꩻထွာဘုရားဖြူးနောဝ်ꩻ လိုꩻနောဝ်ꩻကိုခြာ အဒုဲင်ဒျာႏစွုမ်ႏဖြာꩻဖြာꩻတွော့ꩻ လွူးခါꩻတောဝ်း ပအိုဝ်ႏပေႏတဲ့ သေတောဝ်း၊ ဝါးလောဝ်တွော့ꩻ အဖြောင်းအောဝ်ႏပါဒျာႏ ဒေါ့ꩻအီဖေႏပအိုဝ်ႏပေႏတဲ့ သေတောဝ်း၊ ဝါးလောဝ်တွော့ꩻ အဖြောင်းအောဝ်ႏပါဒျာႏ ဒေါ့ꩻအီဖေႏပအိုဝ်ႏတာႏ ရဲင်ꩻအာႏတပါတောဝ်းဒျာႏတဲ့ တသေတောဝ်း၊ သꩻဓာတ်ရက်စွိုးခွိုꩻအောဝ်ႏတောဝ်းဒျာႏတဲ့ တသေတောဝ်း၊ ယိုခါတဲ့ ပအိုဝ်ႏဒုံတောင်ႏတီနောဝ်ꩻ ပါꩻမျောႏထိုꩻလဲဉ်းစဲပ်စဲပ်နောဝ်ꩻသွူ။ အခေါဝ်မဉ်ꩻ၊ တဖူꩻတထာမဉ်ꩻ၊ အကျောင်ꩻကန်ႏမဉ်ꩻ၊ အတယ်ႏဆို့ꩻမဉ်ꩻ၊ အဆဲင်ႏမဉ်ꩻ၊ အဗွေႏမဉ်ꩻစတဲင် အဗွေႏနမ်းနမ်းဒါႏငါမွေးတဲ့ ပါꩻမျောႏလဲဉ်းနီကရိုꩻနောဝ်ꩻ တသေချာတောဝ်းဒွိုန်းနမ်း၊ အောဝ်ႏထင်းအောဝ်ႏယူႏကဒျာႏ နီယိုလိုꩻယံနုဲင်းနောဝ်ꩻဖုံႏ၊ နီယိုလိုꩻဒါႏ အုံဗာႏဝေင်ꩻနုဲင်းနောဝ်ꩻဖုံႏ၊ နီယိုလိုꩻတန် လမ်းခင်ဟံႏယာႏ စာဖေႏဝင်ꩻဒါႏနုဲင်းနောဝ်ꩻဖုံႏ၊ နီယိုခြွေခြာႏ လမ်းပါႏဆဲင်ႏခန်ꩻ စာဖေႏဝင်ꩻဒါႏနုဲင်းနောဝ်ꩻဖုံႏ၊ နီယိုလꩻဘွဲ့ ပိုခိုပိုမူႏ အွဉ်ႏကွုတ်တသဉ်ဝင်ꩻလိုꩻမျိုꩻဘာႏသာႏဒါႏနုဲင်းနောဝ်ꩻဖုံႏသွူ။ ကထွူထွူလဲဉ်းဒါႏ အခိန်ႏခါႏကိုနောဝ်ꩻ နီပအိုဝ်ႏဖြားဖုံႏ ထေရဲင်ꩻအာႏ၊ ထေဥစ္စာႏ၊ ထေပညာႏတွော့ꩻ ကတယ်ႏဆို့ꩻကမာꩻခါꩻ၊ ကကျိုꩻစာꩻသေꩻဒါႏ အနမ်းအခြုံ အပွိုင်အတူႏဖုံႏယို ပွိုးစွဉ်ႏတသေယူႏခါꩻဖေႏတောဝ်း ပအိုဝ်ႏပိုလီꩻဆုဲင်ꩻချာတာႏတွော့ꩻ သမဲင်ꩻရာႏဇဝင်ႏ တတဲမ်းဒင်ႏခါꩻလွတောဝ်းဝင်ꩻ ပငါပရာꩻ၊ မာꩻနောဝ်ꩻ ဒါႏလဲဉ်းလဲ့ ဆုဲင်ꩻနောဝ်ꩻ ထွာထိုꩻလို့ဒျာႏ ဝင်ꩻထာꩻမာꩻနောဝ်ꩻမꩻ နီပအိုဝ်ႏဖုံႏ ဟောဝ်ယူႏဆွာꩻဆွာꩻဖေႏဒါႏငါႏ အနာႏဂတ်ပအိုဝ်ႏတာႏဖုံႏနောဝ်ꩻသွူ။ အနာႏဂတ် ပအိုဝ်ႏတာႏ သမဲင်ꩻဖေႏ ကထွာအီနောဝ်ꩻ ဟောဝ်ထွားနုဲင်းလွဉ်ꩻငါႏ ဗွေႏဆရာႏတောႏဘဒ္ဒန္တနိမ္မလ၊ ကျောင်ꩻလောကချံꩻသာႏလꩻ၊ ဒုံလေတင်း(လွယ်တင်း) တဲမ်းထွို့ꩻသေꩻခါꩻ ပအိုဝ်ႏဒုံဆောင်ႏပွုံႏစံႏနုဲင်းငါယိုနောဝ်ꩻသွူ။ ဝေင်ꩻနယ်ႏဟိုပုံꩻ၊ ဒုံလေတင်ႏနောဝ်ꩻ လမ်းငင်းအောဝ်ႏ ၁၅၇-လမ်း၊ လိုꩻဖြာꩻပေါင်ꩻ အောဝ်ႏ ၇၂၇-ဖြာꩻ၊ အခေါဝ်အောဝ်ႏ ၆-ခေါဝ်နောဝ်ꩻသွူ၊ အခေါဝ်မဉ်ꩻနောဝ်ꩻ အွဉ်ႏဖန်လွဉ်ဒျာႏ လိုꩻဖြားတယ်ႏဒုံဆောင်ႏသားမဉ်ꩻ၊ တဖူꩻတထာနောဝ်ꩻ အွဉ်ႏဖန်လွဉ်ꩻဒျာႏ စွိုးခွိုꩻအွဉ်ကတူႏဒါႏသားမဉ်ꩻ၊ ဖြားဒုံတွမ်ႏအွဉ်ငါသားနောဝ်ꩻ လွိုတဲင်ပအိုဝ်ႏ ဗုဒ္ဓဘာႏသာႏ ထင်ႏထွာသော့ꩻခွင်ꩻ အဲဉ်ထောဝ်းနောဝ်ꩻသွူ။ ဒုံဆောင်ႏကရီးခါနောဝ်ꩻ အွဉ်ႏလစ်ꩻခေါင်းလွုမ်ꩻ၊ ထူႏလွဉ်ꩻ၊ ထူႏဂွုဏ်ႏလွဉ်ꩻစွိုးခွိုꩻဟံႏနယ်ႏ ခင်ႏလမ်းအုံယံ(၆)နောဝ်ꩻတွော့ꩻ အခေါဝ်အွဉ်ႏဗာႏ(၆)ခေါဝ်နောဝ်ꩻသွူ၊ အခေါဝ်တာနောဝ်ꩻ ဖြားသျုတ်ခေါဝ်၊ အခေါဝ်နီနောဝ်ꩻ ဖြားဗျောင်ခေါဝ်၊ အခေါဝ်သွံနောဝ်ꩻ ဖြားငယ်ခေါဝ်၊ အခေါဝ်လစ်ꩻနောဝ်ꩻ ဖြားမော်ခဲခေါဝ်၊ အခေါဝ်ငတ်ꩻနောဝ်ꩻ ဖြားဘဲခေါဝ်၊ အခေါဝ်သူနောဝ်ꩻ ဖြားညွန်းခေါဝ်နုဲင်းနောဝ်ꩻဖုံႏသွူ။ တဖူꩻတန်ကနွို့သဲင်ꩻဒုံ အကဲဉ်တလီးနောဝ်ꩻ ဟဲ့ꩻဖန်သူရိယစန္တာႏတဖူꩻ၊ တဖူꩻတန်နွို့သဲင်ꩻဒုံ အမော့နောဝ်သွတ်ꩻတလီးနောဝ်ꩻ ခွန်မနုဟာႏတဖူꩻ၊ တဖူꩻတန်နွို့သဲင်ꩻဒုံ သွဉ်လိတ်ကျောင်ꩻဆꩻထင်ꩻဖဲ့ꩻတလီးနောဝ်ꩻ ဖြားဗွာလှဖေတဖူꩻ၊ တဖူꩻတန်နွို့သဲင်ꩻဒုံ မော့ထင်ꩻသွတ်ꩻတလီးနောဝ်ꩻ ဟဲ့ꩻဖန်ဖြားတန်အောင်ႏခမ်းထီတဖူꩻ၊ တဖူꩻတန် လွေꩻနောဝ်ထင်ꩻ သွဉ်လိတ်ကျောင်ꩻဆꩻဒွမ်ဖဲ့ꩻတလီးနောဝ်ꩻ ဟဲ့ꩻဖန်ဖြားတန်ကောင်ခယ်ႏတဖူꩻ၊ နောဝ်ꩻဆꩻဒွမ် ထီခြောင်တန်ဆေꩻခိုႏဖဲ့ꩻတလီးနောဝ်ꩻ ဟဲ့ꩻဖန်ဖြားတန်နမ်းဩတဖူꩻ၊ တဖူꩻတန်လွေꩻနောဝ်ထင်ꩻ အောဝ်ႏရောင်ꩻထီခြောင်တန်ဖဲ့ꩻတွို့ꩻ ဟဲ့ꩻဖန် ဖြားနန္တာႏဟေင်တဖူꩻ၊ တဖူꩻတန်လွေꩻနောဝ်ထင်ꩻ နောဝ်ꩻဆꩻဒွမ်တလီးယင်းနောဝ်ꩻ ဖြားတန်နာစစ်ꩻသောက်တဖူꩻ၊ တဖူꩻတန်ဒုံမော့ဒွမ်သွတ်ꩻ တလီးနောဝ်ꩻ ခွန်မောင်ႏသာႏတဖူꩻ၊ ထာꩻခွုမ်ပဆိုးဝဲင်ꩻဆꩻဒွမ် ထီခြောင်တန်ဖဲ့ꩻကွဉ်ႏ တဖူꩻဒွေါင်ႏတလီးနောဝ်ꩻ ဟဲ့ꩻဖန်ဖြားသာတဖူꩻ၊ ထာꩻခွုမ်ပဆိုးဝဲင်ꩻဖဲ့ꩻထင်ꩻ တဖူꩻဒွေါင်ႏလွေꩻနောဝ်ထင်ꩻတလီးနောဝ်ꩻ ဟဲ့ꩻဖန်ဗိုလ်စံသိန်းတဖူꩻ၊ အာရှတဖူꩻတန်အမုဲင်(၅)ဖဲ့ꩻခိုႏ ကျောင်ꩻတံꩻတွိုင်ꩻတရျာꩻတလီးနောဝ်ꩻ ပိုလ်ႏတုံတဖူꩻ၊ နောဝ်ꩻဖဲ့ꩻနောဝ် တလီးနောဝ်ꩻ ဟဲ့ꩻဖန်ခွန်ကြည်တဖူꩻ၊ နောဝ်ꩻဆꩻနောဝ် တလီးယင်းနောဝ်ꩻ ဟဲ့ꩻဖန်ဗိုလ်ဟိန်မောင်တဖူꩻနုဲင်းနောဝ်ꩻဖုံႏသွူ။ နောဝ်ꩻမꩻ ရပ်လောင်ႏရပ်လင်ꩻ ပအိုဝ်ႏဒုံတန်ဖုံႏကထွာဒါႏ ကျောက်တလွုံꩻတန်၊ နောင်ကာꩻ၊ ဟံႏသူꩻ၊ နာꩻဗောင်၊ ကန်ႏတန်၊ တနွိုင်ရေး၊ နောင်ခုဲင်း၊ သုဲင်ꩻခေါဝ်၊ ကျောက်တန်ꩻ၊ ဟိုနမ်း၊ နောင်တရား၊ တရုဲင်ꩻ၊ ဆောင်ႏပြောင်း၊ တဝီးမွူးစတဲင် ဒုံတန်ဆောင်ႏတန်လဲဉ်းသားဖုံႏနောဝ်ꩻ အောဝ်ႏလိုႏပွိုင်ဆင်ရဲဉ်ꩻခါꩻဖေႏလဲဉ်း တွမ်ႏပအိုဝ်ႏသမဲင်ꩻ၊ တွမ်ႏပအိုဝ်ႏငေါဝ်းဟဲ့ꩻဟောင်နောဝ်ꩻသွူ။ ထွားနုဲင်းမွိုန်း လိုꩻတောင်ႏကီꩻ ဟံႏဗွာသား နယ်မြေ (၁)၊ နယ်မြေ (၂)နုဲင်းနောဝ်ꩻဖုံႏ၊ နှင်းဆီလမ်း၊ စပယ်လမ်း၊ ဂန္ဓမာလမ်းနုဲင်းနောဝ်ꩻဖုံႏ၊ အခေါဝ်မဉ်ꩻလဲ့ ထွားနုဲင်းမွိုန်းလိုꩻသုဲင်ꩻခေါဝ် ဇောတိကရပ်ကွက်၊ မင်္ဂလာရပ်ကွက် နုဲင်းနောဝ်ꩻဖုံႏနောဝ်ꩻ ထွာပါဠိငေါဝ်းဒျာႏတဲင် နီပအိုဝ်ႏငေါဝ်းစဲစ်စဲစ်မွေးတောဝ်းတွော့ꩻ တမာꩻစဲင်းခေါ်တောဝ်း၊ တမာꩻလွိုခေါ်တောဝ်း နီပအိုဝ်ႏတာႏသမဲင်ꩻနောဝ်ꩻသွူ၊ နုဲင်းဖူးဝေးဖြောဝ်ꩻဖုံႏနောဝ်ꩻ ဝေင်ꩻမုဲင်ꩻ၊ ခေါဝ်မုဲင်ꩻခန်းတယောဝ်း ရှမ်းရပ်ကွက်၊ ရှမ်းအုပ်စု နုဲင်းနောဝ်ꩻအောဝ်ႏမော့ꩻတသေႏသေႏ၊ ယိုနောဝ်ꩻ ထွာအီဝင်ꩻသမဲင်ꩻသက်သေႏတဗာႏနောဝ်ꩻသွူ။ တွိုႏဝင်ꩻလိုꩻမျိုꩻနောဝ်ꩻ ဝင်ꩻအွဉ်ႏရေꩻငါႏ ဝင်ꩻသမဲင်ꩻတဲင် နုဲင်းခယ်ႏ ဝင်ꩻသီလွေꩻသွူတဲ့ ဝင်ꩻမုခ်လောင်း တဲမ်းကတွမ်ႏလိတ်ခယ်ႏ၊ လိုꩻသီခန်းတယောဝ်း ဝင်ꩻသမဲင်ꩻတသီတောဝ်း၊ အထွောင်းမုဲင်ꩻမုဲင်ꩻ၊ အခေါဝ်မုဲင်ꩻမုဲင်ꩻ၊ ခင်ႏလမ်းမုဲင်ꩻမုဲင်ꩻယောဝ်း ခယ်ႏလယ်ႏတဲမ်းမွေး ဝင်ꩻသမဲင်ꩻ၊ နုဲင်းဖူးဝေးမန်းယောဝ်း ထွားစံꩻလုဲင်း ကျောင်ꩻမုဲင်ꩻမုဲင်ꩻ၊ ဒုံမုဲင်ꩻမုဲင်ꩻ၊ ဝေင်ꩻမုဲင်ꩻမုဲင်ꩻ၊ တဖူꩻတထာမုဲင်ꩻမုဲင်ꩻယောဝ်း ဖေႏကထွာအီဝွေꩻသီးသမဲင်ꩻနောဝ်ꩻ အွဉ်ဖန်ကြုဲင်ꩻစွဉ်ႏပါꩻမဉ်ꩻ၊ အွဉ်ႏဖန်တောႏစွဉ်ႏဝွေꩻသီးမဉ်ꩻ၊ ကျောင်ꩻမုခ်ဦီးငွါဖုံႏနောဝ်ꩻ ကျောင်ꩻယို တွိုႏတနီꩻခါ ဖေႏကထွာဗာႏဝွေꩻသီးကျောင်ꩻ၊ ယိုခါကာႏ ခံႏလို့အာရီးစွဉ်ႏရွဉ်တဲင် လူႏဖေႏစွဉ်ႏ၊ တဲမ်းဗွို့ꩻစွဉ်ႏဝွေꩻသီးမဉ်ꩻဖုံႏနောဝ်ꩻသွူ။ တွိုႏနီပအိုဝ်ႏဖုံႏနောဝ်ꩻ အုံဝင်ꩻခြာတွော့ꩻ၊ ဝင်ꩻလူႏဖေႏတွော့ꩻ၊ ဝင်ꩻထာꩻယွုမ်းအံႏနီလောင်း ဖေႏကကုဲင်ဗာႏမွိုန်းတောဝ်းတွော့ꩻ နျာႏအွော့ꩻဒွူႏဖေႏစွဉ်ႏပါꩻတဲင် နဲစ်တဲမ်းသော့ꩻဖေႏစွဉ်ႏ ဝင်ꩻကမ္ပယ်ႏနောဝ်ꩻသွူ။ မွေးတမွေးတောဝ်းလဲ့ ဟော်ꩻလိတ်သား ထွားဒျာႏသွော့ဝင်ꩻ တွမ်ႏမဲ့နီပင်၊ ထုဲင်ႏခမ်းကို ပအိုဝ်ႏဒုံတန်ဖုံႏ၊ မန်းခမ်းကို ပအိုဝ်ႏဒုံတန်ဖုံႏ၊ ကျောင်ꩻတန်ဖုံႏနောဝ်ꩻ နီပအိုဝ်ႏပွိုင်းလဲင်ႏခါ ဗꩻထံဟန်ႏသနီꩻ ကအီႏသေပွိုင်ဆင်ခါꩻဖေႏ စွိုးခွိုꩻသမဲင်ꩻယံယံ၊ သမဲင်ꩻခွေါင်ခွေါင်၊ သမဲင်ꩻတဉ်ႏတဉ်ႏဖုံႏ တမုဲင်ꩻမုဲင်ꩻစွဉ်ႏလဲ့ တသေယူႏကိုဖေႏတောဝ်းဝင်ꩻဖုံႏနောဝ်ꩻသွူ။ ကွပ်နောဝ်ꩻမꩻ ထွားနုဲင်းမွိုန်းဒွုမ်ကရီးခါ သဲစ်ကဟော်ꩻထွားဗာႏသွူ ခွေသွဉ်းရွမ်ဖြုဲင်ꩻယိုတွော့ꩻ သေထွꩻဗာႏလဲဉ်းသွူ နီပအိုဝ်ႏဖြားပွိုင်းလဲင်ႏ အာႏပေႏခရာႏတွော့ꩻ နီပအိုဝ်ႏဒုံ ထွာဝင်ꩻဒုံ၊ နီပအိုဝ်ႏကျောင်ꩻ ထွာဝင်ꩻကျောင်ꩻ၊ နီပအိုဝ်ႏခမ်းထီ ထွာဝင်ꩻခမ်းထီ၊ နီပအိုဝ်ႏသမဲင်ꩻ ထွာဝင်ꩻသမဲင်ꩻတဲင် ဟွိုန်လောက်ꩻကာႏစွဉ်ႏလဲ့ မာꩻရာꩻဒါႏဒွုမ်၊ တယ်ႏဟန်ႏနီꩻယိုမာꩻငါ နီပအိုဝ်ႏဒုံ စွုမ်ႏဒုံဒုံ ယံဖန်ဟဲ့ꩻဒျာႏသွော့ဝင်ꩻ တွမ်ႏပအိုဝ်ႏငေါဝ်းစဲစ်စဲစ်၊ အခေါဝ်မဉ်ꩻ၊ တဖူꩻမဉ်ꩻ၊ ကျောင်ꩻကန်ႏမဉ်ꩻဖုံႏလဲ့ ဖန်ဖေႏခန်းတွမ်ႏပအိုဝ်ႏငေါဝ်း၊ မဉ်ႏခုဲင်ႏဖန်ဗာႏဒွိုန်းလဲ့ ဖန်ဖေႏခန်း၊ မဉ်ႏအောဝ်ႏလဲဉ်း မဉ်ႏထွာဒျာႏတွမ်ႏဝင်ꩻမဉ်ꩻ အဟဲ့ꩻဟောင်လဲ့ ဖျင်ချာခန်းတွမ်ႏ နီမဉ်ꩻနောဝ်ꩻသွူ။ နီအောဝ်ႏညာꩻဒျာႏ ဖန်ခရာႏလိုႏတောဝ်း၊ ယွယွကဖန်၊ မဲ့ꩻဝင်ꩻဖန်ဖေႏဒျာႏ၊ မဉ်ႏတွိုႏနေင်ႏငါမꩻ လꩻဒျာႏ၊ လာငါမꩻ ဒေါ့ꩻရီကဝင်ꩻ တွမ်ႏဒေါ့ꩻတွူကျင်ꩻမွိုန်းဒွုမ်ထာꩻ၊ မဲ့ꩻပါꩻရိုꩻလꩻလိုꩻ ပအိုဝ်ႏတွူ ပအိုဝ်ႏတငွူနုဲင်းနောဝ်ꩻ၊ ဝင်ꩻမဉ်ႏရိုꩻမဲ့ꩻ သမ်းဆာအွူဝင်ꩻ၊ ခါးလားဝင်ꩻကရိုꩻလꩻခိန်ႏခါႏနောဝ်ꩻ အုံစွူမွိုန်းတောဝ်း၊ တဖွူထွိုင်ႏနဲစ်အွဉ်ဖန်မွိုင်မွိုင်ခန်းသွော့ဝင်ꩻ ဒုံဆောင်ႏမဉ်ꩻ၊ ဒုံဆောင်ႏခေါဝ်၊ ဒုံဆောင်ႏတဖူꩻဖုံႏလုဲင်း၊ ကထွာဒုံဆောင်ႏလိုတန်ဖုံႏ၊ စွိုးခွိုꩻလိုꩻတန်ဖုံႏ၊ ဗွေႏဆရာႏကျောင်ꩻကိုဖုံႏ တွိုင်ႏတွိုင်ႏပင်ႏပင်ႏ ထွိုင်ႏခွုမ်စံႏထူႏဝင်ꩻပွုံႏတာႏ ဖြာꩻဖဲ့ꩻဖဲ့ꩻတွော့ꩻ ထွိုင်ႏဖန်ဟဲ့ꩻခန်းသွော့ဝင်ꩻ စွုမ်ႏဒုံစွုမ်ႏဆောင်ႏအကျောင်ꩻ။ မဉ်ႏတဟဲ့ꩻဖန်တောဝ်းဒွိုန်းလဲ့ ဆုဲင်ꩻဝုဲင်ꩻလယ်ႏထွားစွုမ်းဒုံဒုံတဲင် ဒုံဆောင်ႏမဉ်ꩻ၊ အခေါဝ်မဉ်ꩻ၊ တဖူꩻမဉ်ꩻ မဉ်ႏခုဲင်ႏအောဝ်ႏတောဝ်းဒွိုန်းနောဝ်ꩻ မဲ့ꩻအီႏသဲင်ꩻတဲမ်းတွိုႏတွိုႏဖေႏ ဖူးဝေးပအိုဝ်ႏဒုံမဉ်ꩻ၊ အခေါဝ်မဉ်ꩻ၊ တဖူꩻမဉ်ꩻဖုံႏနောဝ်ꩻသွူ။ မဉ်ႏသဲင်ꩻတဲမ်းတွိုႏဖေႏနောဝ်ꩻ သဲင်ꩻအွဉ်ႏဖန်တလေ့လေ့ဖေႏပါ ဖူးဝေးသီးဒုံဆောင်ႏမဉ်ꩻ၊ အခေါဝ်မဉ်ꩻ၊ တဖူꩻမဉ်ꩻဖုံႏနုဲင်းငါယို။ ပအိုဝ်ႏနုတ်ꩻဒုံ၊ ပအိုဝ်ႏတွူခေါဝ်၊ လိုꩻလွꩻတဖူꩻ၊ လိုꩻသေတောဝ်းသမဲင်ꩻဒုံ၊ လိုꩻရက်တောဝ်းပအိုဝ်ႏခေါဝ်၊ လိုꩻခွဉ်ႏဆေ့ꩻတဖူꩻ၊ လိုꩻအံႏဆျာႏဝင်ꩻဒုံ၊ လိုꩻဒေါ့ꩻရီဝင်ꩻတနာႏတောဝ်းခေါဝ်၊ လိုꩻဟောဝ်နမ်းတာႏသားတဖူꩻ၊ လိုꩻအံႏစေ့ꩻချာခွိုꩻဒုံ၊ လိုꩻအုံညီꩻဝင်ꩻခေါဝ်းတောဝ်းခေါဝ်၊ လိုꩻယာအေႏသားတဖူꩻ၊ လိုꩻဒါႏတောဝ်းလိတ်သားဒုံ၊ လိုꩻဒေါ့ꩻတေ့ꩻဒါႏ ဝင်ꩻပွုံႏဝင်ꩻမဉ်ꩻခေါဝ်၊ လိုꩻတကေးဒါႏဝင်ꩻသားတဖူꩻ၊ လိုꩻတောင်းပွိုသားဒုံ၊ လိုꩻစာအံႏဒါႏ ပအိုဝ်ႏဟံႏယာႏသားခေါဝ်၊ လိုꩻကျွားမောႏသားတဖူꩻ-စတဲင်နုဲင်းနောဝ်ꩻဖုံႏကွေး။ ဝင်ꩻဖေႏကသဲင်ꩻဖန်ဗာႏပုဲင်ႏ နီဒုံဆောင်ႏမဉ်ꩻ၊ အခေါဝ်မဉ်ꩻ၊ တဖူꩻမဉ်ꩻနုဲင်းကီဖုံႏယိုနောဝ်ꩻ နီတွမ်ႏနီ အခိန်ႏစောဝ်းစောဝ်း နီခွိုꩻပအိုဝ်ႏသီး စွုမ်ႏပီးစွုမ်ႏပါꩻ၊ စွုမ်ႏဖြီးစွုမ်ႏဖြာꩻ ဟဲ့ꩻဖန်ခါꩻ တဲမ်းမုဲင်ခါꩻခန်းသွော့ဝင်ꩻ နီပအိုဝ်ႏဒုံမဉ်ꩻ၊ အခေါဝ်မဉ်ꩻ၊ တဖူꩻတထာမဉ်ꩻဖုံႏအကျောင်ꩻ-။ နမ်းသꩻနီပါꩻ ယံချံꩻသာႏ ပအိုဝ်ႏနုတ်ꩻ၊ ပအိုဝ်ႏတွူ၊ ပအိုဝ်ႏလွꩻ၊ ပအိုဝ်ႏလေႏပျာႏ၊ ပအိုဝ်ႏအံႏဆျာႏချာဒါႏခွိုꩻသားနောဝ်ꩻ ယံကအောဝ်ႏသော့ꩻအာဗာႏမွိုန်းတောဝ်း၊ ကွိုတ်သော့ꩻဗာႏမွိုန်းတောဝ်း ပအိုဝ်ႏဟံႏယာႏကိုနေား။