ပအိုဝ်ႏဒေႏသယိုထင်ႏထို
"ပအိုဝ်ႏဒေႏသယို ထင်ႏထိုပြွူႏဖြိုလွိုလဲဉ်းဝင်ꩻကရိုꩻနဝ်ꩻ တဲက်ထွားလွေꩻနုဲင်းမုဲင်ꩻဟောင်း" တယ်ႏ ၂၀၁၀-နေင်ႏ ဗꩻ ၂၀၁၅-နေင်ႏ အစိုႏရသက်တန်ꩻနဝ်ꩻ သမ္မတဦးသိန်းစိန် အွဉ်ငါလွေꩻ မြန်မာခမ်းထီအစိုႏရထွူ ထွိုင်ႏတွိုႏလွဉ် ဒီမိုကရေစီအစိုႏရ ဒုတိယသက်တန်ꩻကိုနဝ်ꩻ သမ္မတဦးထင်ကျော် အွဉ်ငါခုမ်မာꩻလွေꩻ တယ်ႏ ၂၀၁၆-နေင်ႏ ဗꩻတွိုႏလွဉ် ၂၀၁၈-နေင်ႏစကိုနဝ်ꩻသွူ၊ သမ္မတဦးထင်ကျော် သက်တန်ꩻကထွိုင်ႏလꩻနီနေင်ႏနဝ်ꩻ အုံပဆားလွေꩻထိုꩻတဲင် ကထွာဒါႏ ခမ်းသားလွတ်တောႏဥက္ကဋ္ဌ ဦးဝင်းမြင့် နွို့လွိုက်ရွေꩻခံႏတွော့ꩻ ထင်ႏထွာလွဉ်သော့ꩻ မြန်မာခမ်းထီသမ္မတနဝ်ꩻသွူ။ မြန်မာခမ်းထီယို တယ်ႏ ၂၀၁၀-နေင်ႏ ဗꩻတွိုႏလွဉ် ဟန်ႏသနီꩻ ၂၀၁၈-နေင်ႏကိုယိုနဝ်ꩻ ခမ်းထီသမ္မတ ပြွတ်လုဲင်ႏမာꩻလွဉ်နဝ်ꩻ အဝ်ႏလွေꩻလဲဉ်းသိုမ်ဖြာꩻနဝ်ꩻသွူ၊ သမ္မတတဖြာꩻတောမ်ႏတဖြာꩻယိုလဲ့ ခုမ်မာꩻလွေꩻပုင်ႏ ခုမ်စံႏလွေꩻနယ်ꩻနဝ်ꩻ တဗွိုန်ပီတဝ်းဝင်ꩻနဝ်ꩻသွူ၊ ကထင်ႏထို ကတိုꩻတက်လဲဉ်းလဲ့ ဖေႏကထင်ႏထို ယံကယိန်းတိုꩻတက်ထဲင်းထဲင်းနဝ်ꩻ တဖြာꩻထွူတဖြာꩻ အဝ်ႏကျိုꩻစာꩻလွေꩻနဝ်ꩻ အဝ်ႏထီႏဒျာႏဝင်ꩻနဝ်ꩻသွူ။ ဗွိုန်နုဲင်းနဝ်ꩻနေနေ ကထွာဒါႏ ဖြဝ်ꩻခမ်းနယ်ႏအရန်း ခမ်းနယ်ႏအစိုႏရအစွိုꩻယိုလဲ့ ၂၀၁၀-နေင်ႏ ဗꩻ ၂၀၁၅-နေင်ႏသက်တန်ꩻနဝ်ꩻ ဒေါက်တာ စဝ့်အောင်မြတ် ထွာလွေꩻဖြဝ်ꩻခမ်းဝွန်ႏတန်ချုတ်ထွူ တဲႏ ၂၀၁၆-နေင်ႏမာꩻလွဉ်ယိုနဝ်ꩻ ဒေါက်တာလင်းထွဋ် အဝ်ႏထွာလွေꩻ ဖြဝ်ꩻခမ်းနယ်ႏဝွန်ႏတန်ချုတ်နဝ်ꩻသွူ၊ အစိုႏရသက်တန်ꩻနီဗာႏကို တဗွိုန်ပီတဝ်းဒါႏ ဝွန်ႏတန်ချုတ်နီဖြာꩻသီး စူခြောင်ꩻခုမ်မာꩻပုင်ႏဖုံႏယိုနဝ်ꩻလဲ့ ခမ်းနယ်ႏကို ကအဝ်ႏခမ်းသားသီးနဝ်ꩻ သေဗာႏလဲဉ်းနဝ်ꩻသွူ။ မြန်မာခမ်းထီကို ခမ်းနယ်ႏအဝ်ႏနွတ်ꩻခမ်းနယ်ႏ၊ တွိုင်ႏဒေႏသတန် အဝ်ႏနွတ်ꩻတွိုင်ႏ၊ နမ်းပဲင်ႏအိုပ်ချုတ်ခွင်ꩻလꩻတွိုင်ႏ အဝ်ႏတဗာႏ တောမ်ႏနမ်းပဲင်ႏအိုပ်ချုတ်ခွင်ꩻလꩻဒေႏသ အဝ်ႏလစ်ꩻဗာႏ၊ လို့လို့စင်စင် နမ်းပဲင်ႏအိုပ်ချုတ်ခွင်ꩻလꩻနဝ်ꩻ အဝ်ႏလွေꩻငတ်ꩻဗာႏနဝ်ꩻသွူ၊ နမ်းပဲင်ႏအိုပ်ချုတ်ခွင်ꩻလꩻ အဝ်ႏငတ်ꩻဗာႏအကို လစ်ꩻဗာႏနဝ်ꩻ အဝ်ႏသော့ꩻဖြဝ်ꩻခမ်းနယ်ႏကိုနဝ်ꩻသွူ၊ ပအိုဝ်ႏနမ်းပဲင်ႏအိုပ်ချုတ်ခွင်ꩻလꩻဒေႏသ သိုမ်ဝေင်ꩻနယ်ႏ၊ ဓနုနမ်းပဲင်ႏအိုပ်ချုတ်ခွင်ꩻလꩻဒေႏ နီဝေင်ꩻနယ်ႏ၊ ပလောင်းနမ်းပဲင်ႏအိုပ်ချုတ်ခွင်ꩻလꩻဒေႏသ နီဝေင်ꩻနယ်ႏတောမ်ႏ ဝနမ်းပဲင်ႏအိုပ်ချုတ်ခွင်ꩻလꩻတွိုင်ႏ သူဝေင်ꩻနယ်ႏ စတဲင်ယိုဖုံႏနဝ်ꩻသွူ။ ဟန်ႏသနီꩻ မြန်မာခမ်းထီကို နမ်းပဲင်ႏအိုပ်ချုတ်ခွင်ꩻလꩻဒေႏသ အဒဝ်ႏဒဝ်ႏအခါႏကို ပအိုဝ်ႏနမ်းပဲင်ႏအိုပ်ချုတ်ခွင်ꩻလꩻဒေႏသနဝ်ꩻ တိုꩻတက်ထင်ႏထိုဖဲ့ꩻ၊ ပြွူႏဖြိုလွိုင်ႏကွုန်ꩻသာႏယာႏဖဲ့ꩻယို အဝ်ႏလွိုလဲဉ်းဝင်ꩻ၊ လꩻလွိုလဲဉ်းဝင်ꩻ ကရိုꩻဒါႏ ငေါဝ်းနုဲင်းယိုနဝ်ꩻ နဲင်ႏငံႏရေꩻသားယဟန်ႏဖုံႏ၊ နဲင်ႏငံႏရေꩻပါတီယဟန်ႏဖုံႏအခါႏကို အဝ်ႏဒေါ့ꩻရိုꩻနဝ်ꩻသွူ။ နဝ်ꩻမꩻ ငေါဝ်းယိုဖုံႏနဝ်ꩻ လိုꩻမျိုꩻလင်နဲင်ႏငံႏရေꩻပါတီဖုံႏ၊ လိုꩻမျိုꩻလင်နဲင်ႏငံႏရေꩻသားဖုံႏ ဒေါ့ꩻတဲ့ထွာဒါႏ၊ ပအိုဝ်ႏနဲင်ႏငံႏရေꩻပါတီချာဒျာႏ၊ ပအိုဝ်ႏနဲင်ႏငံႏရေꩻသားဖုံႏ ဒေါ့ꩻချာဒျာႏတဲ့ ထွာနွောင်ꩻနဝ်ꩻသွူ၊ ကဒေါ့ꩻဖေႏငေါဝ်းနုဲင်းယိုနဝ်ꩻ မိဉ်းထွာဒျာႏ အထွာတဲ့ အထွာတွိုင်ꩻ၊ အမွေးတဲ့ အမွေးတွိုင်ꩻနဝ်ꩻ အဝ်ႏမွေးဒျာႏသွူ၊ တွိုႏအမွေးနဝ်ꩻ မိဉ်းတအဝ်ႏတဝ်း၊ တထွာတဝ်း တခံႏစာꩻဗာႏတဝ်းတွော့ꩻ လိုꩻလင်မိဉ်းဒေါ့ꩻနဝ်ꩻ ထွာဒါႏ ဝင်ꩻဆောင်ႏပအိုဝ်ႏသီးသွီႏနဝ်ꩻသွူ၊ တွိုႏအမွေးနဝ်ꩻ မိဉ်းတအဝ်ႏတဝ်း၊ တထွာတဝ်း တခံႏစာꩻဗာႏတဝ်းတွော့ꩻ ပအိုဝ်ႏသီးမိဉ်းဒေါ့ꩻချာဒျာႏနဝ်ꩻ ထွာဒါႏ ပအိုဝ်ႏသီး လိုပ်ꩻနမ်းအိုပ်ꩻနမ်းနဝ်ꩻသွူ။ ပအိုဝ်ႏနမ်းပဲင်ႏအိုပ်ချုတ်ခွင်ꩻလꩻဒေႏသယို ထင်ႏထိုပြွူႏဖြိုလွိုလဲဉ်းဝင်ꩻမွေးဟောင်း၊ မွေးတဝ်းဟောင်း၊ ထင်ႏထိုလွိုဝင်ꩻနုဲင်းမုဲင်ꩻဟောင်း၊ ထင်ႏထိုလွိုအဖဲ့ꩻမုဲင်ꩻဟောင်းနဝ်ꩻ ပအိုဝ်ႏသီး အဝ်ႏလိုႏတဲက်ထွားချာဝင်ꩻနဝ်ꩻသွူ။ နဝ်ꩻတဲင် ဟန်ႏသနီꩻ ပအိုဝ်ႏနမ်းပဲင်ႏအိုပ်ချုတ်ခွင်ꩻလꩻဒေႏသယို ထင်ႏထိုပြွူႏဖြိုလွိုလဲဉ်း ဒေႏသအလင်လင်နဝ်ꩻ တဲက်ထွားလွေꩻနုဲင်းမုဲင်ꩻဟောင်း၊ ခမ်းထီရွဉ်ဘတ်ဂျက်တန်ယို နမ်းပဲင်ႏအိုပ်ချုပ်ခွင်ꩻလꩻ ဒေႏသဖုံႏအကို ခမ်းထီအကို ပအိုဝ်ႏနမ်းပဲင်ႏအိုပ်ချုတ်ခွင်ꩻလꩻဒေႏသအတာႏနဝ်ꩻ သုင်ꩻလွိုဟုဲင်း ဝင်ꩻစီႏရင်ႏနေနုဲင်းနဝ်ꩻဟောင်း၊ နမ်းပဲင်ႏအိုပ်ချုတ်ခွင်ꩻလꩻဒေႏသတွိုင်ꩻကိုယို ဒေႏသအွဉ်ငါသီး လွတ်တောႏအမတ်သီး အဝ်ႏနုဲင်းနုဲင်းဝင်ꩻ၊ မာꩻပဲင်ႏခွင်ꩻအဝ်ႏလꩻပီပီဝင်ꩻတဲင် ထင်ႏထိုစွဉ်ႏလုမ်ꩻ ပအိုဝ်ႏသီးနမ်းပဲင်ႏအိုပ်ချုတ်ခွင်ꩻလꩻဒေႏသကိုနဝ်ꩻ ဝင်ꩻလင်လွတ်တောႏအမတ်တောမ်ႏ ပအိုဝ်ႏလွတ်တောႏအမတ် အကွာႏငါႏဝင်ꩻနုဲင်းမုဲင်ꩻတန်ဟောင်း-စတဲင် ထွာနွောင်ꩻအခေႏနေႏ အဝ်ႏတအဝ်ႏတဝ်း စဉ်ꩻစာꩻယူႏလွေꩻအီနွောင်ꩻဒျာႏ အချက်ယိုဖုံႏနဝ်ꩻသွူ။ ဟန်ႏသနီꩻ ပအိုဝ်ႏဒေႏသကို တဖူꩻတထာ၊ တသီႏယုင်ႏ၊ သွဉ်လိတ်ကျောင်ꩻ၊ မေႏလျပ်စစ်-စတဲင်ယိုဖုံႏနဝ်ꩻ တဗွိုန်ပီတဝ်းနုဲင်းပွိုင်းလဲင်ႏခါ၊ ပြွူႏဖြိုလွဉ်အာလဲဉ်းနဝ်ꩻသွူ၊ ယိုဖုံႏနဝ်ꩻ ထွာလွေꩻဒျာႏ ရုက်ဖဲ့ꩻဆဲင်ႏရာꩻ ပြွူႏဖြိုထင်ႏရေꩻဖဲ့ꩻနဝ်ꩻသွူ၊ အဗွိုန်ပီနုဲင်း ပအိုဝ်ႏနမ်းပဲင်ႏအိုပ်ချုတ်ခွင်ꩻလꩻဒေႏသကိုနေနေ ဓနုနမ်းပဲင်ႏအိုပ်ချုတ်ခွင်ꩻလꩻဒေႏသကိုဖုံႏလဲ့ တဖူꩻတထာ၊ တသီႏယုင်ႏ၊ သွဉ်လိတ်ကျောင်ꩻ၊ မေႏဖုံႏယို အဝ်ႏတိုꩻတက်လွဉ်ဒျာႏနုဲင်းနုဲင်းနဝ်ꩻ အဝ်ႏထီႏဗာႏနဝ်ꩻသွူ။ နဝ်ꩻမꩻ စုမ်ႏနီꩻသတင်ꩻ စူတထွꩻတဝ်း၊ ပအိုဝ်ႏဒေႏသအထန်ႏသတင်ꩻဖုံႏ စူꩻတထွꩻတဝ်းဒါႏ ပအိုဝ်ႏခမ်းသားသီးယို ပအိုဝ်ႏဒေႏသယိုနဝ်ꩻ ပြွူႏဖြိုထဲင်းလဲဉ်း ဒေႏသအလင်နဲ့၊ ပြွူႏဖြိုထွꩻဒွုန်း ဒေႏသအလင်နဲ့နဝ်ꩻ ခိဉ်ႏထွားတဲက်ထွားတဲ့ အီႏယိုꩻတဝ်းဒျာႏရင်ꩻသွူ၊ ထွိုင်ႏတသေထွꩻတဝ်းနဝ်ꩻ ဝင်ꩻကဒေါ့ꩻဒါႏ ငေါဝ်းဆောင်ႏသွီႏဖုံႏ ငေါဝ်းအိုပ်ꩻနမ်းဖုံႏယို ထွာထိုꩻတေားစွဉ်ႏ ငေါဝ်းအမွေးနဝ်ꩻသွူ။ ရုက်ဖဲ့ꩻဆဲင်ႏရာꩻပြွူႏဖြိုမုနဝ်ꩻ အီႏပွိုင်းကွာႏငါႏတဝ်းဝင်ꩻသွူ၊ ထွိုင်ႏတွိုႏပအိုဝ်ႏနမ်းပဲင်ႏဒေႏသကို အဝ်ႏသိုမ်ဝေင်ꩻနယ်ႏယို လွတ်တောႏအမတ် အဝ်ႏ(၁၀)ဖြာꩻလဲ့ ပလောင်းနမ်းပဲင်ႏဒေႏသကို အဝ်ႏနီဝေင်ꩻနယ်ႏနဝ်ꩻ လွတ်တောႏအမတ် အဝ်ႏ(၁၁)ဖြာꩻတဲ့နဝ်ꩻ၊ ပအိုဝ်ႏလိုꩻယွဲး ကျောင်ꩻသားပေႏဖုံႏ ကလွေꩻသွဉ်ပညာႏ မန်းခမ်းပရဟိတကျောင်ꩻဖုံႏတဲ့နဝ်ꩻ၊ ဌာႏနဆဲင်ႏရာꩻကို ပအိုဝ်ႏသီးနွို့ခုမ်မာꩻ ဆေ့ꩻအာအခေႏနေႏတဲ့နဝ်ꩻ စတဲင်အထီအသွီႏဖဲ့ꩻဆဲင်ႏရာꩻ ပြွူႏဖြိုထင်ႏထိုမုယို ပအိုဝ်ႏနမ်းပဲင်ႏအိုပ်ချုတ်ခွင်ꩻလꩻဒေႏသ ထင်ႏထိုလွိုလဲဉ်းဝင်ꩻ မိဉ်းဒေါ့ꩻရိုꩻနုဲင်းနဝ်ꩻနဝ်ꩻ အမာႏထိုꩻဒါႏနဝ်ꩻသွူ။[၁][၂]