ပအိုဝ်ႏလိတ်မွူး

ပအိုဝ်ႏလိတ်မွူး ဖေႏကထွာတမွူးချင်ႏ မာꩻခန်းသွော့ပွဲꩻအုံကိုမ်

ပအိုဝ်ႏဗွေႏသံႏဃာႏတန်တောမ်ႏ အွောန်ငါပအိုဝ်ႏခမ်းထီသား ဆရာႏန်ဖုံႏအေား- ခေတ်ယိုခါနဝ်ꩻ ဖျော်တွိုႏလဲဉ်း လိုꩻအမျာꩻဝါႏဒကို ဒီမိုကရေသီခေတ်တဲင် ဒေါ့ꩻဖြဝ်ႏဝွေႏဖန်ႏပဲင်ႏခွင်ꩻ အဝ်ႏလဲဉ်းနဝ်ꩻမꩻ နီသွောန်းဒေါ့ꩻထန်ႏ ဖေႏကျံႏဉာဏ်ႏဗာႏ ပအိုဝ်ႏလိုꩻမျိုꩻတွက်တာႏ လိတ်မွူးခရာႏနုဲင်းယိုသွူ။ ခမ်းရိုမ်းဗူႏ နီမန်းခမ်းကိုယိုနဝ်ꩻ ခမ်းရင်ꩻသား လိုꩻမျိုꩻပေါင်ꩻ အဝ်ႏသိုမ်ဆီငတ်ꩻမျိုꩻသွူ၊ ခွုင်းကားခမ်းရင်ꩻသား လိုꩻမျိုꩻပေါင်ꩻစွုမ်ႏဖုံႏအကို မိဉ်ႏခြပ်ရဲဉ်ႏ လိုꩻအဖြာꩻပေါင်ꩻ အဆေ့ꩻအအာ အမုဲင်စဲဉ်ႏနဝ်ꩻ နီပအိုဝ်ႏလꩻ အမုဲင်စဲဉ်ႏနွုတ်ꩻသွူ။ နီပအိုဝ်ႏလိုꩻမျိုꩻဖုံႏ ကအဝ်ႏအုံသော့ꩻအာဒါႏ အရပ်ဒေႏသဖုံႏနဝ်ꩻ ဖြဝ်ꩻခမ်းနယ်ႏ၊ မဲင်ꩻခမ်းနယ်ႏ၊ စောက်ꩻခမ်းနယ်ႏ၊ ပဂိုꩻတုံး၊ ရန်ႏတကုန်ႏတုံး၊ မန်ꩻတလေꩻတုံးဖုံႏသွူ။

ပအိုဝ်ႏလိုꩻမျိုꩻနဝ်ꩻ နမ်းတောမ်ႏနမ်းပဲင်ႏ လိတ်လုဲင်ꩻတောမ်ႏယေန်ႏငဲးရေꩻ အဝ်ႏခေါခေါဒျာႏရိုꩻကီလဲ့ လိတ်ပအိုဝ်ႏခေတ်ယိုခါနဝ်ꩻ လိတ်မွူးအဝ်ႏ ၂-မွူး၊ ၂-မွူးကရိုꩻနဝ်ꩻ ခမ်းကောင်သားလိတ်မွူး ထီသိမ်ႏ၊ ခမ်းဒေါမ်သားလိတ်မွူး အခြဲမ်တရျာꩻ အဝ်ႏနဝ်ꩻ ၂-မျိုꩻသွူ။ ဖူးဝေးပအိုဝ်ႏသီးဖုံႏ ၂-မျိုꩻမျိုꩻ၊ ၂-ထွောင်းထွောင်းယို အုံအဝ်ႏခမ်ႏထူႏလို့လို့နုဲင်းနုဲင်း "ပအိုဝ်ႏ"ကရိုꩻဒါႏ လိုꩻမျိုꩻမိဉ်ꩻတောမ်ႏ "ပအိုဝ်ႏအလံႏတောႏ"ယိုဆလတဲင် သꩻဓာတ်လဲ့ပအိုဝ်ႏ၊ ဒေါ့ꩻဖြဝ်ႏလဲ့ငေါဝ်းငွါပအိုဝ်ႏ၊ ကွောန်ကꩻလဲ့ ခေါမ်ꩻလာꩻပအိုဝ်ႏ၊ တဲမ်းဟောꩻလဲ့ လိတ်လုဲင်ꩻပအိုဝ်ႏ- ပအိုဝ်ႏလို့လို့ဒျာႏနဝ်ꩻမꩻ နီလိုꩻမျိုꩻယို ထာꩻလွောင်ႏဗူႏလွဝင်ꩻ အဝ်ႏနေဒွိုန်း ရိုꩻဗာႏနုဲင်းနဝ်ꩻသွူ။ ခေတ်ယိုခါ လိတ်မွူးနဝ်ꩻ ၂-မျိုꩻအကို လိတ်မွူးခမ်းကောင်သားနဝ်ꩻ အဝ်ႏယင်းဒွိုန်းက ၂-မျိုꩻ၊ မဲဉ်မွောန်းဖျင်လိတ်မွူးသားတောမ်ႏ တမဲဉ်မွောန်းဖျင်တဝ်းလိတ်မွူးသား အဝ်ႏယင်း ၂-မျိုꩻတဲင် လိတ်လုဲင်ꩻလွောင်ႏဗူႏရေꩻအာႏရဲင်ꩻ တပါႏအဝ်ႏတဝ်းဒွိုန်း ရိုꩻဗာႏနုဲင်းနဝ်ꩻသွူ။

တဲႏစခရိစ်ယန်ႏနေင်ႏ ၂၀၁၄-ဗာႏ သွောန်ပညာႏနေင်ႏမာꩻငါနဝ်ꩻ အစိုႏရလိတ်သွဉ်ကျောင်ꩻကို ခမ်းရင်ꩻသားလိတ်လုဲင်ꩻယို သွောန်သော့ꩻခွင်ꩻ လꩻလဲဉ်းရိုꩻနုဲင်းနဝ်ꩻတဲင် ခမ်းဒေါမ်သားလဲ့ သွောန်သော့ꩻဒျာႏ လိတ်ခမ်းဒေါမ်၊ ခမ်းကောင်းသားလဲ့ သွောန်သော့ꩻဒျာႏ လိတ်ခမ်းကောင် ဟွုန်ထွꩻသေထွꩻဗာႏနုဲင်းနဝ်ꩻသွူ။ လိုꩻမျိုꩻတမျိုꩻမျိုꩻယို ပေါႏလိတ်အဝ်ႏထွာနေဒွိုန်း ၂-မျိုꩻနုဲင်းယိုနဝ်ꩻ လိုꩻမျိုꩻလဲ့ ပꩻလီဒါႏ ၂-မျိုꩻ၊ ၂-ခဝ်၊ သွုန်ႏသꩻလဲ့ ထွာထိုꩻဒါႏ ၂-စား ၂-မျိုꩻသွူ၊ လိုꩻမျိုꩻနဝ်ꩻ တမျိုꩻချင်ႏဒျာႏ တွိုႏလိတ်လုဲင်ꩻနဝ်ꩻ အဝ်ႏတေား ၂-မျိုꩻနုဲင်းယိုနဝ်ꩻ တလိုႏထွာထွိုက်ထွာသင်ꩻတဝ်း၊ လိုꩻမျိုꩻတမျိုꩻနဝ်ꩻ လိတ်အဝ်ႏငါတစားငါမꩻ လိုꩻမျိုꩻထာꩻလွောင်ႏဗူႏရေꩻ တိဉ်ႏခွေါင်နဝ်ꩻသွူ။ မန်းသီးဖုံႏ ဝင်ꩻလိုꩻမျိုꩻနဝ်ꩻ လိုꩻအဖြာꩻပေါင်ꩻကအာထာꩻမဉ်ႏတဲ့ ဝင်ꩻလိတ်နဝ်ꩻ အဝ်ႏတမျိုꩻလုမ်ꩻ၊ တွိုႏနီပအိုဝ်ႏနဝ်ꩻ လိုꩻအဖြာꩻပေါင်ꩻ တပေါႏအာငါႏတဝ်းလဲ့ လိတ်မွူးအဝ်ႏစွောန်ႏ ၂-မျိုꩻနဝ်ꩻ အဝ်ႏလိုႏအုံတဲင် အုံကိုမ်ဒေါ့ꩻရီခန်းဝင်ꩻနဝ်ꩻသွူ။

ကေားကထွာဒါႏ ပအိုဝ်ႏပိုလီꩻဖုံႏ ခေတ်ယိုခါသားနဝ်ꩻလဲ့ နီလိတ်ပအိုဝ်ႏယို နီအဝ်ႏလိုႏဒါႏစုမ်ႏဖြာꩻဖြာꩻ၊ နဝ်ꩻသွူတကာႏတဝ်း နီလိတ်ပအိုဝ်ႏယိုခါနဝ်ꩻ စုမ်ႏနဲ့ စုမ်ႏတဝ်းတဲ့၊ မဲန်ႏလွောန်ꩻသဒ္ဒါႏနယ်ꩻနဲ့ မဲဉ်ႏတဝ်းနဲ့၊ ဗီးစွို့ꩻ သရစွို့ꩻ ဗီးငေါဝ်းသိုတ်ꩻစွို့ꩻမွေးနဲ့ မွေးတဝ်းနဲ့၊ တဲမ်းအီပအိုဝ်ႏငေါဝ်း လꩻလို့နဲ့ လꩻလို့တဝ်းနဲ့၊ တဲမ်းအီပအိုဝ်ႏငေါဝ်း အဆင်ႏပြေႏနဲ့ ပြေႏတဝ်းနဲ့၊ ငေါဝ်းတငွါ လိတ်တဖြုံႏစား မွေးနဲ့ မွေးတဝ်းနဲ့နဝ်ꩻ အဝ်ႏလိုႏလွူꩻထွားလို့ဝင်ꩻဖုံႏ၊ အဝ်ႏလိုႏမာꩻသုတေသနဖုံႏသွူ။ ပညတ်နေး သမုတ်နေး သွောန်အိုမ်နေး နုဲင်းဝါးကီႏ ကသွောန်ဒေါ့ꩻလိုꩻငေါဝ်းနဝ်ꩻ တထွာထိုက်ထွာသင်ꩻတဝ်းဒွုမ်သွူ။ ပွိုင်းဝွို့တောမ်ႏလိတ်မွူးကိစ္စယို ဖေႏကတရေင်ဗာႏမွုန်း မုဲင်ꩻလဲင်ႏလဲင်ႏ၊ ဖေႏကယပ်ꩻခုဲႏဗာႏမွုန်း မုဲင်ꩻလဲင်ႏလဲင်ႏ၊ အခိန်ႏလဲ့ ဖေႏကလို့ခြေင်ထဲင်းမွုန်းဒွုမ်နဝ်ꩻ ကေားကထွာဒါႏ အောႏဇာႏအာႏဏာႏအဝ်ႏသား၊ တာႏဝွန်ႏဝတ္တရာꩻအဝ်ႏသား နီသွောန်းသီးဆရာႏတန် ပုဂ္ဂိုလ်ႏလိုꩻကျောင်ꩻ လိုꩻလမ်း ခမ်းကောင် ခမ်းဒေါမ်လို့လို့စင်စင်နဝ်ꩻ တွိုင်ႏပင်ႏရော့ꩻရော့ꩻ၊ ဒေါ့ꩻရီဟဝ်ဟဝ်လို့ဝင်ꩻတဲင် အဝ်ႏလိုႏမာꩻလိတ်ပအိုဝ်ႏ ညီႏလာႏခံႏနုဲင်းမုဲင်ꩻ။ အဝ်ႏလိုႏသင်္ဂါႏယနာႏ လိတ်ပအိုဝ်ႏနုဲင်းမုဲင်ꩻ၊ အဝ်ႏလိုႏအွောန်ႏအထွူထဲ့နုဲင်းမုဲင်ꩻ၊ ဗီးစွို့ꩻ သရစွို့ꩻ အသိုတ်ꩻငေါဝ်းစွို့ꩻ၊ မဲဉ်ႏလဲ့မဲဉ်ႏ-စွုမ်ႏလဲ့စွုမ်ႏ-ယိုꩻလဲ့ယိုꩻ တဲမ်းအီပအိုဝ်ႏငေါဝ်း ငေါဝ်းတငွါလိတ်တဖြုံႏ အဆင်ႏပြေႏလꩻလို့-ရမ်ꩻဗာႏတဝ်း၊ ဖမ်ꩻဗာႏတဝ်းနဝ်ꩻနုဲင်းမုဲင်ꩻ၊ ခြပ်တဲမ်းအီ ပအိုဝ်ႏငေါဝ်းငွါ ဝေါဟာရစောင်ႏ ပအိုဝ်ႏအဘိဓာန်ႏနဝ်ꩻ မာꩻဗာႏနုဲင်းမုဲင်ꩻ။ လိတ်ပအိုဝ်ႏ အီႏသွောန်သော့ꩻ အစိုႏရလိတ်သွောန်ကျောင်ꩻကိုနဝ်ꩻ ခမ်းကောင်-ခမ်းဒေါမ် ဖေႏကဗွိုန်ပီဝင်ꩻနဝ်ꩻ မာꩻဗာႏနုဲင်းမုဲင်ꩻ၊ ဖိစ်ပင်ꩻဟွုန်လို့လို့ ပအိုဝ်ႏပညာႏသား လိုꩻဝါႏသနာႏလွူꩻလိတ်သား၊ ဓမ္မာစရိယသား၊ ဘွဲ့ဒီဂရီသားထွူတဲင် မာꩻခန်းပွဲꩻအုံကိုမ် လိတ်မွူးပအိုဝ်ႏတွော့ꩻ အွောန်ႏထွော့ခန်း လိတ်မွူးပအိုဝ်ႏ အမဲဉ်ႏတရာꩻနဝ်ꩻမꩻ နီလိတ်ပအိုဝ်ႏယို အီႏတသွောင်းထင်ႏထိုတောမ်ႏ ခေတ်တသာဒီမိုကရေသီ ပညာႏခေတ်နဝ်ꩻသွူ။

ပအိုဝ်ႏငေါဝ်းစခါရိုꩻ "မဲဉ်ႏထွူက-ထဲ့"နီလိတ်ပအိုဝ်ႏယိုလဲ့ မိဉ်ႏတွိုႏမဂ်ဖိုလ်ႏ အမဲဉ်ႏတရာꩻမꩻ အအီႏထွူထဲ့သွူ။ ကောပ်နဝ်ꩻမꩻ တာႏဝွန်ႏအဝ်ႏ ဗွေႏသံႏဃာႏ ရဟန်ꩻတန်သီး (ဓမ္မစက်)သားတောမ်ႏ ပီအဲန်အို လိုꩻတန်သီး (အာႏဏာႏစက်)သားဖုံႏနဝ်ꩻ ထွားထိုထို ထီႏဆွာꩻဆွာꩻဖေႏ အနာႏဂတ်ပအိုဝ်ႏ ပိုလီꩻပေႏဖုံႏတွက်တာႏတဲင် ရက်စွိုးခွိုꩻ ရက်လိုꩻမျိုꩻ လိုꩻဝါႏသနာႏလွူꩻလိတ်မွူးပအိုဝ်ႏသား ကဒင်ႏပျꩻနယ်ဒါႏ လိတ်မွူးပအိုဝ်ႏ ကအဝ်ႏလိုႏခြွိုင်း၊ ကအဝ်ႏလိုႏမွောန်းဖျင်ဖုံႏ ဖေႏကစွုမ်ႏနဝ်ꩻ မွေးတမွေးတဝ်း စိဉ်ꩻစာꩻစဲင်းစဲင်း-ယူႏစွို့ꩻစွို့ꩻစွောန်ႏစွောန်ႏ အကျိုꩻတောမ်ႏအကျောင်ꩻ၊ အခြောင်ꩻတောမ်ႏအခရာႏ အမဲဉ်ႏတရာꩻထွူတဲင် ပအိုဝ်ႏလိတ်မွူးတွက်တာႏ ကလိုႏအပ်မွေးမွေးဒါႏယို လိုႏထဲမ်လဲ့ထဲမ်ဗာႏ၊ ကအဝ်ႏလိုႏမွောန်းဖျင်လဲ့ မွောန်းဖျင်ခန်းနဝ်ꩻမꩻ တာႏဝွန်ႏဝတ္တရာꩻ အီႏကေႏလꩻသွူ။ မွောန်းဖျင်ကရိုꩻယိုလဲ့ ဖေႏကမွောန်းဖျင်ဗာႏမွုန်းတဝ်းယွဲးယွဲးတောမ်ႏခွိုꩻခွိုꩻ၊ မွောန်းဖျင်အလဲင်ႏယိုနဝ်ꩻ ဖေႏကထွာအဆုဲင်ꩻသွတ်ꩻအနေႏ နေးတောမ်ႏပညာႏသား လိုꩻဝါႏသနာႏလွူꩻလိတ်သား ဓမ္မာစရိယသား ဘွဲ့ဒီဂရီသားတဲင် အဝ်ႏလိုႏအွောန်ႏထန်ႏမဲဉ်ႏမဲဉ်ႏလွောန်ꩻ သဒ္ဒါႏနယ်ꩻသွူ။

မီႏထဲမ်မွောန်းဖျင် နီလိတ်ပအိုဝ်ႏနဝ်ꩻ မဲ့ꩻအဗွိုန်ထိုꩻ ပါꩻယိုမူ ပါꩻနဝ်ꩻမူ ပါꩻယိုလိတ်မွူး ပါꩻနဝ်ꩻလိတ်မွူးနုဲင်းနဝ်ꩻလဲ့ အဝ်ႏလိုႏယူႏတဝ်း၊ အဝ်ႏလိုႏအွောန်ႏသꩻတဝ်း၊ ပေါႏသဘာဝယုတ္တိအဝ်ႏဒျာႏ၊ မဲဉ်ႏလွောန်ꩻဒျာႏသဒ္ဒါႏနယ်ꩻ ဂရမ်မာနယ်ꩻ ပအိုဝ်ႏထွုံꩻနယ်ꩻနဝ်ꩻ အမဲဉ်ဗွိုန်ပါꩻမုဲင်ꩻမုဲင်ꩻလိတ်ဗွိုန်၊ ဗွိုန်ခန်းတယဝ်းယဝ်းလုဲင်း ပယ်ႏထိုꩻခန်းမာန်ႏမာႏန၊ အွောန်ႏကုဲင်ထိုꩻခန်း ပုဂ္ဂလိကအတ္တဝါဒတဲင် ဖောႏထန်ႏခန်း နီလိတ်ပအိုဝ်ႏ လိတ်မွူးအမဲဉ်ႏတရာꩻတွော့ꩻ တွိုင်ႏပင်ႏလို့ဝင်ꩻရော့ꩻရော့ꩻ အဝ်ႏလိုႏအွောန်ႏထွော့လဲဉ်း လိတ်မွူးပအိုဝ်ႏ တမွူးချင်ႏသွူ။ မာꩻပွဲꩻမော့ꩻခွဲးအုံကိုမ် စုခြွဉ်းမွောန်းဖျင် ခြွိုင်းဆင်ထဲမ်ဗွေထွူနေး တမွေးတဝ်းတွော့ꩻ လိတ်မွူးတစွို့ꩻတဝ်း တစုမ်ႏတဝ်းလဲ့ တခံႏတဝ်း အမွောန်းဖျင်တဲင် နေးတောမ်ႏအောႏဇာႏအာႏဏာႏတွော့ꩻ အွောန်ႏအတီႏပျုနွိုင်ႏနွိုင်ႏဆေꩻဆေꩻနေး နုဲင်းပွိုင်းလဲင်ႏလဲင်ႏနဝ်ꩻ အွောန်ႏအတီႏပျုခန်း အလဲင်ႏပိဉ်ရျာꩻရျာꩻတယဝ်း တထူꩻတဝ်းထာꩻမုဲင်ꩻမုဲင်ꩻ၊ မာꩻလို့ခြေင်အခိန်ႏ၊ မာꩻယပ်ꩻခြေင်နမ်း၊ မာꩻသုမ်ꩻခြေင်ရွောန်တရိပ်လုမ်ꩻသွူ။

ကောပ်နဝ်ꩻမꩻ ခမ်းကောင်တောမ်ႏခမ်းဒေါမ် ပအိုဝ်ႏဖုံႏ ခွုင်းကားကအဝ်ႏ အသွုန်ႏသꩻရာႏ ယံဖေႏကအဝ်ႏဒျာႏသွဗာ့ တလွောင်ႏတဗူႏချင်ႏ၊ ယံဖေႏကထွာဒျာႏသွော့ တသွီႏတယာႏချင်ႏ၊ လိတ်မွူးကရိုꩻယိုလဲ့ ယံဖေႏကထွာဒျာႏသွော့ လိတ်မွူးတမွူးချင်ႏနဝ်ꩻ လွေꩻသွိုသဲင်ꩻငီꩻ စွီႏခန်းဝင်ꩻစူ လွောင်ႏလွောင်ႏဗူႏဗူႏ မာꩻခန်းပွဲꩻအုံကိုမ်-သင်္ဂါႏယနာႏလွခန်းသွော့ လိတ်မွူးပအိုဝ်ႏအကျောင်ꩻ ဖေႏကျံႏဉာဏ်ႏ တောင်ꩻပြန်ႏနိုꩻဆောႏတမာထွိုင်ႏဗာႏ ဗွေႏဆရာႏပုဂ္ဂိုလ်ႏ ပအိုဝ်ႏလိုꩻတန်သီးဖုံႏ ဗွေႏအေား။