ပါမုဲင်ꩻတယဝ်း

ခြွေငါႏခြေားငါႏတဲ့ တွမ်ႏကျွားတမွိုꩻတမာꩻမွိုန်းထာꩻ သေယူႏလꩻ၊ သေနမ်းသွော့ အွဉ်ႏတဖေင်ꩻမွိုန်း ကုသိုလ်ႏတရာꩻဖုံႏနေား တနီꩻခါသက်တလီးမဉ်ႏအောဝ်ႏ ပြာႏ ခန္ဓာႏမဉ်ႏလီထိုꩻခိန်ႏမဲ့ꩻ အာႏကွိုꩻခရာႏအောဝ်ႏတောဝ်း။ အာႏကွိုꩻခရာႏအစဲစ်အမဲဉ်ႏနောဝ်ꩻ ထွာဒျာႏရတနာႏသွံပါꩻယိုသွူ။

ယံငါႏ၊ ဒါႏငါႏ၊ ပညာႏတန်ငါႏတဲ့ သꩻဖြုံႏတွမ်ႏထိုမွိုန်း ကယံ၊ ကဒါႏ ပညာႏဖုံႏယို ယံဖေႏနေးကထွာအဟောဝ်ဖဲ့ꩻနောဝ်ꩻအရေꩻတန်ငါႏ တွမ်ႏထွာဗာႏမွိုန်းတောဝ်းလိုꩻယံမဲ့ခေ့ꩻ၊ လိုꩻဒါႏမဲ့ခေ့ꩻ၊ လိုꩻပညာႏမဲ့ခေ့ꩻနေား။ တရေꩻငါႏ၊ နမ်းပြွိုင်ကျငါႏ၊ လွိုးယံဖုဲင်းရက်ငါႏတဲ့ တွမ်ႏထနယင်ႏတန်လွဉ်ꩻငါႏမွိုန်းနမ်းနေား ထာꩻတရေꩻဆချာ အန္တရာယ်ႏတဲ့အာ တွိုႏတနီꩻခါသူꩻအီႏနွမ်ꩻပသူႏ အယာႏဒူႏတဲ့လို့ အီႏအောဝ်ႏတခြို့ဗာႏဒျာႏဟံႏကိုနေား။ လိုꩻခြွေလိုꩻချမ်ꩻသာႏနာꩻမဉ်ႏခွယ်ꩻချာႏနောဝ်ꩻ တနီခါ နာꩻဘဝမဉ်ႏကာႏလွေꩻငါသူꩻ ပါꩻမုဲင်ꩻမုဲင်ꩻတဲ့ တလောက်ꩻကာႏတောဝ်းနာꩻ ဝင်ꩻငွိုးဝင်ꩻတလွိုးဆောင်းတဆင်ႏတာႏလွုမ်ꩻ မဉ်ႏညမဲ့ꩻဝင်ꩻတယူႏလꩻဒွုမ်နာꩻသွူ။ နာꩻအာႏကွိုꩻစဲစ်နောဝ်ꩻ ထွာဒျာႏနာꩻကမာꩻခါꩻကုသိုလ်ႏတရာꩻအဟောဝ်ဖဲ့ꩻ ပေါႏကုသိုလ်ႏတရာꩻတအောဝ်ႏတောဝ်းတဲ့ နာꩻဘဝမော့ꩻဒုက္ခတဲင် အီႏတွိုႏလွေꩻဗာႏခင်ႏလမ်းကုဲင်နောဝ်ꩻသွူ။ ခြွေတဲ့သီဗာႏ၊ တရေꩻတဲ့သီဗာႏ၊ ပညာႏအောဝ်ႏတဲ့သီဗာႏ ပါꩻမုဲင်ꩻမုဲင်ꩻတယောဝ်းသီဗာႏလွဉ်းလွဉ်း မဲဉ်သွဉ်းသွဉ်း မဲဉ်ဗွေႏဗွေႏရုပ်နာမ်ႏအနေႏဒျာႏကွေးကွေးသွူ။

ကွပ်ပွိုးနောဝ်ꩻမꩻ ထွုမ်ႏသွော့အဟောဝ်၊ မာꩻဒျာႏသွော့ကုသိုလ်ႏတရာꩻ ထွုမ်ႏသေꩻခါꩻသွော့ ဘဝချမ်ꩻသာႏတာႏနေား။ နီကမာꩻခါꩻဒျာႏ ထာꩻမာꩻ(ကံႏ)ယို နီခံႏစာꩻဗာႏချာ၊ တွိုႏသဲင်ꩻချာဒျာႏနီနမ်းလောင်းကီနောဝ်ꩻသွူ။