ပိုဖါမာဝါꩻအွဉ်ႏကုဲဝင်ꩻခရာႏ

အဝ်ႏ ဝီခီပီးဒီးယား ကို

ယဟန်ႏသားနဝ်ꩻ အဝ်ႏတွမ်ႏပို အဝ်ႏတွမ်ႏလီꩻလဲ့ တမာဝါꩻ ကထင်ႏတရော့ꩻတဝ်းဝင်ꩻ လျားဝင်ꩻ တဖြာꩻတွမ်ႏတဖြာꩻ ကထင်ႏအွဉ်ႏကုဲင်ဝင်ꩻတဲင် အပိုအလီꩻ တစက်ꩻတစုဲ၊ ဥစ္စာႏပစ္စေꩻ လီလာဟုဲင်လုဲ၊ စီꩻပွာꩻရေꩻကုဲင်အီ၊ အပိုအလီꩻနဝ်ꩻ ဖါထျꩻလဲ့ တမွေးတဝ်း၊ မွိုးထျꩻလဲ့ တမွေးတဝ်း၊ ဖါမီႏဆုမ္မꩻသွဉ်သင်လဲ့ လဲဉ်းတောအမွိုးထျꩻ၊ မွိုးမီႏဆုမ္မꩻသွဉ်သင်လဲ့ လဲဉ်းတောဒျာႏ အဖါထျꩻ၊ လဲဉ်းနဝ်လဲဉ်းထင်ꩻ တန်ထောင်ဒျာႏ တဖူꩻကို၊ အုံခြꩻနဝ် အုံခြꩻထင်ꩻဒျာႏ နုဲင်းကမ်ႏပုဲင်းဒီႏတဲင် မွိုးဝါဒလဲ့မလꩻ၊ ဖါဘာႏသာႏလဲ့မထွာ၊ ဉာဏ်ႏပညာႏလဲ့ ကင်ꩻစင်ကြောင်း၊ အနမ်းလောင်း ကျင်ꩻသိက္ခာႏ၊ ဗာႏလာနံႏထွာလိုꩻမွိုက်၊ အုံညီလင်ꩻဒဝ်ထီသား၊ တောႏလောင်ꩻဆွဉ်းယာလံ၊ ကျင်ꩻမဟဝ် ထူႏမွိုးရွဉ်၊ တခွန်ꩻစွန် ယားဝင်ꩻထာꩻ၊ ထီႏချာမွိုးဖါ တသွင်ꩻတဝ်း၊ ထွာတောဒျာႏ လိုꩻကုဲင် လိုꩻရွိုင်ꩻ လိုꩻမွိုက်တဲင် လောကလဲ့ လဲဉ်းသော့ꩻထောင်ႏ၊ မွိုးဖါနီဖြာꩻ ထောင်လွေꩻလွဉ်ꩻ မဲ့ထီရီႏဗာႏ၊ သꩻခိုးလျားသꩻဒုက္ခလွဉ်ꩻဗာႏနဝ်ꩻသွူ။ ကွပ်မွိုးမွိုက် ကွပ်ဖါကုဲင်တဲင် ပိုလီꩻနဝ်ꩻခါ လောကအတွက် ဆုတ်ယုတ်၊ ထွာဒျာႏလိုꩻဖျင်ꩻ၊ သံႏသရာႏအတာႏလဲ့ ခံႏဗာႏငါးရုဲင်ꩻအပါယ်ႏ၊ ပိုလီꩻကထွာဗာႏနုဲင်းနဝ်ꩻနဝ်ꩻ ကွပ်မွိုးဖါနဝ်ꩻမꩻ ထွာဗာႏနဝ်ꩻသွူ။ ကွပ်နဝ်ꩻမꩻ စီꩻပွာꩻရေꩻအတာႏ ပိုလီꩻအတွက်တာႏ အမျိုꩻတွမ်ႏဘာႏသာႏ ယံဆုတ်ယုတ်လီလာပုဲႏနဝ်ꩻ လမ်းသားပိုမာ မီႏလွဉ်ꩻအခါႏလဲ့ ပိုဝါꩻ သယ်ꩻခံႏယွုန်း၊ ပိုဝါꩻမီႏမာႏလဲ့ လမ်းသားပိုမာ ခန္တီႏနဝ်ꩻမꩻ ကီꩻပွာꩻထင်ႏထို၊ နီပအိုဝ်ႏယို နံပတ်အွီႏနဝ်ꩻထွူနော။

ဘုရာꩻကမ္ပဲႏခရာႏ[မွဉ်းဖျင် | မွဉ်းဖျင်အရွီးခိုႏ]

နီပအိုဝ်ႏသီး အထုံꩻအစံႏတမျိုꩻနဝ်ꩻ မီႏလူႏဗာႏ ကျောင်ꩻလဲ့ ဟဲ့ꩻကျောင်ꩻတကာႏ၊ မီႏလူႏစရွပ်လဲ့ ဟဲ့ꩻပရွပ်တကာႏ၊ မီႏလူႏဗာႏရေႏအိန်ႏလဲ့ ဟဲ့ꩻပအိန်ႏတကာႏ၊ မီႏလူႏဗာႏဘုရာꩻလဲ့ ဟဲ့ꩻဘုရာꩻတကာႏ၊ မီႏအွဉ်ႏခံႏဗာႏ ဗွေႏစင်ꩻလဲ့ ဟဲ့ꩻပေါစင်ꩻစင်ꩻဖါ၊ မီႏအွဉ်ႏခံႏဗာႏသျင်ႏလဲ့ ဟဲ့ꩻပသျင်ႏ သျင်ႏဖါ သျင်ႏမွိုးနုဲင်းနဝ်ꩻသွူ။ ကဟဲ့ꩻဖန်အမဉ်ꩻနုဲင်းနဝ်ꩻခါ ကထင်ႏစဲစ်ဆေꩻနဝ်ꩻ ကုသိုလ်ႏသဒ္ဓါႏတရာꩻတွမ်ႏ လောကဂုဏ်ႏပကာသနမျိုꩻအကို၊ လောကဂုဏ်ႏပကာသနအာနဝ်ꩻသွူ။ ထာꩻလူႏထာꩻတန်ꩻ အမျိုꩻမုဲင်ꩻတရိုꩻတဝ်း သဒ္ဓါႏတရာꩻယိုနဝ်ꩻ အရေꩻတန်လွိုဝင်ꩻ၊ သဒ္ဓါႏတရာꩻဟဝ်မꩻ အကျိုꩻဖေႏ ဘဝဇာတ်ငါဟဝ်၊ သဒ္ဓါႏတရာꩻ ကထင်ႏဟဝ်တဝ်းနဝ်ꩻ အကျိုꩻဖေႏဘဝဇာတ်ငါဆူꩻ တဟဝ်တဝ်းနော။ လောကယိုငခါလဲ့ ထာꩻမာꩻထာꩻခွုမ် အမျိုꩻမုဲင်ꩻတရိုꩻတဝ်း ယွုမ်းယွုမ်းမတ်မတ် ယုံႏကေႏမုꩻကအဝ်ႏဒါႏလိုꩻနဝ်ꩻ အထာꩻမာꩻအထာꩻခွုမ်နဝ်ꩻ ဟဝ်ဒျာႏ၊ သေႏချာႏဒျာႏ၊ ဆဲစ်နဲစ်တဲပ်တဲ့ဒျာႏ၊ ယွုမ်းယွုမ်းမတ်မတ် သဒ္ဓါႏတရာꩻ တအဝ်ႏတဝ်းလိုꩻနဝ်ꩻ ထာꩻခွုမ်ထာꩻမာꩻလဲ့ သေႏချာႏတဝ်း၊ ဆဲစ်နဲစ်တဝ်း၊ တတဲပ်တဲ့တဝ်း၊ တဟဝ်တဝ်းနဝ်ꩻပီဝင်ꩻ၊ ကွပ်နဝ်ꩻမꩻ သဒ္ဓါႏတရာꩻမီႏဟဝ်နဝ်ꩻ ဘဝယိုခါလဲ့ဟဝ်၊ ဘဝဇာတ်ငါလဲ့ဟဝ်နော။

ကျောင်ꩻကာႏ-ဘုရာꩻကာႏ[မွဉ်းဖျင် | မွဉ်းဖျင်အရွီးခိုႏ]

လိုꩻယဟန်ႏနဝ်ꩻ လꩻထွူကျောင်ꩻတကာႏ၊ ဘုရာꩻတကာႏအမိဉ်ꩻတဲင် ထွားချာတဝ်းအကျောင်ꩻ၊ ပျုပျင်ႏချာတဝ်း အဘုရာꩻတဲင် ယိုခါကထီႏဗာႏ ကျောင်ꩻမုဲင်ꩻကျောင်ꩻမုဲꩻတဲ့နဝ်ꩻ၊ ဘုရာꩻကျောင်ꩻဖုံႏတဲ့နဝ်ꩻ အွဉ်ႏခင်ႏလမ်းငါတဲ့ တအဲဉ်ထဝ်း၊ အဘုရာꩻကျောင်ꩻလဲ့ ဟံႏဖွန်ႏတဗော့ꩻလီးတဗော့ꩻလဲ့ꩻ၊ အဘုရာꩻပလ္လင်ႏဆလနဝ်ꩻလဲ့ ယူးအေႏ ညောဝ်ႏအေႏ အဝ်ႏလော်လယ်ႏ၊ အမောက်နမ်းထီဖွိုင်ꩻဘုရာꩻနဝ်ꩻလဲ့ ထီကဝ်ႏအဝ်ႏသဲင်သင်၊ ကအွဉ်ႏဒါႏ ဘုရာꩻပိတ်တံႏနဝ်ꩻလဲ့ သုမ်ဖြေင်စွေး တဗော့ꩻဖြေင်းကရစ်ꩻ၊ ထွာတောဒျာႏ ယူးညောဝ်ႏ ခြေင်းလော်သော့ꩻဝင်ꩻခင်ႏလမ်း၊ မွူးခေ့ꩻခိုႏ မေႏတေန်ꩻမဉ်ႏတပါတဝ်းခါ လွေသော့ꩻပလဲင်ꩻငမ်းသꩻ၊ လိုꩻပေႏခွိုꩻခွိုꩻသꩻဝꩻတွုန်း၊ ယဝ်ꩻထိုꩻနဝ်ꩻလဲ့အဝ်ႏ၊ ကွပ်ဘုရာꩻအာ၊ ယူႏစဉ္စာꩻဒွါႏလုဲင်း၊ ဘုရာꩻကျောင်ꩻတကာႏ ဝင်ꩻအီႏဝုဲင်ႏသီဘုရာꩻနဝ်ꩻ စေႏတနာႏတဗွာတဝ်း၊ သꩻယူႏတဖွောင်း ထိုꩻကွင်ကယ်ထဲင်း၊ ထင်းတောဒွါႏ ထာꩻလော်လယ်၊ သꩻဖေါက်ပြန်ႏ မနော်ကံႏအပဲစ်အဝ်ႏတေင်အီ၊ ဝစီကံႏအအပဲစ် အဝ်ႏတွိုးဒင်ႏ၊ ကွဲညည ကာယကံႏနဝ်ꩻ တွိုႏလွဉ်ꩻပါ၊ တွမ်ႏလူႏပုဲင်ႏဒွုမ်ဘုရာꩻလဲ့ ဟော်ꩻမလꩻ၊ အလူႏနွိုင်ႏနွိုင်ႏဒျာႏတဲင် ဘုရာꩻကွဲအာအာ၊ ဘုရာꩻလီꩻနဝ်ꩻ ခင်ႏလမ်းကွဲခြောခြော၊ ထေထန်ႏတောတော လွꩻအွဉ်ႏထမ်းဖူꩻကို၊ သင်္ဂြိုဟ်ႏသော့ꩻမေႏကိုလဲ့ အဝ်ႏပြုံႏပြင်ႏ၊ ဗွေႏဗွန်ဆရာႏပျုပျင်ႏလဲ့ မလွောက်ꩻနာႏ၊ ဗုဒ္ဓဘာႏသာႏ ကိုꩻကွယ်ႏထွာတောထာꩻဖွီဖုဲ၊ အမျိုꩻဘာႏသာႏ အယူႏကွဲဆေ့ꩻဆေ့ꩻ၊ သာႏသနာႏကွဲခေ့ꩻခေ့ꩻ ဆုတ်ယုတ်လွဉ်၊ ကွပ်စွဉ်ႏစေႏတနာႏ တစွို့ꩻတဝ်း တဖူꩻကွင်နဝ်ꩻမꩻ ထွာဗာႏနုဲင်းနဝ်ꩻထွူနော။ ကိုꩻကွယ်ႏဘုရာꩻအမျိုꩻနဝ်ꩻ ဗုဒ္ဓဘာႏသာႏမန်ႏသမျ ရိုႏသေႏဝုဲင်ႏကန်းတော့ꩻစွုမ်ႏဖြာꩻဖြာꩻတဲင် ပျုပျင်ႏဗာႏကြောင်းကြောင်းနော၊ လောကယိုငခါ နီလိုꩻသီးသဖော်ꩻနဝ်ꩻ အဟဝ်မꩻကျွိုက်၊ ကြောင်းစင်မꩻနစ်သက်နော။ ဥပမာႏ-လိုတဖြာꩻနဝ်ꩻ ထီလဲ့တလူးတဝ်း၊ ကလူꩻလဲ့ အဗွေႏတသုတ်သင်ႏတဝ်း၊ တခွတ်ꩻတဝ်း၊ အစူမီႏနဝ်ꩻလဲ့ ဆွာꩻနုဲင်းတိရစ္ဆာန်ႏစူမီႏ၊ အဖြောင်းနဝ်ꩻလဲ့ တဗော့ꩻလဲ့ꩻ၊ အတငါအေႏဒွုန်၊ အဆဲင်ꩻကွဉ်ꩻနဝ်ꩻလဲ့ ခြူႏခြီႏထုမ်း၊ ကတူႏပေါက်နဝ်ꩻလဲ့ တနျာႏတွတ်ꩻ၊ အခင်ႏခိုႏ အစူခိုႏနဝ်ꩻလဲ့ ခြူႏခြီႏအဝ်ႏပဉ်ကြပ်ꩻကြပ်ꩻ၊ လိုꩻနုဲင်းနဝ်ꩻခါ အရွဉ်လွိုင်ႏ ဥစ္စာႏအာ ပစ္စေꩻပြန်ꩻပြော်ꩻစွဉ်ႏလဲ့ ပါꩻမုဲင်ꩻအီႏအုံဗော့ꩻ၊ ပါꩻမုဲꩻအီႏမက်ꩻဖက်၊ ပါꩻမုဲꩻအီႏအုံညီꩻ၊ ပါꩻမုဲꩻအီႏမာꩻသွꩻ၊ ပါꩻရိုꩻဒျာႏ"လိုꩻဗား"၊ ပါꩻရိုꩻဒျာႏ "သွီႏတစွို့ꩻ"တဝ်းတဲင် ပါꩻထိုꩻညာꩻဒျာႏ၊ ပါꩻအုံခေါ်ဒျာႏနဝ်ꩻသွူ။ အပီနုဲင်းနဝ်ꩻနေနေ။ နီဗွေႏဘုရာꩻယိုနဝ်ꩻ လိုꩻလူꩻဗြဟ္မာႏ သတ္တဝါႏဖုံႏအတွက် အသွီႏသေ့ꩻသေ့ꩻ အယာႏသဲင်သဲင် အာႏရဲင်ꩻလို့လို့ အွဉ်ႏသꩻခွေါင်င်တိဉ်ႏတိဉ်ႏတဲင် လစ်ꩻသင်္ချေႏပုဲင် ကမ္ဘာႏတသဲဉ် ဖြဲ့ꩻလွဉ်ဗာႏပါႏရမီႏအပါꩻတဆီထွူနဝ်ꩻမꩻ တွမ်ႏဘုရာꩻဂုဏ်ႏတောႏကွတ်ꩻပါꩻ ပြဲ့ꩻစုံႏတဲင် ထွာလွဉ်ဗာႏဘုရာꩻထွူ။ ကွပ်နဝ်ꩻမꩻ တွမ်ႏဂုဏ်ႏတောႏကွတ်ꩻပါꩻ ကပြဲ့ꩻစုံႏဒါႏ နီဗုဒ္ဓဘာႏသာႏ အထူꩻအမျတ် နီဗွေႏဘုရာꩻယိုနဝ်ꩻ နီမီႏအွဉ်ႏတဗော့ꩻ၊ နီမဉ်ႏတပျုပျင်ႏတဝ်း ကြောင်းကြောင်းနဝ်ꩻခါ ဝုဲင်ႏရိုႏသေႏဗာႏလဲ့ စေႏတနာႏတအဝ်ႏတဝ်း၊ သꩻသဒ္ဓါႏတရာꩻအဝ်ႏတဝ်းနဝ်ꩻသွူ။ ကွပ်နဝ်ꩻမꩻ နီဗွေႏဘုရာꩻကိုႏစာꩻ ရုပ်ထုတောႏယိုနဝ်ꩻ ဝင်ꩻမီႏဝုဲင်ႏရိုႏသေႏဗာႏလဲ့ စေႏတနာႏသဒ္ဓါႏတရာꩻ ယံကထွာ၊ ဝင်ꩻမဉ်ႏထီႏငါလဲ့ ဝင်ꩻမဉ်ဝုဲႏကန်းတော့ꩻ ယံကထွာနဝ်ꩻ ဘုရာꩻပလ္လင်ႏနဝ်ꩻလဲ့ ဖျိုးကြောင်းကြောင်း၊ ပလ္လင်ႏဆလခါလဲ့ ဖျိုးစင်စင်၊ ဘုရာꩻမဲ့ငါတောႏဆငါနဝ်ꩻလဲ့ ပျုပျင်ႏသျင်ꩻသျင်ꩻ၊ ကဝ်ႏဖွိုင်ꩻဘုရာꩻမောက်နမ်းနဝ်ꩻလဲ့ ကဝ်ႏတွမ်ႏနွူႏပုဲႏ၊ ကဝ်ႏတုဲကဝ်ႏစော့ꩻနဝ်ꩻ ဖေႏကအဝ်ႏသိဉ်သေႏသေႏဗာႏ၊ ဘုရာꩻပိတ်တံႏနဝ်ꩻလဲ့ ပဆျူႏဗွာဗွာ၊ နဝ်ꩻမꩻလဲ့ ဝင်ꩻမီႏထီႏ ဝင်ꩻကေညိုႏစေႏတနာႏတိုꩻပွာꩻ သဒ္ဓါႏတရာꩻဗွာစင်တဲင် ကဝုဲင်ႏဗာႏသားလဲ့ ကုသိုလ်ႏအာ၊ ကလူႏဗာႏဘုရာꩻသား ဘုရာꩻတကာႏနဝ်ꩻလဲ့ ကုသိုလ်ႏပွာꩻနဝ်ꩻသွူ။ ကွပ်နဝ်ꩻမꩻ ဘုရာꩻတကာႏ ကျောင်ꩻတကာႏသားနဝ်ꩻ လာဗွေနီꩻတလဲင်ႏ လာသွစ်ꩻနီꩻတလဲင်ႏ လာမားနီတလဲင်ႏ ထင်ႏကျောင်ꩻတဲင် ဖျိုးပျုပျင်ႏကြောင်းကြောင်း၊ ဖွစ်ꩻဖျိုးစင်စင်ကျောင်ꩻ၊ နိလိုꩻမျိုꩻနဝ်ꩻ လိုꩻမျိုꩻဖြီႏဖြီႏ၊ တလာလစ်ꩻသတင်ꩻ ကုသိုလ်ႏထာꩻမာꩻနဝ်ꩻ ဟဝ်ကျိုꩻလꩻလꩻနဝ်ꩻသွူနော။ "ယိုတစားလဲ့ ဟဝ်သတိꩻငါႏဝင်ꩻနော" နီပအိုဝ်ႏခြာနဝ်ꩻ ဗွေႏဗွန်တွမ်ႏတကာႏ ဝါႏသနာႏတဲႏငါႏဘုရာꩻ၊ တယ်ႏဘုရာꩻသီးအမျိုꩻယိုနဝ်ꩻ လိုꩻအမျာꩻမီႏထီႏတဲင် ကေႏညိုႏမုꩻစေႏတနာႏ ယံကထွာနဝ်ꩻ ဟဝ်တယ်ႏ တင်ႏတင်ႏတယ်ႏတယ်ႏငါႏနော၊ တယ်ႏထွူဘုရာꩻစေႏတီႏတဲင် တပျုပျင်ႏတဝ်း၊ ထွန်လဲ့တသူႏတဝ်း၊ တန်ꩻတွိုင်ꩻလဲ့တတယ်ႏတဝ်း၊ ဘုရာꩻတလင်ꩻလဲ့ တသုတ်သင်ႏဖျိုးစင်တဝ်း၊ ထွာတောဒွါႏ ဖိုးတကြက်ꩻ ပနားကြက်နဝ်ꩻ ကေႏညိုႏမုꩻ တထွာတဝ်းနဝ်ꩻသွူ။ ယဟန်ႏနဝ်ꩻ ထွာတောဝစီအပဲစ် မနော်ကံႏအပဲစ်နဝ်ꩻ အဝ်ႏထီႏဗာႏ အဝ်ႏဟွုန်ဗာႏ၊ ဘုရာꩻခါႏကိုနဝ်ꩻ ထွာဒျာႏ ဖိုးပနားအေႏဖုံႏတဲင် တယ်ႏဘုရာꩻနဝ်ꩻ ကုသိုလ်ႏအီႏလꩻနဝ်ꩻ တွမ်ႏရိုꩻပုဲႏ ထွာထဲင်းအပဲစ် နဝ်ꩻသွူ။ ကွပ်နဝ်ꩻမꩻ တယ်ႏဘုရာꩻစေႏတီႏယိုနဝ်ꩻ တယ်ႏတင်ႏတင်ႏတယ်ႏတယ်ႏတဲင် စေႏတီႏအခင်ႏထျꩻ တဖဲ့ꩻနီသွံလစ်ꩻသောင်ꩻအခါႏကိုနဝ်ꩻ လောႏသေꩻခါꩻစွဉ်ႏ အင်ꩻကွန်ကရစ်တဲင် အင်ꩻကွန်ကရိစ်အထန်ႏဖဲ့ꩻနဝ်ꩻ တယ်ႏသေꩻခါꩻတွမ်ႏတန်ꩻတွိုင်ꩻ အထိုနီသောင်ꩻ၊ မီႏတယ်ႏသေꩻခါꩻဒါႏနဝ်ꩻ ယိန်းဟဝ်နော၊ မီႏတယ်ႏသေꩻခါꩻနုဲင်းနဝ်ꩻမꩻ ဖိုးပနားနွို့တလꩻတဝ်း၊ လိုꩻကဝုဲင်ႏဗာႏသားရိုꩻလဲ့ အုံဗာႏကြောင်းကြောင်းတဲင် သꩻသဒ္ဓါႏစေႏတနာႏဗွာစင်၊ ကုသိုလ်ႏလဲ့တိုꩻပွာꩻသွူ။ တံꩻတွိုင်ꩻအထန်ႏဖဲ့ꩻ ဘုရာꩻတလင်ꩻ အထျꩻအသောင်နဝ်ꩻလဲ့ ထာꩻအီႏထာꩻစျꩻ ယံအဝ်ႏပုဲႏနဝ်ꩻ သုတ်သင်ႏဖျိုးစင်စင်တဲင် အဝ်ႏမွူးကဝ်ႏတုဲလဲ့ ဆို့ꩻသေꩻခါꩻသေႏသေႏချာႏချာႏ၊ တနေင်ႏတလဲင်ႏ ဘုရာꩻထွန်သူႏဗွာဗွာ ကေႏညိုႏစရာႏ ဖေႏကထွာနဝ်ꩻသွူ။ ကတယ်ႏဘုရာꩻ နေင်ႏလာမွူးနီꩻနဝ်ꩻလဲ့ အထိန်ꩻအမတ်ယံကသေဗာႏနဝ်ꩻ ဘုရာꩻကမ္ပယ်ႏနဝ်ꩻလဲ့ လုံးပျာႏလောင်းတဲ့ဒါႏ၊ တောင်ꩻပျာꩻလောင်းလဲ့ဒါႏ ဟဝ်တဲမ်းသေꩻခါꩻငါႏ တဲးတဲးဝါးဝါးနဝ်ꩻသွူ။ ကတဲမ်းကမတ်သေꩻခါꩻနဝ်ꩻလဲ့ တဲမ်းစွဉ်ႏဒျာႏ နီပအိုဝ်ႏလိတ်၊ နီပအိုဝ်ႏဘာႏသာႏနဝ်ꩻ တွိုႏဆုဲင်ꩻချာ ရာႏဇဝင်ႏ ထိုꩻမားဗာႏတဝ်းနဝ်ꩻသွူ။ မဉ်ႏတဲမ်းတွမ်ႏနီပအိုဝ်ႏလိတ်ဘာႏသာႏနဝ်ꩻ နီပအိုဝ်ႏလိတ်လုဲင်ꩻလဲ့ထင်ႏထို၊ နီပအိုဝ်ႏဘာႏသာႏလဲ့ တကုဲင်ဗာႏတဝ်း၊ နီပအိုဝ်ႏလိုꩻမျိုꩻလဲ့ ထင်ႏသျာꩻဒျာႏ၊ ယဟန်ႏနဝ်ꩻ တဲမ်းသေꩻခါꩻဒျာႏ မန်းလိတ်မန်းဘာႏသာႏ၊ ကတဲမ်းတွမ်ႏမန်းလိတ်မန်းဘာႏသာႏနဝ်ꩻ လိတ်ဖြုံႏလဲ့တမဲဉ်ႏတဝ်း၊ ငဝ်းလွေꩻငဝ်းသဲင်ꩻတရော့ꩻတဝ်းတဲင် မန်းကထင်ႏထီႏနဝ်ꩻခါ မန်းငတေ့ꩻစွဉ်ႏထာꩻနဝ်ꩻသွူ။ တဒါႏတဝ်းမန်းလိတ်လဲ့ တဲမ်းနွိုင်ႏမန်းလိတ်တဲင် ထွာနုဲင်းနဝ်ꩻထွူတကာႏတဝ်း တွိုႏဆုဲင်ꩻချာ မန်းရိုꩻတောဒျာႏ မန်းတယ်ႏဘုရာꩻသွူ။ ကွပ်နဝ်ꩻမꩻ လိတ်ကမ္ပယ်ႏနဝ်ꩻ တဲမ်းဒင်ႏတွမ်ႏနီပအိုဝ်ႏလိတ်၊ တဲမ်းတွမ်ႏနီပအိုဝ်ႏဘာႏသာႏနဝ်ꩻဟဝ်ငါႏသွူနော။[၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. လိတ်တမွန်ႏစောင်ႏ
  2. စင်ꩻတန်ဓမ္မသာမိ