ပုဂ္ဂိုလ်ႏအုံကွံထွိုက်ထွိုက်တဝ်း

"ကထာဝတ္ထုသုတ် (ပုဂ္ဂိုလ်ႏအုံကွံထွိုက်၊ ပုဂ္ဂိုလ်ႏအုံကွံထွိုက်တဝ်း)" (က) အွိုးခꩻတလဲင်ႏ- နီဗွေႏဘုရာꩻဟော်ꩻဖေႏ ဗွေႏရဟန်ꩻသီးဖုံႏတရာꩻနုဲင်းယို- "ရဟန်ꩻသီးဖုံႏဟွေး- 'ပုဂ္ဂိုလ်ႏယိုနဝ်ꩻ ဟောဝ်အုံကွံထွိုက်၊ ဟောဝ်ဆွေꩻနွေꩻတွိုင်ႏပင်ႏထွိုက်၊ ပုဂ္ဂိုလ်ႏယိုနဝ်ꩻ ဟောဝ်အုံကွံထွိုက်တဝ်း၊ ဟောဝ်ဆွေꩻနွေꩻတွိုင်ႏပင်ႏထွိုက်တဝ်း'အဝ်ႏလိုႏသေနုဲင်းနဝ်ꩻ။ ရဟန်ꩻသီးဖုံႏဟွေး- ရီဝွေꩻ (ပျဿနာႏ)တဲင် ကအဝ်ႏလိုႏဖြေႏစွဉ်ႏစွဉ်ႏ၊ ဒေါ့ꩻစွဉ်ႏစွဉ်ႏ ပျဿနာႏမျိုꩻနဝ်ꩻ အမဉ်ႏတဖြေႏစွဉ်ႏစွဉ်ႏတဝ်း (ကြဲစ်ချာ၊ ကြဲစ်ငါထာꩻ)တဲ့နဝ်ꩻ၊ ကအဝ်ႏလိုႏဝွေႏဖန်ႏနယ်နေး ပျဿနာႏမျိုꩻနဝ်ꩻ အမဉ်ႏတဝွေႏဖန်ႏနယ်တဝ်းတဲ့နဝ်ꩻ၊ ကအဝ်ႏလိုႏရီချာ ပျဿနာႏမျိုꩻနဝ်ꩻ အမဉ်ႏတရီချာတဝ်းတဲ့နဝ်ꩻ၊ အမျိုꩻကလိုႏ အွဉ်ႏယေန်ထိုꩻဒါႏ ပျဿနာႏမျိုꩻနဝ်ꩻ အမဉ်ႏတအွဉ်ႏယေန်ထိုꩻတဝ်းတဲ့နဝ်ꩻ၊ ပေါႏထွာနုဲင်းနဝ်ꩻနဝ်ꩻ ပုဂ္ဂိုလ်ႏနဝ်ꩻနဝ်ꩻ ဟောဝ်အုံကွံထွိုက်တဝ်း၊ ဟောဝ်ဆွေꩻနွေꩻတွိုင်ႏပင်ႏထွိုက်တဝ်းနောဝ်ꩻသွူ။ ရဟန်ꩻသီးဖုံႏဟွေး- ရီဝွေꩻ (ပျဿနာႏ)တဲင် ကအဝ်ႏလိုႏဖြေႏစွဉ်ႏစွဉ်ႏ၊ ဒေါ့ꩻစွဉ်ႏစွဉ်ႏ ပျဿနာႏမျိုꩻနဝ်ꩻ အဖြေႏစွဉ်ႏစွဉ်ႏ၊ အဒေါ့ꩻစွဉ်ႏစွဉ်ႏဒျာႏ (ကြဲစ်ချာ၊ ကြဲစ်ငါတဝ်းထာꩻ)၊ ကအဝ်ႏလိုႏဝွေႏဖန်ႏနေး ပျဿနာႏမျိုꩻနဝ်ꩻ အဝွေႏဖန်ႏနယ်ဒျာႏ၊ ကအဝ်ႏလိုႏရီချာ ပျဿနာႏမျိုꩻနဝ်ꩻ အရီချာဒျာႏ၊ အမျိုꩻကလိုႏ အွဉ်ႏယေန်ထိုꩻပျဿနာႏမျိုꩻနဝ်ꩻ အအွဉ်ႏယေန်ထိုꩻဒျာႏ၊ ပေါႏထွာနုဲင်းနဝ်ꩻနဝ်ꩻ၊ ပုဂ္ဂိုလ်ႏနဝ်ꩻနဝ်ꩻ ဟောဝ်အုံကွံထွိုက်ဒျာႏ၊ ဟောဝ်ဆွေꩻနွေꩻတွိုင်ႏပင်ႏထွိုက်ဒျာႏနောဝ်ꩻသွူ။ ရဟန်ꩻသီးဖုံႏဟွေး- ရီဝွေꩻ(ပျဿနာႏ)တဲင် အဝ်ႏမွေးအဝ်ႏမဲဉ်ႏသွူတဲ့ အမဉ်ႏတစူꩻတဝ်း (အမဉ်ႏတလက္ခံႏတဝ်း)တဲ့နဝ်ꩻ၊ အမဉ်ႏကျံႏဒေါ့ꩻလင်တောထာꩻတဲ့နဝ်ꩻ၊ ဝွေꩻအဝ်ႏသေသေထသွူတဲ့ အမဉ်ႏတစူꩻတဝ်း၊ (အမဉ်ႏတလက္ခံႏတဝ်း)တဲ့နဝ်ꩻ၊ ကဖြေႏသား ကျင်ꩻဝွတ်(စီꩻကန်ꩻ)အတွိုင်ꩻ မဉ်ႏတလွောက်ꩻနာႏတဝ်းတဲ့နဝ်ꩻ၊ မဉ်ႏထွာနုဲင်းနဝ်ꩻနဝ်ꩻ၊ ပုဂ္ဂိုလ်ႏနဝ်ꩻနဝ်ꩻ ဟောဝ်အုံကွံထွိုက်တဝ်း၊ ဟောဝ်ဆွေꩻနွေꩻတွိုင်ႏပင်ႏ ထွိုက်တဝ်းနောဝ်ꩻသွူ။ ရဟန်ꩻသီးဖုံႏဟွေး- ရီဝွေꩻ(ပျဿနာႏ)တဲင် ပေါႏအမွေးအမဲဉ်ႏနဝ်ꩻ စူꩻဒျာႏ (လက္ခံႏဒျာႏ)၊ ကျံႏဒေါ့ꩻလင်တဝ်းထာꩻ၊ ပေါႏအဝ်ႏသေသေနဝ်ꩻ စူꩻဒျာႏ(လက္ခံႏဒျာႏ)၊ လွောက်ꩻနာႏဒျာႏ ကဖြေႏသား ကျင်ꩻဝွတ်အတွိုင်ꩻ (စီꩻကန်ꩻအတွိုင်ꩻ) ပေါႏထွာနုဲင်းနဝ်ꩻနဝ်ꩻ ဟောဝ်အုံကွံထွိုက်ဒျာႏ၊ ဟောဝ်ဆွေꩻနွေꩻတွိုင်ႏပင်ႏထွိုက်ဒျာႏနောဝ်ꩻသွူ။ ရဟန်ꩻသီးဖုံႏဟွေး- ရီဝွေꩻ(ပျဿနာႏ)တဲင် ငေါဝ်းတငွါတွမ်ႏတငွါ ဝွေꩻအွဉ်ႏတဗစ်ꩻထိုꩻ၊ နေးတွမ်ႏတဆဲင်ႏတဝ်း ငေါဝ်းလင်တဲင် ဝွေꩻပယ်ႏထိုꩻ၊ အသꩻလျားနယ်စွဉ်ႏ၊ အသꩻထန်ႏနယ်စွဉ်ႏ၊ အကျွိုက်တဝ်းမွေးစွဉ်ႏ၊ ပေါႏထွာနုဲင်းနောဝ်ꩻနောဝ်ꩻ၊ ပုဂ္ဂိုလ်ႏနဝ်ꩻနဝ်ꩻ ဟောဝ်အုံကွံထွိုက်တဝ်း၊ ဟောဝ်ဆွေꩻနွေꩻတွိုင်ႏပင်ႏထွိုက်တောဝ်းနောဝ်ꩻသွူ။ (ခ) ရဟန်ꩻသီးဖုံႏဟွေး- ရီဝွေꩻ(ပျဿနာႏ)တဲင် ငေါဝ်းတငွါတွမ်ႏတငွါ ဝွေꩻအွဉ်ႏတဗစ်ꩻထိုꩻတဝ်း၊ နေးတွမ်ႏတဆဲင်ႏတောဝ်း ငေါဝ်းအလင်တဲင် ဝွေꩻတပယ်ႏထိုꩻတဝ်း၊ သꩻလျားတဝ်း၊ သꩻထန်ႏတဝ်း၊ ကျွိုက်မွေးဒျာႏ၊ ပေါႏထွာနုဲင်းနဝ်ꩻနဝ်ꩻ ပုဂ္ဂိုလ်ႏနဝ်ꩻနဝ်ꩻ ဟောဝ်အုံကွံထွိုက်ဒျာႏ၊ ဟောဝ်ဆွေꩻနွေꩻတွိုင်ႏပင်ႏထွိုက်ဒျာႏနောဝ်ꩻသွူ။ ရဟန်ꩻသီးဖုံႏဟွေး- ရီဝွေꩻ(ပျဿနာႏ)တဲင် ဝွေꩻရွစ်နယ်ပါဠိယို ပါဠိနဝ်ꩻတွော့ꩻ ဖေႏဒေါ့ꩻချာတဝ်းဝင်ꩻ၊ အံႏနွောင်ꩻဝင်ꩻ၊ အကျောင်ꩻပျꩻယို အကျောင်ꩻပျꩻနဝ်ꩻ၊ ထောက်နယ်ဠို ထောက်နယ်နဝ်ꩻတွော့ꩻ ဖေႏဒေါ့ꩻချာတဝ်း၊ အံႏနွောင်ꩻဝင်ꩻ၊ ထီႏဖွီကရီသား၊ ကရီသားသꩻကို သံသယဖေႏကထွာတွော့ꩻ သေန်ႏစွဉ်ႏထာꩻတယွို့၊ ငဖါးတောထာꩻ၊ ငဗားတောထာꩻ၊ ဆွမ်ꩻဝင်ꩻငေါဝ်းမာႏ တငွါတွော့ꩻ ဒေါ့ꩻနွောင်ꩻအီတောထာꩻ၊ ပေါႏထွာနုဲင်းနဝ်ꩻနဝ်ꩻ ပုဂ္ဂိုလ်ႏနဝ်ꩻနဝ်ꩻ ဟောဝ်အုံကွံထွိုက်တဝ်း၊ ဟောဝ်ဆွေꩻနွေꩻတွိုင်ႏပင်ႏထွိုက်တောဝ်းနောဝ်ꩻသွူ။ ရဟန်ꩻသီးဖုံႏဟွေး- ရီဝွေꩻ(ပျဿနာႏ)တဲင် ဝွေꩻရွစ်နယ်ပါဠိယို၊ ပါဠိနဝ်ꩻတဲ့ယဝ်း ဖေႏဒေါ့ꩻချာဒျာႏ၊ အံႏနွောင်ꩻတောဝ်းဝင်ꩻ၊ အကျောင်ꩻပျꩻယို အကျောင်ꩻပျꩻနဝ်ꩻ၊ ထောက်နယ်ယို ထောက်နယ်နဝ်ꩻတဲ့ယဝ်း၊ ဖေႏဒေါ့ꩻချာဒျာႏ၊ အံႏနွောင်ꩻတဝ်းဝင်ꩻ၊ ထီႏဖွီတဝ်းကရီသား၊ ကရီသားသꩻကို သံသယဖေႏကထွာတဲ့ မာꩻတဝ်း၊ ငဖါးတဝ်း၊ ငဗားတဝ်းထာꩻ၊ ဆွမ်ꩻဝင်ꩻငေါဝ်းမာႏပေႏ တငွါတွော့ꩻ ဒေါ့ꩻနွောင်ꩻအီတဝ်းထာꩻ၊ ပေါႏထွာနုဲင်းနဝ်ꩻနဝ်ꩻ၊ ပုဂ္ဂိုလ်ႏနဝ်ꩻနဝ်ꩻ ဟောဝ်အုံကွံထွိုက်ဒျာႏ၊ ဟောဝ်ဆွေꩻနွေꩻတွိုင်ႏပင်ႏထွိုက်ဒျာႏနောဝ်ꩻသွူ။ ရဟန်ꩻသီးဖုံႏဟွေး- နေးတွမ်ႏငေါဝ်းအုံကွံတဲင် မဉ်ႏအုံကွံစံꩻ၊ မဉ်ႏဆွေꩻနွေꩻတွိုင်ႏပင်ႏစံꩻနဝ်ꩻ 'ဝွေꩻသꩻဝင်ႏစာꩻဟောင်း၊ ဝွေꩻသꩻဝင်ႏစာꩻတောဝ်းဟောင်း'နဝ်ꩻ သေဗာႏ၊ ပေါႏဝွေꩻနာႏတောဝ်းနဝ်ꩻ အသꩻဝင်ႏစာꩻတဝ်း၊ ပေါႏဝွေꩻနာႏဒျာႏနောဝ်ꩻ အသꩻဝင်ႏစာꩻ သေဗာႏနုဲင်းနောဝ်ꩻသွူ။ ရဟန်ꩻသီးဖုံႏဟွေး- ခြုဲင်းစဲင်းစဲင်းဖေႏ တရာꩻတဲင် လိုꩻသꩻကဝင်ႏစာꩻသားနဝ်ꩻ နေးတွမ်ႏဉာဏ်ႏ ဝွေႏဖန်ႏဒါႏ၊ သေတရာꩻတဲင် ပယ်ႏထိုꩻအကုသိုလ်ႏ၊ ခန္ဓာႏယိုနဝ်ꩻ ဒုက္ခ(သစ္စာႏ)အမွေးအမဲဉ်ႏတဲ့ သေလွဉ်၊ ကဒုက္ခဗာႏယိုနဝ်ꩻ ကွပ်လောဘတဏှာႏ (သမုဒယသစ္စာႏ) အမွေးအမဲဉ်ႏတဲ့ သေလွဉ်၊ ခန္ဓာႏဖေ့ငီမ်ꩻ၊ မဉ်ႏသီမ်ꩻနွောင်ꩻရုပ်နာမ်ႏနဝ်ꩻ ထွာနိရောဓသစ္စာႏ၊ ဒုက္ခကားကအဝ်ႏဖေ့လို့၊ လꩻနိဗ္ဗာန်ႏ-နုဲင်းနဝ်ꩻတဲ့ သေလွဉ်၊ ဖေႏကလꩻနိဗ္ဗာန်ႏနဝ်ꩻ နေးတွမ်ႏမဂ္ဂသစ္စာႏ၊ နေးတွမ်ႏမဂ္ဂင်ႏတရာꩻသွစ်ꩻပါꩻ အားထွုတ်ဗာႏတရာꩻနုဲင်းနဝ်ꩻတဲ့ သေလွဉ်။ ရဟန်ꩻသီးဖုံႏဟွေး- ဖေႏနေးကလသေလွဉ် 'ဒုက္ခသစ္စာႏ၊ သမုဒယသစ္စာႏ၊ နိရောဓသစ္စာႏ၊ မဂ္ဂသစ္စာႏ' ဖေႏနေးကသေလွဉ် သစ္စာႏတရာꩻဘို၊ ဖေႏကလꩻ အရဟတ္တဖိုလ်ႏ၊ ဖေႏကထွာနွောင်ꩻ ရဟန္တာႏပုဂ္ဂိုလ်ႏတဲင် အုံကွံဗာႏလို့ဝင်ꩻ၊ ဆွေꩻနွေꩻတွိုင်ႏပင်ႏဗာႏလို့ဝင်ꩻ၊ သꩻဝင်ႏဝင်ႏစာꩻစာꩻ အုံကွံလို့ဝင်ꩻတရာꩻနဝ်ꩻ အကျိုꩻအဝ်ႏ 'လꩻအရဟတ္တဖိုလ်ႏ-ထွာနွောင်ꩻရဟန္တာႏပုဂ္ဂိုလ်ႏ'နောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ တိကနိပါတ်၊ ကထာဝတ္ထုသုတ်)