ပုဏ္ဏာꩻပိုမူႏအာ အဖါခိုးလျား

"ဗဟုဓီတရသုတ် (ပုဏ္ဏာꩻပိုမူႏအာ၊ အဖါခိုးလျားလွဉ်ꩻဗာႏ)"

အွိုးခꩻတလဲင်ႏ နီဗွေႏဘုရာꩻအဝ်ႏအုံ ကောသလခမ်း၊ တခြာကိုအတွင်ꩻ ပုဏ္ဏာꩻတဖြာꩻနဝ်ꩻ အဖိုးထိုꩻမား တဆီလစ်ꩻဗာႏ၊ အထိုမ်ႏလွဉ်ꩻအဖိုး၊ လွေꩻထီႏခန်း ဗွေႏဘုရာꩻ "အုံတပန်းထာꩻ၊ အွဉ်ႏတနွောင်းနမ်း၊ ဆိမ်ꩻမဲ့၊ အုံကမ္မဋ္ဌာန်ꩻ၊ စွူဖြွိုး၊ ယေန်ကတစ်ꩻ၊ ခွꩻကဒဲ့ꩻ၊ ရျူႏသျူး"နုဲင်းနဝ်ꩻတဲင် လွေꩻထေ့ဘုရာꩻ၊ ဝွေꩻရိုꩻနုဲင်းယို- ၁။ ခွေဖိုးထီးထိုꩻမား တဆီလစ်ꩻဗာႏ၊ ထွဉ်ႏခရာႏအဲဉ်ထဝ်း၊ ထိုမ်ႏဖိုးသူနီꩻလဲဉ်း၊ မော့ꩻတဝ်း၊ ရဟန်ꩻယိုနဝ်ꩻ ဖိုးထိုꩻမားတဝ်းနုဲင်းခွေမꩻ အလွိုးအုံခွꩻ အုံချမ်ꩻသာႏဗာႏထာꩻနုဲင်းယို။ ၂။ ခွေထေင်ခြံသူꩻ ထေင်မွူးသဲင်သင်လို့လဲဉ်း၊ ရဟန်ꩻယိုနဝ်ꩻ အထေင်မွူးသဲင်သင်တောဝ်း နုဲင်းခွေမꩻ အလွိုးအုံခွꩻ အုံချမ်ꩻသာႏဗာႏထာꩻနုဲင်းယို။ ၃။ ခွေဗွူတရွောင်သူꩻ ယူးဖုံႏအဲင်ႏတို၊ ရဟန်ꩻယိုနဝ်ꩻ အလွိုးယူးအဲင်ႏတိုတဝ်း အဗွူတရွောင် နုဲင်းခွေနဝ်ꩻမꩻ အလွိုးအုံခွꩻ အုံချမ်ꩻသာႏဗာႏထာꩻနုဲင်းယို။ ၄။ ခွေသဲ့ꩻထိုꩻဗာႏတဝ်းမီꩻ နွုတ်ꩻလာ၊ ယိုခါ ခွေသွို့ꩻသူꩻ လုံꩻမွေးလဲဉ်းထာꩻ၊ ရဟန်ꩻယိုနောဝ်ꩻ အသွို့ꩻလုံꩻတဝ်းနုဲင်းခွေမꩻ အလွိုးအုံခွꩻ အုံချမ်ꩻသာႏဗာႏထာꩻနုဲင်းယို။ ၅။ ခွေပိုမူႏမေႏမုဲင်း အဝ်ႏနွုတ်ꩻဖြာꩻ၊ အပိုအဝ်ႏ တဖြာꩻနီဖြာꩻလွဉ်းလွဉ်း၊ အဝ်ႏခြွဉ်းလို့ခွေထျꩻ၊ ရဟန်ꩻယိုနဝ်ꩻ အလွူးဗာႏတဝ်း အပိုလီꩻနုဲင်းခွေမꩻ အလွိုးအုံခွꩻ အုံချမ်ꩻသာႏဗာႏထာꩻနုဲင်းယို။ ၆။ ခွေမာမဲ့လွိုတ်ꩻတန်နောဝ်ꩻ ဟဲ့ꩻထွိုင်ႏခွေ ပတ်ꩻနေးတွမ်ႏအခင်ႏ စွုမ်ႏရောဝ်ꩻရောဝ်ꩻ၊ ရဟန်ꩻယိုနောဝ်ꩻ အမာပတ်ꩻထွိုင်ႏတဝ်းနုဲင်းခွေမꩻ အလွိုးအုံခွꩻ အုံချမ်ꩻသာႏဗာႏထာꩻနုဲင်းယို။ ၇။ ခွေနဝ်ꩻ မောင်ꩻတဲင်ထာꩻလေလွုမ်ꩻ "ဖေႏခန်းခွေနီးလုဲင်း၊ ဖြော်ခန်းခွေနီးဟုဲင်း"၊ ခွေကွီနာꩻကွီ၊ ရဟန်ꩻယိုနဝ်ꩻ ပါꩻလွဉ်ကွီနီးသားနုဲင်းခွေ အဲဉ်ထဝ်းမꩻ အလွိုးအုံခွꩻ အုံချမ်ꩻသာႏဗာႏထာꩻနုဲင်းယို။ "ခွေသွဉ်းလောဝ်းဖုံႏနဝ်ꩻ မွေးနေဟောင်းဗွေႏ"ဒေါ့ꩻသန်၊ ရီသန်ဗွေႏဘုရာꩻနုဲင်းနောဝ်ꩻသွူ။ "တကာႏပုဏ္ဏာꩻဟွေး- ခွေယိုနဝ်ꩻ ဖိုးတဲ့ တထိုꩻမားတဝ်း၊ ထေင်မွူးတဲ့ တသဲင်တဝ်း၊ ယူးတဲ့ တအဲင်ႏတိုတဝ်း ဗွူတရွောင်၊ သွို့ꩻတဲ့ တလုံꩻတဝ်း၊ ပိုလီꩻတဲ့ တလွူးဗာႏတဝ်း၊ မာတဲ့ တတပတ်ꩻထွိုင်ႏတဝ်း၊ နီးတဲ့ ပါꩻတကွီတဝ်းနုဲင်းနာꩻ၊ ကွပ်နဝ်ꩻမꩻ အုံခွꩻ အုံချမ်ꩻသာႏဗာႏထာꩻ နုဲင်းယိုသွူ"။ ဗွေႏဘုရာꩻရိုꩻနုဲင်းနောဝ်ꩻတဲင် ဝွေꩻတဲ့ ထင်ႏဗုဲင်ရဟန်ꩻ၊ အားထွုတ်မွေးတရာꩻ၊ ထွာစွဉ်ႏရဟန္တာႏနောဝ်ꩻသွူ။ (သုတ္တန်ႏပိဋကတ်၊ သဂါထာဝဂ္ဂသံယုတ်ပါဠိ၊ ဗဟုဓီတရသုတ်)