ပွါꩻမေတ္တာႏအကျိုꩻသွစ်ꩻမျိုꩻ
"မေတ္တာသုတ် (ပွါꩻမေတ္တာႏအကျိုꩻ သွစ်ꩻမျိုꩻ)" နီဗွေႏဘုရာꩻအဝ်ႏအုံ သာဝတ္ထိခမ်း၊ ကျောင်ꩻဇေႏတဝွန်ႏကိုအတွင်ꩻ ဟော်ꩻဖေႏရဟန်ꩻသီး မေတ္တာႏတရာꩻနုဲင်းယိုသွူ။ "ရဟန်ꩻသီးဖုံႏဟွေး- လိုꩻလင်တွမ်ႏရိုꩻမွုန်း ရန်ႏသူႏသွူတဲ့ ကရက်ပါဒါႏ သꩻမေတ္တာႏယို ထွူႏထွူႏတွုမ်တွုမ် မဉ်ႏအွဉ်ႏသေႏသေႏ၊ သꩻမေတ္တာႏယို မဉ်ႏပွါꩻမျာꩻသေႏသေႏ၊ သꩻမေတ္တာႏယို အလဲင်ႏလဲင်ႏအခြွိုက်ခြွိုက် မဉ်ႏပသာသေႏသေႏ၊ သꩻမေတ္တာႏယို လွေꩻမုဲင်ꩻကိုတဲ့ယဝ်း မဉ်ႏထိုမ်းလွေꩻသေႏသေႏ၊ သꩻမေတ္တာႏယို အုံမုဲင်ꩻကိုတဲ့ယဝ်း မဉ်ႏအုံဒင်ႏသေႏသေႏနဝ်ꩻ လꩻဗာႏအကျိုꩻသွစ်ꩻမျိုꩻ၊ အကျိုꩻသွစ်ꩻမျိုꩻကရိုꩻနဝ်ꩻ- ၁။ သုခံ သုပတိ - ဗေင်ႏဗာႏချမ်ꩻချမ်ꩻသာႏသာႏ ၂။ သုခံ ပဋိဗုဇ္ဈတိ - မဲ့သေထွိုင်ႏဗာႏ ချမ်ꩻချမ်ꩻသာႏသာႏ ၃။ န ပါပကံ သုပိနံ ပဿတိ - ဗေင်ႏမင်းတကုဲင်တောဝ်းထာꩻ ၄။ မနုဿာနံ ပိယော ဟောတိ - လိုꩻသီးဖုံႏ ရက်လွပငါပရာꩻ ၅။ အမနုဿာနံ ပိယော ဟောတိ - ဘီလူꩻခန်းတဲ့ယဝ်း ရက်ဒျာႏဝွေꩻ ၆။ ဒေဝတာ ရက္ခန္တိ - လူꩻတနံသီး အဝ်ႏကိုမ်းခါꩻဖေႏသေႏသေႏ ၇။ နာဿ အဂ္ဂိ ဝါ ဝိသံ ဝါ သတ္ထံ ဝါ ကမတိ - မေႏခိုးတဝ်း၊ အစွူႏထင်ႏတဝ်း၊ လက်နက်ဗာႏတဝ်း ၈။ ဥတ္တရိံ အပ္ပဋိဝိဇ္ဈန္တော ဗြဟ္မလောကူပကော ဟောတိ - မဉ်ႏတထွာဒွိုန်း ရဟန္တာႏတဲ့ တွိုႏဗာႏဗျဟ္မာႏခမ်း၊ ယိုသွစ်ꩻမျိုꩻသွူ။ = ယော စ မေတ္တံ ဘာဝယတိ - မဉ်ႏပွါꩻအာအာ မေတ္တာႏနဝ်ꩻ = တနု သံယောဇနာ ဟောန္တိ - သံယော်ꩻဇဉ်ႏ ဗွိုဖထိုꩻစွဉ်ႏ = ဧကမ္ပိ စေ ပါဏမဒုဋ္ဌစိတ္တော မေတ္တာယတိ - သꩻလျားတဝ်းဝင်ꩻ ခွန်နင်ꩻတဖြာꩻ၊ သတ္တဝါႏ တဗာႏဗာႏပေႏငါတဲ့ယဝ်း မဉ်ႏအွဉ်ႏမေတ္တာႏ (မဉ်ႏရက်)နဝ်ꩻ = ကုသလီ တေန ဟောတိ - ကွပ်မေတ္တာႏနဝ်ꩻတဲင် လꩻဒျာႏကုသိုလ်ႏ။ = သဗ္ဗေ စ ပါဏေ မနသာနုကမ္ပီ - မဉ်ႏအွဉ်ႏထဲင်းမေတ္တာႏ သတ္တဝါႏသီး ကားကအဝ်ႏအလောင်းမွိုင်ဟ = ဗဟူတမရိယော ကရောတိ ပုညံ - ယိန်းလꩻအာအာကုသိုလ်ႏ- မာꩻဗာႏအာအာကုသိုလ်ႏနဝ်ꩻသွူ။ = ထွားနုဲင်းရသေ့ꩻ အွဉ်ႏမေတ္တာႏ ခွန်ဟောဝ်ခွန်ဒါႏဖုံႏနဝ်ꩻ တတွိုက်ꩻတခꩻဗာႏတဝ်း အောင်ႏနွောင်ꩻလို့တဲင် ကေပ်ꩻဆေ့ꩻအခွဉ်ႏ၊ ဖေႏမဲဉ်ႏမဲဉ်ႏထွန်ႏထမ်ꩻသား လခ-လာတာ၊ ထေဖေႏလိုꩻခြော အနီꩻအရင်ꩻ၊ ဒေါ့ꩻရီအွီႏအွီႏနွိုးနွိုး ခမ်းသားထီသားနောဝ်ꩻသွူ။ = ခွန်ဟဝ်မေတ္တာႏ ကမꩻစꩻ ခမ်းသားထီသားနဝ်ꩻ တတွာလယ်ႏကွို့ꩻ သူႏတောႏကောင်ꩻသီးမေတ္တာႏ တဆီသူပွန်း-တပွန်းလွုမ်ꩻ၊ ဗွန်ပီနုဲင်း ဆာႏရောင်ႏ-တထွꩻတဝ်း လာရောင်ႏနောဝ်ꩻသွူ။ = မေတ္တာႏသားနဝ်ꩻ ဝင်ꩻတဲ့ တမာꩻသီတဝ်းဝွေꩻ၊ ဝွေꩻတဲ့ တမာꩻသီတဝ်းဝင်ꩻ၊ ဝင်ꩻတဲ့ တအံႏနွောင်ꩻတဝ်းဝွေꩻ၊ ဝွေꩻတဲ့ တအံႏနွောင်ꩻတဝ်းဝင်ꩻ၊ ခွꩻကဒဲ့ꩻ၊ သျင်ꩻကလျင်ꩻ၊ ရန်ႏသူႏ အဲဉ်ထဝ်းရင်ꩻရင်ꩻနဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ အဋ္ဌကနိပါတ်၊ မေတ္တာသုတ်)[၁][၂]