ဗြဟ္မာယုပုဏ္ဏာꩻခရာႏ

"ဗြဟ္မာယုသုတ် (ဗြဟ္မာယုပုဏ္ဏာꩻခရာႏ အအဲဉ်ႏချုပ်)" အွိုးခꩻတလဲင်ႏ- ကမဉ်ꩻဒါႏ 'ဗြဟ္မာယု'ပုဏ္ဏာꩻတဖြာꩻနဝ်ꩻ အသက်လꩻ-၁၂၀၊ လိုꩻဒါႏပညာႏတဖြာꩻ၊ မဉ်သေဘုရာꩻခရာႏတဲင် ဟဲ့ꩻလွဉ်အတပဲ့ꩻ'ခိုဗင်ႏဥတ္တရ'၊ ဖေႏတာႏဝွန်ႏနုဲင်းယို- "ယိုတပဲ့ꩻ ဥတ္တရ- ရဟန်ꩻဂေါတမသူꩻနဝ်ꩻ ဗွေတွမ်ႏဂွုဏ်ႏတောႏကွတ်ꩻပါꩻတဲ့၊ ဟော်ꩻတရာꩻတဲ့ ယံမွေးစွဉ်ႏထာꩻတဲ့၊ အမဉ်ꩻကျောႏမွေးစွဉ်ႏထာꩻ၊ အမဉ်ꩻကကျောႏထာꩻသူꩻနဝ်ꩻ အကျောႏမွေးဒျာႏ တွမ်ႏဂွုဏ်ႏအင်္ဂါႏ လက္ခဏာႏနဲ့၊ ဝါလွော်တွော့ꩻ ကျောႏလဲဉ်လယ်ႏကွို့ꩻထာꩻနဲ့၊ စဲင်းစဲ့ယံကသေ၊ နာꩻထွေလွဉ်ꩻ၊ နေးတွမ်ႏနီပေႏတင်ႏ (ဒေဝ)ကျမ်ꩻအလꩻ 'လိုꩻခိုမျတ်အင်္ဂါႏ သွံဆီနီပါꩻ'ဗွေနဲ့-ဗွေတဝ်းနဲ့ စတဲင်နုဲင်းနဝ်ꩻတဲင် ထောင်လွဉ်ꩻ-ထွားတေ့ꩻသွော့နော" "မွေးသွူ- ဆရာႏဖြား၊ မဲ့ꩻခွေထောင်ထွားလွဉ်ꩻဒျာႏ" ဥတ္တရ အာႏမခံႏနုဲင်းနဝ်ꩻထွူခါ ထောင်လွဉ်ꩻနီဗွေႏဘုရာꩻဆချာ ညစွဉ်ႏနွုတ်ꩻလာနောဝ်ꩻသွူ။ ထောင်ထွားလွဉ်ꩻ ဗွေႏဘုရာꩻနွုတ်ꩻထာထွူ သဲင်ꩻချာ အဆရာႏထျꩻ၊ သဲင်ꩻဒင်ႏပျꩻ ဗွေႏဘုရာꩻခရာႏနုဲင်းယို- "ဆရာႏဖြားဗွေႏဩ- ဗွေႏဘုရာꩻဂေါတမသူꩻနဝ်ꩻ ဗွေတွမ်ႏဂွုဏ်ႏ၊ ဗွေတွမ်ႏလက္ခဏာႏ၊ အကျောႏမွေးမွေးဒျာႏ ဗွေႏဩ၊ အကျောႏလဲဉ်ထာꩻ မွေးတဝ်းဗွေႏဩ။ ခွေသွဉ်းကထီႏဗာႏ၊ ခွေသွဉ်းကတောင်ꩻတောင်ꩻနဝ်ꩻ- ဗွေႏဘုရာꩻသူꩻနဝ်ꩻ ဗွေဒျာႏတွမ်ႏ လိုꩻခိုမျတ်သီး လက္ခဏာႏသိုမ်ဆီနီပါꩻ၊ ဗွေဒျာႏတွမ်ႏ ဘုရာꩻဂွုဏ်ႏတောႏကွတ်ꩻပါꩻ၊ ဗွေႏဘုရာꩻ ပေါႏကျွꩻလွေꩻထာꩻနဝ်ꩻ အဒဲင်ရီး အခင်ႏအပင်ထွေ၊ အခင်ႏကာတဲ့ ဒွို့ꩻငါတောဝ်း၊ စꩻငါႏတောဝ်း။ အကျွꩻလွေꩻထာꩻတဲ့ ယွိုက်ꩻငါႏတဝ်း၊ မွိုင်ငါႏတဝ်း၊ အတသွိုးဒျာႏ ငင်းဒေင်မာꩻလဒွုမ်၊ ငင်းဒေင်မာꩻကီနဝ်ꩻ တသွိုးတဝ်း၊ ပေါႏအဝ်ႏလိုႏ ထွားချာထာꩻတဲ့ အွဉ်ႏတလိန်ႏ (လီႏင်)နေးတဝ်းငွဉ်ꩻ၊ ချာႏနေးဒျာႏ နမ်းတဗာႏလိုးမ်၊ ထွားကီတဝ်းထာꩻ၊ ထွားလတဝ်းထာꩻ၊ ထွားငါလွေꩻ တဖွူႏတလီးတာႏ (လစ်ꩻသောင်ꩻ)လူꩻမ်။ ပေါႏအုံလင်ꩻထာꩻတဲ့ အုံတပန်းနေး၊ ခင်ႏလေင်းနဝ်ꩻ အွဉ်ႏဒင်ႏတဝ်းလို့ဝင်ꩻ၊ တလွူးန်တောဝ်းကီႏ၊ တလွူးန်တဝ်းခင်ႏလေးင်၊ အလွိုးနန်းထာꩻ အဲဉ်ထဝ်း၊ အလွိုးငမ်းပါꩻ အဲဉ်ထဝ်း၊ အုံဒုံကိုတဲ့ယဝ်း၊ ဝေင်ꩻကိုတဲ့ယဝ်း၊ ထွားလော်လယ်တဝ်းထာꩻ၊ ယေန်ႏယေႏန်ကေႏကေႏ၊ ဣန္ဒြေႏလꩻလꩻ၊ အုံသꩻခွꩻခွꩻဒျာႏထာꩻ ဗွေႏဩ" အတပဲ့ꩻဥတ္တရ တိန်ႏဒေါ့ꩻနုယ်နုဲင်းနဝ်ꩻတဲင် ဗြဟ္မာယုပုဏ္ဏာꩻဖြားနဝ်ꩻ စူဝုဲင်ႏလွေꩻဗွေႏဘုရာꩻ၊ ရွစ်ပါစွဉ်ႏ 'နမော တဿ ဘဂဝတော အရဟတော သမ္မာသမ္ဗုဒ္ဓဿ'သွံလဲင်ႏနောဝ်ꩻသွူ။ ဗြဟ္မာယုပုဏ္ဏာꩻဖြားနဝ်ꩻ လွေꩻထေ့ဗွေႏဘုရာꩻ၊ ဗွေႏဘုရာꩻ ဟော်ꩻဖေႏတရာꩻ၊ ဟော်ꩻတရာꩻထွူနဝ်ꩻ လꩻတမဂ်တဖိုလ်ႏ ထွာသောႏတာႏပန်ႏပုဂ္ဂိုလ်ႏ၊ ပင်ꩻဗွေႏဘုရာꩻတွမ်ႏသံဃာႏ ကပ်သွမ်ꩻနွုတ်ꩻနီꩻ၊ (တွိုႏသွစ်ꩻနီꩻကိုနဝ်ꩻ) ဗွေႏဘုရာꩻ ကျွꩻလွေꩻဝိဒဟခမ်း၊ တညတဝ်းခိန်ႏခါႏ ဗြဟ္မာယုပုဏ္ဏာꩻတဲ့ သီထိုꩻခန်းဒျာႏ (ထွာအနာႏဂါမ်ႏ) တွိုႏထင်ႏဗျဟ္မာႏခမ်း လင်ꩻချာဒူမ်လိုꩻခမ်းယိုသွူ။ (သုတ္တန်ႏပဋိကတ်၊ မဇ္ဈိမပဏ္ဏာသပါဠိတောႏ၊ ဗြဟ္မာယုသုတ်)