ဗွန်ပီနုဲင်းမေႏပြုံႏ

အဝ်ႏ ဝီခီပီးဒီးယား ကို

"အက္ခိက္ခန္ဓောပမသုတ် (ဗွန်နုဲင်းမေႏပြုံႏ)" အွိုးခꩻတလဲင်ႏ- နီဗွေႏဘုရာꩻတွမ်ႏ သံဃာႏပေါင်ꩻအာ ကျွꩻကာလွေꩻ ကောသခမ်း၊ တွိုႏလွေꩻတထွောင်း၊ ထီႏခန်း 'မေႏပြုံႏအဝ်ႏတင်ႏဟွုံဟွုံ'၊ အဝ်ႏတဖူꩻကို ကျွꩻဖုဲင်းထန်ႏ၊ အုံသေင်ႏမွူး တမွူးဆလ၊ ထာꩻဒါကို၊ ရီခန်းရဟန်ꩻသီးဖုံႏနုဲင်းယို- "ရဟန်ꩻသီးဖုံႏဟွေး- မေႏပျော်ꩻထင်ႏသန်-သီထီႏနေ မေႏပြုံႏတန်သူꩻဟောင်း" "ထီႏဒျာႏ ဗွေႏဩ" "ရဟန်ꩻသီးဖုံႏဟွေး- ၁။ ရဟန်ꩻတပါꩻနောဝ်ꩻ သꩻသဘော်ꩻယုတ်ညမ်း၊ အကျင်ꩻဗော့ꩻလဲ့ꩻ ပသို့ꩻအဲ့ꩻတန်၊ အဝ်ႏမာꩻတေ့ꩻ အကုသိုလ်ႏ၊ ရဟန်ꩻတမွေးတဝ်းတဲ့ ဆိမ်ꩻမဲ့လဲဉ်အံႏ ဝွန်ႏခံႏလဲဉ်လိုꩻ ရိုꩻဒျာႏအနမ်းရဟန်ꩻ၊ တကျင်ꩻတဝ်း အကျင်ꩻမျတ်တဲ့ ဝွေꩻရိုꩻကျင်ꩻ အကျင်ꩻမျတ်၊ အထန်ႏတရေꩻခြေင် အကိုသေင် နုဲင်းငွီႏသီ၊ ကိလေႏသာႏထီစိုႏ၊ ဒုဿီလပုဂ္ဂိုလ်ႏ (ပုဂ္ဂိုလ်ႏသီႏလအဲဉ်ထဝ်း)နောဝ်ꩻ- - ဗေင်ႏဖေါ့မေႏပြုံႏ ဟောဝ်နဲ့ - ဗေင်ႏဗော့ꩻခွန်ပိုမူႏ၊ ဗေင်ႏတွိုက်ပုဏ္ဏာꩻပိုမူႏ၊ ဗေင်ႏဖေါ့သဌေꩻပိုမူႏနဝ်ꩻ ဟောဝ်နဲ့" "ဩဗွေႏ ဘုရာꩻမျတ်ဗွေႏဩ- ဗေင်ႏဖေါ့သဌေꩻပိုမူႏနဝ်ꩻ ဟောဝ်ဗွေႏဩ" မွေးတဝ်းရဟန်ꩻသီးဖုံႏ၊ ဗေင်ႏဖေါ့မေႏပြုံႏနဝ်ꩻဟောဝ်၊ နာႏစဲင်းစဲင်းဟုဲင်း၊ ခွေအီႏဟော်ꩻဖေႏသီ တရာꩻယို၊ ဒုဿီလပုဂ္ဂိုလ်ႏ မဉ်ႏဗေင်ႏဖေါ့ မေႏပြုံႏနဝ်ꩻဟောဝ်ထဲင်း၊ ကွပ်ထမုဲင်ꩻနဲတဲင် မေႏခိုးဝွေꩻတွော့ꩻ ဗော့ꩻဗော့ꩻသီထိုꩻစွဉ်ႏ၊ မွေးတဝ်းတဲ့ သီထိုꩻစွဉ်ႏ၊ မေႏခိုးသီခန်းဝွေꩻတဲ့ယဝ်း၊ ဝွေꩻတထဲ့ဗာႏဗာႏတဝ်းငါႏရုဲင်ꩻ၊ ကိလေႏသာႏစိုး ဒုဿီလပုဂ္ဂိုလ်ႏနဝ်ꩻ ကွပ်ဝွေꩻဗေင်ႏဗော့ꩻခွန်ပိုမူႏတဲင် ပွိုးဝွေꩻဗေင်ႏတွိုက်ပုဏ္ဏာꩻပိုမူႏတွော့ꩻ ကွပ်ပွိုးဝွေꩻဗေင်ႏဖေါ့ သဌေꩻပိုမူႏတဲင်တွော့ꩻ ဝွေꩻမဉ်ႏသီတွိုႏဆုဲင်ꩻ ဝွေꩻထဲ့ဗာႏ ငါးရုဲင်ꩻသူꩻသွူ။ ရဟန်ꩻသီးဖုံႏဟွေး- ၂။ ကိလေႏသာႏစိုႏ ဒုဿီလပုဂ္ဂိုလ်ႏနဝ်ꩻ ပါꩻအာႏတလာတဖြာꩻနိစ္စက်၊ ထူႏတဖြွီꩻကျံႏငင်ႏပွစ် ဝွေꩻခင်ႏလောင်ꩻဖုံႏ နီဖဲ့ꩻဖဲ့ꩻ၊ ကွဲအွဉ်ႏပွစ်ပွစ်တွော့ꩻ တဖြွီꩻကျံႏအံႏ၊ သွီႏထန်ႏသွီႏလီ၊ ခြီဗာႏစွဉ်ႏအငေါဝ်း၊ တဖြွီꩻတွိုႏလွေꩻ စွဉ်ႏအဆွတ်ꩻ၊ သွီႏထွတ်ဆာ မရေႏမရာႏ၊ အဝ်ႏတဝျာႏအဝ်ႏတဝီႏ၊ ဝွေꩻငွိုးအွီႏဗာႏစွဉ်ႏထာꩻ။ - တွမ်ႏတဖြွီꩻကျံႏပွစ်နက် ပါꩻနိစ္စက်ဝွေꩻနဝ်ꩻ ဟောဝ်နဲ့ - မွေးတဝ်းတဲ့ ကွပ်ခွန်ခေါက်ဝုဲင်ႏဝွေꩻတဲင် ဝွေꩻနစ်သက်၊ ပွိုးပုဏ္ဏာꩻရွဉ်သား ရိုသေႏဝွေႏတွော့ꩻ ဝွေꩻသꩻရေꩻ၊ ကွပ်ပွိုးသဌေꩻ ခေါက်ဝုဲင်ႏရိုႏသေႏတဲင်တွော့ꩻ ဝွေꩻသာႏယာႏနဝ်ꩻ ဟောဝ်နဲ့" "ဩဗွေႏ ဘုရာꩻမျတ်ဗွေႏဩ- ဝင်ꩻခေါက်ဝုဲင်ႏရိုႏသေတဲင်တွော့ꩻ ဝွေꩻသာႏယာႏနောဝ်ꩻ ဟောဝ်ဗွေႏဩ၊ ပါꩻနိစ္စက်ဝွေꩻနောဝ်ꩻ ယူႏပက်ဒုက္ခလွဉ်ꩻငါႏ ဗွေႏဩ" မွေးတဝ်း ရဟန်ꩻသီးဖုံႏ တွမ်ႏတဖြွီꩻကျံꩻပွစ်နက် ပါꩻနိစ္စက်ဝွေꩻနဝ်ꩻ ဟောဝ်ထဲင်း၊ ကွပ်ထမုဲင်ꩻနဲတဲင် တွမ်ႏတဖြွီꩻပွစ်နက် ပါꩻနိစ္စက်ဝွေꩻတွော့ꩻ ဗော့ꩻဗော့ꩻသီထိုꩻစွဉ်ႏ၊ မွေးတဝ်းတဲ့ သီထိုꩻစွဉ်ႏတဲ့ယဝ်း ဝွေꩻတထဲ့ဗာႏတဝ်းငါးရုဲင်ꩻ။ ကိလေႏသာႏစိုႏ ဒုဿီလပုဂ္ဂိုလ်ႏနဝ်ꩻ ကွပ်နစ်သက် ခွန်ခေါက်ꩻဝုဲင်ႏတဲင် ပွိုးသꩻရေꩻပုဏ္ဏာꩻ ရွဉ်သားရိုႏသေႏတွော့ꩻ၊ ကွပ်ပွိုးသာႏယာႏ-သဌေꩻခေါက်ꩻဝုဲင်ႏရိုႏသေႏတဲင်တွော့ꩻ ဝွေꩻခန္ဓာႏကုဲင်လီ မဉ်ႏသီတွိုႏဆုဲင်ꩻ ဝွေꩻထဲ့ဗာႏငါႏရုဲင်ꩻ၊ (အဲဉ်ထဝ်းသီႏလသိက္ခာႏ၊ မော့ꩻဗာႏစူဝုဲင်ႏတံႏ၊ ခံႏဗာႏငါးရုဲင်ꩻ)သူꩻသွူ။ ရဟန်ꩻသီးဖုံႏဟွေး- ၃။ ကိလေႏသာႏစိုႏ ဒုဿီလပုဂ္ဂိုလ်ႏနဝ်ꩻ ပါꩻအာႏတလာတဖြာꩻ ထူႏဗင်ႏမူထွူ၊ တွမ်ႏဗင်နာစျူစျူ၊ ထောင်းကွယ် ထောင်းကွယ် အသꩻအင် (သွီႏတဖြွတ်ꩻထန်ႏလီ သီထိုꩻစွဉ်ႏ တလဲင်ႏချင်ꩻ) - တွမ်ႏဗင်နာစျူစျူထောင်း ဝွေꩻသꩻအနင်နဝ်ꩻ ဟောဝ်နဲ့ - မွေးတဝ်းတဲ့ ကွပ်ခွန်ခေါက်ဝုဲင်ႏဝွေꩻတဲင် ဝွေꩻနစ်သက်၊ ပွိုးပုဏ္ဏာꩻရွဉ်သား ရိုႏသေႏဝွေꩻတွော့ꩻ ဝွေꩻသꩻရေꩻ၊ ကွပ်ပွိုးသဌေꩻ ခေါက်ꩻဝုဲင်ႏရိုႏသေႏတဲင်တွော့ꩻ ဝွေꩻသာႏယာႏနဝ်ꩻ ဟောဝ်နဲ့" "ဩဗွေႏ ဘုရာꩻမျတ်ဗွေႏဩ- ဝင်ꩻခေါက်ဝုဲင်ႏရိုႏသေႏတဲင်တွော့ꩻ ဝွေꩻသာႏယာႏနဝ်ꩻ ဟောဝ်ဗွေႏဩ၊ တွမ်ႏဗင်နာစျူစျူထောင်း ဝွေꩻသꩻအင်နဝ်ꩻ ယူႏပက်ဒုက္ခလွဉ်ꩻငါႏ ဗွေႏဩ" မွေးတဝ်း ရဟန်ꩻသီးဖုံႏ၊ တွမ်ႏဗင်နာစျူစျူထောင်း ဝွေꩻသꩻအင်နဝ်ꩻ ဟောဝ်ထဲင်း၊ ကွပ်ထမုဲင်ꩻနဲတဲင် တွမ်ႏဗင်နာစျူစျူထောင်း ဝွေꩻသꩻအင်တွော့ꩻ ဝွေꩻသီထိုꩻခန်းတဲ့ယဝ်း၊ ဝွေꩻတဲ့ဗာႏတဝ်းငါးရုဲင်ꩻ၊ ကိလေႏသာႏစိုႏ ဒုဿီလပုဂ္ဂိုလ်ႏနဝ်ꩻ ကွပ်နစ်သက် ခွန်ခေါက်ꩻဝုဲင်ႏတဲင်၊ ပွိုးသꩻရေꩻ ပုဏ္ဏာꩻရွဉ်သားရိုႏသေႏတွော့ꩻ၊ ကွပ်ပွိုးသာႏယာႏ သဌေꩻခေါက်ဝုဲင်ႏရိုႏသေႏတဲင်တွော့ꩻ ဝွေꩻခန္ဓာႏကုဲင်လီ မဉ်ႏသီတွိုႏဆုဲင်ꩻ ဝွေꩻထဲ့ဗာႏငါးရုဲင်ꩻ၊ (အဲဉ်ထဝ်းသီႏလသိက္ခာႏ၊ မော့ꩻဗာႏစူဝုဲင်ႏတံႏ၊ ခံႏဗာႏငါးရုဲင်ꩻ)သူꩻသွူ။ ရဟန်ꩻသီးဖုံႏဟွေး- ၄။ ကိလေႏသာႏစိုႏ ဒုဿီလပုဂ္ဂိုလ်ႏနဝ်ꩻ ပါꩻအာႏတလာတဖြာꩻ တွမ်ႏပသီႏပျာꩻလျား တနျာႏတဲက်ꩻတဲက်ꩻ အွဉ်ႏဒပ်ꩻအသꩻအင် (လျားတဝျာႏတဝီႏ ငွိုးပြာႏပြီႏဗာႏစွဉ်ႏထာꩻ) - တွမ်ႏပသီႏပျာꩻလျား တနျာႏတဲက်ꩻတဲက်ꩻ အွဉ်ႏဒပ်ꩻဝွေꩻသꩻအင်နဝ်ꩻ ဟောဝ်နဲ့၊ - မွေးတဝ်းတဲ့ ကွပ်ခွန်လူႏဝွေꩻသင်္ကန်ꩻတဲင် ဝွေꩻနစ်သက်၊ ပွိုးပုဏ္ဏာꩻရွဉ်သား လူႏဝွေꩻသင်္ကန်ꩻတွော့ꩻ ဝွေꩻသꩻရေꩻ၊ ကွပ်ပွိုးသဌေꩻ လူႏဝွေꩻသင်္ကန်ꩻတဲင်တွော့ꩻ ဝွေꩻသာႏယာႏရွုံႏဗုဲင်နဝ်ꩻ ဟောဝ်နဲ့" "ဩဗွေႏ ဘုရာꩻမျတ်ဗွေႏဩ- ဝင်ꩻလူႏဝွေꩻသင်္ကန်ꩻတဲင်တွော့ꩻ ဝွေꩻသာႏယာႏရွုံႏဗုဲင်နဝ်ꩻ ဟောဝ်ဗွေႏဩ၊ တွမ်ႏပသီႏပျာꩻလျား တနျာႏတဲက်ꩻတဲက်ꩻ အွဉ်ႏဒပ်ꩻဝွေꩻသꩻအင်နဝ်ꩻ ယူႏပက်ဒုက္ခလွဉ်ꩻငါႏဗွေႏဩ" "မွေးတဝ်း ရဟန်ꩻသီးဖုံႏ၊ တွမ်ႏပသီႏပျာꩻလျား တနျာႏတဲက်ꩻတဲက်ꩻ အွဉ်ႏဒပ်ꩻဝွေꩻသꩻအင်နောဝ်ꩻ ဟောဝ်ထဲင်း၊ ကွပ်ထမုဲင်ꩻနဲတဲင် တွမ်ႏပသီႏပျာꩻလျား တနျာႏတဲက်ꩻတဲက်ꩻ အွဉ်ႏဒပ်ꩻဝွေꩻသꩻအင်တွော့ꩻ ဗော့ꩻဗော့ꩻသီထိုꩻစွဉ်ႏ၊ မွေးတဝ်းတဲ့ သီထိုꩻခန်းတဲ့ယဝ်း ဝွေꩻတထဲ့ဗာႏတဝ်းငါးရုဲင်ꩻ။ ကိလေႏသာႏစိုႏ ဒုဿီလပုဂ္ဂိုလ်ႏနဝ်ꩻ ယွုမ်းယွုမ်းအံႏအံႏ ဝင်ꩻလူႏဝွေꩻသင်္ကန်ꩻ၊ ကွပ်နစ်သက် ခွန်လူႏဝွေꩻသင်္ကန်ꩻတဲင်၊ ပွိုးသꩻရေꩻ ပုဏ္ဏာꩻရွဉ်သား လူႏဝွေꩻသင်္ကန်ꩻတွော့ꩻ၊ ကွပ်ပွိုးသာႏယာႏရွုံႏဗုဲင် သဌေꩻသီးကလူႏဒါႏ သင်္ကန်ꩻနဝ်ꩻတဲင်တွော့ꩻ ဝွေꩻခန္ဓာႏကုဲင်လီ မဉ်ႏသီတွိုႏဆုဲင်ꩻ ဝွေꩻထဲ့ဗာႏငါးရုဲင်ꩻ (အဲဉ်ထဝ်းသီႏလသိက္ခာႏ-မော့ꩻဗာႏသင်္ကန်ꩻတံႏ၊ ခံႏဗာႏငါးရုဲင်ꩻ)သူꩻသွူ။ ရဟန်ꩻသီးဖုံႏဟွေး- ၅။ ကိလေႏသာႏစိုႏ ဒုဿီလပုဂ္ဂိုလ်ႏနဝ်ꩻ ပါꩻအာႏတလာတဖြာꩻ တွမ်ႏပသီႏ ခတ်ꩻတအိုအဖြောင်း၊ တွမ်ႏပသီႏကွို့ꩻဒွေါင်ႏ အွဉ်ႏထောက်ကီလခါꩻ အဖြောင်းကို၊ အဖြောင်းတအိုအိုကိုနဝ်ꩻ သွစ်ꩻသော့ꩻပသီႏထီလျား၊ ပသီႏထီလျားနဝ်ꩻ ရွတ်ꩻလျား (ဒုဿီလပုဂ္ဂိုလ်ႏ) ဖြောင်းဗီႏယင်၊ ရွတ်ꩻလျားအဖြောင်းကိုယင်၊ ရွတ်ꩻလျား အဖြေꩻယင်၊ ရွတ်ꩻလျားအကထောင်ꩻယင်၊ ရွတ်ꩻလျားအသꩻအင်ယင်၊ ရွတ်ꩻလျားအဖြေ့တန်ယင်၊ ရွတ်ꩻလျားအဖြေ့ပေႏယင်၊ ပသီႏထီလျားနဝ်ꩻ ထန်ႏလလင်ꩻစွဉ်ႏသူꩻ (ဒုဿီလပုဂ္ဂိုလ်ႏနဝ်ꩻ ဝꩻပြာႏ၊ ကွပ်ပွိုးလျားလွဉ်ꩻငါႏတဲင် ချာႏတခို့၊ ချာႏတအာစွဉ်ႏအနမ်း၊ အွဉ်ႏပြန်-အွဉ်ႏပြန်ဗာႏစွဉ်ႏအနမ်း) - တွမ်ႏပသီႏထီလျား လူႏကြွုံႏကြွုံႏ ထောက်ꩻသော့ꩻအဖြောင်းနဝ်ꩻ ဟောဝ်နဲ့၊ - မွေးတဝ်းတဲ့ ကွပ်လူႏဝွေꩻသွမ်ꩻတဲင် ဝွေꩻနစ်သက်၊ ပွိုးပုဏ္ဏာꩻရွဉ်သား လူႏဝွေꩻသွမ်ꩻတွော့ꩻ ဝွေꩻသꩻရေꩻ၊ ကွပ်ပွိုးသဌေꩻ လူႏဝွေꩻသွမ်ꩻတဲင်တွော့ꩻ ဝွေꩻသာႏယာႏသွုံꩻဆောင်ႏနဝ်ꩻ ဟောဝ်နဲ့" "ဩဗွေႏ ဘုရာꩻမျတ်ဗွေႏဩ- ဝင်ꩻလူႏဝွေꩻသွမ်ꩻတဲင်တွော့ꩻ ဝွေꩻသာႏယာႏသွုံꩻဆောင်ႏနောဝ်ꩻ ဟောဝ်ဗွေႏဩ၊ တွမ်ႏပသီႏထီလျား လူးကြွုံႏကြွုံႏ ထောက်ꩻသော့ꩻဝွေꩻဖြောင်းနဝ်ꩻ ယူႏပက်ဒုက္ခလွဉ်ꩻငါႏ ဗွေႏဩ" "မွေးတဝ်း ရဟန်ꩻသီးဖုံႏ၊ တွမ်ႏပသီႏထီလျား လူးကြွုံႏကြွုံႏ ထောက်ꩻသော့ꩻဝွေꩻဖြောင်းနဝ်ꩻ ဟောဝ်ထဲင်း၊ ကွပ်ထမုဲင်ꩻနဲတဲင် တွမ်ႏပသီႏထီလျား ထောက်ꩻသော့ꩻဝွေꩻဖြောင်းတွော့ꩻ ဗော့ꩻဗော့ꩻသီထိုꩻစွဉ်ႏ၊ မွေးတဝ်းတဲ့ သီထိုꩻစွဉ်ႏတဲ့ယဝ်း ဝွေꩻတထဲ့ဗာႏတဝ်းငါးရုဲင်ꩻ၊ ကိလေႏသာႏစိုႏ ဒုဿီလပုဂ္ဂိုလ်ႏနဝ်ꩻ ယွုမ်းယွုမ်းအံႏအံႏ ဝင်ꩻလူႏဝွေꩻသွမ်ꩻ၊ ကွပ်နစ်သက် ခွန်လူႏဝွေꩻသွမ်ꩻတဲင်၊ ပွိုးသꩻရေꩻ ပုဏ္ဏာꩻရွဉ်သား လူႏဝွေꩻသွမ်ꩻတွော့ꩻ၊ ကွပ်ပွိုးသာႏယာႏ သွုံꩻဆောင်ႏသဌေꩻသီး ကလူႏဒါႏသွမ်ꩻနဝ်ꩻတဲင်တွော့ꩻ ဝွေꩻခန္ဓာႏကုဲင်လီ မဉ်ႏသီတွိုႏဆုဲင်ꩻ ဝွေꩻထဲ့ဗာႏငါးရုဲင်ꩻ၊ (အဲဉ်ထဝ်းသိက္ခာႏ၊ မော့ꩻဗာႏဒဲဉ်တံႏ ခံႏဗာႏငါးရုဲင်ꩻ)သူꩻသွူ။ ရဟန်ꩻသီးဖုံႏဟွေး- ၆။ ကိလေႏသာႏစိုႏ ဒုဿီလပုဂ္ဂိုလ်ႏနောဝ်ꩻ ပါꩻအာႏတလာတဖြာꩻ ခွုမ်ဒုဿီလပုဂ္ဂိုလ်ႏကတူႏ ငင်ႏဒင်ႏကူႏပသီႏလျားလောင်း၊ အွဉ်ႏဗေင်ႏတအာ၊ တေက်ꩻခါꩻ၊ သဲဉ်ꩻဒုဿီလပုဂ္ဂိုလ်ႏ စူဗောင်နီပင် အွဉ်ႏတဲင်ဒင်ႏ ကလာꩻထဲင် ပသီႏလျားလောင်း တေက်ꩻခါꩻ။ - ပါꩻအွဉ်ႏဗေင်ႏဒင်ႏ ကူႏပသီႏလျားလောင်း တေက်ꩻခါꩻ၊ အွဉ်ႏတဲင်ဒင်ႏ ကလာꩻထဲင် ပသီႏလျားလောင်း တေက်ꩻခါꩻနဝ်ꩻ ဟောဝ်နဲ့၊ - မွေးတဝ်းတဲ့ ခွန်တန်ပုဏ္ဏာꩻရွဉ်သား သဌေꩻသီး ယွုမ်းယွုမ်းအံႏအံႏ ကလူႏဒါႏကူႏလောင်း၊ ကလာꩻထဲင်လောင်းနဝ်ꩻ ဗေင်ႏဒင်ႏ-အုံဒင်ႏနဝ်ꩻ ဟောဝ်နဲ့" "ဩဗွေႏ ဘုရာꩻမျတ်ဗွေႏဩ- ဗေင်ႏဒင်ႏ-အုံဒင်ႏ ဝင်ꩻလူႏဒါႏ ကူႏလောင်း ကလာꩻထဲင်လောင်းနဝ်ꩻ ဟောဝ်ဗွေႏဩ၊ ဗေင်ႏဒင်ႏဗာႏ ကူႏပသီႏလျားလောင်း၊ အုံတဲင်ဒင်ႏဗာႏ ကလာꩻထဲင် ပသီႏလျားလောင်းနဝ်ꩻ ယူႏပက်ဒုက္ခလွဉ်ꩻငါႏ ဗွေႏဩ" "မွေးတဝ်း ရဟန်ꩻသီးဖုံႏ၊ ပါꩻငင်ႏဗေင်ႏဒင်ႏ ကူႏပသီႏလောင်း၊ ပါꩻအွဉ်ႏတဲင်ဒင်ႏ ကလာꩻထဲင် ပသီႏလျားလောင်း တက်ꩻခါꩻနဝ်ꩻ ဟောဝ်ထဲင်း၊ ကွပ်ထမုဲင်ꩻနဲတဲင် ပွိုးဗေင်ႏဒင်ႏ ကူႏပသီႏလျားလောင်း၊ အွဉ်ႏတဲင်ဒင်ႏ ကလာꩻထဲင် ပသီႏလျားလောင်းတွော့ꩻ ဝွေꩻသီထိုꩻခန်းတဲ့ယဝ်း ဝွေတထဲ့ꩻဗာႏတဝ်းငါးရုဲင်ꩻ၊ ကိလေႏသာႏစိုႏ ဒုဿီလပုဂ္ဂိုလ်ႏနဝ်ꩻ ယွုမ်းယွုမ်းအံႏအံႏ ဝင်ꩻကလူႏ ကူႏကလာꩻထဲင်လောင်းယို ပွိုးဝွေꩻဗေင်ႏဒင်ႏ ဝွေꩻအုံဒင်ႏတဲင်တွော့ꩻ ဝွေꩻခန္ဓာႏကုဲင်လီ မဥဉ်ႏသီတွိုႏဆုဲင်ꩻ ဝွေꩻထဲ့ဗာႏငါးရုဲင်ꩻ (အဲဉ်ထဝ်းသီႏလ သိက္ခာႏ၊ ဗော့ꩻဗာႏ ကူႏကလာꩻထဲင်တံႏ၊ ခံႏဗာႏငါးရုဲင်ꩻ)သူꩻသွူ"။ "ရဟန်ꩻသီးဖုံႏဟွေး- ၇။ ကိလေႏသာႏစိုႏ ဒုဿီလပုဂ္ဂိုလ်ႏနဝ်ꩻ ပါꩻအာႏတလာတဖြာꩻ သဲဉ်ꩻခါꩻအခင်ႏနီပင်၊ အကတူႏအွဉ်ႏစီꩻလင်ꩻသော့ꩻ ပသီႏထီလျား ဖွိုင်ꩻတောင်ꩻတန်ကို၊ တုံလ၊ ပေါ်ကီ-သီထိုꩻစွဉ်ႏ။ - အခင်ႏပါꩻပီꩻ၊ အကတူႏအွဉ်ႏစီꩻသော့ꩻ ပသီႏထီလျား ဖွိုင်ꩻတောင်ꩻတန်ကိုနဝ်ꩻ ဟောဝ်နဲ့၊ - မွေးတဝ်းတဲ့ အုံသော့ꩻ ခွန်တန်၊ ပုဏ္ဏာꩻ၊ သဌေꩻသီး ကလူႏဒါႏ ကျောင်ꩻကိုနဝ်ꩻ ဟောဝ်နဲ့" "ဩဗွေႏ ဘုရာꩻမျတ်ဗွေႏဩ- အုံသော့ꩻ ဝင်ꩻကလူႏဒါႏကျောင်ꩻကိုနဝ်ꩻ ဟဝ်ဗွေႏဩ၊ အကတူႏအွဉ်ႏစီꩻသော့ꩻ ပသီႏထီလျား ဖွိုင်ꩻတောင်ꩻတန်ကိုနဝ်ꩻ ယူႏပက်ဒုက္ခလွဉ်ꩻငါႏ ဗွေႏဩ" "မွေးတဝ်း ရဟန်ꩻသီးဖုံႏ၊ ဝွေꩻကတူႏအွဉ်ႏစီꩻသော့ꩻ ပသီႏထီလျား ဖွိုင်ꩻတောင်ꩻတန်ကိုနဝ်ꩻ ဟောဝ်ထဲင်း၊ ပွိုးထမုဲင်ꩻနဲတဲင် ဝွေꩻသီစွဉ်ႏတဲ့ တထဲ့တဝ်းငါးရုဲင်ꩻ၊ သီႏလသိက္ခာႏ ထမုဲင်ꩻမုဲင်ꩻအဲဉ်ထဝ်း၊ အုံသော့ꩻခြေင်ဝင်ꩻကျောင်ꩻနဝ်ꩻ ဝွေꩻမဉ်ႏသီတွိုႏဆုဲင်ꩻ ထဲ့ဗာႏငါးရုဲင်ꩻ (မော့ꩻဗာႏကျောင်ꩻတံႏ၊ ခံႏဗာႏငါးရုဲင်ꩻ)သူꩻသွူ"။ (သုတ္တန်ႏပိဋကတ်၊ အင်္ဂုတ္တရပါဠိ၊ သတ္တကနိပါတ်၊ အက္ခိက္ခန္ဓောပမသုတ်)[၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ဗွေႏဗွန်-ကောဝိဒ(သီႏသဲင်ႏ)
  2. လိတ်ဗွောင်မဲ့နား(၂၇၀/၂၇၂)