မဉ်ႏဖေႏလိုꩻသိမ်ꩻဒါႏဟံႏ

အဝ်ႏ ဝီခီပီးဒီးယား ကို

"မဉ်ႏဖေႏလိုꩻသိမ်ꩻဒါႏဟံႏ လိုꩻအာႏဏာႏဗွေႏသီးမဲးနဝ်ꩻ ထွာလွဉ်နွောင်ꩻတမုဲင်ꩻ" အခိန်ႏနုဲင်းယိုခါ ၂၀၁၅-လွိုက်ရွေꩻပွဲꩻနဝ်ꩻ အဝ်ႏဗော့ꩻစပ်ꩻလွဉ်လဲဉ်းသွူ၊ ပါတီအစွိုꩻမုဲင်ꩻမုဲင်ꩻလဲ့ ဝွေꩻသီးပါတီအောင်ႏနွောင်ꩻရေꩻအတာႏ ထိုမ်ႏထွို့ꩻဗူႏ၊ ထိုမ်ႏချောက်သွူ ခမ်းသားသီးသွူ၊ ပါတီအစွိုꩻမုဲင်ꩻမုဲင်ꩻလဲ့ အအီႏအိုပ်ꩻချာဒျာႏ ဝွေꩻသီးပါတီယံ၊ ဝွေꩻသီးမဉ်ႏနွောင်ꩻ ထွာလꩻလွတ်တောႏနမ်းခြောင်ꩻနဝ်ꩻ မဲ့ꩻအီႏမာꩻယံယံဖေႏဒျာႏ ခမ်းသားသီး၊ မာꩻအာအာဖေႏဒျာႏ လွိုင်ႏကွုန်ꩻရေꩻစတဲင် ဒေါ့ꩻချောက်ခမ်းသားသီးထျꩻနုဲင်းယို အီႏအဝ်ႏလွဉ်သွူ။ အခိန်ႏနုဲင်းယိုခါနဝ်ꩻ ခမ်းသားသီး မဲးတဗီႏယို တန်ႏဖိုꩻတန်ငါႏတတျာမုဲင်ꩻ မဉ်ႏဒေါ့ꩻနဝ်ꩻ ဒေါ့ꩻဆွုံꩻဖျတ်ဖေႏ တလꩻနွောင်ꩻတဝ်းသွူ။ ခမ်းသားသီး သꩻအောင်ခါႏ သꩻရာႏကို ထန်ႏလွဉ်ဒါႏ ခမ်းသားသဆန္ဒ မဲးတဗီႏယို အကျိုꩻတွိုႏနွောင်ꩻအီ ခမ်းထီဟဝ်ရေꩻ၊ ခမ်းထီကုဲင်ရေꩻသွူ။ ခမ်းထီဟဝ်ရေꩻ၊ ခမ်းထီကုဲင်ရေꩻကရိုꩻနဝ်ꩻ ခမ်းထီတန်ယို လိုꩻဟဝ်လိုꩻဒါႏ၊ လိုꩻသꩻစေႏတနာႏအဝ်ႏသား မဉ်ႏထင်ႏထွာ၊ မဉ်ႏထင်ႏအွဉ်ငါခုမ်မာꩻနဝ်ꩻ ခမ်းထီယို တိုꩻတက်မွိုင်၊ ထင်ႏထိုပြွိုင်နဝ်ꩻသွူ၊ အွဉ်ငါခုမ်မာꩻဒါႏ ခမ်းထီတဖြုံႏအစိုႏရယို လိုꩻဟဝ်လိုꩻဒါႏနဝ်ꩻ အဓိကမွေးငါႏသွူ၊ ကွပ်စွဉ်ႏလိုꩻဟဝ်လိုꩻဒါႏတဲင် ခမ်းထီတိုꩻတက်ရေꩻယို ခြေင်ႏဝင်ꩻခမ်းစီꩻပွါꩻရေꩻ၊ ခေးဝင်ꩻပညာႏရေꩻယို အဆင်ႏရန်းအဝ်ႏလွဉ်နဝ်ꩻသွူ။ အုပ်ချုပ်ခမ်းထီတဖြုံႏယို ဖေႏကထွာဒျာႏ လိုꩻအုပ်ချုပ်ခုမ်မာꩻဖေႏ တွမ်ႏသꩻစတနာႏနဝ်ꩻတဲ့ အဓိကမွေးငါႏနေနေသွူ၊ ကွပ်စွဉ်ႏခုမ်မာꩻဖေႏ ခမ်းသားအမျာꩻယို ခုမ်မာꩻတွမ်ႏသꩻစေႏတနာႏတဲင် ကအီႏထွားနမ်းတာႏ သꩻတအဲဉ်ထဝ်း၊ သꩻမဲဉ်လꩻခြေင် ခမ်းသားတခြိုꩻအဲဉ်ထဝ်း၊ သꩻမဲဉ်ခြွေနမ်းတာႏ၊ သꩻမဲဉ်လွိုင်ႏပစ္စေꩻဥစ္စာႏအဲဉ်ထဝ်းနဝ်ꩻမꩻ အကျောင်ꩻပျုယိုယိုနဝ်ꩻနဝ်ꩻတွော့ꩻ ကေပ်ꩻကောက်ခြေင်ရွဉ် ခေတ်စနစ်အဲဉ်ထဝ်းနဝ်ꩻသွူ။ နဝ်ꩻမꩻ ခမ်းသားသီး မဲးတဗီႏ ကသော့ꩻဖေႏဒါႏလိုꩻယို မဉ်ႏထွာဒျာႏ လိုꩻဟဝ်လိုꩻဒါႏနဝ်ꩻ ခမ်းထီတဲ့ အီႏဟဝ်၊ ဥပဒေႏတဲ့ ထန်ႏဒျာႏအဟဝ်တဲင် ခမ်းသားအတာႏ အရဲးအကမ်းအဝ်ႏ၊ ပါꩻမုဲင်ꩻမုဲင်ꩻတဲ့ တလွိုတဝ်း၊ ပါꩻမုဲင်ꩻမုဲင်ꩻတဲ့ တယွမ်ꩻတဝ်း၊ တွောင်းတသွုန်ဒါႏ တရာꩻဥပဒေႏဒို့ꩻတခြို့မုတဲ့ အဝ်ႏနဝ်ꩻသွူ။ နဝ်ꩻမꩻ ခမ်းသားသီး ကမဲဉ်ထွာနဝ်ꩻ ခမ်းထီနုဲင်းယိုဒျာႏ၊ ခေတ်စနစ်နုဲင်းယိုဒျာႏ အဝ်ႏသေသေငါႏလဲ့ သꩻကမဲဉ်ထွာ ခမ်းထီပုံႏပွိုင်အတွိုင်ꩻ ပြောင်ꩻလုဲင်ႏခွင်ꩻကလꩻခိန်ႏ၊ အခွင်ꩻအရေꩻဟဝ်ကာႏလ နုဲင်း ၂၀၁၅-ခမ်းလွိုက်ရွေꩻပွယ်ꩻ၊ ထီလွိုက်ရွေꩻပွယ်ꩻကိုယိုနဝ်ꩻ အဝ်ႏလိုႏပြောင်ꩻလုဲင်ႏလꩻလꩻငါႏလဲဉ်း တွမ်ႏခမ်းသားသီး သꩻဆန္ဒမဲးနဝ်ꩻသွူ။ ခမ်းထီဟဝ်ရေꩻ ခမ်းထီကုဲင်ရေꩻ အခေႏနေႏ မဉ်ႏဒေါ့ꩻယင်းတစားနဝ်ꩻ ခမ်းထီကိုယို လိုꩻဟဝ်လိုꩻဒါႏ တမွေးတဝ်း၊ လိုꩻသꩻစေႏတနာႏ တအဝ်ႏတဝ်းသား မဉ်ႏထင်ႏထွာ၊ မဉ်ႏထင်ႏအွဉ်ငါခုမ်မာꩻနဝ်ꩻ ခမ်းထီယို တိုꩻတက်တဝ်း၊ ယိန်းထဲ့ဖွိုႏထဲင်းနဝ်ꩻသွူ၊ ကွပ်စွဉ်ႏအုပ်ချုပ်ခမ်းထီဒါႏတဝ်းတဲင် ပေါႏမာꩻဗာႏတူႏတူႏတန်ႏတန်ႏတဲ့ ဟဲ့ꩻရိုꩻလဲဉ်းမာꩻတိုꩻတက် ခမ်းထီနဝ်ꩻသွူ၊ ဝွေꩻသီးကမာꩻတိုꩻတက်ရေꩻနဝ်ꩻ မဉ်ႏဖက်ထွားတွမ်ႏ ဝင်ꩻခမ်းလင်ယို တမုဲင်ꩻမုဲင်ꩻတဲ့ တမွေးတဝ်းနဝ်ꩻသွူ။ တဒါႏတဝ်းငါႏ အုပ်ချုပ်နွိုင်ႏတဲင် စဲ့ꩻအာႏဏာႏဗွေႏစူကို အနေင်ႏသူဆီတောႏတွင်ꩻ မန်းခမ်းယို တိုꩻတက်မုတမုဲင်ꩻမုဲင်ꩻ တအဲဉ်ထဝ်းနဝ်ꩻ သက်သေႏနဝ်ꩻသွူ။ စဲ့ꩻအာႏဏာႏဗွေႏသိးယို ကအုပ်ချုပ်လွဉ်ဒါႏ ခမ်းထီနေင်ႏပေါင်ꩻ အဆီတောႏတွင်ꩻ မဉ်ႏထွားနေး မန်းခမ်းအစိုႏရအေႏတဲ့နဝ်ꩻ၊ ပအိုဝ်ႏလိုꩻမျိုꩻကိုဒျာႏတဲ့နဝ်ꩻ အတပုဲင်းပွိုင်းတဝ်းနဝ်ꩻသွူ။ အာႏဏာႏဗွေႏသီးယို ဝင်ꩻအမျာꩻတစူꩻတဝ်းတဲ့ မာꩻနွိုင်ႏနွိုင်ႏ၊ ဝင်ꩻမဉ်ႏလွိုဆန်တဲ့ ဆွမ်ꩻတေက်ꩻနျꩻ၊ ခမ်းသားမဉ်ႏဒါႏ၊ မဉ်ႏသူႏသေ မဲ့နားမဉ်ႏလေနဝ်ꩻ တမဲဉ်လꩻတဝ်း၊ တနာႏလိုႏတဝ်းနဝ်ꩻသွူ။ ကခုမ်မာꩻနဝ်ꩻ ခုမ်မာꩻတွမ်ႏသꩻစေႏတနာႏ တမွေးတဝ်း၊ ခုမ်မာꩻဒျာႏ တွမ်ႏမဲဉ်လꩻမာꩻခွင်ꩻ၊ ခုမ်မာꩻဒျာႏ တွမ်ႏအတ္တအာႏဏာႏ၊ ခုမ်မာꩻဒျာႏ တွမ်ႏမဲဉ်ခြွေနမ်းတာႏ၊ မဲဉ်လွိုင်ႏပစ္စေꩻဥစ္စာႏနဝ်ꩻမꩻ အကျောင်ꩻပျုယိုယိုနဝ်ꩻနဝ်ꩻ မဉ်လꩻခြေင် ထူႏခြေင် သိမ်ꩻခြေင်လို့တေား ခမ်းသားသီးထာꩻခြိုꩻ၊ သွို့ꩻခြံဟံႏယာႏဖုံႏနဝ်ꩻသွူ။ နဝ်ꩻမꩻ လိုꩻအာႏဏာႏဗွေႏစနစ် ခမ်းသားသꩻဆန္ဒတပါတဝ်း ထူႏသိမ်ꩻခြေင်နွိုင်ႏ ခမ်းသားတခြိုꩻဥစ္စာႏ သွို့ꩻခြံဟံႏယာႏဖုံႏ၊ နိတ်စက်အံႏနွောင်ꩻ ခမ်းသားဖုံႏအတာႏ ခမ်းသားတဖြာꩻစီႏ တွမ်ႏမဲးတဗီႏယို မဉ်ႏပြောင်ꩻလုဲင်ႏထိုꩻခန်းဒျာႏမꩻ ခမ်းသားသီး အီႏလွစ်ထန်ႏလꩻ အာႏဏာႏဗွေႏသီးစနစ် စူကိုနဝ်ꩻသွူ။ တွမ်ႏမဲးမဉ်ႏဖေႏအာႏ အာႏဏာႏဗွေႏသီး မဉ်ႏလꩻယင်းအာႏဏာႏတွော့ꩻ မဉ်ႏသိမ်ꩻယင်း ခမ်းသားသီးဟံႏယာႏနဝ်ꩻ အာႏဏာႏဗွေႏသီး အမာႏတမွေးတဝ်းဒွုမ်နဝ်ꩻသွူ။[၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ခြွူႏမွဉ်းသားစွိုꩻ
  2. ခမ်းသားငဝ်း အစဲဉ်ႏ(၃)၊ အမုဲင်(၂၃)