မဟာကစ္စာယနမထေရ်ႏ
ဗွေႏမဟာကစ္စာယနမထေရ်ႏနဝ်ꩻ ထွာဒျာႏ ဗွေႏမျတ်ဖရာꩻ သာႏသနာႏတောႏကို ကအဝ်ႏဒါႏ ရဟန်ꩻတပါꩻဒျာႏသွူ။[၁]
"မဟာကစ္စာယနမထေရ်ႏဝတ္ထု"
၉၄။ ဂါႏထာႏပြန်ႏပအိုဝ်ႏခြေင်ခြေင်- ဝါးလေားရထာꩻသား ကပွိုက်ငဲခါꩻဒါႏ သေဖုံႏနောဝ်ꩻ မရုဲင်ꩻတသွိုး အုံစွူဖြွိုးဒါႏလွသွူ၊ ဗွန်ပီနဝ်ꩻနေနေ ရဟန်ꩻမုဲင်ꩻယောဝ်း အဣန္ဒြေႏဖုံႏနဝ်ꩻ ငိမ်ꩻငဲ့စွူဖြွိုးငါႏဖုံႏသွူ၊ ကပယ်ႏထိုꩻမာႏန၊ အာသဝတအဲဉ်ထဝ်း နုဲင်းနဝ်ꩻဗွေစွုံႏ ဂွုဏ်ႏကအဝ်ႏဒါႏ ရဟန်ꩻနဝ်ꩻအတွက် လူꩻသီးဖုံႏတဲ့ ရက်လွငါႏဖုံႏသွူ။
"လꩻဗဟုသုတ၊ လꩻသတိꩻနုဲင်းယို" ဟော်ꩻထွားသွဉ်ဗာႏ မဟာကစ္စာယနမထေရ်ႏဝတ္ထုယိုတဲင်-
၁။ ပေါႏထိန်ꩻဟဝ် ဣန္ဒြေႏ ဝင်ꩻရိုႏသေႏ ဝင်ꩻနစ်သက် ဝင်ꩻရက်ငါႏ၊
၂။ ခွန်သိကျာꩻခန်းတဲ့ယဝ်း ဝင်ꩻငေါဝ်းသွမ်ꩻသဲ့ꩻ ငေါဝ်းကဲ့ꩻရဲ့ꩻတလွစ်တောဝ်း၊
၃။ လိုꩻတွမ်ႏရိုꩻမွုန်း လူꩻသိကျာꩻတန်သွူမဉ်ႏတဲ့ ပုဂ္ဂိုလ်ႏစွယ်ꩻအောဝ်ႏဒျာႏအကျောင်ꩻ-စတဲင်နုဲင်းနဝ်ꩻ သေထွꩻ လꩻဗဟုသုတ၊ လꩻအီသတိꩻအာတန်သွူ။
"သာရိပုတ္တရာႏမထေရ်ႏဝတ္ထု"
၉၅။ ဂါႏထာႏပြန်ႏပအိုဝ်ႏခြေင်ခြေင်- ပုဂ္ဂိုလ်ႏမုဲင်ꩻတယဝ်း ဗွန်ပီနုဲင်းဟံႏတဲင် မာꩻချာဒါႏတဝ်းဝင်ꩻ၊ အကျင်ꩻဟဝ်တဉ်ႏခွေါင် နုဲင်းတခါꩻပေါင်၊ လောကဓံႏသွစ်ꩻချက် လွဉ်နက်တဲ့ယဝ်း ထွာရာꩻတဝ်းတစိꩻစိꩻ၊ အကျင်ꩻဟဝ်ဗွာ အသꩻနဝ်ꩻစွူ နုဲင်းဟံႏဗော့ꩻကင်ꩻရောင် ထီနောင်နဝ်ꩻသွူ။ သဘော်ꩻနုဲင်းနဝ်ꩻကအဝ်ႏခါꩻ ပုဂ္ဂိုလ်ႏနဝ်ꩻအတာႏ သံသရာႏဖုံႏနဝ်ꩻ တထွာတဝ်းဒွုမ်။
"လꩻဗဟုသုတ၊ လꩻသတိꩻနုဲင်းယို" ဟော်ꩻထွားသွဉ်ဗာႏ သာရိပုတ္တရာႏမထေရ်ႏဝတ္ထုယိုတဲင်-
၁။ ကမဉ်ဒါႏဒါႏ အရာႏမဉ်ထိုထို လိုꩻတကေးသား၊ လိုꩻလွꩻထီႏသား၊ လိုꩻသဲ့ꩻသွမ်ꩻသား အောဝ်ႏဒျာႏ၊
၂။ အွဉ်ႏအပွေႏ-ရေႏအပဲစ်နဝ်ꩻ အမဲစ်အဲဉ်ထဝ်း၊ ကော့ꩻမာႏဆုဲင်ꩻနောင်ႏတ၊ မော့ꩻဗာႏ ထာꩻဒုက္ခလွုမ်ꩻ၊
၃။ လိုꩻမျတ်သꩻဗွန်ဟံႏ၊ မော့ꩻလောကဓံႏတဲ့ သယ်ꩻခံႏဒျာႏတေ့ꩻတေ့ꩻ၊
၄။ ပဲစ်မာႏရဟန္တာႏနဝ်ꩻ မော့ꩻဗာႏသွူးစွဉ်ႏ ထာꩻဒုက္ခ၊
၅။ ပဲစ်မာႏသွူဝင်ꩻ မဉ်ႏတောင်ꩻပြန်ႏချာတဝ်း၊ ဝင်ꩻမဉ်ႏသယ်ꩻခံႏ၊ ဝင်ꩻမဉ်ႏအွဉ်ႏစွꩻခွင်ꩻတောဝ်းနဝ်ꩻ အပဲစ်ခံႏဗာႏ သံသရာႏ တသွုပ်ထွူတသွုပ်-အကျောင်ꩻ စတဲင်နုဲင်းနဝ်ꩻ သေဗာႏ လꩻဗဟုသုတ၊ လꩻအီသတိꩻအာငါႏသွူ။[၂][၃]