မုဒုလက္ခဏဇာတ်

၆၆။ မုဒုလက္ခဏဇာတ် ဘုရာꩻအွ်ႏ ဇေတဝန်ႏကျောင်ꩻကိုခိင်ႏ တကာႏတဖြာꩻ ဟွုန်ဗာႏတရာꩻတဲင် ထီႏသာႏသနာႏယို မတ်ပီရတနာႏတွိုက် မဲလ္လꩻတရာꩻ ယူႏဒုမ်ဟို့ꩻဆာ နွို့ဗျ်ရဟန်ꩻ ကျိုꩻစာꩻမွေးကမ္မဋ္ဌာန်ꩻ၊ တနီꩻကို ကျွꩻတုင်ꩻသွမ်ꩻ သာဝဝတ္ထိဝီင်ꩻကို၊ လွေꩻထီႏထိုꩻ တကာႏမတဖြာꩻ အွ်ႏခြွိုင်းတရေꩻခါꩻနမ်း၊ တထိင်ꩻတွ်း မဲ့ဣန္ဒြေႏ ထွားစဲင်းငါႏတဲင် နမ်းကိုကိလေႏသာႏဖိုင်ႏ မဲ့သေထွိုင်ႏလွန် နိစ္စက်စွန်ႏအဗွေႏ နမ်းသꩻနီပါꩻခိုးလျား၊ မဲန်အိုင်ဒုမ်သာႏသနာႏဘောင်ႏကို၊ ကဆူꩻဆွာꩻ၊ အဆွန်ႏဆွာꩻ၊ စူမီႏခင်ႏမီႏဆွာꩻ သင်္ကန်ꩻတဲ့ သေပဆူႏဒုမ်၊ သေလူးဒုမ်ထီ၊ အသွꩻရဟလ္လင်ဖိုင်ႏ ထင်ႏထီႏ အွံလွေꩻထေ့ဘုရာꩻထျꩻ၊ လွ်းဟွုန္ထေ့ပါ အခရာႏ၊ ဘုရာꩻရိုꩻ- "ရဟန်ꩻဟွေး- ဈာန်ႏမဂ်ဖိုလ်ႏ လꩻတွ်းဒွိုန်းသား ကွင်လိုꩻမူႏနွ်ꩻ အဆန်ꩻတွ်း၊ အွိုးစခါ ဈာန်ႏအဘိညာဏ်ႏလꩻထွူသား လွေꩻသဲင်ꩻဒါႏထာꩻ မို့ꩻလောင်းကီသားတန်သွူမီႏတဲ့ ပွိုးဝိသဘာဂအာႏရုင်ႏတဲင် ဈာန်ႏထဲ့ထွူ လꩻအီဗာႏထာꩻဒုက္ခ၊ တလီꩻကမာꩻဖွ်ꩻနွောင်ꩻ မေရုကောင်နွ်ꩻ ကောင်တတွာဒျာႏ လမ်းပေႏနွ်ꩻ ဝင်ꩻတတွက်တွ်း၊ တလီꩻကကွီဝန်နွောင်ꩻ တဖြေꩻမွူးတန္နဝ်ꩻ သီင်ႏကဒေါ့ꩻဒါႏ ခြောင်ဖင်ႏထျꩻယို တင်ꩻတတွက်တွ်း၊ မွူးကမာꩻသေ့ꩻနွောင်ꩻ ထီသမုဒ္ဒရာႏနွ်ꩻ နောင်တီင်နေးစားနွ်ꩻ ဝင်ꩻတတွက်တွ်း၊ လိုꩻက္လောင်းမီႏတဲ့ ဝင်ꩻမာꩻတဗော့ꩻနွောင်ꩻ၊ လိုꩻမိန္တန်မီႏတဲ့ ဝင်ꩻမာꩻဖေ့နွောင်ꩻအမိန်ꩻ၊ ဟောꩻဖေႏဇာတ်ယို- အွိုးစခါ ဗာရာဏသီခမ်း ဗြဟ္မဒတ်ခုန်စိုး သဌေꩻပိုတဖြာꩻ အွန်ႏကျ်လမ္ပာႏထန္တခြာ၊ မာꩻနမ်းရသေ့ꩻ၊ ထူႏကသိဏ ပရိကမ္မ မာꩻတရာꩻ လꩻဈာန်ႏအဘိညာဉ်ႏ အိုင်ဟိမဝန္တာႏတခြာတန္ကို၊ တွိုႏတနီꩻ မဲန်သုင်ꩻအဆိုမ်ဓါတ္တဲင်၊ ဗျ်သင်္ကန်ꩻသွ်ႏဖေ့ꩻစိုမ်ႏတနျာႏ၊ ပ္လီင်တဖဲ့ꩻလောင်းအွန္ဒင်ႏ ကေသီင်ႏဖြီင်းဖြို့ꩻ၊ အွာဟွ်ကထိုမ်း၊ တုင်ꩻသါမ်ꩻဝီင်ꩻကို၊ တွိုႏခုန်တခါꩻငွါ ခန္ထင်္ထီႏနိဿက် ပင်ꩻထင်ႏဟောလောင်း အွန်ႏအိုင်ခင်ႏလမ္မျတ်၊ လူႏသွမ္မျစ္စားထွူ ဖေႏကသွန်သင်ဆုမ္မꩻဖေႏပါ ခုန်ခွိုꩻဖိုင်ႏအတွက်တာႏ ပင်ꩻအွန်ႏအိုင်သော့ꩻအခြမ်အူႏယီန်ႏကို၊ အိုင်လꩻခန်း တဆီသူနေင်ႏ။ တွိုႏတနီꩻ ခမ်းထီခိုးလျား ခုန်အီႏလွေꩻမာꩻငိမ်ꩻ၊ သွမ္ပန္ကိစ္စ ဖေႏတာႏဝုန်ႏသေꩻ မုဒုလက္ခဏကမိန္ဒာႏနင်ꩻတန်၊ တနီꩻသားကို ရဲန်ꩻစုင်ႏလင်ႏထွူသွမ်ꩻတဲင် ရသေ့ꩻသမ်းနန်ꩻလွန်၊ မုဒုလက္ခဏ လူးထီနွုမ်ꩻဟွမ်၊ မွန်းပျင်နမ်းထွူ ဗီင်ႏတလွာထာꩻသွမ်ꩻခုင်ႏထျꩻ၊ အခိင်ႏထင်ႏတွိုႏ ရသေ့ꩻကျွꩻလွန်၊ သင်္ကန်ꩻငွ်းသင်ႏ နွို့ပတဲင်ပေါက် ချင်္သေ့ꩻကတူႏဖဲ့ꩻ၊ ရသေ့ꩻတဲ့ တွိုႏတခါꩻငွါ နင်တန္တဲ့ထွိုင်ႏ၊ အနီꩻဖြဲထီထူးယာႏ လွလင်ꩻ၊ ဝိသဘာဂအာႏရုင်ႏ ဆွမ်ꩻဆုမ်ႏခန်းဒျာႏရသေ့ꩻ၊ ကိလေႏသာႏအနျထန်ႏ၊ ဗိုန်ပါꩻခွꩻဝꩻသီင်ႏ၊ ဗိုဉ္စောက်အာႏဒေ့ꩻလုတ်ꩻ၊ တအိုင်လင်ꩻတွ်းဒုမ်၊ အိုင်ထွိုင်ႏထူႏဒဲန်၊ အွ်ႏပျသာဒ်လောင်းလင်ꩻ၊ သဲင်္ခင်ႏဗာႏထာꩻ၊ တွိုႏခြမ်အူႏယီန်ႏ၊ ဗီင်ႏပ္လာႏဒျာႏထာꩻ ကျောင်ꩻသီင်ႏလာႏကို၊ ပဲန္ဒာလောင်း၊ အမ္ဒုမ်ဒဲန် လꩻစွန်ႏနွုတ်ꩻနီꩻ၊ ခးမ္ထီငိမ်ꩻ ခုန်သဲင်္ချာ လီပ္ပါဝီင်ꩻထွူ လွေꩻထေ့ရီးရသေ့ꩻ၊ အွန်ႏဖွတ်ꩻဖျိုးကျောင်ꩻထွူမꩻ ထင်ႏထီႏရသေ့ꩻအွ်ႏပ္လာႏထာꩻ၊ စမ်ႏအစူခင်ႏရီ "သꩻဒုက္ခငါႏထာꩻအမျိုꩻမျ်ꩻ"။ ရသေ့ꩻထင်ႏဒေါ့ꩻနဲ နန်းဗာႏတွ်းဗွေႏ "လꩻဗာႏဒျာႏ"ရိုꩻတဲင် ပင်ꩻသဲင်ꩻရသေ့ꩻဟောကို ခြွိုင်းစုင်ႏလင်ႏထွူ မုဒုလက္ခဏ၊ ထွန်ႏထွားဟွ်ဟွ်ပါရသေ့ꩻ၊ ရသေ့ꩻတွမ်ႏနင်ꩻတန် လင်ႏထိုꩻခန်းဒျာႏဟော။ "ဝါꩻဗွေႏ နီအွ်ႏလိုႏလမ်းတဗာႏ" လွေꩻကွီခုန်ထျꩻ၊ ခုန်ဖေႏခန်း ခွန္တန်သိုမ်းတဗာႏ၊ နင်ꩻတန်ရိုꩻ "ပသို့ꩻငါႏ" လွေꩻကွီနမ်ႏဗုင်ꩻဖိုင်ႏ၊ တေားထန်ႏထွူအနွုမ်ꩻသီင် ထိုမ်ဗွေယင်းဟမ်ႏ၊ အဆီင်ႏနွ်ꩻ အွ်ႏလိုႏသူႏဖိုးအေႏ၊ အွ်ႏလိုႏဒါ၊ အွ်ႏလိုႏကူႏ၊ အွ်ႏလိုႏဟွမ်ထာꩻဒါ၊ အွ်ႏလိုႏထီဖွိုင်ꩻ၊ အွ်ႏလိုႏထီလူး၊ အွ်ႏလိုႏဒဲန်ဟန်ႏ၊ ထွန်ႏရသေ့ꩻလျ် တမျိုꩻထွူတမျိုꩻ စုင်ႏလင်ႏထွူ တွိုႏခင်ႏလမ်းဗီင်ႏကို နင်ꩻတန်ခွုမ်ရသေ့ꩻလျ်ကာႏဆွန်ႏ၊ ထွို့ꩻလွန္ထေ့အထျꩻ။ "နာꩻယို သေတွ်းရဟန်ꩻဘဝ၊ သေတွ်းလိုꩻကိလေႏသာႏစင်ႏက္လဲႏဘဝနွ်ꩻက" တွိုႏနွ်ꩻခါ ရသေ့ꩻယူႏလꩻအနမ်း၊ "ကိလေႏသာႏယို မာꩻခေ့ꩻလိုꩻမဲ့၊ ကာမဆန္ဒနီဝရဏယို အွန်နွို့တဖူꩻကျမ်ꩻ၊ ပေါႏခွေအွ်ႏလွေꩻငါထဲင်းးနွ်ꩻ အွ်ႏအပါယလိတ်ꩻပါꩻကို အွော့ꩻကတူႏငါတဲ့ အီႏတနွောင်ꩻတွ်း၊ ယူႏထွူနျ်းနွ်ꩻတဲင် ဟဲ့ꩻနင်ꩻတန် လွေꩻအပ်ချာယင်းခုန်၊ ဒေါ့ꩻလွန်ꩻပါငွ်းနျ်းယို- ၆၆။ ဧကာ ဣစ္ဆာ ပုရေ အာသိ၊ အလဒ္ဓါ မုဒုလက္ခဏံ။ ယတော လဒ္ဓါ အဠာရက္ခီ၊ ဣစ္ဆာ ဣစ္ဆံ ဝိဇာယထ။ မဟာရာဇ- ခုန္တန်၊ အလဒ္ဓါ- ခါးလားကလꩻ၊ မုဒုလက္ခဏံ- မုဒုလက္ခဏ၊ ပုရေ- ရီးခါနွ်ꩻ၊ အာသိ- အွ်ႏဒျာႏ၊ ဣစ္ဆာ- မဲလ္လꩻ၊ ဧကာ- မုဒုလက္ခဏတမျိုꩻဒုမ်ꩻ၊ ယတော- တဲႏစွန်ႏ၊ လဒ္ဓါ- ကလꩻ၊ အာဠာရက္ခီ- မဲ့စဲင်းနားဆꩻ မုဒုလက္ခဏ၊ အထ-နွ်ꩻခါမꩻ၊ သာ- ဝွေꩻမုဒုလက္ခဏနွ်ꩻ၊ ဝိဇာယထ- မာꩻထွာလွန်ဖေႏ၊ ဣစ္ဆာဣစ္ဆံ- ထာꩻမဲလ္လꩻအာမျိုꩻအာစားသွူ။ ဘုရာꩻလောင်ꩻတဲ့ ပေါႏအပ်ချာထွူ မုဒုလက္ခဏတလဲင်္ချင်ꩻ၊ လောႏမာꩻပေါႏလွန်ယင်းဈာန္တဲင် အိုင်မို့ꩻလောင်း သွန်သင်ဆုမ္မꩻလင်ꩻထွူခုန်၊ ကွင်ႏလွေꩻထိုꩻခန်းဒျာႏ ဟိမဝန္တာႏတခြာတန်ကို၊ တသက်လိုꩻ သဲင်္ချာတွ်းဒုမ်လိုꩻခြာ၊ ထင်္သီ လဲးန္ကီဗြဟ္မာႏ၊ တရာꩻအနာ ပျꩻပါသစ္စာႏ၊ ဗွေႏရဟန်ꩻ ဗွိုႏသာႏသနာႏနွ်ꩻ လꩻအရဟတ္တဖိုလ်ႏ၊ ဗာရာဏသီႏခုန္နဝ်ꩻ သဲင်္ထွာအာနန္ဒထေရ၊ မုဒုလက္ခဏနွ်ꩻ သဲင်္ထွာ ဥပ္ပလဝဏ်ထေရီ။ နံပါတ်(၆၆) မုဒုလက္ခဏဇာတ်ထွူယို။