မွိုးဖါယားဒွါႏ
=လိုꩻပေႏအစ အဆရာႏ မတ်လွသွော့ဒျာႏ မွိုးတွမ်ႏဖါနော။ = လိုꩻပေႏကဒါႏ ငဝ်းတွံႏငွါ ထျꩻထျꩻနဝ်ꩻခါ မွိုးဖါနီပါꩻနော။ = လိုꩻပေႏလက်ꩻလဲဉ် ကလိမ္မာႏ မွိုးတွံႏဖါဒျာႏ သွဉ်ဖေႏနေနေ။ = လိုꩻပေႏလော်လဲ ကဖင်းထာꩻ မွိုးဖါနီပါꩻ သွဉ်ဖေႏဒျာႏနော။ လင်္ကာႏအဓိပ္ပါယ်ႏနဝ်ꩻ လိုꩻပေႏသီး ပထမအဆရာႏနဝ်ꩻ ထွာမွိုးတွံႏဖါ၊ လိုꩻပေႏကဒါႏလွဉ်ငဝ်းငွါ အဒေါ့ꩻအဖြဝ်ႏနဝ်ꩻခါ ဒါႏလွဉ်မွိုးဖါထျꩻနေနေ၊ ကွပ်နဝ်ꩻမꩻ လောကနီတိဆရာႏ ဒေါ့ꩻသေခါꩻ နုဲးဆလယိုနဝ်ꩻသွူ။
(အမွိုးမူႏယို မီႏယွုတ်နဝ်ꩻလဲင်ႏခါ အပိုထာꩻဒေါ့ꩻ ထာꩻဖြဝ်ႏ ကျံꩻဒျာႏ၊ မွိုက်ဒျာႏ၊ ဝွေႏဒျာႏတဲ့နော၊ အဖါမီႏယွုတ်နဝ်ꩻ အပိုကခွုမ်မာꩻထာꩻနဝ်ꩻလဲ့ ကျံႏဒျာႏ မွိုက်ဒျာႏ ရွိုင်ꩻဒျာႏ ရိုꩻပီးနဝ်ꩻသွူ။) (တပုဒ်နဝ်ꩻ မီႏမဲဉ်သေ ထီယော့ထီဖွိုꩻနဝ်ꩻ ထွို့ꩻထွားဗိုမွူးလဲ့ သေဒျာႏ၊ မီႏမဲဉ်သေ အမျိုꩻယွုတ်အမျိုꩻမျတ်နဝ်ꩻ ထွားအခွုမ်အမာꩻ၊ အဒေါ့ꩻအဖြဝ်ႏနဝ်ꩻ သေဒျာႏ၊ မီႏမဲဉ်သေ ပညာႏအဝ်ႏ တအဝ်ႏတဝ်းနဝ်ꩻခါ ထွားနာႏဗော့ꩻ အဒေါ့ꩻထာꩻနဝ်ꩻ သေဒျာႏ၊ ဟံႏဟဝ်တဟဝ်တဝ်း မီႏမဲဉ်သေနဝ်ꩻ ထွားမီꩻပွူး ဟဝ်တဟဝ်တဝ်းနဝ်ꩻ သေဗာႏ၊ လောကနီတိဆရာႏ အွဉ်ႏနယ်သေꩻခါꩻနုဲးနဝ်ꩻသွူ။)
မဉ်ႏထောက်ထွားနုဲး လောကနီတိဆရာႏ ကအွဉ်ႏနယ်ပျꩻနဝ်ꩻခါ ကထွာမွိုးဖါသီးယို ထာꩻလိန်ႏမာႏ ထာꩻလက်ꩻလဲဉ် လောကအထီႏအဟွုန် ဗဟုသုတနဝ်ꩻ အဝ်ႏလိုႏငါႏ မရေႏမရာႏနဝ်ꩻသွူ။ "ပိုမဉ်ႏတဟဝ်တဝ်း ထွာမွိုးဖါတာႏဝွန်ႏ၊ တပဲ့ꩻမဉ်ႏတဟဝ်တဝ်း ထွာဆရာႏတာႏဝွန်ႏ၊ ဒုံဆောင်ႏလိုꩻအမျာꩻဖုံႏ မဉ်ႏတဟဝ်တဝ်း ထွာဒုံလိုꩻတန်တာႏဝွန်ႏ" နီပအိုဝ်ႏဖုံႏ ဒေါ့ꩻဖြဝ်ႏလွနုဲးနဝ်ꩻလဲ့ အဝ်ႏနဝ်ꩻသွူ။ ကွပ်နဝ်ꩻမꩻ လိုꩻပေႏ လိန်ႏမာႏလက်ꩻလဲဉ်မုꩻ၊ လိုꩻပေႏလော်လယ်မုꩻ၊ တနာႏတဝ်းမွိုးဖါငဝ်းနဝ်ꩻ အပါႏလိုꩻပေႏတမွေးတဝ်း၊ အပါႏဒျာႏလိုꩻတန်နဝ်ꩻသွူ။
ကထီႏဗာႏ ကမော့ꩻဗာႏ ကတလူႏထေ့ဗာႏ လိုꩻပေႏတအုံတဝ်းကျောင်ꩻ ဆရာႏမီႏမာꩻကျံꩻလဲ့ လွေꩻတငီႏတငါတခြာကိုတဲင် ဗေင်ႏတငီႏတငါဒျာႏ ဝင်ꩻသွို့ꩻကို တဒုဲကို၊ မွိုးဖါလဲ့ တနွောင်ꩻလꩻတဝ်း၊ ဆရာႏလဲ့ တနွောင်ꩻလꩻတဝ်းနဝ်ꩻသွူ။ လိုꩻပေႏကထွာဗာႏနုဲးနဝ်ꩻနဝ်ꩻ (၁) မွိုးဖါယားဒျာႏ၊ မွိုးဖါသွဉ်ဖေႏဒျာႏလဲ့ အဝ်ႏ၊ (၂) လမ်းသောင်လမ်းထျꩻ သွꩻပေႏယားဒျာႏလဲ့ အဝ်ႏ။
အမုဲတဗာႏ "မွိုးဖါယားဒျာႏ"ကရိုꩻနဝ်ꩻ ပထမလိုꩻပေႏနဝ်ꩻ မွိုးဖါထင်ႏအပ်ဗွေႏဗွန်ထျꩻ၊ အုံကျောင်ꩻသွဉ်လိတ်လုဲင်ꩻတဲင် ကထင်ႏည လစ်ꩻငတ်ꩻလာ တနေင်ႏနဝ်ꩻလဲင်ႏခါ ကထွာမွိုးဖါနဝ်ꩻ မဲဉ်ဟဲ့ꩻလဲဉ်းအပို၊ မဲဉ်အွဉ်ႏတီလဲဉ်းဖိုး၊ မဲဉ်အွဉ်ႏတီလဲဉ်းပနားတဲင် ဗွေႏဗွန်ထျꩻတဲ့ တကွီခွင်ꩻတဝ်း၊ တထင်ႏလဝ်းတဝ်း၊ ဟဲ့ꩻတေ့ꩻအပို၊ ချောက်တေ့ꩻအပို၊ ယင်ဟန်ႏနဝ်ꩻ - "မဲဉ်လꩻစူသွို့ꩻနဲ့၊ မဲဉ်လꩻနားရီႏနဲ့၊ မဲဉ်လꩻကဲက်ဆဲက်နဲ့၊ မဲဉ်လꩻဆဲင်ꩻခွမ်ꩻလာꩻနဲ့"ချောက်သဲင်ꩻအပိုနုဲးနဝ်ꩻသွူ။ မွိုးဖါကထင်ႏဟဲ့ꩻအာအာ၊ ကထင်ႏချောက်အာအာတဲင် လိုꩻပေႏနဝ်ꩻ ဆရာႏထျꩻလဲ့ တကွီခွင်ꩻတဝ်းတဲင် လွင်းတခွန်ꩻခန်းထာꩻနဝ်ꩻသွူ။ တွိုႏနဝ်ꩻခါ ဗွေႏဗွန်လဲ့ အွဉ်ႏအသွꩻသဲင်ꩻစွိုင်နဝ်ꩻသွူ။ တွိုႏနဝ်ꩻတဲင် ကထွာမွိုးဖါသားလဲ့ ငမ်းပါꩻစွိုင်အပိုတဲင် သွဉ်ဖေႏအပို၊ ထွဉ်ႏအပိုဖင်းထာꩻနဝ်ꩻသွူ။ တောင်ꩻသေꩻ။ လိုꩻပေႏကဖင်းဒါႏထာꩻနဝ်ꩻ တဲႏစစနဝ်ꩻသွူ။
အမွိုးအဖါကထင်ႏသွဉ်ဖေႏနုဲင်းနဝ်ꩻတဲင် အပိုတအုံတဝ်းဒွုမ်လမ်း၊ ဖင်းလော်လယ်စွဉ်ႏဒျာႏ တခြာကိုနဝ်ꩻသွူ။ အသွပေႏကသဲင်ꩻဟဲ့ꩻသား ကစွိုင်သားလဲ့ ပြန်ႏသဲင်ꩻချာခြေင်င်ဒျာႏကျောင်ꩻနဝ်ꩻသွူ။ တွိုႏနဝ်ꩻခါ ဗွေႏဗွန်တဟဲ့ꩻဗွုန်ႏတဝ်းဒွုမ်တဲင် လိုꩻပေႏကလွင်းထာꩻနဝ်ꩻ အုံလခန်ꩻခမ်းနဝ်ꩻသွူ။ ကထွာမွိုးဖါတဲ့ ထင်ႏပရိယာယ်ႏခန်း အဆရာႏဗွေႏဗွန်ထျꩻ "လိုꩻပေႏနဝ်ꩻ အွဉ်ႏထင်ႏကျောင်ꩻလဲ့ တလꩻတဝ်းဩ၊ အသွꩻသဲင်ꩻဟဲ့ꩻလဲ့ ထိုꩻတငီႏတငါထာꩻဩ၊ ခွေသွဉ်းအွဉ်ထင်ႏလဲ့ တလꩻတဝ်း၊ မဉ်ႏအွဉ်ထင်ႏနွိုင်ႏနွိုင်ႏလဲ့ သမ်းဖင်းလော်လယ်ထာꩻ တခြာကိုနဝ်ꩻသွူဩ" အဆရာႏဗွေႏဗွန်လဲ့ ထင်းဒျာႏအမွေးတဲင် အွဉ်ႏစွꩻဗာႏအခွင်ꩻနဝ်ꩻသွူ။
တွိုႏနဝ်ꩻခါ လိုꩻပေႏနဝ်ꩻ သဲင်ꩻအုံစလမ်းတဲင် အွဉ်ႏတီဖိုးလဲ့ အပျောႏဒျာႏ၊ အွဉ်ႏတီပနားလဲ့ အသွင်ႏဒျာႏ၊ အွဉ်ႏမာꩻထာꩻမာꩻလဲ့ အပျောႏဒျာႏ အကုဲးဒျာႏနဝ်ꩻသွူ။ မွူးနီꩻကထင်ႏအာ မွူးလာကထင်ည လိုꩻပေႏနဝ်ꩻ တီဖိုးလွꩻ တီပနားလွꩻ၊ အွဉ်ႏမာꩻထာꩻမာꩻလဲ့ တမဲဉ်မာꩻတဝ်းဒွုမ်နဝ်ꩻသွူ။ တွိုႏနဝ်ꩻတဲင် ကထွာမွိုးဖါခွန်းတဖျ လောက်ꩻခန်းအပိုနဝ်ꩻသွူ။ အပိုလဲ့ လꩻလဲဉ်းအနယ်ꩻ အမွိုးအဖါထျꩻတဲင် အမွိုးအဖါကသွဉ်ဖေႏသေꩻခါꩻအတွိုင်ꩻ ဖင်းလော်လယ်ခန်းထာꩻ တခြာကို၊ ဝင်ꩻသွို့ꩻကို၊ တဒုဲင်ကို၊ ဒဲ့ꩻအံႏတငီႏတငါတောဒျာႏ ဝင်ꩻတဒွီ ဝင်ꩻတဲင်ပူႏ ဝင်ꩻမောက်ꩻစောက်ꩻနဝ်ꩻသွူ။ လိုꩻပေႏကထင်ႏမာꩻအာနုဲင်းနဝ်ꩻတဲင် ကထွာမွိုးဖါလဲ့ သꩻဆင်ꩻရယ်ꩻလွဉ်ꩻဗာႏစွဉ်ႏဒျာႏ အပိုတာႏ စွုမ်ႏနီꩻနီꩻနဝ်ꩻသွူ။ ကခံႏစာꩻဗာႏနုဲးနဝ်ꩻလဲင်ႏခါ ထမုဲꩻမာꩻ နမ်းမာꩻချာဒျာႏနဝ်ꩻသွူ။ လိုꩻပေႏနဝ်ꩻလဲင်ႏခါ မွိုးဖါမီႏချော်ꩻလဲ့ သမ်းချော်ꩻတသေႏသေႏ တဒါႏတဝ်း၊ မဉ်ႏမာꩻကျံꩻလဲ့ သမ်းဖင်းလော်လယ်ထာꩻ၊ ကထင်ႏနွောင်ꩻတဝ်းဒွုမ်အပိုပေႏနဝ်ꩻလဲင်ႏခါ ထင်ႏပသာဖျင် အဆရာႏဗွေႏဗွန်ထျꩻ၊ ကထွာဗွေႏဗွန်လဲ့ တကင်ꩻသာႏတဝ်းတဲင် လက်ခံႏဗာႏချာယင်းနဝ်ꩻသွူ။ လိုꩻပေႏနဝ်ꩻ အကျင်ꩻကုဲလဲဉ်းတဲင် ထင်ႏဖျင်လဲ့ အဆရာႏမီႏအွဉ်ႏဒေါ့ꩻကျံꩻပသာႏတဲင် တမဲဉ်ခံႏတဝ်းဒွုမ်ဆရာႏငဝ်း၊ အဝ်ႏမောင်ꩻစွဉ်ႏဒျာႏ ဆရာႏကဒေါ့ꩻလွုမ်ꩻ ကအီႏဖင်းထာꩻနဝ်ꩻ အဗွေႏဖျင်သေꩻခါꩻလဲဉ်း၊ ရဲဉ်ꩻသေꩻခါꩻလဲဉ်း အထာꩻခြိုꩻ၊ အဒို့ꩻအဒါနဝ်ꩻသွူ။
ကထင်ႏဖင်းဆုဲꩻနဝ်ꩻ အဖင်းဒျာႏတဖြာꩻဒျာႏ၊ အဖင်းရိုꩻရိုꩻဒျာႏ တမွေးတဝ်းဒွုမ်၊ အော်ပါအသွꩻ၊ ချောက်ကုဲပါအသွꩻနဝ်ꩻသွူ။ တွိုႏနဝ်ꩻလဲင်ႏခါ ဆရာႏလဲ့ တနွောင်ꩻတဝ်း၊ မွိုးဖါဆုံꩻမꩻသွဉ်သင်လဲ့ တလꩻတဝ်း၊ ဆရာႏလဲ့ တနွောင်ꩻလꩻတဝ်းတဲင် အတန်လွဉ်စွဉ်ႏ ထာꩻဖင်းလော်လယ်၊ အတန်လွဉ်စွဉ်ႏ ယားဝင်ꩻသေင်ႏရောင်ꩻသေင်ႏရာꩻနဝ်ꩻသွူ။ နဝ်ꩻသွူတကာႏတဝ်း ပေႏခါနဝ်ꩻ ထွာ"လိုꩻလော်ပေႏ"လဲ့ ကထင်ႏတန်လွဉ်ဖျင်တဲ့ ထွာလွဉ်ဖျင်ဒျာႏ "လိုꩻလော်တန်"နဝ်ꩻသွူ။ ပေႏနေအတွင်ꩻနဝ်ꩻ ယားဝင်ꩻထာꩻပေႏပေႏလဲ့ ကထင်ႏတန်နဝ်ꩻ ယားတန်န်ဝင်ꩻထာꩻနဝ်ꩻသွူ။ ကွဲးညည အကျင်ꩻပါတဲင် စူရုဲးခင်ႏရုဲးတဲင် ဗꩻတွိုႏစွဉ်ႏဒျာႏ ရာဇဝွတ်မုꩻ၊ ထိခွိုက်လွဉ် ဝင်ꩻအမျာꩻစီꩻကန်ꩻ၊ ဒုံစီꩻကန်ꩻ၊ ဆောင်ႏစီꩻကန်ꩻ၊ အစိုႏရစီꩻကန်ꩻဥပဒေႏနဝ်ꩻသွူ။ ကထွာဗာႏနုဲင်းနဝ်ꩻနဝ်ꩻ ကွပ်ပွိုးစွဉ်ႏ မွိုးဖါနဝ်ꩻသွူ။
အမုဲင်(၂) "လမ်းသောင်လမ်းထျꩻ သွꩻပေႏယား"ကရိုꩻနဝ်ꩻ မွိုးဖါယဟန်ႏနဝ်ꩻ ဆုံꩻမꩻပိုလီꩻနဝ်ꩻလဲ့ လက်ꩻလဲဉ်လိန်ႏမာႏဒျာႏ၊ မဲ့လေနားလုဲးဒျာႏ၊ ကွဲႏတွော့ꩻ လမ်းသောင်လမ်းထျꩻ သွꩻပေႏတဟဝ်တဝ်း သံးလွေꩻညီꩻသဲင်ꩻညီꩻဝင်ꩻတဲင် စွဉ်ႏဝင်ꩻကရိုꩻ "အတုမြင်-အတတ်သင်" ထီႏနုဲးဒါႏနုဲးနဝ်ꩻ ပီပီဝင်ꩻ၊ ကွပ်စွဉ်ႏ တုꩻနုဲးထွားနုဲး သွꩻပေႏကခွုမ်ကမာꩻ၊ အဒေါ့ꩻအဖြဝ်ႏနဝ်ꩻတဲင် ကုဲင်ဗာႏနဝ်ꩻသွူ။ ဘုရာꩻကဟော်ꩻသေꩻခါꩻ ဝတ္ထုသက်သေႏနဝ်ꩻ အဇာတသတ်ခွန်မင်ꩻနဝ်ꩻ ပွိုးစွဉ်ႏလွောက်ꩻနာႏလွဉ်ꩻ ဒေဝဒတ်အငဝ်းနဝ်ꩻတဲင်၊ ပွိုးစွဉ်ႏပေါင်ꩻဖောႏဒေဝဒတ်နဝ်ꩻတဲင် မာꩻသီအဖါ၊ စွဉ်ႏနꩻဖြဲ့ꩻအဖါခင်ႏနဝ်ꩻ ဗုဒ္ဓဘာႏသာႏလိုꩻမျိုꩻမန်ႏသမျ သေလွနဝ်ꩻသွူ။
ဒေါ့ꩻမွုန်းဒွိုန်းလိုꩻ တိရစ္ဆာန်ႏမီႏလဲ့ အုံညီꩻလိုꩻမွိုက်တဲင် မွိုက်လွဉ်ꩻနုဲး၊ အုံညီꩻလိုꩻဟဝ်တဲင် ဟဝ်လွဉ်ꩻနုဲးနဝ်ꩻသွူ။ အွိုးစခါ တခိုႏလတခြာကို သေင်ႏမွူးတန်အလောင်းနဝ်ꩻ ဝါႏကီႏအပွီအဝ်ႏတပွီနဝ်ꩻသွူ။ အပွီကိုနဝ်ꩻ ဝါးကီႏပေႏအဝ်ႏသော့ꩻနီဗာႏ၊ တွိုႏတနီꩻခါ တလီꩻတန်ခမ်းကထင်ႏလွဉ်နဝ်ꩻ ဝါးကီႏပေႏနီဗာႏနဝ်ꩻ ပါလွဉ်ꩻခန်းတလီꩻ၊ တလီꩻအီထိုꩻတဲင် တဗာႏနဝ်ꩻ လဲဉ်းလွေꩻခန်း တခွန်ꩻစွန်ကအဝ်ႏအရပ်၊ လင်ꩻထဲ့ခန်း တခွန်ꩻစွန်ကအဝ်ႏအခြာတဲင် တခွန်ꩻစွန်သား ထူႏလွူးသေꩻခါꩻခန်းနဝ်ꩻသွူ။ အွိုးတဗာႏနဝ်ꩻ လင်ꩻထဲ့ခန်း ရသေ့ꩻကအားထုတ်ဒါႏတရာꩻ တောႏရꩻကျောင်ꩻကိုနဝ်ꩻသွူ။ ဝါးကီႏပေႏ တဖူးဝေးနဝ်ꩻ ပွိုးစွဉ်ႏတလီꩻအီထိုꩻနဝ်ꩻတဲင် လဲဉ်းဒျာႏ တဗာႏတထွောင်းင်းနဝ်ꩻသွူ။ ကလဲဉ်းလွေꩻ တခွန်ꩻစွန်သားအခြာ ဝါးကီႏပေႏတဗာႏနဝ်ꩻ အုံညီꩻဗာႏ တခွန်ꩻစွန်တဲင် အဒေါ့ꩻအဖြဝ်ႏလဲ့ ဒေါ့ꩻလဲႏဒျာႏ တခွန်ꩻစွန်ငဝ်းတွိုက်ꩻဝင်ꩻပုံႏ၊ မာꩻသီဝင်ꩻပုံႏနဝ်ꩻသွူ။ မီႏထီႏ လိုꩻလွေꩻသဲင်ꩻထာꩻနဝ်ꩻ အဒေါ့ꩻလဲႏဒွါႏ "ခြေင်းလုဲး၊ ခꩻလုဲး၊ သတ်လုဲး၊ မာꩻသီလုဲး"နဝ်ꩻသွူ။ ကလင်ꩻထဲ့ဒါႏ ရသေ့ꩻတောႏရꩻကျောင်ꩻတဗာႏနဝ်ꩻ အဒေါ့ꩻအဖြဝ်ႏလဲ့ ထွာဒျာႏ သူႏတောႏကောင်ꩻရသေ့ꩻသီး အဒေါ့ꩻအဖြဝ်ႏငဝ်းနဝ်ꩻသွူ။ အမဉ်ႏထီႏဒျာႏ လိုꩻလွေꩻသဲင်ꩻထာꩻလဲ့ အဒေါ့ꩻအဟဲ့ꩻလယ်ႏဒျာႏ " လွဉ်ယိုဟုဲး ထီအဝ်ႏယို၊ အအံႏလဲ့ အဝ်ႏယို၊ အွꩻယိုအံႏယို၊ လွေꩻယိုနဝ်ꩻ တွိုႏအရပ်ယို" အငဝ်းအငွါနဝ်ꩻလဲ့ခါ မဲဉ်ဖေႏအံႏ၊ မဲဉ်ဖေႏအွꩻ၊ မဲဉ်ကူႏညီႏကိုဒျာႏဝင်ꩻနဝ်ꩻသွူ။ ပွိုးပီးနဝ်ꩻမꩻ တိရစ္ဆာန်ႏမဉ်ႏလဲ့ အုံညီꩻဗာႏလိုꩻမွိုက်လဲ့ အထာꩻဒေါ့ꩻ အထာꩻဖြဝ်ႏနဝ်ꩻ ထွာနုဲင်းလိုꩻမွိုက်၊ ကအုံညီꩻဗာႏ သူႏတောႏကောင်ꩻလဲ့ အသꩻလဲ့နဝ်ꩻ၊ အထာꩻဒေါ့ꩻထာꩻဖြဝ်ႏလဲ့နဝ်ꩻ သူႏတောႏကောင်ꩻသꩻဖော်ꩻပါဒျာႏနဝ်ꩻသွူ။ အပီနုဲးကအွဉ်ႏနယ် ဝါးကီႏတဖူးဝေးနဝ်ꩻနေနေ၊ မျက်မောက်ယိုလဲင်ႏခါ လိုꩻပေႏသီး ကထီႏဗာႏ ကဟွုန်ဗာႏနဝ်ꩻ ထီႏလဲႏဒျာႏ ပါꩻထံႏတနတ်၊ ထီႏလဲႏဒျာႏ ပါꩻတွိုက်ꩻခꩻဝင်ꩻ၊ အဟွုန်ဗာႏဒျာႏ ခꩻဝင်ꩻ တွိုက်ꩻဝင်ꩻ စွန်ဝင်ꩻ ခြေင်းထာꩻမီꩻထာꩻမင်းတဲင် ဝွေꩻသီးအသꩻလဲ့ ထွာနုဲးနဝ်ꩻသွူ။ အသꩻထွာနုဲးနဝ်ꩻတကာႏတဝ်း အသွ၊သမ်းဟဲ့ꩻ၊ အသွမ်ꩻသမ်းချောက်၊ အသွꩻသမ်းယားကုဲဖျင်တဲင် ပါလွဉ်ꩻအသွꩻ၊ မာꩻလွဉ်ꩻအသွꩻ၊ အကျင်ꩻကုဲ၊ ကွဲးတန်တန်လွဉ်တဲင် အမွိုးအဖါ ထိန်ꩻချာလꩻတဝ်း၊ မွိုးငဝ်းလဲ့မနာႏ၊ ဖါငဝ်းလဲ့ပဲႏတဲင် တနီꩻခါ ထွာတောဒျာႏ လိုꩻမွိုက်လိုꩻကုဲနဝ်ꩻသွူ။ ကထင်ႏထွာလွဉ်နုဲးနဝ်ꩻခါ ကထွာမွိုးဖါသားနဝ်ꩻ (မီႏအံႏဗာႏလဲ့ သုဲꩻသမ်းရော်ꩻ၊ မီႏနုဲႏဗာႏလဲ့ သံးထွာအယာႏဒူႏ)စွဉ်ႏနုဲးနဝ်ꩻပီဝင်ꩻ၊ မီႏတလက်ခံႏတဝ်းလဲ့ သံးထွာပို၊ မီႏလက်ခံႏဖျင်လဲ့ သံးနိစ္စက်မွိုးဖါဖူးဝေး၊ သံးယားကုဲင်စီꩻပွာꩻရေꩻ၊ ကထွာမွိုးဖါသားနဝ်ꩻ ကွပ်ပွိုးစွဉ်ႏ ပိုမွိုက်နဝ်ꩻတဲင် အသꩻဆင်ꩻရယ်ꩻဗာႏ စွုမ်ႏနီꩻစွုမ်ႏဟာနဝ်ꩻသွူ။ ကအွဉ်ႏနယ်ထွူနဝ်ꩻ မွိုးဖါဟဝ်စွဉ်ႏလဲ့ ပွိုးစွဉ်ႏဒျာႏ လမ်းသောင်လမ်းထျꩻ အသွꩻတဟဝ်တဝ်းတဲင် ထွာဗာႏနုဲးနဝ်ꩻသွူ။[၁][၂]