ယွုမ်းကြွို့ꩻကြꩻမွုန်းဝင်ꩻငဝ်း
"ကေသမုတ္တိသုတ် (ယွုမ်းကြွို့ꩻကြꩻမွုန်း ဝင်ꩻငေါဝ်း)" (က) အွိုးခꩻတလဲင်ႏ- နီဗွေႏဘုရာꩻတွမ်ႏ ရဟန်ꩻသံဃာႏဖုံႏနောဝ်ꩻ ကျွꩻလွေꩻကောသလခမ်း၊ ဖျော်လွေꩻ 'ခွန်ကာလာမ'သီးဒုံတန် 'ကေသမုတ္တိ'၊ ဒုံသားဖုံႏတဲ့ ဗွေႏဘုရာꩻကျွꩻ ဗွေႏသံဃာႏသီးဖျော်တဲင် သꩻရောင်းသꩻရေꩻ ခွေလွေꩻနာꩻလွေꩻ၊ လွေꩻဝုဲင်ႏလွ ဗွေႏဘုရာꩻတွမ်ႏ ဗွေႏသံဃာႏဖုံႏနောဝ်ꩻသွူ။ ဒုံသားဝုဲင်ႏဘုရာꩻထွူ အုံစွူလို့လဲဉ်းတဲင် ကေသမုတ္တိဒုံသား တကာႏတဖြာꩻ လောဝ်းဗွေႏဘုရာꩻနုဲင်းယို- "ဩဗွေႏ- ဘုရာꩻမျတ်ဗွေႏဩ- နီသွဉ်း သီး ကေသမုတ္တိဒုံယိုနဝ်ꩻ ရဟန်ꩻပုဏ္ဏာꩻဖုံႏ ဖျော်လွဉ်မွေးစွဉ်ႏထာꩻ၊ ပေါႏဖျော်လွဉ်လဲ့ အစွိုꩻမုဲင်ꩻမုဲင်ꩻတဲ့ယဝ်း ဟော်ꩻတရာꩻ၊ ခြုဲင်းနယ်ဝွေꩻသီးဝါႏဒ၊ သဲ့ꩻသွမ်ႏဝင်ꩻဝါႏဒ၊ ထီႏဖွီဝင်ꩻဝါႏဒ၊ တေက်ꩻနျꩻဝင်ꩻဝါႏဒ၊ ယားကုဲင်ဝင်ꩻဝါႏဒ၊ အံႏဖြာႏဒျာႏ ဝွေꩻသီးဝါႏဒလွုမ်ꩻဗွေႏ။ ဩဗွေႏ- ဘုရာꩻမျတ်ဗွေႏဩ- လိုꩻနီသွဉ်းသီးဒုံယိုနဝ်ꩻ စေႏတနာႏ သဒ္ဓါႏတရာꩻဟောဝ်တဲင် အစွိုꩻမုဲင်ꩻမုဲင်ꩻလွဉ်တဲ့ယတ်း၊ ကျိုႏဆွုမ်ႏဒျာႏ၊ လွဉ်ထေ့ဒျာႏ၊ လွဉ်ဝုဲင်ႏလွဉ်ကန်းတော့ꩻဒျာႏ၊ သွမ်ꩻတဲ့လောင်ꩻဒျာႏ၊ ကပ်ဒျာႏ၊ ဝွေꩻသီးကဟော်ꩻတရာꩻနဝ်ꩻတဲ့ နာႏဒျာႏဗွေႏဩ၊ ကွဲႏတွော့ꩻ နီသွဉ်းသီးနဝ်ꩻ နာႏသူႏသေတဝ်း၊ အစွိုꩻမုဲင်ꩻမုဲင်ꩻဟော်ꩻတဲ့ သေန်ႏနုဲင်းမွေးဒျာႏလွိုႏလွိုႏတွော့ꩻ အီႏထူႏဗာႏတရာꩻအမျိုꩻမုဲင်ꩻ၊ အီႏနေးဗာႏတရာꩻအမျိုꩻမုဲင်ꩻနဝ်ꩻ ဝွေႏဖန်ႏလွဉ်ꩻတထွꩻတဝ်း၊ ယူႏသူႏသေတဝ်း၊ ထူႏသူႏသေတောဝ်းဗွေႏဩ"လောဝ်းဗွေႏဘုရာꩻနုဲင်းနဝ်ꩻ၊ ဗွေႏဘုရာꩻရိုꩻ- "တကာႏခွန်နင်ꩻ ကာလာမမင်ꩻသီးဖုံႏဟွေး- ဟွုန်ကွို့ꩻဝင်ꩻဒေါ့ꩻတဲ့ ယွုမ်းစွဉ်ႏမွုန်းလုဲင်း၊ စခေါင်ႏစခါ ဒေါ့ꩻလွဉ်ကွို့ꩻလွုမ်ꩻတဲ့ ယွုမ်းစွဉ်ႏမွုန်းဟုဲင်း၊ အထွာဖိုကွို့ꩻလွုမ်ꩻတဲ့ ယွုမ်းစွဉ်ႏမွုန်းလုဲင်း၊ မဲဉ်ႏသော့ꩻကွို့ꩻ လိတ်လုဲင်ꩻပိဋကတ်ကိုလွုမ်ꩻတဲ့ ယွုမ်းစွဉ်ႏမွုန်းဟုဲင်း၊ ယူႏသော့ꩻနေးလယ်ႏကွို့ꩻလွုမ်ꩻတဲ့ ယွုမ်းစွဉ်ႏမွုန်းလုဲင်း၊ ထွားနုဲင်းကွို့ꩻလွုမ်ꩻတဲ့ ယွုမ်းစွဉ်ႏမွုန်းဟုဲင်း၊ ယူႏကွို့ꩻအပွိုင်ယို အပွိုနဝ်ꩻလွုမ်ꩻတဲ့ ယွုမ်းစွဉ်ႏမွုန်းလုဲင်း၊ ဗွန်ပီကွိုꩻတွမ်ႏ နီကယူႏ နီကနစ်သက်လွုမ်ꩻတဲ့ ယွုမ်းစွဉ်ႏမွုန်းဟုဲင်း၊ ဟောဝ်တောင်ꩻထွိုက်ကွို့ꩻလွုမ်ꩻတဲ့ ယွုမ်းစွဉ်ႏမွုန်းလုဲင်း၊ နီကရိုႏသေႏ နီဗွေႏဗွန်(နီဗွေႏစင်ꩻ)ငေါဝ်းကွို့ꩻလွုမ်ꩻတဲ့ ယွုမ်းစွဉ်ႏမွုန်းဟုဲင်း။ ကာလာမမင်ꩻ ခွန်နင်ꩻသီးဖုံႏဟွေး- 'ယိုနဝ်ꩻ အကုသိုလ်ႏတရာꩻတန်ဒျာႏ၊ တရာꩻယိုနဝ်ꩻ အပဲ့စ်အဝ်ႏတန်၊ တရာꩻယိုနဝ်ꩻ လိုꩻဟောဝ်လိုꩻဒါႏ ပညာႏအဝ်ႏသား ကဲ့ꩻရဲ့ꩻသဲ့ꩻသွမ်ꩻတန်၊ မဉ်ႏစူꩻလွဉ်ꩻ တရာꩻယိုနဝ်ꩻ အကျိုꩻအဲဉ်ထဝ်း၊ မဉ်ႏနေးနာႏလွဉ်ꩻ တရာꩻယိုနဝ်ꩻ ထွာအီဒါႏ ထာꩻဒုက္ခ' သီနမ်းတွမ်ႏသီနမ်း မဉ်ႏသေနုဲင်းနဝ်ꩻနဝ်ꩻ ပယ်ႏထိုꩻ(အကုသိုလ်ႏ)တရာꩻနောဝ်ꩻဟုဲင်း။ "ကာလာမမင်ꩻ ခွန်နင်ꩻသီးဖုံႏဟွေး- ခွေအီႏရီသီယို သီလောဝ်းရုဲင်းရုဲင်း ပငါပရာꩻနော၊ 'ထာꩻတထဲ့ꩻလောႏဘꩻ မဉ်ႏထွာသော့ꩻလꩻ လိုꩻသီးသꩻကိုနဝ်ꩻ အကျိုꩻဟောဝ်အဝ်ႏနဲ့၊ အကျိုꩻဟောဝ်အဲဉ်ထောဝ်းနဲ့' 'အကျိုꩻဟောဝ် - အဲဉ်ထောဝ်းဗွေႏဩ' (ခ) ကာလာမမင်ꩻ ခွန်နင်ꩻသီဖုံႏဟွေး- ကွပ်ထာꩻတထဲ့ꩻ လောႏဘꩻ အောဝ်ႏသော့ꩻလꩻ လိုꩻသꩻကိုတဲင် မာꩻသီဝင်ꩻသက်၊ တခွန်ꩻဝင်ꩻတခြိုꩻ၊ ပဲ့စ်မာႏဝင်ꩻပိုမာ၊ ဒေါ့ꩻလဲဉ်ထာꩻ၊ ဝွေꩻနမ်းနမ်းတဲ့ မာꩻနုဲင်းနဝ်ꩻ၊ လိုꩻလင်တဲ့ ဝွေꩻထွဉ်ႏမာꩻနုဲင်းနဝ်ꩻ၊ ဝွေꩻနမ်းတဲ့ မဉ်ႏမာꩻနဝ်ꩻအတွိုင်ꩻ၊ လိုꩻလင်တဲ့ မဉ်ႏမာꩻလွဉ်ꩻနဝ်ꩻအတွိုင်ꩻနဝ်ꩻ 'အီႏထွာထာꩻချမ်ꩻသာႏနဲ့-အီႏထွာထꩻဒုက္ခနဲ" "အီႏထွာ- ထာꩻဒုက္ခ ဗွေႏဩ" ကာလာမမင်ꩻ ခွန်နင်ꩻသီးဖုံႏဟွေး- 'ထာꩻကျံꩻထမ်ꩻ၊ ထာꩻသꩻလျား-ဒေါႏသꩻ၊ မဉ်ႏထွာသော့ꩻလꩻ လိုꩻသီးသꩻကိုနဝ်ꩻ အကျိုꩻဟောဝ်အဝ်ႏနဲ့၊ အကျိုꩻဟောဝ်အဲဉ်ထဝ်းနဲ့' "အကျိုꩻဟောဝ်-အဲဉ်ထောဝ်း ဗွေႏဩ" "ကွပ်ထာꩻကျံꩻထမ်ꩻ၊ ထာꩻသꩻလျား-ဒေါသ၊ အဝ်ႏသော့ꩻလꩻသꩻကိုတဲင် မာꩻသီဝင်ꩻသက်၊ တခွန်ꩻဝင်ꩻတခြိုꩻ၊ ပဲစ်မာႏဝင်ꩻပိုမာ၊ ဒေါ့ꩻလဲဉ်ထာꩻ၊ ဝွေꩻနမ်းနမ်းတဲ့ မာꩻနုဲင်းနဝ်ꩻ၊ လိုꩻလင်တဲ့ ဝွေꩻထွဉ်ႏမာꩻနုဲင်းနဝ်ꩻ၊ ဝွေꩻနမ်းတဲ့ မဉ်ႏမာꩻနောဝ်ꩻအတွိုင်ꩻ လိုꩻလင်တဲ့ မဉ်ႏမာꩻလွဉ်ꩻ နဝ်ꩻအတွိုင်ꩻနဝ်ꩻ 'အီႏထွာထာꩻချမ်ꩻသာႏနဲ့-အီႏထွာထာꩻဒုက္ခနဲ့' "အီႏထွာ-ထာꩻဒုက္ခဗွေႏဩ" ကာလာမမင်ꩻ ခွန်နင်ꩻသီးဖုံႏဟွေး- 'သူႏသေတဝ်းထာꩻ၊ ယူႏချာယူႏငါတောဝ်းထာꩻ၊ မဉ်ထွာနုဲင်းမုဲင်ꩻထွာ၊ ထာꩻလိန်းလွုမ်ꩻ-မောႏဟꩻ၊ မဉ်ႏအဝ်ႏသော့ꩻလꩻ လိုꩻသီးသꩻကိုနဝ်ꩻ အကျိုꩻဟောဝ်အောဝ်ႏနဲ့-အကျိုꩻဟောဝ်အဲဉ်ထောဝ်းနဲ့' "အကျိုꩻဟောဝ်-အဲဉ်ထောဝ်းဗွေႏဩ" "ပွိုးစွဉ်ႏသူႏသေတဝ်းထာꩻ၊ ယူႏချာယူႏငါတဝ်းထာꩻ၊ မဉ်ထွာနုဲင်းမုဲင်ꩻထွာ၊ ထာꩻလိန်းလွုမ်ꩻ-မောႏဟꩻ အဝ်ႏသော့ꩻလꩻ လိုꩻသီးသꩻကိုတဲင် မာꩻသဝင်ꩻသက်၊ တခွန်ꩻဝင်ꩻတခြိုꩻ၊ ပဲ့စ်မာႏဝင်ꩻပိုမာ၊ ဒေါ့ꩻလဲဉ်ထာꩻ၊ ဝွေꩻနမ်းတဲ့ မာꩻနုဲင်းနဝ်ꩻ၊ လိုꩻလင်ဖုံႏတဲ့ ဝွေꩻထွဉ်ႏမာꩻနုဲင်းနဝ်ꩻ၊ ဝွေꩻနမ်းတဲ့ မဉ်ႏမာꩻနဝ်ꩻအတွိုင်ꩻ၊ လိုꩻလင်တဲ့ မဉ်ႏမာꩻလွဉ်ꩻ နဝ်ꩻအတွိုင်ꩻနဝ်ꩻ 'အီႏထွာထာꩻချမ်ꩻသာႏနဲ့-အီႏထွာထာꩻဒုက္ခနဲ့' "အီႏထွာ- ထာꩻဒုက္ခဗွေႏဩ" ကာလာမမင်ꩻ ခွန်နင်ꩻသီးဖုံႏဟွေး- လောႏဘꩻ၊ ဒေါႏသꩻ၊ မောႏဟꩻ-မဉ်ႏထွာသော့ꩻလꩻသꩻကိုနဝ်ꩻ 'ထွာကုသိုလ်ႏနဲ့-ထွာအကုသိုလ်ႏနဲ့' "ထွာအကုသိုလ်ႏ ဗွေႏဩ" "အကုသိုလ်ႏနဝ်ꩻ အပဲစ်အဝ်ႏ၊ အကုသိုလ်ႏနဝ်ꩻ ပညာႏအဝ်ႏသား သွမ်ꩻသဲ့ꩻကဲ့ꩻရဲ့ꩻ၊ အကုသိုလ်ႏနဝ်ꩻ အမာꩻဒုက္ခဒါႏလိုꩻနောဝ်ꩻသွူ။ (ဂ) ကာလာမမင်ꩻ ခွန်နင်ꩻသီးဖုံႏဟွေး- ထာꩻတထဲ့ꩻလောႏဘꩻမွေးတဝ်း-အလောႏဘꩻ (အလောႏဘꩻ-သꩻဟောဝ်) မဉ်ႏထွာသော့ꩻလꩻ လိုꩻသီးသꩻကိုနဝ်ꩻ မာꩻသီတဝ်းဝင်ꩻသက်၊ တခွန်ꩻတဝ်းဝင်ꩻတခြိုꩻ၊ ပဲ့စ်မာႏတဝ်းဝင်ꩻပိုမာ၊ ဒေါ့ꩻလဲဉ်တဝ်းထာꩻ၊ ဝွေꩻနမ်းနမ်းတဲ့ လွောက်ꩻနာႏနုဲင်းနဝ်ꩻ၊ လိုꩻလင်တဲ့ ဝွေꩻထွဉ်ႏလွောက်ꩻနာႏနုဲင်းနဝ်ꩻ၊ ဝွေꩻနမ်းတဲ့ မဉ်ႏလွောက်ꩻနာႏနဝ်ꩻအတွိုင်ꩻ၊ လိုꩻလင်တဲ့ မဉ်ႏလွောက်ꩻနာႏလွဉ်ꩻနဝ်ꩻအတွိုင်ꩻနဝ်ꩻ 'အီႏထွာဒျာႏ ထာꩻချမ်ꩻသာႏ'နောဝ်ꩻသွူ။ ကာလာမမင်ꩻ ခွန်နင်ꩻသီးဖုံႏဟွေး- ထာꩻကျံꩻထမ်ꩻမွေးတဝ်း၊ ထာꩻသꩻလျားဒေါသမွေးတဝ်း-အဒေါသ (အဒေါႏသꩻ-သꩻဟောဝ်) မဉ်ႏအဝ်ႏသော့ꩻလꩻ လိုꩻသီးသꩻကိုနဝ်ꩻ မာꩻသီတဝ်းဝင်ꩻသက်၊ တခွန်ꩻတဝ်းဝင်ꩻတခြိုꩻ၊ ပဲစ်မာႏတဝ်းဝင်ꩻပိုမာ၊ ဒေါ့ꩻလဲဉ်တဝ်းထာꩻ၊ ဝွေꩻနမ်းနမ်းတဲ့ လွောက်ꩻနာႏနုဲင်းနဝ်ꩻ၊ လိုꩻလင်တဲ့ ဝွေꩻထွဉ်ႏလွောက်ꩻနာႏနုဲင်းနဝ်ꩻ၊ ဝွေꩻနမ်းတဲ့ မဉ်ႏလွောက်ꩻနာႏလွဉ်ꩻနဝ်ꩻအတွိုင်ꩻ၊ လိုꩻလင်တဲ့ မဉ်ႏလွောက်ꩻနာႏလွဉ်ꩻ နဝ်ꩻအတွိုင်ꩻနဝ်ꩻ 'အီႏထွာဒျာႏ ထာꩻချမ်ꩻသာႏ'နောဝ်ꩻသွူ။ ကာလာမမင်ꩻ ခွန်နင်ꩻသီးဖုံႏဟွေး- သူႏသေဒျာႏထာꩻ၊ ယူႏချာယူႏဒါဒျာႏထာꩻ၊ ထာꩻလိန်းလွုမ်ꩻမောဟမွေးတဝ်း-အမောႏဟꩻ (အမောႏဟꩻ-သꩻဟောဝ်) မဉ်ႏအဝ်ႏသော့ꩻလꩻ လိုꩻသီးသꩻကိုနဝ်ꩻ မာꩻသီတဝ်းဝင်ꩻသက်၊ တခွန်ꩻတဝ်းဝင်ꩻတခြိုꩻ၊ ဒေါ့ꩻလိန်ႏလဲဉ်တဝ်းထာꩻ၊ ဝွေꩻနမ်းနမ်းတဲ့ လွောက်ꩻနာႏနုဲင်းနဝ်ꩻ၊ လိုꩻလင်တဲ့ ဝွေꩻထွဉ်ႏလွောက်ꩻနာႏနုဲင်းနဝ်ꩻ၊ ဝွေꩻနမ်းတဲ့ မဉ်ႏလွောက်ꩻနာႏလွဉ်ꩻနဝ်ꩻအတွိုင်ꩻ၊ လိုꩻလင်တဲ့ မဉ်ႏလွောက်ꩻနာႏလွဉ်ꩻ နဝ်ꩻအတွိုင်ꩻနဝ်ꩻ 'အီႏထွာဒျာႏ ထာꩻချမ်ꩻသာႏ'နောဝ်ꩻသွူ။ ခွန်နင်ꩻသီးဖုံႏဟွေး- အလောႏဘꩻ (လောႏဘꩻမွေးတဝ်း)၊ အဒေါႏသꩻ (ဒေါႏသꩻမွေးတဝ်း)၊ အမောႏဟꩻ (မောႏဟꩻမွေးတဝ်း)၊ သꩻဟောဝ်ဖုံႏနဝ်ꩻ မဉ်ႏထွာသော့ꩻလꩻ သꩻကိုနဝ်ꩻ ထွာဒျာႏကုသိုလ်ႏ၊ ကုသိုလ်ႏနဝ်ꩻ အပဲစ်အဲဉ်ထဝ်း၊ ကုသိုလ်ႏနဝ်ꩻ ပညာႏအဝ်ႏအံႏဖြာႏ၊ ကုသိုလ်ႏနဝ်ꩻ 'အမာꩻချမ်ꩻသာႏဒါႏလိုꩻ'နောဝ်ꩻသွူ။ ခွန်နင်ꩻသီးဖုံႏဟွေး- လောႏဘꩻ၊ ဒေါႏသꩻ၊ မောႏဟꩻ-မဉ်ႏအဝ်ႏသော့ꩻလꩻ သꩻကိုနောဝ်ꩻ ထွာအကုသိုလ်ႏသꩻ၊ ကွပ်အကုသိုလ်ႏသꩻနဝ်ꩻတဲင် မာꩻကာယဒုစရဲက်၊ မာꩻဝစီဒုစရဲက်၊ မာꩻမနော်ꩻဒုစရဲက်၊ ပွိုးစွဉ်ႏမာꩻဒုစရဲက် အပါꩻတဆီနဝ်ꩻတွော့ꩻ ခိုးလျားဗာႏ၊ တရေင်ဗာႏ၊ အာငေါဝ်းဗာႏ၊ တလူႏဗာႏနမ်းဒုက္ခ၊ မော့ꩻဗာႏသꩻနဝ်ꩻသွူ။ ကေသမုတ္တဒုံသားဖုံႏဟွေး- အလောႏဘꩻ၊ အဒေါႏသꩻ၊ အမောႏဟꩻ-မဉ်ႏအဝ်ႏသော့ꩻလꩻ သꩻကိုနဝ်ꩻ ထွာကုသိုလ်ႏသꩻ၊ ကွပ်ကုသိုလ်ႏသꩻနဝ်ꩻတဲင် မာꩻဒျာႏကာယသုစရဲက်၊ မာꩻဒျာႏဝစီသုစရဲက်၊ မာꩻဒျာႏမနော်ꩻသုစရဲက်၊ ပွိုးစွဉ်ႏမာꩻသုစရဲက်အပါꩻတဆီနဝ်ꩻတွော့ꩻ ခွꩻသꩻရျူႏသျူး၊ တရေင်ဗာႏတဝ်း၊ အာငေါဝ်းဗာႏတဝ်း၊ နမ်းတဲ့ချမ်ꩻသာႏ၊ သꩻတဲ့ချမ်ꩻသာႏငါႏနောဝ်ꩻသွူ။ (ဃ) ခွန်ကာလာမသီးဖုံႏဟွေး- နေးတွမ်ႏသꩻ-လောႏဘꩻမွေးတဝ်း၊ နေးတွမ်ႏသꩻ-ဒေါႏသꩻမွေးတဝ်း၊ နေးတွမ်ႏသꩻ-မောႏဟꩻမွေးတဝ်းတဲင် အွဉ်ႏသတိꩻဟဝ်ဟဝ်၊ အရပ်လစ်ꩻဖဲ့ꩻ၊ အစဲင်ႏလစ်ꩻဖဲ့ꩻ၊ ကီတွမ်ႏလ၊ ဌာႏနဆီထွောင်း ကအဝ်ႏဒါႏ လိုꩻလူꩻဗျဟ္မာႏ သတ္တဝါႏသီးအလောင်း၊ နေးတွမ်ႏထာꩻရက်မေတ္တာႏ၊ နေးတွမ်ႏထာꩻသညင်ꩻ ကရုဏာႏ၊ နေးတွမ်ႏထာꩻသꩻရေꩻမုဒိတာႏ၊ နေးတွမ်ႏ (မာꩻရာꩻဒါႏတဝ်း-ကံႏတရာꩻအတွိုင်ꩻဒျာႏ) ဥပေက္ခာႏ၊ နေးတွမ်ႏဗျဟ္မစိုရ်ႏတရာꩻလစ်ꩻပါꩻ၊ အွဉ်ႏသꩻမဉ်ႏအုံနုဲင်း (အရိယာႏတပဲ့ꩻ)နဝ်ꩻနဝ်ꩻ 'သꩻတဗော့ꩻတဝ်း၊ သꩻကြောင်းစင်၊ သꩻငမ်းဗာႏတဝ်းဘေꩻ၊ သꩻနန်းဗာႏတဝ်းရန်ႏ' လꩻသꩻဆွော့ꩻခရာႏ 'လစ်ꩻမျိုꩻ'၊ လစ်ꩻမျိုꩻကရိုꩻနဝ်ꩻ- ၁။ ကွပ်ခွေမာꩻဒျာႏ ကုသိုလ်ႏတဲင် ခွေမဉ်ႏသီနဝ်ꩻ တွိုႏကီဒျာႏလူꩻခမ်း၊ နဝ်ꩻနဝ်ꩻ လꩻပဌမထာꩻသꩻဆွော့ꩻတမျိုꩻ၊ ၂။ ဘဝယိုခါခါ ခွေအုံဒျာႏတွမ်ႏ မေတ္တာႏ၊ ကရုဏာႏ၊ မုဒိတာႏ၊ ဥပေက္ခာႏတွော့ꩻ ငမ်းခရာႏအဲဉ်ထောဝ်း၊ နန်းခရာႏအဲဉ်ထဝ်း၊ ဒုက္ခခရာႏအဲဉ်ထဝ်း၊ အုံဗာႏချမ်ꩻချမ်ꩻသာႏသာႏ၊ နဝ်ꩻနဝ်ꩻ လꩻဒုတိယထာꩻသꩻဆွော့ꩻတမျိုꩻ၊ ၃။ ခွေယိုနဝ်ꩻ မာꩻတဝ်းအကုသိုလ်ႏဟ ဘဝယိုတဲ့ အကုသိုလ်ႏအကျိုꩻ ဒုက္ခမျိုꩻတမော့ꩻနွောင်ꩻတောဝ်း၊ ဘဝငါသူꩻတဲ့ အကုသိုလ်ႏအကျိုꩻ ဒုက္ခမျိုꩻတခံႏဗာႏတဝ်း၊ နဝ်ꩻနဝ်ꩻ လꩻတတိယထာꩻသꩻဆွော့ꩻတမျိုꩻ၊ ၄။ 'မေႏအာ-မေႏနွောင်ꩻ၊ ထီအာ-ထီနွောင်ꩻ' ငေါဝ်းနဝ်ꩻအတွိုင်ꩻ ခွေကမာꩻမာႏ အကုသိုလ်ႏနောဝ်ꩻ အပေႏစား၊ အဖွီစားလွုမ်ꩻ၊ အဆေ့ꩻပေႏလွုမ်ꩻ၊ ခွေကမာꩻ ကုသိုလ်ႏနဝ်ꩻ အတန်စား၊ အသန်စား၊ ခွေကုသိုလ်ႏအာတန်၊ ခွေကမာꩻမာႏဒါႏ အကုသိုလ်ႏကံႏနဝ်ꩻ အမျိုꩻနွောင်ꩻ ခွေကုသိုလ်ႏကံႏနဲ့၊ ခွေတဲးတဲ့ လိုꩻကြောင်းဒျာႏ၊ အုံဗာႏရောင်းရောင်းရျူႏရျူႏဒျာႏ၊ ယွုမ်းအံႏနမ်း လိုꩻဟောဝ်တဖြာꩻ၊ နဝ်ꩻနဝ်ꩻ လꩻစတုတ္ထ ထာꩻသꩻဆွော့ꩻတမျိုꩻ။ ပေါႏအုံတွမ်ႏ ဗျဟ္မစိုရ်ႏတရာꩻလစ်ꩻပါꩻနဝ်ꩻ လꩻထာꩻသꩻဆွော့ꩻလစ်ꩻမျိုꩻနုဲင်းနောဝ်ꩻသွူ။ နီဗွေႏဘုရာꩻ ဟော်ꩻဖေႏတရာꩻနုဲင်းနဝ်ꩻနဝ်ꩻ အစဲင်းစဲ့လဲဉ်းက ပုဂ္ဂိုလ်ႏလင်ကဟော်ꩻ၊ အချော်ꩻလဲဉ်းက ပုဂ္ဂိုလ်ႏလင်ကဒေါ့ꩻ၊ ဟွူန်ရော့ꩻမွေး၊ သꩻရေꩻမွေး ပငါပရာꩻ၊ နမ်းတွမ်ႏနမ်းတဲ့ သꩻဆွော့ꩻချာ ပငါပရာꩻတဲင် လောဝ်းနီဗွေႏဘုရာꩻနုဲင်းယို- "ဩဗွေႏ ဘုရာꩻမျတ်ဗွေႏဩ- ထာꩻသꩻဆွော့ꩻခရာႏ လစ်ꩻမျိုꩻနဝ်ꩻ ယံငါႏ၊ နစ်သက်ငါႏဗွေႏဩ၊ နီသွဉ်းသီး ကားယိုမာꩻငါနဝ်ꩻ ယွုမ်းယိုꩻတဝ်းဒွုမ် ပါꩻငေါဝ်း၊ နေးထူႏဒျာႏ ဗွေႏဘုရာꩻငေါဝ်း၊ အီႏအုံလွေꩻဒျာႏ တွမ်ႏမေတ္တာႏ၊ ကရုဏာႏ၊ မုဒိတာႏ၊ ဥပေက္ခာႏ-ဗျဟ္မစိုရ်ႏတရာꩻ နဝ်ꩻလစ်ꩻပါꩻ ဗွေႏဩ၊ နီသွဉ်းသီးဖုံႏယိုနဝ်ꩻ မတ်ဒျာႏသွော့ ဗွေႏဘုရာꩻ၊ ဗွေႏသံဃာႏသီး ဥပါႏသကာႏဖုံႏနော ဗွေႏသီးဩ"လောဝ်းလွနုဲင်းနောဝ်ꩻဖုံႏသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ တိကနိပါတ်၊ ကေသမုတ္တိသုတ်)[၁][၂]