လိုႏဖေႏအာႏသံႏဃာႏ
၁၃၈၀-ဗွေ၊ ဒဲဉ်ကံလောင်း ( )နီꩻ၊ ပအိုဝ်ႏလိတ်လုဲင်ꩻစွစ်ꩻလီတာႏ ဗဟိုႏသံဃာႏစွိုꩻ ထောင်ထွားရေꩻတရာꩻအမုဲင်(၂) "အဝ်ႏလိုႏဖေႏအာႏ-ဗွေႏသံဃာႏ" တကာႏခွန်နင်ꩻသီးဖုံႏဟွေး- နီဗွေႏဘုရာꩻ ကဟော်ꩻစစ ဓမ္မစကျာႏတရာꩻယာႏနဝ်ꩻ နာႏတရာꩻသားကို လိုꩻပိုပါဒျာႏ ပဉ္စဝဂ္ဂီႏငတ်ꩻပါꩻလွုမ်ꩻ၊ လွိုနဝ်ꩻနဝ်ꩻ လူꩻဖုံႏ ဗျဟ္မာႏဖုံႏဒျာႏ၊ ကွပ်နဝ်ꩻမꩻ ထွာလꩻရဟန်ꩻ(ထွာစင်ꩻ)နဝ်ꩻ အဝ်ႏဒျာႏ ပဉ္စဝဂ္ဂီႏငတ်ꩻပါꩻနဝ်ꩻလွုမ်ꩻ၊ အတွင်ꩻနဝ်ꩻခါ ကဗုဲင်သင်္ကန်ꩻသားနဝ်ꩻ အဝ်ႏပဉ္စဝဂ္ဂီႏငတ်ꩻပါꩻတွမ်ႏ ဘုရာꩻတဆူႏ၊ စုစုခြွဉ်း (လိုꩻလမ်းတခမ်း၊ လူꩻခမ်းသူခမ်း၊ ဗျဟ္မာႏခမ်းနီဆီ၊ ဘွုံႏဘဝ ၂၇-ခမ်းကိုနဝ်ꩻ) အဝ်ႏသူပါꩻနဝ်ꩻလွုမ်ꩻသွူ။
ဆုဲင်ꩻနဝ်ꩻမꩻ သဌေꩻပို ယသတွမ်ႏ အသွꩻ(၅၅)ဖြာꩻဗုဲင်စင်ꩻ၊ ထွာယင်း အပါꩻ(၆၀)၊ တွိုႏနဝ်ꩻခါ နီဗွေႏဘုရာꩻရိုꩻ- "ရဟန်ꩻသီးဖုံႏဟွေး - ဒေသစာႏရီႏ ကျွꩻခီႏလွသွော့၊ လယ်ႏမာꩻလွသွော့ သာႏသနာဟုဲင်း၊ သာႏသနာႏထောက်ထမ်ꩻ ရဟန်ꩻသာႏမဏေႏ ယံဖေႏကပေါႏအာအာ၊ တဖူꩻတလီးနဝ်ꩻ လွေꩻမွုန်းနီပါꩻ၊ လွေꩻညီꩻမွုန်းလို့ဝင်ꩻ နီပါꩻသွံပါꩻ၊ တဖူꩻတလီးနဝ်ꩻ လွေꩻတပါꩻငါ၊ လွေꩻဒျာႏ တပါꩻတထွောင်းထွောင်းဟုဲင်း၊ လယ်ႏဟော်ꩻသွော့တရာꩻဖုံႏဟုဲင်း၊ အွဉ်ႏဗုဲင်ပါသျင်ႏ၊ အွဉ်ႏခံႏပါစင်ꩻဖုံႏဟုဲင်း" ဘုရာꩻနီဗွေႏ ဖေႏတာႏဝွန်ႏနုဲင်းနဝ်ꩻသွူ။ နုဲင်းမုဲင်ꩻမုဲင်ꩻတဲ့ယဝ်း ပေါႏပါꩻစွော့ꩻ၊ ပေါႏပါꩻဒေါ့ꩻရီငါ နာႏတဲ့နဝ်ꩻ၊ နာႏတဝ်းတဲ့နဝ်ꩻ ဟော်ꩻဖေႏတိတ်ꩻတိတ်ꩻစွဉ်ႏတရာꩻ၊ စိုးရီးပန်ချာ ကုသိုလ်ႏကအာ၊ ပါႏရမီႏကပါသားတဲ့ သဘော်ꩻဗွောင်၊ ယွုမ်းလွဉ်ရတနာႏသွံပါꩻ၊ ကိုꩻကွယ်ႏတော ဘုရာꩻ တရာꩻ သံႏဃာႏ၊ ထွာလွဉ်ဗုဒ္ဓဘာႏသာႏ ကွဲအာအာနဝ်ꩻသွူ။ ထွာလွဉ် ဗုဒ္ဓဘာႏသာႏထွူတဲင် အပို အလီꩻ အလင်ꩻ အွဉ်ႏဗုဲင်စင်ꩻ အွဉ်ႏဗုဲင်သျင်ႏဖုံႏတဲ့အဝ်ႏ၊ (အတွင်ꩻနဝ်ꩻခါ) ဘုရာꩻကပွင်ꩻဒါႏ ခမ်းကိုတဲ့နဝ်ꩻ၊ ခမ်းလင်တဲ့နဝ်ꩻ လိုꩻသီးဖုံႏ သꩻစွယ်ꩻခွယ်ꩻနေး လိုꩻလစ်ꩻစား- (၁) ခတ္တိယ-ခွန်ခွိုꩻနွယ်ႏ၊ (၂) ဗြာဟ္မဏ-ပုဏ္ဏာꩻခွိုꩻနွယ်ႏ၊ (၃) ဝေဿ-လိုꩻခြွေခွိုꩻနွယ်ႏ (၄) သုဒ္ဒ-လိုꩻကေန်ꩻခွိုꩻနွယ်ႏ အွဉ်ႏထွော့မာꩻထိုꩻ ခွယ်ꩻလိုꩻလစ်ꩻစားနုဲင်းနဝ်ꩻ။ အတွင်ꩻနဝ်ꩻခါ ခတ္တိယ-ခွန်ခွိုꩻနဝ်ꩻ ဩဇာႏအာႏဏာႏသန်လဲဉ်းဝင်ꩻ၊ ဝင်ꩻရိုꩻ"အမျတ်လဲဉ်းဝင်ꩻ"၊ ကွပ်နဝ်ꩻမꩻ နီဗွေႏဘုရာꩻ သဲင်ꩻကွုတ်ခွန်ခွိုꩻ၊ ဝင်ꩻရိုꩻ"ဘုရာꩻလောင်ꩻမျတ်-ခွန်သီႏထတ်"နုဲင်းနဝ်ꩻသွူ။ ကွဲႏတွော့ꩻ နီဗွေႏဘုရာꩻနဝ်ꩻ တခွယ်ꩻတဝ်းခွိုꩻနွယ်ႏ၊ ဗုဲင်စင်ꩻ လက်ခံႏ၊ ဗုဲင်သျင်ႏ နေးလို့ဒျာႏနဝ်ꩻသွူ။ ကွပ်နဝ်ꩻမꩻ ရဟန်ꩻသံဃာႏကိုနဝ်ꩻ ထွာစွဉ်ႏလိုꩻမျိုꩻစွုမ်ႏ၊ ခွိုꩻနွယ်ႏစွုမ်ႏတဲ့ တွိုႏသာႏသနာႏကိုနဝ်ꩻ ရွုံႏဗုဲင်သင်္ကန်ꩻ၊ စီꩻကန်ꩻသိက္ခာႏ ဗွန်ပီဒျာႏလို့ဝင်ꩻတဲင် ထွာစင်ꩻနုဲင်းနုဲင်းဝင်ꩻ၊ ထွာသျင်ႏနုဲင်းနုဲင်းဝင်ꩻ၊ တခွယ်ꩻတဝ်းခွိုꩻနွယ်ႏ၊ ကားကအဝ်ႏ ထွာလို့ဒျာႏ ဘုရာꩻတပဲ့ꩻတပန်ꩻ ရဟန်ꩻသံဃာႏ၊ စူꩻဒျာႏ သိက္ခာႏ၊ စူꩻဒျာႏဝါႏ၊ တပါꩻတွမ်ႏတပါꩻ တန်တန်ပေႏပေႏ ရိုႏသေႏဒျာႏလို့ဝင်ꩻနဝ်ꩻသွူ။
ခွိုꩻနွယ်ႏစွုမ်ႏ နွို့သော့ꩻသာႏသနာႏတဲင် ရဟန်ꩻသံဃာႏတဲ့ အာမွေးစွဉ်ႏထာꩻ၊ ဗꩻစွဉ်ႏအသိန်ႏတန်ꩻ၊ နီဗွေႏဘုရာꩻတဲ့ လယ်ႏဟော်ꩻတရာꩻ ၄၅-နေင်ႏ၊ တပဲ့ꩻတပန်ꩻ ရဟန်ꩻသံဃာႏ သာရိပုတ္တရာႏ၊ ကုမာရကဿပ-စတဲင် ဓမ္မကထိကသားဖုံႏတဲ့ ခွေဟော်ꩻနာꩻဟော်ꩻတွော့ꩻ နားဗွောင်မဲ့လေ-သူႏသေလိန်ႏမာႏ ထွာဗုဒ္ဓဘာႏသာႏတဲ့ အာမွေးစွဉ်ႏထာꩻ၊ နပ်တွက်အဖြာꩻ သူႏသေသူႏသာဒွုမ်နဝ်ꩻသွူ။ နီဗွေႏဘုရာꩻ ကူꩻနိဗ္ဗာန်ႏထွူ အနေင်ႏနဝ်ꩻ "ဗွေႏမဟာကဿပအွဉ်ငါ - ရဟန္တာႏအပါꩻငတ်ꩻရျာꩻ" မာꩻပထမသံဂါႏယနာႏတင်ႏ၊ ပြန်ႏအွံ နီဗွေႏဘုရာꩻပိဋကတ် တရာꩻတောႏမျတ်ဖုံႏ။ လိုꩻတွိုင်ꩻဖေႏကသေနာႏ ဥပမာႏ ဗွေႏမဟာကဿပရီ- "တရာꩻအပုဒ်ယိုနဝ်ꩻ နီဗွေႏဘုရာꩻဟော်ꩻမွေးနဲ့၊ မွေးတဝ်းနဲ့ တွမ်ႏနီဗွေႏသီး ကဟွုန်ဗာႏ၊ တွမ်ႏနီဗွေႏသီးကဒါႏခါꩻနဝ်ꩻ ဗွန်ပီလို့ဝင်ꩻနဲ့၊ ဗွန်ပီတဝ်းနဲ့" ရဟန္တာႏအပါꩻငတ်ꩻရျာꩻ စွုမ်းပါꩻပါꩻလဝ်းသွိုသွိုချာ-"တွမ်ႏနီသွဉ်းသီး ကဟွုန်ဗာႏ-တွမ်ႏနီသွဉ်းသီး ကဒါႏခါꩻနဝ်ꩻ ဗွန်ပီဒျာႏလို့ဝင်ꩻ ဗွေႏဩ" ဗွေႏမဟာကဿပလဝ်းချာ- "ပေါႏဗွန်ပီလို့ဒျာႏတဲ့ နီသွဉ်းသီး အပါꩻငတ်ꩻရျာꩻ ရွစ်အွံသွိုသွိုလို့ဝင်ꩻဗွေႏဩ" ပေါႏရွစ်အွံထွူတဲ့ ဗွေႏမဟာကဿပ ကေႏညာႏ "ကားယိုမာꩻငါ သံႏဃာႏတဲ့နဝ်ꩻ၊ တကာႏတဲ့နဝ်ꩻ သွဉ်ဗာႏယိုအတွိုင်ꩻ၊ လွောက်ꩻနာႏဗာႏယိုအတွိုင်ꩻ၊ အွဉ်ႏအတီႏယိုအတွိုင်ꩻ"။ ရဟန္တာႏအပါꩻငတ်ꩻရျာꩻတဲ့ "ဟဲ့ꩻ-သာႏဓု"သွံလဲင်ႏ သဘော်ꩻဗွန်ညီႏ အွဉ်ႏအတီႏနဝ်ꩻသွူ။
စဲစ်ဆေꩻတပုဒ်ထွူ ပြန်ႏအွံ၊ စဲစ်ဆေꩻနီသွံပုဒ်ထွူ ပြန်ႏညီꩻ၊ မာꩻလွေꩻနုဲင်းနဝ်ꩻ စွုမ်ႏနီꩻနီꩻတဲင် ညစွဉ်ႏနွုတ်ꩻလာနဝ်ꩻမꩻ ပြန်ႏအွံပိဋကတ်သွံဖုံႏထွူလို့၊ တဲႏနီဗွေႏဘုရာꩻ ကကူꩻနိဗ္ဗာန်ႏ မာꩻလွဉ်ယိုနဝ်ꩻ ယိုခါ လꩻသွူနေင်ႏပေါင်ꩻ ၂၅၆၂-နေင်ႏ၊ နေင်ႏပေါင်ꩻ ၂၅၆၂-နေင်ႏအကို ဒင်ႏသံဂါႏယနာႏ ၆-လဲင်ႏလဲဉ်းသွူ။ ပထမအလဲင်ႏနဝ်ꩻ ဒင်ႏသံဂါႏယနာႏ ရာႏဇဂျိုဟ်ႏခမ်းကို ဗွေႏမဟာကဿပအွဉ်ငါ ရဟန္တာႏအပါꩻငတ်ꩻရျာꩻ။ ဒုတိယအလဲင်ႏနဝ်ꩻ ဒင်ႏသံဂါႏယနာႏ ဝွေႏသာႏလီးခမ်းကို ဗွေႏမဟာယသအွဉ်ငါ ရဟန္တာႏအပါꩻနွုတ်ꩻရျာꩻ။ တတိယအလဲင်ႏနဝ်ꩻ ဒင်ႏသံဂါႏယနာႏ ပါဋလိပုတ်ခမ်း ဗွေႏမဟာမောဂ္ဂလိပုတ္တတိဿအွဉ်ငါ ရဟန္တာႏအပါꩻတရေင်။ စတုတ္ထအလဲင်ႏနဝ်ꩻ ဒင်ႏသံဂါႏယနာႏ သီႏဟီုဠ်ႏခမ်း ဗွေႏမဟာဓမ္မရက္ခိတအွဉ်ငါ ရဟန္တာႏအပါꩻငတ်ꩻရျာꩻ။ အလဲင်ႏယိုနဝ်ꩻ ပြန်ႏအွံထွူ "တဲမ်းခါꩻနေး-ပေႏလာႏလောင်း"။ ပဉ္စမအလဲင်ႏနဝ်ꩻ ဒင်ႏသံဂါႏယနာႏ မန်းခမ်း (ဝေင်ꩻမန္တလေꩻ)ကို ဆရာႏတောႏ ဗွေႏဗွန်ဖြား-ဗွေႏဇာဂရအွဉ်ငါ ရဟန်ꩻအပါꩻပေါင်ꩻ-၂၄၀၀၊ "တဲမ်းခါꩻနေး-လုံးလောင်း"၊ မန်းဟဲ့ꩻ"ပိဋကတ်ကျောက်စာ"ယိုခါအဝ်ႏနေကတဲ့။ ဆဋ္ဌအလဲင်ႏနဝ်ꩻ ဒင်ႏသံဂါႏယနာႏ မန်းခမ်း (ဝေင်ꩻရန်ႏကုန်ႏ၊ ကမ္ဘာအေး-ထမ်း)ကို (သက်တောႏလꩻ-၈၀၊ ဝါႏတောႏလꩻ-၆၀) ညောင်ရမ်းဆရာႏတောႏ ဗွေႏဗွန်ဖြား ဗွေႏရေဝတ-နဝ်ꩻအွဉ်ငါ၊ ရဟန်ꩻအပါꩻပေါင်ꩻ ၂၅၀၀၊ တွဲႏနျꩻခါꩻနေး ပိဋကတ်လိတ်စောင်ႏကိုနဝ်ꩻသွူ။ ကွပ်နဝ်ꩻမꩻ တရာꩻတောႏမျတ် ပိဋကတ်ဖုံႏယိုနဝ်ꩻ ဗွေႏဘုရာꩻဟော်ꩻထန်ႏ အစဲစ်အမဲဉ်ႏဖုံႏဒျာႏတဲင် တဲႏစွဉ်ႏဗွေႏဘုရာꩻစိုးကာႏ သံဃာႏသျင်ႏစင်ꩻ ခွန်နင်ꩻမူႏခို ကံကျင်ꩻနေးထူႏလွဉ်ꩻ "ထေရဝါဒ"ယိုအတွိုင်ꩻနဝ်ꩻသွူ။
ထေရဝါဒသံဃာႏ တကာႏခွန်နင်ꩻသီး ကကိုꩻကွယ်ႏယိုခါနဝ်ꩻ "မာꩻပရိယတ္တိသာသနာႏ၊ မာꩻပဋိပတ္တိသာႏသနာႏ" တာႏဝွန်ႏအဝ်ႏနဝ်ꩻနီပါꩻ၊ ထာꩻမာꩻအဝ်ႏနဝ်ꩻနီစွိုး၊ ဗွောင်လိတ်သွဉ်တွိုက် ချꩻလိတ်၊ သွဉ်လိတ်တဲ့နဝ်ꩻ၊ နင်းကျောင်ꩻ သွဉ်ဖေႏသျင်ႏပေႏ ကော်ပီႏလိတ်တဲ့နဝ်ꩻ၊ သွဉ်ဖေႏလိုꩻပေႏလမ်း "ယေန်ႏငဲလိန်ႏမာႏ"လိတ်ဘာႏသာႏဖုံႏတဲ့နဝ်ꩻ၊ တဲမ်းလိတ် ဘာႏသာႏရေꩻ သာႏသနာႏရေꩻတဲ့နဝ်ꩻ၊ ပိဋကတ်ပြန်ႏပအိုဝ်ႏတဲ့နဝ်ꩻ၊ ဟော်ꩻတရာꩻ ထေရဝါဒအတွိုင်ꩻတဲ့နဝ်ꩻ၊ ထောက်ပမ်းဖေႏအာႏ လိတ်သွဉ်တွိုက်တဲ့နဝ်ꩻ-စတဲင် ဆဲင်ႏရာꩻထာꩻမာꩻပိဋကတ်၊ ဆဲင်ႏရာꩻထာꩻမာꩻပရိယတ်ဖုံႏတဲ့နဝ်ꩻ ထွာမာꩻ"ပရိယတ္တိသာႏသနာႏ"နဝ်ꩻသွူ။ ဗွေႏဘုရာꩻ ကဟော်ꩻသေꩻခါꩻ "သတိပဋ္ဌာန်ႏ"အနယ်ꩻမွေး အနယ်ꩻမဲဉ်ႏအတွိုင်ꩻ အားထုတ်တရာꩻ(အုံတရာꩻ)တဲ့နဝ်ꩻ၊ ကပျꩻတရာꩻ (ကအွဉ်ႏနယ်ဖေႏအနယ်ꩻ)တဲ့နဝ်ꩻ၊ အုံလွဉ်ႏမဲဉ်ႏမဲဉ်ႏ၊ ကျင်ꩻလွဉ်ꩻမဲဉ်ႏမဲဉ်ႏ၊ မာꩻလွဉ်ꩻမဲဉ်ႏမဲဉ်ႏ ဘုရာꩻကဟော်ꩻအတွိုင်ꩻတဲ့နဝ်ꩻ၊ ထောက်ပမ်းဖေႏအာႏ ကမ္မဋ္ဌာန်ꩻတွိုက်တဲ့နဝ်ꩻ-စတဲင်နဝ်ꩻဖုံႏနဝ်ꩻ ထွာမာꩻ"ပဋိပတ္တိသာႏသနာႏ"နဝ်ꩻသွူ။ တကာႏခွန်နင်ꩻသီးဖုံႏဟွေး- ၄၅-ဝါႏ ဆရာႏဗွေႏဘုရာꩻ ကဟော်ꩻခါꩻတရာꩻမျတ် ပိဋကတ်ကျမ်ꩻဂန်ႏ ကတွိုႏလꩻဟန်ႏနီꩻနဝ်ꩻ ကွပ်ပွိုးဗွေႏသံဃာႏသီး ထူႏတာႏဝွန်ႏလွဉ်၊ ဗွေႏသံဃာႏသီးသွဉ်၊ ဗွေႏသံဃာႏသီးချꩻနဝ်ꩻမꩻ တွိုႏလꩻယိုခါနဝ်ꩻသွူ။ ကခွုမ်မာꩻ လိတ်လုဲင်ꩻဘာႏသာႏ သာႏသနာႏရေꩻဖုံႏနဝ်ꩻ သံဃာႏအွဉ်ငါလွဉ်းလွဉ်း၊ လိတ်လုဲင်ꩻဘာႏသာႏ သာႏသနာႏ ကတိုꩻတက်တဲ့နဝ်ꩻ သံဃာႏအွဉ်ငါလွဉ်းလွဉ်း၊ ဟော်ꩻတရာꩻ၊ ပျꩻတရာꩻ၊ နင်းကျောင်ꩻ၊ အွဉ်ႏဗုဲင်သျင်ႏ၊ အွဉ်ႏဗုဲင်စင်ꩻ၊ သမုတ်သိမ်ႏ-စတဲင်နဝ်ꩻဖုံႏနဝ်ꩻ သံဃာႏမာꩻလွဉ်းလွဉ်း၊ သာႏသနာႏကတဉ်ႏခွေါင်လွဉ် နေင်ႏပေါင်ꩻ ၂၅၆၂-ဗꩻယိုခါနဝ်ꩻတဲ့ သံဃာႏကျိုꩻစာꩻ၊ သံဃာႏမာꩻလွဉ်းလွဉ်းနဝ်ꩻသွူ။
တကာႏခွန်နင်ꩻသီးဖုံႏဟွေး- တကာႏခွန်နင်ꩻသီးရပ်ရာႏ၊ ဗုဒ္ဓဘာႏသာႏသီး ဒုံဆောင်ႏနဝ်ꩻ တရေꩻအီတွမ်ႏကျောင်ꩻဝိဟာႏ၊ တင်ႏတယ်ႏအီတွမ်ႏသံႏဃာႏ၊ မာꩻစွဉ်ႏကုသိုလ်ႏအမျိုꩻမုဲင်ꩻတဲ့ယဝ်း သံဃာႏပါတဝ်းတထွူတဝ်း၊ ကွပ်နဝ်ꩻမꩻ လိုႏအာငါႏ သံဃာႏနဝ်ꩻသွူ။ ခေတ်ယိုခါနဝ်ꩻ ကွပ်အစွိုးစွိုး ပွိုးအမျိုꩻမျိုꩻတဲင် သံဃာႏကွဲဆေ့ꩻဆေ့ꩻ၊ သာႏသနာႏကွဲခေ့ꩻခေ့ꩻသဲင်ꩻလဲဉ်းသွူ၊ လွေꩻဒျာႏအတန်ꩻကျောင်ꩻ (အိမ်ကျောင်း)ကဲဉ်းအာအာတဲင် ယိုခါနဝ်ꩻ ဗွေႏသျင်ႏသွဉ် ဘုရာꩻပိဋကတ်၊ သွဉ်ပရိယတ် အာႏဆေ့ꩻထိုꩻလဲဉ်း၊ ပေါႏဗွေႏသျင်ႏဆေ့ꩻတဲ့ ဗွေႏစင်ꩻဆေ့ꩻ၊ ပေါႏဗွေႏစင်ꩻဆေ့ꩻတဲ့ ဗွေႏဗွန်ယပ်ꩻခြေားထိုꩻစွဉ်ႏနဝ်ꩻသွူ။ ကွပ်နဝ်ꩻမꩻ ဖေႏအာႏသွော့သံဃာႏ၊ အွဉ်ႏဗုဲင်သွော့သျင်ႏ၊ အွဉ်ႏဗုဲင်ထွူတဲ့ ပသာသွော့ လိတ်သွဉ်တွိုက်၊ အွဉ်ႏဗုဲင်သွော့စင်ꩻ၊ အွဉ်ႏဗုဲင်ထွူ ပသာသွော့လိတ်သွဉ်တွိုက်၊ ဖေႏအာႏသံဃာႏမꩻ သျင်ႏအာစင်ꩻအာ၊ ပင်ꩻဗွေႏဗွန်ယိုꩻ-ကရိုꩻနဝ်ꩻ သဘော်ꩻဗွောင်လွသွော့။ တကာႏမူႏခိုသီး ကားကအဝ်ႏ ကွပ်နာႏဗာႏတရာꩻ၊ မာꩻဗာႏကုသိုလ်ႏနုဲင်းယိုတဲင် မဂ်တရာꩻဖိုလ်ႏဉာဏ်ႏ နိဗ္ဗာန်ႏချမ်ꩻသာႏ ယံကလꩻဗာႏဝင်ꩻကွိုနဲး နာႏတရာꩻသားအပေါင်ꩻ သူႏတောႏကောင်ꩻသီးယာဟွေး။[၁][၂]