လိုꩻတန်ႏဘိုꩻ

လိုꩻတန်ႏဘိုꩻယို ဟဝ်သေစဲင်းစဲင်းလွငါႏဝင်ꩻ၊ ထွာဗာႏလိုꩻဟဝ်ဒါႏ မဲ့နားအင်္ဂါႏစုံႏလင်ႏယိုနဝ်ꩻ ယိုꩻတဝ်းငါႏငါႏ ဒုလ္လဘတပါꩻသွူ။ ကွပ်နဝ်ꩻမꩻ ဗွေႏမျတ်ဘုရာꩻ ဟော်ꩻသေꩻခါꩻ "မနုဿတ္တဘာဝေါ ဒုလ္လဘော လောကသ္မိံ"သွူ။ အမျိုꩻခြွဉ်းကုဋေႏကုဋာႏ သတ္တဝါႏဖုံႏအကို ကအီႏထွာဗာႏလိုꩻဟဝ်လိုꩻဒါႏ မဲ့နားအင်ႏဂါႏစုံႏလင်ႏတဖြာꩻနဝ်ꩻ ခုဲင်ႏခွေါ့ငါႏနဝ်ꩻသွူ။ နီဗွေႏဘုရာꩻငဝ်းတောႏယို မဲဉ်ႏငါတတွာမုဲင်ꩻကရိုꩻနဝ်ꩻ စဉ်ꩻစာꩻလွစံꩻသွော့ ဟံႏလောင်းထီကိုယို ဖွီးအွာ၊ ထွိုင်း၊ ထပေႏ၊ ညဝ်ႏဟဲင်းကစ အသꩻသာႏ အသွီႏစွိုꩻသတ္တဝါႏ၊ အာဗာႏအာစွိုꩻ တွက်လဲ့ရွိုးခြေင် လို့နွောင်ꩻခိꩻတဝ်း၊ အနာအသွတ်ꩻအဲဉ်ထဝ်း၊ ဗွေဗိတ်ထံဟံႏ၊ ဗွေသေက်ꩻထံထီနဝ်ꩻသွူ။ ခွေတသꩻ နာꩻတသွီႏ အနမ်းသားပီပီ အသꩻသားလွဉ်းလွဉ်းသွူ။ နီနာꩻ တထီႏထွꩻတဝ်းတွမ်ႏမဲ့ ဟွုန်ထွꩻတဝ်းတွမ်ႏနား ကအဝ်ႏခံႏတေ့ꩻဒျာႏ ထာꩻအံႏမထာꩻခိုးလျား ပိတ္တာႏ အသုရကာယ်ႏ ငါးရုဲင်ꩻဖုံႏလဲ့ အဝ်ႏဟံႏခိုႏဗꩻဟံႏကဲဉ် အရန်းရန်းအထပ်ထပ် အဝ်ႏခြပ်အဝ်ႏစီႏနေဒွိုန်း အနန္တောအနန္တ အကျအာဟွုန်ႏကထာꩻသွူ။ ကွဲႏတွော့ꩻ ကအာငါႏတတွာနဝ်ꩻ ကအဝ်ႏငါႏခွုင်းယိုလဲ့ အတွိုင်ꩻတင်ꩻပီပီ အခိုးလျားခြေင်ခြေင် အယပ်ꩻခုဲင်ႏလွဉ်းလွဉ်းသွူ။ သေဗော့ꩻ အုံတဖေင်ꩻ အုံတေင်ꩻတင်ꩻ အုံတငွို့၊ သေဗော့ꩻ ထုမ်ႏအာဟာရ၊ သေဗော့ꩻခံႏစာꩻ ထာꩻဒုက္ခ အုံအဝ်ႏဒုက္ခ ခံႏစာꩻနꩻဗင်တံႏ မေႏလျားပသီႏလျားတံႏဖုံႏလွုမ်ꩻနဝ်ꩻသွူ။ အလူႏအဖေႏ အထိန်ꩻအကံအဲဉ်ထဝ်း၊ မွိုးဖါအဲဉ်ထဝ်း၊ ဆရာႏသမာꩻအဲဉ်ထဝ်း၊ အပေႏအတန်အဲဉ်ထဝ်း၊ အဟဝ်အကုဲင် ခွယ်ꩻချာꩻမုꩻအဲဉ်ထဝ်း၊ တဖြာꩻတွမ်ႏတဖြာꩻ အသွဉ်သင်အဲဉ်ထဝ်း၊ အုပ်ချုပ်သွဉ်သင်ရေꩻ တရာꩻဥပဒေႏအဲဉ်ထဝ်း၊ နွောင်ꩻရာꩻအံႏ၊ ညံးရာꩻခံႏ၊ မေတ္တာႏသꩻ၊ ကရုဏာႏသꩻ၊ မုဒိတာႏသꩻ အဲဉ်ထဝ်း၊ မဉ်ႏရိုꩻလို့လို့နဝ်ꩻ သꩻဟဝ်သꩻမျတ် ကုသိုလ်ႏသွုန်ႏ ကုသိုလ်ႏသꩻ ကထွာနွောင်ꩻအီဒါႏ အခွင်ꩻအရေꩻ အခင်ႏလမ်းအဲဉ်ထဝ်းတဲင် သꩻဟဝ်သꩻမျတ် အီႏထွာဗာႏ ဝွေꩻသီးဖုံႏအနမ်းလောင်း၊ အသွုန်ႏကိုနဝ်ꩻ ယပ်ꩻလဲဉ်းဒွိုန်းကနီလိုꩻ၊ ကအီႏထွာဗာႏခွန်၊ နီနာꩻကအီႏပွိုင်ႏဗာႏခမ်းနဝ်ꩻသွူ။ အလူႏအဖေႏ အထိန်ꩻအကံ မွိုးဖါဆရာႏ အပေႏအတန် အဟဝ်အကုဲင် အသွဉ်အသင် တရာꩻဥပဒေႏကအဝ်ႏသားနဝ်ꩻ အဝ်ႏဒျာႏမနုဿစွိုꩻဖုံႏလွုမ်ꩻသွူ။ မေတ္တာႏသꩻ ကရုဏာႏသꩻ မုဒိတာႏသꩻ (သꩻဟဝ်သꩻမျတ် ကုသိုလ်ႏသွုန်ႏ ကုသိုလ်ႏသꩻကထွာနွောင်ꩻသားနဝ်ꩻ) အဝ်ႏလွုမ်ꩻနီလိုꩻပို သတ္တဝါႏ အဖြာꩻ အဗာႏ တွက်လꩻ နပ်လꩻ ညာꩻညာꩻမꩻတဒုံ၊ နန်ꩻနန်ꩻမꩻတဗူႏ၊ ယူႏထွꩻဒေါ့ꩻထွꩻ၊ အာသျသားခွုင်းမုဲင်ꩻဖြာꩻ၊ အာဖရိကခွုင်းမုဲင်ꩻဒုံ၊ ဥရောပခွုင်းမုဲင်ꩻဟိုႏ၊ အမေရိကန်ႏခွုင်းမုဲင်ꩻကဝ်၊ ဩစတေးလျခွုင်းမုဲင်ꩻနမ်း အလမ်းတွက်လꩻ၊ အဖြာꩻနပ်နွောင်ꩻ ညာꩻညာꩻတပြုံႏ နန်ꩻနန်ꩻတစု၊ လို့လိုညီꩻဝင်ꩻမꩻ ထွာဒျာႏ ကုဋေႏရေင်ရျာꩻဒျာႏလွုမ်ꩻသွူ။ ကွပ်ပွိုးနဝ်ꩻမꩻ နီနာꩻကအီႏပါသော့ꩻဗာႏ အလူႏအဖေႏ အကံအထိန်ꩻ မွိုးဖါဆရာႏ အပေႏအတန် အသွဉ်သင်အဟဝ်ကုဲင် ကွယ်ꩻကွယ်ꩻပျာꩻပျာꩻ တရာꩻဥပဒေႏခင်ႏလမ်း ဘဝလိုꩻခမ်း၊ လိုꩻသွီႏလိုꩻယာႏအကိုယိုနဝ်ꩻ ယပ်ꩻငါႏခုဲင်ႏငါႏ တကားမုဲင်ꩻကရိုꩻနဝ်ꩻ ချင်းခေႏစံꩻဒျာႏသွော့ဝင်ꩻနဝ်ꩻသွူ ။ အရန်းဖွိုႏ အခွိုꩻညမ်း အဗာႏအဖြာꩻ မဉ်ႏအဝ်ႏတသင်ႏချေႏ အယံစားအခွိုꩻထို လိုꩻပိုသွီႏယာႏ မနုဿာႏသွီႏစဲစ်သား ကအီႏပါသော့ꩻ ကအီႏထွိုက်လွဉ်အဖြာꩻ/တဗာႏနဝ်ꩻ ခုဲင်ႏခွေါ့ငါႏ မရေႏမရာႏနဝ်ꩻသွူ။ စဉ်ꩻစာꩻခဉ်ႏစံꩻ တဲက်စံꩻစဲင်းစဲင်းသွော့ဝင်ꩻ၊ သေစဲင်းနဲင်းထင်ႏသျာꩻဗာႏနဝ်ꩻသွူ။ ကွပ်နဝ်ꩻမꩻ နီထွာလိုꩻယို ယပ်ꩻငါႏတတွာမုဲင်ꩻ ယံငါႏတကားမုဲင်ꩻ တန်ႏဘိုꩻအာငါႏ တတွာမုဲင်ꩻကရိုꩻနဝ်ꩻ စွုမ်ႏနီꩻနီꩻ ဟဝ်ယူႏလꩻလွသွော့ဝင်ꩻအကျောင်ꩻ ဗွေႏမျတ်ဘုရာꩻ မိန့်သေꩻခါꩻ ဒုလ္လဘတရာꩻငတ်ꩻပါꩻကို စွုမ်ႏနီꩻစွုမ်ႏနီꩻနဝ်ꩻသွူ။ ဗွေႏမျတ်ဘုရာꩻ ကဖေႏသတိꩻနီနာꩻယို ဖြောင်းထာဖြေꩻခံꩻ လဲင်ႏကွိုင်ႏဟွီ၊ အလဲင်ႏအကိန်ꩻ အနီꩻပေါင်ꩻ တသောင်ꩻခွယ်ꩻလွိလွိုငါႏသွူ။ ဗွေႏမျတ်ဘုရာꩻ ကဖေႏသတိꩻငါႏတတွာယိုနဝ်ꩻ ကွပ်အရေꩻတန်ငါႏ တခွုင်းမုဲင်ꩻကရိုꩻနဝ်ꩻ ဟဝ်စဉ်ꩻစာꩻတဲးတဲးလွငါႏ လိုꩻဘဝ အတန်ႏဖိုꩻနဝ်ꩻသွူ။ ဟဝ်မာꩻသွုမ်ꩻခြေင်တဝ်း လိုꩻဘဝသက် လိုꩻအခိန်ႏခါႏနဝ်ꩻသွူ။ ပွိုင်းဝွို့တွမ်ႏယိုတဲင် ဘဝအမျိုꩻမျိုꩻ တန်ႏဘိုꩻကွာႏဝင်ꩻနုဲင်းမုဲင်ꩻကရိုꩻနဝ်ꩻ ခြုဲင်းနယ်စဲင်းဗာႏယင်းတစိꩻသွူ။ ထွာဗာႏလိုꩻဟဝ်လိုꩻဒါႏ မဲ့နားအင်ႏဂါႏစုံႏလင်ႏဖုံႏယိုနဝ်ꩻ နီဘဝလဲင်ႏယို ကတယ်ႏလွဉ်စ သꩻအရီးသွတ်ꩻ ကပေါႏလွက်ဒါႏ အွိုးမွိုးဟို့ꩻကိုနဝ်ꩻကာႏ ကုသိုလ်ႏလီꩻ အာႏတလာမုꩻ မာꩻထွာလွေꩻဖေႏ သꩻအရန်းထို အစွန်ꩻထင်တြင် သꩻအရန်းထို အစွန်ꩻထင်နဝ်ꩻနဝ်ꩻ ကုသိုလ်ႏလီꩻ ကမာꩻထွာဒါႏဝွေꩻသူꩻ အနုဘောႏအစွန်ꩻ တလို့တဝ်းကာႏလ နေင်ႏဆီ နေင်ႏရျာꩻ နေင်ႏရေင်အတွင်ꩻ တဗာႏထွူတဗာႏ ခေ့ꩻလေနီꩻနာꩻ ပီမေႏတင်ႏ ပီထီထွတ်ꩻသွုပ်ဝင်ꩻ အဝ်ႏအုပ်ချုပ်ပွေါးထိန်ꩻလွေꩻ နီနားလုံꩻဓာတ်ကို သွုန်ႏအောင်ႏကိုနဝ်ꩻသွူ။ နီနားလုံꩻဓာတ် သွုန်ႏအောင်ကို အစွန်ꩻထိင်မျိုꩻယို တယ်ႏသန္ဓေႏကိုကာႏ ကပဲင်ႏလွဉ် ကလꩻလွဉ်ဒါႏ ပုဂ္ဂိုလ်ႏဖုံႏနဝ်ꩻ ယူႏအဟဝ်လဲ့နဝ်ꩻ၊ ယူႏအကုဲင်လဲ့နဝ်ꩻ ဒါႏငါႏ၊ လျင်ႏငါႏ၊ ထင်ငါႏ၊ ဖြွဉ်ငါႏ၊ ကွပ်နဝ်ꩻမꩻ နီလိုꩻပိုဖုံႏယိုနဝ်ꩻ ကွပ်ပွိုးတယ်ႏသန္ဓေႏကိုကာႏ ကုသိုလ်ႏကံႏလီꩻ မꩻထွာဖေႏသꩻအရန်းထို၊ အစွန်ꩻထင်တွော့ꩻ ပဲင်ႏဆဲင်ႏလွ သꩻအရန်းထို၊ အစွန်ꩻထင်တဲင် ဟဝ်သတိꩻတဲးတဲးလွသွော့ဝင်ꩻ၊ နီသွုန်ႏသꩻကို ယူႏအီမာႏမာႏမွုန်း အကုဲင်၊ အထင်ငါႏ၊ လဲဉ်းဆုံးဆဲ့ငါႏထာꩻ၊ ယူႏအီဒျာႏသွော့အဟဝ်၊ လဲဉ်းတသွောင်းမွေးမဲဉ်ႏ ၊ တယ်ႏသန္ဓေႏကို ကအီႏပဲင်ႏဆဲင်ႏလွဉ်ဗာႏ သꩻအရန်းထို အစွန်ꩻထင်နုဲင်းယိုနဝ်ꩻ တယိုꩻတဝ်း၊ ကုသိုလ်ႏလီꩻ အာႏတလာတဲင် မာꩻဖေႏဖန်ဆင်ꩻဖေႏတဲင် နီပဲင်ႏဆဲင်ႏဗာႏလွကရိုꩻနဝ်ꩻ ဟဝ်ယူႏလꩻလွငါႏဝင်ꩻသွူ။ ကုသိုလ်ႏကံႏလီꩻနဝ်ꩻတဗာႏ အစွန်ꩻအနုဘောႏလို့မုဲင်ꩻခါ၊ ကထောက်ပမ်းကိုဒါႏ ဥတုအာဟာရဖုံႏစွန်ꩻအာႏလို့မုဲင်ꩻ၊ အဆင်ႏတရော့ꩻတဝ်း တွိုႏဖျော်မုဲင်ꩻခါလဲ့ နီကပဲင်ႏဆဲင်ႏဒါႏ နီသွုန်ႏသꩻ အရန်းထိုယိုနဝ်ꩻ ထွူသွတ်ꩻဗာႏမုဲင်ꩻခါကရိုꩻနဝ်ꩻ ဟဝ်ယူႏလꩻလွငါႏဝင်ꩻ၊ သꩻအရန်းထို အစွန်ꩻထင်မျိုꩻယို မခွိုက်ကပဲင်ႏဆဲင်ႏနေကတွင်ꩻ ဟဝ်ယူႏအီလွငါႏ အဟဝ်အဒါႏ၊ ယံလꩻခါꩻအီထဲင်းထဲင်းယင်း အခြွီယံ၊ အစွိုးဆꩻ ပါႏရမီႏပုညပါꩻဆီ ဟဝ်အွဉ်ႏသွုမ်ꩻခြေင်တဝ်းငါႏငါႏ၊ လိုꩻဟဝ်လိုꩻဒါႏ မဲ့နားအင်ႏဂါႏစုံႏလင်ႏ အဘတန်ႏဖိုꩻနဝ်ꩻ သေဗာႏလဲဉ်း တတွာယို၊ ဘဝလောင်ႏလင်ခရာႏခရာႏ ယံသေဗာႏထဲင်းထဲင်း ခြုဲင်းထန်ႏငါလွေꩻဗာႏယင်း တစူးတစိꩻသွူ။ တယ်ႏသန္ဓေႏကိုကာႏ မဲ့နားအင်ႏဂါႏ ကချို့ꩻယွင်ꩻ၊ ကတအာႏ၊ ကတေင်ꩻတင်ꩻလွဉ်ဒါႏ မနုဿလိုꩻဖုံႏ၊ လူꩻကုဲင်လူꩻညမ်းဖုံႏ တွမ်ႏတရိစ္ဆာန်ႏဖုံႏနဝ်ꩻ ဝွေꩻသီးဘဝယိုတဗာႏ ကလꩻစ၊ ထွာစသန္ဓေႏ ဘဝအရီးသွတ်ꩻသွတ်ꩻနဝ်ꩻကိုကာႏလကာႏ သꩻအရီးသွတ်ꩻတဗာႏ ကထွာလွဉ်စနဝ်ꩻ ကုသိုလ်ႏလီꩻအာႏပေႏမုꩻ၊ အကုသိုလ်ႏကံႏလီꩻ အာႏတလာမုꩻ မာꩻထွာလွဉ် ၊ တယ်ႏထောင်ႏလွဉ်ဖေႏ သꩻအရန်းဖွိုႏ အစွန်ꩻညမ်းဖုံႏနဝ်ꩻသွူ။ သꩻအရန်းဖွိုႏ အစွန်ꩻညမ်းနဝ်ꩻနဝ်ꩻ ကံႏလီꩻကမာꩻထွာဒါႏဝွေꩻသူꩻ ပေါႏအစွန်ꩻတခုဲင်ႏလို့တဝ်းနဝ်ꩻ နေင်ႏဆီနေင်ႏရျာꩻအတွင်ꩻ ပီမေႏတင်ႏထီထွတ်ꩻ တဗာႏထွူတဗာႏ အဝ်ႏထွာသွုပ်သွုပ်၊ အဝ်ႏအုပ်ချုပ်ပွေါးထိန်ꩻလွေꩻ ဝွေꩻသီးနားလုံꩻ သွုန်ႏဖူꩻကိုနဝ်ꩻသွူ။ တယ်ႏသန္ဓေႏကိုကာႏ ကွပ်ဝွေꩻသီးလꩻလွဉ် ၊ ပဲင်ႏဆဲင်ႏလွဉ် သꩻအရန်းဖွိုႏ အစွန်ꩻညမ်းတဲင် ဝွေꩻသီးဖုံႏယို ယူႏအဟဝ်လဲ့နဝ်ꩻ၊ ယူႏအကုဲင်လဲ့နဝ်ꩻ အစွန်ꩻအဲဉ်ထဝ်း၊ ဒါႏတဝ်း၊ လျင်ႏတဝ်း၊ ယူႏတွေꩻရုဲင်ꩻတသွိုးနွောင်ꩻတဝ်းထာꩻတဲင် အဝ်ႏကြွို့ꩻကြꩻ တေင်ꩻတင်ꩻဗော့ꩻ ကဲဉ်းအာအာ၊ အယူႏအတွေꩻ ဆေ့ꩻခြေားဗာႏနဝ်ꩻသွူ။ နဝ်ꩻလွုမ်ꩻတကာႏတဝ်း ပိတ္တာႏ၊ အသုရကာယ်ႏ၊ ငါးရုဲင်ꩻဖုံႏနဝ်ꩻ ကယိန်းဟုဲင်း၊ ဝွေꩻသီးဖုံႏ နားလုံꩻသွုန်ႏအောင်ကိုယို တယ်ႏသန္ဓေႏကိုကာႏ အကုသိုလ်ႏကံႏလီꩻအာႏတလာ မာꩻထွာလွေꩻဖေႏ သꩻအရန်းဖွိုႏ အစွန်ꩻညမ်း ပီမေႏတင်ႏ ပီထီထွတ်ꩻ တဆက်ထွူတဆက်၊ တဗာႏထွူတဗာႏ အုပ်ချုပ်ပွေါးထိန်ꩻလွေꩻ ဝွေꩻသီးနားလုံꩻ သွုန်ႏအောင်ကို၊ ယူႏတွိုင်ꩻ ထီႏဖြွဉ်တဝ်းဒွုမ်တကာႏတဝ်း အဝ်ႏမအွꩻအံႏ၊ ဆာမေႏလဲမ်ႏ၊ ဆာပသီႏလျား၊ ထီလျား၊ ဆာနꩻဗင်ဆဲ့ꩻရော့-စတဲင် ထာꩻဒုက္ခလဲ့ ခံႏစာꩻဗာႏမွေးစွဉ်ႏနဝ်ꩻသွူ။ ကွပ်နဝ်ꩻမꩻ - ၁။ လိုꩻဟဝ်ဒါႏ မဲ့နားအင်ႏဂါႏ စုံႏလင်ႏသားဘဝ ၂။ တယ်ႏသန္ဓေႏဘဝ ၃။ တိရစ္ဆာန်ႏဘုံႏဘဝ ၄။ ပိတ္တာႏ၊ အသုရကာယ်ႏ၊ ငါးရုဲင်ꩻဘုံႏဘဝ သာမညအနေႏ ခွယ်ꩻလစ်ꩻရန်းတဲင် တရန်းတွမ်ႏတရန်း တဲက်နွောင်ꩻဝင်ꩻ အတန်းဘိုꩻဆေ့ꩻအာနဝ်ꩻသွူ။ မီႏတဲက်ဝင်ꩻ အတန်းဘိုꩻနဝ်ꩻ - ၁။ လိုꩻဟဝ်ဒါႏ မဲ့နားအင်ႏဂါႏစုံႏလင်ႏသားဘဝနဝ်ꩻ ကတယ်ႏသန္ဓေႏကိုနဝ်ꩻကာႏလကာႏ ကွပ်ကုသိုလ်ႏကံႏလီꩻ အာႏတလာ မာꩻထွာလွေꩻဖေႏ သꩻအရန်းထို အစွန်ꩻထင်တဲင် ယူႏတွိုင်ꩻဖြွဉ်လွုမ်ꩻတကာႏတဝ်း ခံႏစာꩻခရာႏ စေꩻစိန်ႏချမ်ꩻသာႏ ထာꩻယံထာꩻတရေꩻ အအွီႏအဗွမ်ႏ၊ အတလေ့၊ အနွုမ်ꩻဟွမ်ဖုံႏကစလဲ့ ပြဲ့ꩻစုံႏပြန်ꩻပြော်ꩻ၊ သꩻဟဝ်သꩻမျတ် ကထွာနွောင်ꩻအီဒါႏ ကုသိုလ်ႏအခွင်ꩻအရေꩻ၊ အလူႏအဖေႏ၊ အထိန်ꩻအကံ၊ မွိုးဖါဆရာႏ၊ တဖြာꩻတွမ်ႏတဖြာꩻ မေတ္တာႏသꩻ၊ ကရုဏာႏသꩻ၊ မုဒိတာႏသꩻဖုံႏ၊ တဖြာꩻတွမ်ႏတဖြာꩻ ခွေါင်းနိစ်စက်တဝ်းဝင်ꩻ၊ တရာꩻဥပဒေႏစီꩻကန်ꩻဖုံႏလဲ့ ထွန်ꩻကာꩻတဲင် ကုသိုလ်ႏတသာ၊ သွုန်ႏဟဝ်သꩻဟဝ်အရန်းလဲ့ ထွာနွောင်ꩻ၊ ဖြွဉ်နွောင်ꩻ၊ ပညာႏသျင်ႏသီး ယူႏဖေႏကိုလွ ဝွေꩻသီးတွက်တာႏနုဲင်းနဝ်ꩻ၊ သွဉ်ဖေႏဝွေꩻသီး ထာꩻသေထာꩻဒါႏ အမျိုꩻမျိုꩻလဲ့ ဝွေꩻသီးရိုꩻတေားဒျာႏ "ဒါႏလိတ်လဲ့ အံႏဒဲဉ်၊ ဒါႏတဝ်းလိတ်လဲ့ အံႏဒဲဉ်"နုဲင်းနဝ်ꩻဖုံႏသွူ။ ဝွေꩻသီးဖုံႏနဝ်ꩻ ဖိုးပနားမွေးတဝ်းလဲ့ ဝွေꩻသီးထွားနုဲင်းတေားဒျာႏ ဖိုးပနား၊ တွက်ဗော့ꩻဒျာႏ အံႏအွꩻမုꩻကိစ္စလွုမ်ꩻ၊ ဖိုးပနားနဝ်ꩻ ဒါႏလိတ်လဲ့ အံႏအဆာႏ၊ ဒါႏတဝ်းလိတ်လဲ့ အံႏအဆာႏတဲင် ဝွေꩻသီးကဒေါ့ꩻဒါႏငဝ်း "ဒါႏလိတ်လဲ့ အံႏဒဲဉ်-ဒါႏတဝ်းလိတ်လဲ့အံႏဒဲဉ်"ကရိုꩻနဝ်ꩻ ဝွေꩻသီးထွားနုဲင်းဖိုးပနား၊ ပညတ်ဖိုးပနားအကျင်ꩻ၊ မာꩻသွုမ်ꩻဖျင်ꩻမာꩻငုတ်၊ မာꩻတခြွတ်ꩻ၊ မာꩻတပွတ်ꩻလိုꩻဘဝဟဝ်ဘဝဒါႏ တန်ႏဘိုꩻသဲစ်သဲစ်လွုမ်ꩻ၊ ဝွေꩻသီးငဝ်းဖုံႏယိုနဝ်ꩻ အယားကုဲင် ဝွေꩻသီးနမ်းအကျိုꩻ၊ ဝွေꩻသီးဘဝတန်ႏဖိုꩻ၊ ဝွေꩻသီးပိုမာ၊ သွꩻမိတ်စွိုးခွိုꩻအကို ဘဝတန်ႏဖိုꩻသဲစ်သဲစ်လွုမ်ꩻ၊ သေလွုမ်ꩻအံႏအွꩻမုꩻ၊ မေႏထုန်ႏမုꩻ၊ ဗေင်ႏမုꩻ သွံမျိုꩻဒျာႏ၊ ကသေထွိုက်သေသင်ꩻ ထာꩻဟဝ်ဖုံႏ မဉ်ႏသေတဝ်း၊ ဒါႏတဝ်းကရိုꩻနဝ်ꩻ ဟဲ့ꩻဗာႏလိုꩻဖိုးပနားဒျာႏအကျောင်ꩻ ဘုရာꩻတွမ်ႏလိုꩻဟဝ်လိုꩻဒါႏသီးဖုံႏ မိန်းခါꩻလွ၊ ဖေႏသတိꩻသေꩻခါꩻလွနုဲင်းနဝ်ꩻသွူ။ လိုꩻဟဝ်လိုꩻဒါႏဘဝနဝ်ꩻ အင်ႏဂါႏသွံပါꩻပြဲ့ꩻစုံႏတဲင် ဟဝ်မာꩻသွုမ်ꩻတဝ်းအကျောင်ꩻ သေဗာႏလဲဉ်းဒျာႏသွူ။ ၂။ ကတယ်ႏစသန္ဓေႏကိုကာႏ လိုꩻမဲ့နားချို့ꩻယွင်ꩻ တအာႏ တေင်ꩻတင်ꩻသားဖုံး၊ လူꩻကုဲင်လူꩻညမ်းဖုံႏဘဝနဝ်ꩻ ကတယ်ႏစသန္ဓေႏကိုကာလကာႏ ကွပ်ကုသိုလ်ႏကံႏလီꩻ အာႏပေႏမုꩻ မာꩻထွာလွေꩻဖေႏ သꩻအရန်းဖွိုႏ အစွန်ꩻညမ်း တသက်လွုမ်း တသွုပ်ထွူတသွုပ်တဲင် ယူႏတွိုင်ꩻတဖြွဉ်တဝ်းလွုမ်ꩻကာႏတဝ်း ခံႏစာꩻခရာႏ စေꩻစိန်ႏချမ်ꩻသာႏမုꩻလဲ့ ညမ်းကဲဉ်းအာအာသွူ။ ကုသိုလ်ႏကထွာနွောင်ꩻအီဒါႏ အခွင်ꩻအရေꩻ၊ အလူႏအဖေႏ၊ အထိန်ꩻအကံ၊ ပေႏတန်၊ မွိုးဖါ၊ အဟဝ်အကုဲင် ခွယ်ꩻချာꩻမုꩻကစဖုံႏနဝ်ꩻ ဝွေꩻသီးတလူႏမော့ꩻခွဲးစွဉ်ႏဒျာႏလဲ့ ကွပ်ဝွေꩻသီးနားလုံꩻဓာတ်ကို သꩻအရန်းဖွိုႏ အစွန်ꩻညမ်းတဲင် ဝွေꩻသီးယူႏလွဉ်ꩻ တထွꩻလို့တဝ်း၊ တဖြွဉ်လို့တဝ်းနဝ်ꩻသွူ။ ကွပ်နဝ်ꩻမꩻ ဝွေꩻသီးဘဝယိုနဝ်ꩻ ချမ်ꩻသာႏမုꩻ အဝ်ႏတစူးတစိꩻ၊ ကုသိုလ်ႏထွာနွောင်ꩻအီ အခွင်ꩻအရေꩻအဝ်ႏလဲ့ ယူႏထွိုင်ႏဖြွဉ်တဝ်း အင်ႏဂါႏဟဝ်နီပါꩻတဖြဝ်း၊ အင်ႏဂါႏဟဝ်တပါꩻ ချို့ꩻယွင်ꩻထံဘဝသွူ။ ဘဝအရန်းအမုဲင်(၂)ရိုꩻဗာႏနုဲင်းနဝ်ꩻသွူ။ ၃။ တိရစ္ဆာန်ႏဘုံႏဘဝနဝ်ꩻ အံႏအွꩻ အုံအဝ်ႏမုꩻ၊ စေꩻစိန်ႏမုꩻ အဲဉ်ထဝ်း၊ ဒုက္ခဗာႏတောႏတောႏတန်ႏတန်ႏတကာႏတဝ်း ဘဝလုမ်းဗဉ်ႏရေꩻ တရာꩻဥပဒေႏအဲဉ်ထဝ်း၊ ဘဝအာႏမခံႏချက် လုံးဝလွစ်ကင်ꩻလွ၊ အလူႏအဖေႏ၊ အထိန်ꩻအကံ၊ မွိုးဖါဆရာႏ၊ ပေႏတန်ဟဝ်ကုဲင် ခွယ်ꩻချာꩻမုꩻကစ သွုန်ႏဟဝ်သꩻမျတ် ကထွာအီနွောင်ꩻဒါႏ ကုသိုလ်ႏအခွင်ꩻအရေꩻဖုံႏလဲ့ လုံးဝအဲဉ်ထဝ်း၊ တယ်ႏသန္ဓေႏကိုကာႏ ကွပ်အကုသိုလ်ႏကံႏအာႏတလာ မာꩻထွာလွေꩻဖေႏ သꩻအရန်းဖွိုႏ အစွန်ꩻညမ်းတဲင် ယူႏတွိုင်ꩻဖြွဉ်တဝ်း၊ ထင်တဝ်းသွူ။ ကွပ်နဝ်ꩻမꩻ ဝွေꩻသီးဘဝယိုနဝ်ꩻ ခံႏဗာႏဒုက္ခတောႏတောႏတန်ႏတန်ႏ၊ ကုသိုလ်ႏ သွုန်ႏသꩻဟဝ်မျတ် ကထွာနွောင်ꩻအီ ကုသိုလ်ႏ အခွင်ꩻအရေꩻအဲဉ်ထဝ်း ၊ ယူႏတွိုင်ꩻပေါႏဖြွဉ်တဝ်း၊ အင်ႏဂါႏတပါꩻတဖြဝ်း၊ အင်ႏဂါႏဟဝ်နီပါꩻ လုံးဝချို့ꩻယင်ꩻဘဝသွူ။ ဘဝအရန်းအမုဲင်(၃) ဘဝညမ်းမျိုꩻသွူ။ ၄။ ပိတ္တာႏ၊ အသုရကာယ်ႏ၊ ငါးရုဲင်ꩻဘုံႏဘဝနဝ်ꩻ ခံႏဗာႏမွေးငါႏ အဝ်ႏမအွꩻအံႏ ဆာမေႏလျမ်ႏ၊ ဆာပသီႏထီလျား၊ ဆာနꩻဗင်ဆဲ့ꩻရော့လွုမ်ꩻတကာႏတဝ်း အလူႏအဖေႏ၊ ကုသိုလ်ႏကဖေႏထွာနွောင်ꩻအီဒါႏ အခွင်ꩻအရေꩻအားလုံး တတွာနံခူꩻ ထꩻနာငါလဲ့အဲဉ်ထဝ်း၊ အကုသိုလ်ႏကံႏအာႏတလာ တယ်ႏစသန္ဓေႏကိုကာႏ ကွပ်မာꩻထွာလွေꩻဖေႏ သꩻအစွန်ꩻညမ်း တသက်လွုမ်းတဲင် ယူႏတွိုင်ꩻလဲ့ဖြွဉ်တဝ်း၊ ထင်တဝ်း၊ ဝွေꩻသီးဘဝယို သညင်ꩻခရာႏအလွိုသွတ်ꩻ၊ ယူႏပက်ခရာႏအကယ်ꩻလွို၊ ကယ်ႏကိုမꩻကိုလဲ့ဖုဲင်ႏတဝ်း၊ နမ်းတွမ်ႏနမ်း ယူႏအဟဝ်ဒါႏ ကျိုꩻစာꩻတရန်ထန်ႏဒျာႏလဲ့ ဒါႏတဝ်း၊ အကုသိုလ်ႏကံႏလီꩻ ကအဝ်ႏသမျ ခံႏဗာႏတိတ်ꩻတိတ်ꩻ၊ ချမ်ꩻသာႏမုꩻ၊ ထာꩻဟဝ်မုꩻ အပေါက်ပေ့ꩻ၊ အငွါတဲပ်ꩻ တကဲ့အပါယ်ႏဘုံႏအစဲစ်၊ ထာꩻဒုက္ခဘုံႏအမဲဉ်ႏ ၊ ကွိုꩻခရာႏ၊ ကယ်ႏခရာႏ လုံးဝလွစ်ကင်ꩻထမ်၊ ဘဝဖြန် ဘဝသွတ်ꩻ ဘဝတခြွတ်ꩻ ဘဝခေ့ꩻကရစ်ꩻဖုံႏမန်ႏမန်ႏသွူ။ ဝွေꩻသီးဘဝယိုနဝ်ꩻ ဆင်ꩻရယ်ꩻတန်ငါႏ၊ ကုသိုလ်ႏထွာအခွင်ꩻအရေꩻ တစူးတစိꩻအဲဉ်ထဝ်း၊ ယူႏတွိုင်ꩻလဲ့ဖြွဉ်တဝ်း၊ ထင်တဝ်း၊ အင်ႏဂါႏဟဝ်သွံပါꩻ လုံးဝချို့ꩻယွင်ꩻ၊ ဘဝဖွိုႏတရွိုႏလွိုဝင်ꩻနဝ်ꩻသွူ။ သာမညအနေႏ ခွယ်ꩻနယ်ဖေႏဘဝအရန်းလစ်ꩻမျိုꩻနဝ်ꩻ ထွူလဲဉ်းဒျာႏသွူ။ တမျိုꩻတွမ်ႏတမျိုꩻ တဲက်စံꩻသွော့ဝင်ꩻ၊ အတန်ႏဖိုꩻထိုလုဲင်း၊ စေꩻစိန်ႏခရာႏ၊ ချမ်ꩻသာႏမုꩻလဲ့အဝ်ႏ၊ သွုန်ႏသꩻဟဝ်မျတ် ကုသိုလ်ႏထွာအီ အခွင်ꩻအရေꩻ အခင်ႏလမ်းလဲ့မွေး၊ ယူႏတွိုင်ꩻလဲ့ဖြွဉ်မွေး ၊ ထင်မွေးကရိုꩻဒါႏ အင်ႏဂါႏဟဝ်သွံစွိုး ကပြဲ့ꩻစုံႏဒါႏဘဝနဝ်ꩻ လꩻခုဲင်ႏငါႏထာꩻ တကားမုဲင်ꩻ စဉ်ꩻစာꩻလုဲင်း၊ အင်ႏဂါႏဟဝ်နဝ်ꩻသွံပါꩻ ကပြဲ့ꩻစုံႏဒါႏဘဝနဝ်ꩻ အဝ်ႏဒျာႏလိုꩻဘဝလွုမ်ꩻ၊ ကွပ်အယံစား၊ ကွပ်အကျမျိုꩻ အခုဲင်ႏခွေါ့အင်ႏဂါႏလက္ခဏာႏဟဝ်ဖုံႏတဲင် အင်ႏဂါႏနဝ်ꩻသွံပါꩻ ကပြဲ့ꩻစုံႏဒါႏ မနုဿအစွိုꩻယိုနဝ်ꩻ ဖေႏကလꩻနွောင်ꩻ၊ ကောကပွိုင်ႏဗာႏသားယိုနဝ်ꩻ အဖြာꩻအဗာႏ ဆေ့ꩻခြေားဗာႏကရိုꩻနဝ်ꩻ သဘာဝကျငါႏ၊ ယုတ္တိအဝ်ႏငါႏ၊ မာꩻထာꩻနုဲင်းမုဲင်ꩻ ကအီႏလꩻယိုꩻယိုꩻနွောင်ꩻ ထွိုင်ႏချင်းခေႏဒါႏလဲဉ်းဝင်ꩻနဝ်ꩻသွူ။ အင်ႏဂါႏဟဝ်သွံပါꩻ ကပြဲ့ꩻစုံႏဒါႏနဝ်ꩻ အဝ်ႏဒျာႏ အဖြာꩻအဗာႏ လိုꩻတကမ္ဘာႏလွုမ်းလွုမ်း တွက်လို့တွက်ထံမꩻ ကုဋေႏရျာꩻရေင်လွုမ်ꩻဒျာႏနဝ်ꩻသွူ။ ကဲဉ်းအာအာနဝ်ꩻ ထွာဗာႏလွဒျာႏ အင်ႏဂါႏဟဝ်တပါꩻချို့ꩻဘဝ၊ နီပါꩻချို့ꩻဘဝ၊ သွံပါꩻလွုမ်းလွုမ်းချို့ꩻယွင်ꩻဘဝဖုံႏနဝ်ꩻ သံႏဝွေႏဂလꩻခရာႏနဝ်ꩻသွူ။ ကွပ်ပွိုးနဝ်ꩻမꩻ အင်ႏဂါႏဟဝ်သွံပါꩻ ကစုံႏလင်ႏဒါႏလိုꩻဘဝယို မခွိုက်နီကလꩻ၊ ထာꩻသရန်းထို၊ ထာꩻထီႏစုံႏလင်ႏ၊ သာႏသနာႏလဲ့ မခွိုက်နီကကျုံႏတနꩻတွင်ꩻယို နီမဉ်ႏသွဉ်တဝ်းလိတ်၊ ထွားတဝ်းကျမ်ꩻဂန်ႏ၊ ရိုႏသေႏတဝ်းရတနာႏသွံပါꩻလဲ့ မဉ်ႏရိုႏသေႏကြွို့ꩻဗော့ꩻဒျာႏထာꩻ၊ သေဗော့ꩻအအံႏကိစ္စ၊ အဗေင်ႏကိစ္စ၊ ကာမဂုဏ်ႏကိစ္စနုဲင်းဖိုးပနားနဝ်ꩻ ထွိုက်တဝ်းလာꩻလာꩻ၊ သွုမ်ꩻငါႏထာꩻကရိုꩻနဝ်ꩻ စဉ်ꩻစာꩻစဲင်းစဲင်းမꩻ စွုမ်းသꩻနဝ်ꩻသွူ ။ "ဒါႏလိတ်တဲ့ အံႏဒဲဉ်-ဒါႏတဝ်းလိတ်လဲ့ အံႏဒဲဉ်"ကရိုꩻနဝ်ꩻ ငဝ်းတုံꩻ ငဝ်းမဲ့ခေ့ဒျာႏသွူ။ လꩻမို့မို့ အင်ႏဂါႏဟဝ်သွံပါꩻ စုံႏလင်ႏဘဝ၊ မော့ꩻမို့မို့သာႏသနာႏ၊ သမ်းအွဉ်ႏတဝ်းတန်ႏဖိုꩻ၊ ထွားနုဲင်းတေားဒျာႏ လိုꩻတအာႏ၊ လိုꩻမဲ့နားအင်ႏဂါႏချို့ꩻယွင်ꩻ၊ တိရစ္ဆန်ႏ ပိတ္တာႏ အသုရကာယ်ႏ ငါးရုဲင်ꩻဖုံႏနဝ်ꩻ ဗွိုန်ဝင်ꩻသွူ။ တွမ်ႏကထွာဗာႏ လိုꩻတအာႏ မဲ့နားအင်ႏဂါႏချို့ꩻယွင်ꩻ တိရစ္ဆန်ႏ ပိတ္တာႏ အသုရကာယ်ႏ ငါးရုဲင်ꩻဘဝအရန်းဖွိုႏ၊ နားလုံꩻဓာတ်တေင်ꩻတင်ꩻဖုံႏနဝ်ꩻ ဗွိုန်ဝင်ꩻသွူ။ ကွပ်ပွိုးနဝ်ꩻမꩻ "ဒါႏလိတ်တဲ့ အံႏဒဲဉ်၊ ဒါႏတဝ်းလိတ်လဲ့ အံႏဒဲဉ်"ကရိုꩻနဝ်ꩻ အံႏတဝ်းဒဲဉ် လꩻတဝ်းတဲင် မဲဉ်ႏဒျာႏသွူ။ ကွဲႏတွော့ꩻ နဝ်ꩻနဝ်ꩻ လိုꩻဘဝထာꩻမျတ် မွေးတဝ်း၊ လိုꩻဘဝသက်ယံမွန်အီနွောင်ꩻအတွက်ဒျာႏတဲင် လိုꩻဘဝထာꩻမျတ်အတွက်နဝ်ꩻ အဝ်ႏလိုႏကျိုꩻစာꩻလွ၊ လွူꩻလွဒျာႏလိတ်ဖုံႏသွူ။ လိုꩻတန်ႏဖိုꩻနဝ်ꩻ သေလဲဉ်းသွူတဲင် ဖေႏနေးကသေဗာႏယင်း ရတနာႏသွံပါꩻအခရာႏနဝ်ꩻ အီႏခြုဲင်းနယ်လွေꩻဖေႏယင်း တစိꩻသွူ။ နီဗွေႏဘုရာꩻ ကဟော်ꩻသေꩻခါꩻဒါႏ "မနုဿတ္တ ဘာဝေါ ဒုလ္လဘော" ဒုလ္လဘတရာꩻငတ်ꩻပါꩻအကို အီႏသဲင်ꩻထွာဗာႏလိုꩻယို တယိုꩻတဝ်းကရိုꩻဒါႏတရာꩻနဝ်ꩻ အဝ်ႏပါသော့ꩻနဝ်ꩻသွူ၊ ဗွေႏမျတ်ဘုရာꩻ ကဟော်ꩻသေꩻခါꩻဒါႏ တရာꩻတောႏယိုနဝ်ꩻ ဖေႏနေးကခံႏစာꩻဗာႏ လိုꩻစေꩻစိန်ႏတဲင် ဟော်ꩻသေꩻခါꩻဒျာႏဟောင်း၊ မဉ်ႏတမွေးတဝ်းတဲ့ ဖေႏနေးကမာꩻနွောင်ꩻ ကုသိုလ်ႏပါႏရမီႏတဲင် ဟော်ꩻသေꩻခါꩻဒျာႏဟောင်း? မဉ်ႏရီနုဲင်းယိုနဝ်ꩻ နီအီႏဖြေႏလွနုဲင်းမုဲင်ꩻ? ဖေႏနေးကခံႏစာꩻဗာႏ လိုꩻစေꩻစိန်ႏတဲင် ဟော်ꩻသေꩻခါꩻဒျာႏ မဉ်ႏဖြေႏနုဲင်းနဝ်ꩻနဝ်ꩻ အဖြေႏယို တမဲဉ်ႏတဝ်း၊ အီႏဆုံꩻဖျတ်နုဲင်းနဝ်ꩻသွူ။ ပွိုးထမုဲင်ꩻဟောင်းကရိုꩻနဝ်ꩻ လိုꩻစေꩻစိန်ႏတွမ်ႏလူꩻစေꩻစိန်ႏ ခွုင်းမုဲင်ꩻအာ မဉ်ႏတဲက်ထွားနဝ်ꩻ လိုꩻစေꩻစိန်ႏနဝ်ꩻ အဝ်ႏတတွာ ထီကအဝ်ႏသော့ꩻ ဖိုးခင်ႏအောင်ကိုလွုမ်ꩻ၊ လူꩻစေꩻစိန်ႏနဝ်ꩻ အဝ်ႏတတွာ ထီကအဝ်ႏသော့ꩻ သမုဒ္ဒရာႏကို ကွာႏဝင်ꩻနုဲင်းနဝ်ꩻသွူ။ လူꩻစေꩻစိန်ႏနဝ်ꩻ အာထဲင်းဒွိုန်းက လိုꩻစေꩻစိန်ႏ အဆပေါင်ꩻ တရျာꩻတကာႏတဝ်းတဲင် နေႏတန်ႏနဝ်ꩻ ဘုရာꩻဟော်ꩻသေꩻခါꩻဒျာႏ "ဒေဝဿ ဘာဝေါ ဒုလ္လဘော" ကအီႏသဲင်ထွာဗာႏလူꩻနဝ်ꩻ ယပ်ꩻခုဲင်ႏငါႏ နုဲင်းနဝ်ꩻမတဝ်း၊ သမ်းတအဝ်ႏသေꩻခါꩻတဝ်းနုဲင်းယို၊ ကွပ်ပွိုးစွဉ်ႏ ဖေႏနေးကမာꩻနွောင်ꩻ ကုသိုလ်ႏပါႏရမီႏအတွက်တာႏနဝ်ꩻမꩻ နီဗွေႏဘုရာꩻနဝ်ꩻ "မနုဿတ္တ ဘာဝေါ ဒုလ္လဘော-အီႏသဲင်ꩻထွာဗာႏလိုꩻနဝ်ꩻ ယပ်ꩻခုဲင်ႏငါႏ" ဟော်ꩻသေꩻခါꩻဒျာႏနုဲင်းနဝ်ꩻသွူ။ လူꩻဗြဟ္မာႏသီးဖုံႏနဝ်ꩻ တံꩻခိုꩻစေꩻစိန်ႏ တန်ထဲင်းဒွိုန်းက လိုꩻစေꩻစိန်ႏတဲင် ဝွေꩻသီးဖုံႏနဝ်ꩻ တဗုဲင်ဒါႏတဝ်းသျင်ႏ၊ တခံႏဒါႏတဝ်းရဟန်ꩻ၊ လိုꩻခမ်းလောကကို လောကဓံႏတရာꩻ အဟဝ်အကုဲင် အဝ်ႏစုံႏလင်ႏသော့ꩻလို့တဲင် မဉ်ႏဖြဲ့ꩻပါႏရမီႏတဲ့ လꩻယိုꩻ၊ ဘုရာꩻလောင်ꩻ ကဖြဲ့ꩻဒါႏပါႏရမီႏနဝ်ꩻမဉ်ႏတဲ့ ဖြဲ့ꩻဗာႏဒျာႏ လိုꩻခမ်းကိုယိုသွူ။ နီဖုံႏယိုနဝ်ꩻ ဘဝရီးခါ ကံႏကအီႏသဲင်ꩻထွာအီဒါႏလိုꩻ ပါလွဉ်လဲဉ်းသွူတဲင် သဲင်ꩻထွာဗာႏသွူလိုꩻတကာႏတဝ်း၊ ထွာနွောင်ꩻလွပါစွဉ်ႏ ဗုဒ္ဓဘာႏသာႏပုဂ္ဂိုလ်ႏဖုံႏသွူ။ ကွပ်ပွိုးနဝ်ꩻမꩻ နီကကိုꩻကွယ်ႏဒါႏ ဘုရာꩻ၊ တရာꩻ၊ သံႏဃာႏ ရတနာႏသွံပါꩻအကျောင်ꩻခရာႏ မဉ်ႏသေနာႏလွနဝ်ꩻ ကေညိုႏကိုꩻကွယ်ႏ တဲးတဲးဝါးဝါးနွောင်ꩻ ရတနာႏသွံပါꩻနဝ်ꩻသွူ။ တရာꩻတောႏအတွိုင်ꩻ မဉ်ႏကံကျင်ꩻအားထုတ်လွဉ်ꩻနဝ်ꩻ လꩻနွောင်ꩻ လိုꩻလူꩻချမ်ꩻသာႏလွုမ်ꩻမကာႏ နိဗ္ဗာန်ႏချမ်ꩻသာႏတဲ့ လꩻနွောင်ꩻဒျာႏသွူ။ နီဗုဒ္ဓဘာႏသာႏစွိုꩻ ပုဂ္ဂိုလ်ႏအကို ကောကသေနာႏတဝ်းဒွိုန်း ရတနာႏသွံပါꩻအကျောင်ꩻခရာႏသားအတွက် ယံဖေႏကသေနာႏစဲင်းစဲင်း၊ မဉ်ႏသေထွူ ယံဖေႏနေး ကကံကျင်ꩻအားထုတ်လွေꩻနွောင်ꩻ ရေႏရွယ်ႏလွေꩻနုဲင်းနဝ်ꩻတဲင် တဲမ်းနယ်ဖေႏဗာႏ ရတနာႏသွံပါꩻအကျောင်ꩻနုဲင်းဆꩻငါယိုသွူ။