လိုꩻမူႏပြောဝ်ႏမို့ꩻတို

"လိုꩻမူႏပြောဝ်ႏမို့ꩻတို လိုꩻခိုတဲ့ꩻထုဲင်ထိုး" ခေတ်ယိုတဗာႏနောဝ်ꩻ မာꩻစွဉ်ႏထာꩻမာꩻအမျိုꩻမုဲင်ꩻ၊ အရေꩻအမျိုꩻမုဲင်ꩻခန်းတယောဝ်း လိုꩻမူႏတွမ်ႏလိုꩻခိုနောဝ်ꩻ ကဲဉ်းအာအာ ထီႏဒျာႏလိုꩻမူႏဖုံႏလွုမ်ꩻသွူ၊ ဟံႏတန်လောင်းကီ ခမ်းထီပေါင်ꩻစွုမ်ႏအကို စိမ်စွဉ်ႏခမ်းမုဲင်ꩻမုဲင်ꩻယောဝ်း လိုꩻမူႏတွမ်ႏလိုꩻခို အခွင်ꩻအရေꩻအစ အာႏခꩻ၊ လာခꩻဖုံႏစတဲင် ထာႏနဆဲင်ႏရာꩻကိုဖုံႏနောဝ်ꩻ လိုꩻမူႏနွို့ထူႏသော့ꩻလို့လဲဉ်း ခင်ႏလမ်းဖုံႏနောဝ်ꩻသွူ။ စိမ်စွဉ်ႏခင်ႏလမ်းတွိုင်ꩻကို လိုꩻမူႏဖုံႏယို ဖေႏတောဝ်းခင်ႏလမ်းတဲ့ တလꩻတောဝ်း၊ ဖေႏဗာႏ၊ အခွင်ꩻအရေꩻတွမ်ႏလိုꩻခိုလဲ့ လꩻတွာတွာဗာႏ၊ ဖေႏယွမ်ꩻထဲင်းလိုꩻခိုလဲ့ တလꩻတောဝ်းနောဝ်ꩻသွူ။ မဉ်ႏထွားဒျာႏ ကလွေꩻသွဉ်ထူႏပညာႏအရန်းထိုကိုဖုံႏသူꩻလဲ့ လိုꩻမူႏနောဝ်ꩻ အာထဲင်းလိုꩻခို၊ မဉ်ႏထွားယင်း မာꩻထာꩻမာꩻ ထယ်ႏဗေင်ႏထွိုင်ႏ ဗꩻဗေင်ႏချာ နားဟွိုန်တဗာႏအကို အမာတွမ်ႏအဝါꩻနောဝ်ꩻ အမာယို မာꩻဗာႏအာထဲင်းအဝါꩻ အပွန်းပဉ်ဆီဆီဒျာႏရင်ꩻသွူ။ လိုꩻမူႏသီးမျိုꩻလဲ့ ကတူႏတဖြုံႏ၊ စူခင်ႏမဲ့နားနီပင်စီႏ ဗွိုန်ပီဒျာႏလိုꩻခိုနေနေ၊ လိုꩻခိုထာꩻယူႏ ထာꩻမာꩻအတွိုင်ꩻလဲ့ ဝွေꩻသီးလိုꩻမူႏတဲ့ အောဝ်ႏယူႏဒါႏ၊ အောဝ်ႏမာꩻဒါႏဒျာႏနေနေ၊ လိုꩻမူႏလေႏကြွို့ꩻ ဒေါ့ꩻတလꩻတောဝ်းဒွုမ်နောဝ်ꩻသွူ။ လိုꩻမျိုꩻတန်သား၊ ခမ်းတန်သားလိုꩻမူႏဖုံႏနောဝ်ꩻ ဝင်ꩻမာꩻထာꩻမာꩻ နီလိုꩻခိုကဖေႏဗာႏ အသွုမ်ꩻသားလဲ့ အောဝ်ႏဗောႏဗာႏ၊ လိုꩻမူႏကယံ၊ လိုꩻမူႏကထင်၊ လိုꩻမူႏကဒါႏလဲ့ နဲင်ႏငံႏကမ္ဘာႏဆꩻကီယို အောဝ်ႏဗောႏဗာႏနောဝ်ꩻသွူ။ အမေႏရိကန်ႏခမ်းနောဝ်ꩻ ဟယ်လာနရီ၊ အိန္ဒိယခမ်းနောဝ်ꩻ မဟ့ဂန္ဒီ၊ မန်းခမ်းနောဝ်ꩻ ဒေါ်အောင်ဆန်းစုကြည်၊ ပအိုဝ်ႏကိုနောဝ်ꩻ ခံꩻဗွာစီ-ငေါဝ်းနောဝ်ꩻအတွိုင်ꩻ လိုꩻမူႏယံနောဝ်ꩻ အောဝ်ႏဒျာႏခ်းတန်ကိုလွုမ်ꩻမွေးတောဝ်း၊ နီမန်းခမ်းကိုတဲ့ အောဝ်ႏဒျာႏနေနေ၊ အောဝ်ႏပအိုဝ်ႏမူႏသꩻအောင်ခါႏ လွူးထန်ႏနွောင်ꩻဒျာႏ ပိုမူႏဟောဝ်ရတနာႏနေနေနောဝ်ꩻသွူ။ ပွိုင်းလဲင်ႏခါနောဝ်ꩻ နီပအိုဝ်ႏခြာယို ထီႏလိုꩻမူႏယို ဖေႏတောဝ်းခင်ႏလမ်း၊ ဖေႏတောဝ်းဒေါ့ꩻခွင်ꩻ၊ ယူႏခွင်ꩻ၊ မာꩻခွင်ꩻတဲင် အံႏတိတ်ꩻနျꩻခါꩻဒျာႏ လိုꩻမူႏကဲဉ်းအာအာ၊ အမျာꩻကိုတရိုꩻတောဝ်း၊ အစီꩻဝွေꩻကိုတရိုꩻတောဝ်း၊ လမ်းကိုဒျာႏတရိုꩻတောဝ်း ပေါႏလိုꩻမူႏဒေါ့ꩻထာꩻနောဝ်ꩻ စူꩻတောဝ်း (လက္ခံႏတောဝ်း)တဲင် "သီလိုꩻမူႏလိုꩻပေႏနောဝ်ꩻ အုံတေ့ꩻတေ့ꩻ၊ ဆျာမွူးအူႏထာꩻ ထာꩻတလေတောဝ်း"ရိုꩻဗော့ꩻနုဲင်းနောဝ်ꩻတွော့ꩻ အောဝ်ႏပေ့ꩻခါꩻဒျာႏ လိုꩻမူႏနောဝ်ꩻမꩻ ဗꩻထံယိုခါ လိုꩻမူႏတအုဲင်ႏဒေါ့ꩻဒွုမ်ထာꩻနောဝ်ꩻသွူ။ အမျာꩻကို ပွိုးစွဉ်ႏဖေႏဒေါ့ꩻတောဝ်း လိုꩻမူႏတွော့ꩻ ဖြောင်ဒေါင်ခေတ်ထွိုင်ႏတွိုႏလွဉ် နုဲင်းယိုခါနောဝ်ꩻ ဝင်ꩻလိုꩻမျိုꩻ၊ ဘာႏသာႏလင်သား ထီႏနီပအိုဝ်ႏမူႏနောဝ်ꩻ ထင်းတောစွဉ်ႏ တငွို့တငွဉ်ႏ၊ တအာႏ၊ အမျာꩻခါႏ ဒေါ့ꩻထာꩻနုဲင်းဝင်ꩻဒါႏတောဝ်း၊ ဝင်ꩻရိုꩻရောင်၊ ဝင်ꩻထီႏဖွီထင်းပေႏရောင်လွ နီပအိုဝ်ႏမူႏနုဲင်းနောဝ်ꩻဖုံႏလဲ့ အောဝ်ႏခံႏဗာႏနောဝ်ꩻသွူ။ လိုꩻမူႏတဲ့ လိုꩻတဖြာꩻ၊ ကတူႏခီးတဖြုံႏနေနေတွော့ꩻ လိုꩻမူႏထာꩻယူႏထာꩻတွေꩻ၊ လိုꩻမူႏထာꩻဒေါ့ꩻထာꩻဖြောဝ်ႏဖုံႏလဲ့ အမဲဉ်ႏအောဝ်ႏပါသော့ꩻ အာတန်ဒျာႏနောဝ်ꩻ နီပအိုဝ်ႏခိုသီးဖုံႏ ယိုမာꩻငါနောဝ်ꩻ တလိုႏတိတ်ꩻနျꩻခါꩻတောဝ်း၊ ပေ့ꩻရဲးခါꩻတောဝ်း လိုꩻမူႏငေါဝ်း၊ အောဝ်ႏလိုႏဖေႏဗဲင်းဒေါ့ꩻခွင်ꩻဖုံႏနောဝ်ꩻသွူ။ "အမေႏရိကန်ႏမူႏပေႏနောဝ်ꩻ ထင်ႏနယ်လဲဉ်း လာလောင်းကီ၊ ဂျမနီမူႏပေႏနောဝ်ꩻ ငုပ်နယ်လဲဉ်း ထီပင်ႏလယ်ႏ၊ ခယ်ႏမူႏပေႏနောဝ်ꩻ ထင်ႏပြောဝ်ႏနယ်လဲဉ်းသွူမို့ꩻတို၊ အောဝ်ႏကုဲင်ပအိုဝ်ႏမူႏပေႏနောဝ်ꩻ တွမ်ႏသူးစွူစွူမွိုန်းဖျ၊ အွိုးအလံႏထွန်ႏဆꩻလ အောင်ႏပွယ်ꩻထျꩻသူꩻ ဝင်ꩻအောဝ်ႏသွင်ꩻပါလဲဉ်း ပအိုဝ်ႏမူႏစာႏရင်ꩻကရိုꩻနောဝ်ꩻ---။ တက္ကသိုလ်ႏကျောင်ꩻသားမူႏပေႏသီးဖုံႏ တွမ်ႏရက်ခွိုꩻတရုဲင်ထင် ပအိုဝ်ႏမူႏပေႏသီးဖုံႏဟွေး- မွိုးကထောက်စူပင်ထွေနောဝ်ꩻ အူအီမွိုန်းဒွုမ်မေႏ၊ ဖါကဖေႏစူပင်စေႏနောဝ်ꩻ တရွူꩻအီထဲင်းမွိုန်းဒွုမ်တွေ၊ အွိုး It ခေတ်ထာꩻသေ ဟော်နန်ꩻတန်ကိုသူꩻ တွမ်ႏသꩻရုဲင်းထင် လိုꩻမူႏယံလက္ခဏာႏတွော့ꩻ ထင်ႏဗွောင်နွို့သော့ꩻ ထုမ်ႏလွူꩻနုဲင်းနုဲင်းခန်း၊ ဒီမိုကရေစီယို ထာꩻဗေင်ႏမင်း တမွေးတောဝ်းကရိုꩻနောဝ်ꩻ နီပအိုဝ်ႏမူႏပေႏလိုꩻယွဲးသီး သꩻတွမ်ႏရွူႏရုဲင်းမွိုန်းဒွုမ်အကျောင်ꩻ--။ လွတ်တောႏညီႏလာႏခံႏကိုသူꩻ ဝင်ꩻလိုꩻမျိုꩻ၊ ဝင်ꩻဘာႏသာႏ လိုꩻမူႏဖုံႏ အောဝ်ႏနွို့တွူႏဖါႏရောင်လဲက်း ပငါပရာꩻ၊ နီပအိုဝ်ႏမူႏ သွီႏခွꩻမွိုန်းဒွုမ်ထာꩻလုဲင်း၊ နွို့တွူႏဖါႏရုဲင်းရုဲင်းခန်းဝင်ꩻစာႏရင်ꩻကို၊ ပအိုဝ်ႏမူႏပေႏ အခေႏအနေႏ ဖေႏကယံနောဝ်ꩻ ပွိုင်ဆင်ခန်းသွော့ဝင်ꩻရော့ꩻရော့ꩻလုဲင်း-အွိုးဟွေး ပအိုဝ်ႏမူႏပေႏ တရေꩻသေႏ၊ အွိုးဝေး ပအိုဝ်ႏမူႏပေႏ ဖျင်ခန်းဝင်ꩻပညာႏအခေႏလုဲင်းကရိုꩻနောဝ်ꩻ- နဂါꩻပိုမူႏ လက်ꩻလဲဉ်ဒါႏ၊ ဝိဇ္ဇာႏပိုမူႏပညာႏတန်၊ ဘွုံꩻကံႏလဲ့သန် လွိုးဖုဲင်ႏရက်၊ စွိုးခွိုꩻအတွက် တွူႏငါရုဲင်း၊ ကျင်ႏလယ်ႏဖွီကုဲင်း တလျူမွိုင်၊ ယပ်ꩻခုဲင်ႏထပ်ထွိုင် တွူႏဖါႏနွောင်ꩻ၊ စနစ်ယတဖွောင်ꩻ လွစ်ထန်ႏလꩻ၊ ဝင်ꩻတိတ်ꩻအံႏနျꩻ ယံခံႏဗာႏမွိုန်းတောဝ်းဒွုမ်နောဝ်ꩻ အွဉ်ဝင်ꩻပကျောက်ꩻထွိုင်ႏတဝဲဉ်ကာႏဗꩻဗꩻ-တွိုက်ꩻထန်ႏလꩻလꩻခန်းသွော့ဝင်ꩻလုဲင်း၊ သွီႏရုဲင်းပအိုဝ်ႏမူႏယံသီးဖုံႏဟွေး။ ပအိုဝ်ႏမူႏကံႏကျမ္မာႏနောဝ်ꩻ နေးတွမ်ႏမူႏရဲင်ꩻအာႏ တလာလာသန်သန်တဲင် တွမ်ႏလွိုးဗန်ဗန် သွီႏရုဲင်းထင်ထင်တွော့ꩻ ပွိုင်ဆင်ရဲဉ်ႏထင်ႏသွိုသွိုညီႏညီႏခန်းဝင်ꩻလုဲင်း အွိုးဟွေး- ပအိုဝ်ႏမူႏသီးဖုံႏဟွေး-။ နမ်းသꩻနီပါꩻ ယံချံꩻသာႏ၊ အွိုးပအိုဝ်ႏမူႏဟော်နန်ꩻ ကမ္ဗလာႏလောင်းကီသူꩻ ပအိုဝ်ႏမူႏတာႏ ခွင်ꩻရေꩻတသွိုန်တွောင်း ခွင်ꩻအောဝ်းပွေါးယောင်းစူ ကျိုႏဆွုမ်ႏတသေႏသေႏငါႏလဲဉ်းနောဝ်ꩻသွူ။ တွမ်ႏမေတ္တာႏတဲင်-