လိုꩻမျိုꩻသမဲင်ꩻ

"လိုꩻမျိုꩻသမဲင်ꩻ" သꩻဓာတ်ရက်စွိုးခွိုꩻကရိုꩻနောဝ်ꩻ ဖေႏနွောင်ꩻအစွန်ꩻသတ္တိ စွိုးခွိုꩻစီꩻပွာꩻရေꩻတွမ်ႏ လိုꩻအုံအောဝ်ႏရေꩻ၊ လိုꩻမုꩻရေꩻထင်ႏထိုမုꩻ ထာꩻမာꩻတာႏသွူ။ ထွꩻခေတ်ကထင်ႏထိုဒါႏ လိုꩻမျိုꩻတွိုင်ꩻ လွူးလွသꩻဓာတ် ရက်စွိုးခွိုꩻတွမ်ႏ ဇာႏတိသွီႏသꩻဓာတ် အောဝ်ႏလွဒျာႏဝင်ꩻသွူ။ လိုꩻတွိုင်ꩻစွုမ်ႏဖြာꩻ စီꩻကန်ꩻဖေႏကအောဝ်ႏ၊ နမ်းကျင်ꩻတရာꩻ ဖေႏကမဲဉ်ႏ၊ စွယ်ꩻလုံ့လဝီရိယ ဖေႏကအောဝ်ႏအတွက် ထေအာႏအောဝ်ႏကျိုꩻစာꩻလွဝင်ꩻ ပငါပရာꩻသွူ၊ ရက်စွိုးခွိုꩻသꩻဓာတ် ဖေႏကတလာထင်ႏလွဉ်နောဝ်ꩻ အောဝ်ႏလိုႏသေငါႏ နီလိုꩻမျိုꩻ ကလေစဲင်းအီဒါႏ အင်္ဂါႏလက္ခဏာႏယိုနောဝ်ꩻသွူ။ မဉ်ႏထောင်ထွားလွေꩻဗာႏ လိုꩻဘဝလိုꩻသမဲင်ꩻစဲဉ်ႏလောင်းယိုနောဝ်ꩻ ထွားရီးရီးဗာႏ "လိုꩻယို အစအောဝ်ႏမုဲင်ꩻကိုလွဉ်"နောဝ်ꩻသွူ၊ သိပ္ပံပညာႏသျင်ႏတဖြာꩻ အရိုꩻနောဝ်ꩻ အသက်သꩻအောဝ်ႏ လောကယိုနောဝ်ꩻ တယ်ႏစလွဉ် ထီကိုကအောဝ်ႏဒါႏ ထီယွိုင်ꩻ(ရေညှိ)ထွူမꩻ ဆဲလ်အဆေ့ꩻစားကအောဝ်ႏဒါႏ သတ္တဝါႏ၊ ထီသတ္တဝါႏ ထွာလွဉ်ထီတကွို့ꩻ ဟံႏလောင်းတကွို့ꩻ သတ္တဝါႏ၊ ငင်းဆွတ်ꩻတအောဝ်ႏတောဝ်း သတ္တဝါႏ၊ ငင်းဆွတ်ꩻအောဝ်ႏ သတ္တဝါႏ၊ ဟံႏလောင်းသတ္တဝါႏ၊ ယို့သတ္တဝါႏ၊ အဆုဲင်ꩻသွတ်ꩻ တွိုႏလွဉ်လိုꩻမီꩻသတ္တဝါႏသွူ၊ အောဝ်ႏနောဝ်ꩻတရန်း ထင်ႏထိုလွဉ် လုံးခေတ်ကို(ကျောက်ခေတ်လူသား)သွူ၊ အောဝ်ႏထွာလိုꩻရွိုင်ꩻဘဝနောဝ်ꩻမꩻ ကွဲးညည ထွာလွဉ်လိုꩻယေန်ႏငဲဘဝနောဝ်ꩻသွူ။ ခါးလားသမဲင်ꩻ ကတဲမ်းဒင်ႏသေꩻခါꩻ နေင်ႏပေါင်ꩻမွုန်ႏသဲဉ်ꩻခါကာႏ သတ္တဝါႏအောဝ်ႏထွူလဲဉ်းဒျာႏ၊ ခမ္ဘာႏလောင်းယို အခိန်ႏနောဝ်ꩻခါ ထွားချောင်ꩻတိရစ္ဆာန်ႏအရွိုင်ꩻ အခေႏအနေႏတဲင် ချောင်ꩻတွယ်ႏချောင်ꩻဆွမ်ꩻဒါႏ သတ္တဝါႏနောဝ်ꩻတစား အောဝ်ႏထွူလဲဉ်းဒျာႏသွူ၊ နေင်ႏစုခြွဉ်း ထွိုင်ႏအာလွဉ်တွော့ꩻ သတ္တဝါႏသီးနောဝ်ꩻစားနောဝ်ꩻ ထွာလွဉ်လိုꩻသတ္တဝါႏတဲင် အောဝ်ႏကမ္ဘာႏဦꩻ လိုꩻသတ္တဝါႏနောဝ်ꩻမꩻ ကွဲးယေန်ႏယေန်ႏလွဉ်နောဝ်ꩻသွူ။ ထာꩻသေထာꩻလိမ္မာႏတဲ့ ကွဲးထင်ႏထိုတိုꩻတက်လွဉ်၊ အမွူးအထီး၊ အမူႏတွမ်ႏအခို အုံညီꩻအောဝ်ႏရောဝ်းဒါႏတွမ်ႏလမ်းပါႏသွူ၊ အစခါ အံႏတသဉ်ဒါႏထာꩻယာႏ၊ ဆုဲင်ꩻခါ ထွိုင်ႏမော့ꩻလွဉ်မေႏတွော့ꩻ ဖို့ꩻအံႏနေး၊ ပေင်းအံႏနေး၊ ခွုမ်စံႏဒါႏလွဉ်စွဉ်ႏမေႏနောဝ်ꩻသွူ၊ မေႏနောဝ်ꩻ ကာႏကွယ်ႏအီ နီနမ်းအန္တရာယ်ႏတဲင် သွုံꩻဒါႏလွဉ်စွဉ်ႏမေႏနောဝ်ꩻသွူ။ သမဲင်ꩻပညာႏသျင်ႏဖုံႏ နေးတွမ်ႏခေတ်အမျိုꩻမျိုꩻတဲင် ခွယ်ꩻနယ်စွဉ်ႏ လိုꩻသမဲင်ꩻယိုသွူ၊ ဘာႏသာႏ ငေါဝ်းငွါ၊ ယိုꩻယာႏဓလေ့ꩻ၊ ခွိုꩻနွယ်ႏဗွိုန်ပီမုꩻအလꩻ ထွာလွဉ်ဒါႏ လိုꩻစွုမ်ꩻစွိုꩻဖုံႏယိုနောဝ်ꩻ ဟဲ့ꩻဗာႏလိုꩻမျိုꩻနောဝ်ꩻသွူ၊ မနုဿဗေဒ ပညာႏသျင်ႏဖုံႏနောဝ်ꩻ ထွားလိုꩻကတူႏခြုံ၊ ထွားလိုꩻအဆွတ်ꩻဖုံႏ၊ အနမ်းအခြုံဖုံႏ၊ ထွားလိုꩻအဖွိုႏအထို၊ ထွားလိုꩻမဲ့ငါပွိုင်၊ ထွားမဲ့ခူꩻအရောင်ႏတွမ်ႏ ကလူꩻဆွဉ်ႏအရောင်ႏတဲင် ခွယ်ꩻချာအီလိုꩻမျိုꩻနောဝ်ꩻသွူ။ မဉ်ႏထွားအသွီႏအယာႏအရောင်ႏနောဝ်ꩻ ကမ္ဘာႏလောင်းယို လိုꩻဗွာ၊ လိုꩻဖြေင်း၊ လိုꩻတနျာႏ၊ လိုꩻတသီး အောဝ်ႏလွဉ်စွဉ်ႏလစ်ꩻမျိုꩻနောဝ်ꩻသွူ၊ လိုꩻမျိုꩻတန်လစ်ꩻမျိုꩻယို ယေန်ႏငဲရေꩻအစနောဝ်ꩻ အောဝ်ႏအွိုးဟံႏဩဇာႏ၊ ဟဲ့ꩻဗဲ့ꩻဟောဝ် ကအောဝ်ႏဒါႏအရပ်၊ ထီခြောင်ထျꩻအရပ်ကိုသွူ။ မဉ်ႏဒေါ့ꩻဗာႏ အအဲဉ်ႏနယ်ꩻနောဝ်ꩻ လိုꩻယာႏဗွာဖုံႏနောဝ်ꩻ အောဝ်ႏအုံသော့ꩻဒျာႏ ဥရောပတွိုက်ကို၊ လိုꩻတနျာႏနောဝ်ꩻ အောဝ်ႏအုံသော့ꩻ အာဖရိကတွိုက်ကိုတွမ်ႏ မြောက်အမေရိကတွိုက်ကို၊ လိုꩻယာႏဖြေင်းဖုံႏနောဝ်ꩻ အုံအောဝ်ႏသော့ꩻ အာဖရိကတွိုက်ကို၊ လိုꩻယာႏတသီးဖုံႏနောဝ်ꩻ အုံအောဝ်ႏသော့ꩻအာဒျာႏ နီသွဉ်းသီး အာသျှတွိုက်ကိုယိုနောဝ်ꩻသွူ။ ခယ်ႏ၊ ဂျပန်၊ ကိုးရီးယား၊ ဗီယက်နမ်၊ ကမ္ဘောဒီးယား၊ ထုဲင်ꩻတွမ်ႏမန်းခမ်းကို ကအောဝ်ႏအုံသော့ꩻဒါႏ လိုꩻမျိုꩻလို့လို့စင်စင်ယို ထွာဒျာႏလိုꩻတသီးလွဉ်းလွဉ်းသွူ၊ နီပအိုဝ်ႏလိုꩻမျိုꩻ ကရိုꩻယိုနောဝ်ꩻလဲ့ အောဝ်ႏပါဝင်ႏသော့ꩻဒျာႏ လိုꩻယာႏတသီးကိုနောဝ်ꩻသွူ။ ကွပ်ပွိုးနောဝ်ꩻမꩻ နီပအိုဝ်ႏခမ်းရင်ꩻသားဖုံႏ လို့လို့စင်စင်နောဝ်ꩻ အောဝ်ႏလိုႏအုံဖွီ အောဝ်ႏဖွီမွိုန်းတောဝ်းထာꩻတဲင် လွူးသꩻဓာတ် "စူစောဝ်ႏမꩻ ဖြောင်းစောဝ်ႏ"တွော့ꩻ ရုပ်နာမ်ႏသတ္တိꩻ ဖေႏကအောဝ်ႏလွဉ်၊ ခံႏထူႏယွုမ်းအံႏဒျာႏ သꩻဓာတ်ရက်စွိုးခွိုꩻ ဗွေကုမ်ႏလွဉ်၊ ခွိုင်းစူကထွꩻရာꩻနောဝ်ꩻ လေ့လာထုမ်ႏသောက်လွေꩻလွဝင်ꩻနောဝ်ꩻသွူ။