လိုꩻယွဲးတွမ်ႏခြွိုင်ႏသန်ꩻရေꩻ
လိုꩻသီးနဝ်ꩻ ကံႏဟဝ်အဝ်ႏငတ်ꩻမျိုꩻ၊ ငတ်ꩻမျိုꩻကရိုꩻနဝ်ꩻ (က) သက်ထိုစိုးဆွာꩻ (ခ) ချမ်ꩻသာႏလွိုင်ႏကွုန်ꩻ (ဂ) ခြွိုင်ႏသန်ꩻ (ဃ) ရက်စိုမ်ꩻထာꩻမာꩻဟဝ် (င) သဘာဝအလွောက်ꩻ သီရိုꩻရိုꩻဗာႏထာꩻ- ယိုငတ်ꩻမျိုꩻဖုံႏနဝ်ꩻသွူ။ နဝ်ꩻငတ်ꩻမျိုꩻဖုံႏအကို သက်ထိုစိုးဆွာꩻတွမ်ႏ ခြွိုင်ႏသန်ꩻဖုံႏနဝ်ꩻ စပ်ဆွိုင်ꩻတွမ်ႏကျမ္မာႏရေꩻ၊ ကဗွောင်ဒါႏကျမ္မာႏရေꩻ အခရာႏနဝ်ꩻ ထာꩻဆာꩻကင်ꩻကင်ꩻ၊ အုံဗာႏဟဝ်ဟဝ်အဝ်ႏနုဲင်းနဝ်ꩻသွူ၊ ကမ္ဘာႏကျမ္မာႏရေꩻအစွိုꩻသားအနေႏ ကဗွောင်နယ်နဝ်ꩻ ထာꩻမာꩻသားခမ်းသားလိုꩻဖုံႏ မော့ꩻခွဲးဗာႏတဝ်း ရောႏဂါႏအန္တရာယ်ႏပေါင်ꩻအာ၊ စူခင်ႏစတဲင်အင်္ဂါႏချို့ꩻယွင်ꩻဗာႏတဝ်းတွော့ꩻ နမ်းချမ်ꩻသာႏ၊ သꩻချမ်ꩻသာႏ၊ လိုꩻမုꩻရေꩻချမ်ꩻသာႏ ချမ်ꩻသာႏယိုသိုမ်မျိုꩻ ကဗွေစွုမ်ႏဒါႏနဝ်ꩻ ဟဲ့ꩻဗာႏကျမ္မာႏရေꩻဟဝ်နဝ်ꩻသွူ။
အကျောင်ꩻခရာႏ ကမာꩻဒွေါင်ႏအီလိုꩻသီးသက်ဖုံႏလဲ့ အဝ်ႏသွူ၊ တမုဲင်ꩻဖုံႏနဲးတဲင် မက်ငါႏထာꩻအံႏ၊ လွꩻလေႏ၊ သꩻဖြုံႏထို(မာႏနတန်)၊ လောဘလွဉ်ꩻချိုꩻငါႏထာꩻ၊ တဏှာႏရာႏဂတန်လွဉ်ꩻငါႏ၊ ဒေါသတန်(သꩻမွိုင်)လွဉ်ꩻငါႏ-စတဲင်နုဲင်းနဝ်ꩻဖုံႏသွူ၊ သက်ဖေႏနေးကဆွာꩻ ကလိုႏသျောင်ႏခရာႏဖုံႏလဲ့ အဝ်ႏဒျာႏ၊ အဝ်ႏလိုႏဆွဉ်းတဝ်းယာထူ၊ အဝ်ႏလိုႏအွꩻတမွိုꩻတမာꩻတဝ်းဒဝ်၊ တနီꩻယို ဗေင်ႏထာꩻ(၈)နားရီႏလွို(မွေးတဝ်းလဲ့) ဗေင်ႏဗွေတဝ်းနွုတ်ꩻနားရီႏ၊ မွူးရဝ်ꩻခိုႏ အဝ်ႏလိုႏအံႏမဲဉ်ႏမဲဉ်ႏအဆာႏအာဟာႏရ၊ နမ်းယာႏခဉ်ႏထွူႏလွဉ်ꩻငါႏ (မွေးတဝ်းလဲ့) ဖွီလွဉ်ꩻငါႏ၊ အဝ်ႏလိုႏမာꩻကျမ္မာႏရေꩻ-စတဲင်နုဲင်းနဝ်ꩻသွူ။ လိုꩻကအုံဗာႏသက်ဆွာꩻဆွာꩻသား အထာꩻပလို့ꩻချက်ဖုံႏလဲ့ အဝ်ႏနေဒွိုန်း၊ နဝ်ꩻဖုံႏနဝ်ꩻ အံႏအာအာဒျာႏ အိုသဉ်အိုလာႏ၊ အုံဒျာႏကောင်ဆောင်ႏအခြာ၊ ထောင်အာအာတဖူꩻ၊ နုဲင်းမုဲင်ꩻမုဲင်ꩻတဲ့ယဝ်း ဖေႏဒေါသကထန်ႏမွုန်းနဝ်ꩻ အုံအဝ်ႏ၊ အုံမဲဉ်ႏမဲဉ်ႏတရာꩻနုဲင်းနဝ်ꩻဖုံႏသွူ။ ကျမ္မာႏရေꩻဝွန်ႏတန်သီး ရေႏမိုးချက်ဖုံႏလဲ့အဝ်ႏဒျာႏသွူ၊ [၁][၂]
လိုꩻယွဲးတွမ်ႏကျမ္မာႏရေꩻ[မွဉ်းဖျင် | မွဉ်းဖျင်အရွီးခိုႏ]
လိုꩻကအုံဗာႏသက်ဆွာꩻဆွာꩻသားဖုံႏ အထာꩻပလို့ꩻချက်ဖုံႏလဲ့ အဝ်ႏသွူ၊ အံႏအာဒျာႏ အိုသဉ်အိုလာႏ၊ အုံအဝ်ႏဒျာႏ ကောင်ဆောင်ႏခြာ၊ လွေꩻခင်ႏအာအာထာꩻ၊ စစရာႏရာႏ အုံထာꩻဒေါသဖေႏကထန်ႏမွုန်းတွမ်ႏ အုံလင်ꩻမဲဉ်ႏမဲဉ်ႏတရာꩻဖုံႏနဝ်ꩻသွူ။ လိုꩻယွဲးတွိုင်ꩻဖုံႏလဲ့ သꩻခြွိုင်ႏသန်ꩻနမ်းခြွိုင်ႏသန်ꩻဖုံႏအဝ်ႏလွဒျာႏနေနေ၊ သꩻဖေႏနေးကခြွိုင်ႏသန်ꩻနဝ်ꩻ အွဉ်ႏသꩻဒါႏဒါႏဗာႏ၊ လိုꩻတဖြာꩻ သꩻရောႏဂါႏကအဝ်ႏလွဉ်ဗာႏနဝ်ꩻ ကွပ်တလွောက်ꩻဖက်တဝ်း နမ်းစွဲးကမ်းနွောင်ꩻစိုန်ꩻအာႏတွမ်ႏ ကလိုႏအပ်ဒါႏ အသောင်အရင်ꩻဖုံႏတဲင် သꩻရောႏဂါႏထွာလွဉ်ဗာႏ ဆရာႏတန် လိုမ်ꩻလာꩻသꩻရောႏဂါႏသား ရိုꩻဗာႏဖိုနုဲင်းနဝ်ꩻသွူ။ လိုꩻတဖြာꩻ သꩻခြွိုင်ႏသန်ꩻကရိုꩻနဝ်ꩻ နမ်းထာꩻလိုႏဆန္ဒဖုံႏ၊ ရေႏမိုးချက်ဖုံႏ၊ စိုန်ꩻထီဖုံႏ၊ ခံႏစာꩻမုꩻဖုံႏတွမ်ႏ ထာꩻသေသꩻဓာတ် ဖေႏနေးကလွောက်ꩻဖက်တွမ်ႏ နမ်းကခွဲးတလူႏဒါႏ ထာꩻလိုႏဖုံႏနုဲင်းနဝ်ꩻသွူ။ လိုꩻသꩻခြွိုင်ႏသန်ꩻနဝ်ꩻ နမ်းယိုတွမ်ႏသꩻ သက်သာႏလွဒျာႏဖုံႏ၊ ထဲမ်ဗွေနွောင်ꩻ နမ်းဘဝကလိုႏလိုႏဒါႏဖုံႏနဝ်ꩻသွူ၊ နမ်းမဉ်ႏတခြွိုင်ႏတဝ်းနဝ်ꩻ တထိုမ်ႏနွောင်ꩻတဝ်း စီꩻပွာꩻဥစ္စာႏ၊ ကအဝ်ႏထွူလဲဉ်းဒါႏ စီꩻပွာꩻဥစ္စာႏလဲ့ အီႏထိန်ꩻသိမ်ꩻနွောင်ꩻ စိုန်ꩻအာႏအဲဉ်ထဝ်း၊ နမ်းမဉ်ႏခြွိုင်ႏသန်ꩻမꩻ ထိုမ်ႏနွောင်ꩻစီꩻပွာꩻဥစ္စာႏ၊ နမ်းမဉ်ႏခြွိုင်ႏသန်ꩻမꩻ ကထိုမ်ႏခါꩻထွူဒါႏ စီꩻပွာꩻဥစ္စာႏယို သုံꩻဆောင်ႏနွောင်ꩻ၊ သꩻမဉ်ႏတခြွိုင်ႏသန်ꩻတဝ်းနဝ်ꩻ အားထုတ်နွောင်ꩻတဝ်းတရာꩻ၊ သꩻတပါတဝ်းတရာꩻ၊ တလꩻတဝ်းဒွိုန်းလာဘ်လဲ့ အပေ့ꩻထိုꩻဒါႏ၊ အကျိုꩻအဲဉ်ထဝ်းနဝ်ꩻသွူ။
လိုꩻယွဲးသီးသဘာဝ ထွာဒျာႏအမွန်ဗန် အပြွူႏဖြိုနဝ်ꩻဒျာႏရင်ꩻ၊ အဝ်ႏမွိုးဖါခြွိုင်ႏသန်ꩻ ကလွူးဖွါꩻလင်ꩻဒါႏ လိုꩻယွဲးနဝ်ꩻ ခြွိုင်ႏသန်ꩻ ပြွူႏတန်ဗာႏဒျာႏသွူ၊ ပေါႏလွိုတဲင် ရောႏဂါႏကပါလွူးခါကာႏ ကအဝ်ႏကုဲင်လိုꩻယွဲးကားကအဝ်ႏဖုံႏနဝ်ꩻ အီႏထွာလိုꩻယွဲး ပြွူႏဖြိုတန်လွဉ်ပုံႏမဲဉ်ႏစားဖုံႏနဝ်ꩻသွူ။ နမ်းဖေႏကခြွိုင်ႏသန်ꩻအီတာႏ အဝ်ႏလိုႏအွဉ်ႏရေꩻ ထိန်ꩻသိမ်ꩻဟဝ်မွေးငါႏ အင်္ဂါႏကခံႏအာႏရုံႏစားသွူ၊ လိုꩻယွဲးသီး သဘာဝနဝ်ꩻ ဖွီသွောင်မွိုင်တလျူလွတဲင် အင်္ဂါႏခံႏအာႏရုံႏဖုံႏ၊ စူခင်ႏဖုံႏ ဖေႏနေးကချို့ꩻဗာႏမွုန်းနဝ်ꩻ အဝ်ႏလိုႏအွဉ်ႏရေꩻလွငါႏ၊ ဥပမာႏ- စူခင်ႏစို့ꩻ ကက်ဆွော့ꩻ ဗန်းဗားစတဲင်နုဲင်းနဝ်ꩻဖုံႏသွူ။ အဝ်ႏလိုႏဆဲ့ꩻရဲးခါꩻရီး တသီႏဖုံႏနဝ်ꩻ ထွာမွိုးဖါလိုꩻတန်သီးတာႏဝွန်ႏ၊ လိုꩻပေႏသီပေႏသီဆားထာꩻတဲ့ အာမွေးမုဲင်းစွဉ်ႏထာꩻ၊ တဲႏသက်(၁၃)ဗꩻ သက်(၁၉)အခါႏလယ်ႏနဝ်ꩻ ခမ်းတွို့ꩻသား ဟဲ့ꩻဒျာႏလိုꩻပေႏဘဝတဲင် အခိန်ႏအဝ်ႏလိုꩻပေႏဘဝ ခါးလားကပြောင်ꩻလွေꩻ လိုꩻယွဲးဘဝတွင်ꩻနဝ်ꩻသွူ။ အရွယ်ႏခိုဗင်ႏမူႏနံꩻစနဝ်ꩻ အခိုတဲ့ယဝ်း အခိုတဲ့သင် ကွပ်ပွိုးဟော်မုန်းအာႏတမာတဲင် ဗိုန်ပီနုဲင်း လိုꩻမူႏသီး ရာႏသီႏကကဝ်ႏလွဉ်၊ သꩻအင်ကပြွူႏဖြိုလွဉ်နဝ်ꩻအတွိုင်ꩻ လိုꩻခိုသီးဖုံႏလဲ့ အငဝ်းပြောင်ꩻလွဉ်၊ ဆွဉ်ႏဖုံႏလွိုင်ႏလွဉ်၊ သꩻဝင်ႏစာꩻလွဉ် လိင်တဗိုန်တဝ်းသားအလောင်းဖုံႏနဝ်ꩻသွူ။ ကွပ်တရဝ်းအခိန်ႏတဲင် ငမ်းလွဉ်ꩻဝင်ꩻသꩻလွဉ်ꩻငါႏထာꩻ၊ ထာꩻကွုတ်ꩻကွုတ်ꩻကတ်ꩻကတ်ꩻဖုံႏယို မွိုးဖါလိုꩻတန်သီး အဝ်ႏလိုႏဒေါ့ꩻသေꩻခါꩻရီးငါႏသွူ၊ မွေးတဝ်းလဲ့ အဗွေႏနမ်းဖုံႏ အဝ်ႏလိုႏဟော်ꩻထွားငါႏ လိတ်အုပ်ကဖေႏဒါႏ တသီႏပညာႏဖုံႏသွူ၊ တရဝ်းခိန်ႏနဝ်ꩻ ကွပ်စွဉ်ႏစူခင်ႏအင်္ဂါႏဖုံႏ တန်ဖြိုစွော့ꩻလွဉ်တဲင် ခွေါင်းလွဉ်အသꩻထွာဒါႏနုဲင်းနဝ်ꩻသွူ။ ကွပ်လိုꩻတန်ဖုံႏ ခွန်းထွမ်ဒင်ႏအပဲစ်တဲင် ခွေါင်းဒါႏအသꩻနဝ်ꩻသွူ၊ အနမ်းပြွူႏဖြိုလွဉ်ကီလဲ့ နွို့ဝင်ꩻခြာတတွမ်ႏတဝ်းတွော့ꩻ ခင်ႏလမ်းအဲဉ်ႏထိုꩻဒါႏသွူ၊ ကုဲင်းခံႏစာꩻအီဗာႏဒါႏ သꩻဝွေႏဒနာႏ၊ လိုꩻယွဲးဘဝနဝ်ꩻ ထွာအရွယ်ႏအံႏအွီႏဗေင်ႏအွီႏတဲင် ကျမ္မာႏရေꩻဟဝ်ရိုꩻဗာႏနုဲင်းနဝ်ꩻသွူ၊ ကွပ်ဟို့ꩻရောႏဂါႏ၊ အလျားအခွꩻလွဉ်ꩻတွော့ꩻ ကထွာဒါႏ ထာꩻဆော့ရောႏဂါႏတွမ်ႏ ယာႏပီရောဂါႏယင်ဟန်ႏဖုံႏတဲင် ရုပ်ဆဲင်ႏရာꩻချို့ꩻယွင်ꩻချက် ကုဲင်းထွာဒါႏနေနေ၊ နေးတွမ်ႏအနယ်ꩻမဲဉ်ႏမဲဉ်ႏ အဝ်ႏလိုႏရုဲင်ꩻတသွိုးဖေႏနမ်းသွူ။
စွုမ်ႏနီꩻနီꩻ အဝ်ႏလိုႏလူးမဲဉ်ႏမဲဉ်ႏထီ၊ အအံႏအအွꩻ အအုံအအဝ်ႏလဲ့ အဝ်ႏလိုႏဆင်ႏချင်ႏငါႏ၊ လိုꩻယွဲးသီး သꩻဖေႏကခြွိုင်ႏသန်ꩻနဝ်ꩻ စပ်ဆွိုင်ꩻဒျာႏ သꩻပြွူႏဖြိုမုꩻ၊ ပေါႏလွိုတဲင် ကလွူးခါကာႏ သꩻချို့ꩻယွင်ꩻတထွူ၊ လိုꩻပေႏဘဝ ကထွာဒါႏသꩻရောႏဂါႏ အဝ်ႏကုဲင်ကဖေါက်ပြန်ႏဒါႏ အလောင်ႏအလင်ဖုံႏနဝ်ꩻ ကဲဉ်းအာအာ စပ်ဆွိုင်ꩻလွဒျာႏ တွမ်ႏထာꩻမတ်ဉာဏ်ႏ နမ်းရင်ꩻအထီအသွီႏ သꩻရုဲင်ꩻတသွိုးမုꩻဖုံႏနဝ်ꩻသွူ။ အကွာႏလွဒျာႏကွို့ꩻ ဖူးဝေးစွိုးခွိုꩻအာတွမ်ႏ နားဟွိုန်ꩻလမ်းကိုဆေ့ꩻနုဲင်းနဝ်ꩻလွုမ်ꩻ၊ လိုꩻယွဲးသီးအတာႏ သꩻဖေႏကခြွိုင်ႏသန်ꩻအီ ကလိုႏအပ်ငါႏနဝ်ꩻ အဝ်ႏလိုႏကျိုꩻစာꩻထိန်ꩻတီ သꩻရုဲင်ꩻတသွိုးမုꩻတွမ်ႏ အုံအဝ်ႏလက်ခံႏဒါႏ ပကတိအခေႏအနေႏနဝ်ꩻလွုမ်ꩻသွူ၊ လိုꩻတွိုင်ꩻ ထာꩻဆာရောႏဂါႏကင်ꩻကင်ꩻ ဖေႏနေးကအုံအဝ်ႏဗာႏ ခြွိုင်ႏခြွိုင်ႏသန်ꩻသန်ꩻနဝ်ꩻ အနယ်ꩻအဝ်ႏအာတန်ဒျာႏသွူ။
တဟာယို အဆေ့ꩻသွတ်ꩻ အဝ်ႏလိုႏဗေင်ႏထာꩻ (၈)နားရီႏ၊ မွူးယာခိုႏနဝ်ꩻ တနီꩻယို အဆ့ꩻသွတ်ꩻ ဗေင်ႏထာꩻတနားရီႏတွော့ꩻ အဝ်ႏလိုႏအုံပဆားငါႏသွူ၊ သွီႏတလီꩻဖေႏနေးကမဲဉ်ႏနဝ်ꩻ အဝ်ႏလိုႏမာꩻဖေႏ စူခင်ႏရုဲင်ꩻတသွိုးမုꩻ၊ ကမာꩻဒါႏ ထာꩻမာꩻတနီꩻတနီꩻအကိုယိုလဲ့ အဝ်ႏလိုႏမာꩻယွမ်ꩻလွေꩻလဲင်ႏစိꩻစိꩻ၊ အဝ်ႏလိုႏယုက်ထွူႏတဝ်းထာꩻ၊ လွေꩻအထွူႏအဖွီထွူစွုမ်ႏလဲင်ႏ အဝ်ႏလိုႏသုံꩻနေးထီ၊ အဆေ့ꩻသွတ်ꩻနဝ်ꩻ အဝ်ႏလိုႏလွေꩻဗဲင်း တနီꩻတလဲင်ႏ၊ ဖေႏနေးဟို့ꩻကမဲဉ်ႏတဲင် အဝ်ႏလိုႏအံႏတတွာတွာဖေႏပါငါႏ အယာႏကထွာအာဟာရတွမ်ႏ ရာႏသီႏအလွောက်ꩻ အိုသဉ်အိုလာႏဖုံႏနဝ်ꩻသွူ။ အဝ်ႏလိုႏအံႏတဝ်း တသီႏဟို့ꩻနုတ်အကျမ်ꩻလွဉ်ꩻထာꩻစား၊ အဝ်ႏလိုႏအံႏငါ တသီႏနုတ်ဟို့ꩻ ပေါင်းချော်ꩻချော်ꩻစားငါ၊ အံႏအွꩻထွူတွိုင်ꩻ အဝ်ႏလိုႏပွစ်တငါ တဖြူငါႏဖြောင်း၊ ရာႏသီႏအလွောက်ꩻ အဝ်ႏလိုႏကွဉ်ကꩻဒျာႏ ခွမ်ꩻလာꩻတခြင်ခြင်၊ အဝ်ႏလိုႏအံႏအွꩻဒျာႏ အိုသဉ်အိုလာႏဗန်ဗန် အသွတ်ꩻတဲ့သင်၊ အငိုးတဲ့သင်၊ အထီတဲ့သင်ဖုံႏနဝ်ꩻသွူ။
ရာႏသီႏအလွောက်ꩻ ကပေါႏဒါႏ သင်္ဘောꩻရာႏ၊ မောက်ꩻအိုꩻရာႏ၊ တသွီရာႏ၊ မောက်ꩻဖါးရာႏ၊ တခေါ့ꩻရာႏ၊ မောက်ꩻစောက်ꩻရာႏ-စတဲင်အရာႏဖုံႏလဲ့ အဝ်ႏလိုႏအံႏဖေႏပါငါႏ၊ မဉ်ႏအွꩻနွောင်ꩻ ဖိုးနဲဉ်းထီ တနီꩻအယာႏခဉ်ႏတစိတ်နဝ်ꩻ ယိန်းယံ၊ ထာꩻဆိုမ်၊ ထာꩻငိုးခြိုမ်ႏ၊ ထာꩻကြူးကြူးနေးစူဖုံႏ၊ ဗင်ႏဆျာႏ၊ ခေါင်ꩻဆျာႏ၊ တညင်းရာႏဖုံႏနဝ်ꩻ အတတ်နွိုင်ႏသွတ်ꩻ အဝ်ႏလိုႏသျောင်ႏထိုꩻငါႏအကျောင်ꩻ ဒင်ႏပျꩻနယ်ဗာႏနုဲင်းနဝ်ꩻသွူ။[၃]