လိုꩻယွဲးတွမ်ႏအိန်ႏထောင်ႏရေꩻ
"လိုꩻယွဲးတွမ်ႏအိန်ႏထောင်ႏရေꩻ" အမူႏတွမ်ႏအခို အီႏအုံခြွဉ်းငီꩻလွေꩻအီလို့ဝင်ꩻ ကတဲႏထောင်ႏလွေꩻဒါႏ လမ်းပါႏခြွိုင်ႏခြိုꩻနဝ်ꩻ ဟဲ့ꩻ"အိန်ႏထောင်ႏ"၊ မဉ်ႏထွာပအိုဝ်ႏနဝ်ꩻ ဟဲ့ꩻ"တောႏလမ်းတောႏပါႏ"၊ တောႏလမ်းတောႏပါႏထာꩻယို မာꩻနေးအခန်ꩻနာꩻ ဖေႏနေးဝင်ꩻအမျာꩻကသေထွꩻနဝ်ꩻ ဟဲ့ꩻ"ထိန်ꩻမျာꩻမင်္ဂလာႏ"၊ ဇီဝဗေဒပညာႏသဘော်ꩻအလꩻ ထွာဒျာႏ လိုꩻခိုတွမ်ႏလိုꩻမူႏသီး ဖေႏနေးခွိုꩻသွုပ်ကစွစ်ꩻလီအီတာႏဒျာႏနဝ်ꩻသွူ။ လိုꩻသီးဖုံႏ ကထွိုင်ႏတဲႏထောင်ႏလွဉ် ယေန်ႏငဲးမုꩻအရန်းရန်းခိန်ႏယို တောႏလမ်းတောႏပါႏအကို ထိန်ꩻသိမ်ꩻပွေါးထွားဖေႏဗာႏ ပိုခိုပိုမူႏဖူးဝေးစွိုးခွိုꩻစတဲင်-ကရိုꩻဒါႏ တာႏဝွန်ႏဝတ္တရာꩻနဝ်ꩻ ထွာစွဉ်ႏဒျာႏ အရေꩻတန်တာႏဝွန်ႏဝတ္တရာ၊ သေနာႏလွဉ်လွနုဲင်းနဝ်ꩻဖုံႏသွူ၊ နဝ်ꩻမꩻ တောႏလမ်းတောႏပါႏထာꩻယိုနဝ်ꩻ လိုꩻမုꩻရေꩻကိုနဝ်ꩻ ထွာဒျာႏယေန်ႏငဲးမုꩻတဗာႏတန်သွူ။ အခိုတွမ်ႏအမူႏ တောႏလမ်းတောႏပါႏလို့ဝင်ꩻယို အဝ်ႏဟဲ့ꩻလွတွမ်ႏဝေါဟာရအမျိုꩻမျိုꩻ "ထိန်ꩻမျာꩻမင်္ဂလာႏ"၊ "တောႏလမ်းတောႏပါႏ"၊ "လက်ထပ်မင်္ဂလာႏ"၊ "ခဲဉ်းဖေႏလွတွမ်ႏလူႏ"နုဲင်းနဝ်ꩻဖုံႏ၊ ထိန်ꩻမျာꩻကရိုꩻနဝ်ꩻ ဖေႏအုဲင်ႏလို့ဝင်ꩻ၊ ဖေႏသဲင်ꩻလွဉ်ꩻဝင်ꩻ၊ အာဝါဟမင်္ဂလာႏ-ကရိုꩻနဝ်ꩻ ပိုမူႏသား ပသာသဲင်ꩻလွဉ်ꩻ အခိုသားလမ်းနဝ်ꩻသွူ၊ လက်ထပ်လို့ဝင်ꩻ အခန်ꩻအနာꩻကိုနဝ်ꩻ အမူႏစူနဝ်ꩻ အွဉ်ႏဆꩻလ၊ အခိုစူနဝ်ꩻ အွဉ်ႏဆꩻကီထွူတဲင် တွမ်ႏပိတ်ချော်ꩻပနဲဉ်ႏ စွိုင်ဗဲဉ်ခါꩻထွူ ဆူလွဉ်ꩻဖေႏဗာႏတွမ်ႏထီနဝ်ꩻသွူ။ (ကွဲႏတွော့ꩻ ပအိုဝ်ႏထုံꩻယိုခါနဝ်ꩻ အွဉ်ႏခဲဉ်းဖေႏအလူႏဒျာႏနဝ်ꩻသွူ။) ထိန်ꩻမျာꩻမင်္ဂလာႏ ဓလေ့ꩻထုံꩻစံႏယင်ဟန်ႏဖုံႏနဝ်ꩻ အခိုအမူႏသီးယို အွဉ်ႏဖေႏတွမ်ႏခိုဗင်ႏမူႏနံꩻအရံႏဖုံႏ နီဖဲ့ꩻဖဲ့ꩻထွူတဲင် ဂုဏ်ႏကျက်သရေႏအဝ်ႏ လိုꩻတန်တမာဝါꩻသီး အွဉ်ႏထပ်ဖေႏအစူ၊ ကွဉ်းတော့ꩻရတနာႏသိုမ်ပါꩻတွမ်ႏ နီဖဲ့ꩻမွိုးဖါထွူတွော့ꩻ ခံႏထဉ်ႏလွူးတဲင်စာႏဂလွေꩻနဝ်ꩻသွူ။ ယင်ဟန်ႏနဝ်ꩻ ထောက်ꩻဆူနေးတွမ်ႏအဘိသေက်၊ ဟော်ꩻနေးလိတ်ဩဘာ၊ ဟော်ꩻလွရတုဖုံႏ၊ ဒေါ့ꩻလွငဝ်းဆုံꩻမꩻဩဝါဒဖုံႏ-စတဲင် ကျင်ꩻသုံꩻလွေꩻအမျိုꩻမျိုꩻ၊ ယင်ဟန်ႏနဝ်ꩻ အပ်နေးအခန်ꩻနုဲင်းနဝ်ꩻလဲ့အဝ်ႏဒျာႏ၊ ကွီဒျာႏလုံးခြဲက်ငိုꩻလဲ့ အဝ်ႏနေကဒွိုန်းဖုံႏသွူ။ ထိန်ꩻမျာꩻမင်္ဂလာႏစနစ်ဖုံႏ အဝ်ႏလွအမျိုꩻမျိုꩻ၊ နဝ်ꩻဖုံႏအကို အသက်အဝ်ႏမွန်တွင်ꩻ အခိုတဖြာꩻနဝ်ꩻ ထူႏကွို့ꩻအမူႏတဖြာꩻလွုမ်ꩻတရိုꩻတဝ်း၊ အမူႏတဖြာꩻနဝ်ꩻ ထူႏကွို့ꩻအခိုတဖြာꩻလွုမ်ꩻတဲ့သင် ဗꩻစွဉ်ႏသီထံ မာꩻတဖြာꩻဝါꩻတဖြာꩻစားစနစ်နဝ်ꩻ ထွာအစဲင်းထင်ႏသျာꩻလွိုဝင်ꩻနဝ်ꩻသွူ။ နဲင်ႏငံႏယင်ဟန်ႏ၊ ဘာႏသာႏယင်ဟန်ႏနဝ်ꩻ အခိုတဖြာꩻနဝ်ꩻ ထူႏလွိုလိုꩻမူႏတဖြာꩻ စနစ်နုဲင်းနဝ်ꩻလဲ့ အဝ်ႏလွဒျာႏ၊ စနစ်နဝ်ꩻနဝ်ꩻ တထွန်ꩻကာꩻထွꩻတဝ်း နုဲင်းမာတဖြာꩻဝါꩻဖြာꩻစနစ်သွူ၊ ခေတ်ပွိုင်းလဲင်ႏ ပါꩻမူႏတဖြာꩻဒျာႏနဝ်ꩻ ထူႏလိုꩻခိုအာတန် စနစ်နုဲင်းနဝ်ꩻ ထွန်ꩻကာꩻဗာႏဖို၊ ခေတ်ယိုခါနဝ်ꩻ တိဗဲစ်၊ အိန္ဒိယတွမ်ႏ အဲက်သကီးမိုးဒေႏသယင်ဟန်ႏကိုနဝ်ꩻ စနစ်နုဲင်းနဝ်ꩻအဝ်ႏနေကဒွိုန်းသွူ။ ခေတ်ယိုခါကာႏလ ဗုဒ္ဓဘာႏသာႏခွိုꩻ လိုꩻခိုတဖြာꩻတွမ်ႏ လိုꩻမူႏတဖြာꩻ ယံဖေႏနေးကထွာ မာဝါꩻတရာꩻဝင်ႏ ကလိုႏအပ်ဒါႏအချက်ဖုံႏနဝ်ꩻ- (၁) လိုꩻခိုနဝ်ꩻ အီႏတောႏလမ်းထာꩻယို ခြွိုင်ႏသန်ꩻရဲင်ꩻဆွော့ꩻဗာႏ (၂) အမူႏယို မဲးမုဲင်း(မွေးတဝ်းတဲ့) မုဲင်းရင်းတပန်မဉ်ႏတမွေးတဝ်းနဝ်ꩻ သက်(၂၀)ဗွေဗာႏ၊ သက်(၂၀)မဉ်ႏတဗွေတဝ်းဒွိုန်းလဲ့ မွိုးဖါ(တဝ်းလဲ့) ကေားကထိန်ꩻထွားသား သဘော်ꩻဗိုန်ဗာႏ (၃) ခေတ်မဲ့ဆꩻလယိုခါ ယံကထွာတမာဝါꩻ အီႏတောႏလမ်းအီတာႏ နီဖဲ့ꩻသဘော်ꩻဗိုန်ချက် လွစ်လွစ်တခြင်ခြင်အဝ်ႏဗာႏ (၄) နီဖဲ့ꩻဖဲ့ꩻ အဖဲ့ꩻမုဲင်ꩻတဲ့ယဝ်း ဖေႏကထွာဗာႏမွုန်း လိုꩻသꩻယောင်ႏ (၅) ဖေႏကထွာတမာဝါꩻ ပေါင်ꩻကွိုက်ꩻသွုပ်ဆွိုက်မုꩻအဝ်ႏဗာႏ (၆) အမူႏဖဲ့ꩻနဝ်ꩻ တရာꩻဝင်ႏဝင်ႏ အဝါꩻဖေႏကလဲဉ်းထွူဗာႏ-နုဲင်းနဝ်ꩻဖုံႏသွူ။ တောႏလမ်းတောႏပါႏအရေꩻနဝ်ꩻ လိုꩻပေႏလိုꩻယွဲးတာႏ ထွာအထျꩻထျꩻတမွေးတဝ်း၊ ရေႏမိုးချက်အထျꩻထျꩻနဝ်ꩻ အဝ်ႏလိုႏအွဉ်ႏဒျာႏ ခြွိုင်ႏသန်ꩻရေꩻတွမ်ႏပညာႏရေꩻဖုံႏငါသွူ၊ ထာꩻတောႏလမ်းတောႏပါႏနဝ်ꩻ ထွာဒျာႏလိုꩻတွိုင်ꩻ ကအီႏကျုံႏတလူႏဗာႏဒါႏ ပျဿနာႏတန်ဒျာႏနဝ်ꩻသွူ။ ကထွာမွိုးဖါသီးတဲ့ "ဟဝ်တဝ်းရဲးခါꩻ၊ ဟဝ်ရာꩻနယ်အွဉ်၊ ထွဉ်ႏသွဉ်ပညာႏ၊ တောႏပါႏအပ်လင်ꩻ၊ နီꩻရင်ꩻထေဖေႏ၊ ငတ်ꩻပါꩻသေႏ၊ မွိုးဗွေႏဖါသီး ဝတ္တရာꩻ"ကရိုꩻဒါႏ မွိုးဖါသီးဝတ္တရာꩻအလꩻ အွဉ်ႏတောႏလမ်းဖေႏဗာႏ ပိုခိုပိုမူႏသီးဖုံႏနဝ်ꩻသွူ၊ ပိုခိုပိုမူႏသီးဖုံႏလဲ့ "လွူးမွိုးဖါဗွေႏ၊ မာꩻဖေႏထာꩻမာꩻ၊ ထိန်ꩻခါꩻခွိုꩻရက်၊ မွေႏဆက်ခံႏထူႏ၊ လူႏဖန်းမွိုးဖါ၊ ငတ်ꩻပါꩻခါ၊ ကထွာပိုသီး ဝတ္တရာꩻ"ကရိုꩻဒါႏ ပိုခိုပိုမူႏသီးဝတ္တရာꩻအလꩻ နမ်းခွိုꩻနမ်းနွယ်ႏ ဖေႏနေးကညဆွာꩻအီအတာႏ တောႏလမ်းတောႏပါႏလွဗာႏနဝ်ꩻသွူ။ ကမ္ဘာႏဟံႏယို ဖေႏနေးကညဆွာꩻတဉ်ႏခွေါင်အီတာႏ လိုꩻသီးအစဲဉ်ႏအဆက် အခါႏအဝ်ႏလိုႏထဲ့ထိုꩻတဝ်းသွူ၊ လိုꩻသီးယေဘုယျ အသက်တန်ꩻနဝ်ꩻ ကွပ်အဝ်ႏကွို့ꩻဒျာႏ အနေင်ႏတရျာꩻလွုမ်ꩻတဲင် ဖေႏနေးခွိုꩻဆက် ကထဲ့ထိုꩻဗာႏမွုန်း၊ ကိစ္စကလိုႏမာꩻဒါႏ တောႏလမ်းတောႏပါႏနဝ်ꩻ ထွာဒျာႏကိစ္စလဲ့ꩻဖုဲင်းထိုꩻ တလꩻတဝ်းစားဒျာႏနဝ်ꩻသွူ။ လိုꩻပေႏလိုꩻယွဲး ကအဝ်ႏရုဲင်ꩻတသွိုးကျိုꩻစာꩻလွဒါႏ နမ်းတာႏတဖြာꩻ ပညာႏဖေႏကအဝ်ႏသားဖုံႏနဝ်ꩻ မွူးရဝ်ꩻတရူꩻကို အဝ်ႏလိုႏထိုမ်ႏရောမ်ကဒွိုန်း ဥစ္စာႏတွမ်ႏ ဖေႏခွိုꩻဆက်ကစွစ်ꩻ အီႏထိုမ်ႏဗာႏယင်းက တောႏလမ်းတောႏပါႏဖက်၊ တောႏလမ်းပါႏရေꩻယို မာꩻခွုင်းကထွာ တလꩻတဝ်း၊ အထွာယိုꩻ အကုဲင်မွိုင်၊ ခဉ်ႏတဲက်ဒါႏဒါႏ အဝ်ႏလိုႏငါႏပညာႏနဝ်ꩻသွူ။ နဝ်ꩻထွူတကာႏတဝ်း "တောႏလမ်း တဲႏစေႏတီႏ၊ သမ်ꩻတသီႏ ယိုသိုမ်စား၊ ပေါႏရော့ꩻတဝ်း ဖျင်ဆုဲင်ꩻဗာႏ၊ ယပ်ꩻငါႏခိုးလျား"ကရိုꩻဒါႏငဝ်းအတွိုင်ꩻ စဉ်ꩻစာꩻနွောင်ꩻမꩻ အီႏထဲ့မဲဉ်ႏနွောင်ꩻကိစ္စမျိုꩻတန်သွူ၊ တောႏလမ်းတောႏပါႏထာꩻကရိုꩻနဝ်ꩻ ခွိုꩻမျိုꩻဗီဇအနေႏတဲ့နဝ်ꩻ၊ လိင်ႏအနေႏတဲ့နဝ်ꩻ၊ နမ်းအထီအသွီႏအနေႏတဲ့နဝ်ꩻ၊ အွဉ်ႏသဘော်ꩻခံႏထူႏချက်အနေႏတဲ့နဝ်ꩻ၊ ဓလေ့ꩻစရဲက်တွမ်ႏ ကျွိုက်နိစ်သက်မုꩻဝါႏသနာႏအနေႏတဲ့နဝ်ꩻ လိုꩻနီဖြာꩻ တဗိုန်နွောင်ꩻတဝ်းတထပ်ချင်ႏလဲ့ ထွာဒျာႏကိစ္စ အီႏအုံရောင်လို့ဝင်ꩻနီဖြာꩻတွော့ꩻ စဉ်ꩻစာꩻတဲးတဲးခွုမ်မာꩻမꩻ လွောက်ꩻဖက်ဝင်ꩻ၊ အီႏညဆွာꩻတဉ်ႏခွေါင်နွောင်ꩻနဝ်ꩻသွူ။ ဝွေꩻမဉ်ႏခြေင်းတဲ့ ခွေအဝ်ႏလိုႏယန်ꩻ၊ ဝွေꩻမဉ်ႏဆွော့ꩻလဲ့ ခွေအဝ်ႏလိုႏပနဲဉ်ႏနဝ်ꩻ အရေꩻတန်မွေးစွဉ်ႏထာꩻ၊ ဝွေꩻလဲ့ခြေင်းခွေလဲ့ခြေင်း မဉ်ႏခြေင်းလို့နီဖဲ့ꩻဖဲ့ꩻနဝ်ꩻ ဖွိုင်ꩻကျုံႏကင် လꩻတန်ꩻတဉ်ႏဒွိုန်း အဝ်ႏအကုဲင်ချာလွုမ်ꩻနဝ်ꩻသွူ။ လွိုက်ရွေꩻတောႏလမ်းတောႏပါႏဖက်ကရိုꩻယို တသက်လိုမ်း လိုꩻတဖြာꩻကမာꩻဗာႏအွဉ်ႏထွော့ချက်ဖုံႏအကို ထွာအယပ်ꩻခုဲင်ႏသွတ်ꩻ၊ အန္တရာယ်ႏအအဝ်ႏသွတ်ꩻ၊ အီႏရံႏတယိုꩻတဝ်းငါႏ ထာꩻမာꩻတဗာႏတန်သွူ၊ လွိုက်ရွေꩻတောႏလမ်းတောႏပါႏဖက်ယို လိုꩻအစွိုꩻအဗူႏအဒဝ်ႏဒဝ်ႏဖုံႏအကို ထွာဒျာႏကဲဉ်းအာ လိုꩻအရွယ်ႏတွိုႏသား ကလိုႏခွုမ်မာꩻဒါႏ ထာꩻမာꩻတဗာႏအနေႏ အွဉ်ႏထွော့ဖေႏကီနုဲင်းနဝ်ꩻလဲ့ ခွုင်းကားတဲင် ယေန်ႏငဲးမုꩻကကွာႏခေါ်အတွိုင်ꩻ ကလွိုက်ရွေꩻဗာႏ တောႏလမ်းတောႏပါႏဖက်အခရာႏ၊ ကလွိုက်ရွေꩻဒါႏအခိန်ႏ၊ ကော့ꩻမောင်ꩻချက်၊ လွိုက်ရွေꩻနယ်ꩻဖုံႏလဲ့ ကွာႏခေါ်လွဒျာႏနဝ်ꩻသွူ။ မန်းသီးထုံꩻဓလေ့ꩻပွိုင်းလဲင်ႏအလꩻ "လိုꩻမူႏအဝ်ႏတွေကို-လိုꩻခိုထွာလဲဉ်းစင်ꩻ"ကရိုꩻဒါႏငတ်းအလꩻ လိုꩻခိုအရွယ်ႏတောႏလမ်းတောႏပါႏနဝ်ꩻ (၂၀-၂၅)နေင်ႏ၊ လိုꩻမူႏသီးနဝ်ꩻတဲး ပေါႏမူႏနံꩻတရဝ်းစလဲ့ တောႏလမ်းတောႏပါႏလꩻလဲဉ်းဒျာႏ-လက်ခံႏခါꩻလွနုဲင်းနဝ်ꩻသွူ။ အီႏတောႏလမ်းတောႏပါႏထာꩻတာႏ အနယ်ꩻအဝ်ႏသိုမ်နယ်ꩻ၊ လိုꩻတန်မွိုးဖါသီး လွိုက်ရွေꩻအွဉ်ႏတောႏလမ်းဖေႏ၊ အောင်ႏသွယ်ႏသား လွိုက်ရွေꩻအွဉ်ႏတောႏလမ်းဖေႏ၊ နမ်းတွမ်ႏနမ်း ထိုမ်ႏထွူတွော့ꩻ တောႏလမ်းချာဒျာႏ-နုဲင်းနဝ်ꩻဖုံႏသွူ၊ ကလွိုက်ရွေꩻဖေႏဗာႏ တောႏလမ်းတောႏပါႏဖက်နဝ်ꩻ ထွာဒျာႏ မွိုးဖါသီးဝတ္တရာꩻတပါꩻတန်သွူ။ "မဉ်ထီႏဒျာႏ သေအဝ်ႏရံႏ-ထိုမ်းဒင်ႏဆင်"ငဝ်းပွုမ်ႏအလꩻ ကလွောက်ꩻနာႏလွဒါႏ မွိုးဖါသီးလွိုက်ရွေꩻဖေႏနဝ်ꩻ အာကယ်ꩻလဲဉ်းက နမ်းတွမ်ႏနမ်းကလွိုက်ရွေꩻလွသွူ၊ တောႏလမ်းတောႏပါႏသင်ꩻအရွယ်ႏ-ကရိုꩻဒါႏ ငဝ်းရီအဖြေႏနဝ်ꩻ ကအီႏဖန်ဆင်ꩻအီ သာႏယာႏပျောႏသွင်ႏခရာႏကယံဒါႏ အိန်ႏထောင်ႏရေꩻတဗာႏယို စစရာႏရာႏ ကအဝ်ႏခါꩻတထွူအရွယ်ႏနဝ်ꩻ ထွာအရွယ်ႏ တောႏလမ်းတောႏပါႏသင်ꩻနုဲင်းနဝ်ꩻသွူ။ ခါးလားပညာႏကစွုမ်ႏ၊ ခါးလားနမ်းခန္ဓာႏကပြွူႏဖြို၊ ခါးလားကလꩻထာꩻမာꩻ မဉ်ႏတောႏလမ်းတောႏပါႏစဝ်းထာꩻနဝ်ꩻ တထွာနွောင်ꩻတဝ်း အိန်ႏထောင်ႏအသာႏယာႏစား၊ လိုꩻပေႏသꩻထိုꩻမားထွူတဲင် သꩻဓာတ်နပ်ဖြား သွီႏယာႏကရေꩻဒါႏ ၁၈-၁၉အရွယ်ႏနဝ်ꩻ မဉ်ႏမဉ်တောႏလမ်းတောႏပါႏနဝ်ꩻ လꩻလဲဉ်းဒျာႏနဝ်ꩻသွူ။ လိုꩻခိုတဖြာꩻအတာႏ လꩻဘွဲ့တဗာႏခိန်ႏ သက် ၂၅-၃၀နေင်ႏအရွယ်ႏ မဉ်ႏတောႏလမ်းတောႏပါႏထာꩻ ထွာအရွယ်ႏမဲဉ်ႏနဝ်ꩻသွူ၊ လိုꩻပေႏဖုံႏ ခေတ်ယိုခါနဝ်ꩻ အဝ်ႏပေႏခါ ထိုမ်ႏရောမ်စုခါꩻဒျာႏ ပညာႏတွမ်ႏဥစ္စာႏတဲင် နမ်းအာႏ၊ ဉာဏ်ႏအာႏမဉ်ႏဗွေစွုမ်ႏမꩻ တဲႏထောင်ႏဒျာႏ ကအီႏညဆွာꩻတဉ်ႏခွေါင်ဒါႏ အိန်ႏထောင်ႏထွူတဲင် နမ်းခွိုꩻဆက် ဖေႏကညဆွာꩻအီတာႏ အဝ်ႏလိုႏလွူးထန်ႏငါႏ နဲင်ႏငံႏသားယံဖုံႏအကျောင်ꩻ မဉ်တမာငါႏနုဲင်းနဝ်ꩻသွူ။ ကလွိုက်ဒါႏ တောႏလမ်းတောႏပါႏဖက်အကို တဖူꩻကယီးနယ်ဖေႏဒါႏ အဝ်ႏလိုႏလွိုက်ရွေꩻဒျာႏ အင်္ဂါႏနုဲင်းမုဲင်ꩻ၊ သဘော်ꩻနုဲင်းမုဲင်ꩻ၊ နမ်းအထီအသွီႏ အပုံႏပွိုင်သတ္တိꩻဖုံႏနုဲင်းနဝ်ꩻတဲး တယိုꩻနွောင်ꩻတဝ်း၊ လိုꩻတဖြာꩻထာꩻကျွိုက်ယို အဝ်ႏလွဒျာႏ ဖြာꩻမျိုꩻမျိုꩻတဲင် ပါꩻတဖြာꩻ ကအဝ်ႏထင်းဒါႏ "လိုꩻနဝ်ꩻယံ"လဲ့ ပါꩻတဖြာꩻခေါ်အတာႏနဝ်ꩻ "တကုဲင်တန်-တယံတဝ်း"ထင်းဒါႏလွနုဲင်းနဝ်ꩻသွူ။ "ပါꩻမုဲင်ꩻအရက်သွတ်ꩻခန်းတဲ့ အတကုဲင်တအဲဉ်ထဝ်း"ကရိုꩻဒါႏ ငဝ်းပွုမ်ႏအလꩻ ထာꩻရက်မေတ္တာႏတွမ်ႏ ထာꩻတရေꩻဖုံႏနဝ်ꩻ ကဲဉ်းအာအာ ကလွိုက်ရွေꩻဒါႏ တောႏလမ်းတောႏပါႏဖက်အကို ဒါႏပညာႏ၊ ခြွိုင်ႏသန်ꩻ၊ ကုံꩻနွောင်ꩻအိန်ႏထောင်ႏ၊ ရိုꩻသာꩻ-ကစဒါႏ အင်္ဂါႏလစ်ꩻပါꩻနဝ်ꩻတဲ့ ထွာအထျꩻထျꩻအကျောင်ꩻ၊ ကလွိုက်ရွေꩻဒါႏ တောႏလမ်းတောႏပါႏဖက်သီး နမ်းရင်ꩻအထီအသွီႏကိုနဝ်ꩻ ကျောင်ꩻသားဖုံႏနဝ်ꩻ အထျꩻအွဉ်ႏလွိုက်ရွေꩻလွဒျာႏ သစ္စာႏအဝ်ႏအဝ်ႏ၊ နမ်းကျင်ꩻစာရိတ္တဟဝ်၊ ကျမ္မာႏရေꩻဟဝ်၊ ထိန်ꩻသိမ်ꩻဒါႏအိန်ႏထောင်ႏ-စတဲင် အထီအသွီႏနုဲင်းနဝ်ꩻဖုံႏ၊ ခွိုꩻမျိုꩻဂုဏ်ႏထိုတွမ်ႏ ကျင်ႏလဲပ်လိင်ကိစ္စဖုံႏနဝ်ꩻ တအွဉ်ႏရေꩻလွတဝ်းအကျောင်ꩻ။ ကျောင်ꩻသားမူႏဖုံႏ ကလွိုက်ရွေꩻဒါႏ တောႏလမ်းတောႏပါႏဖက်အကိုနဝ်ꩻ အွဉ်ႏရေꩻကော့ꩻမောင်ꩻလွဒါႏ သစ္စာႏအဝ်ႏအဝ်ႏ၊ အကျင်ꩻစာရိတ္တဟဝ်၊ ပညာႏအထီအသွီႏထိုနုဲင်းနဝ်ꩻတဲင် ကျင်ႏလဲပ်ပဲင်ႏဒါႏလိင်ကိစ္စတွမ်ႏ ခြွိုင်းကွဉ်ကꩻတဲပ်နဲပ်မုꩻယို အွဉ်ႏဒျာႏအဖွိုႏသွတ်ꩻအကျောင်ꩻ ထီႏဗာႏနုဲင်းနဝ်ꩻသွူ၊ပွိုင်းဝွို့တွမ်ႏ တောႏလမ်းတောႏပါႏဖက်တဲင် ထွိုင်ႏလွူꩻတဲက်ခြိꩻ ကစွꩻခွင်ꩻနွောင်ꩻဒါႏအင်္ဂါႏဖုံႏတွမ်ႏ တစွꩻခွင်ꩻနွောင်ꩻတဝ်း အင်္ဂါႏဖုံႏခိန်ႏနဝ်ꩻ အမူႏတဲ့ယဝ်းအခိုတဲ့ပါ ကစွꩻခွင်ꩻနွောင်ꩻဒါႏ အင်္ဂါႏဖုံႏနဝ်ꩻ- (က) ဆင်ꩻရယ်ꩻခြေား (ခ) သက်တန်လွဉ်ꩻကယ်ꩻအနမ်း (ဂ) ပေႏလွဉ်ꩻထာꩻ (ဃ) အွဉ်ႏဖိုဝင်ꩻမူႏ/ဝင်ꩻခို-နုဲင်းနဝ်ꩻဖုံႏသွူ။ အမူႏတဲ့ယဝ်း အခိုတဲ့ပါ တစွꩻခွင်ꩻနွောင်ꩻတဝ်း အင်္ဂါႏဖုံႏနဝ်ꩻ-(၁) လိင်အင်္ဂါႏချို့ꩻယွင်ꩻ (၂) ရောႏဂါႏရဒါႏဝင်ꩻအဝ်ႏ-ထီႏဗာႏနုဲင်းနဝ်ꩻသွူ။ ကွဲႏတွော့ꩻ လိုꩻမျိုꩻဘာႏသာႏဗိုန်ပီတဝ်း၊ တဒါႏတဝ်းပညာႏလာꩻလာꩻနဝ်ꩻ လိုꩻခိုသီးစွꩻခွင်ꩻနွောင်ꩻဒျာႏလဲ့ လိုꩻမူႏသီးနဝ်ꩻ တစွꩻခွင်ꩻနွောင်ꩻတဝ်းလာꩻလာꩻ-ထီႏဗာႏနုဲင်းနဝ်ꩻသွူ။ တောႏလမ်းတောႏပါႏဖက်ယံတဖြာꩻအလောင်း အဝ်ႏလိုႏအဝ်ႏသင်ꩻမွော့ တကော့ꩻမောင်ꩻခါꩻဒါႏ အင်္ဂါႏဖုံႏနဝ်ꩻ-(က) ရက်စိုမ်ꩻယေန်ႏငဲးမုꩻ (ခ) ရိုꩻသာꩻ (ဂ) ထာꩻသေနာႏအဝ်ႏ (ဃ) သစ္စာႏအဝ်ႏ (င) အွဉ်ႏရေꩻထွူႏတွုမ် အိန်ႏထောင်ႏလောင်း (စ) နမ်းခန္ဓာႏပွိုင်ရော့ꩻ-နုဲင်းနဝ်ꩻဖုံႏသွူ။ ကျောင်ꩻသားမူႏသီး ကကော့ꩻမောင်ꩻခါꩻဒါႏ တောႏလမ်းတောႏပါႏဖက်ယံ တဖြာꩻအလောင်း ကအဝ်ႏသင်ꩻဒါႏ အထီအသွီႏဖုံႏနဝ်ꩻ- (၁) ရိုꩻသာꩻ (၂) ထာꩻသေနာႏအဝ်ႏ (၃) သစ္စာႏအဝ်ႏ (၄) အွဉ်ႏရေꩻထွူႏတွုမ် အိန်ႏထောင်ႏအလောင်း (၅) ထွာလိုꩻအမွိုးအဖါသဘော်ꩻလꩻဒျာႏ (၆) သညင်ꩻဟွုန်ရက်ဒါႏ (၇) ထာꩻထီႏတန်ထာꩻထီႏဆွာꩻ (၈) ရက်စိုမ်ꩻဒါႏနီ-နုဲင်းနဝ်ꩻဖုံႏအကျောင်ꩻ သုတေသနလိတ်ရဲဉ်ႏကို အွဉ်ႏနယ်ခါꩻနုဲင်းနဝ်ꩻသွူ။ ကအဝ်ႏထောင်လွဒါႏ ဘဝတသက်တာႏ တဖူꩻတလီးအလောင်း အရေꩻတန်မွေးငါႏ အဝ်ႏလိုႏလွိုက်မဲဉ်ႏမဲဉ်ႏငါႏ ဘဝသွꩻဟဝ် ကအီႏဆွန်ꩻစွီႏဒါႏနီစူသားယိုသွူ၊ ဖေႏနေးကလွိုက်မဲဉ်ႏတနꩻဒျာႏ လိုꩻထောက်ချာငါဒါႏ ထာꩻစာႏနာႏအဝ်ႏ၊ လိုꩻစရဲက်ကဗိုန်နီ၊ ဟဝ်ဟဝ်ကုဲင်ကုဲင် လိုꩻကတွိုင်ႏပင်ႏလꩻနွောင်ꩻစားနဝ်ꩻ အရေꩻတန်မွေးငါႏသွူ။ အထူꩻအနေႏ လိုꩻမူႏသီးအတာႏ ကုဲင်းထွာဒါႏ နုဲင်းဝင်ꩻကရိုꩻ"နေးဝါꩻမဉ်ႏမာႏ-ဝန်ဒါႏတသက်လိုမ်း"တန်သွူ၊ လိုꩻတောႏလမ်းတောႏပါႏထွူသားဖုံႏနဝ်ꩻ ခိန်ႏခါႏညဆွာꩻ အီႏအုံငီꩻဗာႏလို့ဝင်ꩻတဲင် "ဖြေꩻတွမ်ႏတငါ-မာꩻတွမ်ႏဝါꩻ"ကရိုꩻဒါႏငဝ်းနဝ်ꩻအတွိုင်ꩻ တလဲင်ႏတဝ်းတဲ့တလဲင်ႏ ကုဲင်းခွဲးကျုံႏလွဉ်ဗာႏဒါႏ တခံႏနွောင်ꩻတဝ်းကိစ္စမျိုꩻဖုံႏသွူ။ ကွပ်ပွိုးတဖြာꩻဖြာꩻ ချို့ꩻယွင်ꩻထိုꩻတဲင် ရွို့ꩻရန်ႏသꩻထန်ႏလို့ဝင်ꩻတဲင် အနာလွိုနဝ်ꩻ ခွေါင်းလို့လို့ယင်း ဝင်ꩻနီနီသꩻသွူ၊ နဝ်ꩻမꩻ နုဲင်းဝင်ꩻကရိုꩻဒါႏ "ထျꩻမဉ်ႏယံခါ-အနာႏသေႏချာႏ"ငဝ်းနဝ်ꩻအတွိုင်ꩻ ကတဲႏဆို့ꩻလွေꩻဒါႏ အိန်ႏထောင်ႏရေꩻတဗာႏအကို အခင်ႏမွဉ်အွတ်ꩻရွီးဖေႏကဆွော့ꩻနဝ်ꩻ အရေꩻတန်မွေးစွဉ်ႏနဝ်ꩻသွူ။ အခင်ႏအွတ်ꩻရွီးကရိုꩻနဝ်ꩻ- ထာꩻရက်မေတ္တာႏတရာꩻဗွေ၊ ထောက်ချာငါဒါႏ-ထာꩻစာႏနာႏအဝ်ႏ၊ အွဉ်ႏသဘော်ꩻမဲဉ်ႏတနꩻလို့ဝင်ꩻ၊ တဖြာꩻတွမ်ႏတဖြာꩻ ဖေႏနွောင်ꩻဗွေဗွေဖေႏလို့ဝင်ꩻ လိင်ကိစ္စ၊ သꩻဓာတ်နပ်ဖြားဟဝ်-နုဲင်းနဝ်ꩻဖုံႏသွူ၊ ပေါႏအခင်ႏမွဉ်အွတ်ꩻရွီးနဝ်ꩻဖုံႏ ခွေါင်ခံႏတဲးတဲ့ ကတဲႏဆို့ꩻခါꩻဒါႏ အိန်ႏထောင်ႏ(တဗာႏ)ယို သာႏယာႏစွို့ꩻစွဉ်ႏလွေꩻဗာႏနဝ်ꩻသွူ။ နဝ်ꩻမꩻ လိုꩻပေႏလိုꩻယွဲးဖုံႏနဝ်ꩻ ရဲဉ်ꩻဖျင်သေꩻခါꩻလွ ကလိုႏအပ်ဒါႏ အထီအသွီႏဗွေဗွေထွူတဲင် ကအဝ်ႏကုဲင်ဒါႏ ထာꩻမာꩻကလွိုက်ရွေꩻ တောႏလမ်းတောႏပါႏဖက်ထာꩻမာꩻယို မဉ်ႏပိုန်းထိုꩻ လိုꩻပေႏဘဝ၊ မဉ်ႏတွိုႏလဲဉ်း ပညာႏဥစ္စာႏ တွမ်ႏထာꩻမာꩻကအဝ်ႏထွူလဲဉ်း လိုꩻတလောင်ꩻဘဝခိန်ႏမꩻ ကွဲးချꩻမာꩻငါႏ အရဲဉ်ꩻအပွိုင်အကျောင်ꩻ-ဖေႏကျံႏဉာဏ်ႏဗာႏနုဲင်းယိုသွူ။[၁][၂]