လိုꩻယွဲးမဉ်ႏကျင်ꩻယာ

"လိုꩻယွဲးမဉ်ႏကျင်ꩻယာ ပအိုဝ်ႏအနာႏဂတ်အီႏဆာတဲင် ထွားတဝ်းမဲ့ငါဗွာမဲ့ငါဖြေင်း အဝ်ႏလိုႏထူႏရေꩻတသွုန်ခြေင်း" ပအိုဝ်ႏတစွိုးခွိုꩻလွုမ်း တွိုက်ꩻဖြန်လွေꩻ ဖေင်ꩻဖင်ꩻယာအနေႏ ဗဟိုႏသံႏဃာႏစွိုꩻအပါ ပအိုဝ်ႏစွိုးခွိုꩻအစွိုꩻ၊ ပအိုဝ်ႏစွိုးခွိုꩻအစွိုꩻ(အသွင်ပြောင်းပြည်သူ့စစ်)စဲ့ꩻအွဉ်ဟိုတဲင် ထွို့ꩻဗူႏလွေꩻ ပအိုဝ်ႏတစွိုးခွိုꩻလွုမ်းတွိုက်ꩻဖြန်လွေꩻယာ ကောႏမတီႏတွော့ꩻ ယိုခါကျာꩻ ပအိုဝ်ႏလိုꩻမျိုꩻဒေႏကို အဝ်ႏလယ်ႏဒေါ့ꩻခြုဲင်း ဖေႏပညာႏနဝ်ꩻသွူ။ ကတွိုက်ꩻဖြန်လွေꩻယာယို လွေꩻနေးတောမ်ႏ ဖြားဗွာခမ်း၊ စန္တာႏခမ်း၊ သူရိယခမ်းတောမ်ႏ မျင်ꩻမိုရ်ႏခမ်း ခမ်းနယ်ႏယိုလစ်ꩻဖြုံႏ၊ တွိုင်ႏယိုလစ်ꩻတုံးအကို တခီႏချင်ꩻ တခြွိုက်တွင်ꩻ နယ်ႏတုံးအလွောက်ꩻ အွဉ်ငါထူႏတာႏဝွန်ႏတဲင် လယ်ႏဒေါ့ꩻခြုဲင်းနယ်လွေꩻသွိုလဲဉ်းဝင်ꩻနဝ်ꩻလဲ့ တွိုက်ꩻဖြန်လွေꩻ ဖေင်ꩻဖင်ꩻယာကောႏမတီႏ အွဉ်အကိုရေꩻ ဖြားခွန်ကိုးဒေါ့ꩻနဝ်ꩻသွူ။ ပအိုဝ်ႏတစွိုးခွိုꩻလွုမ်း တွိုက်ꩻဖြန်ဖေင်ꩻဖင်ꩻယာ ထာꩻမာꩻစဲဉ်ႏကိုယို အွဉ်ႏလွေꩻနေး ဒုံအရန်း ဖေႏဖေင်ꩻဖင်ꩻထာꩻသေ၊ အွိုင်ႏအရန်း ဖေႏဖေင်ꩻဖင်ꩻထာꩻသေအစွိုꩻ အရန်းရန်းတွော့ꩻ အီႏဖေႏသေလွေꩻရီး ဖေင်ꩻဖင်ꩻထာꩻသေပညာႏမဉ်ႏထွူ အုံပွေါးထွား လာတကွို့ꩻရပ် ဖြေꩻစာသား၊ သုံꩻအံႏသား မဉ်ႏတနာႏတဝ်း၊ အဝ်ႏသုံꩻအဝ်ႏဖြေꩻစာဒျာႏလီꩻလီꩻကရိုꩻလဲ့ ဟဲ့ꩻမော့ꩻခွဲးဖေႏသတိလွေꩻနေးယင်း၊ အဆုဲင်ꩻသွတ်ꩻအုံပွေါးထွားယင်း မဉ်ႏတနာႏတဝ်း အဝ်ႏဖြေꩻစာအဝ်ႏသုံꩻအုံႏဒျာႏတွိုင်ꩻတွိုင်ꩻလဲ့ လိုꩻကဖြေꩻစာ၊ လိုꩻကသုံꩻအံႏဒျာႏ ဖေင်ꩻဖင်ꩻယာသားစာႏရင်ꩻယို ဖေႏထေ့တွိုက်ꩻဖြန်ဖေင်ꩻဖင်ꩻယာယဲꩻစွိုꩻထျꩻ ဥပဒေႏအလꩻ အီႏအွဉ်ႏယဲꩻသီး ခုမ်စံႏလွေꩻနဝ်ꩻလဲ့ သေရိုမ်းဗာႏသွူ။ နဝ်ꩻမꩻ မဉ်ႏထွားနုဲင်းဒျာႏ ပအိုဝ်ႏလိုꩻခြာကိုယိုနဝ်ꩻ ပတ်သဲစ်တောမ်ႏ ဖေင်ꩻဖင်ꩻယာယို အဆို့ꩻတဲ့နဝ်ꩻ၊ အအံႏတဲ့နဝ်ꩻ၊ အဖြေꩻအစာတဲ့နဝ်ꩻ ကောပ်အာငါႏတဲင် ပအိုဝ်ႏလိုꩻမျိုꩻလိုꩻယွဲး လိုꩻပေႏပိုလီꩻဆꩻချာဖုံႏယို အကျင်ꩻကုဲင်အာထိုꩻဗာႏ၊ ဖဝတဖူꩻတရွို့ꩻထိုꩻဗာႏ၊ မဉ်ႏဒေါ့ꩻဗာႏတနယ်ꩻ ပအိုဝ်ႏလိုꩻယွဲးယိုခါ မဉ်ႏကျင်ꩻကုဲင်အာလဲဥဉ်သွူ တောမ်ႏဖေင်ꩻဖင်ꩻယာနဝ်ꩻ ဆုဲင်ꩻတနီꩻတခိန်ႏကို ပအိုဝ်ႏလိုꩻမျိုꩻပညာႏရေꩻ၊ ပအိုဝ်ႏလိုꩻမျိုꩻစီꩻပွါꩻရေꩻ၊ ပအိုဝ်ႏလိုꩻမျိုꩻနဲင်ႏငံႏရေꩻဖုံႏယို မဲ့ခေ့ꩻနားအွိုင်ထိုꩻချာတဲင် အခန်ꩻကဏ္ဍစစရာႏရာႏယို ထဲ့ဒွေါက်အဝ်ႏကုဲင်ဆုဲင်ꩻဗာႏသွူ။ နဝ်ꩻမꩻ ဖေင်ꩻဖင်ꩻယာ ကပြန်ꩻပြော်ꩻဗာႏဒါႏထာꩻ ပအိုဝ်ႏလိုꩻမျိုꩻဒေႏသတုံးကိုယို ကောပ်ပွိုးတမုဲင်ꩻကရိုꩻနဝ်ꩻ အဝ်ႏလိုႏထောင်ထွားတဲပ်တဲပ်ငါႏ အထျꩻအထောင်ꩻ အမောင်ꩻအဆွုမ်ႏနဝ်ꩻသွူ။ နုဲင်းယိုခါ ထွို့ꩻဗူႏလွေꩻနေးစွဉ်ႏ ပအိုဝ်ႏတစွိုးခွိုꩻလွုမ်း တွိုက်ꩻဖြန်လွေꩻဖေင်ꩻဖင်ꩻယာ ကောႏမတီႏတွော့ꩻ ခုမ်စံႏမာꩻလွေꩻဖေႏ ထာꩻသေပညာႏယို ဟဝ်ထဲင်း မာꩻတဝ်းထာꩻမုဲင်ꩻမုဲင်ꩻလဲ့ အီႏမာꩻဖြန်လွေꩻ သုံꩻအံႏအရန်းလွုမ်ꩻနဲ့၊ အီႏမာꩻဖြန်လွေꩻ ဖြေꩻစာအရန်းနဲ့၊ အီႏမာꩻဖြန်လွေꩻ ဆို့ꩻရုဲင်ရေꩻအရန်းနဲ့။ သုံꩻအံႏ၊ ဖြေꩻစာ၊ ဆို့ꩻရုဲင်ယိုသိုမ်စွိုး ပအိုဝ်ႏဒေႏသကို မဉ်ႏအဝ်ႏနေကနဝ်ꩻလဲ့ ယိုသိုမ်စွိုးကဖေႏဒါႏ ထာꩻဒုက္ခယို အီႏခံႏဗာႏနေကနဝ်ꩻသွူ၊ ဆို့ꩻရုဲင်ယာယို ပအိုဝ်ႏလိုꩻမျိုꩻကို အုံနောင်ခုမ်မာꩻနေးစွဉ်ႏ စီꩻပွါꩻရေꩻတဗာႏအနေႏတဲင် အဝ်ႏယာအခြောင်ꩻ အီႏပြောင်ꩻလုဲင်ႏလင် စီꩻပွါꩻရေꩻအကွက်ယို အွဉ်ငါသားလဲ့ မဉ်ႏထွားချꩻဖေႏအပွိုင်ဟဝ်ဟဝ်၊ ဆေꩻကွက်ဟဝ်ဟဝ်ဒျာႏမꩻ အီႏပြောင်ꩻလုဲင်ႏလꩻနွောင်ꩻနဝ်ꩻသွူ။ ထွိုင်ႏတွိုႏအဝ်ႏကုဲင်ဒါႏ သုံꩻအံႏတောမ်ႏဖြေꩻစာယို အထျꩻအဝ်ႏဒျာႏ ကေားဖြေꩻစာသားရိုꩻဗာႏနုဲင်းနဝ်ꩻသွူ၊ ဖေင်ꩻဖင်ꩻယို ဒုံကိုခြင်ꩻခါႏ၊ ဒုံထျꩻဒုံသောင် ယိုꩻယိုꩻမာꩻမာꩻ မဉ်ႏတလꩻနွောင်ꩻတဝ်းနဝ်ꩻ ကသုံꩻအံႏသားယို ယိုꩻယိုꩻမာꩻမာꩻ အီႏသုံꩻအံႏနွောင်ꩻဗာႏ တမွေးတဝ်းနဝ်ꩻသွူ။ နဝ်ꩻမꩻ ဖေင်ꩻဖင်ꩻ ကတွိုႏသဲင်ꩻဗာႏ ပအိုဝ်ႏဒုံ၊ ယာမွန်ꩻမန်ꩻ ကသဲင်ꩻဖုံဗာႏ ပအိုဝ်ႏရပ်နဝ်ꩻ ကောပ်လိုꩻနုဲင်းမုဲင်ꩻဖုံႏဒျာႏဟောင်း၊ လိုꩻယွဲးမဉ်ႏကျင်ꩻယာ ပအိုဝ်ႏအနာႏဂတ်အီႏဆာကရိုꩻယို မဉ်ႏအဝ်ႏသေနာႏဒျာႏလဲ့ မာꩻပဲင်ႏခွင်ꩻအဝ်ႏတွော့ꩻ ဖြေꩻစာလꩻခန်းတယဝ်း၊ ကောပ်အကျောင်ꩻမုဲင်ꩻမုဲင်ꩻတွော့ꩻ ဖြေꩻစာလꩻခန်းတယဝ်း အဝ်ႏလိုႏအွဉ်ႏထွူစဝ်းစဝ်းခန်းသွူ။ ယိုခါ မာꩻလွေꩻတစွိုးခွိုꩻလွုမ်း တွိုက်ꩻဖြန်ဖေင်ꩻဖင်ꩻယာ ထာꩻမာꩻစဲဉ်ႏကိုယို မဉ်ႏရေႏရွယ်ႏမွေး ပအိုဝ်ႏဒေႏသကို ဖေင်ꩻဖင်ꩻယာ ဖြန်ဗာႏရွောင်ဗာႏနဝ်ꩻ ဖေင်ꩻဖင်ꩻယာကတွိုႏသဲင်ꩻအီဒါႏ ပအိုဝ်ႏရပ်ရာႏကို အရွီးအခိုႏမန်ႏသမျ ခမ်းသားတဲ့နဝ်ꩻ၊ မာꩻပဲင်ႏခွင်ꩻအဝ်ႏသားတဲ့နဝ်ꩻ၊ လိုꩻပေႏတဲ့နဝ်ꩻ၊ လိုꩻတန်တဲ့နဝ်ꩻ ခွဲꩻတဝ်းမဲ့ငါပေႏ၊ ခွဲꩻတဝ်းမဲ့ငါတန်၊ ခွဲꩻတဝ်းမဲ့ငါဗွာ၊ ခွဲꩻတဝ်းမဲ့ငါဖြေင်း မဉ်ႏထူႏရေꩻတသွုန်သွုန်၊ မဉ်ႏထူႏရေꩻခြေင်းခြေင်းမွးနဝ်ꩻ ဖြန်ဗာႏရွောင်ဗာႏသွူ။ ကောပ်ဆို့ꩻရုဲင်တဲင် အခွဉ်ႏတဲ့ ဖေႏဗာႏ၊ ထွိုင်ႏလꩻခိန်ႏလဲ့ သမ်းထွာဥပဒေႏတကင်ꩻတဝ်းတဲင် ဝင်ꩻဆောမ်ꩻတဲ့ခံႏဗာႏ၊ ထွာခြေင်ဗာႏဒျာႏဝင်ꩻအဆာႏ၊ အဝ်ႏလိုႏထူႏငါႏလဲဉ်း သံႏဝွေႏဂသွဉ်ခန်ꩻအကျောင်ꩻ ခမ်းသားငေါဝ်း အယ်ဒီတာစွိုꩻအနေႏ တဲက်တွန်ꩻတမာလွေꩻဗာႏနဝ်ꩻသွူ။