လိုꩻယွဲးသီးမိဉ်းသွဉ်ထူႏ
"လိုꩻယွဲးသီး မိဉ်းသွဉ်ထူႏလꩻထွူသွူ ပညာႏရေꩻဘွဲ့နဝ်ꩻ အီႏမာꩻဗာႏထာꩻမာꩻမုဲင်ꩻ" ဟန်ႏသနီꩻ မြန်မာခမ်းထီကို ကအဝ်ႏဒါႏလိုꩻယွဲးသီးဖုံႏယို ထာꩻမာꩻအဲဉ်ထဝ်း၊ ထာꩻမာꩻလွစ်စူနဝ်ꩻ အဝ်ႏအာငါႏနဝ်ꩻသွူ၊ သွဉ်ထူႏပညာႏအောင်ႏထွူလဲဉ်းသား၊ လꩻထွူလဲဉ်းဘွဲ့သား လိုꩻယွဲးသီးဖုံႏဒျာႏလဲ့ တလꩻတဝ်းထာꩻမာꩻ တမုဲင်ꩻမုဲင်ꩻ၊ အဝ်ႏခြေင်အဝ်ႏပျင်ႏထာꩻ အဝ်ႏအာငါႏနဝ်ꩻသွူ၊ ယိုနဝ်ꩻ ဖန်ဆင်ꩻလိုမ်းလိုမ်းကိုမ်ႏကိုမ်ႏဖေႏနွောင်ꩻတဝ်း ထာꩻမာꩻပျဿနာႏနဝ်ꩻသွူ။ ဟန်ႏသနီꩻ မြန်မာခမ်းထီကို ကထွာဒါႏလိုꩻယွဲး၊ လိုꩻရွယ်ႏမဲဉ်ႏ မာꩻနွောင်ꩻထာꩻမာꩻအရွယ်ႏ၊ အာႏကဗွေ ရဲင်ꩻကဗွေအရွယ်ႏဖုံႏယို မူႏမူႏခိုခို လွေꩻမာꩻရောင်လွဒျာႏ ထာꩻမာꩻကထွာဒါႏ ခမ်းထန်ႏ ထုဲင်ꩻခမ်း၊ စင်ကာပူခမ်း၊ ကိုးရီးယား၊ မလေးသျားခမ်း-စတဲင်ဖုံႏနဝ်ꩻသွူ၊ ကလွေꩻမာꩻဗာႏနုဲင်းယိုနဝ်ꩻလဲ့ ကောပ်စွဉ်ႏဒျာႏ အကျောင်ꩻအစွိုးစွိုး အုံအဝ်ႏရပ်ဒေႏသကို လိုပ်ꩻမာꩻခရာႏ သွို့ꩻခြံဟံႏယာႏအဲဉ်ထဝ်းတဲင် လွေꩻထိုမ်ႏမာꩻဗာႏသားတဲ့အဝ်ႏ၊ ထာꩻမာꩻအဲဉ်ထဝ်းတဲင် လွေꩻထိုမ်ႏမာꩻဗာႏသားတဲ့အဝ်ႏ၊ ထာꩻမာꩻအဝ်ႏဒျာႏတွော့ꩻ ကောပ်ရွဉ်နွို့လꩻယို တန်ႏဖိုꩻကွာႏတဲင် လွေꩻထိုမ်ႏမာꩻသားတဲ့ အဝ်ႏနဝ်ꩻသွူ။ ကလွေꩻမာꩻဗာႏထာꩻမာꩻ ခမ်းထန်ႏယို အီႏအဝ်ႏလိုꩻနီစွိုးနဝ်ꩻသွူ၊ တစွိုးနဝ်ꩻ ပညာႏဒါႏသား၊ လꩻလဲဉ်းဘွဲ့သားဖုံႏတောမ်ႏ တစွိုးနဝ်ꩻ သွဉ်ဗာႏတဝ်းပညာႏသားဖုံႏနဝ်ꩻသွူ၊ သွဉ်ဗာႏတဝ်းပညာႏသားဖုံႏနဝ်ꩻ ကောပ်မြန်မာခမ်းကို ထာꩻမာꩻအဲဉ်ထဝ်း၊ ထာꩻမာꩻဆေ့ꩻခြောတဲင် လွေꩻထိုမ်ႏမာꩻဗာႏ ထာꩻမာꩻခမ်းထန်ႏနဝ်ꩻသွူ၊ ဒါႏပညာႏသားဖုံႏနဝ်ꩻ မြန်မာခမ်းကို ထာꩻမာꩻတဲ့ဆေ့ꩻတောမ်ႏအာ အီႏအဝ်ႏဒျာႏလဲ့ ကွဲးတွော့ꩻ မိဉ်းလွေꩻထိုမ်ႏမာꩻထာꩻမာꩻ ခမ်းထန်ႏနဝ်ꩻ ရွဉ်တန်ႏဖိုꩻကွာႏ၊ ရွဉ်နွို့ရွဉ်လꩻယို အီႏလꩻလွိုတဲင် လွေꩻထိုမ်ႏမာꩻဗာႏဝင်ꩻခမ်းလင်နဝ်ꩻသွူ။ လွေꩻမာꩻထာꩻမာꩻခမ်းထန်ႏ ထုဲင်ꩻခမ်း၊ မလေးသျားခမ်း၊ စင်ကာပူခမ်း၊ ကိုးရီးယားခမ်းကိုဖုံႏယို ပအိုဝ်ႏလိုꩻမျိုꩻသီးတဲ့ အဝ်ႏလွေꩻမာꩻနဝ်ꩻ ဆေ့ꩻပလွိုႏလွိုႏတဝ်းထာꩻနဝ်ꩻ ပအိုဝ်ႏသီးအဝ်ႏသေဒျာႏဝင်ꩻသွူ၊ ပအိုဝ်ႏသီးကလွေꩻခမ်းထန်ႏနဝ်ꩻ ရင်းစွုမ်ႏဝေင်ꩻဝေင်ꩻ၊ ရင်းစွုမ်ႏဒုံဒုံ၊ ရင်းစွုမ်ႏရပ်ရပ်နေးစွဉ်ႏသွူ၊ လိုꩻပေႏလိုꩻယွဲး လိုꩻရွယ်ႏမဲဉ်ႏဖုံႏနဝ်ꩻ လွေꩻလို့တဲင် ယရပ်ရပ်ဖုံႏနဝ်ꩻ မူႏနမ်ꩻခိုဗင်ႏ လဲင်ꩻတအဝ်ႏနေးဒွုမ်၊ ယဒုံဒုံနဝ်ꩻ အဝ်ႏကုဲင်ဒျာႏ လိုꩻဖြားတောမ်ႏအလီꩻပေႏဖုံႏလုမ်ꩻနဝ်ꩻသွူ။ ယိုဖုံႏ မိဉ်းထိုမ်ႏထွားချာ အထျꩻထျꩻနဝ်ꩻ ကောပ်ခမ်းထီပညာႏရေꩻထဲ့ဖွိုႏ၊ ပညာႏရေꩻစနစ် အထီအသွီႏညမ်းနဝ်ꩻသွူ၊ ခေတ်အသွုပ်သွုပ် ကလွူးလွဉ် ကတန်လွဉ်ဒျာႏ လိုꩻပေႏလိုꩻယွဲးသီးဖုံႏယိုလဲ့ လွူးအီဗော့ꩻဒျာႏ ပညာႏရေꩻစနစ်ယို၊ တန်အီဗော့ꩻဒျာႏ ပညာႏရေꩻစနစ်ယိုနဝ်ꩻသွူ၊ ကသွဉ်ထူႏပညာႏရေꩻစနစ်ယို၊ ကလꩻပညာႏရေꩻယိုဘွဲ့သား လိုꩻယွဲးသီးဖုံႏ မာꩻအီထာꩻမာꩻအာတာႏ တလိုမ်းကိုမ်ႏထွူတဝ်းဒွုန်းနဝ်ꩻသွူ၊ ပအိုဝ်ႏလိုꩻယွဲးသီး ကဲဉ်းအာထဲင်းနဝ်ꩻ ပညာႏရေꩻစနစ်ယိုအကိုပေႏငါမွုန်းတဲ့ ထွူထွူသွတ်ꩻသွတ်ꩻ တသွဉ်နွောင်ꩻဗာႏတဝ်းသား အဝ်ႏအာဗောႏငါႏထာꩻနဝ်ꩻသွူ။ နဝ်ꩻမꩻ ဟန်ႏသနီꩻ သွဉ်ပညာႏထွူ လꩻလဲဉ်းဘွဲ့ လိုꩻယွဲးသီး အီႏမာꩻထာꩻမာꩻမုဲင်ꩻ၊ သွဉ်ဗာႏတဝ်းပညာႏ လိုꩻယွဲးသီး အီႏခုမ်မာꩻ ထာꩻမာꩻမုဲင်ꩻကရိုꩻနဝ်ꩻ အဝ်ႏဟွုန်ယပ်ꩻတွော့ꩻ အဝ်ႏသောင်ခြင်ꩻဗာႏဒျာႏသွူ။ ဟန်ႏသနီꩻ လိုꩻယွဲးသီး သွဉ်ပညာႏထွူ လꩻဘွဲ့ထွူ အီႏမာꩻဗာႏထာꩻမာꩻတမုဲင်ꩻ၊ အီႏလယ်ႏဒင်ႏဗာႏ ထာꩻမာꩻနုဲင်းမုဲင်ꩻ၊ ကဒါႏဒျာႏ ပညာႏ၊ ကလꩻဒျာႏဘွဲ့ယို အီႏထဲ့မဲဉ်ႏတနꩻ တောမ်ႏထာꩻမာꩻအမျိုꩻမုဲင်ꩻ၊ လိုꩻယွဲးသီးနမ်းတောမ်ႏနမ်းဒျာႏ မိဉ်မာꩻထာꩻမာꩻမုဲင်ꩻနဝ်ꩻ ဆုံꩻဖျတ်ချာ၊ လွိုက်ရွေꩻချာဗာႏနုဲင်းမုဲင်ꩻ စတဲင်ဖဝအတာႏ အရေꩻတန်မွေးငါႏနဝ်ꩻ ထိုမ်ႏအမော့ ထွားအဆုမ်ႏတထီႏတဝ်း၊ အဝ်ႏကွင်ကွင်ကယ်ကယ်ဗာႏဒျာႏထာꩻနဝ်ꩻသွူ၊ ခမ်းထီအနာႏဂတ်အာႏရဲင်ꩻဖုံႏ ဆာသုမ်ꩻခြေင်ဗာႏငါႏထာꩻသွူ။ လိုꩻယွဲးသီး အခန်ꩻကဏ္ဍအနေႏ ကောပ်ပညာႏရေꩻစနစ်မာꩻထွာတဲင် တပဲစ်တင်ႏတယ်ꩻတဝ်းဒွုမ်ပါꩻမုဲင်ꩻမုဲင်ꩻတဲင် ခမ်းထီကို ထာꩻမာꩻဆေ့ꩻခြောခန်းတယဝ်း၊ ထာꩻမာꩻအဲဉ်ထဝ်းဝထွူ လိုꩻယွဲးသီးအနေႏ တောမ်ႏနမ်းပညာႏယို ကမာꩻစနွောင်ꩻဒါႏ ထာꩻမာꩻယို ထွိုင်ႏမာꩻထွိုင်ႏတယ်ႏထွင်ႏချာဝင်ꩻနဝ်ꩻ ခမ်းထီအတာႏတဲ့ အကျိုꩻအဝ်ႏ၊ နမ်းအထီအသွီႏတဲ့ မူထင်ပါနဝ်ꩻသွူ။ သွဉ်ပညာႏတစွိုးစွိုးထွူ မိဉ်းလꩻလဲဉ်းသွူဘွဲ့နဝ်ꩻ ထွာလဲဉ်းပညာႏဒါႏသား ပညာႏသျင်ႏနဝ်ꩻသွူ၊ မြန်မာခမ်းထီကို ပညာႏဒါႏသား ပညာႏသျင်ႏနဝ်ꩻ ခုမ်တောမ်ႏဘွဲ့လက်မှတ်တဲင် အဝ်ႏလယ်ႏဒင်ႏဗာႏနေးဒျာႏက ထာꩻမာꩻ ကုမ္ပဏီတဖြုံႏနွို့တဖြုံႏထန်ႏ၊ တရုမ်ꩻနွို့တရုမ်ꩻထန်ႏနဝ်ꩻသွူ၊ ပညာႏဒါႏဘွဲ့လက်မှတ်နဝ်ꩻ ထွာထိုꩻတေားစွဉ်ႏဒျာႏ မာꩻအီထာꩻမာꩻတာႏ ထာꩻမာꩻလက်မှတ်နဝ်ꩻသွူ။ နဝ်ꩻမꩻတဲင် ကလဲဉ်းဒါႏဘွဲ့သား ပအိုဝ်ႏလိုꩻယွဲး မူႏခိုခွန်နင်ꩻသီး အဝ်ႏလိုႏယူႏစဲင်းစဲင်းငါႏသွူ၊ လꩻလဲဉ်းဘွဲ့တွော့ꩻ လယ်ႏထိုမ်ႏဒင်ႏထာꩻမာꩻ မိဉ်းတလꩻတဝ်း သꩻကုဲင်သꩻထဲ့ခရာႏ တမွေးတဝ်းသွူ၊ လꩻလဲဉ်းဘွဲ့ ထွာလဲဉ်းပညာႏဒါႏ ပညာႏသျင်ႏတဲင် လꩻတဝ်းထာꩻမာꩻလဲ့ ပညာႏဒါႏသား ပညာႏသျင်ႏပီပီ အဝ်ႏလိုႏတယ်ႏထွင်ႏခုမ်မာꩻလဲဉ်း ထာꩻမာꩻတစွိုးစွိုးနဝ်ꩻသွူ။ မြန်မာခမ်းထီယိုနဝ်ꩻ လိုꩻတယ်ႏထွင်ႏထာꩻမာꩻ၊ လိုꩻတယ်ႏထောင်ႏထာꩻမာꩻဗွေႏ ဆေ့ꩻငါႏတဲင် အဝ်ႏအာဒျာႏ လိုꩻမာꩻလွဉ်ꩻ၊ လိုꩻထာꩻမာꩻသားနဝ်ꩻမꩻ မာꩻချာထာꩻမာꩻခမ်းကို တလိုမ်းတဝ်း၊ လွေꩻထိုမ်ႏမာꩻပါဗာႏခမ်းလင်၊ လွေꩻထွာပါခမ်းထန်ႏ ထာꩻမာꩻသားနဝ်ꩻသွူ။ နဝ်ꩻမꩻ ပအိုဝ်ႏလိုꩻယွဲးသီး သွဉ်ဒါႏလဲဉ်းသွူပညာႏ၊ လꩻလဲဉ်းသွူဘွဲ့တဲင် ပညာႏဒါႏသားပီပီ၊ ပညာႏသျင်ႏသားမွေးမွေးတွော့ꩻ ထိုမ်ႏထွာဒွုမ်ဝင်ꩻထာꩻမာꩻသား၊ ထွင်ႏချာနမ်းထာꩻမာꩻ၊ ထာꩻမာꩻမိဉ်းယိန်းတန်တန် လိုꩻယွဲးဆုဲင်ꩻချာတာႏ ထွာထာꩻမာꩻခင်ႏလမ်းနဝ်ꩻမꩻ ထိုမ်ႏအနယ်ꩻ ထွိုင်ႏမာꩻထွိုင်ႏထွင်ႏခန်းနဝ်ꩻသွူ။[၁][၂]