လိုꩻယွဲးအာႏရဲင်ꩻ

အဝ်ႏ ဝီခီပီးဒီးယား ကို

"လိုꩻယွဲးအာႏရဲင်ꩻ" (၁) "အာႏရဲင်ꩻ-အာႏရဲင်ꩻ" မာꩻစွဉ်ႏထာꩻမာꩻ အမျိုꩻမုဲင်ꩻတဲ့ယောဝ်း "အာႏရဲင်ꩻ"ယိုနောဝ်ꩻ အရေꩻတန်လဲဉ်းဝင်ꩻ၊ "ပညာႏအာႏရဲင်ꩻ၊ တခြိုꩻအာႏရဲင်ꩻ၊ လိုꩻအာႏရဲင်ꩻ" အောဝ်ႏသွံမျိုꩻ၊ လိုꩻကရိုꩻနောဝ်ꩻတဲ့ "လိုꩻမူႏပေႏယွဲး၊ လိုꩻခိုပေႏယွဲး၊ မူႏနံꩻပေႏယွဲး၊ မူႏနံꩻယွဲး၊ ခိုဗင်ႏယွဲး၊ ပိုမွိုးယွဲး၊ ပိုဖါယွဲး" အောဝ်ႏသူယွဲးပဉ် ၊ အာႏသူမျိုꩻခွဲး၊ ယွဲးသူရဲဉ်ႏဗူႏတဲင် ယူႏနေးငါတဲ့ သꩻတဖွိုန်၊ ဟွိုန်နေးငါတဲ့ သꩻထင်လောႏ၊ ဝွေꩻသီးပျောႏမွေးစွဉ်ႏဒျာႏထာꩻ။ ဝွေꩻသီးကရိုꩻနောဝ်ꩻ ပါꩻမုဲင်ꩻဖုံႏဟောင်း? (၂) "ခွန်မာဃသီး လိုꩻယွဲးစွိုꩻ" ဝွေꩻသီး ကအောဝ်ႏဒုံ၊ ဝွေꩻသီး ကအုံဆောင်ႏနောဝ်ꩻ ရာႏဇဂျိုဟ်ႏခမ်း၊ အွိုင်ႏမာဂဓ၊ ဒုံနောဝ်ꩻ တပေါႏတန်တောဝ်းတဲ့ လိုꩻယံဖုံႏ အောဝ်ႏသော့ꩻအာ၊ လိုꩻယံဖုံႏကရိုꩻနောဝ်ꩻ "ခွန်မာဃသီး လိုꩻယွဲးအစွိုꩻ"။ ဝွေꩻသီးအစွိုꩻယို မရိုꩻဗာႏတွိုး လိုꩻယံနုဲင်းမုဲင်ꩻ၊ ကွပ်ပွိုးထမုဲင်ꩻဟောင်း? ခွန်မာဃသီး လိုꩻယွဲးအစွိုꩻနောဝ်ꩻ - - မာꩻကြောင်းဒုံခြင်ꩻ၊ မာꩻသျင်ꩻဒုံသောင်ဖုံႏ ၊ - မာꩻဟောဝ်တဖူꩻ ၊ ဟွော့ꩻစူꩻတထာဖုံႏ ၊ - ဆို့ꩻစရွပ်ကားမုဲင်ꩻဖြုံႏဖြုံႏ ၊ ခူႏထီအုံႏ ကားမုဲင်ꩻထွောင်းထွောင်း ၊ - မာꩻကုသိုလ်ႏဒါႏန ၊ သီႏလတဲ့ ခံႏကုဲင်တောဝ်း ။ ထွိုင်ႏစောဝ်းစွုမ်ႏရောဝ်ꩻရောဝ်ꩻ၊ ထူႏနꩻ၊ ယꩻခွါ၊ အီပါစော်ꩻနမ်ႏ၊ ခူႏဟံႏပွိုတွောင်း၊ ဟွော့ꩻတသွောင်းမာꩻဟောဝ်၊ လွေꩻနောဝ်တဲ့သျင်ꩻ၊ လွေꩻထင်ꩻတဲ့စွဉ်ႏ ၊ လွေꩻကွဉ်ႏတဲ့စွို့ꩻ၊ လွေꩻတွို့ꩻတဲ့ဖြောင်၊ ငရောင်အောႏအာႏ၊ ခိုႏဒါႏတောဝ်းထာꩻ၊ ကျိုꩻစာꩻမွေးမုဲင်း၊ လိုꩻကုဲင်းစွဉ်ႏခြေင်ခြေင်၊ ကွပ်နောဝ်ꩻမꩻ ခွန်မာခဃသီးလိုꩻယွဲးစွိုꩻနောဝ်ꩻ ရိုꩻဗာႏ "လိုꩻယံ"နုဲင်းနောဝ်ꩻသွူ။ လိုꩻယံသီးယိုနောဝ်ꩻ လိုꩻဟောဝ်နောဝ်ꩻ ကျွိုက်တဲ့ လိုꩻမွိုက်နောဝ်ꩻ လွꩻထီႏ၊ ကွပ်နောဝ်ꩻမꩻ ပါꩻလွꩻထီႏဝွေꩻသီး အောဝ်ႏတဖြာꩻ၊ ပါꩻနောဝ်ꩻ ကျံႏတကုဲင်လဲဉ်းသွူ ဝွေꩻသီး၊ ကျံႏတကုဲင်နုဲင်းမုဲင်ꩻနဲးတဲင်- (၃) "မဟာႏရာႏဇာႏ ခွန်တန်ဗွေႏဩ၊ ခွေသွဉ်း ကအုပ်ချွုတ်ဒါႏ အွိုင်ႏမာဂဓကိုသူꩻနောဝ်ꩻ စွန်သား ထꩻမွေးစွဉ်ႏထာꩻ ဗွေႏအော်" "နာꩻနောဝ်ꩻ ဟိန်တန်ပဉ်ဖြာꩻ မွေးတောဝ်းနဲ့ နုဲင်းကွို့ꩻစွန်နောဝ်ꩻ နာꩻဆွမ်ꩻမွိုင်" "အောဝ်ႏပဉ် သွံဆီသွံဖြာꩻတဲင် အီႏဆွမ်ꩻဗာႏတဲ့ ယိုꩻတောဝ်းအော်" "ဟော - အောဝ်ႏစွဉ်ႏ သွံဆီသွံဖြာꩻနဲ့ရိုႏ" "မွေး- ဗွေႏအော်၊ စွန်ကဲႏနောဝ်ꩻ အမဉ်ꩻမာဃ၊ ကွဲးညည အလိုꩻမဉ်ႏကွဲးအာအာ မဲ့ꩻအအင်းစွန်ပါ နီဗွေႏတဲ့အော်" "ဟား- ဟား၊ မာဃ၊ အင်းစွန်ဗွိုန်ႏစွဉ်ႏ ခွန်တန်နုဲင်းခွေယိုနဲ့ရိုႏ၊ ဝွေꩻကျငါႏ တကားမုဲင်ꩻ၊ ဟွေ့-အမတ်ဖြား၊ ထွဉ်ႏခွေလိုꩻဖုံႏ ဆွမ်ꩻလွဉ်စွန်သားဖုံႏသူꩻ" "အမိန်းတောႏမျတ် ဒင်ႏကတူႏ၊ ခွေသွဉ်း ထူႏတာႏဝွန်ႏဖေႏဒျာႏ မဟာႏရာႏဇာႏ ဗွေႏဩ" "အွို- မွေးသွူ၊ လွေꩻဟုဲင်း" (၄) မွူးယာခိုႏတိန်ႏတိန်ႏ၊ ထာꩻလျားခိန်ႏတန်၊ ခွန်မာဃသီး လိုꩻစွိုꩻဖုံႏ တသိုꩻလီးတသိုꩻလူး ခူႏလုံး၊ တကြွီႏသေင်ႏခြုံး၊ မာꩻဟောဝ်တဖူꩻ၊ မာꩻလုဲင်းတဖူꩻဖုံႏ၊ လိုꩻလွေꩻသဲင်ꩻ ဖေႏကခေါး၊ လေားလွေꩻသဲင်ꩻ ဖေႏကယိုꩻ၊ ဝွေꩻသီးရိုꩻနုဲင်းနောဝ်ꩻ။ "ယို - ဝေးခိုသီးဖုံႏဟွေး- အုံပဆားပသာႏကမွိုင်၊ ဝေးခိုသီး အရွိုးဖေႏနေးကပြေႏတဲင် ဖူးမူႏသီး ဒွိုႏလွဉ်ဖေႏ နေင်းထီယို၊ နေင်းထီကပ်ꩻ ဗေဟံႏသွတ်ꩻတဲ့ပါ၊ လွဉ်သွုံꩻဆောင်ႏက ဖူးမူႏသီး နေင်းထီယိုလုဲင်း" "ဟွေ့- သွꩻရက်သီးဖုံႏဟွေး၊ ဖူးမူႏသုဓမ္မာႏ၊ သုစိတ္တာႏ၊ သုနန္ဒာႏသီးဖုံႏ ဒွိုႏလွဉ်ဖေႏနီ နေင်းထီတဲ့၊ အချိန်ႏအုံပဆားလဲဉ်းဒျာႏရင်ꩻ၊ အွဉ်ႏလင်ꩻက သီနံႏ သီနꩻ လွေꩻအွꩻ နေင်းထီသူꩻလုဲင်း" ခိုဗင်ႏတန် ခွန်မာဃ ကထင်ႏဒေါ့ꩻနုဲင်းနောဝ်ꩻတဲင် အွဉ်ႏလင်ꩻနံႏ အွဉ်ႏလင်ꩻနꩻ လွဉ်အွꩻနေင်ႏထီ ပငါပရာꩻ၊ အံႏဗေဟံႏသွတ်ꩻ၊ အွꩻရွတ်ꩻပါနေင်းထီ၊ ဒေါ့ꩻရီပါမူႏနံꩻ၊ ယံမွေးစွဉ်ႏထာꩻ၊ တိန်ႏထီႏမူႏနံꩻလွိုးတွော့ꩻ အရွိုးယေန်ထိုꩻစွဉ်ႏဒျာႏတဲ့ရိုႏ၊ ကွဲႏတွော့ꩻ - ကွဲႏတွော့ꩻ နုဲင်းမုဲင်ꩻနဲးတဲင် - (၅) "ဟွေ့ မာဃ၊ နီလွဉ်ဆွမ်ꩻ သီလိုꩻစွိုꩻ၊ ရုဲင်ꩻမွိုန်းထာꩻ တဖြာꩻဖြာꩻလုဲင်း" "မဆွမ်ꩻတွိုႏနီ၊ နီအပဲစ်ထမုဲင်ꩻအောဝ်ႏ ဖါပဟိန်?" "အပဲစ်အောဝ်ႏ၊ အပဲစ်အဲဉ်ထောဝ်းနောဝ်ꩻ သေနာႏတောဝ်းလာꩻလာꩻ၊ မဟာႏရာႏဇာႏ ခွန်တန်အမိန်းဒျာႏ၊ ဒေါ့ꩻအာမွိုန်းထာꩻ၊ ဟွေ့- ခွန်လိုꩻဖုံႏနောဝ်ꩻ ဆွမ်ꩻပါꩻစားယိုဟုဲင်း၊ စွိုင်အစူဖုံႏနောဝ်ꩻလုဲင်း" ထာꩻပျောႏဆွိုး၊ ထာꩻတလွိုးတွိုႏတေားလဲဉ်းသွူ ခွန်မာဃသီး လိုꩻယွဲးစွိုꩻ၊ အီႏမော့ꩻသွူ ထာꩻဒုက္ခ၊ အီႏမော့ꩻဗာႏသွူ ထာꩻဒုက္ခဒျာႏရင်ꩻ။ (၆) "ဟော - ပိုမူႏသီးဖုံႏ လောင်ႏလွိုးတဲ့တကုဲင်၊ တသိုꩻတုဲင် လဲင်ꩻရွိုးရား၊ ထွားသီမွော့ ထွာလဲဉ်းတမျိုꩻမျိုꩻမတောဝ်" "ဖြားဒုံ- အိုးမွေးတောဝ်း၊ ဖါဖြား - ဖါဖြားပဟိန် ဆွမ်ꩻထိုꩻလဲဉ်း ဝေးမာဃသီးလိုꩻစွိုꩻ" "ဟွူး- မွေးနေဟောင်း မူႏ" "မွေး- ဖါဖြား၊ နီအောဝ်ႏနောဝ်ꩻကို လွင်းသဲင်ꩻယိုသနယ်၊ ပဟိန်ရိုꩻ ခွန်အမိန်းတဲ့" "အား- ပေါႏနောဝ်ꩻတဲးတဲ့ ပဟိန်လွေꩻအံႏစာလဲဉ်းသွူ မောင်ႏမာဃသီးဒျာႏရင်ꩻ၊ အုံဗော့ꩻနုဲင်းယိုထွာတောဝ်း၊ သုဓမ္မာႏနောဝ်ꩻ လောႏလွေꩻ ဒုံခေါဝ်ကွဉ်ႏ ၊ သုစိတ္တာႏနောဝ်ꩻ လောႏလွေꩻ ဒုံခေါဝ်နောဝ်၊ သုနန္ဒာႏနောဝ်ꩻ လောႏလွေꩻ ဒုံခေါဝ်တွို့ꩻသူꩻ လွေꩻဒေါ့ꩻဒုံသားဖုံႏနောဝ်ꩻ ထွဉ်ႏလွဉ်လို့လို့ယိုကိုနော" "အော် - တွိုႏသုဇာႏတာႏဟာ ပါတောဝ်းနဲ့" "သုဇာႏတာႏနောဝ်ꩻ ဟဲ့ꩻတလꩻတောဝ်း ဖါဖြား" "အွူ - သုဇာႏတာႏနောဝ်ꩻ ဒါႏစွဉ်ႏ အွဉ်ႏတရေꩻအနမ်းလွုမ်ꩻ၊ ကုသိုလ်ႏတရာꩻ ထာꩻမာꩻထမုဲင်ꩻမုဲင်ꩻတသေတောဝ်း၊ အီႏဒေါ့ꩻဆွာꩻတရွားထာꩻတဲ့ တထွာတောဝ်း၊ လွေꩻခန်းလုဲင်း၊ ဒုံခေါဝ်ထင်ꩻမဲ့ꩻ ခွေနမ်းဖြားလွေꩻဒျာႏ" "ဝင်ꩻဆွမ်ꩻလိုꩻလဲဉ်း မာဃသီး လိုꩻစွိုꩻတဲ့" ကရိုꩻဒါႏ သတင်ꩻယိုနောဝ်ꩻ တလဲင်ꩻချင်ꩻစွစ်ꩻစွဉ်ႏဒျာႏ တဒုံလုမ်း၊ ကောကငွိုးထာꩻသားတဲ့ အောဝ်ႏဒျာႏ၊ ကောကခွန်းထွမ် ပဟိန်သားတဲ့ အောဝ်ႏဒျာႏ၊ သင်ႏစွဉ်ႏညွုတ်ꩻညွုတ်ꩻညက်ꩻညက်ꩻ၊ ဖျော်ပြုံႏဖျော်ပြင်ႏလွဉ်စွဉ်ႏ ဖြားဒုံလမ်းငါ၊ လိုꩻအာမွေးစွဉ်ႏထာꩻ။ "အဟမ်း-အဟမ်း၊ အုံတေ့ꩻတေ့ꩻဆောင်းထာꩻ တဆင်ႏငါမွိုင်ႏ ပိုလီꩻဖုံႏဟွေး- ဒုံကိုယို အွဉ်ႏကုဲင်ငါ လိုꩻဖြား လိုꩻမူႏတွမ်ႏ လိုꩻပေႏဖုံႏငါ၊ လွိုနောဝ်ꩻ လွေꩻထောက်ခံႏလွဉ်ꩻလို့လို့ဗာႏ မောင်ႏမာဃသီးစွိုꩻသူꩻ မွေးနေဟောင်း?" "မွေးဒျာႏ၊ မွေးဒျာႏ" "မွေးငါႏနုဲင်းနောဝ်ꩻသွူသနယ်" "အွို ပေါႏနောဝ်ꩻလဲ့လွေꩻ၊ လွေꩻစွဉ်ႏယိုခါခါ" လိုꩻပေါႏမာꩻဖေႏ ဝင်ꩻအကျိုꩻနောဝ်ꩻ မဉ်ႏမော့ꩻစိန်ႏစွော့ꩻ ထာꩻဒုက္ခနုဲင်းယိုတဲ့ ဝင်ꩻအမျာꩻတထွားလွိုတောဝ်း၊ လွေꩻလောႏ နာꩻလောႏ၊ ကောလောႏသား အောဝ်ႏအာတန်။ (၇) "ဒူꩻ - ဟူꩻ - ဟူꩻ၊ ဒူꩻ - ဟူꩻ - ဟူꩻ၊ ခမ်းသားသီးဖုံႏဟွေး - ဟိန်တန်မာဂဓ ဆွမ်ꩻလꩻလွဉ်စွန်သား သွံဆီသွံဖြာꩻ၊ စွန်သားဖုံႏနောဝ်ꩻနောဝ်ꩻ ဟန်ႏနီꩻ မွူးယာခိုႏတိန်ႏတိန်ႏ မွူးနွောင်းတဲ့ꩻတဲ့ꩻ အချိန်ႏသူꩻနောဝ်ꩻ ခွန်တန်ဟာႏရာႏဇာႏ ထေအာႏဏာႏ အမိန်းထင်၊ အီႏထွဉ်ႏယမ်းတွမ်ႏဆင်တဲင် ခိုခိုမူႏမူႏ လွဉ်ထွားလွသွော့ဝင်ꩻ ပငါပရာꩻလုဲင်း ခမ်းသား ထီသားဖုံႏဟွေး- ဒူꩻ - ဟူꩻ - ဟူꩻ၊ ဒူꩻ - ဟူꩻ - ဟူꩻ" "အီႏအွဉ်ႏယမ်းစွန်သား တွမ်ႏဆင်တဲ့"ကရိုꩻဒါႏ သတင်ꩻယိုနောဝ်ꩻ အောဝ်ႏတဖြေꩻယောင်း၊ အောဝ်ႏတဖြောင်းဒေါ့ꩻငါငါတဲင် တဆင်ႏလွုမ်ꩻတွော့ꩻ စွစ်ꩻတိုးဒွမ်ခိုႏ၊ ရာႏဇဂြိုဟ်ႏတဝေင်ꩻလုမ်းနေးစွဉ်ႏ။ မွိုးဖြားမဲကျောင်ꩻအူꩻနောဝ်ꩻရိုꩻ- "အွိုး အွေး- နေႏရာႏဝွေꩻသီးနဝ်ꩻ အွဉ်ႏခံနေးငါထောင်ႏငါ၊ အောဝ်ႏလိုႏမာꩻသီတောဝ်းဝင်ꩻ၊ သညင်ꩻငါႏ အပိုအမာဆချာ" ဖါဖြား ကျောင်ꩻဝဏ္ဏနောဝ်ꩻရိုꩻ- "အီ - တလိုႏသညင်ꩻတောဝ်း၊ လိုꩻလွꩻဖုံႏဟ၊ လုပ်ꩻခွုမ် ဖြေꩻစာ ကူꩻကားဟောဝ်ဟောဝ်ဒါႏဒါႏမွိုင် ပါꩻမုဲင်ꩻကဲး အီႏမာꩻသီဝွေꩻသီး၊ စွန်ထာꩻတဲ့ မဉ်ႏထွာ နီသွံလဲင်ႏလွုမ်ꩻတဲး ဝင်ꩻဆွုံꩻမꩻချꩻနား ဟောဝ်ဟောဝ်ဒါႏဒါႏနေးဒျာႏ၊ ယိုနောဝ်ꩻ အာလဲင်ႏငါႏ၊ ဒေါ့ꩻတနာႏတောဝ်းမꩻ ခွန်ချꩻအမိန်းသီမတောဝ်၊ အွူ - မဉ်ႏယူႏ အပိုအမာတဲ့ ကသညင်ꩻ၊ ဝွေꩻသီးထာꩻမာꩻတွမ်ႏ ဝွေꩻသီးကံႏဒျာႏနောဝ်ꩻသနဲ့" ကောကဝွေႏဖန်ႏစတဲင် နုဲင်းနောဝ်ꩻဖု့ႏတဲ့ အောဝ်ႏဗောႏဗာႏထာꩻ၊ မွူးတဲ့ ကွဲးထင်ႏထိုထိုလဲဉ်းသွူ။ မွူးကွဲးထင်ႏထိုထိုတဲ့ မောင်ႏမာဃသီးယို ကွဲးဗော့ꩻဗော့ꩻသွူထာꩻသီ၊ ဖြားဒုံသီးဖုံႏ လွေꩻတောင်ꩻပြန်ႏတဲ့ ခွန်သꩻထန်ႏထဲင်းဒျာႏထာꩻ၊ အီႏမာꩻဗာႏနုဲင်းမုဲင်ꩻမကောင် ဝွေꩻသီးယူႏထာꩻတဲ့ တဖြောင်တဖြင်တောဝ်းဒွုမ်။ ထာꩻတရာꩻတောဝ်းနဝ်ꩻ အောဝ်ႏသေသေဒျာႏ၊ ကွဲႏတွော့ꩻ ဒေါ့ꩻသော့ꩻထာꩻတလꩻတောဝ်း၊ တနွောင်ꩻတဝ်းဝင်ꩻတဲင် ဝွေꩻသီးအဲင်ႏခြေင်းကတွောင်တငါ၊ ခံႏဆာဗာႏစွဉ်ႏတေ့ꩻတေ့ꩻ။ (၈) "အွိုးသူꩻ - အွိုးသူꩻ ဝင်ꩻစွီႏလွဉ်သွူ စွန်သားဖုံႏ" မွေး ဝင်ꩻစွီႏလွဉ်သွူ မာဃသီးလိုꩻယွဲးစွိုꩻ။ "အွိုး အွေး - ထွားမွိုင်သူꩻနောဝ်ꩻ စွန်ကဲႏသူꩻ ယောင်ꩻဆင်ꩻ ကတရေꩻထာꩻသူꩻအွို၊ ရစွဉ်ႏစွန်မွေးတောဝ်း၊ သညင်ꩻငါႏလိုꩻခွေ" "ဟွေ့- ဟွေ့၊ အုံလင်ꩻ၊ အုံလင်ꩻ၊ အုံလင်ꩻထွားနေးလုဲင်း" မဲ့ခူꩻပေါင်ꩻ တသောင်ꩻမကာႏ ထွားဟုမ်လွေꩻစွဉ်ႏဒျာႏ မာဃသီးလိုꩻယွဲးစွိုꩻ။ "သွꩻရက်သီးဖုံႏဟွေး - ပဟိန်သူꩻတဲ့နဝ်ꩻ၊ ခွန်သူꩻတဲ့နဝ်ꩻ၊ ဝင်ꩻကဆွမ်ꩻနီ ခွန်လိုꩻဖုံႏသူꩻတဲ့နောဝ်ꩻ၊ ကအီႏအွဉ်ႏယမ်းနီ ဆင်သူꩻတဲ့နောဝ်ꩻ သꩻလျားမွိုန်းတစိꩻစိꩻနော၊ အွဉ်ႏဒျာႏသွော့ မေတ္တာႏ၊ မတ်ပီပီဒျာႏသွော့ နီနမ်းနော" "ဟွေ့-မာဃ၊ နာꩻဒေါ့ꩻဆွားတရွားမွိုန်းထာꩻနောဝ်ꩻ၊ ကားကအောဝ်ႏ ဗေင်ႏပြာႏလင်ꩻလို့လို့လုဲင်း" ခွန်လိုꩻ ပါꩻမဲ့တနျာႏ၊ ဖြေင်းကရစ်ꩻတန်တဖြာꩻနောဝ်ꩻ ထွဉ်ႏနုဲင်းနောဝ်ꩻတဲင် မာဃသီးလိုꩻယွဲးစွိုꩻတဲ့ ဗေင်ႏပြာႏတလာလင်ꩻဗာႏစွဉ်ႏ ဟံႏလောင်း ဟော်ငါ။ "အွိုးသူꩻ ဆင် ဆင်၊ ဝင်ꩻစွီႏလွဉ်သွူ ဆင်ထီးတန်" မွေး - ဝင်ꩻစွီႏလွဉ်သွူ ဆင်ထီးတန်၊ အီႏအွဉ်ႏယမ်းသွူ မာဃသီးလိုꩻယွဲးစွိုꩻ၊ ဆင်ထီးနောဝ်ꩻ အကုဲင်သွတ်ꩻ၊ ယမ်းသီလိုꩻ ကားမုဲင်ꩻဖြာꩻဖြာꩻလဲဉ်း ၊ ယိုနောဝ်ꩻ သမ်းတွိုက်ꩻနေးထဲင်း ဒေါဝ်အဟောဝ်စား တဆီသူပလဲင်ꩻတဲ့၊ ဆင်ထီးတန်တဲ့ အမဲ့တကယ်လဲဉ်းသွူ။ အစူအောဝ်ႏဝွေးအောဝ်ႏဝုဲင်းစွဉ်ႏထာꩻ၊ ဆင်ဆရာႏတဖြာꩻ အွဉ်ႏစွꩻလွဉ်လဲဉ်းသွူ။ ဆင်ထီးတန်တဲ့ နဲစ်ငါလွေꩻစွဉ်ႏ စွုတ်စွုတ်၊ အီႏတွိုႏလွေꩻသွူ မာဃသီးထျꩻ၊ အီႏလွေꩻယမ်းသွူဝွေꩻသီး၊ ကထွားသားဖုံႏနောဝ်ꩻ သꩻတနွော့ꩻမွေးစွဉ်ႏထာꩻ။ ကွဲႏတွော့ꩻ ဆင်ထီးတန် ကထင်ႏတွိုႏလွေꩻသွူ မာဃသီးထျꩻ အီႏလွေꩻယမ်းသွူဝွေꩻသီး ခြောဝ်အငေါဝ်း လွင်းချာထိုꩻဒျာႏ၊ မာဃသီးတဲ့နောဝ်ꩻ၊ လိုꩻဟောဝ်လိုꩻဒါႏဖုံႏတဲ့နောဝ်ꩻ သꩻရေꩻမွေးစွဉ်ႏထာꩻ၊ အီလွဉ်ဖျင် ဆင်တဗာႏခေါ် ထွဉ်ႏယမ်း၊ ဆင်ငမ်းဖင်းချာ၊ အီလွဉ်ဖျင် ဆင်တဗာႏခေါ် အွဉ်ႏယမ်း ဆင်ငမ်းလွင်းချာ၊ တလဲင်ႏ၊ နီလဲင်ႏ၊ သွံလဲင်ႏလဲဉ်းသွူ။ "ဝွေꩻသီး တသီႏဆောင်ႏဟောဝ် အောဝ်ႏမတောဝ်၊ ထွားသောက်စံꩻအနမ်းလောင်းနောဝ်ꩻဟုဲင်း"ခွန်လိုꩻတဲ့ ထွားသောက်၊ ကတူႏပေါက်ခွေႏကိုငါတဲ့ တအွဉ်ႏကုဲင်ဒွုမ် သောက်လို့ပါ။ "ဝွေꩻသီး တသီႏဆောင်ႏ အဲဉ်ထောဝ်း - ဗွေႏအော်" "အဂါႏထာႏဟောဝ် အောဝ်ႏမတောဝ်၊ လွေꩻရီစံꩻဟုဲင်း" ခွန်လိုꩻတဲ့ နက်လွေꩻထ့ ခွန်မာဃ၊ ဂါႏထာႏဟဝ် အောဝ်ႏ အောဝ်ႏတောဝ်း ယံလောဝ်းချာဗာႏခွန်တဲ့- "ဝွေꩻသီးဂါႏထာႏဟောဝ်အောဝ်ႏတဲ့ - ဗွေႏအော်" ခွန်နောဝ်ꩻနောဝ်ꩻ တွိုႏနမ်းကျင်ꩻနောဝ်ꩻ မာꩻတဗော့ꩻလဲ့ꩻ၊ ကွိုꩻတေားဒျာႏ လက်ဖွဲ့ဂါႏထာႏ၊ ဝါႏသနာႏတောဒျာႏ တေန်ꩻအင်ꩻ၊ အမျိုꩻအီႏထွꩻ နမ်းကျင်ꩻတရာꩻ သီႏလငတ်ꩻပါꩻဟောင်း။ "ဝွေꩻသီး ဂါႏထာႏဟောဝ်မဉ်ႏအောဝ်ႏတဲ့ အွဉ်ႏစွꩻဟုဲင်း၊ ထွဉ်ႏလွဉ်လို့လို့ ခွေထျꩻယို" ခွန်မာဃသီး လိုꩻယွဲးစွိုꩻ သꩻသွိုꩻငါႏလဲဉ်းသွူ၊ မာꩻနုဲင်းမုဲင်ꩻတဲ့ယောဝ်း ထာꩻသီခန်ꩻတဲးတဲ့ တတွိုႏနွောင်ꩻတောဝ်းဒွုမ်။ "ကိန်းရွစ်နယ်မွိုင် သီဂါႏထာႏဟောဝ်ဖုံႏနောဝ်ꩻမွိုင်" "ခွန်တန် မဟာႏရာႏဇာႏဗွေႏဩ၊ နီသွဉ်းသီး လိုꩻယွဲးစွိုꩻယိုနောဝ်ꩻ မာꩻသီတောဝ်းဝင်ꩻသက်၊ ထူႏတခွန်ꩻတောဝ်းဝင်ꩻထာꩻ၊ ပဲစ်မာႏတောဝ်း ဝင်ꩻပိုမာ၊ ဒေါ့ꩻလဲဉ်တောဝ်းထာꩻ၊ အွꩻတောဝ်း ဒေါဝ်သူႏရာႏ၊ အွဉ်ႏဒျာႏမေတ္တာႏ၊ မာꩻဒျာႏတဖူꩻ၊ ခူႏဒျာႏထီအုံႏ၊ ဆို့ꩻဒျာႏစရွပ်၊ ယိုဖုံႏနောဝ်ꩻ နီသွဉ်းသီးဂါႏထာႏ၊ နီသွဉ်းသီးပရိတ်၊ ထွာနီသွဉ်းသီး အစီꩻအပွာꩻဖုံႏသွူ ဗွေႏဩ" "အွူ- ထွားနုဲင်း သီရွုတ်အင်္ဂါႏ၊ နာႏနုဲင်းသီငေါဝ်းသုဲင်ယိုနောဝ်ꩻ သီယို လိုꩻကုဲင်ဖုံႏမွေးတောဝ်း" အောဝ်ႏနောဝ်ꩻထွူတွော့ꩻ ထွားစွော့ꩻလွေꩻတော ပဟိန်မဲ့ငါ၊ ပဟိန်နောဝ်ꩻ အွဉ်ႏတကုတ်ꩻအကတူႏ၊ အယူႏထာꩻဖြောင်ဒွုမ်၊ အွော့ꩻအမဲ့ငါတဲ့ ဗွိုန်ႏဒွုမ်။ "ယို - ပဟိန်၊ ကွပ်ပွိုးထမုဲင်ꩻ နာꩻကျံႏတကုဲင်တွိုး မောင်ႏမာဃသီးယိုဟောင်း" ပဟိန်လောဝ်းချာတောဝ်း ငေါဝ်းတငွါငွါ၊ အုံတကုတ်ꩻစွူစွူဒျာႏထာꩻ။ "လောဝ်းချာလုဲင်း ပဟိန်၊ ပေါႏနာꩻတလောဝ်းချာတောဝ်းတဲ့ ဆင်ဖုံႏသူꩻနောဝ်ꩻ အွဉ်ႏယမ်းသီတေားစွဉ်ႏနာꩻသနယ်" "ဟူး- အွဉ်ႏယမ်းမွိုန်းဗွေႏ၊ အွဉ်ႏယမ်းမွိုန်း၊ အွဉ်ႏယမ်းမွိုန်း၊ ငမ်းငါႏဗွေႏအော်" "ဟွူ - လိုꩻမွိုက် လိုꩻမွိုက်၊ တွိုႏဝင်ꩻနောဝ်ꩻ အွဉ်ႏယမ်း၊ တွိုႏဝွေꩻနမ်းနောဝ်ꩻ ငမ်းထာꩻသီ၊ လိုꩻမွိုက်သီးအဖဲင်ႏ၊ လိုꩻသꩻတကဲင်ႏသီး ထာꩻမာꩻနောဝ်ꩻ တတရာꩻတောဝ်း တစိꩻစိꩻစွဉ်ႏဒျာႏ" "ခွေ - ခွေသွဉ်း အီႏလောဝ်းစွဉ်ႏစွဉ်ႏဒျာႏ ဗွေႏအော်၊ ခါးလားဝွေꩻသီး လိုꩻယွဲးစွိုꩻကပေါႏနောဝ်ꩻ ခွေသွဉ်းမာꩻနုဲင်းမုဲင်ꩻတဲ့ရော့ꩻ၊ ဒေါ့ꩻနုဲင်းမုဲင်ꩻတဲ့ထွာ၊ လꩻအာရွဉ်ခံꩻ - ဗွေႏအော်" "ယိုခါဟာ လꩻအာတောဝ်းနဲ့" "လꩻအာတောဝ်း၊ ယိုခါနောဝ်ꩻ ဝင်ꩻဖေႏအာႏဒျာႏ ဝွေꩻသီး၊ ခွေသွဉ်းနောဝ်ꩻ အစွူႏထဲ့ပြာႏ၊ အာႏဏာႏကုဲင်ပြင်ꩻ၊ ဝင်ꩻတအံႏသွင်ꩻတောဝ်းဒွုမ် ခွေသွဉ်း၊ ရွဉ်တဲ့ခြောမွေးမုဲင်းစွဉ်ႏထာꩻ၊ ကွပ်နောဝ်ꩻမꩻ ခွေသွဉ်းကျံႏတကုဲင်ဗာႏ ဝွေꩻသီးနုဲင်းယိုသွူ - ဗွေႏအော်" "အွူ- ပဟိန်၊ ပဟိန်၊ နာꩻနောဝ်ꩻ နီထင်းလိုꩻဟောဝ်တဲင် နီဒင်ႏဖေႏအရာႏ၊ အွဉ်ႏထွာဒျာႏလိုꩻတန်၊ နာꩻကထင်ႏထွာလိုꩻတန်တဲ့ အုံလိုꩻတန်တောဝ်းထာꩻ၊ မာꩻလိုꩻတန်တောဝ်းနမ်း၊ နာꩻအစွူႏသွုံꩻမာႏ၊ နာꩻအာႏဏာႏသွုံꩻလွင်ꩻ၊ နာꩻအံႏနွောင်ꩻတောဒျာႏဝင်ꩻဟနော၊ မွေးနေဟောင်း" "မွေးဒျာႏ - ဗွေႏအော်" "လိုꩻအမျာꩻကရိုꩻနောဝ်ꩻတဲ့ ဖိုးပနား တိရစ္ဆာန်ႏမွေးတောဝ်း၊ ဝင်ꩻတဲ့လိုꩻနေနေ၊ နာꩻကမာꩻထာꩻယို မွေး/တမွေးတောဝ်း၊ တရာꩻ/တရာꩻတောဝ်း ကရိုꩻနောဝ်ꩻတဲ့ ဝင်ꩻအောဝ်ႏဝွေႏဖန်ႏဒါႏဒျာႏနေနေ၊ နာꩻမာꩻထာꩻ တမွေးတမဲဉ်ႏတောဝ်းနောဝ်ꩻမꩻ နာꩻအစွူႏထဲ့ပြာႏ၊ နာꩻအာႏဏာႏကုဲင်ပြင်ꩻဗာႏနောဝ်ꩻသနဲ့ ပဟိန်၊ အဲင်ႏချာခွေငေါဝ်း နာꩻမဉ်လောဝ်းနုဲင်းမုဲင်ꩻ" "အဲင်ႏချာဖုဲင်ႏတောဝ်း၊ လောဝ်းခရာႏအဲဉ်ထောဝ်းဒွုမ် ဗွေႏအော်" "အွို - မွေးသွူ၊ တဲႏဟန်ႏနီꩻယိုမာꩻငါ နာꩻထွာဗာႏဒွုမ် ဟိန်၊ မောင်ႏမာဃနဝ်ꩻ ထွာတော့သွော့ဟိန်၊ နာꩻနမ်းတဲ့နောဝ်ꩻ၊ နာꩻပိုမာဖုံႏတဲ့နောဝ်ꩻ ထွာဖေႏဗာႏ မောင်ႏမာဃသီးသွဉ်း၊ နာꩻကအံႏပွစ်ဝင်ꩻတခြိုꩻ၊ နာꩻကသိမ်ꩻထိုꩻ ဝင်ꩻဥစ္စာႏဖုံႏနောဝ်ꩻတဲ့ ဖေႏအပ်လို့လို့ဗာႏ မောင်ႏမာဃယို၊ လွိုဆန် ခွေငေါဝ်းယိုလꩻတောဝ်း၊ ယိုနောဝ်ꩻ ခွေအမိန်း" ခွန်တန်ရာႏဇ တိန်ႏချꩻလင်ꩻအမိန်းနုဲင်းနောဝ်ꩻတဲင် ပဟိန်မွိုက်နောဝ်ꩻ အွဉ်ႏလင်ꩻဗာႏစွဉ်ႏဒျာႏ အမဲ့ထီ၊ ကဟွိုန်ထွꩻသား ကားကအောဝ်ႏဖုံႏတဲ့ တဗꩻစူထောက်ခံႏ၊ ယွိုင်ႏယင်ႏစွဉ်ႏ အကတူႏပေါက်၊ ခြောဝ်ဝေါက် စွဉ်ႏအငေါဝ်းဖုံႏ၊ လိုꩻမာဃသီးဒုံနောဝ်ꩻ ယိန်းကယ်ꩻစွဉ်ႏဝင်ꩻ။ "မောင်ႏမာဃသီးဖုံႏဟွေး- မာꩻဖေႏဝင်ꩻအတွက် ဆောင်ႏရွက်ဖေႏဝင်ꩻအတာႏ၊ လိုꩻစေႏတနာႏမဲဉ်ႏနုဲင်းသီဖုံႏယိုနောဝ်ꩻ ကျေꩻဇူꩻအာတန်၊ ဆင်တန်တိရစ္ဆာန်ႏလယ်ႏကွို့ꩻမဉ်ႏတဲ့ သေသီကျေꩻဇူꩻ၊ တွိုႏခွေနောဝ်ꩻ တကယ်သူႏရာႏ၊ ယွုမ်းမာႏပဟိန်ငေါဝ်း၊ အွဉ်ႏစွꩻခွင်ꩻသွော့ခွေနော၊ ကားယိုမာꩻငါ ခွေဖေႏအာႏဒျာႏသီ၊ လိုႏအမျိုꩻမုဲင်ꩻတဲ့ ဒေါ့ꩻနယ်သွော့၊ ယိုတလဲင်ႏနောဝ်ꩻ ဆုꩻတန်အနေႏ ဖေႏသဲင်ꩻသီ ဆင်တန်တဖြာꩻတဗာႏဗာႏ၊ ထုမ်းဆင်တန် သဲင်ꩻပျောႏပျောႏ၊ မာꩻသဲင်ꩻသွော့ ငေါဝ်းတဲက်အောႏအောႏလုဲင်းနော" (၉) ခွန်မာဃသီး လိုꩻယွဲးစွိုꩻ သွံဆီသွံဖြာꩻ ထုမ်းတွမ်ႏဆင်တန် ဖြာꩻဗာႏဗာႏ ထန်ႏသဲင်ꩻသွူရာႏဇဂျိုဟ်ႏဝေင်ꩻ၊ လိုꩻကဖေႏအာႏဝွေꩻသီး ခမ်းသားထီသား ကပသာလွဉ်ꩻ ဝွေꩻသီးဖုံႏနောဝ်ꩻတဲ့ အောဝ်ႏခြပ်အောဝ်ႏခြိပ်နေးစွဉ်ႏ တဖူꩻသောင်၊ အောဝ်ႏထောင်အောဝ်ႏထင်လွေꩻစွဉ်ႏ တဖူꩻထျꩻ၊ စူꩻယာꩻကင်းမဲ့ကူႏ၊ အွဉ်ႏရီႏရူႏကတောင်၊ ထွားထောင်လွဉ်ꩻတဲ့ တထီႏဖြောင်လို့တောဝ်းအနာ၊ တထီႏငါတောဝ်းအသွတ်ꩻ၊ အာမွေးအာမုဲင်းစွဉ်ႏထာꩻ။ ခွန်မာဃသီး လိုꩻယွဲးစွိုꩻ မာꩻသဲင်ꩻပါစွဉ်ႏ အငေါဝ်းနုဲင်းယို- "နီလိုꩻယွဲးအစွိုꩻ အောင်ႏလဲဉ်းသွူနယ်ဟွေး-ဟွေး"၊ မွေး- မွေးငါႏမရေႏမရာႏ၊ ဝွေꩻသီးလိုꩻယွဲးအစွိုꩻ အောင်ႏလဲဉ်းသွူ။ အောင်ႏတောဝ်းအောဝ်ႏဒါႏပဲးနဲ့၊ ယူႏမွိုင် - ဝွေꩻသီးတဲ့ သမ်းဖြွမ်းလို့ဝင်ꩻ၊ နမ်းကျင်ꩻတဲ့ သမ်းဟောဝ်၊ အွဉ်ႏသꩻစေႏတနာႏ မာꩻဖေႏဒျာႏဝင်ꩻအကျိုꩻ ကဲဉ်းအာအာ၊ ခံႏဆာနွောင်ꩻမွေးစွဉ်ႏအနမ်း။ ကွပ်နောဝ်ꩻမꩻ ပါꩻမုဲင်ꩻကဲး အီႏတုနွောင်ꩻဝွေꩻသီး၊ ပါꩻမုဲင်ꩻကဲး အီႏခေးပြဲင်ႏဗွိုန်ႏဝွေꩻသီး၊ ဝွေꩻသီးအာႏရဲင်ꩻနောဝ်ꩻ တလာလဲဉ်းက ဆင်၊ ဆင်တန်သွူမဉ်ႏတဲ့ ငမ်းဗာႏဝွေꩻသီး မွေးတောဝ်းနဲ့၊ လိုꩻယွဲးအာႏရဲင်ꩻနောဝ်ꩻ တလာတကားမုဲင်ꩻ၊ တွိုႏခြောင်ꩻတကားမုဲင်ꩻကရိုꩻနောဝ်ꩻ ကရီးခါတဲ့ ဟွိုန်ဗာႏဖိုလဲဉ်း၊ ယိုခါတဲ့ ထီႏဗာႏလဲဉ်း၊ တွိုႏဆုဲင်ꩻသူꩻတဲ့ အီႏထီႏဗာႏဖျင်၊ ဝွေꩻသီးအာႏယိန်းတက်တက်၊ ဝွေꩻသီးယိန်းနက်နက်၊ ယိန်းသတ်သတ်နောဝ်ꩻသွူ။ ကမာꩻတိုꩻတက်အီ နီရပ်ရာႏနောဝ်ꩻ ထမုဲင်ꩻ? "လိုꩻယွဲးအာႏရဲင်ꩻ" အာႏကွိုꩻခရာႏ အယံသွတ်ꩻနောဝ်ꩻ ထမုဲင်ꩻ? "လိုꩻယွဲးအာႏရဲင်ꩻ" မုဲင်ꩻစွဉ်ႏတဲ့ ရန်ႏသူႏတယားနွောင်ꩻတောဝ်းနောဝ်ꩻ ထမုဲင်ꩻ? "လိုꩻယွဲးအာႏရဲင်ꩻ" စွုမ်ႏရပ်စွုမ်ႏရာႏ၊ စွုမ်ႏဒုံစွုမ်ႏဆောင်ႏ၊ မူႏမောင်ႏဗူႏခွဲး၊ လိုꩻယွဲးအာႏရဲင်ꩻ၊ မဉ်ႏအောဝ်ႏပဲင်ꩻဆငါ၊ မဉ်ႏတလာသေႏသေႏနောဝ်ꩻ - တိုꩻတက်ဗာႏ သာႏယာႏဗာႏ ချမ်ꩻသာႏဗာႏနောဝ်ꩻသွူ။ "ဝွန်ႏခံႏချက်"ဘုရာꩻဟော်ꩻ ဧကနိပါတ် ကုလာဝကဇာတ်တောႏယို ခြပ်သော့ꩻထဲင်းအပင် ဆင်သော့ꩻထဲင်းအလာႏ ဖတ်ဗာႏယံစွယ်ꩻဆုဲင်ꩻတဲင် တဲမ်းထွို့ꩻနေးတော "ဘုရာꩻလိတ်ကောဝ်ႏလုဲင်ꩻ"နုဲင်းယိုသွူ။[၁][၂][၃]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ပအိုဝ်ႏလိတ်လုဲင်ꩻစွစ်ꩻလီတာႏအစွိုꩻ
  2. ပအိုဝ်ႏလိတ်မွူးစောင်ႏ
  3. ၁၃၅၅-ဗာႏ၊ တောႏလင်ꩻဆန်ꩻ(၃)နီꩻ