လူႏသီႏလသားအကျိုꩻတန်
"ဝစ္ဆဂေါတ္တသုတ် (လူႏသီႏလသား၊ လူႏအရိယာႏ၊ လူႏရဟန္တာႏနဝ်ꩻ အကျိုꩻတန်)"
ဝစ္ဆခွိုꩻနွယ်ႏကထွာဒါႏ ပရိဗိုဇ်တဖြာꩻနဝ်ꩻ ဖျော်လွဉ်နီဗွေႏဘုရာꩻထျꩻ၊ လောဝ်းနီဗွေႏဘုရာꩻနုဲင်းယို- "ဩဗွေႏဂေါတမ- ခွေသွဉ်းဟွုန်ဝင်ꩻရိုꩻ နီဗွေႏနုဲင်းယို- 'ရဟန်ꩻဂေါတမနောဝ်ꩻ ထွဉ်ႏလူႏဒျာႏဝွေꩻလွုမ်ꩻ၊ လိုꩻလင်နဝ်ꩻ ဖေႏလူႏတောဝ်း၊ ထွဉ်ႏလူႏဒျာႏ ဝွေꩻတပဲ့ꩻလွုမ်ꩻ၊ လိုꩻလင်နဝ်ꩻ ဝွေꩻဖေႏလူႏတဝ်း၊ လူႏခွေမꩻ အကျိုꩻတန်၊ လူႏလိုꩻလင်နဝ်ꩻ အကျိုꩻတန်တဝ်း၊ လူႏဝွေꩻတပဲ့ꩻမꩻ အကျိုꩻတန်၊ လူႏလိုꩻလင်နဝ်ꩻ အကျိုꩻတန်တဝ်း'တဲ့၊ ဝင်ꩻရိုꩻနုဲင်းနဝ်ꩻ မွေးနေဟောင်းဗွေႏ" "မွေးတဝ်း၊ ဝစ္ဆ- ငေါဝ်းနဝ်ꩻနဝ်ꩻ စွော်စွော်စွတ်စွယ်ꩻခွေဒျာႏ၊ ပေါႏရဲဝင်ꩻထာꩻလူႏနဝ်ꩻ ထွာအန္တရာယ်ႏသွံမျိုꩻ၊ အန္တရာယ်ႏသွံမျိုꩻကရိုꩻနဝ်ꩻ- ၁။ ထွာကောလူႏသား ကုသိုလ်ႏအန္တရာယ်ႏ ၂။ ထွာအလူႏခံႏသား လာဘ်အန္တရာယ်ႏ ၃။ ကရဲသားနဝ်ꩻ ထွာနမ်းအန္တရာယ်ႏ"၊ ပေါႏရဲဝင်ꩻထာꩻလူႏနဝ်ꩻ ထွာအန္တရာယ်ႏသိုမ်မျိုꩻ နုဲင်းနဝ်ꩻသွူ။ "ဝစ္ဆဟွေး- ပသေဖွိုင်ꩻ ထီတကုဲင်တဲ့နဝ်ꩻ၊ ပသေဝန်ႏ ထီတကုဲင်တဲ့နောဝ်ꩻ 'ထာꩻသားခြောင်ကို၊ ထာꩻသားနောင်ကို ဖေႏကအံႏဗာႏ ဒဲဉ်စျꩻဟန်ႏစျꩻ'အွဉ်ႏသꩻနုဲင်းနဝ်ꩻတဲင် မဉ်ႏထောက်ꩻသော့ꩻနဝ်ꩻ 'ထွာကုသိုလ်ႏ'ခွေဟော်ꩻတွိုႏပဉ်တကားနဝ်ꩻ၊ လူႏလိုꩻလင်ထဲင်းဟ ဒေါ့ꩻခရာႏ အမျိုꩻအဝ်ႏနဲ့၊ 'လူႏလိုꩻလင်နဝ်ꩻ အကျိုꩻတန်တောဝ်း'ငေါဝ်းနုဲင်းနဝ်ꩻနဝ်ꩻ ခွေအမျိုꩻရိုꩻနဲ့။ "ဝစ္ဆဟွေး- 'လူႏသီႏလသားနဝ်ꩻ အကျိုꩻတန်၊ လူႏလိုꩻသီႏလ တအဲဉ်ထဝ်းနဝ်ꩻ အကျိုꩻတန်တဝ်း'ခွေဟော်ꩻနုဲင်းနဝ်ꩻဒျာႏ၊ လိုꩻပေါႏပယ်ႏထိုꩻ 'လောဘ၊ ဒေါသ၊ ထိန၊ မိဒ္ဓ၊ ဥဒ္ဓစ္စ၊ ကုက္ကုစ္စ၊ ဝိစိကိစ္ဆာ၊ ထာꩻမဉ်လꩻ၊ ထာꩻသꩻလျား၊ သꩻထွူႏဆွို့၊ တခေင်ꩻထာꩻ၊ သꩻလော်လယ်၊ သꩻကော့ꩻမာႏ၊ သꩻယူႏမာႏ'လိုꩻပေါႏပယ်ႏနွောင်ꩻ ကိလေႏသာႏနဝ်ꩻဖုံႏနဝ်ꩻ ထွာအရိယာႏ၊ 'လူႏအရိယာႏပုဂ္ဂိုလ်ႏနဝ်ꩻ အကျိုꩻတန်၊ လူႏရဟန္တာႏနဝ်ꩻ အကျိုꩻတန်'ခွေဟော်ꩻနုဲင်းနောဝ်ꩻဒျာႏ။ "ဝစ္ဆဟွေး- ဖိုးဖြေင်း၊ ဖိုးဗွါ၊ ဖိုးတနျာႏ၊ ဖိုးတလုဲင်ꩻ၊ ဖိုးနုဲင်းမုဲင်ꩻမုဲင်ꩻတဲ့ယဝ်း 'အွဉ်ငါဒါႏ၊ အငဲး၊ အာႏတလာ၊ သꩻဟောဝ်' အရေꩻတန်ဒျာႏ အချက်နဝ်ꩻဖုံႏလူမ်ꩻ၊ ဖိုးအဆွဉ်ႏဖုံႏနဝ်ꩻ အရေꩻတတန်တောဝ်း၊ ဥပမာႏနုဲင်းနဝ်ꩻနေနေ- ခွန်၊ ပုဏ္ဏာꩻ၊ ဆင်ꩻရယ်ꩻသား၊ ကွုန်ႏသယ်ႏသား၊ ထာꩻကွီအံႏသား၊ အဖြာꩻမုဲင်ꩻတဲ့ယဝ်း 'ယေန်ႏကေႏ၊ အကျင်ꩻဟောဝ်၊ တရာꩻသား၊ သီႏလအဝ်ႏ၊ လဲဉ်ဒါႏတဝ်းထာꩻ၊ မာꩻတဝ်းအကုသိုလ်ႏ၊ ထွာအရိယာႏ၊ ထွာရဟန္တာႏ'အရေꩻတန်ဒျာႏ အချက်နဝ်ꩻဖုံႏလူမ်ꩻ၊ လိုꩻအမျိုꩻယို၊ လိုꩻအမျိုꩻနဝ်ꩻနဝ်ꩻ အရေꩻတန်တဝ်း၊ 'ဆယ်ꩻကပ်လိုꩻဟောဝ်၊ လူႏလိုꩻဟောဝ်ဖုံႏနဝ်ꩻဟုဲင်း အကျိုꩻတန်၊ လꩻလိုꩻချမ်ꩻသာႏ၊ လꩻလူꩻချမ်ꩻသာႏ၊ လꩻနိဗ္ဗာန်ႏချမ်ꩻသာႏ'နောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ တိကနိပါတ်၊ ဝစ္ဆဂေါတ္တသုတ်)[၁][၂]