လွိုက်ရွေꩻအိုပ်ချုက်ရေꩻ

အဝ်ႏ ဝီခီပီးဒီးယား ကို

"လွိုက်ရွေꩻအိုပ်ချုက်ရေꩻအွဉ်ငါကို အီႏပါဝင်ႏလွိုက်ရွေꩻနုဲင်းမုဲင်ꩻစား၊ အီႏလွိုက်ရွေꩻဗာႏ လိုꩻအထီအသွီႏအဝ်ႏနုဲင်းမုဲင်ꩻစား" အစိုႏရတသာစူကို ၂၀၁၇-ဗာႏ၊ ဒီဇင်ဘာလာယို အီႏလွိုက်ဒင်ႏတသာလွေꩻယင်း မြန်မာခမ်းထီတဖြုံႏလုမ်းကို ကအဝ်ႏဒါႏ ရပ်ကွက်၊ ရပ်ရာႏအုပ်စုအိုပ်ချုက်ရေꩻ(မှူး)အွဉ်ငါ ကရိုꩻနဝ်ꩻ အစိုႏရထေထန်ႏချက်အလꩻ သေထွꩻဗာႏနဝ်ꩻသွူ။ နဝ်ꩻမꩻ မြန်မာခမ်းထီကိုယို အခေႏခံႏသွတ်ꩻ အိုပ်ချုက်ရေꩻ၊ တောမ်ႏခမ်းသားသီးအခါႏကို ပွိုင်းဝွို့ခွိုင်းဝွို့သွတ်ꩻ အိုပ်ချုက်ရေꩻမိဉ်းရိုꩻသွူနဝ်ꩻ ထွာရပ်ကွက်အိုပ်ချုက်ရေꩻ၊ ရပ်ရာႏအုပ်စုအိုပ်ချုက်ရေꩻယိုနဝ်ꩻသွူ။ မိဉ်းအီႏလွိုက်ဒင်ႏသွူ ရပ်ကွက်၊ ရပ်ရာႏအိုပ်ချုက်ရေꩻအွဉ်ငါနဝ်ꩻ ရီးသွတ်ꩻဝေင်ꩻနယ်ႏအိုပ်ချုက်ရေꩻအွဉ်ငါ(မြို့နယ်အုပ်ချုပ်ရေးမှူး)ယို အီႏလွိုက်ရွေꩻ ရပ်ကွက်၊ ရပ်ရာႏအိုပ်ချုက်ရေꩻအွဉ်ငါကို ထိန်ꩻကျပ်နွောင်ꩻအီအတာႏ လိုꩻရပ်ကွက်၊ ရပ်ရာႏကိုသား ကလွိုက်ရွေꩻဒါႏ အီႏခုမ်မာꩻဖေႏတာႏဝွန်ႏနဝ်ꩻတာႏ သꩻဆန္ဒကအဝ်ႏဒါႏ ရပ်မွိုးရပ်ဖါ ငတ်ꩻဖြာꩻယို အွဉ်ႏထွာထိန်ꩻကျပ်ရေꩻအစွိုꩻတဲင် ထွို့ꩻဗူႏဖေႏအပ်လွေꩻဗာႏ တာႏဝွန်ႏနဝ်ꩻသွူ။ နဝ်ꩻမိဉ်းထွူ ရပ်ကွက်၊ ရပ်ရာႏကို ကလꩻထန်ႏလွဉ်ဒါႏ ထိန်ꩻကျပ်သားငတ်ꩻဖြာꩻယိုနဝ်ꩻ လင်ꩻထိန်ꩻကျပ်ထွားမာꩻဖေႏချာ တယ်ႏလမ်းငင်းတဗာႏစီႏ လမ်းနားဟွိုန်ꩻစု၊ အဝ်ႏလမ်းနားဟွိုန်ꩻ အဆီဗာႏစုကိုယိုတဲင် တောမ်ႏအမျာꩻဆန္ဒတွော့ꩻ လွိုက်ထန်ႏလမ်းဆီဗာႏစုအွဉ်ငါ (ဆယ်အိမ်မှူး)၊ အဝ်ႏလမ်းဆီဗာႏစု အွဉ်ငါဖိုင်ႏယိုကိုတဲင် တောမ်ႏအမျာꩻဆန္ဒ လွိုက်ထန်ႏယင်း လမ်းရျာꩻဗာႏစုအွဉ်ငါ (ရာအိမ်မှူး)၊ အဝ်ႏလမ်းရျာꩻဗာႏစုကိုတရန်းတဲ့နဝ်ꩻ၊ လိုꩻအထီအသွီႏကဗွေဒါႏ တောမ်ႏအိုပ်ချုက်ရေꩻအွဉ်ငါ (အိုပ်ချုပ်ရေးမှူး)အထီအသွီႏသားဖိုင်ႏ မိဉ်ႏနွို့လွိုက်ရွေꩻခံႏတဲ့နဝ်ꩻ တောမ်ႏအမျာꩻဆန္ဒတဲင် လွိုက်ရွေꩻထန်ႏဗာႏ ရပ်ကွက်အိုပ်ချုက်ရေꩻအွဉ်ငါ (ရပ်ကွက်အုပ်ချုပ်ရေးမှူး)၊ ရပ်ရာႏအိုပ်ချုက်အွဉ်ငါ (ကျေးရွာအုပ်စုအုပ်ချုပ်ရေးမှူး)နဝ်ꩻသွူ။ ရပ်ကျေးဥပဒေႏ အခန်ꩻ(၃)၊ ပုဒ်မွူး (၅)အလꩻ ရပ်ကွက်(မွေးတဝ်းလဲ့) ရပ်ရာႏအိုပ်ချုက်ရေꩻအွဉ်ငါ ရပ်ဒုံတာႏဝွန်ႏခံႏ၊ လမ်းအရျာꩻဗာႏအွဉ်ငါ၊ လမ်းအဆီဗာႏအွဉ်ငါသီးဖိုင်ႏယို (က) ထွာဗာႏလိုꩻခမ်းသားမွိုးဖါနီဖြာꩻ လွူးဖွါꩻလင်ꩻ လိုꩻခမ်းသား၊ (ခ) ထွာဗာႏလိုꩻ အသက်ဗွေထွူ (၂၅)နေင်ႏ၊ (ဂ) ထွာဗာႏလိုꩻအုံအဝ်ႏလွဉ်ရပ်ကွက်(မွေးတဝ်းလဲ့) ရပ်ရာႏနဝ်ꩻကို တသွုပ်ချင်ႏအဆေ့ꩻသွတ်ꩻ(၅)နေင်ႏထွူ မိဉ်းထေင်းထံႏ တာႏဝွန်ႏခိန်ႏလဲ့ ထွာဗာႏလိုꩻအုံအဝ်ႏသော့ꩻဗာႏမွေးရပ်ကွက်(တဝ်းလဲ့) ရပ်ရာႏနဝ်ꩻကို၊ ချို့ꩻယွင်ꩻချက်အနေႏ မိဉ်းထွာလိုꩻဝွန်ႏထမ်ꩻ အံႏအငိမ်ꩻကရိုꩻလဲ့ ရပ်ကွက်(တဝ်းလဲ့)ရပ်ရာႏနဝ်ꩻကို အုံအဝ်ႏသော့ꩻလွဉ်တသွုပ်ချင်ႏ(၂)နေင်ႏနဝ်ꩻ ယူႏသော့ꩻနွောင်ꩻဒျာႏသွူ။ (ဃ) ထွာဗာႏလိုꩻရပ်ရာႏကို ကေႏညိုႏအံႏသွင်ꩻ၊ သိက္ခာႏသမာႏဓိ ကအဝ်ႏဒါႏလိုꩻ၊ (င) ကဖေႏအပ်ဒါႏတာႏဝွန်ႏယို ထေင်းထမ်ႏနွောင်ꩻ စွန်ꩻကအဝ်ႏဒါႏလိုꩻ၊ (စ) နဲင်ႏငံႏတောႏ တောမ်ႏရပ်ရာႏဒေႏသအကျိုꩻယို တောမ်ႏစေႏတနာႏသန်သန်တဲင် ထေင်းထမ်ႏတာႏဝွန်ႏသꩻဆန္ဒကအဝ်ႏဒါႏလိုꩻ၊ (ဆ) ကအုံအဝ်ႏညီꩻအလမ်း နားဟွိုန်ꩻသားဖိုင်ႏယိုလဲ့ အကျင်ꩻစာရိတ္တဟဝ်မဲဉ်ႏထွူ ရိုꩻသာꩻစွို့ꩻစွဉ်ႏဒါႏလိုꩻဖိုင်ႏ။ (ဇ) ထေင်းထမ်ႏတာႏဝွန်ႏတွင်ꩻ ထွာဗာႏတဝ်း အစိုႏရဝွန်ႏထမ်ꩻသား၊ (ဈ)ထွာဗာႏတဝ်း ခုမ်(စူ)ခြွိုင်းသားအစွိုꩻ၊ သွုပ်ဆွိုက်တရာꩻတဝင်ႏတဝ်းအစွိုꩻဖိုင်ႏ၊ အစွိုꩻနွို့ဖိုင်ႏစတဲင် အဝ်ႏဗွေဗာႏ အထီအသွီႏယိုဖိုင်ႏနဝ်ꩻသွူ။ တောမ်ႏအမျာꩻဆန္ဒတဲင် ကလွိုက်ရွေꩻခံႏဗာႏဒါႏ ရပ်ကွက်၊ ရပ်ရာႏအိုပ်ချုပ်ရေꩻအွဉ်ငါမိဉ်ꩻ၊ ရပ်ဒုံတာႏဝွန်ႏခံႏမိဉ်ꩻ၊ လမ်းအရျာꩻဗာႏအွဉ်ငါမိဉ်ꩻ၊ လမ်းအဆီဗာႏအွဉ်ငါမိဉ်ꩻဖိုင်ႏတောမ်ႏ ဝွေꩻသီးနမ်းခြောင်ꩻအအဲဉ်ႏဖိုင်ႏယို ကထွာထိန်ꩻကျပ်သားစွိုꩻနဝ်ꩻ ထူႏပသာထေ့ဗာႏ ဝေင်ꩻနယ်ႏအိုပ်ချုက်ရေꩻအွဉ်ငါထျꩻနဝ်ꩻသွူ။ အဝ်ႏနဝ်ꩻတဲင် ဝေင်ꩻနယ်ႏအိုပ်ချုက်ရေꩻအွဉ်ငါနဝ်ꩻ ကဒင်ႏလွဉ်နယ်ဒါႏ မိဉ်ꩻစာႏရင်ꩻဖိုင်ႏယို စဲစ်ထွားထွူ မိဉ်ႏဗွေစုမ်ႏဒျာႏတောမ်ႏ ပုဒ်မွူး ၅-ကပါ အထီအသွီႏဖိုင်ႏကရိုꩻလဲ့ ဒင်ႏဖေႏဗာႏ ရပ်ကွက်၊ ရပ်ရာႏအုပ်စုအိုပ်ချုက်ရေꩻအွဉ်ငါ (ရပ်/ကျေးရွာအုပ်ချုပ်ရေးမှူး)နဝ်ꩻသွူ၊ အွဉ်ႏထွာ ရပ်ဒုံတာႏဝွန်ႏခံႏ၊ လမ်းအရျာꩻဗာႏအွဉ်ငါ၊ လမ်းအဆီဗာႏအွဉ်ငါဖိုင်ႏတဲင် ဖေႏတာႏဝွန်ႏလွေꩻဗာႏနဝ်ꩻသွူ၊ ယိုနဝ်ꩻ ပွိုင်းဝွို့စွဉ်ႏ ကအီႏမာꩻဒါႏ လွိုက်ရွေꩻရပ်ကွက်၊ ကျေးရွာအိုပ်ချုပ်ရေꩻနဝ်ꩻသွူ။ ဒီမိုကရေသီနယ်ꩻအလꩻ မိဉ်းလက်ခံႏဒျာႏမွေး စွိုꩻစွဉ်ႏအမဲဉ်ႏတရာꩻနဝ်ꩻ အဝ်ႏလွိုက်ရွေꩻပွယ်ꩻကို ကလꩻထန်ႏလွဉ်ဒါႏအဖြေႏယို နွောင်ꩻတဲ့နဝ်ꩻ၊ သုမ်ꩻတဲ့နဝ်ꩻ လက်ခံႏဒျာႏကေႏကေႏနပ်နပ်တဲင် ရပ်ကွက်၊ ရပ်ရာႏဟဝ်အကျိုꩻတာႏ ကအီႏဆောင်ႏရွက်ခုမ်မာꩻဒါႏ၊ ကလꩻလွေꩻအနွောင်ꩻသားယိုအလောင်း သꩻရေꩻကူဒျာႏ၊ ဖေႏအာႏကူဒျာႏ၊ စွဲးကမ်းစွဲးပင်ႏကူဒျာႏနဝ်ꩻမꩻ ထွာသꩻဓာတ်ဟဝ် လိုꩻမုအသောင်အရင်ꩻ၊ ထွာသꩻဓာတ် အဆင်ႏအရန်းအဝ်ႏ လိုꩻခမ်းတန်သားတဖြာꩻပီပီနဝ်ꩻသွူ။ မြန်မာခမ်းထီ အိုပ်ချုက်ရေꩻယန္တရား အရန်းရန်းအကို အခင်ႏထျꩻ အခေႏခံႏအိုပ်ချုက်ရေꩻနဝ်ꩻ လမ်းအဆီဗာႏစုတာႏ လမ်းအဆီဗာႏအွဉ်ငါ၊ လမ်းအရျာꩻဗာႏစုတာႏ လမ်းအရျာꩻဗာႏအွဉ်ငါ၊ ရပ်ဒုံတာႏ ရပ်ဒုံတာႏဝွန်ႏခံႏ၊ ရပ်ကွက်၊ ကျေးရွာအုပ်စုတာႏရပ်ကွက်၊ ကျေးရွာအုပ်စုအိုပ်ချုပ်ရေꩻအွဉ်ငါ အဝ်ႏလွေꩻနုဲင်းနဝ်ꩻထွူ ထင်ႏယင်းဝေင်ꩻနယ်ႏ အိုပ်ချုက်ရေꩻအွဉ်ငါ၊ ထင်ႏယင်း ခရဲင်ႏအိုပ်ချုက်ရေꩻအွဉ်ငါ၊ ထင်ႏယင်းခမ်းနယ်ႏတောမ်ႏ တွိုင်ႏဒေႏသအဒဝ်ႏဒဝ်ႏအိုပ်ချုက်ရေꩻအွဉ်ငါအတန်အကဲꩻ၊ အဝ်ႏနဝ်ꩻတွိုႏထင်ႏယင်း ခမ်းကိုရေꩻဝွန်ႏတန်ဌာႏန (ပြည်ထဲရေးဝန်ကြီးဌာန)နဝ်ꩻသွူ။ မြန်မာခမ်းထီ ခမ်းကိုရေꩻဝွန်ႏတန်ဌာႏန၊ ခမ်းကိုရေꩻဝွန်ႏတန်ယို ထွာဒျာႏ မြန်မာခမ်း စဲ့ꩻတပ်မတောႏ စဲ့ꩻကတူႏအွဉ်ငါချုပ် ဒင်ႏသွင်ꩻမိဉ်ꩻစာႏရင်ꩻ၊ ဒင်ႏသွင်ꩻလိုꩻနဝ်ꩻသွူ၊ မြန်မာခမ်းထီဝွန်ႏတန်ဌာႏန(၂၄)ဗာႏအကို ပြည်ထဲရေးဝွန်ႏတန်ဌာႏန၊ ကာကွယ်ရေးဝွန်ႏတန်ဌာႏန၊ နယ်စပ်ရေးရာဝွန်ႏတန်ဌာႏန ယိုသိုမ်ဗာႏဝွန်ႏတန်ဖိုင်ႏနဝ်ꩻ ထွာဒျာႏ စဲ့ꩻကတူႏအွဉ်ငါဒင်ႏသွင်ꩻ ဝွန်ႏတန်ဖိုင်ႏနဝ်ꩻသွူ။[၁][၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ခြွူႏမွဉ်းသားစွိုꩻ
  2. ခမ်းသားငဝ်း အမုဲင်(၅)၊ အစဲဉ်ႏ(၄၇)