ဝါႏဒအမျိုꩻမျိုꩻ
"အပဏ္ဏကသုတ် (ဝါႏဒအမျိုꩻမျိုꩻ)" အွိုးခꩻတလဲင်ႏ- နီဗွေႏဘုရာꩻတွမ်ႏတပဲ့ꩻသံဃာႏနဝ်ꩻ ကျွꩻလွေꩻကောသလခမ်း၊ တွိုႏလွေꩻ ပုဏ္ဏာꩻသီးဒုံ (သာလာ)နဝ်ꩻသွူ၊ ဟွူန်ဗွေႏဘုရာꩻဖျော်တဲင် ခိုခိုမူႏမူႏ လွဉ်ဝုဲင်ႏလွဗွေႏဘုရာꩻ၊ လွဉ်ရိုႏသေႏလွ ဗွေႏသံဃာႏနောဝ်ꩻသွူ။ နီဗွေႏဘုရာꩻရီ ဒုံသားနုဲင်းယို- "သီကမဲဉ်ႏသွူန်ႏမဲဉ်ႏသꩻ သီကအာႏကွိုꩻလꩻလꩻ ဆရာႏဟောဝ်ဟောဝ်နဝ်ꩻ အဝ်ႏလဲဉ်းနဲ့" "အဲဉ်ထဝ်းဒွိုန်းဗွေႏအော်" "အွို- ပေါႏနဝ်ꩻတဲ့ ခွေဟော်ꩻဖေႏသီတရာꩻ 'သွုမ်ꩻခင်ꩻအဲဉ်ထဝ်း-အကျိုꩻအဝ်ႏဒျာႏ'တရာꩻယာႏယို နာႏလွသွော့နော" "သꩻရေꩻငါႏဗွေႏ၊ နာႏလွဒျာႏ ဗွေႏအော်" ဝွေꩻသီးဒုံ(သာလာ)နဝ်ꩻ ဒုံတန်၊ ခင်ႏလမ်းရော့ꩻ၊ လွေꩻသဲင်ꩻဗော့ꩻတဲင် သမဏဗြာဟ္မဏ(ရဟန်ꩻပုဏ္ဏာꩻ)ဖုံႏ တစွိုꩻထွူတစွိုꩻ အဝ်ႏဖျော်ခွိုꩻခွိုꩻ၊ တစွိုꩻလွဉ် ဟော်ꩻတရာꩻတမျိုꩻ၊ တစွိုꩻလွဉ် ဟော်ꩻဖျင်တမျိုꩻ၊ တစွိုꩻတွမ်ႏတစွိုꩻ ဝါႏဒဗွန်ပီတဝ်းလို့ဝင်ꩻ။ ၁။ ပွိုင်းဝွို့တွမ်ႏ ထာꩻလူႏကိစ္စ- ယင်ဟန်ႏသားနဝ်ꩻရိုꩻ- 'နတ္ထိ ဒိန္နံ - လူႏထာꩻအကျိုꩻအဲဉ်ထဝ်း-တဲ့' ယင်ဟန်ႏသားနဝ်ꩻရိုꩻ- 'အတ္ထိ ဒိန္နံ- လူႏထာꩻအကျိုꩻအဝ်ႏ-တဲ့' ဝါႏဒနဝ်ꩻနီမျိုꩻအကို- လိုꩻကယွုမ်းဒျာႏ 'လူႏထာꩻအကျိုꩻအဲဉ်ထဝ်း'နဝ်ꩻ လူႏတဝ်းထာꩻ၊ မာꩻတဝ်းဒါႏနကုသိုလ်ႏ၊ လိုꩻကယွုမ်း 'လူႏထာꩻအကျိုꩻအဝ်ႏ'နဝ်ꩻ လူႏထာꩻ၊ မာꩻဒါႏနကုသိုလ်ႏ။ လိုꩻကလူႏထာꩻနဝ်ꩻ ဒါႏနအကျိုꩻဖေႏ ခြွေခြာႏချမ်ꩻသာႏ၊ တလူႏတဝ်းထာꩻသားနဝ်ꩻ ဒါႏနအကျိုꩻဖေႏခရာႏအဲဉ်ထဝ်းတဲင် ကေန်ꩻခြောဒုက္ခ၊ ကွပ်နဝ်ꩻမꩻ လူႏထာꩻနဝ်ꩻ 'သွုမ်ꩻခင်ꩻအဲဉ်ထဝ်း-အကျိုꩻအဝ်ႏဒျာႏ'နဝ်ꩻသွူ။ ၂။ ပွိုင်းဝွို့တွမ်ႏပူဇောႏလူꩻ-တင်ႏလူꩻကိစ္စ ယင်ဟန်ႏသားနဝ်ꩻရိုꩻ- 'ပူႏဇောႏလူꩻ-တင်ႏလူꩻနဝ်ꩻ အကျိုꩻအဲဉ်ထဝ်း-တဲ့' ယင်ဟန်ႏသးနဝ်ꩻရိုꩻ- 'ပူဇောႏလူꩻ-တင်ႏလူꩻနဝ်ꩻ အကျိုꩻအဝ်ႏ-တဲ့' ဝါႏဒနဝ်ꩻနီမျိုꩻအကို- 'ပူဇောႏလူꩻ-တင်ႏလူꩻနဝ်ꩻ အကျိုꩻအဲဉ်ထဝ်း'ကယွုမ်းနုဲင်းနဝ်ꩻသားဖုံႏနဝ်ꩻ ပူႏဇောႏတဝ်းလူꩻ-တင်ႏတဝ်းလူꩻ၊ လိုꩻစားနဝ်ꩻနဝ်ꩻ မုဲင်ꩻခါတဲ့ယဝ်း လူꩻသီးဖုံႏ တစွဲကိုတဝ်း၊ ဘေꩻအန္တရာယ်ႏတဲ့ လူꩻဟောဝ်လူꩻဒါႏသီးဖုံႏ တရဲခါꩻဖေႏတဝ်း၊ လူꩻဟောဝ်လူꩻဒါႏသီး တမꩻစꩻဖိုဖိုတောဝ်းနောဝ်ꩻသွူ။ 'ပူႏဇောႏလူꩻ-တင်ႏလူꩻနဝ်ꩻ အကျိုꩻအဝ်ႏ'ကယွုမ်းနုဲင်းနဝ်ꩻသားနဝ်ꩻ ပူႏဇောႏလူꩻ-တင်ႏလူꩻ၊ ပေါႏမာꩻကုသိုလ်ႏတဲ့ ဖန်းဝွေႏဖေႏပါ လူꩻသီးဖုံႏတဲင် လူꩻသီးသꩻရေꩻနစ်သက်တွော့ꩻ လိုꩻကပူႏဇောႏလူꩻသား-ကတင်ႏလူꩻသား ကဖန်းဖေႏပါ လူꩻသီးကုသိုလ်ႏသားဖုံႏနဝ်ꩻ လူꩻသီးစွဲကမ်းကို၊ ရဲခါꩻဖေႏအန္တရာယ်ႏ၊ လူꩻသီးကိုမ်းခင်-မꩻစꩻနောဝ်ꩻသွူ။ ကွပ်နဝ်ꩻမꩻ ပူႏဇောႏလူꩻ-တင်ႏလူꩻ၊ ဖန်းဖေႏပါလူꩻသီးကုသိုလ်ႏနဝ်ꩻ 'သွုမ်ꩻခင်ꩻအဲဉ်ထဝ်း-အကျိုꩻအောဝ်ႏဒျာႏ'နောဝ်ꩻသွူ။ ၃။ကုသိုလ်ႏ-အကုသိုလ်ႏကိစ္စ ယင်ဟန်ႏသားနဝ်ꩻရိုꩻ- 'ကုသိုလ်ႏအဲဉ်ထဝ်း၊ အကုသိုလ်ႏအဲဉ်ထဝ်း၊ (ကွပ်နဝ်ꩻမꩻ) ကုသိုလ်ႏအကျိုꩻအဲဉ်ထဝ်း၊ အကုသိုလ်ႏအကျိုꩻ အဲဉ်ထဝ်း-တဲ့'၊ ယင်ဟန်ႏသားနဝ်ꩻရိုꩻ- 'ကုသိုလ်ႏအဝ်ႏ၊ အကုသိုလ်ႏအဝ်ႏ (ကွပ်နဝ်ꩻမꩻ) ကုသိုလ်ႏအကျိုꩻအောဝ်ႏ၊ အကုသိုလ်ႏအကျိုꩻအဝ်ႏ-တဲ့။ ဝါႏဒနဝ်ꩻနီမျိုꩻအကို- လိုꩻကယွုမ်းဒါႏ 'ကုသိုလ်ႏအဲဉ်ထဝ်း-အကုသိုလ်ႏအဲဉ်ထဝ်း၊ (ကွပ်နဝ်ꩻမꩻ) ကုသိုလ်ႏအကျိုꩻအဲဉ်ထဝ်း၊ အကုသိုလ်ႏအကျိုꩻအဲဉ်ထဝ်း'နဝ်ꩻ (ငမ်းဒွုမ်ထမုဲင်ꩻမုဲင်ꩻ) လွိုက်တဝ်းဒွုမ် ထာꩻမာꩻဟောဝ်-ထာꩻမာꩻကုဲင်၊ အဟောဝ်အကုဲင်လွိုက်ဒွုမ် မဉ်မာꩻထမုဲင်ꩻမာꩻ၊ ကားကထွာမာꩻတိတ်ꩻတိက်ꩻတဲင်'ထွာ-ကာယဒုစရဲက်၊ ထွာ-ကာယကံႏအကုသိုလ်ႏ'အာတန်။ ထာꩻဒေါ့ꩻဖဲ့ꩻတဲ့ ချင်းဒေါ့ꩻဒွုမ်၊ အဟောဝ်အကုဲင်ရိုꩻဒူမ်၊ ဒေါ့ꩻတငါတငီ၊ ကားကွို့ꩻကထန်ႏဖြောင်း၊ ကားကွို့ꩻကလောင်းဖြေꩻ၊ ဒေါ့ꩻလွေꩻတငါတငီတိတ်ꩻတိက်ꩻတွော့ꩻ 'ထွာ-ဝစီဒုစရဲက်၊ ထွာ-ဝစီꩻကံႏအကုသိုလ်ႏ'အာတန်။ ထာꩻယူႏဖဲ့ꩻတဲ့ အဟောဝ်အကုဲင် (ကုသိုလ်ႏ-အကုသိုလ်ႏ) ယူႏယာႏဒူမ်၊ မဉ်ယူႏထမုဲင်ꩻယူႏ၊ ကမ်းသꩻယူႏတိတ်ꩻတိက်ꩻတဲင်တွော့ꩻ 'ထွာ-မနော်ꩻဒုစရဲက်၊ ထွာ-မနော်ꩻကံႏအကုသိုလ်ႏ'အာတန်။ ကွပ်နဝ်ꩻမꩻ 'ကာယဒုစရဲက်-ကာယကံႏအကုသိုလ်ႏ၊ အကျိုꩻကထွိုင်ႏဖေႏ'နဝ်ꩻ မာꩻထမုဲင်ꩻမုဲင်ꩻတဲ့ အဆင်ႏပြေႏတဝ်း၊ ထွာထာꩻမာꩻမာႏ၊ ကွပ်ထာꩻမာꩻမာႏနဝ်ꩻတဲင် မော့ꩻဗာႏနမ်းထာꩻဒုက္ခနောဝ်ꩻသွူ။ 'ဝိစီꩻဒုစရဲက်-ဝစီꩻကံႏအကုသိုလ်ႏ အကျိုꩻကထင်ႏဖေႏ'နဝ်ꩻ ဒေါ့ꩻထမုဲင်ꩻမုဲင်ꩻတဲ့ အဆင်ႏပြေႏတဝ်း၊ ထွာထာꩻဒေါ့ꩻမာႏ၊ ကွပ်ထာꩻဒေါ့ꩻမာႏနဝ်ꩻတွော့ꩻ မော့ꩻလွဉ်ꩻဗာႏ ထာꩻဒုက္ခနောဝ်ꩻသွူ။ 'မနော်ꩻဒုစရဲက်-မနော်ꩻကံႏအကုသိုလ်ႏ အကျိုꩻကတိန်ႏဖေႏ'နဝ်ꩻ ကျံႏထမုဲင်ꩻမုဲင်ꩻတဲ့ အဆင်ႏပြေႏတဝ်း၊ ထွာထာꩻကျံႏမာႏ၊ ကွပ်ထာꩻကျံႏမာႏနဝ်ꩻတဲင်တွော့ꩻ မော့ꩻလွဉ်ꩻဗာႏထာꩻဒုက္ခ-စတဲင်နုဲင်းနောဝ်ꩻသွူ။ လိုꩻကယွုမ်းဒါႏ 'ကုသိုလ်ႏအဝ်ႏ၊ အကုသိုလ်ႏအဝ်ႏ၊ (ကွပ်နဝ်ꩻမꩻ) ကုသိုလ်ႏအကျိုꩻအဝ်ႏ၊ အကုသိုလ်ႏအကျိုꩻအဝ်ႏ'နဝ်ꩻ (ငမ်းထွာအမာႏ၊ ငမ်းထွာအကုသိုလ်ႏတဲင်) ထာꩻမာꩻတဲ့ မာꩻတငါတငီတဝ်း၊ ယိုနောဝ်ꩻ ထာꩻမာꩻဟောဝ်၊ ကုသိုလ်ႏထာꩻမာꩻ၊ ထွားလွိုက်မာꩻနုဲင်းနဝ်ꩻတဲင် 'ထွာ-ကာယသုစရဲက်၊ ထွာ-ကာယကံႏကုသိုလ်ႏ'အာတန်။ ထာꩻဒေါ့ꩻဖဲ့ꩻတဲ့ လွိုက်အဟောဝ်-အကုဲင်ချင်းဒေါ့ꩻ၊ ဒေါ့ꩻတငါတငီတဝ်းတွော့ꩻ 'ထွာ-ဝစီသုစရဲက်၊ ထွာ-ဝစီꩻကံႏကုသိုလ်ႏ'အာတန်။ ထာꩻယူႏဖဲ့ꩻတဲ့ ယူႏအဟောဝ်-အကုဲင် (ယူႏကုသိုလ်ႏ-အကုသိုလ်ႏ) ကမ်းသꩻယူႏတဝ်း၊ ကျံႏယူႏဒျာႏ အဟောဝ်ဖဲ့ꩻ (ကုသိုလ်ႏဖဲ့ꩻလူမ်ꩻ)တဲင်တွော့ꩻ 'ထွာ-မနော်ꩻသုစရဲက်၊ ထွာ-မနော်ꩻကံႏကုသိုလ်ႏ'အာတန်။ ကွပ်နဝ်ꩻမꩻ 'ကာယသုစရဲက်-ကာယကံႏကုသိုလ်ႏ၊ အကျိုꩻကထွိုင်ႏဖေႏ'နဝ်ꩻ မာꩻထမုဲင်ꩻမုဲင်ꩻတဲ့ အဆင်ႏပြေႏဟောဝ်ငါႏ၊ ထွာဒျာႏထာꩻမာꩻရော့ꩻ၊ ကွပ်ထာꩻမာꩻရော့ꩻနဝ်ꩻတဲင် မော့ꩻဗာႏနမ်းချမ်ꩻသာႏနောဝ်ꩻသွူ။ 'ဝိစီꩻသုစရဲက်-ဝစီꩻကံႏကုသိုလ်ႏ အကျိုꩻကထင်ႏဖေႏ'နဝ်ꩻ ဒေါ့ꩻထမုဲင်ꩻမုဲင်ꩻတဲ့ အဆင်ႏပြေဟောဝ်ငါႏ၊ ထွာဒျာႏထာꩻဒေါ့ꩻရော့ꩻ၊ ကွပ်ထာꩻဒေါ့ꩻရော့ꩻနဝ်ꩻတွော့ꩻ လꩻလွဉ်ꩻထာꩻချမ်ꩻသာႏနောဝ်ꩻသွူ။ 'မနော်ꩻသုစရဲက်-မနော်ꩻကံႏကုသိုလ်ႏ အကျိုꩻကတိန်ႏဖေႏ'နဝ်ꩻ ကျံႏထမုဲင်ꩻမုဲင်ꩻတဲ့ အဆင်ႏပြေႏဟောဝ်ငါႏ၊ ထွာဒျာႏထာꩻကျံႏရော့ꩻ၊ ကွပ်ထာꩻကျံႏရော့ꩻနဝ်ꩻတဲင်တွော့ꩻ ချမ်ꩻသာႏလွဉ်ꩻအီ-စတဲင်နုဲင်းနောဝ်ꩻ၊ ယွုမ်းကုသိုလ်ႏနဝ်ꩻ သွုမ်ꩻခင်ꩻအဲဉ်ထဝ်း-အကျိုꩻအောဝ်ႏဒျာႏနောဝ်ꩻသွူ။ ၄။ ဘဝယို-ဘဝငါ (လောကယို-လောကငါ)ကိစ္စ 'ဘဝငါအဝ်ႏ'ဗွေႏဘုရာꩻ-ဗွေႏရဟန္တာႏသီး (နေးတွမ်ႏဉာဏ်ႏ) အဝ်ႏသေနောက်နောက်နောင်ꩻနောင်ꩻတဲင် ဗွေႏဘုရာꩻသီးရိုꩻ 'အတ္ထိ ပရော လောကော- ဘဝငါအဝ်ႏ'ဟော်ꩻနုဲင်းနဝ်ꩻ။ ယင်ဟန်ႏသားနဝ်ꩻ ဟော်ꩻခတ်ꩻဗွေႏဘုရာꩻ-ဗွေႏရဟန္တာႏသီး ဝွေꩻသီးရိုꩻ'နတ္ထိ ပရော လောကော-ဘဝငါအဲဉ်ထဝ်း'တဲ့၊ ဝွေꩻသီးဟော်ꩻခတ်ꩻ ဗွေႏဘုရာꩻ-ဗွေႏရဟန္တာႏနုဲင်းနဝ်ꩻနဝ်ꩻ ထွာထာꩻဟော်ꩻမာႏ၊ ထွာတရာꩻမာႏ၊ ထွာလိုꩻမွိုက်တရာꩻ၊ လိုꩻကယူႏ 'ဘဝငါအဲဉ်ထဝ်း'နဝ်ꩻတဲ့ ထွာထာꩻယူႏမာႏ၊ ထွာလိုꩻမွိုက်ထာꩻယူႏတန်၊ ဘဝငါအဝ်ႏသွူတဲ့ ရိုꩻဒျာႏ'ဘဝငါအဲဉ်ထဝ်း'ယူႏနုဲင်းနဝ်ꩻ၊ ဒေါ့ꩻနုဲင်းနဝ်ꩻ၊ ဟော်ꩻနုဲင်းနဝ်ꩻ၊ ကွပ်နီသေနီဒါႏမꩻ ဟော်ꩻနွောင်ꩻတရာꩻနုဲင်းယို၊ ဒေါ့ꩻဖြိုထာꩻ-အုပ်ꩻအနမ်း၊ ဖြွꩻအဗဲ့ꩻနုဲင်းနဝ်ꩻ။ အွိုးကယူႏခါကာႏ မာႏထွူလဲဉ်း၊ အွိုးကဒေါ့ꩻခါကာႏ တရော့ꩻတဝ်းဒွုမ်၊ အွိုးကဟော်ꩻခါကာႏ သဘော်ꩻတရာꩻ သစ်ညာꩻထိုꩻလဲဉ်းနောဝ်ꩻသွူ။ ဝါႏဒနဝ်ꩻနီမျိုꩻအကို- လိုꩻကသူႏသေထာꩻသားနဝ်ꩻ ယူႏဆင်ႏချင်ႏနုဲင်းယို- 'လိုꩻကရိုꩻဒါႏ ဘဝငါအဲဉ်ထဝ်း'နဝ်ꩻ ဘဝငါမဉ်ႏအဲဉ်ထဝ်းမွေးတဲတဲ့ ခန္ဓာႏကုဲင်လီ ဝွေꩻမဉ်ႏသီနောဝ်ꩻ ထွာတဝ်းထမုဲင်မုဲင်ꩻ၊(ချမ်ꩻသာႏဒျာႏ)။ 'လိုꩻကယွုမ်းဒါႏ ဘဝငါလဲဉ်ထဝ်း-တလိုႏတဝ်းကုသိုလ်ႏ'လိုꩻကရိုꩻနုဲင်းနဝ်ꩻနဝ်ꩻ မာꩻတဝ်းကုသိုလ်ႏ၊ ဘဝငါအဲဉ်ထဝ်း (ဟောဝ်ဟောဝ်-ကုဲင်ကုဲင်) ထွူဗော့ꩻဘဝယိုလူမ်ꩻ၊ လိုꩻကယူႏနုဲင်းနဝ်ꩻ ငမ်းတဝ်းအပဲ့စ်၊ မာꩻမွိုင်းဒျာႏအကုသိုလ်ႏ၊ ပျောႏလွဉ်ꩻဒျာႏ ထာꩻမာꩻကုဲင်ကာယဒုစရဲက်၊ လောႏလွဉ်ꩻဒျာႏ ထာꩻမာꩻမာႏ အကုသိုလ်ႏတဲင် ထွာကာယဒုစရဲက်၊ ထွာကာယကံႏ အကုသိုလ်ႏအာတန်။ ဘဝငါအဲဉ်ထဝ်း-ခံဗာႏတဝ်း ဖြောင်းပဲ့စ်ယူႏနုဲင်းနဝ်ꩻတွော့ꩻ ဒေါ့ꩻတငါတငီထာꩻ၊ ခွန်းတငါတငီထာꩻ၊ ထွာဝစီဒုစရဲက်-ထွာဝစီꩻကံႏအကုသိုလ်ႏအာတန်၊ ဘဝငါအဲဉ်ထဝ်း-ခံႏဗာႏတဝ်း သꩻအပဲ့စ်ယူႏနုဲင်းနောဝ်ꩻတဲင်တွော့ꩻ ကျံႏအံႏနွောင်ꩻဝင်ꩻ၊ ကျံႏမာꩻဒုက္ခဝင်ꩻ၊ ကျံႏမာꩻသီဝင်ꩻ၊ ထွာမနော်ꩻဒုစရဲက်-ထွာမနော်ꩻကံႏအကုသိုလ်ႏ အာတန်နောဝ်ꩻသွူ။ 'အတ္ထိ ပရော လောကော-ဘဝငါသမ်းအဝ်ႏ'တဲင်- 'ဘဝငါအဲဉ်ထဝ်း၊ တလိုႏတဝ်း-ကုသိုလ်ႏ၊ ဟောဝ်ဟောဝ်ကုဲင်ကုဲင် ထွူဗော့ꩻဘဝဘိုလူမ်ꩻ'လိုꩻကယႏမာႏ (မိစ္ဆာႏဒိဋ္ဌိ)သားဖုံႏနဝ်ꩻ မောꩻလို့ထာꩻဒုက္ခ၊ ကွပ်မာꩻခါꩻဗာႏတဝ်း ဒါႏနကုသိုလ်ႏတဲင် ကေန်ꩻခြောဒုက္ခ၊ ကွပ်သီႏလကုသိုလ်ႏပါတဝ်းတွော့ꩻ ခြွိုင်ႏသန်ꩻတဝ်း၊ သက်ထိုတဝ်း၊ ကွပ်ဘာႏဝနာႏကုသိုလ်ႏ ပါတဝ်းတဲင်တွော့ꩻ ယိန်းသူႏသေတဝ်းထာꩻ။ ကွပ်မာꩻမာႏ ကာယဒုစရဲက်တဲင် မာꩻထမုဲင်ꩻမုဲင်ꩻ အဆင်ႏပြေႏတဝ်း၊ နမ်းမော့ꩻထာꩻဒုက္ခ၊ ပွိုးဒေါ့ꩻမာႏ ဝစီꩻဒုစရဲက်တွော့ꩻ ဒေါ့ꩻထာꩻ အဆင်ႏပြေႏတဝ်း၊ ပွိုးငေါဝ်းမာႏတွော့ꩻ မော့ꩻဗာႏထာꩻဒုက္ခ၊ ကွပ်ပွိုးမနော်ꩻဒုစရဲက်တဲင်တွော့ꩻ မော့ꩻလွဉ်ꩻအီထာꩻဒုက္ခ၊ လင်ꩻထဲ့ဗာႏကငါးရုဲင်ꩻ။ 'ဘဝငါအဲဉ်ထဝ်း'လိုꩻကယွုမ်းနုဲင်းနဝ်ꩻသားနဝ်ꩻ ဘဝယိုတဲ့ မာꩻတဝ်းကုသိုလ်ႏ၊ လိုႏဒျာႏဒုစရဲက်တဲင် ခံႏဗာႏပညာႏအဝ်ႏသား သူႏတောႏကောင်ꩻလိုꩻဟောဝ်သီး ထီႏဖွီသဲ့ꩻသွမ်ꩻ၊ ဘဝငါသူꩻတဲ့ သမ်းမော့ꩻဖျင်ထာꩻဒုက္ခ၊ သွုမ်ꩻစွဉ်ႏနီဖဲ့ꩻ(လျားစွဉ်ႏနီဖဲ့ꩻ-နုဲင်းဆူပေႏ)နောဝ်ꩻသွူ။ 'အတ္ထိ ပရော လောကော-ဘဝငါအဝ်ႏ'ကယွုမ်းနုဲင်းနဝ်ꩻသားနဝ်ꩻ ထာꩻယူႏမဲဉ်ႏ၊ ကွပ်ယွုမ်းနုဲင်းနဝ်ꩻတဲင် ကယွုမ်းအတွိုင်ꩻ ဒေါ့ꩻဖေႏဝင်ꩻ၊ သွဉ်ဖေႏဝင်ꩻ၊ ဟော်ꩻလွဉ်ꩻဒျာႏ ဗွေႏဘုရာꩻ ဗွေႏရဟန္တာႏသီး တရာꩻတွော့ꩻ ဒေါ့ꩻဖြိုတဝ်းထာꩻ၊ အုပ်ꩻတဝ်းနမ်း၊ သဲ့ꩻသွမ်ꩻတဝ်းဝင်ꩻတဲင်တွော့ꩻ အွိုးကဟော်ꩻခါယိုကာႏ သဘော်ꩻတရာꩻ မွေးမဲဉ်ႏလို့ဒျာႏ၊ (သဘော်ꩻမာႏပါတဝ်း)နောဝ်ꩻသွူ။ ကွပ်ပွိုးဒေါ့ꩻသွဉ်ဟော်ꩻဖေႏ မွေးမွေးမဲဉ်ႏမဲဉ်ႏဒျာႏတဲင်တွော့ꩻ ဒေါ့ꩻခတ်ꩻ-ဟော်ꩻလွို ဗွေႏဘုရာꩻ ဗွေႏရဟန္တာႏ ဗွေႏအရိယာႏသီး မွေးတဝ်းနဝ်ꩻမꩻ လꩻအာဒျာႏကုသိုလ်ႏနောဝ်ꩻသွူ။ 'ဘဝငါအဝ်ႏ'ယွုမ်းအမွေးအမဲဉ်ႏနုဲင်းနဝ်ꩻတဲင် ဘဝယိုတဲ့ နာႏဗွေႏဘုရာꩻအဆွုံꩻအမꩻ၊ ထာꩻတဟောဝ်တဝ်း အကုသိုလ်ႏနဝ်ꩻ ပယ်ႏ- ကျံႏစယ်ႏမာꩻအာအာဒျာႏ ကုသိုလ်ႏတရာꩻ၊ မာꩻတဝ်းဒုစရဲက်၊ မာꩻဒျာႏသုစရဲက်တွော့ꩻ ပညာႏအဝ်ႏသား လိုꩻဟောဝ်(သူႏတောႏကောင်ꩻ)သီး အံႏဖြာႏနောဝ်ꩻသွူ။ 'အတ္ထိ ပရော လောကော-ဘဝငါအဝ်ႏ'ကယွုမ်းနုဲင်းနဝ်ꩻသားနဝ်ꩻ- ဘဝယိုနောဝ်ꩻ ကွပ်မာꩻသေꩻဗာႏ ဒါႏနကုသိုလ်ႏတဲင် တွိုႏဘဝငါသူꩻတွော့ꩻ ဒါႏနကုသိုလ်ႏ အကျိုꩻဖေႏ တွိုႏလူꩻခမ်း၊ တွိုႏလိုꩻခမ်း၊ ခြွေခြာႏချမ်ꩻသာႏ၊ စံႏစာꩻဗာႏ ဒါႏနကုသိုလ်ႏအကျိုꩻ။ ဘဝယိုနဝ်ꩻ ကွပ်မာꩻသေꩻဗာႏ သီႏလကုသိုလ်ႏတဲင် တွိုႏဘဝငါသူꩻတွော့ꩻ သီႏလကုသိုလ်ႏ အကျိုꩻဖေႏ တွိုႏလူꩻခမ်း၊ တွိုႏလိုꩻခမ်း၊ အုံဟောဝ်အဝ်ႏသန်ꩻ၊ သက်ထိုစိုးဆွာꩻ၊ စံႏစာꩻဗာႏ သီႏလကုသိုလ်ႏအကျိုꩻ။ ဘဝယိုနဝ်ꩻ ကွပ်မာꩻသေꩻဗာႏ (သမထ၊ ဝိပဿနာႏ)ဘာႏဝနာႏကုသိုလ်ႏတဲင် တွိုႏထင်ႏလူꩻခမမ်းအဝ်ႏ၊ ဗျဟ္မာႏခမ်းအဝ်ႏ၊ ကလꩻနိဗ္ဗာန်ႏသားအဝ်ႏ၊ အညမ်းသွတ်ꩻ သဲင်ꩻထွာလိုꩻတဲ့ယဝ်း ထွာလိုꩻညမ်းမွေးတောဝ်း၊ ထွာလိုꩻသေလိုꩻဒါႏ၊ ထွာလိုꩻပညာႏသား၊ ထွာသူႏတောႏကောင်ꩻနောဝ်ꩻသွူ။ ကွပ်မာꩻဒျာႏ ကာယသုစရဲက်တဲင် တွိုႏဘဝငါသူꩻ ကာယသုစရဲက် အကျိုꩻဖေႏတဲင် မာꩻထမုဲင်ꩻတဲ့ယဝ်း အဆင်ႏပြေႏ၊ နမ်းချမ်ꩻသာႏ၊ ပွိုးဝစီꩻသုစရဲက် အကျိုꩻဖေႏတွော့ꩻ ဒေါ့ꩻထာꩻယံ၊ ဒေါ့ꩻထာꩻဖုဲင်ႏနာႏ၊ ကွပ်ထာꩻဒေါ့ꩻရော့ꩻတငါငါ၊ ထွာထာꩻချမ်ꩻသာႏ၊ ကွပ်ပွိုးမနော်ꩻသုစရဲက် အကျိုꩻဖေႏတဲင်တွော့ꩻ ထာꩻယူႏစွို့ꩻ၊ ထာꩻယူႏမဲဉ်ႏ၊ ကျံႏတကုဲင်တဝ်းဝင်ꩻ၊ ကျံႏနွောင်ꩻတဝ်းဝင်ꩻ၊ ထွာလိုꩻသွူန်ႏစွဉ်ႏ၊ သꩻစွဉ်ႏ၊ ထွာလိုꩻသꩻရင်ꩻဟောဝ်၊ ကွပ်နဝ်ꩻမꩻ ကယွုမ်းဘဝငါအဝ်ႏနဝ်ꩻ သွုမ်ꩻခင်ꩻအဲဉ်ထဝ်း-အကျိုꩻအောဝ်ႏဒျာႏနောဝ်ꩻသွူ။ ၅။သီႏလကိစ္စ (အပဲစ်အဝ်ႏ-အပဲစ်အဲဉ်ထဝ်း)" ယင်ဟန်ႏသားနဝ်ꩻရိုꩻ- 'ပါဏာတိပါတာ-ဖဲ့ဝင်ꩻ၊ ဗက်ꩻဝင်ꩻ၊ နိစ္စက်ဝင်ꩻ၊ မာꩻသီဝင်ꩻနဝ်ꩻ နမ်းမာꩻတဲ့ယဝ်း၊ ထွဉ်ႏဝင်ꩻတဲ့ယဝ်း ထွာတဝ်းအကုသိုလ်ႏ၊ ထွာတဝ်းအပဲစ်'တဲ့၊ ယင်ဟန်ႏသားနဝ်ꩻရိုꩻ- 'အဒိန္နာဒါနာ-တခွန်ꩻဝင်ꩻထာꩻ၊ စွန်(စိုန်)ပါꩻမုဲင်ꩻကိုကိုတဲ့ယဝ်း၊ နမ်းတခွန်ꩻစွန်တဲ့ယဝ်း၊ ထွဉ်ႏဝင်ꩻတခွန်ꩻစွန်တဲ့ယဝ်း၊ ထွာတဝ်းအကုသိုလ်ႏ၊ အပဲ့စ်အဲဉ်ထဝ်း'တဲ့၊ ယင်ဟန်ႏသားနဝ်ꩻရိုꩻ- 'ကာမေသုမိစ္ဆာစာရာ-ပဲစ်မာႏဝင်ꩻပိုမာနဝ်ꩻ နမ်းပဲ့စ်မာႏတဲ့ယဝ်း၊ ထွဉ်ႏဝင်ꩻပဲစ်မာႏတဲ့ယဝ်း ထွာတဝ်းအကုသိုလ်ႏ၊ အပဲ့စ်အဲဉ်ထဝ်း'တဲ့၊ ယင်ဟန်ႏသားနဝ်ꩻရိုꩻ- 'မုသာဝါသာ-ဒေါ့ꩻလိန်ႏလဲဉ်ထာꩻနဝ်ꩻ နမ်းဒေါ့ꩻလိန်ႏလဲဉ်တဲ့နဝ်ꩻ၊ ထွဉ်ႏဝင်ꩻဒေါ့ꩻလိန်ႏလဲဉ်တဲ့ယဝ်း ထွာတဝ်းအကုသိုလ်ႏ၊ အပဲ့စ်အဲဉ်ထဝ်း'တဲ့ ဒေါ့ꩻဟော်ꩻမာႏနုဲင်းနောဝ်ꩻသွူ။ ယင်ဟန်ႏသားနဝ်ꩻရိုꩻ- 'ပါဏာတိပါတာ ဝေရမဏိ-ဖဲ့တဝ်းဝင်ꩻ၊ ဗက်ꩻတဝ်းဝင်ꩻ၊ နိစ္စက်တောဝ်းဝင်ꩻ၊ မာꩻသီတဝ်းဝင်ꩻနဝ်ꩻ ထွာတဝ်းအကုသိုလ်ႏ၊ အပဲ့စ်အဲဉ်ထဝ်း'တဲ့၊ (နမ်းသျောင်ႏတဲ့ယဝ်း၊ ထွဉ်ႏဝင်ꩻသျောင်ႏ(လဲ့ꩻဖုဲင်း)တဲ့ယဝ်း) ထွာတဝ်းသီႏလကုသိုလ်ႏ၊ အကျိုꩻအဲဉ်ထဝ်း'တဲ့။ ယင်ဟန်ႏသားနဝ်ꩻရိုꩻ- 'အဒိန္နာဒါနာ ဝေရမဏိ-တခွန်ꩻတဝ်းဝင်ꩻထာꩻ၊ စွန်တဝ်းပါꩻ၊ နမ်းတဲ့တခွန်ꩻတဝ်း၊ စွန်တဝ်း၊ ဝင်ꩻတဲ့ထွဉ်ႏတခွန်ꩻတဝ်း၊ ထွဉ်ႏစွန်တဝ်း၊ သျောင်ႏထိုꩻနုဲင်းနဝ်ꩻ ထွာတဝ်းသီႏလကုသိုလ်ႏ၊ အကျိုꩻအဲဉ်ထဝ်း'တဲ့။ ယင်ဟန်ႏသားနဝ်ꩻရိုꩻ- 'ကာမေသုမိစ္ဆာစာရာ ဝေရမဏိ-နမ်းတဲ့ပဲ့စ်မာႏတဝ်း ဝင်ꩻပိုမာ၊ ဝင်ꩻတဲ့ ထွဉ်ႏပဲစ်မာႏတဝ်း ဝင်ꩻပိုမာ၊ သျောင်ႏထိုꩻနုဲင်းနဝ်ꩻ (ပဲ့စ်မာႏတဝ်း ဝင်ꩻပိုမာတဲ့ယဝ်း) ထွာတဝ်းသီႏလကုသိုလ်ႏ၊ အကျိုꩻအဲဉ်ထဝ်း'တဲ့။ ယင်ဟန်ႏသားနဝ်ꩻရိုꩻ- 'မုသာဝါသာ ဝေရမဏိ-ဒေါ့ꩻလိန်ႏလဲဉ်တဝ်းထာꩻ၊ ဝင်ꩻတဲ့ထွဉ်ႏဒေါ့ꩻလိန်ႏလဲဉ်တဝ်းထာꩻ၊ သျောင်ႏထိုꩻနုဲင်းနဝ်ꩻ (ဒေါ့ႏလိန်ႏလဲဉ်တဝ်းထာꩻတဲ့ယဝ်း) ထွာတဝ်းသီႏလကုသိုလ်ႏ၊ အကျိုꩻအဲဉ်ထဝ်း'တဲ့ ဒေါ့ꩻဟော်ꩻမာႏနုဲင်းနောဝ်ꩻသွူ။ ယင်ဟန်ႏသားနဝ်ꩻရိုꩻ- 'မာꩻသီဝင်ꩻသက်တဲ့နဝ်ꩻ၊ ထွဉ်ႏဝင်ꩻမာꩻသီတဲ့ ထွာအကုသိုလ်ႏ၊ အပဲ့စ်အောဝ်ႏ၊ နမ်းတခွန်ꩻဝင်ꩻထာꩻတဲ့နဝ်ꩻ၊ ထွဉ်ႏဝင်ꩻတခွန်ꩻတဲ့နဝ်ꩻ ထွာအကုသိုလ်ႏ၊ အပဲ့စ်အဝ်ႏ၊ နမ်းပဲစ်မာႏ ဝင်ꩻပိုမာတဲ့နဝ်ꩻ၊ ထွဉ်ႏဝင်ꩻပဲ့စ်မာႏ ဝင်ꩻပိုမာတဲ့နဝ်ꩻ ထွာအကုသိုလ်ႏ၊ အပဲ့စ်အဝ်ႏ၊ နမ်းဒေါ့ꩻလိန်ႏလဲဉ်ထာꩻတဲ့နဝ်ꩻ၊ ထွဉ်ႏဝင်ꩻဒေါ့ꩻလိန်ႏလဲဉ်ထာꩻတဲ့နဝ်ꩻ ထွာအကုသိုလ်ႏ၊ အပဲ့စ်အဝ်ႏ၊ ယူႏမဲဉ်ႏ၊ ဒေါ့ꩻမဲဉ်ႏ၊ ဟော်ꩻမဲဉ်ႏနုဲင်းနဝ်ꩻသွူ။ ယင်ဟန်ႏသားနဝ်ꩻရိုꩻ- 'နမ်းတဲ့ မာꩻသီတဝ်းဝင်ꩻသက်၊ ဝင်ꩻတဲ့ ထွဉ်ႏမာꩻသီတဝ်းဝင်ꩻသက်၊ သျောင်ႏထိုꩻနုဲင်းနဝ်ꩻ မာꩻသီတဝ်းဝင်ꩻသက်နုဲင်းနဝ်ꩻနဝ်ꩻ ထွာသီႏလကုသိုလ်ႏ၊ အကျိုꩻအဝ်ႏ။ ယင်ဟန်ႏသားနဝ်ꩻရိုꩻ- 'နမ်းတဲ့နဝ်ꩻ၊ ဝင်ꩻတဲ့နဝ်ꩻ တခွန်ꩻတောဝ်းဝင်ꩻထာꩻ၊ ပဲ့စ်မာႏတဝ်း ဝင်ꩻပိုမာ၊ ဒေါ့ꩻလိန်ႏဒေါ့ꩻလဲဉ်တဝ်းထာꩻ၊ သျောင်ႏထိုꩻ(လဲ့ꩻဖုဲင်းထိုꩻ)နုဲင်းနဝ်ꩻနဝ်ꩻ ထွာသီႏလကုသိုလ်ႏ၊ အကျိုꩻအဝ်ႏ'ယူႏမဲဉ်ႏ၊ ဒေါ့ꩻမဲဉ်ႏ၊ ဟော်ꩻမဲဉ်ႏနုဲင်းနောဝ်ꩻသွူ။ ဝါႏဒနဝ်ꩻနီမျိုꩻအကို- နမ်းဖဲ့ဝင်ꩻ၊ ဗက်ꩻဝင်ꩻ၊ နိစ္စက်ဝင်ꩻ၊ မာꩻသီဝင်ꩻနဝ်ꩻ နမ်းမာꩻတဲ့ယဝ်း၊ ထွဉ်ႏဝင်ꩻတဲ့ယဝ်း (တွမ်ႏတမာꩻတဝ်းနဝ်ꩻ ဗွန်ဝင်ꩻ)၊ ထွာအဝ်းအကုသိုလ်ႏ၊ ထွာတဝ်းအပဲ့စ်၊ ကယူႏနုဲင်းနဝ်ꩻ၊ ကဒေါ့ꩻနုဲင်းနဝ်ꩻ၊ ကဟော်ꩻနုဲင်းနဝ်ꩻနဝ်ꩻ သေတဝ်းအကုသိုလ်ႏ တဗော့ꩻလဲ့ꩻခရာႏ၊ သေတဝ်းအကုသိုလ်ႏအပဲ့စ်တန်မꩻ ဒေါ့ꩻဟော်ꩻနုဲင်းနဝ်ꩻသွူ။ နမ်းတခွန်ꩻဝင်ꩻတခြိုꩻ၊ စွန်ဝင်ꩻ၊ ထွဉ်ႏဝင်ꩻတခွန်ꩻ၊ ထွဉ်ႏဝင်ꩻစွန်၊ နမ်းပဲ့စ်မာႏဝင်ꩻပိုမာ၊ ထွဉ်ႏဝင်ꩻပဲ့စ်မာႏဝင်ꩻပိုမာ၊ နမ်းဒေါ့ꩻလိန်ႏလဲဉ်ထာꩻ၊ ထွဉ်ႏဝင်ꩻဒေါ့ꩻလိန်ႏလဲဉ်ထာꩻ(မာꩻခန်းနုဲင်းနဝ်ꩻတဲ့ယဝ်း တွမ်ႏတမာꩻတဝ်းနဝ်ꩻ ပီဝင်ꩻ) ထွာတဝ်းအကုသိုလ်ႏ၊ ထွာတဝ်းအပဲ့စ်၊ ကဒေါ့ꩻဟော်ꩻနုဲင်းနဝ်ꩻနဝ်ꩻ သေတဝ်းအကုသိုလ်ႏ ဝွေႏဝက်ခရာႏ၊ သေတဝ်းအကုသိုလ်ႏအပဲ့စ်တန်မꩻ ဒေါ့ꩻဟော်ꩻနုဲင်းနောဝ်ꩻသွူ။ နမ်းတဲ့ဖဲ့တဝ်းဝင်ꩻ၊ ဗက်ꩻတဝ်းဝင်ꩻ၊ နိစ္စက်တဝ်းဝင်ꩻ၊ မာꩻသီတဝ်းဝင်ꩻ၊ နမ်းတဲ့သျောင်ႏထိုꩻနုဲင်းနဝ်ꩻ၊ ဝင်တဲ့ ထွဉ်ႏဖဲ့ဗက်ꩻတဝ်း၊ ထွဉ်ႏနိစ္စက်တဝ်း၊ ထွဉ်ႏမာꩻသီတဝ်း၊ ထွဉ်ႏသျောင်ႏထိုꩻ (မာꩻခန်းနုဲင်းနောဝ်ꩻတဲ့ တထူꩻတဝ်း) ထွာတောဝ်းသီႏလကုသိုလ်ႏ၊ အကျိုꩻအဲဉ်ထောဝ်း၊ ကဒေါ့ꩻနုဲင်းနဝ်ꩻနဝ်ꩻ အသေတဝ်း သီႏလဗွာခရာႏ၊ အသေတဝ်း သီႏလကုသိုလ်ႏ အကျိုꩻတန်နဝ်ꩻမꩻ ဒေါ့ꩻဟော်ꩻနုဲင်းနဝ်ꩻသွူ။ နမ်းတဲ့ထူႏတခွန်ꩻတဝ်း ဝင်ꩻတခြိုꩻ၊ စွန်တဝ်းဝင်ꩻ၊ ထွဉ်ႏတဝ်း ဝင်ꩻတခွန်ꩻထာꩻ၊ ထွဉ်ႏတဝ်းဝင်ꩻစွန်ပါꩻ၊ နမ်းတဲ့ပဲ့စ်မာႏတဝ်း ဝင်ꩻပိုမာ၊ ဝင်ꩻတဲ့ထွဉ်ႏပဲ့စ်မာႏတဝ်း ဝင်ꩻပိုမာ၊ နမ်းတဲ့ ဒေါ့ꩻလိန်ႏလဲဉ်တဝ်းထာꩻ၊ ဝင်ꩻတဲ့ ထွဉ်ႏဒေါ့ꩻလိန်ႏလဲဉ်တဝ်းထာꩻ၊ နမ်းတဲ့သျောင်ႏညာꩻလဲ့ꩻဖုဲင်းထိုꩻ၊ ဝင်ꩻတဲ့ ထွဉ်ႏသျောင်ႏညာꩻ-ထွဉ်ႏလဲ့ꩻဖုဲင်းထိုꩻတဲ့ယဝ်း (မာꩻခန်းနုဲင်းနဝ်ꩻတဲ့ယဝ်း တထူꩻတဝ်း) ထွာတဝ်းသီႏလကုသိုလ်ႏ၊ အကျိုꩻအဲဉ်ထဝ်း၊ ကဒေါ့ꩻဟော်ꩻနုဲင်းနဝ်ꩻနဝ်ꩻ သေတဝ်းကုသိုလ်ႏ ကြောင်းစင်ခရာႏ၊ သေတဝ်းသီႏလကုသိုလ်ႏ အကျိုꩻတန်နဝ်ꩻမꩻ ဒေါ့ꩻဟော်ꩻနုဲင်းနောဝ်ꩻသွူ။ ကွပ်သေတဝ်း အကုသိုလ်ႏတဗော့ꩻလဲ့ꩻ ဝွေႏဝက်တဲ့နဝ်ꩻ၊ ပွိုးသေတဝ်း အကုသိုလ်ႏအပဲ့စ်တန်တဲ့နဝ်ꩻ မာꩻမွိုင်းဒျာႏအကုသိုလ်ႏ၊ မာꩻမွိုင်းဒျာႏ ကာယဒုစရဲက်၊ ဒေါ့ꩻမွိုင်းဒျာႏ ဝစီꩻဒုစရဲက်၊ ယူႏမွိုင်းဒျာႏ မနော်ꩻဒုစရဲက်တွော့ꩻ ခန္ဓာႏကုဲင်လီ ကတိန်ႏသီသူꩻနဝ်ꩻ အကုသိုလ်ႏကံႏအလွိုက် ကမွိုက်ခါꩻအတွိုင်ꩻ လွေꩻဗာႏ(ငါးရုဲင်ꩻ၊ တိရစ္ဆာန်ႏ၊ ပိတ္တာႏ၊ အသူႏရကာယ်ႏ)အပါယ်ႏလစ်ꩻခမ်းနောဝ်ꩻသွူ။ အဝ်ႏငါးရုဲင်ꩻ ကထွိုင်ႏသဲင်ꩻထွာယင်းလိုꩻတဲ့ အကုသိုလ်ႏအကျိုꩻသွုပ်၊ ဒုစရဲက်အကျိုꩻသွုပ်အနေႏ ကေန်ꩻခြောဒုက္ခ၊ နမ်းယပ်ꩻသꩻယပ်ꩻ-စတဲင် ဒုက္ခဆဲင်ႏရာꩻဖုံႏနဝ်ꩻ မော့ꩻဗာႏနေကနောဝ်ꩻသွူ။ ထာꩻမာꩻ၊ ထာꩻဒေါ့ꩻ၊ ထာꩻယူႏ ကမွေးကမဲဉ်ႏသားနဝ်ꩻ ထီႏသေကုသိုလ်ႏ ဗွာစင်ကြောင်းကြဲ့ခရာႏ (သီႏလ)ကုသိုလ်ႏ အကျိုꩻတန်ငါႏခရာႏနဝ်ꩻမꩻ မာꩻဒါႏနကုသိုလ်ႏ၊ သီႏလကုသိုလ်ႏ၊ ဘာႏဝနာႏကုသိုလ်ႏ၊ မာꩻဒျာႏထာꩻဟောဝ် ကာယသုစရဲက်၊ ဒေါ့ꩻဒျာႏထာꩻဟောဝ် ဝစီꩻသုစရဲက်၊ ကျံႏဒျာႏထာꩻဟောဝ် မနော်ꩻသုစရဲက်တဲင် ခန္ဓာႏကုဲင်လီ ကထွိုင်ႏသီသူꩻနဝ်ꩻ ကုသိုလ်ႏကံႏဟောဝ်အလွိုက်၊ ထွိုက်ရာꩻလိုꩻဘဝ လူꩻဘဝ ဗျဟ္မာႏဘဝ၊ ယင်ဟန်ႏသားတဲ့ လꩻမဂ်ဉာဏ်ႏ ဖိုလ်ႏဉာဏ်ႏ လꩻနိဗ္ဗာန်ႏချမ်ꩻသာႏ-စတဲင် လꩻချမ်ꩻသာႏအမျိုꩻမျိုꩻ၊ လꩻအကျိုꩻဟောဝ် အစားစားဖုံႏနောဝ်ꩻသွူ။(သုတ္တန်ႏပိဋကတ်၊ မဇ္ဈိမပဏ္ဏာသပါဠိတောႏ၊ အပဏ္ဏကသုတ်)[၁][၂]