ဝွေႏဖန်ႏဒါႏဒါႏ

"ဝွေႏဖန်ႏဒါႏဒါႏ ဒေါ့ꩻခန်ꩻမွိုန်းဝင်ꩻ" "လူမှန်ရင် အမှားနဲ့မကင်း"မန်းငေါဝ်းနောဝ်ꩻအတွိုင်ꩻ ပေါႏမဉ်ႏသဲင်ꩻထွာလဲဉ်း ပုထုဇဉ်ႏလိုꩻကရိုꩻနောဝ်ꩻ အီႏလွစ်ကင်ꩻတွမ်ႏအမာႏယို ရမွော့တအောဝ်ႏတောဝ်းနောဝ်ꩻသွူ။ နောဝ်ꩻထွူတကာႏတောဝ်း လောကလိုꩻခမ်းယို အမဲဉ်ႏတွမ်ႏအမာႏ အောဝ်ႏတယ်ꩻဝင်ꩻကရိုꩻနောဝ်ꩻ နီသွဉ်းသီး လက်ခံႏတောဝ်းလဲ့ တလꩻနွောင်ꩻတောဝ်းနောဝ်ꩻသွူ။ သတ္တဝါႏအကို ထာꩻသေတရာꩻ ဉာဏ်ႏပညာႏအအောဝ်ႏသွတ်ꩻယို မဉ်ႏထုမ်ႏချာနောဝ်ꩻ ထွာဒျာႏလိုꩻသီးမျိုꩻဖုံႏနောဝ်ꩻသွူ။ နောဝ်ꩻမꩻ နီသွဉ်းသီး ကအောဝ်ႏအုံနောင်ဒါႏ လောကလိုꩻခမ်းယို အမာႏဖေႏနေးကအောဝ်ႏမွိုန်း၊ အမာႏမဉ်ႏအောဝ်ႏရိုꩻကီလဲ့ ယံဖေႏနေး ကမွဉ်းဖျင်နွောင်ꩻတဲင် တဖြာꩻတွမ်ႏတဖြာꩻ၊ တစွိုꩻတွမ်ႏတစွိုꩻ၊ တခမ်းတွမ်ႏတခမ်း မေတ္တာႏတရာꩻ အွဉ်ႏအထျꩻတွော့ꩻ ယီးနယ်၊ ဝွေႏဖန်ႏနယ်နောဝ်ꩻ အကျိုꩻတရာꩻ မင်္ဂလာႏအောဝ်ႏငါႏနောဝ်ꩻသွူ။ ယီးနယ်(ထောက်ပြ)ဝွေႏဖန်ႏမုꩻယိုနောဝ်ꩻ မာꩻထင်ႏထိုအီဒျာႏ နီခမ်းထီ၊ နီလိုꩻမျိုꩻ၊ အဆုဲင်ꩻသွတ်ꩻမဉ်ႏဒေါ့ꩻဗာႏနောဝ်ꩻ မာꩻထင်ႏထိုအီဒျာႏ နီတဖြာꩻစီႏ အထီအသွီႏ မွေးတောဝ်းနဲ့။ မွေးသွူ၊ နေးတွမ်ႏဒျာႏ အကျိုꩻတရာꩻတွော့ꩻ နီသွဉ်းသီးတဖြာꩻတွမ်ႏတဖြာꩻ ဝွေႏဖန်ႏဝင်ꩻ၊ အွဉ်ႏနယ်ဝင်ꩻအမာႏရိုꩻကီလဲ့ ယဟန်ႏနောဝ်ꩻ ဗွိုန်စွဉ်ႏမွော့ခွန်းဝင်ꩻ၊ ပဲစ်တင်ႏဝင်ꩻတဲင် မင်္ဂလာႏမွော့ တအောဝ်ႏတောဝ်းငါႏဟောင်း? ထွိုင်ႏထုမ်ႏချာအဖြေႏနောဝ်ꩻ နီသွဉ်းသီးယို တခွယ်ꩻချာꩻဒါႏတောဝ်းဒွိုန်း "ထာꩻဝွေႏဖန်ႏ"တွမ်ႏ "ဒေါ့ꩻခတ်ꩻဝင်ꩻ"ကရိုꩻနောဝ်ꩻ ထင်ႏသျာꩻငါႏနောဝ်ꩻသွူ။ နီသွဉ်းသီးမဉ်ႏထွားချာ "ထာꩻဝွေႏဖန်ႏ"ကရိုꩻနောဝ်ꩻ လိုꩻတဖြာꩻအမာႏယို ဝွေꩻတွမ်ႏဝွေꩻ ဖေႏနေးကသေယူႏအွဉ်ႏသတိꩻချာတဲင် နေးတွမ်ႏအဟောဝ်ဖဲ့ꩻ မေတ္တာႏတရာꩻအွဉ်ႏဆꩻငါတဲင် တွမ်ႏသက်သေႏတရာꩻ ခွေါင်ခွေါင်တွော့ꩻ ဒေါ့ꩻနယ်၊ စေနယ်နောဝ်ꩻ ဟဲ့ꩻ"ထာꩻဝွေႏဖန်ႏ"၊ မဉ်ႏတမွေးတောဝ်း ဝင်ꩻတဖြာꩻအမာႏယို ထူႏအခွင်ꩻအရေꩻတွော့ꩻ ခွန်းဝင်ꩻ၊ ချꩻဝင်ꩻသိက္ခာႏ၊ နေးတွမ်ႏဒေါသ၊ မောဟတဲင် ဒေါ့ꩻဝင်ꩻနောဝ်ꩻ ထွာဒျာႏ"ဒေါ့ꩻခတ်ꩻဝင်ꩻ"အကျောင်ꩻ မဟာဗောဓိမြိုင်ဗွေႏဆရာႏတောႏ ရိုꩻသေꩻခါꩻနုဲင်းနောဝ်ꩻသွူ။ မဟာဗောဓိမြိုင်ဗွေႏဆရာႏတောႏ ကသွဉ်သင်ဆွုံꩻမꩻဒါႏငေါဝ်းယို မဉ်ႏသေနာႏမꩻ နီသွဉ်းသီးတဖြာꩻတွမ်ႏတဖြာꩻ၊ တစွိုꩻတွမ်ႏတစွိုꩻ ကဖေႏဒါႏဝင်ꩻ အကျံႏဉာဏ်ႏ။ ကဝွေႏဖန်ႏထောက်ပျꩻနယ်ဒါႏဝင်ꩻဖုံႏယို အကျိုꩻတရာꩻအီႏအောဝ်ႏလွဉ်နောဝ်ꩻသွူ။ လိုꩻသီးသဘာဝယိုနောဝ်ꩻ ကျွိုက်ဒျာႏထာꩻနုညံꩻ၊ မောင်ꩻကော့ꩻဒျာႏ မေတ္တာႏတရာꩻနောဝ်ꩻသွူ။ လိုꩻသီးယို ယဟန်ႏနောဝ်ꩻ ထာꩻသေတရာꩻ အာႏပေႏငါႏတဲင် ဝွေꩻကမာꩻဒါႏ ထာꩻမာꩻဖုံႏယို အမာႏအောဝ်ႏလဲ့ သေယူႏချာတောဝ်းဖုံႏလဲ့ အောဝ်ႏဒါႏနောဝ်ꩻသွူ။ နုဲင်းယိုဖုံႏက နီသွဉ်းသီး ကဝွေႏဖန်ႏသားနောဝ်ꩻ မဉ်ႏတအွဉ်ႏနယ် လိန်ႏလိန်ႏမာႏမာႏတောဝ်း၊ မဉ်ႏစူꩻဗော့ꩻဒျာႏ ဒေါသ၊ မောဟသꩻတဲင် မဉ်ႏလွေꩻခွန်းထိုꩻဝွေꩻ၊ မဉ်ႏလွေꩻမာꩻဆရာႏထိုꩻဝွေꩻနောဝ်ꩻ ဝွေꩻအီႏဝွန်ႏခံႏဝွေꩻအမာႏ၊ ဝွေꩻအီႏဖျင်ချာဝွေꩻအမာႏယို ရမွော့ခြောငါႏနောဝ်ꩻသွူ။ ကွပ်ပွိုးတမုဲင်ꩻဟောင်းတဲင် ဝွေꩻယို ကွပ်တသတောဝ်း သမ်းမာꩻမာႏလဲဉ်း အမာႏတွော့ꩻ နီသွဉ်းသီး သမ်းဒေါ့ꩻခတ်ꩻယင်းဝွေꩻနောဝ်ꩻ ဝွေꩻယို အီႏခံႏစာꩻဗာႏနုဲင်းမုဲင်ꩻ နီသွဉ်းသီးဟောဝ်သေယူႏငါႏနောဝ်ꩻသွူ။ မေႏကခိုးထာꩻနောဝ်ꩻ နီသွဉ်းသီး မာꩻဖေ့တွမ်ႏထီလျားတဲ့ လꩻဒျာႏ၊ ကွဲတွော့ꩻ နီသွဉ်းသီး မဉ်ႏမာꩻဖေ့တွမ်ႏထီခွꩻနောဝ်ꩻ အန္တရာယ်ႏတဲ့က်ငꩻ၊ မေႏတဲ့ဖေ့ယိုꩻမွေးတောဝ်းနဲ့၊ မဉ်ႏတခွယ်ꩻချာꩻဒါႏတောဝ်း "ထာꩻတွမ်ႏဖန်ႏ"တွမ်ႏ"ဒေါ့ꩻခတ်ꩻဝင်ꩻ"ယိုနောဝ်ꩻ နီသွဉ်းသီးကဒေါ့ꩻ၊ နီသွဉ်းသီးကခွန်းဝွေꩻယို အမဲဉ်ႏတရာꩻဒျာႏရိုꩻကီလဲ့ မဲ့ꩻဝင်ꩻတယွုမ်းတောဝ်း နီသွဉ်းသီး၊ မဲ့ꩻဝင်ꩻသတ်မတ်ထိုꩻထဲင်း နီသွဉ်းသီးယို "လိုꩻပညာႏဆေ့ꩻ"နောဝ်ꩻသွူ။ အခိန်ႏခါႏယိုခါနောဝ်ꩻ နီသွဉ်းသီး ပအိုဝ်ႏလိုꩻမျိုꩻယို အောဝ်ႏလိုႏလွောင်ႏဗူႏဝင်ꩻအခိန်ႏ မဉ်ႏဒေါ့ꩻနုဲင်းနောဝ်ꩻတဲ့ တမာႏတောဝ်းနောဝ်ꩻသွူ။ နောဝ်ꩻမꩻ ယိုခါခိန်ႏ နီသွဉ်းသီးယို တဖြာꩻတွမ်ႏတဖြာꩻ၊ တစွိုꩻတွမ်ႏတစွိုꩻ မဉ်ႏအောဝ်ႏပဲစ်တင်ႏဗော့ꩻဝင်ꩻ၊ မဉ်ႏအောဝ်ႏထုမ်ႏဗော့ꩻဝင်ꩻအပဲစ်နောဝ်ꩻ မဲ့ꩻနီသွဉ်းသီး အောဝ်ႏလိုႏလꩻထွိုက်၊ လꩻသင်ꩻဒါႏ အခွင်ꩻအရေꩻယို မဲ့ꩻသွုမ်ꩻထိုꩻဒါႏနောဝ်ꩻသွူ။ အမာႏအီႏကင်ꩻဒါႏပုဂ္ဂိုလ်ႏ၊ အမာႏအီႏကင်ꩻဒါႏအစွိုꩻနောဝ်ꩻ ကမ္ဘာႏလောင်းကို မဉ်ႏထုမ်ႏနောဝ်ꩻ ရမွော့တမော့ꩻတောဝ်းနောဝ်ꩻသွူ။ နီသွဉ်းသီး ပအိုဝ်ႏလိုꩻမျိုꩻ အစွိုꩻပေါင်ꩻစွုမ်ႏဖုံႏယို တထင်းတောဝ်းအမာႏဖုံႏတဲ့ ရမွော့အောဝ်ႏဒါႏနေနေ၊ နီသွဉ်းသီးပအိုဝ်ႏလိုꩻမျိုꩻယို ထာꩻသေတရာꩻ အောဝ်ႏဒျာႏလိုꩻမျိုꩻ၊ ယေန်ႏကေႏဒျာႏလိုꩻမျိုꩻဖုံႏနောဝ်ꩻသွူ။ နီသွဉ်သီးယို ပအိုဝ်ႏလိုꩻမျိုꩻဖုံႏဒျာႏကွေႏကွေႏတဲင် မဉ်ႏထီႏဝင်ꩻအမာႏဖုံႏရိုꩻလဲ့ နေးတွမ်ႏမေတ္တာႏတရာꩻ၊ နေးတွမ်ႏသက်သေႏခွေါင်ခွေါင်တွော့ꩻ မဉ်ႏဝွေႏဖန်ႏ၊ အွဉ်းနယ်ဒျာႏဝင်ꩻနောဝ်ꩻမꩻ နီသွဉ်းသီးလိုꩻမျိုꩻယို ဘွုံႏတန်ꩻခိုꩻအီႏအောဝ်ႏအကျောင်ꩻ-