ဝွေꩻကွို့ꩻသꩻနွောင်ꩻတဝ်း

"ဟတ္ထကသုတ် (ဝွေꩻကွို့ꩻသꩻနွောင်ꩻတောဝ်း သွံမျိုꩻ)"

နီဗွေႏဘုရာꩻအဝ်ႏအုံ သာဝတ္ထိခမ်း၊ ကျောင်ꩻဇေႏတဝွန်ႏကိုအတွင်ꩻ တွိုႏတဟာ မွူးကွို့ꩻနာꩻတိန်ႏတိန်ႏ အခိန်ႏနဝ်ꩻ လူꩻပို(နတ်သာꩻ)တဖြာꩻ ဖျော်လင်ꩻဗွေႏဘုရာꩻထျꩻ၊ အွဉ်ႏအွꩻနမ်းအရောင်ႏ လေတောင်ႏလို့စွဉ်ႏ တကျောင်ꩻလိုမ်းနောဝ်ꩻသွူ။ လိုꩻပိုဟတ္ထကနဝ်ꩻ အပနဲဉ်ႏမွေးမုဲင်းစွဉ်ႏထာꩻတဲင် ကျံႏအုံဒင်ႏပဲဉ်လောင်း တထွောင်းထွောင်း၊ သဲစ်ဝွေꩻနမ်း ကခွေါင်းပဲဉ်တဲ့ ဝွေꩻနမ်းနဝ်ꩻ လီလာထိုꩻမားထိုꩻစွဉ်ႏ၊ ဖန်ဆင်ꩻယင်း အနမ်းတလဲင်ႏ၊ ကျံႏအုံဒင်ႏယင်း ပဲဉ်လောင်းတထွောင်း၊ သဲစ်ကခွေါင်းပဲဉ်တဲ့ ဝွေꩻနမ်းနဝ်ꩻ လီလာထိုꩻမားဖျင်စွဉ်ႏ။ ဥပမာႏ- နားမန်ꩻနဝ်ꩻ ပေါႏထာက်ꩻလူးသုဲင်ꩻတဲ့ စွုမ်းသော့ꩻလို့ဒျာႏ သုဲင်ꩻခါႏ၊ ထီတဲ့ ပေါႏထောက်ꩻဒင်ႏသုဲင်ꩻလောင်းတဲ့ ခွို့သော့ꩻလို့ဒျာႏ သုဲင်ꩻခါႏ၊ နားမန်ꩻထွာအတွတ်ꩻ အဝ်ႏတဲင်ဒင်ႏ အွတ်ꩻလောင်းနဝ်ꩻ လꩻတဝ်း၊ ထီထွာအခြုံးတဲင်ဒင်ႏ လုံးလောင်းနဝ်ꩻလꩻတဝ်း၊ ဥပမာႏ-ဗွန်ထီ၊ ပီနားမန်ꩻနဝ်ꩻနေနေသွူ။ ကွပ်နဝ်ꩻမꩻ နီဗွေႏဘုရာꩻရိုꩻ ဟတ္ထက- "နာꩻအုံဒင်ႏပဲဉ်လောင်း တထွောင်းထွောင်း ဖေႏကလꩻခန်း၊ နာꩻနမ်းနဝ်ꩻ ဖန်ဆင်ꩻဆွော့ꩻဆွော့ꩻ၊ ဖန်ဆင်ꩻကျံꩻကျံꩻဟုဲင်း"ဗွေႏဘုရာꩻ မိန်းနုဲင်းနဝ်ꩻတဲင်- ခွန်လူꩻဟတ္ထကရိုꩻ- "အုံဒင်ႏပဲဉ်ဖေႏကလꩻခန်း၊ ခွေသွဉ်းနမ်းယို ဖန်ဆင်ꩻဆွော့ꩻဆွော့ꩻ၊ ဖန်ဆင်ꩻကျံꩻကျံꩻသွူ ဗွေႏဩ" လောဝ်းချာ ဗွေႏဘုရာꩻနုဲင်းနဝ်ꩻထွူခါ ဝွေꩻနမ်းနဝ်ꩻ ဖန်ဆင်ꩻဆွော့ꩻဆွော့ꩻ ဖန်ဆင်ꩻကျံꩻကျံꩻထွူနဝ်ꩻမꩻ ယမ်းလꩻယင်းပဲဉ်၊ သေန်ႏလျောႏရာꩻတထွောင်း၊ အုံတနွောင်းထွူတွော့ꩻ ကန်းတော့ꩻရိုႏသေႏ၊ အုံထွိုင်ႏဝုဲင်ႏလွေꩻ ဗွေႏဘုရာꩻနောဝ်ꩻသွူ။ နီဗွေႏဘုရာꩻရီ လူꩻပိုဟတ္ထကနုဲင်းယို- "နာꩻကအဝ်ႏထွာလိုꩻခါ နာꩻကသွဉ်ခါꩻဒါႏ 'ပရိယတ်တရာꩻ'ဖုံႏနောဝ်ꩻ နာꩻထွိုင်ႏထွာလူꩻယိုခါ နာꩻထွားလွူꩻချာဝောာဝ်းဒွုမ်နဲ့" "အဝ်ႏထွားလွူꩻချာဒျာႏ ဗွေႏဩ၊ ယိုခါ ခွေသွဉ်း အဝ်ႏအုံညီꩻလူꩻသီးဖုံႏ၊ ခွေသွဉ်းအောဝ်ႏဟော်ꩻဖေႏ လူꩻသီးတရာꩻ၊ လူꩻသီးဖုံႏ အဝ်ႏလွဉ်နာႏတရာꩻ ခွေသွဉ်းထျꩻဗွေႏဩ" လူꩻဟတ္ထကဟွေး- "နာꩻကအဝ်ႏထွာလိုꩻခါနဝ်ꩻ နာꩻမာꩻအာကုသိုလ်ႏ အမျိုꩻမုဲင်ꩻဟောင်း" "ဩဗွေႏ ဘုရာꩻမျတ်ဗွေႏဩ- ခွေသွဉ်းကအဝ်ႏထွာလိုꩻခါနဝ်ꩻ မာꩻကားမုဲင်ꩻလဲင်ႏလဲင်ႏသွူတဲ့ တကွို့ꩻသꩻနွောင်ꩻတဝ်း၊ တလွꩻနွောင်ꩻတဝ်းနဝ်ꩻ အဝ်ႏသွံမျိုꩻဗွေႏဩ၊ သွံမျိုꩻကရိုꩻနဝ်ꩻ- ၁။ ဘဂ၀တော ဒဿနဿ အတိတ္တော - ဝုဲင်ႏဘုရာꩻ ကွို့ꩻသꩻတဝ်း၊ ၂။ သဒ္ဓမ္မသဝနဿ အတိတ္တော - နာႏတရာꩻ ကွို့ꩻသꩻတဝ်း၊ ၃။ သံဃဿ ဥပဌာနဿ အတိတ္တော - ဝွတ်ပတ်သံဃာႏနဝ်ꩻ ကွို့ꩻသꩻတဝ်း၊ ကွပ်ပွိုးခွေသွဉ်းမာꩻအာကုသိုလ်ႏ နဝ်ꩻသွံမျိုꩻနဝ်ꩻတဲင် ယိုခါ ခွေသွဉ်းထင်ႏတွိုႏနွောင်ꩻစွဉ်ႏ 'အဝိဟာႏဗျဟ္မာႏ'ဘွုံႏဗွေႏဩ"လောဝ်းနုဲင်းနောဝ်ꩻသွူ။ (သုတ္တန်ႏပိဋကတ်၊ အင်္ဂုတ္တရပါဠိ၊ တိကနိပါတ်၊ ဟတ္ထကသုတ်)