သပေင်ခမ်းထီ

သပေင်ခမ်းထီ (အိန်းကလေတ်: Spain)ယို တရာꩻဝင်ႏအနေႏ ဟဲ့ꩻဖန်ခါꩻ သပေင်ခွန်ဟော်ခမ်ꩻခမ်းထီ (Kingdom of Spain) တဲင် အဝ်ႏဒျာႏ ဥရောပအခဝ်နဝ် တောမ်ႏဥရောပအခဝ်တွို့ꩻကို ခမ်းတခမ်းဒျာႏတဲင်၊ အာဖရိကအခဝ်ထင်ꩻဖဲ့ꩻလဲ့ ဟံႏနယ်ႏဖုံႏ အဝ်ႏပါသော့ꩻဒျာႏသွူ။ ဥရောပခမ်းကောင်တန်လောင်း ကအဝ်ႏဒါႏ အနဝ်သွတ်ꩻအရပ်ယို သပေင်ခမ်းထီ အဝ်ႏပါသော့ꩻဒျာႏတဲင်၊ ဥရောပအခဝ်နဝ်ကို ခမ်းထီအတန်သွတ်ꩻ တောမ်ႏ ဥရောပသမဂ္ဂ (EU) အစွိုꩻနွို့ ခမ်းထီဖုံႏအကို လိုꩻအုံအဝ်ႏအာႏရဲင်ꩻ အအာသွတ်ꩻ အဝ်ႏအမုဲင်(၄) ခမ်းထီဒျာႏသွူ။ အိုင်ဘေးရီးယန်းခမ်းဗီႏ (Iberian Peninsula) အခဝ်အာယို သပေင်ခမ်းထီ အဝ်ႏအိုပ်ချုတ်ခါꩻဒျာႏတဲင်၊ ဟံႏနယ်ႏကိုနဝ်ꩻ အတ္တလန္တိတ်သမုဒ္ဒရာႏအခဝ်ကွဉ်ႏကို ကအဝ်ႏဒါႏ ကနေရီကြွန်ဖုံႏ (Canary Islands)၊ ပင်ႏလယ်ႏဟံႏခါႏအခဝ်တွို့ꩻကို ကအဝ်ႏဒါႏ ဘယ်လယ်ရစ်ကြွန်ဖုံႏ (Balearic Islands)၊ တောမ်ႏ အာဖရိကကောင်တန်လောင်း ကအဝ်ႏဒါႏ သေအူတာ (Ceuta) တောမ်ႏ မယ်လီလာ (Melilla) ဝေင်ꩻနယ်ႏဒေႏသဖုံႏလဲ့ ပါသော့ꩻဒျာႏသွူ။ သပေင်ခမ်းဖဲ့ꩻထင်ꩻနဝ်ꩻ ပိဉ်တိစ်(ပြင်သစ်)၊ အဲဉ်ဒိုရာခမ်းထီတောမ်ႏ ဗစ်ကေးပင်ႏလယ်ႏအောတ်ꩻ (Bay of Biscay) ဖုံႏ အဝ်ႏကပ်ခါꩻဒျာႏသွူ။ ဖဲ့ꩻကွဉ်ႏတောမ်ႏဖဲ့ꩻနဝ်နဝ်ꩻ ပင်ႏလယ်ႏဟံႏခါႏ၊ ဂီဘရော်လ်တာ (Gibraltar) တောမ်ႏ မော်ရိုကိုခမ်း (Morocco)ဖုံႏ အဝ်ႏခူခါꩻဒျာႏတဲင်၊ ဖဲ့ꩻတွို့ꩻနဝ်ꩻ ပေါ်တူဂီခမ်းထီ တောမ်ႏ အတ္တလန္တိတ်သမုဒ္ဒရာႏဖုံႏ အဝ်ႏခူခါꩻဒျာႏသွူ။ သပေင်ခမ်းထီ ဝေင်ꩻတန်တောမ်ႏ အတန်သွတ်ꩻဝေင်ꩻနဝ်ꩻ ထွာဒျာႏ မဒရစ် (Madrid) ဝေင်ꩻဒျာႏသွူ။ ဝေင်ꩻတန်အလင်ဖုံႏနဝ်ꩻ ထွာဒျာႏ ဗာသီလိုနာ၊ ဗလင်သီယာ၊ ဆီဗီးလ်၊ ဇာရာဂိုးဇား၊ မာလာဂါ၊ မူဆီးယား တောမ်ႏ ပါလ်မာဒဲမော်ရိုကာဖုံႏ နဝ်ꩻသွူ။