သဘာပတိငဝ်းဗွောင်

"နေင်ႏ ၁၃၆၈-ဗာႏ၊ ဗဟိုႏသံႏဃာႏ ထောင်ထွားရေꩻတရာꩻ သဘာပတိဩဝါဒ (ငဝ်းဗွောင်)" ကကျွꩻလွဉ်ဒါႏ ဗွေႏသံႏဃာႏတွမ်ႏ တကာႏမူႏခိုသီးဖုံႏဟွေး -

ပအိုဝ်ႏလိတ်လုဲင်ꩻစွစ်ꩻလီတာႏ ဗဟိုႏသံႏဃာႏ ထောင်ထွားရေꩻအစွိုꩻယိုနဝ်ꩻ ကွပ်ပွိုးထီႏငါႏ ဗွေႏသံႏဃာႏတွမ်ႏ တကာႏမူႏသီးအကျိုꩻနဝ်ꩻမꩻ အွဉ်ႏကုဲင်စွဉ်ႏကျောင်ꩻ၊ အွဉ်ႏကုဲင်စွဉ်ႏထာꩻမာꩻ၊ တန်ꩻတဝ်းတဲ့ ရိမ်အခိန်ႏ အွဉ်ႏအတန်ꩻတန်ꩻ အဝ်ႏတဖဲ့ꩻတွမ်ႏတဖဲ့ꩻ ကျွꩻလွဉ်တဲင် ဟော်ꩻဖေႏတရာꩻ၊ လွဉ်ဗွောင်ဖေႏတန်ပေႏမဲ့နား၊ လွဉ်ဖေႏဖြားဆား ထာꩻသေတရာꩻနုဲင်းယိုနဝ်ꩻ ဟဝ်သꩻရေꩻငါႏ မရေႏမရာႏသွူ။

ပအိုဝ်ႏလိတ်လုဲင်ꩻစွစ်ꩻလီတာႏ ဗဟိုႏသံႏဃာႏ ထောင်ထွားရေꩻ ပုဂ္ဂိုလ်ႏကအီႏဟော်ꩻလွေꩻ တရာꩻသား နီဗွေႏသီးတဲ့ နေးတွမ်ႏမေတ္တာႏ ကရုဏာႏတရာꩻတဲင် ဟော်ꩻရုဲင်းရုဲင်း၊ ခြုဲင်းစွုမ်ႏစွုမ်ႏဖေႏသွော့ ဗွေႏသံႏဃာႏသီးအတာႏ တကာႏမူႏခိုသီးအတွက် ကတိုꩻတက်အီအမျိုꩻ အကျိုꩻကရအဝ်ႏ အစားဖုံႏနဝ်ꩻ တဲးဝါးဟော်ꩻပျꩻ သွဉ်သင်ဆုံꩻမꩻဖေႏသွော့။

နီတကာႏမူႏခိုသီးတဲ့ ဗွေႏသံႏဃာႏသီး ကဟော်ꩻတရာꩻတွင်ꩻနဝ်ꩻ အုံယေန်ယေန်၊ အဝ်ႏတေ့ꩻတေ့ꩻသွော့၊ တန်တန်ပေႏပေႏ ရိုႏရိုႏသေႏသေႏနာႏလွသွော့ ပငါပရာꩻ။

ကဟော်ꩻသားတဲ့ ချမ်ꩻချမ်ꩻသာႏသာႏ၊ ကနာႏသားတဲ့ ရောင်းရောင်းရျူႏရျူႏ၊ ဖေႏဖေႏထူႏထူႏ၊ လွောင်ႏလွောင်ႏဗူႏဗူႏ ယံကထွာသွော့အကျောင်ꩻ-ဆုတောင်ꩻနုဲင်းနဝ်ꩻထွူတဲင် ဩဝါဒ ငဝ်းဗွောင်ယိုနဝ်ꩻ အွဉ်ႏသဝ်ꩻဒွိုန်းက တခွိုင်းယိုကွိုနဲး တဖုံႏတဖင်ႏ တင်ႏကနန်ႏတဉ်ဟွေး။

သဘာပတိ ဩဝါဒ (ငဝ်းပေ့ꩻ)

ကနာႏတရာꩻ သံႏဃာႏအမျာꩻတွမ်ႏ တကာႏမူႏခိုသီးဖုံႏဟွေး - ပအိုဝ်ႏလိတ်လုဲင်ꩻစွစ်ꩻလီတာႏ ဗဟိုႏသံႏဃာႏ ထောင်ထွားရေꩻအစွိုꩻ ကဟော်ꩻနယ်ပျꩻ၊ ကဆုံꩻမꩻသွဉ်သင်ဒါႏ အခရာႏဖုံႏနဝ်ꩻ ဟွုန်ဗာႏ၊ သေဗာႏလဲဉ်းသွူ ပငါပရာꩻ။ သေထွူတဲ့ အဝ်ႏလိုႏနေးထူႏ၊ အဝ်ႏလိုႏလွောက်ꩻနာႏလွေꩻ၊ သေထွူအွဉ်ႏပြာႏ၊ နာႏထွူအွဉ်ႏလွင်ꩻ၊ မဉ်ႏကံကျင်ꩻလွဉ်ꩻတဝ်း၊ မဉ်ႏလွောက်ꩻနာႏလွဉ်ꩻတဝ်းနဝ်ꩻ ဗွေႏသံႏဃာႏသီးတဲ့ ကခံႏယပ်ꩻဗာႏတဲ့နဝ်ꩻ၊ တကာႏမူႏခိုသီး ကခံႏယပ်ꩻဗာႏတဲ့နဝ်ꩻ အကျိုꩻတပေါႏအဲဉ်ထဝ်း။ ကွပ်နဝ်ꩻမꩻ မဉ်ႏလွောက်ꩻနာႏလွဉ်ꩻမွေးမွေးနဝ်ꩻမꩻ ယိုခါဆုဲင်ꩻတာႏ အီႏချမ်ꩻသာႏနွောင်ꩻ၊ ဖေႏနေးကချမ်ꩻသာႏနွောင်ꩻနဝ်ꩻ ဗွေႏသံႏဃာႏသီး ကဟော်ꩻနယ်ပျꩻ၊ ကဆုံꩻမꩻသွဉ်သင်အတွိုင်ꩻ လွောက်ꩻနာႏလွဉ်ꩻသွော့၊ ကွပ်လွောက်ꩻနာႏလွဉ်ꩻတဲင် ယိုခါဆုဲင်ꩻတာႏ ချမ်ꩻသာႏသုခ ယံကလꩻလွဝင်ꩻကွိုနဲး တရာꩻနာႏအပေါင်ꩻ သူႏတောႏကောင်ꩻသီးယာ တဖုံႏတဖင်ႏ တင်ႏကနန်ႏတဉ်ဟွေး။