သာႏသနာႏဆုတ်ယုတ်
သာႏသနာႏဆုတ်ယုတ်အီအကျောင်ꩻ[မွဉ်းဖျင် | မွဉ်းဖျင်အရွီးခိုႏ]
ကထီႏဗာႏယိုခါ မီႏအွဉ်ႏနယ်ဗာႏ အချက်နဝ်ꩻ နှဲးဆလယိုထွူနော။ (၁) လိုꩻကျောင်ꩻသီး တသွဉ်တဝ်းလိတ်လုဲꩻ (၂) ဒါႏထွူလိတ်တဲ့ သွဉ်သင်ဖေႏတောတဝ်းဝင်ꩻ (၃) လိုꩻပေႏအဝ်ႏအုံကျောင်ꩻသဲင်ꩻစွဉ်ႏလဲ့ တသေတဝ်းဘာႏသာႏတရာꩻ (၄) လိုꩻကျောင်ꩻသီးလဲ့ ခွုမ်မာꩻအာငါႏ လိုꩻလမ်းထာꩻခွုမ်ထာꩻမာꩻ (၅) လိုꩻဒါႏယကာႏသီး စေႏတနာႏကုဲအီဒါႏ ထာꩻခွုမ်ထာꩻမာꩻ။ ===လိုꩻကျောင်ꩻသီး ပွိုးစွဉ်ႏတသွဉ်တဝ်းလိတ်လုဲꩻ=== နဝ်ꩻမꩻ သာႏသနာႏဆုတ်ယုတ်အီဗာႏကရိုꩻနဝ်ꩻ - သွဉ်တဝ်းလိတ်နဝ်ꩻမꩻ ဒါႏလွတဝ်းလိတ်၊ ကထင်ႏဒါႏတဝ်းလိတ်နဝ်ꩻခါ ဟော်ꩻပျော်ꩻသွဉ်သင် ဩဝါဒဆုံꩻမꩻတကာႏသီးလဲ့ တဒါႏတဝ်း၊ တပဲ့ꩻသီးအလောင်းဖုံႏလဲ့ တဒါႏတဝ်း၊ ဟော်ꩻပျော်ꩻသွဉ်သင် ဩဝါဒ ဆုံꩻမꩻဖေႏ ကထင်ႏဒါႏတဝ်းနဝ်ꩻလဲင်ႏခါ တကာႏသီးလဲ့ရွိုင်ꩻ၊ တပဲ့ꩻသီးလဲ့ရွိုင်ꩻ၊ ဒေါ့ꩻဖေႏတကာႏတပဲ့ꩻသီးလဲ့ တကာႏတပဲ့ꩻသီး တနာႏတဝ်း၊ သွင်ꩻဖွီဒျာႏနဝ်ꩻသွူ။ လိုꩻကျောင်ꩻသီးနဝ်ꩻ ထွာဒုံစော့ꩻ ရပ်ရာႏစော့ꩻ ဒုံကဲႏဒုံလိုꩻတန်တမျိုꩻနေနေ၊ လိုꩻကျောင်ꩻသီး ဆုံꩻမꩻသွဉ်သင် ဟော်ꩻပျော်ꩻမီႏဒါႏနဝ်ꩻ တကာႏတပဲ့ꩻသီး လိမ္မာႏလက်ꩻလဲဉ်လွဉ်ဒျာႏ၊ လိုꩻကျောင်ꩻသီး မီႏဖျင်ꩻလဲ့ တကာႏတပဲ့ꩻသီးတဲ့ ထွာဒျာႏလိုꩻဖျင်ꩻဖုံႏနဝ်ꩻသွူ။ ယိုခါ ကထီႏဗာႏနဝ်ꩻ လိတ်လင်လဲ့ တသွဉ်တဝ်း၊ အမျိုꩻသာꩻ ဘာႏသာႏလိတ်ပအိုဝ်ႏလဲ့ တသွဉ်တဝ်း။
အမိဉ်ႏဒါႏစွဉ်ႏလိတ်လင်လဲ့ လိတ်လင်ကို ကပါဒါႏ အဓိပ္ပါယ်ႏတွမ်ႏ ကအဝ်ႏလိုႏသေဒါႏ အချက်နဝ်ꩻ တသေနာႏတဝ်း၊ မဉ်ႏသေနာႏ မဉ်ႏထူႏဒါႏ အချက်နဝ်ꩻမꩻ ရိုꩻဗာႏသေနာႏလိတ်လင်၊ ရိုꩻဗာႏ ဟော်ꩻဒါႏလိတ်လင်နဝ်ꩻသွူနော၊ ဟော်ꩻလိတ်လင်လဲ့ အဓိပ္ပါယ်ႏ တသေလွတဝ်း၊ ကဟော်ꩻထွူတရာꩻလင် (တရာꩻမန်း တရာꩻဖြဝ်ꩻ)လဲ့ အဒေါ့ꩻထာꩻမုဲꩻ အဓိပ္ပါယ်ႏနုဲးမုဲꩻလဲ့ တသေနာႏတဝ်း၊ အဟော်ꩻသားမဉ်ႏလဲ့ မဉ်ႏတသေနာႏတဝ်းနဝ်ꩻခါ ကနာႏသားသီးလဲ့ အမျိုꩻသေနာႏတမွေးတဝ်း၊ နီနမ်းယို မဉ်ႏစဲင်း မဉ်ႏသေနာႏနဝ်ꩻမꩻ ဟော်ꩻဖေႏဝင်ꩻ၊ ခြုဲင်းနယ်ဖေႏဝင်ꩻနဝ်ꩻ ဝင်ꩻသေနာႏနဝ်ꩻသွူနော။ ခေတ်ယိုခါ လိုꩻလမ်းသီးနဝ်ꩻ လိုꩻပေႏဖုံႏ ယံကဒါႏလွပညာႏ၊ ယံကဟော်ꩻဒါႏလိတ်တဲင် တဲႏထောင်ႏလွဝင်ꩻ လိတ်သွဉ်ကျောင်ꩻဖုံႏ (အိန်ကျောင်း) ကအောင်ႏမျင်ႏ ကတိုꩻတက်ဒါႏ အရပ်လဲ့အဝ်ႏ၊ တဲႏထောင်ႏထွူ ကကုဲချာထိုꩻဒါႏအရပ်လဲ့အဝ်ႏ၊ ကအောင်ႏမျင်ႏဒါႏအရပ်နဝ်ꩻ လိုꩻမူႏလိုꩻပေႏဖုံႏ ကဟော်ꩻဒါႏလိတ်နဝ်ꩻ အဝ်ႏအာလဲဉ်း၊ ရွဉ်ကအဝ်ႏဒါႏလိုꩻနဝ်ꩻ အပိုအလီꩻဖုံႏ လွေꩻအွဉ်ႏအုံ ဝေင်ꩻကိုတဲင် လွေꩻအွဉ်ႏသွဉ်လွလိတ်ဖုံႏ၊ ကအောင်ႏလဲဉ်း ကွတ်ꩻတန်ꩻအတန်ꩻတဆီ ထင်ႏတငါ တက္ကသိုလ်ႏလဲ့ အဝ်ႏလဲဉ်း၊ ကမာꩻအစိုꩻရထာꩻမာꩻလဲ့အဝ်ႏလဲဉ်း၊ တအောင်ႏတဝ်းစွဉ်ႏလိတ်တန်ꩻတန်လဲ့ ဟော်ꩻလိတ် တဲမ်းလိတ် ကကျလဲဉ်းလိုꩻကျောင်ꩻနဝ်ꩻလဲ့ အဝ်ႏလဲဉ်း၊ ဝင်ꩻလိုꩻလမ်းနဝ်ꩻ ပညာႏရေꩻ စီꩻပွာꩻရေꩻ ယံကထင်ႏထိုနဝ်ꩻ မွူးခေ့ꩻမွူးလေ အချိန်ႏတရွေꩻတဝ်း အားထုတ်ကျိုꩻစာꩻလွလဲဉ်း စွုမ်ႏရပ်ရပ်စွုမ်ႏရာႏရာႏနဝ်ꩻ ထီႏဗာႏလဲဉ်း၊ ထင်ႏတွိုႏတဲင် နီလိုꩻကျောင်ꩻသီးနဝ်ꩻ ပညာႏရေꩻအတွက် ကအီႏသွဉ်ဖေႏလိုꩻပေႏလိတ်လဲ့ တအဲဉ်ထဝ်းဒွုမ်၊ ပွိုးပီးနဝ်ꩻမꩻ သာႏသနာႏနဝ်ꩻ တနီꩻတစိꩻ တလာတစိꩻ ကွဲးခေ့ꩻခေ့ꩻလွဉ်နဝ်ꩻသွူ။ သာႏသနာႏကခေ့ꩻနဝ်ꩻ ပါꩻမုဲꩻမာꩻခေ့ꩻ၊ လိုꩻကျောင်ꩻမာꩻခေ့ꩻ၊ သာႏသနာႏကလေနဝ်ꩻ ပါꩻမုဲꩻမာꩻလေ လိုꩻကျောင်ꩻမာꩻလေ၊ မာꩻလေအကျောင်ꩻနဝ်ꩻ ဟဝ်ယူႏတွေꩻငါႏသွူနော။
ဒါႏထွူလိတ်လဲ့ တသွဉ်ဖေႏတဝ်းဝင်ꩻ[မွဉ်းဖျင် | မွဉ်းဖျင်အရွီးခိုႏ]
ကရိုꩻနဝ်ꩻ - ခေတ်ယိုခါ ထွာလိုꩻကျောင်ꩻ ရဟန်ꩻသာႏမဏေႏသီးလဲ့ လွေꩻဝင်ꩻခမ်း လယ်ႏဝင်ꩻထီတဲင် သွဉ်လွလိတ်လုဲꩻဖုံႏနဝ်ꩻ အာငါႏ၊ ယဟန်ႏနဝ်ꩻ သွဉ်လောကုတ်ဖဲ့ꩻလဲ့အဝ်ႏ၊ ယဟန်ႏနဝ်ꩻ သွဉ်လောကီꩻဖဲ့ꩻလဲ့အဝ်ႏ၊ ကသွဉ်လွနုဲးနဝ်ꩻခါ ကဒါႏသဲင်ꩻလဲ့အဝ်ႏ၊ ကဒါႏတောႏတောႏတန်ႏတန်ႏလဲ့အဝ်ႏ၊ တဒါႏတဝ်း ဖျုံꩻတကာႏရွဉ် မာꩻလို့တကာႏရွဉ်လဲ့အဝ်ႏနဝ်ꩻ ထီႏဗာႏ၊ ဟွုန်ဗာႏနော၊ လောကုတ်ဖဲ့ꩻလဲ့နဝ်ꩻ၊ လောကီꩻဖဲ့ꩻလဲ့နဝ်ꩻ ကဒါႏသဲင်ꩻဒါႏပုဂ္ဂိုလ်ႏ ဓမ္မာစရိယ အတန် အတလောင်ꩻ အပေႏတန်ꩻသားလဲ့အဝ်ႏ၊ ကအောင်ႏသဲင်ꩻဒါႏ လစ်ꩻငတ်ꩻသူနွတ်ꩻတန်ꩻသားလဲ့နဝ်ꩻ ကထွိုင်ႏတွိုႏသဲင်ꩻချာ ဆရာႏသမာꩻထျꩻနဝ်ꩻခါ ကအီႏသဲင်ꩻသွဉ်ဖေႏ လိုꩻပေႏလိတ်လုဲꩻနဝ်ꩻ တထီႏတဝ်း၊ သဲင်ꩻပျꩻနယ်ဗော့ꩻ အမာႏနနုံꩻ အမာႏနစွဲႏ ဆရာႏသမာꩻထျꩻ ဆရာႏသမာꩻလောင်း၊ တကာႏထျꩻ တကာႏလောင်းနဝ်ꩻရွုမ်ꩻတဲင် အခိန်ႏလို့ငခြေင်ဗော့ꩻဒျာႏ၊ ကွပ်နဝ်ꩻမꩻ ဆရာႏတောႏတပါꩻဒေါ့ꩻနုဲးယိုနဝ်ꩻ ဟွုန်ဗာႏဖို "သော့ꩻဖေႏအဒေ့ꩻထွူတဲင် ကျောင်ႏဝုဲးထာꩻ လိုꩻဆကီ၊ ဝါႏဗင်ႏနဝ်ꩻ ထိုလဲဉ်းဝါႏမွူး၊ ဆဲင်ꩻထုံꩻပေႏနဝ်ꩻ လဲဉ်းဆဲင်ꩻထုံꩻတန်ဆကီ" အဒေါ့ꩻနုဲးနဝ်ꩻ၊ ဆရာႏတောႏကဒေါ့ꩻငဝ်းပွုမ်ႏခွိုင်ꩻနဝ်ꩻ နုညံꩻငါႏ၊ မီႏနုဲးလိတ်တဲမ်းသား ငဝ်းပွုမ်ႏခွိုင်ꩻနဝ်ꩻ "အဗွေႏဖေႏအံႏအဆာႏ၊ အဲင်ႏချာအဗွေႏ"မဉ်ပွုမ်ႏခွိုင်ꩻဖေႏနုဲးနဝ်ꩻထွူနော။
ကထင်ႏလွေꩻဗာႏ ဝင်ꩻခမ်းဝင်ꩻထီတဲင် အဟွုန်အထီႏဗဟုသုတကထင်ႏအဝ်ႏ၊ ကထင်ႏဟော်ꩻဒါႏလိတ်လုဲꩻပေႏ၊ ပညာႏပေႏ ကထင်ႏအဝ်ႏတဖြီးတဖြဝ်းနဝ်ꩻ ဆရာႏကမျောက်သေꩻခါꩻ သာႏမဏေႏရဟန်ꩻကေꩻဇူꩻ၊ ဆရာႏကပသာဖေႏ ဝင်ꩻခမ်းဝင်ꩻထီကေꩻဇူꩻ၊ ဆရာႏကထောက်ပံ့ဖေႏ ထီꩻဝီꩻခင်ႏဖါႏ သင်္ကန်ꩻရွဉ်စုတ်ꩻရွဉ်စုဲႏကေꩻဇူꩻ၊ ကဟော်ꩻကပျော်ꩻဖေႏကေꩻဇူꩻနဝ်ꩻ တသေချာတဝ်းဒွုမ်၊ သေစွဉ်ႏဒျာႏ အမာႏနနုံꩻ အမာႏနစွဲႏ အီႏဆဲ့ꩻဗာႏထာꩻမုဲꩻ၊ အီႏနွီဗာႏထာꩻမုဲꩻ၊ အီႏသတ်ဗာႏထာꩻမုဲꩻနဝ်ꩻရွုမ်ꩻတဲင် တွမ်ႏဆရာႏသမာꩻနဝ်ꩻ ကွယ်ꩻဝင်ꩻ၊ တတဲ့ꩻတဝ်းဒွုမ်ဝင်ꩻနဝ်ꩻမꩻ ကအဝ်ႏလိုႏပို့ချ သွဉ်သင်ဖေႏဗာႏ လိုꩻပေꩻနဝ်ꩻ တပို့ချသွဉ်သင်တဝ်းဒွုမ်တဲင် ထွာတောဒျာႏ လိုꩻအွိုးနဲးအွိုးနဲးသားနဝ်ꩻမꩻ သာႏသနာႏ တလေတဝ်း၊ ဆုတ်ယုတ်ဒွါႏတမျိုꩻနေနေထွူနော။
ဗွေႏဗွန်ယဟန်ႏနဝ်ꩻ လိုꩻပေႏလိတ်လဲ့ တသွဉ်ဖေႏတဝ်း၊ တပျꩻဖေႏတဝ်း၊ အတပဲ့ꩻ ကဒါႏသဲင်ꩻလိတ်လုဲꩻသားနဝ်ꩻလဲ့ ယံကသွဉ်ဖေႏ လိုꩻပေႏလိတ်လုဲꩻနဝ်ꩻ တအပ်တဝ်း၊ အွဉ်ႏစွꩻလွင်ꩻ အွဉ်ႏလော်လယ်ႏဒျာႏ လိုꩻပေႏတဲင် သျင်ႏပေႏ ကော်ပီႏဖုံႏ လော်လဲႏထာꩻ ဝင်ꩻခြံကိုတဲင် ထူႏအံႏဝင်ꩻသေင်ႏရောင်ꩻသေင်ႏရာႏ၊ ယားကုဲဝင်ꩻထာꩻမွူးနုဲးနဝ်ꩻလဲ့အဝ်ႏ၊ ကွပ်နဝ်ꩻမꩻ ပါꩻတဖြာꩻဒေါ့ꩻနုဲးယိုနဝ်ꩻ ဟွုန်ဗာႏဖို "လွူးဖြားနမ်းနဝ်ꩻ ထင်ႏလွူးဖြားဒျာႏ အွိုးကျောင်ꩻ"တဲ့၊ ပါꩻတဖြာꩻ ကရိုꩻငဝ်းအဓိပ္ပါယ်ႏနဝ်ꩻ လွူးနမ်းလွူးသက်အတွက် မီႏအုံလမ်း လွူးချာအနမ်းနဝ်ꩻ တဖြားလꩻတဝ်း၊ မော့ꩻထာꩻဒုက္ခ မော့ꩻထာꩻဆင်ꩻရယ်ꩻ အငမ်းနုဲးနဝ်ꩻတဲင် ထင်ႏလွူးသော့ꩻအနမ်း ကျောင်ꩻကို၊ သာႏသနာႏကို၊ ပရိယတ် ပဋိပတ်ထာꩻမုဲꩻလဲ့ တမာꩻတဝ်း အရေႏရွဲႏနုဲးနဝ်ꩻတဲင် ဒေါ့ꩻနော။
လိုꩻပေႏအဝ်ႏအုံကျောင်ꩻသဲင်ꩻစွဉ်ႏလဲ့ တသေနာႏဝ်း ဘာႏသာႏတရာꩻ"[မွဉ်းဖျင် | မွဉ်းဖျင်အရွီးခိုႏ]
ကရိုꩻနဝ်ꩻ - ဗွေႏဗွန်သီး ကသွဉ်ဖေႏလိုꩻပေႏလိတ်နဝ်ꩻ ခေတ်လဲဉ်းချာငါႏ၊ ပွိုးအကျောင်ꩻနုဲးမုဲꩻတဲင် ဗွေႏဗွန်သီး ကသွဉ်ဖေႏလိုꩻပေႏလိတ်ယိုခါ သွဉ်ဖေႏစွဉ်ႏ ပရိတ်တန်ပါဠိတော်၊ မင်္ဂလာႏသုတ်ပါဠိတော်ရွုမ်ꩻ၊ ကထင်ႏတွိုႏအနက် အဓိပ္ပါယ်ႏနဝ်ꩻ တခြုဲးနယ်ဖေႏတဝ်း၊ တသွဉ်ဖေႏတဝ်း၊ ကွပ်စွဉ်ႏလိုꩻပေႏ တသေနာႏတဝ်း ပရိတ်တန်အဓိပ္ပါယ်ႏ၊ မင်္ဂလာႏသုတ်အဓိပ္ပါယ်ႏ ဘုရာꩻဂုဏ်ႏ တရာꩻဂုဏ်ႏ သံဃာႏဂုဏ်ႏအဓိပ္ပါယ်ႏ တွမ်ႏဘုရာꩻဗုဒ္ဓဝင်ႏအဲဉ်ႏအဲဉ်ႏနဝ်ꩻမꩻ အသꩻလဲ့ တဝင်ႏစာꩻသော့ꩻတဝ်းလိတ်ကို၊ တသေနာႏတဝ်းလဲ့ အငမ်းအဆရာႏသမာꩻတဲင် အမဲ့နဝ်ꩻ အဝ်ႏထွားဒျာႏနားရီႏ၊ မာꩻလို့အီဒျာႏအခိန်ႏရွုမ်ꩻ၊ ပါဠိကအဝ်ႏအတွိုင်ꩻ ဗေင်ႏတခို့ဗေင်ႏတအာ ကူႏကာႏရောင်ရင်ဒျာႏအငဝ်း၊ အဓိပ္ပါယ်ႏထာꩻမုဲꩻလဲ့ တသေတဝ်း၊ အခိန်ႏလို့နားရီႏတွိုႏဒျာႏနဝ်ꩻသွူ။ ယဟန်ႏနဝ်ꩻ ဗွေႏဗွန်တသွဉ်ဖေႏတဝ်း၊ အသွꩻချင်ꩻချင်ꩻ တဖြာꩻတွမ်ႏတဖြာꩻ သွဉ်ချာဖေႏဗာႏဝင်ꩻတဲင် ထွာဒျာႏမာႏမာႏမီႏမီႏနဝ်ꩻလဲ့ အဝ်ႏ၊ ကွပ်ထွာနုဲးနဝ်ꩻမꩻ လိုꩻပေႏဖုံႏနဝ်ꩻ အဝ်ႏအုံကျောင်ꩻ ကထင်ႏသဲင်ꩻတွိုႏလမ်းနဝ်ꩻ ဘာႏသာႏရေꩻသဘော်ꩻတရာꩻ တသေနာႏတဝ်းတဲင် ကထင်ႏတန်တနီꩻခါ ကထင်ႏထွာလွဉ်ချာ တကာႏနဝ်ꩻ အွꩻဒဝ်ဆွဉ်းယာလံ၊ တောႏထာꩻ၊ ဖို့ꩻဖိုး၊ ထွာတခွန်ꩻစွန်၊ ကထွာအဗွေႏဗွန် အဆရာႏလဲ့ ဆုံꩻမꩻတလꩻတဝ်း၊ တနာႏတဝ်းဒွုမ်နဝ်ꩻမꩻ ထုမ်ႏရန်ႏချာအဆရာႏ အဗွေႏဗွန်၊ နဝ်ꩻလဲ့ တဆေ့ꩻတဝ်း၊ အဝ်ႏဟွုန်ဗာႏအာနော။
လိုꩻကျောင်ꩻသီး ခွုမ်မာꩻနုဲးဒျာႏ လိုꩻလမ်းထာꩻခွုမ်ထာꩻမာꩻ[မွဉ်းဖျင် | မွဉ်းဖျင်အရွီးခိုႏ]
ကရိုꩻနဝ်ꩻ - ခေတ်အတွင်ꩻယိုလဲင်ႏခါ ကထီႏဗာႏနဝ်ꩻ တွမ်ႏလိုꩻကျောင်ꩻသီး တစပ်ဆွိုင်ꩻတဝ်း ထာꩻခွုမ်ထာꩻမာꩻနဝ်ꩻလဲ့ ခွုမ်မာꩻဒျာႏနဝ်ꩻလဲ့ ထီႏဗာႏ၊ ဆို့ꩻကျောင်ꩻ ဆို့ꩻတရွပ် ရွာꩻသေင်ႏ ရွာꩻပဲဉ် မာꩻလက်သမာꩻ မာꩻစင်းခံꩻ မာꩻစင်းလေက်ꩻ တေန်ꩻမေႏ တွက်ဂျိုဟ်ႏသက် ဂျိုဟ်ႏသုံꩻ ကွင်ꩻဇာႏတာႏ တောက်ꩻလူးဖုဲꩻ လဲင်းမောင်း တဲ့ꩻထုံ ဆꩻစက် ဖြေꩻသွို့ꩻ ဖြေꩻခြံ ဖြေꩻလုဲး ဖြေꩻဗေဟံႏ ဖြေꩻဖက်ခေါ် ဖြေꩻဗွူ ဖြေꩻဗွူကလာꩻ ဖြေꩻသဲင် ဖြေꩻခံꩻ ဖြေꩻစာကူꩻကားနုဲးလိုꩻလမ်းနဝ်ꩻ ထီႏဗာႏဟွုန်ဗာႏ၊ မဉ်ႏမာꩻဒါႏနုဲးနဝ်ꩻမꩻ ထုမ်ႏရွဉ်မဉ်ႏကျမꩻ တကာႏမဲ့မန်ႏဖြေင်းသား၊ မဲ့မန်ႏချိုသား၊ မဲ့မန်ႏတသီးသား၊ ကတူႏထွူႏသား သာႏသနာႏမဲ့ခေ့ꩻသားဖုံႏနဝ်ꩻ ထင်းဒျာႏ အဗွေႏဗွန် အဗွေႏစင်ꩻ သဗ္ဗညု၊ "နီဗွေႏဗွန် နီဗွေႏစင်ꩻနဝ်ꩻ ဉာဏ်ႏအဝ်ႏငါႏ၊ ထာꩻဒါႏတန်ငါႏ"သမ်းအံႏဖြာႏထဲင်းနုဲးနဝ်ꩻသွူ။
အတကာႏ ကထင်ႏသော့ꩻဖေႏ မဲ့မန်ႏသိဉ်နဝ်ꩻခါ အဗွေႏဗွန် အဗွေႏစင်ꩻနဝ်ꩻလဲ့ အသွီႏကုဲ အသွီႏဗား ထင်ႏစွဉ်ႏတဝီးနာ၊ ငန်ꩻဗာႏထꩻ သူရဿတီႏနိုꩻတဲင် သတ်ထဲင်းထဲင်းစွဉ်ႏဒျာႏ၊ ယိုနဝ်ꩻ တကာႏကျွိုက်၊ တကာႏမီႏကျွိုက်နဝ်ꩻမꩻ လူႏတန်ꩻဒါႏနပွာꩻ၊ ဒါႏနမီႏပွာꩻနဝ်ꩻမꩻ သာႏသနာႏလေ ထင်းနုဲးနဝ်ꩻတဲင် သတ်ထဲင်းထဲင်းစွဉ်ႏဒျာႏနဝ်ꩻသွူ။ ဒါႏနလူႏတန်ꩻနွောင်ꩻနဝ်ꩻမꩻ သာႏသနာႏလေ တမွေးတဝ်းနော၊ သေစဲင်းနားလယ်ႏ သာႏသနာႏအကျောင်ꩻတဲင် ကံဒျာႏ ကျင်ꩻဒျာႏ လွောက်ꩻနာႏဒျာႏ ဘုရာꩻဟော်ꩻနဝ်ꩻမꩻ သာႏသနာႏလေ၊ သာႏသနာႏထင်ႏထိုအကျောင်ꩻနဝ်ꩻ လွတ်ꩻထိုꩻမဲ့မန်ႏဖြေင်းတဲင် သော့ꩻလုဲႏသွော့ မဲ့မန်ႏဗွာနဝ်ꩻ ထွားစဲင်းစဲင်းနော။
တကာႏသီး စေႏတနာႏကုဲအီဒါႏ ထာꩻခွုမ်ထာꩻမာꩻ[မွဉ်းဖျင် | မွဉ်းဖျင်အရွီးခိုႏ]
ကရိုꩻနဝ်ꩻ - ဗွေႏဗွန်ပေႏ၊ ဗွေႏစင်ꩻပေႏ သျင်ႏတန်ဖုံႏ ယဟန်ႏနဝ်ꩻ လိတ်လုဲꩻလဲ့ တထွားတဝ်း၊ တသွဉ်တဝ်းတဲင် တကာႏသီး စေႏတနာႏကုဲအီဒါႏ ထုမ်ႏတွမ်ႏလောလဲင် (လောတလီꩻ) လဲႏထာꩻလုဲးသောင် သွို့ꩻထျꩻ ခြံထျꩻတဲင် မာꩻငဝ်းတဲက်၊ အွဉ်ႏထောင်ႏမန်ႏ တသေန်ႏလျောႏတဝ်း လိုꩻမူႏလိုꩻပေႏခြာလဲ့ နွို့ထန်ႏလွေꩻသဲင်ꩻ ဒေါ့ꩻရီငဝ်းလိုꩻလမ်း၊ ဒုံႏတိန်ႏထွို့ꩻခါယာ၊ ဆွတွမ်ႏနားရီႏ ဆွစူသွို့ꩻ ဆဲင်တွမ်ႏတသီႏပုံႏတဲင် တလမ်းနွို့တလမ်းထန်ႏ လယ်ႏစာတသီႏနုဲးနဝ်ꩻဖုံႏနဝ်ꩻ တကာႏသီးစေႏတနာႏကုဲအီဒါႏ၊ တကာႏအမျာꩻ စေႏတနာႏမီႏကုဲနဝ်ꩻခါ သာႏသနာႏဆုတ်ယုတ်အီနဝ်ꩻသွူ။ နဝ်ꩻမꩻ ဘုရာꩻဟော်ꩻသေꩻခါꩻနုဲးယိုနဝ်ꩻသွူ။ "အပ္ပသန္နာနံ ပသာဒါယ၊ ပသန္နာနံ ဘိယျောဘာဝါယ။ အဓိပ္ပါယ်ႏပအိုဝ်ႏ = ကောတကေညိုႏတဝ်းဒွိုန်းက တကာႏသီးနဝ်ꩻ ယံဖေႏကကေႏညိုႏတဲင် လွေꩻသဲင်ꩻအုံအဝ်ႏ ဒေါ့ꩻဖြဝ်ႏဗာႏ၊ ကအဝ်ႏကေညိုႏထွူလဲဉ်း တကာႏသီးနဝ်ꩻ ယံဖေႏကကေညိုႏထဲင်းထဲင်းနဝ်ꩻ လွေꩻသဲင်ꩻအုံအဝ်ႏ ဒေါꩻ့ဖြဝ်ႏဗာႏ၊ ပွိုးပီးနဝ်ꩻမꩻ ထာꩻလွေꩻသဲင်ꩻ ထာꩻအုံအဝ်ႏ ထာꩻဒေါ့ꩻဖြဝ်ႏယိုနဝ်ꩻ လိုꩻကျောင်ꩻသီး အဝ်ႏလိုႏဆင်ႏချင်ႏငါႏနော။[၁][၂]