အင်္ဂါႏနီꩻ ကူꩻပရိနိဗ္ဗာန်ႏ

အဝ်ႏ ဝီခီပီးဒီးယား ကို

နီဗွေႏဘုရာꩻ သက်တောႏလꩻ (၂၉)နေင်ႏနဝ်ꩻ၊ တောႏထွက်ထန်ႏတခြာ ကျင်ꩻဒုက္ကရစရိယာႏ (၆)နေင်ႏ၊ သက်တောႏလꩻ (၃၅)နေင်ႏနဝ်ꩻ ထွာဘုရာꩻနဝ်ꩻသွူ ၊၊ထွာဘုရာꩻထွူတဲင် အုံခြေင်တဝ်းထာꩻစိꩻစိꩻ၊ တဝေင်ꩻလွေꩻ တဝေင်ꩻအုံ တဒုံနွို့တဒုံထန်ႏ၊ ကျံႏချွစ်ကျံႏကယ်ႏ လယ်ႏဟော်ꩻတရာꩻ၊ နီꩻနာꩻခေ့ꩻလေ ထွူသေမအောဝ်ႏဒါႏ ညစွဉ်ႏ(၄၅)ဝါႏ (၄၅)နေင်ႏနဝ်ꩻသွူ ၊၊သက်တောႏလꩻ(၈၀)  မဟာႏသက္ကရာဇ် -၁၄၈ ဗာႏ၊ ဒဲဉ်ရုတ်ꩻလာဗွေ အင်္ဂါႏဟာ၊ မွူးကွို့ꩻနာꩻလွဉ်ꩻ ထာꩻအီႏလေခိန်ႏနဝ်ꩻ ကူꩻခန်းဒျာႏနိဗ္ဗာန်ႏ၊ ကုသိနာႏရုံႏခမ်း၊ အင်းချင်းမွူးခါႏ ခွန်မလ္လာႏသီး ဥယျာဉ်ႏခြံကို နဝ်ꩻသွူ ၊၊

တောင်ꩻခါꩻ =

  • ၁၊၊ နီဗွေႏဘုရာꩻ ကလွဉ်ကူꩻနိဗ္ဗာန်ႏ ကုသိနာႏရုံႏခမ်းကိုနဝ်ꩻ၊ ရေႏရွယ်ႏချက် အဝ်ႏသွံချက်၊ သွံချက် ကရိုꩻနဝ်ꩻ

(က) မဲဉ်ဟော်ꩻနယ်ပါ မဟာသုဒဿနသုတ္တန်ႏ (ခ) မဲဉ်ကယ်ႏချွစ်ပါ သုဘဒ္ဒပုရဗိုဇ် (ဂ) မဉ်ႏဖန်းခွေဓာတ်တောႏသူꩻနဝ်ꩻရာꩻ ဒေါနပုဏ္ဏာႏသူꩻနဝ်ꩻမꩻ မာꩻခွꩻနွောင်ꩻရွို့ꩻရန်ႏ အီႏဝွေႏဖန်ႏဖေႏ ရေႏရွယ်ႏနုဲင်းနဝ်ꩻသွူ၊၊

  • ၂၊၊ နီဗွေႏဘုရာꩻ ကအဝ်ႏမွုန်နေတွင်ꩻ ကလꩻရီးရီးဝင်ꩻဖိုလ်ႏ(ကထွာဗာႏရီးရီးဝင်ꩻအရိယာႏပုဂ္ဂိုလ်ႏ)နဝ်ꩻ ဗွေႏကောဏ္ဍည နဝ်ꩻသွူ၊၊
  • ၃၊၊ နီဗွေႏဘုရာꩻ လဲင်ꩻအီႏကူꩻသွူ နိဗ္ဗာန်ႏမꩻ၊ သꩻဝီးသꩻဝꩻ ငမ်းထွꩻတဝ်းဘုရာꩻ ကလောႏနဲစ်လွဉ်ꩻထာꩻနဝ်ꩻ၊ "သုဘဒ္ဒ" သဲစ်ကတွိုႏလွဉ်တဲ့ လွေꩻထေ့ထွူစွဉ်ႏဘုရာꩻ၊ နာႏတရာꩻထွူ အားထွုတ်တရာꩻတွော့ꩻ၊ နီဗွေႏဘုရာꩻ အီႏကူꩻသွူ နိဗ္ဗာန်ႏလေလေႏ အခိန်ႏနဝ်ꩻ၊ ထွာနုဲင်းနုဲင်းခန်း ရဟန္တာႏ နဝ်ꩻသွူ၊၊ ကွပ်နဝ်ꩻမꩻ နီဗွေႏဘုရာꩻ အဝ်ႏမွန်တွင်ꩻ၊ ဆုဲင်ꩻသွတ်ꩻလဲဉ်းဝင်ꩻ ကထွာလꩻ ရဟန္တာႏနဝ်ꩻ "သုဘဒ္ဒ" ယိုသွူ၊၊
  • ၄၊၊ သုဘဒ္ဒယိုနဝ်ꩻ ဥပက(ဆာဝါ)သီးပိုတဲ့ "သုဘဒ္ဒ"တဲ့ တမွေးတဝ်း၊၊ ဟွုန်ဘုရာꩻကူꩻလဲဉ်း နိဗ္ဗာန်ႏတွော့ꩻ "ဘုရာꩻကူꩻလဲဉ်း နိဗ္ဗာန်ႏတဲင် နီမဲဉ်မာꩻတမုဲင်ꩻတဲ့ ကမ်းသꩻမာꩻဗာႏသွူ" လိုꩻတွူကဒေါ့ꩻရွိုင်ꩻဒါႏထာꩻ "သုဘဒ္ဒ"နဝ်ꩻတပါꩻတဲ့ တမွေးတဝ်း၊၊

သုဘဒ္ဒ"ယိုတပါꩻနဝ်ꩻ ပုဏ္ဏာꩻရွဉ်သားပို သုဘဒ္ဒ တပါꩻခေါ်ခေါ်ဒျာႏနဝ်ꩻသွူ၊၊

  • ၅၊၊ ထွာရဟန္တာႏ အဝ်ႏ(၃)မျိုꩻ

(က) ဘုရာꩻအဝ်ႏမွန်တွင်ꩻနဝ်ꩻ ဗုဲင်သျင်ႏ၊ ဘုရာꩻကူꩻနိဗ္ဗာန်ႏထွူမꩻ ဗုဲင်စင်ꩻ၊ အားထုတ်တရာꩻ ထွာရဟန္တာႏ၊၊ (ခ) ဘုရာꩻအဝ်ႏမွန်တွင်ꩻနဝ်ꩻ ဗုဲင်သျင်ႏခံႏစင်ꩻ၊ ဘုရာꩻကူꩻနိဗ္ဗာန်ႏထွူမꩻ အားထုတ်တရာꩻ ထွာရဟန္တာႏ၊၊ (ဂ) ဘုရာꩻ အဝ်ႏမွန်တွင်ꩻနဝ်ꩻ ဗုဲင်သျင်ႏခံႏစင်ꩻ၊ အားထွုတ်တရာꩻ ထွာရဟန္တာႏ ယိုသွံမျိုꩻ နဝ်ꩻသွူ၊၊[၁]

  • ငဝ်းလင်္ကာႏ
 လယ်ႏဟော်ꩻနယ်ပျꩻ       ချွစ်၀ွေႏနေႏ
  ဘုရာꩻနီဗွေႏ           ကကျိုꩻစာꩻ
  ခေ့ꩻလေနီꩻနာꩻ          မအုံဗာႏ
 လစ်ꩻဆီငတ်ꩻဝါႏ          န၀်ꩻတဲင်ခါ
 သက်တောႏဗွေငါ         သွစ်ꩻဆီတွင်ꩻ
 ခွန်သီန၀်ꩻရင်ꩻ           လွဉ်လဝ်းဖစ်
 မဟာႏသက္ကရာဇ်         ရျာꩻလစ်ꩻဆီ
 သွစ်ꩻဗာႏလွိုကီ         ဒဲဉ်ရုတ်ꩻဩ
 လာဗွေဟာနေား         နီꩻအင်္ဂါႏ
  အင်းချင်းမွူးခါႏ        ကိန်ꩻတလွာꩻ
  နီဗွေႏဘုရာꩻ           ကူꩻနိဗ္ဗာန်ႏ  
  မဲ့ထီရီႏထန်ႏ          လိုꩻပေါင်ꩻအာ
  ကယ်ꩻစွဉ်ႏမွိုးဖါ         အွဉ်ႏကုဲင်နꩻ
  တလွိုးပေႏသꩻ         စွုမ်ႏဖြာꩻဖြာꩻ
  ငွိုးရောင်လွထာꩻ        ခိုခိုမူႏ
  ခွေသွဉ်းထင်ႏယူႏ        နဝ်ꩻကိုခြာ
  တလွိုးလဲ့ပါ           ဟွုန်လောႏကာႏ
  ကီႏညိုႏမွေးငါႏ         ဗွေႏဘုရာꩻ
  စွုမ်းသွိုꩻလွဉ်ꩻထာꩻ       ပီတိပြုဲင်
  စူခုမ်ꩻဗိုတုဲင်           ယွော့ကီဒင်ႏ
  ရိုႏသေႏဝုဲင်ႏထင်ႏ      နီဗွေႏဘုရာꩻဩ။
   ဝုဲင်ႏဗာႏယိုနေား       ကူꩻနိဗ္ဗာန်ႏ
  သꩻဖူꩻဓိဋ္ဌာန်ႏ          ကရေႏခါꩻ
  မဂ်ဖိုလ်ႏတရာꩻ         ယံလꩻဗွေႏ
  တဏှာႏဝွဋ်ဟွေႏ        မခုဲင်ႏဖေ့
  ထီႏမေႏလောႏထေ့       နုဲင်းထာꩻသား
  လောဘသꩻဗား          မလို့စင်
  မဉ်ႏကွုတ်ထဲင်းဖျင်      စိုးမုဲင်ꩻယဝ်း
  ထာꩻကုဲင်ကွုတ်တဝ်း     မျတ်မွိုးဖါ
  ရွဉ်ခံꩻလွိုင်ႏအာ        သဲင်ꩻခြွေခြာႏ
  သေထုမ်ႏမာꩻဒျာႏ        ကုသိုလ်ႏခန်ꩻ
  သက်ထိုခြွိုင်ႏသန်ꩻ       ချမ်ꩻသာႏမွေး
  မိဉ်ႏသီန၀်ꩻဟွေး         တနီꩻခါ
  ဆာညနေင်ႏလာ         မမော့ꩻဗာႏ
  အ၀်ႏလွိုႏလွိုႏကာႏ        ထာꩻသာထဲ့
  နုဲင်းပါꩻဆိမ်ꩻမဲ့          ဗေင်ႏအွီႏထာꩻ
  ပေႏတန်အမျာꩻ          ဟွုန်လောႏကာႏ
  ဝင်ꩻမာꩻယံငါႏ           ပွယ်ꩻတရေꩻ
  သံႏဃာႏလꩻလွေꩻ         ကသမ်းအာ
  တရာꩻနာႏပါ           ကုသိုလ်ႏဖန်း
  အပါယ်ႏလစ်ꩻခမ်း       ကင်ꩻလွစ်လꩻ
  ဘွုံႏဟဝ်ရွစ်ဗꩻ         စွုမ်ႏဇာတ်ဇာတ်
  နိဗ္ဗာန်ႏခွꩻဓာတ်         ချမ်ꩻသာႏသေႏ
  ယံလꩻမွိုင်ဗွေႏ         ဆုတောင်ꩻနုဲင်းနဝ်ꩻဩ။[၂]

အာႏကွိုꩻ[မွဉ်းဖျင် | မွဉ်းဖျင်အရွီးခိုႏ]

  1. ဗွေႏဗွန်သီႏသဲင်ႏ (တဲမ်း) ဘာႏသာႏရေꩻဗဟုသုတ အမုဲင်(၃)
  2. ပအိုဝ်ႏလိတ်လုဲင်ꩻစွစ်ꩻလီတာႏအစွိုꩻ၊ အင်္ဂါႏနီꩻ ကူꩻနိဗ္ဗာန်ႏခန်ꩻ